“Ta Sikato’ya so Nibakian Ko”

1-4. (a) Panon a marundunong ya imbangat nen Jesus so Samaritana, tan antoy resulta? (b) Antoy reaksion na saray apostol to?

PIGAY oras lan manaakar si Jesus tan saray apostol to. Manlapu ed Judea et sikaray mamapaamianen pian onla ed Galilea. Say sankaasinggeran lan rota, a taloy agew a biahien, et ondalan ed Samaria. Sanen mamegpegley lay agew, asingger la ira’d melag a syudad a manngaran na Sicar, tan tinmunda ira ditan pian manparepresko.

² Legan ya oonlan mangaliw na pangugtoan iray apostol, si Jesus so nampainawa ed abay na bobon diad paway na syudad. Sakey a bii so nitan lan onasol. Diad satan et nayari met a desidien nen Jesus ya ag-imanoen so bii. Tutal, sikatoy “naksawan ed impanaakar to.” (Juan 4:6) Natalosan la no ilikdem to labat la tan ag-ibano iyan Samaritana. Unong a naaralan tayo ed Kapitulo 4 na sayan libro, nayarin iilaloan met la na sayan bii a sikatoy ag-ibano na anggan siopan Judio. Balet ta sikatoy kinatongtong nen Jesus.

³ Ginapoan toy tongtongan diad impangusar ed sakey ya ilustrasyon ya imbase to’d inagew-agew a kabibilay na bii, salanti, say mismon gagawaen na bii ed saman a bekta. Say bii so wadman pian onasol; tan intongtong nen Jesus so nipaakar ed danum a mangiter na bilay tan mangekal ed inkapgaan to ed espiritual. Diad saman, aminpigan sinalambit na bii iray punton nayarin pansengegay sangsangan.a Balet, mataktikan pinaliisan nen Jesus iratan ya isyu tan intultuloy ton intongtong so walad nonot to. Inyapasakey to ed saray espiritual a pamaakaran, salanti, say puron panagdayew tan say nipaakar ed si Jehova a Dios. Seguradon tinmanek ed puso na bii so innabang nen Jesus lapud imbalita to iratan ed saray totoo diad syudad, tan kinaliktan met na saratan so ondengel ed si Jesus.​—Juan 4:3-42.

⁴ Kapawil na saray apostol, antoy reaksion da ed alay-abig ya impantasi nen Jesus? Sikaray matabtabang. Abigla ni ingen ira ta kinatongtong nen Jesus iyan bii, tan mapatnag ya agda inim-imano so bii. Sanen inmalis la so bii, aminpiga ran kinerew ed si Jesus a mangan ed awit dan tagano. Balet, inkuan nen Jesus ed sikara: “Wala so . . . kanen ko ya agyo amta.” Lapud agda atalosan so labay ton ibaga, abaloan dan walay literal a tagano to. Insan to impaliwawa: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:32, 34) Diad satan sirin et nibangat nen Jesus ed sikara a mas importante ed sikato so manunan kimey to ed bilay nen say pangan. Labay ton ontan met so pangipasen da ed satan. Anto itan a kimey?

5. Anto so kimey nen Jesus, tan anto so aralen tayo ed sayan kapitulo?

⁵ Aminsan et oniay imbaga nen Jesus: ‘Kaukolan kon ipulong so ebanghelyo na panariay Dios ta sikato’ya so nibakian ko.’ (Lucas 4:43) On, imbaki si Jesus a mangipulong tan mangibangat ed ebanghelyo na Panarian na Dios.b Satan met so kimey na saray patumbok nen Jesus natan. Kanian, importantin aralen tayo no akin tan anto so impulong nen Jesus, tan no anto so awawey to ed asainmin to.

No Akin a Nampulong si Jesus

6, 7. (a) Anto so labay nen Jesus a pangipasen na amin a “managbangat” nipaakar ed pananginabang na maong a balita ed arum? Iyilustra.

