Marso

Lapud imon tan panamusol, si Jefte et pinataynan na saray agagi tod ama, tan agda inter so manepeg ya tawir to bilang panguloan. (Ukom 11:1-3) Balet nen kinmerew iray tulong, tinulongan to ra. (Ukom 11:4-11) Say pangidepensa ed ngaran nen Jehova so mas importante ed sikato nen say anggan anton agpantatalosan. Sikatoy determinadon mansiansian matoor ed si Jehova kanian maabig so epekto ed sikato tan ed arum. (Heb. 11:32, 33) Kasin ipapuso tayo so alimbawa nen Jefte? Nayarin asali ti lay adismaya odino aliway impantrato ed sikatayo na arum ya agagi. No ontan, agtayo aabuloyan iratan a situasyon ya mangamper ed iyatendi tayod saray aral odino panlingkor ed si Jehova tan sigpot ya pilimog ed saray agagi. Pian naalig tayoy Jefte, abuloyan tayo met ya say estandarte na Dios so ontulong ed sikatayo pian nasarag iray negatibon situasyon tan mantultuloy ya magmaliw a makapaseseg ed arum.​—Roma 12:20, 21; Col. 3:13. w16.04 1:7, 9, 10

Kaukolan tayoy mansungdo, aliwa labat ya diad sakey a panaon noagta anggad anggaan. Pian iyilustra: Isipen pay sakey ya barko ya onlelereg. Pian makaliktar iray pasahero, kaukolan day onlangoy angga ed sakbit. Samay linmangoy ya anggad ngalngali la makasabi ed sakbit balet tinmunda et pareho labat so pansumpalan to ed samay akauna lan sinmuko. Ontan met, determinado tayon mansungdo anggad makasabi tayo ed balon mundo. Akadepende ed pansungdo tayo so bilay tayo. Say determinasyon tayo et singa si apostol Pablo ya amidua ton imbaga: “Ag-itayo ontutunda.” (2 Cor. 4:16) Segurado tayo ya tulongan itayo nen Jehova ya mansungdo anggad anggaan. Matalek itayo met a singa si Pablo, ya oniay imbalikas to ed Roma 8:37-39: “Sigpot itayon manalo diad panamegley to ya angaro ed sikatayo. Ta manisia ak ya anggan say ipapatey odino say bilay odino saray anghel odino saray gobierno odino saray bengatlan wala natan odino saray bengatlan onsabi odino saray pakayari odino say kaatagey odino say kaaralem odino anggan dinan nin pinalsa so agbalot makapangisian ed sikatayo ed aro na Dios a walad si Kristo Jesus a Katawan tayo.” w16.04 2:17, 18

Kerew mod Jehova so karunongan pian nanengneng tan naarap mo ray situasyon ya nayarin pansengegan na pangikompromisom ed neutralidad mo. No napriso odino nadusa ka lapud agmo labay ya benegan so dugan panagdayew, ipikasim ya nawalaan kay biskeg pian nidepensam so pananisiam tan nasungdoan moy antokaman ya onsabin panamasegsegang. (Gawa 4:27-31) Sarag to kan pabiskegen nen Jehova panamegley na Biblia. Dalepdepen iray teksto ya makatulong ed sikan mansiansian neutral no nasusubok. Ipatlep la iratan natan pian napabiskeg da ka no onsabi panaon ya agka la nayarin manbukay na Biblia. Pabiskegen met na Salita na Dios so ilalom ed saray bendisyon na Panarian ed arapen. Importante iyan ilalo pian nasungdoan tayoy panamasegsegang. (Roma 8:25) Manpili na saray teksto ya pakabasaan na saray bendisyon ya pipirawaten mon naawat, tan imadyin mon panliliketan mo la iratan diad Paraiso. w16.04 4:14, 15

Saray pari odino pastor na Kakristianoan et agda ipupulong so Panarian na Dios. No tutukoyen da so Panarian, kaslakan ed sikara et ibabaga ran sakey itan ya liknaan odino kipapasen na puso na sakey a Kristiano. (Luc. 17:21) Agda tutulongan iray totoo ya natalosan a say Panarian na Dios et sakey a gobierno ed tawen tan si Jesu-Kristo so Manuley, ya satan so solusyon ed amin a problema na totoo, tan asingger lan ekalen na satan so amin ya kaugsan ed sayan dalin. (Apo. 19:11-21) Mas labay dan nodnonoten si Jesus no Krismas tan Easter (odino, Piesta na Inkioli). Mapatnag ya agda amta no antoy gawaen nen Jesus bilang say balon Manuley ed dalin. Agda met amta no antoy nepeg ya motibo ed panagpulong. Aliwa itan ya pian mankolekta na kuarta tan mangipaalagey na ankabli iran bilding. Say Salita na Dios et agnepeg ya pannegosyoan. (2 Cor. 2:17, paimanod leksab) Saray mangipupulong ed mensahe et agda nepeg ya anapey pinabangan da ed kimey ya gagawaen da.​—Gawa 20:33-35. w16.05 2:7, 8

