ਦਾਊਦ ਅਤੇ ਗੋਲਿਅਥ

ਯਹੋਵਾਹ ਨੇ ਸਮੂਏਲ ਨੂੰ ਕਿਹਾ: ‘ਯੱਸੀ ਦੇ ਘਰ ਜਾਹ। ਉਸ ਦਾ ਇਕ ਮੁੰਡਾ ਇਜ਼ਰਾਈਲ ਦਾ ਅਗਲਾ ਰਾਜਾ ਹੋਵੇਗਾ।’ ਇਸ ਲਈ ਸਮੂਏਲ ਯੱਸੀ ਦੇ ਘਰ ਚਲਾ ਗਿਆ। ਜਦੋਂ ਉਸ ਨੇ ਯੱਸੀ ਦਾ ਸਭ ਤੋਂ ਵੱਡਾ ਮੁੰਡਾ ਦੇਖਿਆ, ਤਾਂ ਉਸ ਨੇ ਸੋਚਿਆ: ‘ਪੱਕਾ ਇਹੀ ਉਹ ਨੌਜਵਾਨ ਹੋਣਾ ਜਿਸ ਨੂੰ ਯਹੋਵਾਹ ਨੇ ਚੁਣਿਆ ਹੈ।’ ਪਰ ਯਹੋਵਾਹ ਨੇ ਸਮੂਏਲ ਨੂੰ ਕਿਹਾ ਕਿ ਉਸ ਨੇ ਇਸ ਨੂੰ ਨਹੀਂ ਚੁਣਿਆ। ਯਹੋਵਾਹ ਨੇ ਕਿਹਾ: ‘ਮੈਂ ਇਨਸਾਨ ਦਾ ਸਿਰਫ਼ ਬਾਹਰਲਾ ਰੂਪ ਨਹੀਂ ਦੇਖਦਾ, ਪਰ ਉਸ ਦਾ ਦਿਲ ਦੇਖਦਾ ਹਾਂ।’

ਯੱਸੀ ਆਪਣੇ ਹੋਰ ਛੇ ਮੁੰਡੇ ਸਮੂਏਲ ਕੋਲ ਲੈ ਕੇ ਆਇਆ। ਪਰ ਸਮੂਏਲ ਨੇ ਕਿਹਾ: ‘ਯਹੋਵਾਹ ਨੇ ਇਨ੍ਹਾਂ ਵਿੱਚੋਂ ਕਿਸੇ ਨੂੰ ਨਹੀਂ ਚੁਣਿਆ। ਕੀ ਤੇਰਾ ਕੋਈ ਹੋਰ ਮੁੰਡਾ ਹੈ?’ ਯੱਸੀ ਨੇ ਕਿਹਾ: ‘ਮੇਰਾ ਇਕ ਹੋਰ ਮੁੰਡਾ ਹੈ ਜੋ ਸਭ ਤੋਂ ਛੋਟਾ ਹੈ। ਉਸ ਦਾ ਨਾਂ ਦਾਊਦ ਹੈ। ਉਹ ਭੇਡਾਂ ਚਾਰਨ ਗਿਆ ਹੈ।’ ਜਦੋਂ ਦਾਊਦ ਆਇਆ, ਤਾਂ ਯਹੋਵਾਹ ਨੇ ਸਮੂਏਲ ਨੂੰ ਕਿਹਾ: ‘ਇਹੀ ਹੈ ਜਿਸ ਨੂੰ ਮੈਂ ਚੁਣਿਆ ਹੈ।’ ਸਮੂਏਲ ਨੇ ਦਾਊਦ ਦੇ ਸਿਰ ʼਤੇ ਤੇਲ ਪਾ ਕੇ ਉਸ ਨੂੰ ਇਜ਼ਰਾਈਲ ਦਾ ਅਗਲਾ ਰਾਜਾ ਨਿਯੁਕਤ ਕਰ ਦਿੱਤਾ।

ਕੁਝ ਸਮੇਂ ਬਾਅਦ ਇਜ਼ਰਾਈਲੀ ਫਲਿਸਤੀਆਂ ਨਾਲ ਯੁੱਧ ਲਈ ਇਕੱਠੇ ਹੋਏ। ਫਲਿਸਤੀਆਂ ਦਾ ਇਕ ਯੋਧਾ ਸੀ ਜਿਸ ਦਾ ਨਾਂ ਗੋਲਿਅਥ ਸੀ ਤੇ ਉਹ ਦੈਂਤ ਵਰਗਾ ਸੀ। ਹਰ ਦਿਨ ਗੋਲਿਅਥ ਇਜ਼ਰਾਈਲੀਆਂ ਦਾ ਮਜ਼ਾਕ ਉਡਾਉਂਦਾ ਸੀ। ਉਸ ਨੇ ਉੱਚੀ-ਉੱਚੀ ਕਿਹਾ: ‘ਮੇਰੇ ਨਾਲ ਲੜਨ ਲਈ ਇਕ ਆਦਮੀ ਭੇਜੋ। ਜੇ ਉਹ ਜਿੱਤ ਜਾਵੇ, ਤਾਂ ਅਸੀਂ ਤੁਹਾਡੇ ਨੌਕਰ ਬਣ ਜਾਵਾਂਗੇ। ਪਰ ਜੇ ਮੈਂ ਜਿੱਤ ਗਿਆ, ਤਾਂ ਤੁਸੀਂ ਸਾਡੇ ਨੌਕਰ ਬਣ ਜਾਓਗੇ।’

