ਯਹੋਵਾਹ ਦਾ ਮੰਦਰ

ਸੁਲੇਮਾਨ ਇਜ਼ਰਾਈਲ ਦਾ ਰਾਜਾ ਬਣ ਗਿਆ ਤੇ ਯਹੋਵਾਹ ਨੇ ਉਸ ਨੂੰ ਪੁੱਛਿਆ: ‘ਤੂੰ ਮੇਰੇ ਤੋਂ ਕੀ ਮੰਗਣਾ ਚਾਹੁੰਦਾ?’ ਸੁਲੇਮਾਨ ਨੇ ਕਿਹਾ: ‘ਮੈਂ ਬੱਸ ਇਕ ਨੌਜਵਾਨ ਹਾਂ ਅਤੇ ਮੈਨੂੰ ਪਤਾ ਨਹੀਂ ਕਿ ਰਾਜ ਕਿੱਦਾਂ ਕਰਨਾ। ਮੈਨੂੰ ਬੁੱਧ ਦੇ ਤਾਂਕਿ ਮੈਂ ਤੇਰੇ ਲੋਕਾਂ ਦੀ ਦੇਖ-ਭਾਲ ਕਰ ਸਕਾਂ।’ ਯਹੋਵਾਹ ਨੇ ਕਿਹਾ: ‘ਤੂੰ ਬੁੱਧ ਮੰਗੀ ਹੈਂ, ਇਸ ਲਈ ਮੈਂ ਤੈਨੂੰ ਦੁਨੀਆਂ ਦਾ ਸਭ ਤੋਂ ਜ਼ਿਆਦਾ ਬੁੱਧੀਮਾਨ ਇਨਸਾਨ ਬਣਾਵਾਂਗਾ। ਮੈਂ ਤੈਨੂੰ ਅਮੀਰ ਵੀ ਬਣਾਵਾਂਗਾ। ਜੇ ਤੂੰ ਮੇਰਾ ਕਹਿਣਾ ਮੰਨਿਆ, ਤਾਂ ਤੇਰੀ ਉਮਰ ਲੰਬੀ ਹੋਵੇਗੀ।’

ਸੁਲੇਮਾਨ ਨੇ ਮੰਦਰ ਬਣਾਉਣਾ ਸ਼ੁਰੂ ਕਰ ਦਿੱਤਾ। ਉਸ ਨੇ ਸਭ ਤੋਂ ਵਧੀਆ ਸੋਨਾ, ਚਾਂਦੀ, ਲੱਕੜ ਅਤੇ ਪੱਥਰ ਵਰਤੇ। ਮੰਦਰ ਵਿਚ ਹਜ਼ਾਰਾਂ ਹੀ ਮਾਹਰ ਆਦਮੀਆਂ ਤੇ ਔਰਤਾਂ ਨੇ ਕੰਮ ਕੀਤਾ। ਸੱਤ ਸਾਲ ਬਾਅਦ ਮੰਦਰ ਬਣ ਗਿਆ ਅਤੇ ਯਹੋਵਾਹ ਨੂੰ ਸਮਰਪਿਤ ਕਰਨ ਲਈ ਤਿਆਰ ਸੀ। ਇਸ ਮੰਦਰ ਵਿਚ ਇਕ ਵੇਦੀ ਸੀ ਜਿਸ ʼਤੇ ਬਲ਼ੀਆਂ ਚੜ੍ਹਾਈਆਂ ਗਈਆਂ। ਸੁਲੇਮਾਨ ਨੇ ਵੇਦੀ ਸਾਮ੍ਹਣੇ ਗੋਡਿਆਂ ਭਾਰ ਬੈਠ ਕੇ ਪ੍ਰਾਰਥਨਾ ਕੀਤੀ: ‘ਹੇ ਯਹੋਵਾਹ, ਤੇਰੇ ਲਈ ਇਹ ਮੰਦਰ ਨਾ ਤਾਂ ਬਹੁਤ ਵੱਡਾ ਹੈ ਤੇ ਨਾ ਹੀ ਬਹੁਤ ਸੋਹਣਾ, ਪਰ ਸਾਡੀ ਭਗਤੀ ਤੇ ਸਾਡੀਆਂ ਪ੍ਰਾਰਥਨਾਵਾਂ ਕਬੂਲ ਕਰ।’ ਯਹੋਵਾਹ ਮੰਦਰ ਅਤੇ ਸੁਲੇਮਾਨ ਦੀ ਪ੍ਰਾਰਥਨਾ ਬਾਰੇ ਕੀ ਸੋਚਦਾ ਸੀ? ਜਿਉਂ ਹੀ ਸੁਲੇਮਾਨ ਪ੍ਰਾਰਥਨਾ ਕਰ ਹਟਿਆ, ਤਾਂ ਆਕਾਸ਼ ਤੋਂ ਅੱਗ ਵਰ੍ਹੀ ਜਿਸ ਨੇ ਵੇਦੀ ʼਤੇ ਪਈਆਂ ਬਲ਼ੀਆਂ ਸਾੜ ਦਿੱਤੀਆਂ। ਇੱਦਾਂ ਕਰ ਕੇ ਯਹੋਵਾਹ ਨੇ ਦਿਖਾਇਆ ਕਿ ਉਹ ਮੰਦਰ ਤੋਂ ਬਹੁਤ ਖ਼ੁਸ਼ ਸੀ। ਇਹ ਦੇਖ ਕੇ ਇਜ਼ਰਾਈਲੀਆਂ ਨੇ ਖ਼ੁਸ਼ੀਆਂ ਮਨਾਈਆਂ।

