ਰੋਜ਼ ਯਹੋਵਾਹ ਦੀ ਉਸਤਤ ਕਰੋ
1. ਪਰਮੇਸ਼ੁਰ ਦੇ ਸੇਵਕ ਕੀ ਕਰਨ ਲਈ ਪ੍ਰੇਰਿਤ ਹੁੰਦੇ ਹਨ ਤੇ ਕਿਉਂ?
1 ਰਾਜਾ ਦਾਊਦ ਨੇ ਆਪਣੇ ਮਨ ਵਿਚ ਧਾਰਿਆ ਕਿ ਉਹ ਯਹੋਵਾਹ ਦੀ “ਦਿਨੋ ਦਿਨ,” ਸਗੋਂ ਜੁੱਗੋ-ਜੁੱਗ ਉਸਤਤ ਕਰੇਗਾ। (ਜ਼ਬੂ. 145:2, 7, 21) ਸਾਡੇ ਕੋਲ ਵੀ ਹਰ ਰੋਜ਼ ਯਹੋਵਾਹ ਦੀ ਉਸਤਤ ਕਰਨ ਦਾ ਚੰਗਾ ਕਾਰਨ ਹੈ।—ਜ਼ਬੂ. 37:10; 145:14, 18; 2 ਪਤ. 3:13.
2. ਪਰਿਵਾਰ ਹਰ ਰੋਜ਼ ਯਹੋਵਾਹ ਦੀ ਉਸਤਤ ਕਿੱਦਾਂ ਕਰ ਸਕਦੇ ਹਨ?
2 ਆਪਣੇ ਘਰ ਬੈਠਿਆਂ ਯਹੋਵਾਹ ਦੀ ਉਸਤਤ ਕਰੋ: ਸਾਡੇ ਕੋਲ ਕਿੰਨਾ ਵਧੀਆ ਸਾਹਿੱਤ ਹੈ ਜਿਸ ਦੀ ਮਦਦ ਨਾਲ ਅਸੀਂ ਪਰਮੇਸ਼ੁਰ ਬਾਰੇ ਗੱਲਾਂ ਕਰ ਸਕਦੇ ਹਾਂ। ਇੱਦਾਂ ਅਸੀਂ ਉਦੋਂ ਕਰਦੇ ਹਾਂ ਜਦੋਂ ਅਸੀਂ ਰੋਜ਼ ਦਾ ਹਵਾਲਾ ਪੜ੍ਹ ਕੇ ਉਸ ਉੱਤੇ ਚਰਚਾ ਕਰਦੇ ਹਾਂ, ਪਰਿਵਾਰਕ ਸਟੱਡੀ ਕਰਦੇ ਹਾਂ ਤੇ ਸਭਾਵਾਂ ਦੀ ਤਿਆਰੀ ਕਰਦੇ ਹਾਂ। ਕਈ ਪਰਿਵਾਰ ਘੱਟੋ-ਘੱਟ ਦਿਨ ਵਿਚ ਇਕ ਵਾਰ ਇਕੱਠੇ ਬੈਠ ਕੇ ਰੋਟੀ ਖਾਂਦੇ ਹਨ। ਇਵੇਂ ਉਹ ਆਰਾਮ ਨਾਲ ਇਕ-ਦੂਜੇ ਨਾਲ ਗੱਲਾਂ ਕਰ ਸਕਦੇ ਹਨ ਤੇ ਉਨ੍ਹਾਂ ਨੂੰ ਯਹੋਵਾਹ ਦੀ ਉਸਤਤ ਕਰਨ ਦਾ ਵਧੀਆ ਮੌਕਾ ਮਿਲਦਾ ਹੈ। ਯਹੋਵਾਹ ਬਾਰੇ ਗੱਲਾਂ ਕਰਨ ਨਾਲ ਮਾਪਿਆਂ ਨੂੰ ਆਪਣੇ ਬੱਚਿਆਂ ਦੀ “ਪ੍ਰਭੁ ਦੀ ਸਿੱਖਿਆ ਅਰ ਮੱਤ” ਦੇ ਕੇ ਪਰਵਰਿਸ਼ ਕਰਨ ਵਿਚ ਬਹੁਤ ਮਦਦ ਮਿਲੇਗੀ।—ਅਫ਼. 6:4; ਬਿਵ. 6:5-7.
