¿ʼBe̱ʼä ra ʼTsu̱ʼtabi Ojä?

NUʼÄ ʼBE̱ʼÄ MANʼÄ BIBLIA

“Di nja na ʼtse̱di ʼne dä fädi ge na ʼtsu̱nʼtu̱ Ojä ge tätethoho na ʼtse̱di. ʼNe nuʼä Ojä di japi di nʼtsu̱ʼtabi [...] ga̱ʼtho yu̱ pa ʼne hinjämʼbu̱ dä guadi” (Lucas 1:32, 33, Ra ʼDaʼyonhogui nangue ma Hmuhu̱ ra Jesucristo, ko yu̱ letra ge nuʼä ñuhü ja ya).

YU̱ NHO GE GÄ PÄHMU̱ʼÄ

• ʼNa hogä ʼtsu̱ʼtabi geʼtho i sa̱ dä ze̱kju̱ ʼna ngü ʼnaju̱ (Isaías 48:17, 18).

• Mi ʼtsu̱tho dä ʼyo̱ʼte gä mʼbu̱hmu̱ gä njohyahu̱ nuʼbu̱ bi gohi ma ʼdaʼyo nuua Ha̱i, ya hindi nja yu̱ nza̱manʼu̱ (Apocalipsis 21:3, 4).

¿HA DÄ ZA̱ GÄ ËʼKYËIHU̱ NUʼÄ ʼBE̱ʼÄ MANʼÄ BIBLIA?

Ähä, geʼtho:

• Jesús bi ʼyüdi ʼbe̱ʼä dä ʼyo̱ʼte ra ʼTsu̱ʼtabi Ojä. Nuʼä bi xa̱mbi nuʼu̱ toʼo mi te̱nni ge dä ʼya̱ʼpä Ojä ge dä ëhë na ʼTsu̱ʼtabi ʼne dä ʼyo̱ʼte na pa̱ha̱ nuua Ha̱i (Mateo 6:9, 10). Kexʼtä bi ʼyüdi ʼbe̱pu̱ di nja nuʼä bi ma.

  Nuʼbu̱ mi nʼyoua Ha̱i, Jesús bi ʼuini nuʼu̱ mi tümanthühü, bi ʼyo̱the yu̱ nza̱manʼu̱ ʼne bi ünni maho̱nʼä na te nuʼu̱ xi dü (Mateo 15:29-38; Juan 11:38-44). Geʼtho geʼä dä manda nubu̱ ra ʼTsu̱ʼtabi Ojä, njabu̱ bi za̱ bi ʼyüdi ʼda yu̱ hogä nʼto̱ʼte ge dä ʼyo̱ʼte ra ʼTsu̱ʼtabi Ojä pa yu̱ jäʼi (Apocalipsis 11:15).

• Nuʼä ʼbe̱ʼä i njaua ximha̱i di jakju̱ gä pähmu̱ ge ya mi ʼtsu̱tho dä ëhë ra ʼTsu̱ʼtabi Ojä. Jesús bi ma ge ante ge nuʼä ra ʼTsu̱ʼtabi Ojä dä hä ra mʼbu̱manho nuua Ha̱i, mʼbe̱ʼto di nja yu̱ su̱i, yu̱ thühü ʼne yu̱ nhuänha̱i (Mateo 24:3, 7).

  Geʼu̱ yu̱ hëi di hanthu̱ yu̱ pa di ʼbu̱hmu̱, njabu̱ di ka̱mfënihu̱ ge nuʼä ra ʼTsu̱ʼtabi Ojä mi ʼtsu̱tho di hoki ga̱ʼtho.