ਦਲੇਰ ਅਤੇ ਵਫ਼ਾਦਾਰ ਯੋਨਾਥਾਨ

ਰਾਜਾ ਸ਼ਾਊਲ ਦਾ ਸਭ ਤੋਂ ਵੱਡਾ ਮੁੰਡਾ ਯੋਨਾਥਾਨ ਦਲੇਰ ਯੋਧਾ ਸੀ। ਦਾਊਦ ਨੇ ਕਿਹਾ ਕਿ ਯੋਨਾਥਾਨ ਉਕਾਬ ਤੋਂ ਵੀ ਤੇਜ਼ ਅਤੇ ਸ਼ੇਰ ਤੋਂ ਵੀ ਤਕੜਾ ਹੈ। ਇਕ ਦਿਨ ਯੋਨਾਥਾਨ ਨੇ ਪਹਾੜੀ ʼਤੇ ਕੁਝ ਫਲਿਸਤੀ ਫ਼ੌਜੀ ਦੇਖੇ। ਉਸ ਨੇ ਆਪਣੇ ਹਥਿਆਰ ਚੁੱਕਣ ਵਾਲੇ ਨੂੰ ਕਿਹਾ: ‘ਅਸੀਂ ਉਨ੍ਹਾਂ ʼਤੇ ਤਾਂ ਹੀ ਹਮਲਾ ਕਰਾਂਗੇ ਜੇ ਯਹੋਵਾਹ ਸਾਨੂੰ ਕੋਈ ਨਿਸ਼ਾਨੀ ਦਿਖਾਵੇ। ਜੇ ਫਲਿਸਤੀ ਫ਼ੌਜੀਆਂ ਨੇ ਕਿਹਾ ਕਿ ਸਾਡੇ ਕੋਲ ਉੱਪਰ ਆਓ, ਤਾਂ ਇਹ ਸਾਡੇ ਲਈ ਨਿਸ਼ਾਨੀ ਹੋਵੇਗੀ ਅਤੇ ਅਸੀਂ ਉਨ੍ਹਾਂ ʼਤੇ ਹਮਲਾ ਕਰਾਂਗੇ।’ ਫਲਿਸਤੀ ਉੱਚੀ-ਉੱਚੀ ਕਹਿਣ ਲੱਗੇ: ‘ਉੱਪਰ ਆਓ ਅਤੇ ਸਾਡੇ ਨਾਲ ਲੜਾਈ ਕਰੋ!’ ਇਸ ਲਈ ਉਹ ਦੋਵੇਂ ਜਣੇ ਪਹਾੜੀ ʼਤੇ ਗਏ ਅਤੇ ਉਨ੍ਹਾਂ ਨੇ 20 ਫ਼ੌਜੀਆਂ ਨੂੰ ਮਾਰ ਦਿੱਤਾ।

ਸ਼ਾਊਲ ਦਾ ਸਭ ਤੋਂ ਵੱਡਾ ਮੁੰਡਾ ਹੋਣ ਕਰਕੇ ਯੋਨਾਥਾਨ ਨੇ ਅਗਲਾ ਰਾਜਾ ਬਣਨਾ ਸੀ। ਪਰ ਯੋਨਾਥਾਨ ਨੂੰ ਪਤਾ ਸੀ ਕਿ ਯਹੋਵਾਹ ਨੇ ਦਾਊਦ ਨੂੰ ਇਜ਼ਰਾਈਲ ਦਾ ਅਗਲਾ ਰਾਜਾ ਚੁਣਿਆ ਸੀ। ਉਸ ਨੇ ਦਾਊਦ ਨਾਲ ਈਰਖਾ ਨਹੀਂ ਕੀਤੀ। ਯੋਨਾਥਾਨ ਅਤੇ ਦਾਊਦ ਜਿਗਰੀ ਦੋਸਤ ਬਣ ਗਏ। ਉਨ੍ਹਾਂ ਨੇ ਵਾਅਦਾ ਕੀਤਾ ਕਿ ਉਹ ਹਮੇਸ਼ਾ ਇਕ-ਦੂਜੇ ਦੀ ਰੱਖਿਆ ਕਰਨਗੇ। ਯੋਨਾਥਾਨ ਨੇ ਦਾਊਦ ਨੂੰ ਦੋਸਤੀ ਦੀ ਨਿਸ਼ਾਨੀ ਵਜੋਂ ਆਪਣਾ ਚੋਗਾ, ਤਲਵਾਰ, ਕਮਾਨ ਅਤੇ ਕਮਰਬੰਦ ਦੇ ਦਿੱਤਾ।