3. ਭੈਣਾਂ-ਭਰਾਵਾਂ ਨਾਲ ਹੁੰਦਿਆਂ ਸਾਡੇ ਕੋਲ ਕਿਹੜੇ ਮੌਕੇ ਹੁੰਦੇ ਹਨ?
3 ਭਰਾਵਾਂ ਨਾਲ ਮਿਲ ਕੇ ਯਹੋਵਾਹ ਦੀ ਉਸਤਤ ਕਰੋ: ਜਦੋਂ ਅਸੀਂ ਪ੍ਰਚਾਰ ਕਰਦੇ ਹਾਂ ਜਾਂ ਆਪਣੀਆਂ ਸਭਾਵਾਂ ਵਿਚ ਹੁੰਦੇ ਹਾਂ, ਤਾਂ ਸਾਨੂੰ ਭੈਣਾਂ-ਭਰਾਵਾਂ ਨਾਲ ਮਿਲ ਕੇ ਯਹੋਵਾਹ ਦੀ ਉਸਤਤ ਕਰਨ ਦੇ ਵਧੀਆ ਮੌਕੇ ਮਿਲਦੇ ਹਨ। (ਕਹਾ. 15:30; ਫ਼ਿਲਿ. 4:8; ਇਬ. 13:15) ਅਸੀਂ ਸਾਰੇ ਯਹੋਵਾਹ ਨੂੰ ਪਿਆਰ ਕਰਦੇ ਹਾਂ, ਇਸ ਲਈ ਇਕ-ਦੂਜੇ ਨਾਲ ਗੱਲਾਂ ਕਰਦਿਆਂ ਦਿਲੋਂ ਯਹੋਵਾਹ ਦੀ ਭਲਿਆਈ ਲਈ ਧੰਨਵਾਦ ਕਰਨਾ ਸਾਡੇ ਲਈ ਸੌਖਾ ਹੁੰਦਾ ਹੈ।—ਜ਼ਬੂ. 106:1.
4. ਤੁਸੀਂ ਹੋਰ ਕਿਹੜੇ ਮੌਕਿਆਂ ਤੇ ਪ੍ਰਚਾਰ ਕਰ ਕੇ ਯਹੋਵਾਹ ਦੀ ਉਸਤਤ ਕਰ ਸਕਦੇ ਹੋ?
