3 ਯਿਸੂ​—⁠ਪਰਮੇਸ਼ੁਰ ਵਰਗਾ, ਈਸ਼ਵਰੀ

ਕੁਝ ਬਾਈਬਲਾਂ ਵਿਚ ਯੂਹੰਨਾ 1:1 ਦਾ ਇਸ ਤਰ੍ਹਾਂ ਅਨੁਵਾਦ ਕੀਤਾ ਗਿਆ ਹੈ: “ਆਦ ਵਿੱਚ ਸ਼ਬਦ ਸੀ ਅਰ ਸ਼ਬਦ ਪਰਮੇਸ਼ੁਰ ਦੇ ਸੰਗ ਸੀ ਅਤੇ ਸ਼ਬਦ ਪਰਮੇਸ਼ੁਰ ਸੀ।” ਕਈ ਲੋਕ ਇਸ ਤੋਂ ਇਹ ਭਾਵ ਕੱਢਦੇ ਹਨ ਕਿ “ਸ਼ਬਦ” ਯਾਨੀ ਯਿਸੂ ਖ਼ੁਦ ਸਰਬਸ਼ਕਤੀਮਾਨ ਪਰਮੇਸ਼ੁਰ ਹੈ। ਕੀ ਇਹ ਸੱਚ ਹੈ? ਜੇ ਅਸੀਂ ਇਸ ਤੋਂ ਇਹ ­ਸਮਝੀਏ ਕਿ ਯਿਸੂ ਹੀ ਪਰਮੇਸ਼ੁਰ ਹੈ, ਤਾਂ ਇਹ ਅਗਲੇ ਵਾਕ ਨਾਲ ਮੇਲ ਨਹੀਂ ਖਾਵੇਗਾ ਜਿੱਥੇ ਲਿਖਿਆ ਹੈ: “ਸ਼ਬਦ ਪਰਮੇਸ਼ੁਰ ਦੇ ਸੰਗ ਸੀ।” ਜੇ ਕੋਈ ਕਿਸੇ ਦੇ “ਸੰਗ” ਜਾਂ ਨਾਲ ਹੋਵੇ, ਤਾਂ ਇਸ ਦਾ ਮਤਲਬ ਹੈ ਕਿ ਦੋ ਜਣਿਆਂ ਦੀ ਗੱਲ ਹੋ ਰਹੀ ਹੈ​—⁠ਕੋਈ ਆਪਣੇ “ਸੰਗ” ਨਹੀਂ ਹੋ ਸਕਦਾ। ਇਸ ਲਈ ਕਈ ਬਾਈਬਲਾਂ ਇਹ ਗੱਲ ਸਾਫ਼ ਸਮਝਾ­ਉਂਦੀਆਂ ਹਨ ਕਿ “ਸ਼ਬਦ” ਸਰਬਸ਼ਕਤੀਮਾਨ ਪਰਮੇਸ਼ੁਰ ਨਹੀਂ, ਪਰ ਕੋਈ ਹੋਰ ਸੀ।

ਯੂਹੰਨਾ 1:1 ਵਿਚ “ਈਸ਼ਵਰ” ਅਤੇ “ਪਰਮੇਸ਼ੁਰ” ਲਈ ਇੱਕੋ ਯੂਨਾਨੀ ਸ਼ਬਦ (“ਥੀਓਸ”) ਇਸਤੇਮਾਲ ਕੀਤਾ ਗਿਆ ਹੈ। ਪਰ ਯੂਨਾਨੀ ਵਿਚ “ਪਰਮੇਸ਼ੁਰ” ਸ਼ਬਦ ਦੇ ਮੁਹਰੇ ਇਕ ਹੋਰ ਯੂਨਾਨੀ ਸ਼ਬਦ (“ਹੋ”) ਲਾਇਆ ਗਿਆ ਹੈ, ਜੋ ਸੰਕੇਤ ਕਰਦਾ ਹੈ ਕਿ ਉੱਥੇ ਸਿਰਫ਼ ਸਰਬਸ਼ਕਤੀਮਾਨ ਪਰਮੇਸ਼ੁਰ ਦੀ ਗੱਲ ਕੀਤੀ ਗਈ ਹੈ। ਜਦ ਕਿ “ਈਸ਼ਵਰ” ਸ਼ਬਦ ਦੇ ਮੁਹਰੇ ਇਹ ਸ਼ਬਦ (“ਹੋ”) ਨਹੀਂ ਲਾਇਆ ਗਿਆ ਹੈ। ਇਸ ਲਈ ਬਾਈਬਲ ਦੇ ਵਿਦਵਾਨਾਂ ਮੁਤਾਬਕ ਯੂਹੰਨਾ 1:1 ਵਿਚ “ਸ਼ਬਦ” ਨੂੰ “ਈਸ਼ਵਰ” ਕਹਿ ਕੇ ਯੂਹੰਨਾ ਨੇ ਇਹ ਨਹੀਂ ਦਿਖਾਇਆ ਕਿ “ਸ਼ਬਦ” ਪਰਮੇਸ਼ੁਰ ਹੈ ਜਾਂ ਪਰਮੇਸ਼ੁਰ ਦੇ ਬਰਾਬਰ ਹੈ, ਸਗੋਂ ਉਹ “ਪਰਮੇਸ਼ੁਰ ਵਰਗਾ” ਹੈ। ਇਸੇ ਕਰਕੇ ਉੱਪਰ ਦਿਖਾਏ ਗਏ ਅੰਗ੍ਰੇਜ਼ੀ, ਫਰਾਂਸੀਸੀ ਅਤੇ ਜਰਮਨ ਅਨੁਵਾਦਾਂ ਵਿਚ ਇਸ ਆਇਤ ਵਿਚ “ਇਕ ਈਸ਼ਵਰ,” “ਈਸ਼ਵਰ ਵਰਗਾ” ਜਾਂ “ਈਸ਼ਵਰੀ” ਵਰਗੇ ਸ਼ਬਦ ਵਰਤੇ ਗਏ ਹਨ।