Pebrero

Anton “gagala” so nepeg ya sumpalen na panagsungdo? Ontulong itan pian ‘magmaliw itayon ayadyari tan nagnap ed amin a pamaakaran, ya anggapoy pankulangan tayo.’ (Sant. 1:4) Kaslakan, no wala ray subok et napatnagan iray kakapuyan tayo, saray kabiangan na personalidad tayo ya kaukolan ti nin paaligwasen. Balet no sungdoan tayo iratan ya subok, say Kristianon personalidad tayo et magmaliw a mas nagnap, o andiay pakabalawan. Singa bilang, nayarin magmaliw itayon mas maanos, maapresya, tan mapangasi. Lapud sumpalen na panagsungdo so importantin gagala to ya moldien itayo bilang Kristiano, ag-ikokompromiso iray prinsipyo na Biblia pian panampoten iray subok ya onsabid sika. Singa bilang, panon to no naiirapan kan labanan iray marutak ya kanonotan? Imbes ya manpatalo ed tukso, manpikasi ka pian nalabanan iratan ya pilalek. Diad ontan et napabiskeg moy panangontrol ed sarilim. Kasin susumpaen ka na saray agmananisian kapamilyam? Imbes ya manpaapekto ka, nepeg ya determinado kan mantultuloy ed impapuson panagdayew mo. Tandaan: Pian naawat tayoy panangabobon nen Jehova, kaukolan tayoy mansungdo.​—Roma 5:3-5; Sant. 1:12. w16.04 2:15, 16

Amta tayo ya no ipaatagey tayo so tribu, kultura, odino bansa tayo, onkokontra tayod pangipapasen nen Jehova ed totoo tan uley na too. Siempre, ag-iilaloan na Dios ya agtayo la birbiren so kultura tayo. Diad tua, lapud pandudumaan na kultura, nanengneng tayo so makapadinayew ya nanduruman klase na totoo. Balet nepeg tayon tandaan ya pareparehoy pakanengneng na Dios ed amin a totoo. (Roma 10:12) Say pangipasirayew ed bansan nanlapuan tayo et pakapatnagan na nasyonalismo, tan nayarin onggapo ditan so pakapikompromiso. Posiblin nawalaan met na ontan ya ugali iray Kristiano ta anggan diad kongregasyon nen inmunan siglo, wala ray manlalabi ed saray agagi da ya dumay bansan nanlapuan da. (Gawa 6:1) Panon tayon nibaga ya magmamaliw ti lan mapaatagey? Singa bilang, antoy reaksion mo no walay agin dumay lahi to ya angiter na suhestion ed sika? Kasin agmo awaten itan tan isipen mon tampol ya, ‘Mas maong so paraan mi dia’? Aliwan ontan komon, noagta iyaplika tayon amin so bilin na Biblia ya walad teksto tayod sayan agew. w16.04 4:12, 13

Impulong nen Jesus so “maong a balita na Panarian,” tan iilaloan ton gawaen met itan na saray disipulo to. Anton grupo na totoo so mangipupulong ed satan a mensahe diad “amin a nasyon”? (Mat. 28:19) Malinew so ebat​—Saray Tasi nen Jehova labat. Aminsan et imbaga na sakey a misioneron pari ed sakey a Tasi ya dakdakel lan bansa so nanayaman to tan tinepetan to iray Tasi ed saratan ya bansa no anton mensahe so ipupulong da. Antoy inyebat dad sikato? Inkuan na pari: “Makulangkulang iran amin ta pareparehoy ebat da: ‘Say maong a balita na Panarian.’ ” Balet aliwan “makulangkulang” iraman ya Tasi, noagta nankakasakey ira ed ibabaga ra, ta ontan so nepeg ya gawaen na saray tuan Kristiano. (1 Cor. 1:10) Tan iyaabawag da so mensahe na Say Panag-bantayan Mangipapalapag na Panarian nen Jehova. Sayan magasin et wala lad 254 a lenguahe tan ngalngali 59 milyon a kopya so niyiimprinta ed kada isyu, kanian satan so magasin a sankalaknaban ya nibubunog ed interon mundo. w16.05 2:6

