OMBIBILI SASALIWEN—NO PANON MON NASARAG
Mankontento
Saray totoo ya kontento et maliket ed no antoy walad sikara. Tan no manguman so situasyon da, man-adjust ira tan pasaragen day badyet da.
NO AKIN YA MANKONTENTO
Imbaga na psychologist ya si Jessica Koehler ya saray totoon kontento et poppositibo. Agmet ira kuno bastabasta naiinggit ed arum. Kampega lan mas maliket ira tan ag-ira masyadon nai-stress. Diad tua, no siopa ramay simpli labat so bilay da, sikara may sankaliketan ya totoo. Lalo lad saramay mas iyuuna day agnasaliw na kuarta, singa say piulop ed kapamilya tan kakaaro da.
NO ANTOY NAGAWAAN MO
Agmo ikokomparay sarilim. No simpli labat so bilay mo tan ikomparam so sarilim ed saramay magarboy panagbilay da, ompan nainggit ka tan agka laingen mankontento. Sakey ni, aliwan realistiko ya ikomparam so sarilim ed arum. Kasi wala ra may singa mayamyaman, pero diad tua, lubog la ra manayad utang. Balibali imbaga nen Nicole ya taga Senegal: “Agko kailangan so amayamay ya bagay pian magmaliw ya maliket. No kontento ak, maliket ak anggano mas mainawa ni bilay na arum nen say siak.”
Salim iya: Iwasan mo ray advertisement odino post ed social media ya mangipapanengneng ed yaman o magarbo ya bilay na arum.
Misalamat. Saray totoon amta day misalamat et kontento tan agda isipen ya walay kulang ed sikara. Aliwa met iran demanding. Oniay imbaga nen Roberton ya taga Haiti: “No walay manggawa na kamaongan ed siak tan ed pamilyak, agko iratan lilingwanan. Insan ko ibabagad sikara ya aapresyaen koy ginawa da. Ibabangat ko met so waloy taon ya anako ya ibagay salamat kada no walay mangiter ed sikato.”
Salim iya: Kada agew, isulat mo no anto ray pisasalamatan mo. Singa bilang, say kasil na laman, maliket ya pamilya, tuan kakaaro, odino anggan say balibalin sunset.
No maminsan, mairap so mankontento. Pero nabawbawim so pansagpot mo! No pilien moy mankontento, pipilien mo met so magmaliw ya maliket. Tan ag-itan nasaliw na kuarta.