Nayarin walay labalabay mon estilo na panangawes, balet ompan ag-itan nagustoan na arum ed kongregasyon. Anggapo balet so nanonotan mon espisipikon ganggan ed Biblia ya sebel itan. Anto kasi nononoten nen Jehova ed satan? Oniay impuyan ya simbawa nen apostol Pablo: “Nepeg a say pamarakep na saray bibii ed sarili ra et say matukoy a panangawes, a mangipatnag na kasimpitan tan limpion kanonotan, aliwan say nanduruman estilo na panaglapir na buek tan saray balitok odino perlas odino mabmablin kawes, noagta diad paraan a manepeg ed saray bibii a mangibabagan mandadayew irad Dios.” (1 Tim. 2:9, 10) Siempre, onaplika met iyan simbawa ed saray Kristianon lalaki. Lapud interon puso itayon manlilingkor ed si Jehova, agtayo labat nononoten no antoy labay tayon estilo na panangawes tan panag-ayos noagta nononoten tayo met so epekto na satan ed arum. Say kasimpitan tan panangaro so mamakiwas ed sikatayon ikonsidera so opinyon na saray agagi pian agtayo ra nagapol.​—1 Cor. 10:23; Fil. 3:17. w16.05 3:14

Nen nanrebelde si Adan ed Nanggawa ed sikato, abalang toy pribilehyon natawag ya anak na Dios. Anggaman ontan, diad amin ya sinmublay a henerasyon, “walay baleg a grupo” na saray ananak nen Adan ya pinili dan suportaan so soberanya na Dios. (Heb. 12:1) Diad mapaabeban impanpasakop dad Amalsa, impanengneng da ya sikato so labay dan Ama tan Managdamili da, aliwan si Satanas. (Juan 8:44) Say katooran dad Dios et mangipanonot ed teksto tayo ed sayan agew. Natan, amin ya mandadayew ed si Jehova ed espiritu tan katuaan et mansasagpot ya ipatnag met so ontan ya inkamapaabeba tan inkamapasakop. Parad sikara et kagalangan da ya tawagen si Jehova ya Ama tan manpasakop ed sikato bilang Managdamili ra. Kasin ipapasen moy sarilim ya singa anlemek ya pitek ed lima na Dios, ya maliket ya pamoldi pian magmaliw a pananginan ya marakdakep ed pakanengneng to? Kasin ipapasen mo met a saray agagim ed espiritual et peles nin kikimeyan tan momoldien na Dios? w16.06 1:2, 3

Legan ya manasingger tayo lad balon mundo, nasusubok so pananisia tayo. Maabig no usisaen tayo no panon kabiskeg so pananisia tayo. Singa bilang, anto kasi pangipapasen tayod samay imbaga nen Jesus ed Mateo 6:33? Tepetay sarilim: ‘Kasin napatnagan ed saray prayuridad tan desisyon ko ya talagan panisiaan koy imbaga nen Jesus? Kasin agak la miaral o manpulong pian mas baleg so naalmok? Antoy gawaen ko no say trabahok et mangaala na dakel ya panaon tan biskeg ko? Kasin abuloyan koy mundo ya mangimpluensya ed siak​—ya ompan taynan ko ni ingen so katuaan?’ Niay sakey nin alimbawa: Sakey ya lingkor nen Jehova so manduaruwa no unoren to ray prinsipyod Biblia, nayarin nipaakar ed pipiulop, panagdispelosip, o panagligliwaan. Tepetay sarilim, ‘Kasin ontan ak?’ No nalilikas tayon onaawet lay puso tayo, nepeg ya usisaen a tampol so pananisia tayo! Diad panamegley na Salitay Dios et nepeg tayon gawaen itan a naynay. w16.06 2:8, 9

Saray Tasi, ya matoor ya lingkor nen Jehova diad dalin, et sakey ya organisasyon ya talagan nikadkaduma. Tua, totoo ira ya agperpekto tan nalilingo met. Balet say masanton espiritu nen Jehova so ontutulong pian ombaleg tan onaligwas so kongregasyon to ed interon mundo. Nen ginmapo so kaunoran iran agew na sayan sistema na mundo nen 1914, dagdaiset ni ray lingkor na Dios ed dalin. Balet benendisyonan nen Jehova so pampupulong da. Diad tinmumbok iran dekada, minilyon so nanaral na katuaan ed Biblia tan nagmaliw ya Tasi nen Jehova. Diad tua et impasakbay la nen Jehova iyan makapakelaw ya idakel da, ya nabasa ed teksto tayod sayan agew tan inkuan to nin: “Siak a mismo, si Jehova, so mamapeles ed saya diad mismon panaon to.” Talagan nasusumpal itan ya propesiya ed sayan kaunoran iran agew. Kanian natan, say bilang na totoo na Dios ed dalin et mas dakel nen say pinan-iiban populasyon na dakel ya bansa. w16.06 4:1, 2