⁶ Usisaen tayo no panoy impangipasen nen Jesus ed saray katuaan ya imbangat to; insan tayo singbaten so awawey to ed saray totoon binangatan to. Angusar si Jesus na matukotukoy ya ilustrasyon no panon ton impasen so pananginabang ed saray katuaan ya imbangat ed sikato nen Jehova. Oniay inkuan to: “Sakey a [“managbangat,” NW] ed panarian na tawen miulibay ed sakey a too a sikatoy akan-abung, a mangala ed [pananginan na] kayamanan to na saray bengatlan balo tan daan.” (Mateo 13:52) Diad sayan ilustrasyon, akin et mangala odino mangipaway so akan-abung na saray bengatla manlapud pananginan to na kayamanan?

⁷ Bueno, agmet ipapangta na akan-abung iray kaykayarian to a singa samay ginawa nen Arin Hezekias nensaman, a nanresulta ed trahedya. (2 Arari 20:13-20) Anto sirin so motibo na akan-abung? Imanoen pa iyan ilustrasyon: Bilbilang et nilam so paboritom a maestra ed abung to. Kabebekta, impaway to so duaran sulat​—say sakey et duyawan la ed inkadaan tan samay sakey et balo ni. Sulat iratan ed sikato na ama to, samay sakey et sani nen sikatoy ugaw, a pigay dekada lay apalabas, tan samay sananey et diad agano ni ran taon. Legan ton ibabaga ed sika no panoy pamapabli to ed saratan a sulat, tan no panon ya akapanguman ed bilay to iray wadtan a simbawa tan no panon met a makatulong ed sika iratan, nanenengneng mo ed saray mata to so panlikliket. Napatnagan a papablien tan lalaniran na maestram iratan a sulat. (Lucas 6:45) Impanengneng to iratan ed sika, aliwan pian manpasirayew, noagta pian nagunggonaan ka tan inabang ed sika so kakanaan na saratan.

8. Akin a dakel so rason tayo pian ipasen a kayamanan iray katuaan a nanaaralan tayo ed Salita na Dios?

⁸ Ontan so motibo na Matalonggaring a Managbangat a si Jesus diad panginanabang to ed saray katuaan na Dios ed arum. Parad sikato, saratan a katuaan et mipara ed sakey a kayamanan ya agnabayaran. Pinabpabli to iratan, tan labalabay ton innabang iratan. Kaliktan ton ontan met so pangipasen na amin a papatumbok to, salanti amin a “managbangat.” Kasin ontan itayo? Dakel so rason tayo pian aroen so kada katuaan a nanaaralan tayo ed Salita na Dios. Papablien tayo iray mablin katuaan, balang lan saray abayag lan sisisiaen tayo odino saray agano ni ran panamalinew. Diad panamegley na impapuso tan maligsan pangitongtong tan pantultuloy a pangaro ed saray imbangat nen Jehova ed sikatayo, nipatnag tayo itan a panangaro, a singa ed ginawa nen Jesus.

9. (a) Panoy impangipasen nen Jesus ed saray totoon binangatan to? (b) Panon tayon naalig so awawey nen Jesus ed saray totoo?

⁹ Inaro met nen Jesus iray totoon imbangat to, tan satan so singbaten tayon nagkalalo ed Seksion 3. Impropesiya la a say Mesias so ‘mangabagey ed saray makapuy tan mairap-bilay.’ (Salmo 72:13, Maung a Balita) On, iyaansakit nen Jesus so totoo. Iimanoen to ray walad nonot da tan say awawey a mamapakiwas ed sikara; sikatoy mililikna ed saray pakadedetdetan dan problema tan nagogonigon met lapud pakakasbel dan natalosay katuaan. (Mateo 11:28; 16:13; 23:13, 15) Nonoten pa lamet imay Samaritana, bilang alimbawa. Seguradon pandinayewan na saman a bii so impangimano nen Jesus ed sikato. Lapud atebek nen Jesus so situasyon na bii, sinisia ton si Jesus et sakey a propeta tan imbalita to ed arum so nipaakar ed Sikato. (Juan 4:16-19, 39) Tua, agnabasa na saray papatumbok nen Jesus natan so kapusoan na totoon pupulongan da. Balet, sarag tayoy magmaliw ya interesado ed totoo, a singa samay ginawa nen Jesus; sarag tayon ipalikna ya iyaansakit tayo ira; tan sarag tayon itukoy so pitotongtong tayo ed saray paninteresan, problema, tan pankaukolan da.