Bilang manangipalapag na Panarian, ompan labay tayoy manregular payunir. Pian nagawaan tayo itan, kaukolan ya pasimplien tayo ni bilay tayo. Balet nayarin mapaga itayo no kasin makapansiansia tayo nin maliket anggano daiset so kuarta tayo. Siempre, anggapoy ganggan ed Biblia ya manpayunir itayo; sarag tayoy makapantultuloy a manlingkor ed si Jehova bilang matoor ya manangipalapag. Balet, papaseguroan itayo nen Jesus ya saramay mansasakripisyo parad Panarian et makaawat na dakel a bendisyon. (Luc. 18:29, 30) Sakey ni, ipapanengneng na Kasulatan ya naliliketan si Jehova ed ‘boluntaryon iyaapay tayo a panangidayew’ ed sikato, tan naliliketan met no maliket tayon gagawaey anggaay nayarian tayo pian suportaan so dugan panagdayew. (Sal. 119:108) Diad saratan a punto manlapud Kasulatan, tan diad pampikasi tayo parad panangigiya, agta natetebek tayoy panagnonot nen Jehova? No dalepdepen tayo iraya, natulongan itayon manggaway desisyon ya praktikal parad sikatayo tan naawat tayoy bendisyon na Ama tayo ed tawen. w16.05 3:13

Dakel ed saray probleman ipapaliwawa ed saray artikulo ya parad kabataan et naeeksperiensya met na arum. Amin tayo et nepeg tayon idepensay pananisia tayo, kontroley emosyon tayo, resistiay mauges iran impluensya na saray kalimog, tan paliisan iray mauges ya kaulop tan panagligliwaan. Sarayan topic tan dakel ni et nipaliwawa ed saray artikulon parad saray tinedyer. Nepeg kasin isipen na saray wala lad edad ya Kristiano ya nipaabeba ira no basaen da ray publikasyon ya parad kabataan? Andin balot! Anggaman say artikulo et ginawa ya makapasagyat parad saray kabataan, saray impormasyon ditan et base ed ag-ondadaan iran prinsipyo ed Biblia tan amin tayo et minabang ed sarayan espiritual a probisyon. Likud ed panangigiya na saray publikasyon ed saray kabataan pian nasarag da ray problema, ontutulong met iratan pian ontatken irad espiritual tan onapit irad si Jehova. Nagunggonaan met ed saya iray wala lad edad ya Kristiano.​—Ecl. 12:13. w16.05 5:15, 16

“Si Jehova a Dios tayo et saksakey a Jehova.” Talagan mapuersa itan a panonot! Satan so amabiskeg ed saray Israelita ya arapen iray subok diad iloob tan panayam dad Insipan a Dalin. No ipapuso tayo met iratan, napabiskeg tayon arapen so onsabin baleg ya kairapan tan makatulong tayo ed nagawan Paraiso. Komon ta ipanengneng tayo ya si Jehova labat so dadayewen tayo diad pangaro tan panlingkor ed sikato ed interon puso, tan diad panggaway anggaan na nayarian tayon pansiansiaen so pankakasakey tayo bilang sanaagi. No itultuloy tayon gawaen itan, makapanmatalek itayon nanengneng so pakasumpal na samay imbaga nen Jesus nipaakar ed saramay naukom bilang karnero: “Gali dia, sikayo ran benendisyonan nen Amak, tawir yoy Panarian ya imparaan ed sikayo manlapu lad inkiletneg na mundo.”​—Mat. 25:34. w16.06 3:2, 20

No mapaatagey tayo, ikatunongan tayo ray gagawaen tayo tan magmaliw tayon mairap ya moldien. Kasin asalim lay asakitan na sakey ya agi odino naandian na saray pribilehyo? Antoy reaksion mo? Kasin agmo naawat? Odino say manunan nononoten mo et say pikareenan ed agim tan pansiansian matoor ed si Jehova? (Sal. 119:165; Col. 3:13) No say sakey et manggagawa na kasalanan tan iyaamot to itan, mairap toy mangawat na simbawa manlapud Biblia. Magmainomay to lay manggawa na kasalanan. (Ecl. 8:11) Oniay inamin na sakey nin brother ya naynay lan manbabantay na pornograpiya, “Nagmaliw ak ya makritiko ed saray elder.” Naapektoan so espiritualidad to lapud naynay ya pambabantay to. Nen naamtaan na saray elder so gagawaen to, tinulongan da. Siempre, amin tayo et aliwan perpekto. Balet no makritiko tayo la odino ikakatunongan tayoy aliwan gagawaen tayo imbes ya onkerew na panamerdona tan tulong na Dios, nayarin onaawet lay puso tayo. w16.06 2:5, 6