ਰਾਜਾ ਸੁਲੇਮਾਨ ਆਪਣੀ ਬੁੱਧ ਕਰਕੇ ਇਜ਼ਰਾਈਲ ਅਤੇ ਇੱਥੋਂ ਤਕ ਕਿ ਦੂਰ-ਦੂਰ ਦੇਸ਼ਾਂ ਵਿਚ ਵੀ ਜਾਣਿਆ ਜਾਂਦਾ ਸੀ। ਲੋਕ ਸੁਲੇਮਾਨ ਕੋਲ ਆਪਣੀਆਂ ਮੁਸ਼ਕਲਾਂ ਹੱਲ ਕਰਾਉਣ ਆਉਂਦੇ ਸਨ। ਇੱਥੋਂ ਤਕ ਕਿ ਸ਼ਬਾ ਦੀ ਰਾਣੀ ਵੀ ਸੁਲੇਮਾਨ ਦੀ ਪਰੀਖਿਆ ਲੈਣ ਆਈ ਅਤੇ ਉਸ ਨੇ ਸੁਲੇਮਾਨ ਨੂੰ ਬਹੁਤ ਸਾਰੇ ਔਖੇ ਸਵਾਲ ਪੁੱਛੇ। ਜਦੋਂ ਰਾਣੀ ਨੇ ਉਸ ਦੇ ਜਵਾਬ ਸੁਣੇ, ਤਾਂ ਉਸ ਨੇ ਕਿਹਾ: ‘ਤੇਰੇ ਬਾਰੇ ਜੋ ਲੋਕ ਕਹਿੰਦੇ ਸਨ, ਮੈਂ ਉਨ੍ਹਾਂ ਦੀਆਂ ਗੱਲਾਂ ʼਤੇ ਯਕੀਨ ਨਹੀਂ ਕੀਤਾ। ਪਰ ਹੁਣ ਮੈਂ ਜਾਣ ਗਈ ਹਾਂ ਕਿ ਤੂੰ ਕਿੰਨਾ ਹੀ ਜ਼ਿਆਦਾ ਬੁੱਧੀਮਾਨ ਹੈਂ। ਤੇਰੇ ਪਰਮੇਸ਼ੁਰ ਯਹੋਵਾਹ ਨੇ ਤੈਨੂੰ ਬਰਕਤ ਦਿੱਤੀ ਹੈ।’ ਇਜ਼ਰਾਈਲੀਆਂ ਦੀ ਜ਼ਿੰਦਗੀ ਵਧੀਆ ਸੀ ਅਤੇ ਉਹ ਖ਼ੁਸ਼ ਸਨ। ਪਰ ਹਾਲਾਤ ਛੇਤੀ ਹੀ ਬਦਲਣ ਵਾਲੇ ਸਨ।