No Anto so Impulong nen Jesus

10, 11. (a) Anto so impulong nen Jesus? (b) Akin a nakaukolan so Panarian na Dios?

¹⁰ Anto so impulong nen Jesus? No ebatan mo itan base ed saray bangat na dakel a relihyon a mangibabagan irerepresenta ra si Jesus, nayarin mankonklusyon ka a say inyabawag to et nipaakar ed sakey a tampolan a solusyon na saray inagew-agew a kapagaan na totoo. Odino nayarin isipen mon impaseseg to so reporma ed politika odino impurek ton manunaan ed ami-amin so dilin kilalaban. Bangbalet, unong ya inkuan la, malinlinew ya imbaga nen Jesus: “Kaukolan ko met ya ipulong . . . so ebanghelyo na panariay Dios.” Anton talagay lalanoren na satan?

¹¹ Tandaan, wadman ed tawen si Jesus sanen unonan inangat nen Satanas so inkamanepeg na inkasoberano nen Jehova. Seguradon asaksakitan si Jesus ed impakaimaton a say matunong ya Ama to et pinauges tan inakusaan ya agmakatunongan a Manuley tan isisiblet Toy pankaabigan na saray pinalsa To! Seguradon asaksakitan met so Anak na Dios sanen say pauges nen Satanas et sinisia di Adan tan Eva, say panlapuan na katooan! Anengneng na Anak no panon a kinmayat so kasalanan tan ipapatey lapu ed satan ya impanrebelde. (Roma 5:12) Balet, seguradon sikatoy alikliketan sanen naamtaan ton nasabi panaon et ipetek na Ama to iray pamaakaran!

12, 13. Antoran ag-inkahustisya so ipetek na Panarian na Dios, tan panon a ginawa nen Jesus a manuna so Panarian ed ministeryo to?

¹² Anto so manunan nakaukolan ya ipetek? Nakaukolan a nagalang so masanton ngaran nen Jehova tan naekal so amin ya impamabanday nen Satanas tan saray dinmapag ed sikato. Nakaukolan a niyalangon so inkamanepeg na inkasoberano nen Jehova, salanti say paraan na pananguley to. Mas natatalosan nen Jesus irayan importantin isyu nen say siopaman a too. Diad samay modelon pikakasi, imbangat to iray patumbok to a kerewen da nin unona a nagalang komon so ngaran na Ama to, insan onsabi komon so Panarian na Ama to, tan kayari na satan et nagawa komon so linawa na Dios ed dalin. (Mateo 6:9, 10) Diad panamegley nen Kristo Jesus bilang Manuley, say Panarian na Dios so magano lan maneral ed marelmeng a sistema nen Satanas ed dalin tan magnayon lan mamekder a matunong so pananguley nen Jehova.​—Daniel 2:44.

¹³ Satan a Panarian so tema na ministeryo nen Jesus. Amin ya imbaga tan ginawa to et tinmulong pian napalinew no anto itan a Panarian tan no panon itan a manumpal ed gagala nen Jehova. Anggapoy antokaman ya inabuloyan nen Jesus a mangisuawi ed sikato ed misyon ton ipulong so maong a balita na Panarian na Dios. Nen panaon to, walaray makapadetdet a problema ed sosyedad, tan dakdakel so nagagawan ag-inkahustisya, balet insentro toy imano to ed mensahe tan kimey to. Kasin kabaliksan na satan a si Jesus et agmakalikas, makisir so panmoria to, tan makapasawa so metodo to? Andin balot!

14, 15. (a) Panon a si Jesus et “babaleg nen si Solomon”? (b) Panon tayon naalig si Jesus diad mensahen ipupulong tayo?

