ਯਿਸੂ ਬਾਰੇ ਸੱਚਾਈ ਦਾ ਪ੍ਰਚਾਰ ਕਰੋ

¹ ਮਸਹ ਕੀਤੇ ਹੋਏ ਮਸੀਹੀ ਆਪਣੇ ਸਾਥੀਆਂ ਯਾਨੀ ਹੋਰ ਭੇਡਾਂ ਦੀ ਮਦਦ ਨਾਲ “ਯਿਸੂ ਦੀ ਸਾਖੀ ਭਰਦੇ ਹਨ।” (ਪਰ. 12:17) ਇਹ ਇਕ ਅਹਿਮ ਕੰਮ ਹੈ, ਕਿਉਂਕਿ ਲੋਕ ਸਿਰਫ਼ ਯਿਸੂ ਦੁਆਰਾ ਹੀ ਮੁਕਤੀ ਹਾਸਲ ਕਰ ਸਕਦੇ ਹਨ।—ਯੂਹੰ. 17:3; ਰਸੂ. 4:12.

² ‘ਰਾਹ, ਸਚਿਆਈ ਅਤੇ ਜੀਉਣ’: ਯਿਸੂ ਨੇ ਕਿਹਾ: “ਰਾਹ ਅਤੇ ਸਚਿਆਈ ਅਤੇ ਜੀਉਣ ਮੈਂ ਹਾਂ। ਕੋਈ ਮੇਰੇ ਵਸੀਲੇ ਬਿਨਾ ਪਿਤਾ ਦੇ ਕੋਲ ਨਹੀਂ ਆਉਂਦਾ।” (ਯੂਹੰ. 14:6) ਯਿਸੂ “ਰਾਹ” ਹੈ ਕਿਉਂਕਿ ਸਿਰਫ਼ ਉਸੇ ਦੁਆਰਾ ਅਸੀਂ ਪ੍ਰਾਰਥਨਾ ਰਾਹੀਂ ਪਰਮੇਸ਼ੁਰ ਨਾਲ ਗੱਲ ਕਰ ਸਕਦੇ ਹਾਂ ਅਤੇ ਯਹੋਵਾਹ ਨਾਲ ਇਕ ਚੰਗਾ ਰਿਸ਼ਤਾ ਬਣਾ ਸਕਦੇ ਹਾਂ। (ਯੂਹੰ. 15:16) ਯਿਸੂ “ਸਚਿਆਈ” ਹੈ ਕਿਉਂਕਿ ਇਬਰਾਨੀ ਸ਼ਾਸਤਰ ਵਿਚ ਦਿੱਤੀਆਂ ਭਵਿੱਖਬਾਣੀਆਂ ਅਤੇ ਨਿਸ਼ਾਨੀਆਂ ਉਸ ਵਿਚ ਪੂਰੀਆਂ ਹੋਈਆਂ ਹਨ। (ਯੂਹੰ. 1:17; ਕੁਲੁ. 2:16, 17) ਸੱਚੀ ਭਵਿੱਖਬਾਣੀ ਦਾ ਮੁੱਖ ਉਦੇਸ਼ ਇਹੀ ਹੈ ਕਿ ਉਹ ਪਰਮੇਸ਼ੁਰ ਦੇ ਮਕਸਦ ਦੀ ਪੂਰਤੀ ਵਿਚ ਯਿਸੂ ਦੀ ਮੁੱਖ ਭੂਮਿਕਾ ਉੱਤੇ ਚਾਨਣ ਪਾਵੇ। (ਪਰ. 19:10) ਯਿਸੂ “ਜੀਉਣ” ਵੀ ਹੈ। ਸਦਾ ਦੀ ਜ਼ਿੰਦਗੀ ਦੀ ਬਰਕਤ ਹਾਸਲ ਕਰਨ ਲਈ ਲੋਕਾਂ ਨੂੰ ਉਸ ਦੇ ਰਿਹਾਈ-ਕੀਮਤ ਬਲੀਦਾਨ ਵਿਚ ਨਿਹਚਾ ਕਰਨੀ ਪਵੇਗੀ।—ਯੂਹੰ. 3:16, 36; ਇਬ. 2:9.