Pampapagaan na saray dumerengel nen Jesus iray bengatlan agda nepeg komon ya pampagaan. Imbaga nen Jesus ya tundaan da la itan​—tan walay maabig ya rason. Say alablabas ya pampaga o panaburido, anggan diad saray nepeg met ya pampagaan, et nayarin mangapag na nonot na sakey tan agla makapampokus, nalingwanan to la no antoy mas importante ed bilay, saray espiritual a bengatla. Sankanonot nen Jesus iray disipulo to kanian diad sermon tod palandey et amipat to ran pinasakbayan nipaakar ed sayan mapeligron tendensia. (Mat. 6:27, 28, 31, 34) Amta to iray inagew-agew ya nakaukolan na totoo. Amta to met iray mairap ya kipapasen ya arapen na saray disipulo to ya manbilay diad “kaunoran iran agew,” ya “mapeligro tan mair-irap a panaon.” (2 Tim. 3:1) Dakel so andian na trabaho, mabmabli iray sasaliwen, kulang so naakan, tan agaylay irap so bilay. Balet amta met nen Jesus ya ‘mas importante so bilay nen say naakan tan say laman nen say kawes.’ w16.07 1:8, 9

No nagagawaan tayon amin iray kakaukolanen nen Jehova, kanepegan tayo komon so kaabigan ya ipapanengneng tod sikatayo. Balet ta agtayo nagagawaan ya amin. Kanian insulat na makabat ya Arin Solomon: “Anggapoy matunong a too diad dalin a naynay a manggagaway maong tan agbalot mankakasalanan.” (Ecl. 7:20) Onia met so imbaga nen apostol Pablo: “Amin et nankasalanan tan agda sarag ya ipatnag so gloria na Dios,” tan “say bayar na kasalanan et patey.” (Roma 3:23; 6:23a) Atan so kanepegan tayo. Balet impatnag nen Jehova so panangaro tod makasalanan ya totoo panamegley na agnaparaan a kaabigan. Bilang sankabalegan ya regalo to, imbaki to diad dalin so “bogbogtong ya Anak to” pian ompatey parad sikatayo. (Juan 3:16) Kanian insulat nen Pablo ya si Jesus et “akoronaan la na gloria tan galang lapud impanagmak toy ipapatey, pian diad agnaparaan a kaabigan na Dios et natawayan toy ipapatey parad kada too.” (Heb. 2:9) On, “say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.”​—Roma 6:23b. w16.07 3:3, 4

Say panangasawa et parte na bilay tayo. No repasoen tayoy nanlapuan tan gagala na satan, magmaliw ya dugay pangipasen tayo ed relasyon na sanasawa tan mas naapresya tayo ray makapaliket ya gagala na satan. Kayarin pinalsa na Dios so unonan laki ya si Adan, inyakar To iray ayayep ed sikato pian ngaranan to. Balet, “anggapoy kaiba na laki bilang katulongan to.” Kanian, pinaugip na Dios si Adan, inala Toy sakey a taglang to, ginawa Ton bii, tan inyakar Tod laki. (Gen. 2:20-24) Say panangasawa sirin et nanlapud Dios. Inulit nen Jesus imay imbaga nen Jehova ya, “Taynan na laki so ama tan ina to tan iyamong toy asawa to, tan sikaran dua et magmaliw a sakey a laman.” (Mat. 19:4, 5) Diad samay impangusar na Dios ed taglang nen Adan pian gawaey unonan bii, posiblin nipanonot ed unonan sanasawa ya sikaray parad sakey tan sakey. Anggapoy uksoyan parad diborsyo odino pakawalaay pigaran asawa. w16.08 1:1, 2

