Dä mi fa̱xä ni kongregasion

Ga̱ʼtho na noho ra ximha̱i yu̱ miyonetho yu̱ jäʼi di thänneʼä Jeoba nubu̱ ja yu̱ kongregasion. ʼNa ngü ʼna yu̱ ʼyëʼkyëi te̱nnu̱ yu̱ nʼtëdi ʼne yu̱ nʼtsofo pa ma üni, ʼne emme di johya ge honi ʼbe̱pu̱ ge dä ma̱xu̱ yu̱ kongregasion. ¿Ha kextä gi johya nuʼbu̱ gi fa̱xä ni kongregasion?

1. ¿ʼBe̱pu̱ dä za̱ gi honʼä ni tiempo ʼne ni ʼtse̱di pa gi fa̱xä ni kongregasion?

Ga̱ʼthogähu̱ dä za̱ gä fa̱xu̱ ma kongregasionhu̱. Tengü, xi nubu̱ ni kongregasion ¿ha ʼbu̱pu̱ yu̱ kü ge xi ndäʼkyëi o ge hëmbä na nza̱manʼu̱? ¿Ha dä za̱ gi ze̱di pa gi sixpu̱ ja yu̱ mpe̱ti? ¿Ha dä za̱ gi ze̱di pa dä da̱nʼu̱ honi o gi ze̱di pa di paxʼtu̱ yu̱ ngü? ¿O gi ze̱di geʼbu̱ jaʼä manʼna honi? (Dä mi nu Santiago 1:27). Kextä dä za̱ gä fa̱xu̱ ma kongregasionhu̱ nuʼbu̱ pa njoki o pa mʼbeʼte nuʼä Ngü Mpe̱ti, o kextä nubu̱ pa ma hoki hapu̱ xi nʼtsoni. Njoʼo toʼo o̱rkähu̱ ʼtse̱di gä fa̱xu̱ ma Ngü Mpe̱tihu̱; pe̱ di o̱thu̱ ko mpa̱ha̱thoho geʼtho di nehu̱ʼä Ojä ʼne nuʼu̱ ma kühu̱ (Salmo 110:3).

Nuʼu̱ yu̱ Testigo ge ya xi nxixña xi ngü ʼbe̱pu̱ dä za̱ dä fa̱ʼtsi nuʼu̱ yu̱ kongregasion. Nuʼu̱ yu̱ kü ge ʼte̱nnu̱ yu̱ nʼtëdi bä ʼyëpu̱ ja Biblia dä za̱ di sierbo ministerial ʼne mʼbe̱fa dä za̱ di ansiano ge kongregasion. Ga̱ʼtho yu̱ kü yu̱ nʼyohu̱ ʼne yu̱ bo̱mbe dä za̱ manʼna di predika, dä za̱ di mpe̱fi tengü ge prekursor. ʼBu̱ʼu̱ ʼra yu̱ Testigo ge di mpe̱fi di hoʼku̱ yu̱ Ngü Mpe̱ti. ʼNe ʼbu̱ʼu̱ miʼra yu̱ kü ge pabu̱ miʼra yu̱ hnini pa di predika ʼne dä ma̱xu̱ yu̱ kongregasion ge bi jabu̱.

2. ¿ʼBe̱pu̱ dä za̱ gä fa̱xu̱ʼä kongregasion ko nuʼä mbe̱ti ʼne nuʼä ʼbe̱ʼä di pe̱su̱?

Nuʼä Biblia ma ge ja gä ëspähu̱ʼä Jeoba ko nuʼä di pe̱su̱ ge di muui (Proverbios 3:9). Emme di johyahu̱ nuʼbu̱ di honhmu̱ ma mbe̱tihu̱ ʼne nuʼä di pe̱su̱ pa gä fa̱xu̱ ma kongregasionhu̱ ʼne pa dä mba ʼyombi na Nhman Ojä ga̱ʼtho ra noho na nximha̱i (dä mi nu 2 Corintios 9:7). Nuʼä mbe̱ti di ünhmu̱ kextä pa nthoni pa dä mba fa̱ʼtsiʼu̱ yu̱ kü ge thohyu̱ ʼyänthi. Xi ngüʼu̱ yu̱ kü häkiʼtsu̱ nuʼä hängü tähä pa di ünʼä na donasion (dä mi nu 1 Corintios 16:2). Nuʼä mbe̱ti dä za̱ dä ja̱rbu̱ ʼtu̱kaja ge jabu̱ ja yu̱ Ngü Mpe̱ti o kextä dä za̱ dä ʼbe̱hni ʼna donasion nubu̱ internet nubu̱ pajina donate.jw.org. Nuʼä Jeoba ne ge gä ünhmu̱ hangüʼtsu̱ di pe̱su̱ pa gä fa̱xu̱ na ʼbe̱fi ʼne gä fa̱xu̱ mä kühu̱, ʼne di johya nubu̱ handi ge di o̱thu̱ ko mpa̱ha̱tho geʼtho ngübu̱ di ühmu̱ ge majuäni di nehu̱ʼä Jeoba.

