ਅੱਜ ਫ਼ਾਇਦੇਮੰਦ

“ਤੇਰਾ ਬਚਨ ਮੇਰੇ ਪੈਰਾਂ ਲਈ ਦੀਪਕ, ਅਤੇ ਮੇਰੇ ਰਾਹ ਦਾ ਚਾਨਣ ਹੈ।”—ਜ਼ਬੂਰਾਂ ਦੀ ਪੋਥੀ 119:105.

ਬਾਈਬਲ ਵੱਖਰੀ ਕਿਵੇਂ ਹੈ? ਕੁਝ ਕਿਤਾਬਾਂ ਨੂੰ ਸ਼ਾਇਦ ਬਹੁਤ ਵਧੀਆ ਸਾਹਿੱਤ ਮੰਨਿਆ ਜਾਵੇ, ਪਰ ਉਹ ਜ਼ਿੰਦਗੀ ਬਾਰੇ ਕੋਈ ਸੇਧ ਨਹੀਂ ਦਿੰਦੀਆਂ। ਅੱਜ-ਕੱਲ੍ਹ ਦੀਆਂ ਹਿਦਾਇਤਾਂ ਦੇਣ ਵਾਲੀਆਂ ਕਿਤਾਬਾਂ ਨੂੰ ਅਕਸਰ ਬਦਲਣ ਦੀ ਲੋੜ ਪੈਂਦੀ ਹੈ। ਪਰ ਬਾਈਬਲ ਦਾਅਵਾ ਕਰਦੀ ਹੈ ਕਿ ਇਸ ਵਿਚ “ਜੋ ਵੀ ਪਹਿਲਾਂ ਲਿਖਿਆ ਗਿਆ ਸੀ, ਉਹ ਸਾਨੂੰ ਸਿੱਖਿਆ ਦੇਣ ਲਈ ਹੀ ਲਿਖਿਆ ਗਿਆ ਸੀ।”—ਰੋਮੀਆਂ 15:4.

ਇਕ ਮਿਸਾਲ: ਭਾਵੇਂ ਬਾਈਬਲ ਡਾਕਟਰੀ ਕਿਤਾਬ ਨਹੀਂ ਹੈ, ਪਰ ਇਸ ਵਿਚ ਸਾਡੇ ਜਜ਼ਬਾਤਾਂ ਅਤੇ ਸਿਹਤ ਬਾਰੇ ਫ਼ਾਇਦੇਮੰਦ ਸੁਝਾਅ ਦਿੱਤੇ ਗਏ ਹਨ। ਮਿਸਾਲ ਲਈ, ਇਹ ਦੱਸਦੀ ਹੈ: “ਸ਼ਾਂਤ ਮਨ ਸਰੀਰ ਦਾ ਜੀਉਣ ਹੈ।” (ਕਹਾਉਤਾਂ 14:30) ਬਾਈਬਲ ਇਹ ਵੀ ਚੇਤਾਵਨੀ ਦਿੰਦੀ ਹੈ: “ਜੋ ਆਪ ਨੂੰ ਵੱਖਰਾ ਕਰੇ ਉਹ ਆਪਣੀ ਇੱਛਿਆ ਭਾਲਦਾ ਹੈ, ਉਹ ਸਾਰੀ ਖਰੀ ਬੁੱਧੀ ਦੇ ਵਿਰੁੱਧ ਚਿੜਦਾ ਹੈ।” (ਕਹਾਉਤਾਂ 18:1) ਦੂਸਰੇ ਪਾਸੇ, ਇਸ ਵਿਚ ਇਹ ਵੀ ਲਿਖਿਆ ਹੈ: “ਲੈਣ ਨਾਲੋਂ ਦੇਣ ਵਿਚ ਜ਼ਿਆਦਾ ਖ਼ੁਸ਼ੀ ਮਿਲਦੀ ਹੈ।”—ਰਸੂਲਾਂ ਦੇ ਕੰਮ 20:35.

