“ਕੀ ਤੁਸੀਂ ਦੱਸ ਸਕਦੇ ਹੋ?”
1. ਕਈਆਂ ਨੂੰ ਕਿਹੜੀ ਇਕ ਸਮੱਸਿਆ ਆਉਂਦੀ ਹੈ?
1 ਕੀ ਤੁਹਾਡੇ ਨਾਲ ਇਸ ਤਰ੍ਹਾਂ ਹੁੰਦਾ ਹੈ ਕਿ ਤੁਹਾਨੂੰ ਪਰਮੇਸ਼ੁਰ ਦਾ ਬਚਨ ਪੜ੍ਹਨਾ ਤਾਂ ਪਸੰਦ ਹੈ, ਪਰ ਇਸ ਵਿਚ ਦੱਸੀਆਂ ਘਟਨਾਵਾਂ ਬਾਰੇ ਸਾਰੀਆਂ ਗੱਲਾਂ ਯਾਦ ਰੱਖਣੀਆਂ ਮੁਸ਼ਕਲ ਹਨ ਜਾਂ ਤੁਹਾਨੂੰ ਯਾਦ ਨਹੀਂ ਰਹਿੰਦਾ ਕਿ ਕਿਹੜੀ ਗੱਲ ਕਿੱਥੇ ਲਿਖੀ ਹੈ? ਕੀ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਡੇ ਬੱਚੇ ਬਾਈਬਲ ਦੀਆਂ ਗੱਲਾਂ ਦੀ ਸਹੀ ਸਮਝ ਪ੍ਰਾਪਤ ਕਰਨ? ਜਾਗਰੂਕ ਬਣੋ! ਰਸਾਲੇ ਦੇ ਸਫ਼ਾ 31 ਉੱਤੇ ਛਪਦਾ ਲੇਖ “ਕੀ ਤੁਸੀਂ ਦੱਸ ਸਕਦੇ ਹੋ?” ਪਰਮੇਸ਼ੁਰ ਦੇ ਬਚਨ ਦੀ ਸਮਝ ਵਧਾਉਣ ਵਿਚ ਵੱਡੇ-ਛੋਟੇ ਸਾਰਿਆਂ ਦੀ ਮਦਦ ਕਰ ਸਕਦਾ ਹੈ।—ਰਸੂ. 17:11.
2. “ਕੀ ਤੁਸੀਂ ਦੱਸ ਸਕਦੇ ਹੋ?” ਨਾਮਕ ਲੇਖ ਨੂੰ ਕਿਵੇਂ ਵਰਤਿਆ ਜਾ ਸਕਦਾ ਹੈ?
2 ਤੁਸੀਂ ਇਸ ਲੇਖ ਨੂੰ ਕਿਵੇਂ ਵਰਤ ਸਕਦੇ ਹੋ? ਅਪ੍ਰੈਲ-ਜੂਨ 2006 ਦੇ ਜਾਗਰੂਕ ਬਣੋ! ਵਿਚ ਇਸ ਲੇਖ ਨੂੰ ਵਰਤਣ ਬਾਰੇ ਇਹ ਸੁਝਾਅ ਦਿੱਤਾ ਗਿਆ ਸੀ: “[ਇਸ ਲੇਖ ਵਿਚ ਦਿੱਤੇ] ਕਈ ਸਵਾਲ ਬੱਚਿਆਂ ਨੂੰ ਦਿਲਚਸਪ ਲੱਗਣਗੇ, ਪਰ ਕਈ ਸਵਾਲ ਵੱਡਿਆਂ ਦੀ ਯਾਦਾਸ਼ਤ ਨੂੰ ਪਰਖਣਗੇ। ਇਸ ਵਿਚ ‘ਇਤਿਹਾਸ ਵਿਚ ਕਦੋਂ?’ ਨਾਮਕ ਭਾਗ ਤੁਹਾਡੀ ਇਹ ਦੇਖਣ ਵਿਚ ਮਦਦ ਕਰੇਗਾ ਕਿ ਬਾਈਬਲ ਵਿਚ ਦੱਸੇ ਲੋਕ ਕਿਨ੍ਹਾਂ ਸਾਲਾਂ ਦੌਰਾਨ ਜੀਉਂਦੇ ਸਨ ਅਤੇ ਅਹਿਮ ਘਟਨਾਵਾਂ ਕਦੋਂ ਵਾਪਰੀਆਂ ਸਨ। ‘ਇਸ ਅੰਕ ਵਿੱਚੋਂ’ ਨਾਮਕ ਭਾਗ ਵਿਚ ਦਿੱਤੇ ਸਵਾਲਾਂ ਦੇ ਜਵਾਬ ਤੁਹਾਨੂੰ ਉਸੇ ਅੰਕ ਵਿੱਚੋਂ ਲੱਭਣੇ ਪੈਣਗੇ, ਜਦ ਕਿ ਹੋਰ ਸਵਾਲਾਂ ਦੇ ਜਵਾਬ ਉਸੇ ਸਫ਼ੇ ਉੱਤੇ ਪੁੱਠੇ ਛਾਪੇ ਗਏ ਹੋਣਗੇ। ਜਵਾਬ ਪੜ੍ਹਨ ਤੋਂ ਪਹਿਲਾਂ ਕਿਉਂ ਨਾ ਤੁਸੀਂ ਕੁਝ ਛਾਣਬੀਣ ਕਰੋ? ਫਿਰ ਤੁਸੀਂ ਜੋ ਕੁਝ ਸਿੱਖਦੇ ਹੋ, ਉਹ ਦੂਸਰਿਆਂ ਨੂੰ ਦੱਸੋ। ਤੁਸੀਂ ਪਰਿਵਾਰ ਨਾਲ ਮਿਲ ਕੇ ਜਾਂ ਦੋਸਤਾਂ-ਮਿੱਤਰਾਂ ਨਾਲ ਮਿਲ ਕੇ ਵੀ [ਇਸ] ਲੇਖ ਉੱਤੇ ਚਰਚਾ ਕਰ ਸਕਦੇ ਹੋ।”
3. ਕੁਝ ਪਰਿਵਾਰਾਂ ਨੇ ਇਸ ਲੇਖ ਤੋਂ ਕਿਵੇਂ ਫ਼ਾਇਦਾ ਲਿਆ ਹੈ ਅਤੇ ਇਸ ਦਾ ਕਿਹੜਾ ਭਾਗ ਤੁਹਾਨੂੰ ਸਭ ਤੋਂ ਪਸੰਦ ਹੈ?
3 ਬਹੁਤ ਸਾਰੇ ਮਾਤਾ-ਪਿਤਾ ਬੱਚਿਆਂ ਨਾਲ ਅਧਿਐਨ ਕਰਨ ਵੇਲੇ ਇਸ ਲੇਖ ਉੱਤੇ ਚਰਚਾ ਕਰਦੇ ਹਨ। ਬ੍ਰਾਜ਼ੀਲ ਵਿਚ ਰਹਿਣ ਵਾਲੇ ਇਕ ਭਰਾ ਨੇ ਕਿਹਾ: “ਮੈਂ ਤੇ ਮੇਰਾ ਸੱਤ ਸਾਲਾਂ ਦਾ ਮੁੰਡਾ ਮੋਇਜ਼ਜ਼ ਇਸ ਲੇਖ ਨੂੰ ਬਹੁਤ ਪਸੰਦ ਕਰਦੇ ਹਾਂ। ਇਸ ਲੇਖ ਦੀ ਮਦਦ ਨਾਲ ਮੋਇਜ਼ਜ਼ ਨੇ ਧਿਆਨ ਦੇਣਾ, ਬਾਈਬਲ ਦੀਆਂ ਆਇਤਾਂ ਲੱਭਣੀਆਂ, ਤਸਵੀਰਾਂ ਵਿਚ ਦਰਸਾਈਆਂ ਗੱਲਾਂ ਨੂੰ ਸਮਝਣਾ ਅਤੇ ਬਾਈਬਲ ਵਿਚ ਦਰਜ ਘਟਨਾਵਾਂ ਦੀਆਂ ਤਾਰੀਖ਼ਾਂ ਨੂੰ ਚੇਤੇ ਰੱਖਣਾ ਸਿੱਖਿਆ ਹੈ।” ਅੱਠਾਂ ਸਾਲਾਂ ਦੀ ਐਸ਼ਲੀ ਲਿਖਦੀ ਹੈ: “ਜਾਗਰੂਕ ਬਣੋ! ਵਿਚ ‘ਕੀ ਤੁਸੀਂ ਦੱਸ ਸਕਦੇ ਹੋ?’ ਲੇਖ ਛਾਪਣ ਲਈ ਤੁਹਾਡਾ ਬਹੁਤ ਧੰਨਵਾਦ! ਮੈਂ ਇਸ ਲੇਖ ਦੀ ਮਦਦ ਨਾਲ ਬਾਈਬਲ ਦੀਆਂ ਕਈ ਗੱਲਾਂ ਸਿੱਖੀਆਂ ਹਨ।”
4. ਪਰਿਵਾਰਕ ਅਧਿਐਨ ਵਿਚ ਇਸ ਲੇਖ ਨੂੰ ਕਿਵੇਂ ਵਰਤਿਆ ਜਾ ਸਕਦਾ ਹੈ?