¹⁴ Unong a nanengneng tayo ed sayan interon seksion, ginawa nen Jesus a makapainteres tan aliwan apasakey so panagbangat to. Asabi toy kapusoan na totoo. Ipapanonot na saya ed sikatayo si Arin Solomon, a nanggunaet a nananap na balibali tan dugaruga iran salita na katuaan, pian ipasabi iray mensahe ya impuyan nen Jehova ya isulat to. (Eclesiastes 12:10) Sayan aliwan perpekton too et inikdan nen Jehova na “malawig a puso,” kanian sarag ton itongtong so nipaakar ed antokaman a bengatla, a singa say nipaakar ed kamanokan, sirasira, kakiewan, tan arum niran ayayep. Sikatoy lalaen na saray totoo a nanlalapud ararawi nin lugar pian dengelen so ibaga to. (1 Arari 4:29-34) Bangbalet, si Jesus et “babaleg nen si Solomon.” (Mateo 12:42) Sikatoy mas makabat ya aminpigapiga tan mas “malawig [so] puso” to. Sano ibabangat nen Jesus iray totoo, uusaren to so superyor a kakabatan to nipaakar ed Salita na Dios, ontan met ed saray manok, ayayep, sira, panagdalos, tiempo, kaplesan iran nagagawa, awaran, tan say kipapasen na panagbilay. Sakey ni, agbalot impasikat nen Jesus so kakabatan to pian pandinayewen so arum. Pinansiansia ton simpli tan malinew so mensahe to. Kanian agpankelawan a kalkaliktan na totoo a dengelen so ibaga to!​—Marcos 12:37; Lucas 19:48.

¹⁵ Panggugunaetan na saray Kristiano natan a tumboken so alimbawa nen Jesus. Tua, agtayo naparaan so ontan lan laknab na karunongan tan kakabatan to, balet anggan panon et wala met so kakabatan tan eksperiensya tayon amin, a nausar tayo sano inanabang tayo ed arum iray katuaan na Salita na Dios. Singa bilang, sarag ya usaren na saray ateng so eksperiensya ra diad impamabaleg ed ananak da pian iyilustra so panangaro nen Jehova ed saray ananak To. Sarag met ya usaren na arum iray alimbawa odino ilustrasyon ya imbase ed trabaho, eskuelaan, odino ed kakabatan da nipaakar ed totoo tan kaplesan iran nagagawa. Siempre, legan tayon gagawaen itan, aalwaran tayo ya agnisuawi so imano na totoo manlapud mensahe tayo, salanti, say maong a balita na Panarian na Dios.​—1 Timoteo 4:16.

Say Awawey nen Jesus ed Ministeryo To

16, 17. (a) Antoy awawey nen Jesus ed ministeryo to? (b) Panon ya impatnag nen Jesus a manuna ed bilay to so ministeryo to?

¹⁶ Impasen nen Jesus so ministeryo to bilang mablin kayamanan. Panliliketan ton tulongan so totoo a nakabat no siopan talaga si Ama to a walad tawen, pian niwalwal so ginawa-na-too iran doktrina tan tradisyon a makawetwet tan mangiyaamot ed katuaan. Labalabay nen Jesus a tulongan so totoo a nawalaan na naabobonan a relasyon ed si Jehova tan ilalon andi-anggaan a bilay. Panlikliketan ton iter ed totoo so pakainawaan tan gayagan ipapagamor na maong a balita. Panon ton impatnag ya ontan so nalilikna to? Usisaen pa so taloran pamaakaran.

¹⁷ Unona, ginawa nen Jesus a manuna ed bilay to so ministeryo. Say pangitongtong ed Panarian so ginawa ton karera, manunan kimey to ed bilay, tan manunan kawalaan na interes to. Satan so rason, unong a naaralan tayo ed Kapitulo 5, no akin a sikakabat a pinansiansia nen Jesus a simpli so bilay to. Sano sisimbawaen to so arum, lawas ton isesentro so imano to ed no anto so sankaimportantian. Sikatoy agnampaabala ed nambabangil a bengabengatla a gagastosan, aasikasoen, tan aapigeren odino sasalatan. Simpli so impanbilay to kanian anggapoy akadisturbo ed ministeryo to.​—Mateo 6:22; 8:20.