ਰਿਸਰਚ ਤੋਂ ਕੀ ਪਤਾ ਲੱਗਦਾ ਹੈ: ਸ਼ਾਂਤ ਸੁਭਾਅ ਹੋਣ, ਚੰਗੇ ਦੋਸਤ ਬਣਾਉਣ ਅਤੇ ਖੁੱਲ੍ਹੇ ਦਿਲ ਵਾਲੇ ਹੋਣ ਨਾਲ ਤੁਹਾਡੀ ਸਿਹਤ ਵਿਚ ਸੁਧਾਰ ਹੋ ਸਕਦਾ ਹੈ। ਦ ਜਰਨਲ ਆਫ਼ ਦੀ ਅਮੈਰੀਕਨ ਮੈਡੀਕਲ ਐਸੋਸੀਏਸ਼ਨ ਰਿਪੋਰਟ ਕਰਦਾ ਹੈ: “ਜਿਹੜੇ ਆਦਮੀ ਗੁੱਸੇ ਨਾਲ ਭੜਕ ਉੱਠਦੇ ਹਨ ਉਨ੍ਹਾਂ ਨੂੰ ਉਨ੍ਹਾਂ ਆਦਮੀਆਂ ਨਾਲੋਂ ਦੋ ਗੁਣਾ ਦੌਰਾ ਪੈਣ ਦਾ ਖ਼ਤਰਾ ਹੁੰਦਾ ਹੈ ਜਿਹੜੇ ਆਪਣੇ ਗੁੱਸੇ ਨੂੰ ਕੰਟ੍ਰੋਲ ਕਰ ਲੈਂਦੇ ਹਨ।” ਆਸਟ੍ਰੇਲੀਆ ਵਿਚ ਦਸ ਸਾਲਾਂ ਤਾਈਂ ਕੀਤੀ ਸਟੱਡੀ ਤੋਂ ਪਤਾ ਲੱਗਾ ਕਿ ਜਿਹੜੇ ਬਜ਼ੁਰਗ ਆਪਣੇ “ਦੋਸਤ-ਮਿੱਤਰਾਂ ਅਤੇ ਹਮਰਾਜ਼ ਲੋਕਾਂ ਨਾਲ ਮੇਲ-ਜੋਲ ਰੱਖਦੇ ਹਨ,” ਉਹ ਜ਼ਿਆਦਾ ਲੰਬੀ ਉਮਰ ਜੀਉਂਦੇ ਹਨ। 2008 ਵਿਚ ਕੈਨੇਡਾ ਅਤੇ ਅਮਰੀਕਾ ਦੇ ਖੋਜਕਾਰਾਂ ਨੇ ਦੇਖਿਆ ਕਿ “ਆਪਣੇ ਉੱਤੇ ਪੈਸੇ ਖ਼ਰਚਣ ਦੀ ਬਜਾਇ ਦੂਜਿਆਂ ਉੱਤੇ ਪੈਸੇ ਖ਼ਰਚਣ ਨਾਲ ਜ਼ਿਆਦਾ ਖ਼ੁਸ਼ੀ ਮਿਲਦੀ ਹੈ।”

ਤੁਹਾਡਾ ਕੀ ਖ਼ਿਆਲ ਹੈ? ਕੀ ਤੁਸੀਂ ਸਿਹਤ ਸੰਬੰਧੀ ਦਿੱਤੀ ਸਲਾਹ ਬਾਰੇ ਕਿਸੇ ਹੋਰ ਕਿਤਾਬ ਉੱਤੇ ਇਤਬਾਰ ਕਰ ਸਕਦੇ ਹੋ ਜੋ ਲਗਭਗ 2,000 ਸਾਲ ਪਹਿਲਾਂ ਲਿਖੀ ਗਈ ਸੀ? ਜਾਂ ਕੀ ਇਸ ਮਾਮਲੇ ਵਿਚ ਬਾਈਬਲ ਅਨੋਖੀ ਹੈ? (w12-E 06/01)

[ਸਫ਼ਾ 8 ਉੱਤੇ ਕੈਪਸ਼ਨ]

“ਮੈਨੂੰ ਬਾਈਬਲ ਬਹੁਤ ਪਸੰਦ ਹੈ . . . ਕਿਉਂਕਿ ਇਸ ਵਿਚ ਸਿਹਤ ਬਾਰੇ ਬਹੁਤ ਵਧੀਆ ਸਲਾਹ ਦਿੱਤੀ ਗਈ ਹੈ।”—ਹਾਵਰਡ ਕੈਲੀ, ਐੱਮ. ਡੀ., ਜਾਨਜ਼ ਹੌਪਕਿਨਜ਼ ਯੂਨੀਵਰਸਿਟੀ ਦੇ ਮੈਡੀਕਲ ਸਕੂਲ ਦੇ ਮੋਢੀਆਂ ਵਿੱਚੋਂ ਇਕ ਮੈਂਬਰ