ਜਦੋਂ ਦਾਊਦ ਸ਼ਾਊਲ ਤੋਂ ਭੱਜ ਰਿਹਾ ਸੀ, ਤਾਂ ਯੋਨਾਥਾਨ ਦਾਊਦ ਕੋਲ ਗਿਆ ਅਤੇ ਕਿਹਾ: ‘ਦਲੇਰ ਬਣ ਅਤੇ ਹਿੰਮਤ ਰੱਖ। ਯਹੋਵਾਹ ਨੇ ਤੈਨੂੰ ਰਾਜਾ ਬਣਨ ਲਈ ਚੁਣਿਆ ਹੈ। ਇਹ ਗੱਲ ਮੇਰਾ ਪਿਤਾ ਵੀ ਜਾਣਦਾ ਹੈ।’ ਕੀ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਡਾ ਵੀ ਯੋਨਾਥਾਨ ਵਰਗਾ ਜਿਗਰੀ ਦੋਸਤ ਹੋਵੇ?

ਯੋਨਾਥਾਨ ਨੇ ਕਈ ਵਾਰ ਆਪਣੇ ਦੋਸਤ ਕਰਕੇ ਆਪਣੀ ਜਾਨ ਖ਼ਤਰੇ ਵਿਚ ਪਾਈ। ਉਹ ਜਾਣਦਾ ਸੀ ਕਿ ਰਾਜਾ ਸ਼ਾਊਲ ਦਾਊਦ ਨੂੰ ਮਾਰਨਾ ਚਾਹੁੰਦਾ ਸੀ। ਇਸ ਲਈ ਉਸ ਨੇ ਆਪਣੇ ਪਿਤਾ ਨੂੰ ਕਿਹਾ: ‘ਜੇ ਤੂੰ ਦਾਊਦ ਨੂੰ ਮਾਰਿਆ, ਤਾਂ ਤੂੰ ਪਾਪ ਕਰੇਂਗਾ ਕਿਉਂਕਿ ਉਸ ਨੇ ਕੁਝ ਗ਼ਲਤ ਨਹੀਂ ਕੀਤਾ।’ ਸ਼ਾਊਲ ਨੂੰ ਯੋਨਾਥਾਨ ʼਤੇ ਬਹੁਤ ਗੁੱਸਾ ਆਇਆ। ਕੁਝ ਸਾਲਾਂ ਬਾਅਦ ਸ਼ਾਊਲ ਅਤੇ ਯੋਨਾਥਾਨ ਇਕ ਲੜਾਈ ਵਿਚ ਮਾਰੇ ਗਏ।

ਯੋਨਾਥਾਨ ਦੇ ਮਰਨ ਤੋਂ ਬਾਅਦ ਦਾਊਦ ਨੇ ਉਸ ਦੇ ਮੁੰਡੇ ਮਫੀਬੋਸ਼ਥ ਨੂੰ ਲੱਭਿਆ। ਮਫੀਬੋਸ਼ਥ ਨੂੰ ਲੱਭਣ ਤੋਂ ਬਾਅਦ ਦਾਊਦ ਨੇ ਉਸ ਨੂੰ ਕਿਹਾ: ‘ਮੈਂ ਅਤੇ ਤੇਰਾ ਪਿਤਾ ਜਿਗਰੀ ਦੋਸਤ ਸੀ। ਇਸ ਲਈ ਮੈਂ ਸਾਰੀ ਜ਼ਿੰਦਗੀ ਤੇਰੀ ਦੇਖ-ਭਾਲ ਕਰਾਂਗਾ। ਤੂੰ ਮੇਰੇ ਮਹਿਲ ਵਿਚ ਰਹੇਂਗਾ ਅਤੇ ਮੇਰੇ ਮੇਜ਼ ʼਤੇ ਖਾਣਾ ਖਾਵੇਂਗਾ।’ ਦਾਊਦ ਆਪਣੇ ਦੋਸਤ ਯੋਨਾਥਾਨ ਨੂੰ ਕਦੇ ਨਹੀਂ ਭੁੱਲਿਆ।