Lanang ya ipupulong nen Jesus so nipaakar ed Panarian. Singa bilang, mabilabilay tan balibali resulta na impitongtong tod sakey a bii diad bobon nen Jacob ya asingger ed syudad na Sicar. (Juan 4:5-30) Akitongtong met ed si Mateo Levi, ya managsingil na buis. Inawat nen Mateo so imbitasyon nen Jesus ya magmaliw a babangatan to. Nadngel nen Mateo tan saray kakaiba to so paliwawa nen Jesus diad sakey a ponsia ed abung to. (Mat. 9:9; Luc. 5:27-39) Aminsan, makaaron akitongtong si Jesus ed si Natanael, ya negatiboy iisipen tod saray taga Nazaret. Lapud saman, anguman so kanonotan nen Natanael. Labay to lan naaralan so ibabangat nen Jesus ya taga Nazaret. (Juan 1:46-51) Maabig met sirin no ipasal tayo ray balon manangipalapag ya magmaliw a makaaro tan relaks ya mitongtong ed totoo. Seguradon naliketan iray tutulongan tayo no naobserbaan dan maabig so epekto na pangipanengneng na personal ya interes tan makaaron pitongtong. w16.08 4:7-9

No wala ray seryoson problema na sanasawa, nayarin isipen day mansian o mandiborsyo. Say pisian et seryoson bengatla. Anggano singa atan so solusyon no wala ray graben agpantatalosan, diad tua et panlapuan itan na mas dakel ya problema. Kayarin inulit nen Jesus so imbaga na Dios nipaakar ed panaynan na laki ed atateng to tan pangiyamong tod asawa to, inkuan to: “Say impankasakey na Dios et agnepeg a pansianen na too.” (Mat. 19:3-6; Gen. 2:24) Labay ya ibaga na satan ya agnayarin ‘pansianen na asawan laki o asawan bii so impankasakey na Dios.’ Parad si Jehova et legay bilay so panangasawa. (1 Cor. 7:39) Amin tayo et mikuentaan ed Dios, kanian nepeg ya gawaen na saray walaan na asawa so anggaay nayarian dan resolbien a tampol iray problema da pian agla onloor iratan. w16.08 2:10, 11

Nayarin onataki iray kalaban no agtayo iilaloan tan no makapkapuy tayo, kanian kaukolan ya mansiansia tayon alerto. Natalosan tayod panamaseseg ya agtayo “padadaeg ed mauges” ya sarag tayon taloen so mauges. Nagawaan tayo itan no itultuloy tayon labanan itan. Balet no mapaulyan tayo tan ontunda ti lan milaban, natalo itayo nen Satanas, say mauges ya mundo to, tan saray kakapuyan tayo. Agmo aabuloyan ya taktakoten tan taloen ka nen Satanas! (1 Ped. 5:9) Pian manalo iray milalaban, kaukolan ya amta ray rason no akin ya milalaban ira. Pian naawat day pabor tan bendisyon na Dios, kaukolan ya sankanonot day panamaseguro ya nabasad Hebreo 11:6: “Siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.” Say Griegon salita ya impatalos ya “masimoon a manaanap” et ontutukoy ed impasya tan graben pansagpot.​—Gawa 15:17. w16.09 2:4, 5

Mangiiter so Salita na Dios na praktikal iran giya ya ontulong ed sikatayon manggaway makabat ya desisyon pian nigloria so Dios. Siempre, walay karapatan tayon manpili na isulong tayo. Nandurumay labay tayo, tan pakasarag tayon mangaliw. Balet nepeg ya say kawes tayo et lanang a maayos, malinis, masimpit, matukoy ed okasyon, tan agmakaopendi ed lugar tayo. Tua aliwan naynay ya mainomay so manggaway desisyon ya pakapatnagan na maong a pakatebek, inkasimpit. Tan agtayo naynay ya naimano so amin ya detalye. Karaklan ya panagsaliwan et puro uso so ilalako da, kanian mairap so makalmo na masimpit ya palda, bestida, tan blouse, odino long-sleeve tan pantalon ya aliwan mapitpitat. Balet, posiblin naimano na agagi so impansagpot mo tan apresyaen day anos mon nan-anap na balibali tan matukoy ya kawes. Tan melag labat so sagpot tayo no ikomparad liket ya nalikna tayo no nigloria tayoy maaron Ama tayod tawen. w16.09 3:15, 16