³ ਸਿਰ ਅਤੇ ਰਾਜਾ: ਲੋਕਾਂ ਨੂੰ ਇਹ ਵੀ ਮੰਨਣ ਦੀ ਲੋੜ ਹੈ ਕਿ ਯਹੋਵਾਹ ਨੇ ਯਿਸੂ ਨੂੰ ਵੱਡਾ ਅਧਿਕਾਰ ਦਿੱਤਾ ਹੈ। ਯਿਸੂ ਨੂੰ ਪਰਮੇਸ਼ੁਰ ਦੇ ਰਾਜ ਦਾ ਰਾਜਾ ਬਣਾਇਆ ਗਿਆ ਹੈ—ਉਹ “ਲੋਕਾਂ ਦੀ ਆਗਿਆਕਾਰੀ” ਹਾਸਲ ਕਰਨ ਦਾ ਹੱਕਦਾਰ ਹੈ। (ਉਤ. 49:10) ਇਸ ਤੋਂ ਇਲਾਵਾ, ਯਹੋਵਾਹ ਨੇ ਉਸ ਨੂੰ ਕਲੀਸਿਯਾ ਦਾ ਸਿਰ ਵੀ ਠਹਿਰਾਇਆ ਹੈ। (ਅਫ਼. 1:22, 23) ਸਾਨੂੰ ਆਪਣੇ ਬਾਈਬਲ ਵਿਦਿਆਰਥੀਆਂ ਨੂੰ ਇਹ ਸਮਝਾਉਣ ਦੀ ਲੋੜ ਹੈ ਕਿ ਯਿਸੂ ਕਿੱਦਾਂ ਕਲੀਸਿਯਾ ਦੀ ਨਿਗਰਾਨੀ ਕਰਦਾ ਹੈ ਅਤੇ “ਮਾਤਬਰ ਅਤੇ ਬੁੱਧਵਾਨ ਨੌਕਰ” ਦੁਆਰਾ ‘ਵੇਲੇ ਸਿਰ ਅਧਿਆਤਮਿਕ ਰਸਤ’ ਦਿੰਦਾ ਹੈ।—ਮੱਤੀ 24:45-47.

⁴ ਦਿਆਲੂ ਪ੍ਰਧਾਨ ਜਾਜਕ: ਯਿਸੂ ਨੇ ਆਪਣੀ ਮਨੁੱਖੀ ਜ਼ਿੰਦਗੀ ਦੌਰਾਨ ਕਈ ਅਜ਼ਮਾਇਸ਼ਾਂ ਅਤੇ ਦੁੱਖ ਸਹੇ ਸਨ। ਇਸ ਲਈ, “ਉਹ ਓਹਨਾਂ ਦੀ ਜਿਹੜੇ ਪਰਤਾਵੇ ਵਿੱਚ ਪੈਂਦੇ ਹਨ ਸਹਾਇਤਾ ਕਰ ਸੱਕਦਾ ਹੈ।” (ਇਬ. 2:17, 18) ਨਾਮੁਕੰਮਲ ਇਨਸਾਨਾਂ ਨੂੰ ਇਹ ਜਾਣ ਕੇ ਕਿੰਨੀ ਤਸੱਲੀ ਮਿਲਦੀ ਹੈ ਕਿ ਯਿਸੂ ਉਨ੍ਹਾਂ ਦੀਆਂ ਕਮਜ਼ੋਰੀਆਂ ਨੂੰ ਸਮਝਦਾ ਹੈ ਅਤੇ ਉਨ੍ਹਾਂ ਲਈ ਦਇਆ ਨਾਲ ਸਫ਼ਾਰਸ਼ ਕਰਦਾ ਹੈ! (ਰੋਮੀ. 8:34) ਯਿਸੂ ਦੇ ਬਲੀਦਾਨ ਦੇ ਆਧਾਰ ਉੱਤੇ ਅਤੇ ਪ੍ਰਧਾਨ ਜਾਜਕ ਦੀ ਹੈਸੀਅਤ ਵਿਚ ਉਸ ਦੀਆਂ ਸੇਵਾਵਾਂ ਦੁਆਰਾ ਅਸੀਂ “ਦਿਲੇਰੀ ਨਾਲ” ਯਹੋਵਾਹ ਨੂੰ ਪ੍ਰਾਰਥਨਾ ਕਰ ਕੇ ‘ਵੇਲੇ ਸਿਰ ਸਹਾਇਤਾ’ ਹਾਸਲ ਕਰ ਸਕਦੇ ਹਾਂ।—ਇਬ. 4:15, 16.

