ਪਾਠ 13

ਜਾਣਕਾਰੀ ਨੂੰ ਲਾਗੂ ਕਰਨ ਬਾਰੇ ਦੱਸੋ

ਯਸਾਯਾਹ 48:17

ਸਾਰ: ਸੁਣਨ ਵਾਲਿਆਂ ਦੀ ਇਹ ਜਾਣਨ ਵਿਚ ਮਦਦ ਕਰੋ ਕਿ ਵਿਸ਼ੇ ਦਾ ਉਨ੍ਹਾਂ ਦੀਆਂ ਜ਼ਿੰਦਗੀਆਂ ਨਾਲ ਕੀ ਤਅੱਲਕ ਹੈ ਅਤੇ ਉਹ ਸਿੱਖੀਆਂ ਗੱਲਾਂ ਨੂੰ ਕਿਵੇਂ ਲਾਗੂ ਕਰ ਸਕਦੇ ਹਨ।

ਇਸ ਤਰ੍ਹਾਂ ਕਿਵੇਂ ਕਰੀਏ?

ਸੁਣਨ ਵਾਲਿਆਂ ਬਾਰੇ ਸੋਚੋ। ਸੋਚੋ ਕਿ ਸੁਣਨ ਵਾਲਿਆਂ ਨੂੰ ਇਸ ਜਾਣਕਾਰੀ ਦੀ ਕਿਉਂ ਲੋੜ ਹੈ ਅਤੇ ਖ਼ਾਸ ਕਰਕੇ ਕਿਹੜੀਆਂ ਖ਼ਾਸ ਗੱਲਾਂ ਤੋਂ ਉਨ੍ਹਾਂ ਨੂੰ ਫ਼ਾਇਦਾ ਹੋਵੇਗਾ।
ਭਾਸ਼ਣ ਦੌਰਾਨ ਸੁਣਨ ਵਾਲਿਆਂ ਨੂੰ ਦੱਸੋ ਕਿ ਉਨ੍ਹਾਂ ਨੂੰ ਕੀ ਕਰਨ ਦੀ ਲੋੜ ਹੈ। ਭਾਸ਼ਣ ਦੀ ਸ਼ੁਰੂਆਤ ਤੋਂ ਹੀ ਸੁਣਨ ਵਾਲਿਆਂ ਨੂੰ ਲੱਗਣਾ ਚਾਹੀਦਾ ਹੈ ਕਿ ‘ਇਹ ਜਾਣਕਾਰੀ ਮੇਰੇ ਲਈ ਹੈ।’ ਹਰੇਕ ਮੁੱਖ ਗੱਲ ਬਾਰੇ ਗੱਲ ਕਰਦਿਆਂ ਦੱਸੋ ਕਿ ਇਸ ਜਾਣਕਾਰੀ ਨੂੰ ਕਿਵੇਂ ਲਾਗੂ ਕਰਨਾ ਹੈ। ਜਾਣਕਾਰੀ ਨੂੰ ਉੱਪਰੋਂ-ਉੱਪਰੋਂ ਨਾ ਦੱਸੋ, ਸਗੋਂ ਖ਼ਾਸ ਗੱਲਾਂ ਸਾਫ਼-ਸਾਫ਼ ਸਮਝਾਓ।

ਪਿਆਰ ਅਤੇ ਹਮਦਰਦੀ ਰੱਖਦਿਆਂ ਦੱਸੋ ਕਿ ਬਾਈਬਲ ਦੇ ਅਸੂਲਾਂ ਨੂੰ ਕਿਵੇਂ ਲਾਗੂ ਕੀਤਾ ਜਾ ਸਕਦਾ ਹੈ। ਦੂਸਰਿਆਂ ਨੂੰ ਨਿਰਾਸ਼ ਨਾ ਕਰੋ, ਸਗੋਂ ਯਹੋਵਾਹ ਲਈ ਉਨ੍ਹਾਂ ਦੇ ਪਿਆਰ ਅਤੇ ਉਨ੍ਹਾਂ ਦੀ ਨਿਹਚਾ ਨੂੰ ਵਧਾਓ। ਭਰੋਸਾ ਰੱਖੋ ਕਿ ਉਨ੍ਹਾਂ ਦਾ ਮਨ ਉਨ੍ਹਾਂ ਨੂੰ ਸਹੀ ਕੰਮ ਕਰਨ ਲਈ ਉਕਸਾਵੇਗਾ।

ਪ੍ਰਚਾਰ ਕਰਦੇ ਵੇਲੇ

ਪ੍ਰਚਾਰ ਦੀ ਤਿਆਰੀ ਕਰਦੇ ਵੇਲੇ ਸੋਚੋ ਕਿ ਕਿਹੜੀ ਖ਼ਬਰ ਸੁਰਖੀਆਂ ਵਿਚ ਹੈ ਅਤੇ ਲੋਕਾਂ ਨੂੰ ਕਿਹੜੇ ਵਿਸ਼ੇ ਦਿਲਚਸਪ ਲੱਗਣਗੇ। ਲੋਕਾਂ ਨਾਲ ਗੱਲ ਕਰਦੇ ਵੇਲੇ ਆਪਣੀ ਗੱਲਬਾਤ ਨੂੰ ਉਨ੍ਹਾਂ ਦੀਆਂ ਲੋੜਾਂ ਮੁਤਾਬਕ ਢਾਲੋ। ਗੱਲਬਾਤ ਕਰਦਿਆਂ ਸਮਝਦਾਰੀ ਨਾਲ ਸਵਾਲ ਪੁੱਛੋ ਤਾਂਕਿ ਤੁਹਾਨੂੰ ਪਤਾ ਲੱਗ ਸਕੇ ਕਿ ਘਰ-ਮਾਲਕ ਨੂੰ ਕਿਹੜੀਆਂ ਗੱਲਾਂ ਦੀ ਚਿੰਤਾ ਹੈ ਅਤੇ ਕਿਹੜੀਆਂ ਗੱਲਾਂ ਵਿਚ ਦਿਲਚਸਪੀ ਹੈ। ਉਸ ਦਾ ਜਵਾਬ ਸੁਣਨ ਤੋਂ ਬਾਅਦ ਆਪਣੀ ਗੱਲਬਾਤ ਨੂੰ ਉਸ ਮੁਤਾਬਕ ਢਾਲੋ।