Saray ugugaw et ma-imadyin. Kanian atateng, mangusar kayon lanang na ilustrasyon no ibabangat yo ra. Saray epektibon ilustrasyon et makatulong met pian napabiskeg so pananisia na anak yo ya susto so Biblia. Singa bilang, imano yo pay teksto ed sayan agew. Panon yon ipanengneng ya sayan teksto et nanlapud Dios? Nayarin basta yo labat ibaga iray katuaan. Balet, agta maabig no tulongan yon man-imadyin? Ibaga yo ya posiblin agmanisia iray totoo ed panaon nen Job ya akabitin ed anggapo so dalin ta amta ra ya amin ya bengatlan walay belat to, singa say bola o bato, et kaukolan ya walay mangawit o pangigatonan. Ipaimano yod sikato ya nen panaon Job et anggapo ni ray telescope tan spaceship. Diad ontan et natalosan ton abayag lan impaisulat nen Jehova ed Biblia iray katuaan antis nin apruebaan na totoo ya susto iratan.—Neh. 9:6. w16.09 5:9, 12

Say pananisia et aliwa labat ya antam iray gagala na Dios. Mabiskeg itan ya puersan mamakiwas ed sakey pian gawaen so panlabayan na Dios. No say sakey et walaan na pananisia ed inusar na Dios ya mangiliktar, napakiwas ya inabang ed arum so maong a balita. Say ilalo tayon manbilay ya anggapoy anggaan diad balon mundo na Dios et akadependid pakawalaan na pananisia tan pamasiansia ed satan a mabiskeg. Nayari tayon ikompara itan ed mabunan tanaman ya kaukolan a salogen. Aliwan singa say artipisyal ya tanaman, say mabilay ya tanaman et manguuman-uman. Nayarin nalenes itan no agnasalog odino mantultuloy a manbilay no lanang ya nasasalog. No napaulyanan, nayarin ompatey anggano dati et mabunabuna. Ontan met so pananisia tayo. Nalenes tan ompatey no napaulyanan. (Luc. 22:32; Heb. 3:12) Balet no asikasoen tayo, say pananisia tayo et mansiansian mabilay tan ‘ombiskeg a maong.’​—2 Tes. 1:3; Tito 2:2. w16.10 4:4, 5

Nen si Daniel tan saray kakaiba to et inyakar ed Babilonia, sinali na saray totoo diman ya impluensyaan irad kultura da diad impangibangat dad “lenguahe na saray Caldeo.” Sakey ni, say opisyal na palasyo ya mangaasikasod sikara et inikdan to ray kangaranan ed Babilonia. (Dan. 1:3-7) Say ngaran ya inter tod si Daniel et ontutukoy ed si Bel, say manunan dios ed Babilonia. Labay ya ipurek nen Arin Nabucodonosor ed si Daniel ya say Dios ton si Jehova et walad pakauley na dios na Babilonia. (Dan. 4:8) Anggano say inter dan naakan to et panangan na ari, “determinadoy Daniel ya agto dutakan so sarili to.” (Dan. 1:8) Lapud intultuloy ton inaral iray “sagradon libro” ed sarili ton lenguahe, apansiansia ton mabiskeg so espiritualidad to anggano walad arum a bansa. (Dan. 9:2, paimanod leksab) Kanian kalabas na 70 taon manlapu nen sinmabid Babilonia, kabkabat nin siansia ed samay Hebreon ngaran to.​—Dan. 5:13. w16.10 2:7, 8