18. Diad antoran pamaakaran ya intalaga nen Jesus so inkasikato ed ministeryo to?

¹⁸ Komadua, intalaga nen Jesus so inkasikato ed ministeryo. Pirmi so impansagpot to, a nilasus kilometro so inakar to ed interon Palestina pian anapen so totoon napanginabangan to na maong a balita. Kinatongtong to ra ed kaabungan da, diad saray tindaan, tan diad arum ni ran publikon pasen. Intultuloy to ni ingen iran kinatongtong sanen kaukolan to la komoy mangan, oninum, odino manpainawan magano kaiba iray sankaapitan a kakaaro to. Anggan sanen magano lan ompatey, intultuloy ton innabang ed arum so maong a balita na Panarian na Dios!​—Lucas 23:39-43.

19, 20. Panon ya inyaliling nen Jesus so inkaganat na panagpulong a kimey?

¹⁹ Komatlo, impasen nen Jesus a maganat so ministeryo to. Nonot yo pa lamet imay impitongtong to ed Samaritana diad abay na bobon ed paway na Sicar. Ompatnag ya ag-atebek na saray apostol nen Jesus ed saman a pankanawnawa a maganat a kimey so pananginabang na maong a balita ed arum. Oniay inkuan nen Jesus ed sikara: “Agyo ta kuan, wala ni apat bulan, tan insan onsabi panagani? Nia, kuan ko ed sikayo, itangwa yo ray mata yo, tan nengneng yo so kaumaan, ya amputi la ran maparaan ed panagani.”​—Juan 4:35.

²⁰ Imbase nen Jesus itan ya ilustrasyon ed kaplesan a tiempo ra. Mapatnag a bulan na Chislev (Nobyembre/​Disyembre) ed saman. Apat bulan ni so palabasen antis dan anien so sebada, a nayarin ombana ed panaon na Paskua ed Nisan 14. Kanian, diad saman a panaon, agni manggaganat iray dumaralos. Andukey nin panaon so palabasen. Balet, no nipaakar ed panagani ed totoo ey? Ah, dakel so akaparaan ya ondengel, manaral, tan magmaliw a babangatan nen Kristo tan makagamor na marakdakep ya ilalon iyoopresi nen Jehova ed sikara. Singano banbantagen nen Jesus iratan a piguratibon kaumaan tan nanenengneng ton pinmuti lan amin so matatken a buke-bukel ya ipapalayupoy na dagem, a tanda ya akaparaan la iran gapasen.c Satan la sirin so panaon na panagani, tan apurado so kimey! Kanian, sanen kokombinsien na totoo ed sakey a syudad si Jesus a mansiansia ni ed sikara, oniay ebat to: “Kaukolan ko met ya ipulong . . . so ebanghelyo na panariay Dios ed saray arum a syudad; ta sikato’ya so nibakian ko.”​—Lucas 4:43.

21. Panon tayon naalig si Jesus?

²¹ Diad amin a taloran pamaakaran a kapkapansingbat, sarag tayon naalig si Jesus. Napagmaliw tayon manuna ed bilay tayo so ministeryo tayo bilang Kristiano. Anggano walaray obligasyon tayo ed pamilya tan trabaho, nipanengneng tayon manuna ed sikatayo so ministeryo tayo diad maseseg tan regular a pibiang ed satan, a singa ed ginawa nen Jesus. (Mateo 6:33; 1 Timoteo 5:8) Sarag tayon italaga so inkasikatayo ed ministeryo, a mabulos tayon usaren so panaon, biskeg, tan kaykayarian tayo pian suportaan itan. (Lucas 13:24) Tan lawas tayon nonoten a say kimey tayo et maganat. (2 Timoteo 4:2) Kaukolan tayon anamoten so amin a pankanawnawa pian manpulong!

22. Anto so nasingbat ed onsublay a kapitulo?

²² Impatnag met nen Jesus a natetebek to so kaimportantian na satan a kimey diad impaneguro ton mantultuloy itan kayari ipatey to. Ingganggan toray patumbok to a mangituloy ed panagpulong tan panagbangat a kimey. Satan a ganggan so tema ed onsublay a kapitulo.