ਦਾਊਦ ਇਜ਼ਰਾਈਲੀ ਫ਼ੌਜ ਦੀ ਛਾਉਣੀ ਵਿਚ ਆਪਣੇ ਭਰਾਵਾਂ ਲਈ ਖਾਣਾ ਲੈ ਕੇ ਆਇਆ। ਉਸ ਨੇ ਗੋਲਿਅਥ ਦੀ ਗੱਲ ਸੁਣ ਕੇ ਕਿਹਾ: ‘ਮੈਂ ਉਸ ਨਾਲ ਲੜਾਂਗਾ।’ ਰਾਜਾ ਸ਼ਾਊਲ ਨੇ ਕਿਹਾ: ‘ਤੂੰ ਤਾਂ ਮੁੰਡਾ ਜਿਹਾ ਹੈਂ।’ ਦਾਊਦ ਨੇ ਜਵਾਬ ਦਿੱਤਾ: ‘ਯਹੋਵਾਹ ਮੇਰੀ ਮਦਦ ਕਰੇਗਾ।’

ਸ਼ਾਊਲ ਨੇ ਦਾਊਦ ਨੂੰ ਲੜਨ ਲਈ ਆਪਣੇ ਹਥਿਆਰ ਦਿੱਤੇ, ਪਰ ਦਾਊਦ ਨੇ ਕਿਹਾ: ‘ਮੈਂ ਇਨ੍ਹਾਂ ਨਾਲ ਨਹੀਂ ਲੜ ਸਕਦਾ।’ ਦਾਊਦ ਗੋਪੀਆ ਲੈ ਕੇ ਨਦੀ ʼਤੇ ਚਲਾ ਗਿਆ। ਉਸ ਨੇ ਉੱਥੋਂ ਪੰਜ ਮੁਲਾਇਮ ਪੱਥਰ ਚੁੱਕ ਕੇ ਆਪਣੇ ਥੈਲੇ ਵਿਚ ਪਾ ਲਏ। ਫਿਰ ਉਹ ਗੋਲਿਅਥ ਵੱਲ ਨੂੰ ਦੌੜਿਆ। ਗੋਲਿਅਥ ਨੇ ਉੱਚੀ ਦੇਣੀ ਕਿਹਾ: ‘ਓਏ ਮੁੰਡਿਆ, ਇੱਧਰ ਆ। ਮੈਂ ਤੈਨੂੰ ਆਕਾਸ਼ ਦੇ ਪੰਛੀਆਂ ਤੇ ਜੰਗਲੀ ਜਾਨਵਰਾਂ ਦਾ ਖਾਣਾ ਬਣਾਵਾਂਗਾ।’ ਦਾਊਦ ਡਰਿਆ ਨਹੀਂ। ਉਸ ਨੇ ਉੱਚੀ ਦੇਣੀ ਕਿਹਾ: ‘ਤੂੰ ਤਲਵਾਰ ਤੇ ਬਰਛੇ ਨਾਲ ਆਇਆ ਹੈਂ, ਪਰ ਮੈਂ ਯਹੋਵਾਹ ਦੇ ਨਾਂ ʼਤੇ ਆਇਆ ਹਾਂ। ਤੂੰ ਸਾਡੇ ਨਾਲ ਨਹੀਂ ਲੜ ਰਿਹਾ, ਤੂੰ ਪਰਮੇਸ਼ੁਰ ਨਾਲ ਲੜ ਰਿਹਾ ਹੈਂ। ਇੱਥੇ ਇਕੱਠੇ ਹੋਏ ਸਾਰੇ ਜਣੇ ਦੇਖਣਗੇ ਕਿ ਯਹੋਵਾਹ ਤਲਵਾਰ ਤੇ ਬਰਛੇ ਤੋਂ ਕਿਤੇ ਜ਼ਿਆਦਾ ਤਾਕਤਵਰ ਹੈ। ਉਹ ਤੁਹਾਨੂੰ ਸਾਰਿਆਂ ਨੂੰ ਸਾਡੇ ਹੱਥ ਵਿਚ ਦੇ ਦੇਵੇਗਾ।’

ਦਾਊਦ ਨੇ ਗੋਪੀਏ ਵਿਚ ਇਕ ਪੱਥਰ ਪਾ ਕੇ ਪੂਰੇ ਜ਼ੋਰ ਨਾਲ ਘੁਮਾ ਕੇ ਮਾਰਿਆ। ਯਹੋਵਾਹ ਦੀ ਮਦਦ ਨਾਲ ਪੱਥਰ ਸਿੱਧਾ ਜਾ ਕੇ ਗੋਲਿਅਥ ਦੇ ਮੱਥੇ ਵਿਚ ਵੱਜਾ ਅਤੇ ਖੁੱਭ ਗਿਆ। ਉਹ ਮਰ ਗਿਆ ਅਤੇ ਜ਼ਮੀਨ ʼਤੇ ਡਿਗ ਪਿਆ। ਫਿਰ ਫਲਿਸਤੀ ਆਪਣੀਆਂ ਜਾਨਾਂ ਬਚਾਉਣ ਲਈ ਭੱਜੇ। ਕੀ ਤੁਸੀਂ ਦਾਊਦ ਵਾਂਗ ਯਹੋਵਾਹ ʼਤੇ ਭਰੋਸਾ ਰੱਖਦੇ ਹੋ?