OMBIBILI SASALIWEN—NO PANON MON NASARAG
Mangiter
No naiirapan ka lapud ibibili sasaliwen, ompan isipen mo, ‘Anta anggapok la lanti, mangiter ak ni?’ Pero antam, no mangiter ka, mas nasarag moy irap na bilay. On, anggano mantitipid ka, sarag mo nin siansiay makapangiter.
NO AKIN YA MANGITER
Makapaliket tan balibalid liknaan so mangiter, anggano melag labat. Diad tua, ibabaga na arum ya doktor ya maong so epekto to ’tan ed laman tan isip tayo ta nabawasay paga, stress, tan sakit na lamalaman. Ondakep ni ingen kunoy blood pressure tayo tan masamit so ugip tayo.
No mangiter tayo ed arum na kuarta o arum nin pankaukolan da, agtayo manalangan ya mangawat no mankaukolan tayo met. Oniay imbaga nen Howard ya taga England: “Maniisip kami nen asawak no panon kamin makapangiter tan makatulong ed arum. Kanian no sikami met so mankaukolan, agkami nababaingan ya mangawat na tulong.” Siempre, no talagan manlapud puso so pangiiter tayo, agtayo mani-expect na kasalat. Pero say niwalad sikatayo et tuan kakaaro ya ontulong no mankaukolan tayo met.
NO ANTOY NAGAWAAN MO
Mangiter depende ed pakasarag mo. No daiset labat so walad sika, makapangiter ka nin siansia, anggan simplin naakan labat. Si Duncan tan say pamilya to ya taga Uganda et mairap so bilay da pero maiter ira. Oniay imbaga nen Duncan ya gagawaen da: “Kada Simba, mangiimbita kami nen asawak ed abung. Simpli labat so ipaparungo mi. Pero nai-enjoy mi mi-bonding ed sikara.”
Siempre no mangiter ka, amay nasarag yo labat pian agnairapan so pamilyam.—Job 17:5.
Salim iya: Mangiter na simplin naakan o nainum. No wala ray gamit ya agmo la kailangan, anto kasi no ipakerew mo lad kakaarom o kakaabay ya mankaukolan ed satan?
Arum ni ran sarag mon iter. Agnasaliw na kuarta so arum ed saray sankarakepan ya regalo. Singa bilang, say pangiter na oras pian ontulong ed arum tan ipaliknan iyaansakit mo ra. Anggan say pangibagay ‘salamat’ tan ‘inaro mi ka’ et balibali lan regalo! Kanian ibagam labat.
Salim iya: Tulongan so arum ed kimey dad abung, pangapiger na abung, o arum ni. Sarag mo met so mangiter na card odino man-message ed kakaarom pian nalikna da ya sankanonot mo ra.
No manggawa kay paraan pian makapangiter ka, nabendisyonan tan mas maliket ka.