OMBIBILI SASALIWEN—NO PANON MON NASARAG

Agnaaandiay Ilalo

Kasin ombibili sasaliwen pero ag-onaatagey so sueldom? Kasin mantalikarkar kan taryaan so pamilyam tan sarilim? No ontan, ompan isipen mo, ‘Anggapo la ya, agla makaimwas so too.’ Pero anggan panon kairap so bilay, agka komon naaandiay ilalo.

NO AKIN YA AGNAAANDIAY ILALO

Saray totoon agnaaandiay ilalo et aglabat manaalagar ya anggapoy gagawaen da. Lapud positibo ira, manggawa ray remedyo pian ondakep so situasyon da. Base ed saray psychologist, saray totoon agnaaandiay ilalo et . . .

agbastabasta onsusuko tan sarag day makaimwas
sarag day man-adjust
duga ray desisyon da no nipaakar ed panangan, kakaugip, tan arum ni, kanian nasisimpitan day laman da

NO ANTOY NAGAWAAN MO

Unona, amtaen no panon kan natulongan na Biblia natan. Nabasa ed Biblia iray praktikal ya bilin ya sarag mon gawaen no ombili sasaliwen. Makatulong iratan pian agmo isipen ya anggapo lay nagawaan mo tan nasarag moy situasyon no bilang ta onloor ni.

“Iyagel ka na kakabatan tan pakatalus mo.”—Probirbio 2:11, Maung a Balita, Biblia.

Komadua, amtaen no antoy ibabaga na Biblia ya nagawad arapen. No nanengneng mo ya baleg so nitulong ed sika na saray bilin na Biblia, napakiwas kan aralen so ibabaga to ya nagawad arapen. Singa bilang, naaralan mo ditan ya agka labat ikdan na Dios na “maong ya arapen tan ilalo,” imbes angiter met na prueba ya talagan nagawa ’tan. (Jeremias 29:11) Anton prueba? Say Panarian na Dios.

ANTO SO PANARIAN NA DIOS, TAN ANTOY GAWAEN TO?

Say Panarian na Dios et sakey ya gobierno ed tawen ya manuley ed interon dalin. (Daniel 2:44; Mateo 6:10) Panampoten na satan so amin ya paniirap. Magmaliw lan mareen, maliket, tan mainaway bilay. Nanengneng tayo itan ed sarayan sipan na Biblia.

“Magmaliw kan maliket tan maaligwas.”—Salmo 128:2.

“[Saray uleyan na Panarian et] ag-ira mansagpot ed andi-kakanaan.”—Isaias 65:23.

“Dakdakel so anien ya ilik diad dalin.”—Salmo 72:16.

Manisia so minilyon ya totoo ed saratan ya sipan, ta kombinsido ira ya say Dios et “agto nayarian so mantila.” (Tito 1:2) Anto kasi no aralen mo so ibabaga na Biblia? Naamtaan mo ditan ya wala manayay pag-asa tayo, kanian ombiskeg so liknaan mo ya saragen so irap na bilay tan talaranan so balibalin nagawad arapen.