⁵ ਆਓ ਆਪਾਂ ਦੂਸਰਿਆਂ ਨੂੰ ਯਿਸੂ ਬਾਰੇ ਸੱਚਾਈ ਸਿਖਾਉਣ ਦੀ ਪੂਰੀ ਕੋਸ਼ਿਸ਼ ਕਰੀਏ ਤਾਂਕਿ ਉਹ ਵੀ ਸਾਡੇ ਨਾਲ ਮਿਲ ਕੇ ਯਿਸੂ ਦੀ ਆਗਿਆ ਮੰਨਣ ਅਤੇ ਉਸ ਦੀ ਸੇਵਾ ਕਰਨ ਲਈ ਪ੍ਰੇਰਿਤ ਹੋਣ।—ਯੂਹੰ. 14:15, 21.

ਆਪਣੇ ਕਲੀਸਿਯਾ ਪੁਸਤਕ ਅਧਿਐਨ ਨਿਗਾਹਬਾਨ ਦੀ ਮਦਦ ਕਰੋ

¹ ਕਲੀਸਿਯਾ ਪੁਸਤਕ ਅਧਿਐਨ ਤੋਂ ਸਾਨੂੰ ਸਾਰਿਆਂ ਨੂੰ ਬਹੁਤ ਸਾਰੇ ਫ਼ਾਇਦੇ ਹੁੰਦੇ ਹਨ। ਪਿਛਲੇ ਮਹੀਨੇ ਅਸੀਂ ਚਰਚਾ ਕੀਤੀ ਸੀ ਕਿ ਕਲੀਸਿਯਾ ਪੁਸਤਕ ਅਧਿਐਨ ਨਿਗਾਹਬਾਨ ਕਿੱਦਾਂ ਆਪਣੀ ਜ਼ਿੰਮੇਵਾਰੀ ਪੂਰੀ ਕਰਦਾ ਹੈ। ਪਰ ਅਸੀਂ ਉਸ ਦੀ ਮਦਦ ਕਰਨ ਲਈ ਕੀ ਕਰ ਸਕਦੇ ਹਾਂ ਜਿਸ ਨਾਲ ਸਾਨੂੰ ਅਤੇ ਦੂਸਰਿਆਂ ਨੂੰ ਵੀ ਲਾਭ ਹੋਵੇ?

² ਹਰ ਹਫ਼ਤੇ ਹਾਜ਼ਰ ਰਹੋ: ਪੁਸਤਕ ਅਧਿਐਨ ਗਰੁੱਪ ਕਾਫ਼ੀ ਛੋਟੇ ਹੁੰਦੇ ਹਨ, ਇਸ ਲਈ ਤੁਹਾਡੀ ਹਾਜ਼ਰੀ ਬਹੁਤ ਜ਼ਰੂਰੀ ਹੈ। ਹਰ ਹਫ਼ਤੇ ਅਧਿਐਨ ਵਿਚ ਹਾਜ਼ਰ ਰਹਿਣ ਦਾ ਟੀਚਾ ਰੱਖੋ। ਤੁਹਾਡੇ ਸਮੇਂ ਸਿਰ ਆਉਣ ਨਾਲ ਵੀ ਨਿਗਾਹਬਾਨ ਨੂੰ ਕਾਫ਼ੀ ਮਦਦ ਮਿਲੇਗੀ ਕਿਉਂਕਿ ਇਸ ਤਰ੍ਹਾਂ ਉਹ ਸਭਾ ਨੂੰ ਵਿਵਸਥਿਤ ਢੰਗ ਨਾਲ ਸ਼ੁਰੂ ਕਰ ਸਕੇਗਾ।—1 ਕੁਰਿੰ. 14:40.

