KAHON 19B
Onaagus a Danum a Nagmaliw ya Ilog!
Tinonton nen Ezequiel so onaagus a danum ya manlalapud santuaryo nen Jehova, tan makapakelaw ta samay ontetedter a danum et nagmaliw ya aralem ya ilog diad loob labat na manga duaran kilometro! Diad gilig na ilog, anengneng to ray masalompapak a kiew ya mamapawala na naakan tan pantambal. Antoy kabaliksan na sarayan amin?
Ilog ya Panlalapuan na Saray Bendisyon
NENSAMAN: Kapawil na saray Judio ed dalin da, inmagus ed sikara iray bendisyon nen tinmulong iran ipawil so dugan panagdayew ed templo
PANAON TAYO: Nen 1919, nipawil so dugan panagdayew kanian inmagus so agnasabaan ya espiritual iran bendisyon ed saray matoor a lingkor na Dios
ARAPEN: Kayari na Armagedon, saray onagus a bendisyon nen Jehova et parehon pisikal tan espiritual
Danum ya Mangiiter na Bilay
NENSAMAN: Dakel so bendisyon nen Jehova ed saray matulok ya totoo to kanian binmiskeg ira ed espiritual, tan magenap iray bendisyon anggano dinmakel ira
PANAON TAYO: Diad onaaligwas ya espiritual a paraiso, agunggonaan iray ondarakel ya lingkor nen Jehova ed ombabaleg ya iyaagus na saray espiritual a bendisyon to tan binmilay ira ed espiritual
ARAPEN: Nakaiba na saray makaliktar ed Armagedon so minilyon ya napaoli, tan magenap parad amin iray bendisyon nen Jehova
Saray Kiew ya Parad Kakanen tan Parad Pantambal
NENSAMAN: Diad espiritual a pantalos, pinakan nen Jehova iray matoor a totoo to diad nipawil a dalin da; pinaabig to met ira ed espiritual a sakit ya abayag ya amairap ed sikara
PANAON TAYO: Makakatulong ed totoo so dakerakel ya espiritual a naakan pian ag-ira naapektoan na graben espiritual a sakit tan eras ed sayan mundo
ARAPEN: Tulongan na Kristo tan saray 144,000 a kaiba ton manuley so amin ya matulok a totoo pian magmaliw iran perpekto tan andi-anggaan dan panliketan so bilay tan kasil na laman!