¿Toʼo majuäni di manda ua ximha̱i?

NUʼÄ ʼBE̱ʼÄ MANʼÄ BIBLIA

“I o na ʼtse̱di ra Zithü nuʼu̱ miʼda i ʼbu̱kua ja ra ximha̱i” (1 Juan 5:19, Ra ʼDaʼyonhogui nangue ma Hmuhu̱ ra Jesucristo, ko yu̱ letra ge nuʼä ñuhü ja ya).

“ʼNe geʼä i zo̱kua ja ra ximha̱i na ʼtsu̱nʼtu̱ Ojä, ge di ʼtsombä na ʼbe̱fi ra Zithü” (1 Juan 3:8).

YU̱ NHO GE GÄ PÄHMU̱ʼÄ

Gä pähmu̱ hapu̱ bä fu̱di yu̱ hëi jaua ximha̱i (Apocalipsis 12:12).

Dä za̱ gä ka̱mfënihu̱ ge di nhokua ximha̱i (1 Juan 2:17).

¿HA DÄ ZA̱ GÄ ËʼKYËIHU̱ NUʼÄ ʼBE̱ʼÄ MANʼÄ BIBLIA?

Ähä, geʼtho:

• Nuʼä ra ʼtsu̱ʼtabi ä Zithü dä guadi. Nuʼä Zithü di manda ua ja ximha̱i pe̱ Jeoba ʼnaʼtä i ma ge di juadi. Nuʼä i ma ge di “juadi [...] ä Zithü” ʼne di hoki ga̱ʼtho ä nʼtso xi ʼyo̱ʼte (Hebreos 2:14, Traducción del Nuevo Mundo).

• Jesukristo geʼä ra ʼtsu̱ʼtabi ge bi huanhni Ojä. Jesús hingä ʼdaingüuiʼä di manda ua ximha̱i; geʼtho nuʼä Zithü dondoʼä ʼne di nhuëkse̱he̱. Ojä i ma ge nubu̱ ra ʼtsu̱ʼtabi ä Kristo: “Di nja na nyëmu̱i nangeʼä ʼna hogä jäʼi ʼne nuʼä hyoya [...]. Dä yäni nangeʼä ra nʼu̱mbi ʼne ra nsu̱i” (Salmo 72:13, 14).

• Ojä hingi ma yu̱ fe̱hni. Nuʼä Biblia i ëna ge Ojä “hindi nfe̱hni” (Hebreos 6:18). Njabu̱ geʼbu̱ jaʼä i ma Ojä ge dä ʼyo̱ʼte, di ka̱mfënihu̱ ge majuäni dä ʼyo̱ʼte (Isaías 55:10, 11). Ojä bi ma ge nuʼä ʼtsu̱ʼtabiua ximha̱i dä mba ma ʼueke (Juan 12:31).