Tinuro nen Jesus so ‘matoor ya aripen,’ bilang say saksakey ya usaren to pian iparaan so espiritual ya naakan. (Mat. 24:45-47) Manlapu la nen 1919, uusaren na nitronon ari ya si Jesu-Kristo iyan aripen pian natalosan na saray papatumbok to so Libro na Dios tan niyaplika day simbawa na satan. No unoren tayoy instruksion na Biblia, napansiansia tayoy kalinisan, kareenan, tan pankakasakey ed kongregasyon. Tepetan tayoy sarili tayo, ‘Kasin matoor ak ed sayan aripen ya uusaren nen Jesus natan?’ Diad tulong na Biblia et naamtaan tayoy nipaakar ed kabiangan na organisasyon nen Jehova ed tawen. Singa bilang, akaawat na pasingawey si propetan Ezequiel ya say kabiangan na organisasyon na Dios ed tawen et irerepresenta na mangatatawen ya karwahe. (Eze. 1:4-28) Lapud asingger lan deralen nen Kristo tan saray masanton anghel to iyan mauges a mundo, maples ya onaabante so karwahe nen Jehova pian niyalangon so soberanya to tan napasanto so ngaran to! w16.11 3:9, 10

Singa saramay papatumbok nen Jesus nensaman, mantitipon itayo pian makaaral tan napaseseg. (1 Cor. 14:31) Anggan saray eksperiensyadon lingkor na Dios et kaukolan day panamaseseg. Imanoen pay Josue. Anggan abayag lan matoor ya manlilingkor, siansian ingganggan na Dios si Moises ya mamaseseg ed sikato: “Turom si Josue tan paseseg mo tan pabiskeg mo, ta sikato so ombaliw diad unaan na sarayan totoo tan diad panamegley to et natawir da so dalin a nabantag mo.” (Deu. 3:27, 28) Baleg so responsabilidad nen Josue ta sikato so mangidaulo ed saray Israelita ya onloob ed Insipan a Dalin. Dakel so arapen ton problema tan natalo ya maminsan ed guerra. (Jos. 7:1-9) Talagan kaukolan nen Josue so panamaseseg tan panamabiskeg! Maong sirin no personal tayon pasesegen iray elder, pati saray manangasikaso na sirkito, ya mansasagpot a maong pian naasikasoy pulok na Dios.​—1 Tes. 5:12, 13. w16.11 1:12, 13

Atalosan na Saray Estudyante na Biblia ya agmagenap so basta pangipaamta dad saray kakanayon, kakaaro, tan membro na simbaan ya inmekal irad palson relihyon. Kaukolan ya naamtaan na interon mundo no anton talaga so Makapanyarin Babilonia—imoral itan ya relihyon! Kanian nen Disyembre 1917 anggad kagapo na 1918, nilibon Estudyante na Biblia so makulikulin angibunog na 10,000,000 ya kopya na tract ya say title to et “Naderal Lay Babilonia”​—talagan diretsaan itan ya akusasyon ed Kakristianoan. Agaylay pasnok na saray papari; balet agsinmuko iray Estudyante na Biblia tan intuloy da so importantin kimey. Determinado ran “unoren so Dios bilang manuley imbes a saray totoo.” (Gawa 5:29) Antoy nibaga tayod satan? Malinew sirin ya agla ra naaripen na Makapanyarin Babilonia legan na guerra. Diad tua, saratan ya Kristiano et makakalukpos la rad impluensya to tan tutulongan da ray arum ya ontan met so gawaen da. w16.11 5:2, 4

Nayarin isipen na arum ya say tutukoyen na saya et saray anggapod katuaan tan saray walad katuaan, saramay aliwan Kristiano tan Kristiano. Balet, say sinulatan nen Pablo et “amin ya inad-aro na Dios a walad Roma, a tinawag pian magmaliw a masanto.” (Roma 1:7) Kanian say pankokomparaen nen Pablo et saray Kristianon manaakar unong ed laman tan saray Kristianon manaakar unong espiritu. Imbaga to ya say ‘pambilay unong ed laman,’ et walay koneksion tod “saray makasalanan a pilpilalek” ya saratan et “onkikiwas ed laman” da. (Roma 7:5) Kanian no tutukoyen iramay “pinonot da ray bengatlan nipaakar ed laman,” say tutukoyen nen Pablo et saray totoon pakokontrol ed pilalek da tan tendensia na agperpekton too. Diad antikey ya salita, sikara iramay totoon unor-unor ed pilalek, panlabayan, tan pirpirawat da, balanglan nipaakar ed sekso tan arum ni ra. w16.12 2:5, 7