4 ਯਹੋਵਾਹ ਨੂੰ ਨਾ ਮੰਨਣ ਵਾਲਿਆਂ ਨਾਲ ਗੱਲਾਂ ਕਰਦਿਆਂ ਉਸ ਦੀ ਉਸਤਤ ਕਰੋ: ਭਾਵੇਂ ਕਿ ਅਸੀਂ ਰੋਜ਼ ਪ੍ਰਚਾਰ ʼਤੇ ਨਹੀਂ ਜਾ ਸਕਦੇ, ਪਰ ਅਸੀਂ ਕੰਮ ਦੀ ਥਾਂ ਤੇ, ਸਕੂਲੇ ਅਤੇ ਹੋਰਨਾਂ ਨਾਲ ਯਹੋਵਾਹ ਅਤੇ ਉਸ ਦੇ ਮਕਸਦਾਂ ਬਾਰੇ ਗੱਲਾਂ ਕਰ ਕੇ ਨੇਕਦਿਲ ਲੋਕਾਂ ਨੂੰ ਉਮੀਦ ਦੇ ਸਕਦੇ ਹਾਂ। (ਜ਼ਬੂ. 27:14; 1 ਪਤ. 3:15) ਜਹਾਜ਼ ਵਿਚ ਸਫ਼ਰ ਕਰਦਿਆਂ ਇਕ ਭੈਣ ਨੇ ਇਕ ਔਰਤ ਨੂੰ ਗਵਾਹੀ ਦੇ ਕੇ ਉਸ ਦਾ ਇੰਨਾ ਹੌਸਲਾ ਵਧਾਇਆ ਕਿ ਉਸ ਨੇ ਭੈਣ ਨੂੰ ਆਪਣਾ ਅਤਾ-ਪਤਾ ਤੇ ਟੈਲੀਫ਼ੋਨ ਨੰਬਰ ਦਿੱਤਾ ਤਾਂਕਿ ਉਹ ਇਕ-ਦੂਜੇ ਨਾਲ ਸੰਪਰਕ ਰੱਖ ਸਕਣ। ਜਿਉਂ-ਜਿਉਂ ਇਸ ਦੁਨੀਆਂ ਦੇ ਹਾਲਾਤ ਵਿਗੜਦੇ ਜਾ ਰਹੇ ਹਨ, ਯਹੋਵਾਹ ਦੇ ਲੋਕ ਉਨ੍ਹਾਂ ਲੋਕਾਂ ਨੂੰ “ਭਲਿਆਈ ਦੀ ਖੁਸ਼ ਖਬਰੀ” ਸੁਣਾਉਂਦੇ ਹਨ ਜੋ ਸੁਣਨ ਲਈ ਤਿਆਰ ਹਨ। ਇਹ ਖ਼ਬਰ ਸੁਣ ਕੇ ਲੋਕਾਂ ਨੂੰ ਉਮੀਦ ਮਿਲਦੀ ਹੈ ਤੇ ਉਹ ਵੀ ਯਹੋਵਾਹ ਦੀ ਉਸਤਤ ਕਰਨ ਲੱਗ ਪੈਂਦੇ ਹਨ।—ਯਸਾ. 52:7; ਰੋਮੀ. 15:11.
5. ਅਸੀਂ ਯਹੋਵਾਹ ਦੀ ਉਸਤਤ ਕਿਉਂ ਕਰਨਾ ਚਾਹੁੰਦੇ ਹਾਂ ਤੇ ਇਸ ਦੇ ਨਤੀਜੇ ਕੀ ਨਿਕਲ ਸਕਦੇ ਹਨ?
5 ਯਹੋਵਾਹ ਰੋਜ਼ ਆਪਣੇ ਸੇਵਕਾਂ ਤੋਂ ਆਪਣੀ ਉਸਤਤ ਸੁਣ ਕੇ ਕਿੰਨਾ ਖ਼ੁਸ਼ ਹੁੰਦਾ ਹੋਣਾ! ਜਿਸ ਤਰ੍ਹਾਂ ਸ੍ਰਿਸ਼ਟੀ ਪਰਮੇਸ਼ੁਰ ਦੀ ਮਹਿਮਾ ਕਰਦੀ ਹੈ, ਉਸੇ ਤਰ੍ਹਾਂ ਅਸੀਂ ਵੀ ਆਪਣੇ ਘਰਾਂ ਵਿਚ ਬੈਠਿਆਂ, ਕਲੀਸਿਯਾ ਵਿਚ ਹੁੰਦਿਆਂ ਅਤੇ ਉਨ੍ਹਾਂ ਲੋਕਾਂ ਨਾਲ ਗੱਲਾਂ ਕਰਦਿਆਂ ਯਹੋਵਾਹ ਦੀ ਉਸਤਤ ਕਰ ਸਕਦੇ ਹਾਂ ਜੋ ਅਜੇ ਯਹੋਵਾਹ ਨੂੰ ਨਹੀਂ ਮੰਨਦੇ।—ਜ਼ਬੂ. 19:1-4.