OMBIBILI SASALIWEN—NO PANON MON NASARAG
Tanggap Moy Situasyon
No kalkalnan ombibili sasaliwen, ompan agmo napansin, lalo la no onaatagey met so sueldom. Pero, no biglan binmili sasaliwen balet ta dati ni sueldom, ompan naaburido tan na-stress ka, lalo la no walay pamilyam.
Agtayo nakontrol so ibibili sasaliwen. Balet, parad pankaabigan ti lanlamang no tanggapen tayoy situasyon.
NO AKIN YA TANGGAPEN
No awaten tayo ya agtayo kontrolado so ibibili sasaliwen, . . .
agtayo nabigla tan mansiansia tayon kalmado. No kalmado ti labat, mas makapanisip tayon maong tan makagawa tayoy dugan desisyon.
iwasan tayo ray kagagawa ya palooren toy situasyon. Singa bilang, agtayo gastos lan gastos tan agtayo ipappaleen so pambayar na kuryente o danum.
naiwasan tayoy mikolkol ed kapamilya tayo lapud kuarta.
saray kaukolan ti labat so saliwen tayo tan ompan manggawa tayoy paraan pian makatipid.
NO ANTOY NAGAWAAN MO
Man-adjust ka. No ombili iray sasaliwen, marakep no agka saliw lan saliw na nambabangil. Wala ray totoo ya magarbo so panagbilay da pero agmet pasok ed badyet da. No ontan, sikara lanlamang so nakesawan ta singa da susubaen so maples ya agus. Siempre no walay pamilyam, natural met labat ya napagaan ka no panon mon itaryay pankaukolan da. Pero tandaan mo iya: Mas kaukolan day panangaro, oras, tan atension mo nen say kuarta o gamit.
No ipasoot na sakey so manbilay na magarbo pero agmet pasok ed badyet to, seguradon nakesawan ta singa to susubaen so maples ya agus