Nayarin napapagaan so arum lapud saray ginawa o lingo rad apalabas. Walay panaon ya say pakalikna nen David et ‘onsasakbong ed ulo to iray lingo to.’ Inamin to: “Manugaog ak lapud maer-ermen so pusok.” (Sal. 38:3, 4, 8, 18) Diad ontan iran situasyon, antoy maong ya gawaen nen David? Antoy ginawa to? Sikatoy nanmatalek ed panangasi tan panamerdona nen Jehova. (Sal. 32:2, 3, 5) No maminsan, nayarin napagaan kad saray kaplesan ya nagagawa. Singa bilang, nen insulat nen David so Salmo 55, sikatoy natatakot lapud napepeligroy bilay to. (Sal. 55:2-5) Anggaman ontan, agto inabuloyan ya naandi so talek tod si Jehova lapud satan ya kapagaan. Impikasi to ray problema to, balet ta nanggawa met na saray praktikal a paraan pian naarap toy panlalapuan na saratan. (2 Sam. 15:30-34) Makaaral tayod si David. Imbes ya manpatalo ed saray kapagaan, manggawa tayoy paraan pian naarap iratan insan tayo la ipalima ed si Jehova. w16.12 3:14, 15

Inawat nen David so panangipetek na imbaki nen Jehova, si propeta Natan. Nampikasi met si David ed si Jehova, impatua to ray kasalanan to tan imbaga ton labay ton napapawil so panangabobon nen Jehova. (Sal. 51:1-17) Imbes ya manpatalo ed pakakakonsiensia to, akaaral si David ed saray lingo to. Tan agto lan balot inulit iratan. Kalabas na pigay taon, sikatoy inatey ya matoor, sankanonot nen Jehova so katooran to. (Heb. 11:32-34) Antoy naaralan tayod alimbawa nen David? No akagawa tayoy seryoson kasalanan, kaukolan ya impapuso so pagbabawi tayo tan kerewey panamerdona nen Jehova. Ipatua tayod sikato iray kasalanan tayo. (1 Juan 1:9) Onasingger tayo met ed saray elder pian natulongan da tayon ombiskeg lamet ed espiritual. (Sant. 5:14-16) No ontulok tayod saray uksoyan nen Jehova, ipapanengneng tayon manmamatalek tayod promisa to ya paabigen tan perdonaen to tayo. Bilang resulta, makaaral tayod saray lingo tayo, nituloy tayoy manlingkor ed si Jehova, tan nailaloan tayo ray bendisyon ed arapen.​—Heb. 12:12, 13. w17.01 1:13, 14

Anto iratay “gawan mapalakbat”? No say sakey et bengatbengat odino basta to labat gawaen so agto kanepegan, sikatoy mapalakbat. Lapud atawir tayon kasalanan, no maminsan et magmaliw itayon ontan. Balet singa ipapanengneng na agawad si Saul, no napasal tayon ipasoot so labay tayo, agmanbayag et ompan ipulisay itayo met na Dios. Oniay nabasad Salmo 119:21 nipaakar ed si Jehova: “Babanoen mo so mapalakbat.” Akin et babanoen to ra? Saray gawan mapalakbat et mas ambelat nen saray agginagalan lingo. Unona, no manpaatagey tayo, agtayo nigagalang si Jehova bilang Soberano. Komadua, no onlampas itayod autoridad ya niiter ed sikatayo, ompan makapikolkol itayo. (Pro. 13:10) Tan komatlo, no naamtaan na arum ya mapalakbat itayo, nayarin nabaingan itayo laingen. (Luc. 14:8, 9) Anggapoy maong ya resulta na saray gawan mapalakbat. Base ed Biblia, naynay ya duga so pagmaliw ya mapaabeba. w17.01 3:4, 5

