ਵਿਡਿਓ ਜੋ ਸਾਨੂੰ ਗੰਭੀਰਤਾ ਨਾਲ ਸੋਚਣ ਲਈ ਮਜਬੂਰ ਕਰਦਾ ਹੈ

“ਇਸ ਵਿਡਿਓ ਨੇ ਸੱਚ-ਮੁੱਚ ਸਾਨੂੰ ਸੋਚਣ ਲਈ ਮਜਬੂਰ ਕੀਤਾ!”

“ਇਸ ਵਿਡਿਓ ਨੇ ਮੇਰੇ ਉੱਤੇ ਗਹਿਰਾ ਅਸਰ ਪਾਇਆ!”

“ਇਹ ਵਿਡਿਓ ਦੇਖ ਕੇ ਮੇਰਾ ਗਲਾ ਭਰ ਆਇਆ!”

¹ ਨੌਜਵਾਨ ਪੁੱਛਦੇ ਹਨ—ਮੈਂ ਚੰਗੇ ਮਿੱਤਰ ਕਿਵੇਂ ਬਣਾ ਸਕਦਾ ਹਾਂ? (ਅੰਗ੍ਰੇਜ਼ੀ) ਨਾਂ ਦੇ ਵਿਡਿਓ ਨੂੰ ਪਹਿਲੀ ਵਾਰ ਦੇਖਣ ਤੇ ਕੀ ਤੁਸੀਂ ਵੀ ਇਸੇ ਤਰ੍ਹਾਂ ਮਹਿਸੂਸ ਕੀਤਾ ਸੀ? ਕੁਝ ਸਾਲ ਪਹਿਲਾਂ ਇਕ ਨੌਜਵਾਨ ਭਰਾ ਗ਼ਲਤ ਲੋਕਾਂ ਨਾਲ ਦੋਸਤੀ ਕਰ ਕੇ ਮੁਸ਼ਕਲ ਵਿਚ ਪੈ ਗਿਆ। ਇਨ੍ਹਾਂ ਦੋਸਤਾਂ ਦੇ ਅਸਰ ਹੇਠ ਸੱਚਾਈ ਵਿਚ ਉਸ ਦੀ ਰੁਚੀ ਘੱਟ ਗਈ ਤੇ ਯਹੋਵਾਹ ਨਾਲੋਂ ਉਸ ਦਾ ਰਿਸ਼ਤਾ ਟੁੱਟ ਗਿਆ। ਫਿਰ ਚੰਗੇ ਮਿੱਤਰ ਵਿਡਿਓ ਰਿਲੀਜ਼ ਹੋਇਆ। ਉਸ ਨੇ ਕਿਹਾ: ‘ਮੈਂ ਇਹ ਵਿਡਿਓ ਵਾਰ-ਵਾਰ ਦੇਖਿਆ ਤੇ ਹਰ ਵਾਰ ਦੇਖਣ ਤੇ ਮੱਲੋ-ਮੱਲੀ ਮੇਰੀਆਂ ਅੱਖਾਂ ਵਿਚ ਹੰਝੂ ਆ ਗਏ। ਮੈਂ ਯਹੋਵਾਹ ਦਾ ਸ਼ੁਕਰੀਆ ਅਦਾ ਕੀਤਾ ਕਿ ਉਸ ਨੇ ਸਹੀ ਵਕਤ ਤੇ ਮੇਰੀ ਮਦਦ ਕੀਤੀ।’ ਇਸ ਵਿਡਿਓ ਦੀ ਪ੍ਰੇਰਣਾ ਨਾਲ ਉਸ ਨੇ ਬੁਰੇ ਸਾਥੀਆਂ ਨੂੰ ਛੱਡ ਦਿੱਤਾ ਅਤੇ ਚੰਗੇ ਦੋਸਤ ਬਣਾਏ। ਅੱਗੇ ਉਸ ਨੇ ਕਿਹਾ: “ਜ਼ਾਹਰ ਹੈ ਕਿ ਯਹੋਵਾਹ ਦਾ ਸੰਗਠਨ ਇਸ ਗੱਲ ਦੀ ਪੂਰੀ ਜਾਣਕਾਰੀ ਰੱਖਦਾ ਹੈ ਕਿ ਅੱਜ ਨੌਜਵਾਨਾਂ ਉੱਤੇ ਕਿਹੜੀਆਂ ਗੱਲਾਂ ਦਾ ਅਸਰ ਪੈ ਰਿਹਾ ਹੈ।” ਮਾਪਿਓ ਅਤੇ ਨੌਜਵਾਨੋ, ਕਿਉਂ ਨਾ ਤੁਸੀਂ ਆਪਣੇ ਅਗਲੇ ਪਰਿਵਾਰਕ ਅਧਿਐਨ ਵਿਚ ਇਹ ਵਿਡਿਓ ਦੇਖੋ? ਹਰ ਭਾਗ ਤੋਂ ਬਾਅਦ ਵਿਡਿਓ ਰੋਕੋ ਅਤੇ ਹੇਠਲੇ ਪੈਰਿਆਂ ਵਿਚ ਦਿੱਤੇ ਸਵਾਲਾਂ ਉੱਤੇ ਖੁੱਲ੍ਹ ਕੇ ਚਰਚਾ ਕਰੋ।

² ਜਾਣ-ਪਛਾਣ: ਸੱਚਾ ਮਿੱਤਰ ਕੌਣ ਹੈ?—ਕਹਾ. 18:24.

