Sinubok nen Jose Iray Kuya To

LABAY ya naamtaan nen Jose no kasin anguman la ray 10 ya kuya to. Kanian imbaga tod sikara: ‘Espiya kayo. Linma kayo dia pian nengnengen no iner so mainomay ya lusoben ed bansa mi.’

‘Andi, aliwa kamin espiya. Maong kamin totoo. 12 kamin sanaagi. Balet, anggapo lay sakey ya agi mi tan say bolirek et kaiba nen tatay mi,’ so ebat da.

Kunwarin agmanisia si Jose. Impakulong toy kuya ton si Simeon, tan saray arum et impangawit to na naakan tan pinasempet to la ra. Balet imbaga tod sikara: ‘No ompawil ki dia, awit yoy agi yon bolirek.’

Kasabi dad Canaan, inistorya dad tatay dan si Jacob so agawa. Maer-ermen si Jacob. Inyakis to: ‘Anggapo lay Jose. Tan natan anggapo lay Simeon. Agko labay ya alaen yo ni anakon bolirek ya Benjamin.’ Balet, nen nauupot lay naakan da, apilitan si Jacob ya ipilad sikara si Benjamin ed Ehipto.

Anengneng nen Jose ya nitan la ray kuya to. Malikeliket ta kaiba ray agi ton si Benjamin. Siempre, anggapoy makaamtad sikara ya sayan importantin laki et si Jose. Wala natay ginawa nen Jose pian nasubok so 10 ya kuya to.

Ingganggan to ray aripen to ya panoen na naakan iray sako na agagi to. Balet agda amta ya impakarga tod sako nen Benjamin imay balibalin pilak a kopa to. Nen akaalis la ra, impausilan ira nen Jose ed saray aripen to. Nen nabotan da ra, imbaga na saray aripen: ‘Akin et tinakew yo so pilak a kopa na katawan mi?’

‘Agmi tinakew so kopa to. No naromog yod sakey ed sikami itan a kopa, ipapatey yo,’ so ebat da.

Kanian nilulukasan na saray aripen so amin a sako ra, tan nalmo ray kopa ed sako nen Benjamin, a singa nanenengneng mod litrato. Imbaga na saray aripen: ‘Sarag yo lay onalis, balet natilak si Benjamin.’ Antoy ginawa na 10 ya kuya to ey?

Akila ran amin ed si Benjamin diad abung nen Jose. Imbaga nen Jose ed saray kuya to: ‘Sarag yo lay onsempet, balet natilak diay Benjamin pian magmaliw ya aripen ko.’

Et imbaga nen Juda: ‘No agko kaiban onsempet so agi mi, ompatey so tatay mi ta sikatoy inad-aro ton maong. Kanian panangasim, siak lay gawam ya aripen, tan pasempet mo la yay agi mi.’

Anengneng nen Jose ya anguman la ray kuya to. Aliwa la ran mauges. Amtaen tayo no anto natay gawaen nen Jose.