ਬਿਲਾਮ ਦੀ ਗਧੀ ਨੇ ਗੱਲ ਕੀਤੀ

ਇਜ਼ਰਾਈਲੀਆਂ ਨੂੰ ਉਜਾੜ ਵਿਚ ਘੁੰਮਦਿਆਂ ਲਗਭਗ 40 ਸਾਲ ਹੋ ਗਏ ਸਨ। ਉਨ੍ਹਾਂ ਨੇ ਬਹੁਤ ਸਾਰੇ ਸ਼ਹਿਰਾਂ ਨੂੰ ਜਿੱਤਿਆ। ਉਨ੍ਹਾਂ ਨੇ ਯਰਦਨ ਨਦੀ ਦੇ ਪੂਰਬੀ ਪਾਸੇ ਮੋਆਬ ਦੇ ਮੈਦਾਨ ਵਿਚ ਡੇਰਾ ਲਾਇਆ। ਹੁਣ ਵਾਅਦਾ ਕੀਤੇ ਹੋਏ ਦੇਸ਼ ਵਿਚ ਜਾਣ ਦਾ ਸਮਾਂ ਸੀ। ਮੋਆਬ ਦਾ ਰਾਜਾ ਬਾਲਾਕ ਡਰ ਗਿਆ ਕਿ ਕਿਤੇ ਇਜ਼ਰਾਈਲੀ ਉਸ ਦੇ ਸ਼ਹਿਰ ʼਤੇ ਵੀ ਕਬਜ਼ਾ ਨਾ ਕਰ ਲੈਣ। ਇਸ ਲਈ ਉਸ ਨੇ ਬਿਲਾਮ ਨਾਂ ਦੇ ਆਦਮੀ ਨੂੰ ਮੋਆਬ ਬੁਲਾਇਆ ਤਾਂਕਿ ਉਹ ਇਜ਼ਰਾਈਲੀਆਂ ਨੂੰ ਸਰਾਪ ਦੇਵੇ।

ਪਰ ਯਹੋਵਾਹ ਨੇ ਬਿਲਾਮ ਨੂੰ ਕਿਹਾ: ‘ਤੂੰ ਇਜ਼ਰਾਈਲੀਆਂ ਨੂੰ ਸਰਾਪ ਨਾ ਦੇਈਂ।’ ਸੋ ਬਿਲਾਮ ਉਨ੍ਹਾਂ ਨਾਲ ਨਹੀਂ ਗਿਆ। ਰਾਜਾ ਬਾਲਾਕ ਨੇ ਉਸ ਨੂੰ ਦੁਬਾਰਾ ਬੁਲਾਇਆ ਅਤੇ ਵਾਅਦਾ ਕੀਤਾ ਕਿ ਉਹ ਜੋ ਮੰਗੇਗਾ, ਉਸ ਨੂੰ ਦਿੱਤਾ ਜਾਵੇਗਾ। ਪਰ ਬਿਲਾਮ ਫਿਰ ਵੀ ਨਹੀਂ ਗਿਆ। ਫਿਰ ਪਰਮੇਸ਼ੁਰ ਨੇ ਕਿਹਾ: ‘ਤੂੰ ਚਲਾ ਜਾਹ, ਪਰ ਉਹੀ ਕਹੀਂ ਜੋ ਮੈਂ ਤੈਨੂੰ ਬੋਲਣ ਲਈ ਕਹਾਂਗਾ।’

ਬਿਲਾਮ ਆਪਣੀ ਗਧੀ ʼਤੇ ਬੈਠ ਕੇ ਮੋਆਬ ਨੂੰ ਚੱਲ ਪਿਆ। ਭਾਵੇਂ ਯਹੋਵਾਹ ਨੇ ਉਸ ਨੂੰ ਸਰਾਪ ਦੇਣ ਤੋਂ ਮਨ੍ਹਾ ਕੀਤਾ ਸੀ, ਪਰ ਉਸ ਨੇ ਇਜ਼ਰਾਈਲੀਆਂ ਨੂੰ ਸਰਾਪ ਦੇਣ ਦਾ ਮਨ ਬਣਾ ਲਿਆ ਸੀ। ਯਹੋਵਾਹ ਦਾ ਦੂਤ ਤਿੰਨ ਵਾਰ ਰਾਹ ਵਿਚ ਆਇਆ। ਬਿਲਾਮ ਦੂਤ ਨੂੰ ਨਾ ਦੇਖ ਸਕਿਆ, ਪਰ ਗਧੀ ਦੇਖ ਸਕੀ। ਪਹਿਲਾਂ ਗਧੀ ਰਾਹ ਤੋਂ ਹਟ ਕੇ ਖੇਤ ਵਿਚ ਚਲੀ ਗਈ। ਫਿਰ ਗਧੀ ਪੱਥਰ ਦੀ ਕੰਧ ਨਾਲ ਲੱਗ ਗਈ ਜਿਸ ਕਰਕੇ ਬਿਲਾਮ ਦਾ ਪੈਰ ਦੱਬ ਹੋ ਗਿਆ। ਅਖ਼ੀਰ ਗਧੀ ਰਾਹ ਵਿਚ ਹੀ ਬੈਠ ਗਈ। ਹਰ ਵਾਰ ਬਿਲਾਮ ਨੇ ਗਧੀ ਨੂੰ ਡੰਡੇ ਨਾਲ ਕੁੱਟਿਆ।