³ ਉਤਸ਼ਾਹਿਤ ਕਰਨ ਵਾਲੀਆਂ ਟਿੱਪਣੀਆਂ: ਤੁਸੀਂ ਚੰਗੀ ਤਿਆਰੀ ਕਰਨ ਅਤੇ ਉਤਸ਼ਾਹਿਤ ਕਰਨ ਵਾਲੀਆਂ ਟਿੱਪਣੀਆਂ ਦੇਣ ਦੁਆਰਾ ਵੀ ਨਿਗਾਹਬਾਨ ਦੀ ਮਦਦ ਕਰ ਸਕਦੇ ਹੋ। ਪੈਰੇ ਵਿੱਚੋਂ ਸਿਰਫ਼ ਇਕ ਨੁਕਤੇ ਬਾਰੇ ਦੱਸਣਾ ਬਿਹਤਰ ਹੁੰਦਾ ਹੈ, ਕਿਉਂਕਿ ਇਸ ਨਾਲ ਦੂਸਰਿਆਂ ਨੂੰ ਵੀ ਜਵਾਬ ਦੇਣ ਦਾ ਮੌਕਾ ਮਿਲੇਗਾ। ਪੂਰੇ ਪੈਰੇ ਉੱਤੇ ਟਿੱਪਣੀ ਨਾ ਦਿਓ। ਜੇ ਕਿਸੇ ਖ਼ਾਸ ਗੱਲ ਨੇ ਤੁਹਾਨੂੰ ਪ੍ਰਭਾਵਿਤ ਕੀਤਾ ਹੈ, ਤਾਂ ਤੁਸੀਂ ਆਪਣੀ ਟਿੱਪਣੀ ਵਿਚ ਆਪਣੇ ਵਿਚਾਰ ਦੱਸ ਕੇ ਚਰਚਾ ਨੂੰ ਹੋਰ ਜ਼ਿਆਦਾ ਉਤਸ਼ਾਹਜਨਕ ਬਣਾ ਸਕਦੇ ਹੋ।—1 ਪਤ. 4:10.

⁴ ਜਦੋਂ ਤੁਹਾਨੂੰ ਗਰੁੱਪ ਲਈ ਪੈਰੇ ਪੜ੍ਹਨ ਦਾ ਸਨਮਾਨ ਦਿੱਤਾ ਜਾਂਦਾ ਹੈ, ਤਾਂ ਦਿਲ ਲਾ ਕੇ ਆਪਣੀ ਇਸ ਜ਼ਿੰਮੇਵਾਰੀ ਨੂੰ ਪੂਰਾ ਕਰੋ। ਚੰਗੀ ਤਰ੍ਹਾਂ ਪੜ੍ਹਨ ਨਾਲ ਭੈਣ-ਭਰਾ ਅਧਿਐਨ ਤੋਂ ਜ਼ਿਆਦਾ ਲਾਭ ਅਤੇ ਖ਼ੁਸ਼ੀ ਹਾਸਲ ਕਰਨਗੇ।—1 ਤਿਮੋ. 4:13.