³ ਮਿੱਤਰਤਾ ਦੇ ਰਾਹ ਵਿਚ ਰੁਕਾਵਟਾਂ: ਜੇ ਤੁਹਾਨੂੰ ਇੱਦਾਂ ਮਹਿਸੂਸ ਹੁੰਦਾ ਹੈ ਕਿ ਸਭ ਲੋਕ ਤੁਹਾਡੇ ਤੋਂ ਦੂਰ-ਦੂਰ ਰਹਿੰਦੇ ਹਨ, ਤਾਂ ਤੁਸੀਂ ਕੀ ਕਰ ਸਕਦੇ ਹੋ? (ਫ਼ਿਲਿ. 2:4) ਤੁਹਾਨੂੰ ਆਪਣੀ ਸ਼ਖ਼ਸੀਅਤ ਨੂੰ ਸੁਧਾਰਨ ਲਈ ਤਿਆਰ ਕਿਉਂ ਰਹਿਣਾ ਚਾਹੀਦਾ ਹੈ ਅਤੇ ਇਸ ਤਰ੍ਹਾਂ ਕਰਨ ਵਿਚ ਕੌਣ ਤੁਹਾਡੀ ਮਦਦ ਕਰ ਸਕਦਾ ਹੈ? ਕਿਹੜੀ ਗੱਲ ਜ਼ਿਆਦਾ ਮਿੱਤਰ ਬਣਾਉਣ ਦੇ ਮੌਕੇ ਪੈਦਾ ਕਰੇਗੀ ਤੇ ਇਹ ਮਿੱਤਰ ਕਿੱਥੇ ਮਿਲ ਸਕਦੇ ਹਨ?—2 ਕੁਰਿੰ. 6:13.

⁴ ਪਰਮੇਸ਼ੁਰ ਨਾਲ ਮਿੱਤਰਤਾ: ਤੁਸੀਂ ਯਹੋਵਾਹ ਦੇ ਮਿੱਤਰ ਕਿਵੇਂ ਬਣ ਸਕਦੇ ਹੋ ਤੇ ਇਹ ਮਿੱਤਰਤਾ ਫ਼ਾਇਦੇਮੰਦ ਕਿਉਂ ਹੈ? (ਜ਼ਬੂ. 34:8) ਪਰਮੇਸ਼ੁਰ ਨਾਲ ਤੁਹਾਡੀ ਮਿੱਤਰਤਾ ਨੂੰ ਕੌਣ ਪੱਕਾ ਕਰ ਸਕਦਾ ਹੈ?

⁵ ਬੁਰੇ ਸਾਥੀ: ਬੁਰੇ ਸਾਥੀ ਕੌਣ ਹਨ? (1 ਕੁਰਿੰ. 15:33) ਬੁਰੇ ਸਾਥੀ ਯਹੋਵਾਹ ਨਾਲ ਤੁਹਾਡੇ ਰਿਸ਼ਤੇ ਨੂੰ ਕਿਵੇਂ ਵਿਗਾੜ ਸਕਦੇ ਹਨ? ਬਾਈਬਲ ਵਿਚ ਦੀਨਾਹ ਦੀ ਕਹਾਣੀ ਤੋਂ ਤੁਸੀਂ ਕੀ ਸਿੱਖਦੇ ਹੋ?—ਉਤ. 34:1, 2, 7, 19.

⁶ ਆਧੁਨਿਕ ਡਰਾਮਾ: ਤਾਰਾ ਉੱਤੇ ਇਕੱਲੇਪਣ ਦਾ ਕੀ ਅਸਰ ਪਿਆ? ਉਸ ਨੇ ਦੁਨਿਆਵੀ ਨੌਜਵਾਨਾਂ ਨਾਲ ਆਪਣੀ ਮਿੱਤਰਤਾ ਨੂੰ ਕਿਵੇਂ ਜਾਇਜ਼ ਕਿਹਾ? ਉਨ੍ਹਾਂ ਨੇ ਉਸ ਨੂੰ ਕਿਹੜੇ ਖ਼ਤਰੇ ਵਿਚ ਪਾ ਦਿੱਤਾ ਸੀ? ਤਾਰਾ ਦੇ ਮਾਪੇ ਇਸ ਖ਼ਤਰੇ ਨੂੰ ਸਮਝਣ ਵਿਚ ਅਸਫ਼ਲ ਕਿਉਂ ਰਹੇ, ਪਰ ਉਨ੍ਹਾਂ ਨੇ ਤਾਰਾ ਦੀ ਅਧਿਆਤਮਿਕ ਤੌਰ ਤੇ ਮਦਦ ਕਰਨ ਲਈ ਕੀ ਕੀਤਾ? ਇਕ ਪਾਇਨੀਅਰ ਭੈਣ ਤਾਰਾ ਦੀ ਸੱਚੀ ਸਹੇਲੀ ਕਿਵੇਂ ਸਾਬਤ ਹੋਈ? ਮਸੀਹੀਆਂ ਨੂੰ ਕਹਾਉਤਾਂ 13:20 ਅਤੇ ਯਿਰਮਿਯਾਹ 17:9 ਉੱਤੇ ਕਿਉਂ ਵਿਚਾਰ ਕਰਨਾ ਚਾਹੀਦਾ ਹੈ? ਤਾਰਾ ਨੇ ਕਿਹੜਾ ਮਹੱਤਵਪੂਰਣ ਸਬਕ ਸਿੱਖਿਆ?

⁷ ਮੁਕਦੀ ਗੱਲ: ਤੁਸੀਂ ਇਸ ਵਿਡਿਓ ਤੋਂ ਕੀ ਸਿੱਖਿਆ? ਦੂਜਿਆਂ ਦੀ ਮਦਦ ਕਰਨ ਲਈ ਤੁਸੀਂ ਇਸ ਵਿਡਿਓ ਨੂੰ ਕਿਵੇਂ ਵਰਤ ਸਕਦੇ ਹੋ?—ਜ਼ਬੂ. 71:17.