GÄ PÄHMU̱ MANʼNA NANGEHNA

3. Dä za̱ gi ünʼä mfa̱ʼtsi ko nangeʼä gi pe̱ʼtsi

Nuʼä Jeoba ʼne Jesús emme di johya nuʼbu̱ handi nuʼu̱ toʼo di ho di mfa̱xte. ʼNa ra pa nuʼä Jesús bi hyanʼtä bi ʼyo̱ʼtä ʼna zu̱ ʼranxü nuʼbu̱ mi ünʼä ʼna donasion. Dä mi nuui Lucas 21:1-4 ʼne manhmi nangehna:

• ¿Ha mahyoni xi ngü mbe̱ti gä ünhmu̱ pa gä johyabähu̱ na mu̱iʼä Jeoba?

• ¿ʼBe̱ʼä mbënʼä Jeoba ʼne Jesús nuʼbu̱ handi ge di ünhmu̱ ʼna donasion ko mpa̱ha̱tho?

Pa dä za̱ gi pädi ʼbe̱pu̱ pa nthoniʼä mbe̱ti gi üni, dä mi nuui ä BIDEO. ʼNe mʼbe̱fa manhmi nangehna:

BIDEO: Gä yüsu̱ ma ʼye̱hmu̱ konʼä ʼna ra nʼtünni pa nuʼä Jeoba (4:47)

• ¿ʼBe̱ʼä ma mfa̱ʼtsi hänʼu̱ yu̱ kongregasion ga̱ʼtho ra noho na ximha̱i ko nangeʼu̱ yu̱ donasion di ünhmu̱?

4. Dä za̱ gi ünʼä ʼna mfa̱ʼtsi

Nuʼu̱ yu̱ mu̱di ʼyëʼkyëi bi mfa̱xte pa ge xti nhobu̱ hapu̱ mi thänne Ojä, pe̱ hingä ho̱ntho bi ünʼä mbe̱ti, kextä bi mpe̱fi. Dä mi nuui 2 Crónicas 34:9-11 ʼne manhmi nangehna:

• ¿Xiʼu̱ yu̱ israelita ʼbe̱pu̱ bi jamansü o bi fa̱di nuʼä “na ngüʼä Jeoba” hapu̱ mi pa nthänne?

Nuya gä pähmu̱ ʼbe̱pu̱ ge nuʼu̱ yu̱ testigoʼä Jeoba di jamansü o di fa̱ʼu̱ yu̱ Ngü Mpe̱ti, dä mi nuui ä BIDEO. ʼNe mʼbe̱fa manhmi nangehna:

BIDEO: Gä fa̱hmu̱ ma Ngü Mpe̱tihu̱ (3:31)

• ¿Hanja emme jaʼtse̱di ge nuʼä ma Ngü Mpe̱tihu̱ nzäntho dä ʼbeʼte ʼne di hmimanho?

• ¿Xiʼe ʼbe̱pu̱ dä za̱ gi mfa̱xte pa ge nzäntho di hmimanhoʼä ra Ngü Mpe̱ti?

5. Nuʼu̱ yu̱ kü dä za̱ dä ʼyo̱ʼte miʼra yu̱ ʼbe̱fi nubu̱ ja kongregasion

Nuʼä Biblia ëmʼpu̱ yu̱ ʼyëʼkyëi nʼyohu̱ ge za̱ dä ʼyo̱ʼte ge manʼna xtä nzaki yu̱ nʼtëʼkyëi pa ʼnepu̱ya manʼna dä za̱ dä fa̱xä kongregasion. Gä pähmu̱ nangeʼä ʼna kü ge ngübu̱ bi ʼyo̱ʼte, dä mi nuui ä BIDEO. ʼNe mʼbe̱fa manhmi nangehna:

BIDEO: Ma küʼähu̱, dä mi ʼyo̱thu̱ ʼtse̱di ge manʼna gi hyänhmu̱ yu̱ ʼbe̱fibu̱ ja mpe̱ti (5:23)

• ¿ʼBe̱ʼä bi ʼyo̱ʼtä Ryan pa ge manʼna xtä nzaki na nʼtëʼkyëi ʼne manʼna dä fa̱xä kongregasion?