⁵ ਆਪਣੇ ਗਰੁੱਪ ਨਾਲ ਪ੍ਰਚਾਰ ਵਿਚ ਜਾਣਾ: ਕਈ ਪੁਸਤਕ ਅਧਿਐਨ ਵਾਲੀਆਂ ਥਾਂਵਾਂ ਤੇ ਖੇਤਰ ਸੇਵਾ ਦੀਆਂ ਸਭਾਵਾਂ ਵੀ ਕੀਤੀਆਂ ਜਾਂਦੀਆਂ ਹਨ। ਜਦੋਂ ਤੁਸੀਂ ਇਨ੍ਹਾਂ ਪ੍ਰਬੰਧਾਂ ਦਾ ਸਮਰਥਨ ਕਰਦੇ ਹੋ, ਤਾਂ ਇਸ ਨਾਲ ਨਿਗਾਹਬਾਨ ਨੂੰ ਪ੍ਰਚਾਰ ਦੇ ਕੰਮ ਵਿਚ ਅਗਵਾਈ ਲੈਣ ਵਿਚ ਮਦਦ ਮਿਲੇਗੀ। ਇਨ੍ਹਾਂ ਪ੍ਰਬੰਧਾਂ ਨੂੰ ਆਪਣੇ ਭਰਾਵਾਂ ਨੂੰ ਹੋਰ ਵੀ ਚੰਗੀ ਤਰ੍ਹਾਂ ਨਾਲ ਜਾਣਨ ਅਤੇ ਉਨ੍ਹਾਂ ਨੂੰ ਹੌਸਲਾ ਦੇਣ ਦੇ ਮੌਕਿਆਂ ਦੇ ਤੌਰ ਤੇ ਵਿਚਾਰੋ।

⁶ ਖੇਤਰ ਸੇਵਾ ਰਿਪੋਰਟ: ਹਰ ਮਹੀਨੇ ਦੇ ਅਖ਼ੀਰ ਵਿਚ ਸਮੇਂ ਸਿਰ ਆਪਣੀ ਖੇਤਰ ਸੇਵਾ ਰਿਪੋਰਟ ਦੇਣ ਨਾਲ ਵੀ ਤੁਸੀਂ ਨਿਗਾਹਬਾਨ ਦੀ ਮਦਦ ਕਰੋਗੇ। ਤੁਸੀਂ ਆਪਣੀ ਰਿਪੋਰਟ ਉਸ ਨੂੰ ਫੜਾ ਸਕਦੇ ਹੋ ਜਾਂ ਇਸ ਨੂੰ ਕਿੰਗਡਮ ਹਾਲ ਵਿਚ ਸੇਵਾ ਰਿਪੋਰਟਾਂ ਇਕੱਠੀਆਂ ਕਰਨ ਲਈ ਰੱਖੇ ਗਏ ਡੱਬੇ ਵਿਚ ਪਾ ਸਕਦੇ ਹੋ। ਪੁਸਤਕ ਅਧਿਐਨ ਨਿਗਾਹਬਾਨ ਇਕੱਠੀਆਂ ਕੀਤੀਆਂ ਰਿਪੋਰਟਾਂ ਨੂੰ ਇਸ ਡੱਬੇ ਵਿਚ ਪਾ ਸਕਦੇ ਹਨ, ਜਿੱਥੋਂ ਸੈਕਟਰੀ ਇਨ੍ਹਾਂ ਨੂੰ ਲੈ ਲਵੇਗਾ।

⁷ ਕਲੀਸਿਯਾ ਪੁਸਤਕ ਅਧਿਐਨ ਨਿਗਾਹਬਾਨ ਨੂੰ ਦਿੱਤੇ ਤੁਹਾਡੇ ਸਹਿਯੋਗ ਦੀ ਬਹੁਤ ਕਦਰ ਕੀਤੀ ਜਾਵੇਗੀ। ਤੁਸੀਂ ਇਹ ਵੀ ਭਰੋਸਾ ਰੱਖ ਸਕਦੇ ਹੋ ਕਿ ਯਹੋਵਾਹ ਦੀ ‘ਕਿਰਪਾ ਤੁਹਾਡੇ ਆਤਮਾ ਉੱਤੇ ਹੁੰਦੀ ਰਹੇਗੀ।’—ਫ਼ਿਲਿ. 4:23.