4 ਸੋ ਕਿਉਂ ਨਾ ਤੁਸੀਂ ਆਪਣੇ ਪਰਿਵਾਰ ਨਾਲ ਅਧਿਐਨ ਕਰਨ ਵੇਲੇ ਸਮੇਂ-ਸਮੇਂ ਤੇ ਇਸ ਲੇਖ ਨੂੰ ਇਸਤੇਮਾਲ ਕਰੋ? ਤੁਸੀਂ ਔਖੇ ਸਵਾਲਾਂ ਦੇ ਜਵਾਬ ਲੱਭਣ ਲਈ ਇੰਡੈਕਸ ਜਾਂ ਸੀ. ਡੀ.-ਰੋਮ ਉੱਤੇ ਵਾਚਟਾਵਰ ਲਾਇਬ੍ਰੇਰੀ ਇਸਤੇਮਾਲ ਕਰ ਸਕਦੇ ਹੋ। ਇਨ੍ਹਾਂ ਨੂੰ ਇਸਤੇਮਾਲ ਕਰ ਕੇ ਤੁਸੀਂ ਆਪਣੇ ਬੱਚਿਆਂ ਨੂੰ ਰਿਸਰਚ ਕਰਨੀ ਸਿਖਾ ਸਕਦੇ ਹੋ। ਜੇ ਤੁਹਾਡੇ ਬੱਚੇ ਵੱਡੇ ਹਨ, ਤਾਂ ਤੁਸੀਂ ਉਨ੍ਹਾਂ ਨੂੰ ਅਧਿਐਨ ਤੋਂ ਪਹਿਲਾਂ “ਬੁੱਝੋ ਮੈਂ ਕੌਣ ਹਾਂ?” ਜਾਂ “ਇਹ ਘਟਨਾ ਕਦੋਂ ਵਾਪਰੀ?” ਸਵਾਲਾਂ ਦੇ ਜਵਾਬ ਲੱਭਣ ਦਾ ਕੰਮ ਦੇ ਸਕਦੇ ਹੋ। ਫਿਰ ਉਹ ਅਧਿਐਨ ਦੌਰਾਨ ਜਵਾਬ ਤੇ ਹੋਰ ਸੰਬੰਧਿਤ ਜਾਣਕਾਰੀ ਦੇ ਸਕਦੇ ਹਨ। ਇਸ ਲੇਖ ਨੂੰ ਵਰਤ ਕੇ ਮਾਪੇ ਆਪਣੇ ਬੱਚਿਆਂ ਦੇ ਦਿਲਾਂ ਵਿਚ ਪਰਮੇਸ਼ੁਰ ਦਾ ਬਚਨ ਬਿਠਾ ਸਕਦੇ ਹਨ ਅਤੇ ਛੋਟੀ ਉਮਰ ਤੋਂ ਹੀ ਉਨ੍ਹਾਂ ਨੂੰ “ਪਵਿੱਤਰ ਲਿਖਤਾਂ” ਦਾ ਗਿਆਨ ਦੇ ਸਕਦੇ ਹਨ।—2 ਤਿਮੋ. 3:15; ਬਿਵ. 6:7.