Unona ed Saray Taga Corinto
12 Kaukolan a manpasirayew ak. Aliwa yan makagunggona, balet natan, say ibagak et nipaakar ed saray mamilagron pasingawey+ tan saray panangiparungtal na Katawan.+ 2 Walay kabat kon too a disipulo nen Kristo, a 14 taon lay apalabas et sikatoy biglan niyakar ed komatlon tawen—agko amta no kasin sikatoy walad pisikal a laman to odino anggapod pisikal a laman to; balet amta na Dios. 3 On, kabat ko itan a too—agko amta no kasin sikatoy walad pisikal a laman to odino anggapod pisikal a laman to; balet amta na Dios— 4 a sikatoy biglan niyakar ed paraiso tan akarengel na saray salitan agsarag ya ibaga tan agnayarin salitaen na sakey a too. 5 Ipasirayew ko itan a too, balet agko ipasirayew so sarilik nilikud ed saray kakapuyan ko. 6 Ta anggano labay koy manpasirayew, agak magmaliw ya agmakatunongan, ta ibagak so katuaan. Balet agko itan gawaen, pian anggapoy mannonot na alabas nen say nanenengneng odino narerengel to ed siak, 7 lapu labat ta akaawat ak na saray makapakelaw a panangiparungtal.
Pian agak magmaliw a mapaatagey, niiter ed siak so sakey a sabit ed laman,+ sakey ya anghel nen Satanas, a naynay a manatampal* ed siak, pian agak magmaliw a mapaatagey. 8 Amitlo ak ya akikasi ed Katawan a naekal komon itan ed siak. 9 Balet imbaga tod siak: “Duga lad sika so agnaparaan a kaabigan ko, ta no kapigan makapuy ka, diman mabisbiskeg so pakayarik.”+ Diad ontan et malikeliket ak a mangipasirayew ed saray kakapuyan ko, ta say pakayari na Kristo et singa tolda a naynay ya akatarong ed siak. 10 Kanian manliliket ak diad saray kakapuyan, diad saray panag-insulto, diad saray pankaukolan, diad saray panamasegsegang tan kairapan, parad Kristo. Ta no kapigan a makapuy ak, diman ak mabiskeg.+
11 Nagmaliw ak ya agmakatunongan. Pinilit yo ak a magmaliw ya ontan, ta nepeg komon a maabig iray imbaga yo nipaakar ed siak. Ta diad antokaman a bengatla et aliwa ak ya abeba nen “saray sankamaongan ya apostol” yo, anggano anggapoy kakanaan ko.+ 12 On, impanengneng kod sikayo iray tanda na inka-apostol ko diad pinasyan impansungdok,+ tan diad panamegley na saray tanda tan pakelaw tan makapanyari iran gawa.*+ 13 Agta say sengegan labat ya agkayo apribilehyoan nen say arum a kongregasyon et say agko impagmaliw a pabelat ed sikayo?+ Perdona yo ak pa ed sayan lingo.
14 Komatlo la yan pankanawnawa ya akaparaan ak ya onlad sikayo, tan agak magmaliw a pabelat ed sikayo. Ta say aanapen ko et aliwan saray kaykayarian yo+ noagta sikayo; ta saray ananak+ et ag-iilaloan a mantipon parad saray atateng da, noagta saray atateng so mantipon parad saray ananak da. 15 Balet malikeliket ak a mangusar ed amin a walad siak tan sigpot ak a pausar parad sikayo.*+ No aaroen ta kayon maong, aroen yo ak kasi na daiset? 16 Anggaman ontan, agta kayo pinabelatan.+ Balet ibabaga yon “masilib” ak tan narel ta kayo “lapud panagpalikdo.” 17 Kasin inanamot ta kayo diad panamegley na anggan sakey ed saramay imbakik ed sikayo? 18 Pinaseseg koy Tito ya onlad sikayo tan angibaki ak na agin kaiba to. Agta agkayon balot inanamot nen Tito?+ Agta nanakar kami unong ed saksakey ya espiritu? Agta saksakey a basbas so nanakaran mi?
19 Kasin anggad natan et iisipen yon idedepensa mi sarili mi ed sikayo? Mansasalita kami tua diad arapan na Dios bilang papatumbok nen Kristo. Balet, inad-arok ya agagi, say gagala na amin a gagawaen mi et pian pabiskegen kayo. 20 Ta mapaga ak ompan sano onsabi ak ditan et duma kayo ed samay iilaloan ko tan duma ak met ed samay iilaloan yo, tan ompan wala ni ingen so pankokolkol, imon, sanok, sangsangan, panagpauges, panagtsismis,* panagpaatagey, tan gulo. 21 Sano onla ak lamet ditan et ompan iyan ak na Dios ko ed kababaingan diad arapan yo, tan ompan panermenan koy dakel ed saramay nankasalanan ya agni nagbabawi ed gagawaen dan karutakan tan seksual ya imoralidad* tan anggapoy-baing a kagagawa.*