Isaias
2 Tan balang sakey ed sikara et magmaliw a singa amotan* ed dagem,
Sakey a pansaniban* no bagyo,
Singa agus na danum ed dalin ya anggapoy danum,+
Singa anino na sakey a baleg a bato ed amagaan a dalin.
3 Insan agla naperengan iray mata na saramay makanengneng,
Tan ondengel la iray layag na saramay makarengel.
4 Say puso na saramay bengatbengat a mandedesisyon et morekdeken toy kakabatan,
Tan say ata-atan dila et mansalitan marlas tan malinew.+
5 Agla ipasen a maiter so andiay pakatalos,
Tan agla ipasen a gagalangen so andiay prinsipyo;
6 Ta mansalita na andi-kakanaan imay andiay pakatalos,
Tan manplano so puso to na saray makapasakit a bengatla,+
Pian ipaseseg toy panag-apostasya* tan mansalitay mauges ed si Jehova,
Pian agnapakan imay narasan,*
Tan agmakainum imay napgaan.
7 Mauges iray paraan na toon andiay prinsipyo;+
Ipapaseseg to iray makapabaing a kagagawa,
Pian deralen to so napapairap diad panamegley na saray tila,+
Anggano duga so sasalitaen na pobri.
9 “Sikayo ran kampantin bibii, alagey kayo, talineng yoy boses ko!
Sikayo ran ananak a bibiin agnapapagaan,+ dengel yoy ibabagak!
10 Pigaran agew kayari sakey taon, ontakot kayo, sikayo ran agnapapagaan,
Ta anggapoy naala yon bunga sano asumpal lay panagburbor na ubas.+
11 Giwgiw kayo, sikayo ran kampantin bibii!
Ontakot kayo, sikayo ran agnapapagaan!
Lakseb yoy kawes yo,
Tan balkesan yo na sakon abel iray balangbang yo.+
12 Tapok yo ray pagew yo ed panermen
Lapud nansumpalan na saray mabungan uma tan kaubasan.
13 Ta sakbongan na sabisabit tan makaturok a dikarika so dalin na saray totook;
Sakbongan na saratan so amin a kaabungan na panliliket,
On, say syudad a malikeliket.+
Nagmaliw a dalin ya agnapanayaman so Ofel+ tan say panagbantayan,
A panliketan na saray atap ya asno
Tan panagpastolan parad saray pulok,+
15 Anggad nikalbo lad sikatayo so espiritu manlapud tawen,+
Tan say kalawakan et magmaliw lan tanemay manbubungan kiew,
Tan sayan tanemay manbubungan kiew et ipasen lan singa sakey a katakelan.+
16 Insan manayam ed kalawakan so inkahustisya,
Tan manayam ed tanemay manbubungan kiew so inkatunong.+
17 Say resulta na tuan inkatunong et kareenan,+
Tan say bunga na tuan inkatunong et agmanganggan deen tan kaligenan.+
18 Manayam iray totook diad mareen a pasen,
Diad saray maligen ya ayaman tan mareen a pasen a painawaan.+
19 Balet deralen na uran a kristal so katakelan,
Tan sigpot a nageba so syudad.