ਤੀਸਰੀ ਵਾਰ ਤੋਂ ਬਾਅਦ ਯਹੋਵਾਹ ਨੇ ਗਧੀ ਨੂੰ ਬੋਲਣ ਦੀ ਤਾਕਤ ਦਿੱਤੀ। ਗਧੀ ਨੇ ਬਿਲਾਮ ਨੂੰ ਪੁੱਛਿਆ: ‘ਤੂੰ ਮੈਨੂੰ ਕਿਉਂ ਕੁੱਟੀ ਜਾਂਦਾ?’ ਬਿਲਾਮ ਨੇ ਕਿਹਾ: ‘ਤੂੰ ਮੈਨੂੰ ਮੂਰਖ ਬਣਾਇਆ। ਜੇ ਮੇਰੇ ਕੋਲ ਤਲਵਾਰ ਹੁੰਦੀ, ਤਾਂ ਮੈਂ ਤੈਨੂੰ ਵੱਢ ਦੇਣਾ ਸੀ।’ ਗਧੀ ਨੇ ਜਵਾਬ ਦਿੱਤਾ: ‘ਤੂੰ ਕਈ ਸਾਲਾਂ ਤੋਂ ਮੇਰੀ ਸਵਾਰੀ ਕਰ ਰਿਹਾਂ। ਕੀ ਮੈਂ ਪਹਿਲਾਂ ਕਦੀ ਤੇਰੇ ਨਾਲ ਇੱਦਾਂ ਕੀਤਾ?’

ਹੁਣ ਬਿਲਾਮ ਯਹੋਵਾਹ ਦੀ ਮਦਦ ਨਾਲ ਦੂਤ ਨੂੰ ਦੇਖ ਸਕਦਾ ਸੀ। ਦੂਤ ਨੇ ਕਿਹਾ: ‘ਯਹੋਵਾਹ ਨੇ ਤੈਨੂੰ ਇਜ਼ਰਾਈਲ ਨੂੰ ਸਰਾਪ ਦੇਣ ਤੋਂ ਰੋਕਿਆ ਸੀ।’ ਬਿਲਾਮ ਨੇ ਕਿਹਾ: ‘ਮੈਥੋਂ ਗ਼ਲਤੀ ਹੋ ਗਈ। ਮੈਂ ਘਰ ਵਾਪਸ ਮੁੜ ਜਾਵਾਂਗਾ।’ ਪਰ ਦੂਤ ਨੇ ਕਿਹਾ: ‘ਤੂੰ ਮੋਆਬ ਨੂੰ ਜਾਹ, ਪਰ ਉਹੀ ਕਹੀਂ ਜੋ ਯਹੋਵਾਹ ਤੈਨੂੰ ਬੋਲਣ ਲਈ ਕਹੇਗਾ।’

ਕੀ ਬਿਲਾਮ ਨੇ ਕੋਈ ਸਬਕ ਸਿੱਖਿਆ? ਨਹੀਂ। ਇਸ ਤੋਂ ਬਾਅਦ ਵੀ ਬਿਲਾਮ ਨੇ ਇਜ਼ਰਾਈਲ ਨੂੰ ਤਿੰਨ ਵਾਰ ਸਰਾਪ ਦੇਣ ਦੀ ਕੋਸ਼ਿਸ਼ ਕੀਤੀ, ਪਰ ਹਰ ਵਾਰ ਯਹੋਵਾਹ ਨੇ ਉਸ ਦੇ ਮੂੰਹੋਂ ਬਰਕਤ ਹੀ ਕਢਾਈ। ਬਾਅਦ ਵਿਚ ਇਜ਼ਰਾਈਲ ਨੇ ਮੋਆਬ ʼਤੇ ਹਮਲਾ ਕੀਤਾ ਜਿਸ ਵਿਚ ਬਿਲਾਮ ਮਾਰਿਆ ਗਿਆ। ਕਿੰਨਾ ਚੰਗਾ ਹੁੰਦਾ ਜੇ ਬਿਲਾਮ ਪਹਿਲੀ ਵਾਰੀ ਹੀ ਯਹੋਵਾਹ ਦੀ ਗੱਲ ਸੁਣ ਲੈਂਦਾ, ਹੈਨਾ?