Nuʼä Biblia ma ʼbe̱ʼä ja dä ʼyo̱ʼtu̱ yu̱ kü ge ne di mpe̱fi ge sierbo ministerial o ge ansiano. Dä mi nuui 1 Timoteo 3:1-13 ʼne manhmi nangehna:

• ¿ʼBe̱ʼä ja dä ʼyo̱ʼtu̱ yu̱ kü ge ne di sierbo ministerial o ge di ansiano?

• ¿ʼBe̱ʼä ja dä ʼyo̱ʼtu̱ yu̱ familiaʼu̱ toʼo ne di sierbo ministerial o di ansiano? (Dä mi nuui yu̱ bersikulo 4 ʼne 11).

• Nuʼbu̱ yu̱ kü o̱ʼtä ʼtse̱di dä de̱nnu̱ yu̱ nʼtëdi mambu̱ ja Biblia, ¿ʼbe̱ʼä ma nho nuʼu̱ yu̱ kü ʼyobu̱ ja mpe̱ti?

NUʼÄ MANʼNA JAʼTSE̱DI

Pa nangeʼä Jeoba emme di muui ga̱ʼtho nuʼä ʼbe̱ʼä di o̱thu̱ pa gä fa̱xu̱ ma kongregasionhu̱, tengü nuʼbu̱ di honhmu̱ ma tiempohu̱, ma ʼtse̱dihu̱, nuʼä mbe̱ti o honʼtä go ʼbe̱ʼä manʼna di pe̱su̱.

Nuʼä dä pähmu̱

• ¿ʼBe̱pu̱ dä za̱ gä fa̱xu̱ʼä kongregasion ko nangeʼä ma tiempohu̱ ʼne ma ʼtse̱dihu̱?

• ¿ʼBe̱pu̱ dä za̱ gä fa̱xu̱ʼä kongregasion ko nangeʼä ma mbe̱tihu̱ o nuʼä ʼbe̱ʼä manʼna di pe̱su̱?

• ¿Xiʼe ʼbe̱ʼä gi ne gi ʼyo̱ʼte pa gi fa̱xä ni kongregasion?

DÄ MI PÄDI MANʼNA

Dä mi pädi hanja nuʼä Ojä ya hingi to̱ʼmi ge nuʼu̱ yu̱ me̱fi di ünʼä diesmo.

“¿ʼBe̱ʼä manʼä Biblia nangeʼä ra diesmo?” (Bä ʼyëpu̱ jw.org)

Nuʼä Biblia ma ge nuʼu̱ ʼra yu̱ ʼbe̱fi jabu̱ ja mpe̱ti ho̱nʼtu̱ ya nʼyohu̱ sa̱ dä ʼyo̱ʼte.¿ʼBe̱ʼä dä thogi geʼbu̱ ʼna kü xisu dä ʼyo̱ʼtä ʼna ʼbe̱fi ge ho̱nʼtu̱ yu̱ nʼyohu̱ ja dä ʼyo̱ʼte?

“Nuʼu̱ toʼo ja gä ëspähu̱ ʼne gä numansühu̱ nubu̱ ja mpe̱ti” (La Atalaya, febrero ge 2021)

Dä mi pädi nangeʼu̱ ʼra yu̱ Testigo ge käspä yu̱ publikasion yu̱ kü madägeʼä xi nhëi dä zo̱mbu̱ hapu̱ ʼbu̱i.

Pa ma daʼti yu̱ publikasion nubu̱ ja hnini Congo (4:25)

Dä mi pädi hapu̱ bi hä mbe̱tiʼu̱ yu̱ Testigo pa dä za̱ dä ʼyo̱tyu̱ ʼbe̱fi ʼne ʼbe̱pu̱ di hye̱ʼtsi ko nuʼä o̱ʼtu̱ miʼra yu̱ nijä.

“¿Hapu̱ bi häkä mbe̱tiʼu̱ yu̱ testigoʼä Jeoba pa dä ʼyo̱ʼtu̱ yu̱ ʼbe̱fi?” (Bä ʼyëpu̱ jw.org)