Lapud agla perpekto si Adan, agto la nipatnag iray kualidad na Dios diad perpekton paraan. Aliwan sikato labat so naandian na balibalin arapen, noagta impatawir to met ed ananak to so ag-inkaperpekto, kasalanan, tan patey. (Roma 5:12) Insiblet tod ananak to so ilalon manbilay ya anggapoy anggaan. Niarum ni, agla ra makapananak na perpekton too; anggan saray ananak da et agmet la makapananak na perpekton too. Manlapud samay impanukso nen Satanas a Diablo ed si Adan tan Eva, siansia nin papalikdoen to ray totoo anggad natan. (Juan 8:44) Balet, siansian inaro nen Jehova iray totoo. Anggano nanrebelde si Adan tan Eva, labay nen Jehova ya nawalaay maong ya relasyon ed sikato iray totoo. Agto labay a walay siopaman ya ompatey. (2 Ped. 3:9) Kanian kayari na rebelyon, nanggawa so Dios na paraan pian makapikaaro lamet ed sikato iray totoo balet ta diad paraan ya agto nikompromisoy matunong iran estandarte to.​—Juan 3:16. w17.02 1:12-14

Mas napabli tayoy betang tayod organisasyon no aligen tayoy Jehova ya say iimanoen to et say kaabigan na arum. Imbes ya man-ambisyon tayon magmaliw ya prominente odino naynay tayon diktaan so arum, mas maabig no mapaabeba tayon kerewen so simbawa na arum tan awaten so suhestion da. Miliket tayod sikara no akaawat iray pribilehyo. Tan idayew tayoy Jehova legan tayon nanenengneng ya bebendisyonan toy ‘amin ya agagi tayo ed interon mundo.’ (1 Ped. 5:9) Ontan met, onaligwas so pakatebek tayo no mapaabeba tayon aralen tan aligen so panmoria nen Jehova. Diad panamegley na regular a panagaral, panagpikasi, tan pangiyaplika ed saray nanaaralan tayo, mas nipasal tayoy konsiensia tayo. (1 Tim. 1:5) Naaralan tayon iyunay pankaabigan na arum. No ontan so gawaen tayo, impromisa nen Jehova ya “sumpalen toy pangipapasal tod sikatayo,” tan tulongan to tayon magmaliw ya mas mapaabeba tan napaaligwas iray arum nin balibalin kualidad.​—1 Ped. 5:10. w17.01 4:17, 18

Kanepegan na saray agagi tayo so galang tan respeto, lalo lad saray elder ya mangidadaulo ed sikatayo. Igagalang tayo irayan brother anggan antoy lahi, edukasyon, trabaho, odino kipapasey bilay da. Tinawag ira na Biblia ya “saray regalo a lalaki,” tan walay importantin betang da ed uksoyan na Dios pian naasikasoy pankaukolan na totoo to. (Efe. 4:8) Isip mo pa ray elder ed kongregasyon, manangasikaso na sirkito, saray membro na Branch Committee tan Mananguley ya Ulop. Nirespeto na agagi nen inmunan siglo iramay aturon mangidaulo, tan ontan met so gagawaen tayo natan. No nakaiba tayo ray kabkabat ya mangirerepresenta ed Kristianon kongregasyon, agtayo ra iidoloen odino tratratoen ya singa anghel. Imbes, rerespetoen tan papagalangan tayo ra lapud inkakuli tan inkamapaabeba da.​—2 Cor. 1:24; Apo. 19:10. w17.03 1:13

Talagan dumay ugali nen Jesus no ikomparad si Herodes Agripa I, ya nagmaliw ya ari na Judea! Diad sakey ya espisyal a miting, nansulong si Herodes na “kawes na ari.” Insan inmeyag iray totoo: “Boses na dios, aliwan boses na too!” Mapatnag ya manlikliket si Herodes ed satan. Balet “tampol a sikatoy kinabil na anghel nen Jehova, lapud inala toy gloria a parad Dios, tan sikatoy kinan na saray bigis tan inatey.” (Gawa 12:21-23) Seguradon anggapoy makalakal ya toon akanengneng ed saman ya mangibagan pinili nen Jehova si Herodes ya magmaliw a lider. Diad si Jesus balet, dakel so mabiskeg ya ebidensyan sikatoy tinuro na Dios, tan naynay ton iglogloria si Jehova bilang Sankamakapanyarian ya Lider na totoo to. Say panuley nen Jesus bilang lider et aliwa labat ya pigaran taon. “Amin a pakauley ed tawen tan diad dalin et niiter lad siak” so inkuan to nen apaolid bilay. “Tan wala ak ed sikayo ed amin ya agew anggad kaunoran a parte na sistema na mundo.”​—Mat. 28:18-20. w17.02 3:20, 21