Parad si Jesus, imposiblin say Ama ton walad tawen et mangitarya na naakan ed saray manok balet ta agto asikasoen iray ontan ya manunan nakaukolan na totoo. (1 Ped. 5:6, 7) Agto isuboy naakan ed sikatayo, balet nayarin bendisyonan to ray sagpot tayon mantanem odino mananap na kuartan isaliw na saray nakaukolan tayo ed kada agew. Tan nayarin pakiwasen toy arum ya mangiter na walad sikara no mankakkaukolan tayo. Anggaman ag-imbaga nen Jesus ya itataryaan nen Jehova na panayaman iray ontitikyab ya manok, inikdan to ra na nisipor ya abilidad, dunong, tan saray nausar dad panggawa na ubong da. Natulongan itayo met nen Jehova ya makaromog na magenap ya panayaman na pamilya tayo. Nen imbaga nen Jesus so teksto ed sayan agew, nayarin say sankanonot to et say magano lan pangiter toy bilay to parad totoo. (Ikomparay Lucas 12:6, 7.) Inatey si Jesus, aliwan parad saray manok, noagta parad sikatayo pian makapambilay itayo ya anggapoy anggaan.​—Mat. 20:28. w16.07 1:11-13

Panon ya nagmaliw a makasalanan so totoo tan akin ya ompapatey tayon amin? Ipapaliwawa na Biblia: “Diad impakasumlang na sakey a too [si Adan] et nan-ari so patey” ed amin ya ilalak nen Adan. (Roma 5:12, 14, 17) Balet sarag tayon pilien ya ag-itayo la uleyan o kontrolen na kasalanan. No ipapanengneng tayoy pananisia ed dondon bagat nen Kristo, manpapauley tayod agnaparaan a kaabigan nen Jehova. (Roma 5:20, 21) Anggano makasalanan tayo nin siansia, sarag tayon ag-abuloyan ya kontrolen na kasalanan so bilay tayo. No bilang makapankasalanan tayo, kerewen tayod si Jehova ya perdonaen to tayo. Kanian say agnaparaan a kaabigan so manuuley lad sikatayo. Antoy resulta? Impaliwawa nen Pablo: “[Say agnaparaan a kaabigan na Dios] so mangipapasal ed sikatayon ipulisay so mauges a kagagawa tan minumundo iran pilalek tan manbilay itayon walaan na limpion kanonotan tan inkatunong tan debosyon ed Dios diad sayan kaplesan a sistema na mundo.”​—Tito 2:11, 12. w16.07 3:5, 6

Aliway nansumpalan na sanasawan si Adan tan Eva ta inabuso day regalo ed sikaran makapandesisyon a bukor nen agda inunor si Jehova. Say “sankaunaan ya uleg,” si Satanas a Diablo et niloko toy Eva. Pinanisia ton no “mangay bunga na kiew na pikakabat ed maong tan mauges,” lalon ontalino tan makapandesisyon no antoy maong tan mauges. Agnirespeto nen Eva so inkaulo na asawa to lapud agla nampatanir ed ginawa to. Tan imbes ya unoren nen Adan so Dios, inawat ton tampol so prutas ya inter nen Eva. (Apo. 12:9; Gen. 2:9, 16, 17; 3:1-6) Nen kinatongtong ira na Dios, tinetel nen Adan so asawa to. Tinetel balet nen Eva so uleg ya nanloko ed sikato. (Gen. 3:12, 13) Ataptapew iratan ya baraan da! Lapud ag-inunor na inmunan sanasawa si Jehova, impasen to ran rebelde. Pasakbay itan ed sikatayo natan! Pian magmaliw ya maliket so panangasawa, nepeg ya akoen na asawan laki tan asawan bii so responsabilidad da tan unoren day Jehova. w16.08 1:1, 4, 5

No aliwan realistiko so iilaloan na sakey ya asawa, panlapuan itan na problema. No ag-agawa so papangarapen ton maliket ya pamilya, nayarin nadismaya, pakalikna to et aloko, odino maer-ermen ni ingen. Posiblin wala ray agpantatalosan lapud mandumaan so emosyon na laki tan bii, pati say paraan na impamabaleg ed sikara. Nayarin sengegay kolkolan so kuarta, katulangan, tan panagpabaleg na ananak. Balet, nakomendaan so dakel ya Kristianon sanasawa ta nareresolbe da iratan ya problema. Nagagawaan da itan lapud manpapaigiya rad Dios. No walay seryoson problema na Kristianon sanasawa, kaukolan day manpatulong ed saray elder. Baleg so nitulong na sarayan eksperiensyadon agagi pian niyaplika na sanasawa so simbawa ed Salita na Dios. Pian naresolbe iray problema ed panangasawa, kaukolan tayo met ya kerewen so espiritu tan tulong nen Jehova. Diad ontan et niyaplika tayo ray prinsipyo na Biblia tan nipanengneng tayoy bunga na espiritu to.​—Gal. 5:22, 23. w16.08 2:11-13

Limitado so panaon nen Jesus ed ministeryo. Anggaman ontan, impanaon ton bayuboay interes na totoon dinmengel ed maong a balita. Singa bilang, pian nabangatan to ray dakel a totoo, linmugan ed sakey a baloto. Diad saman, nanggaway milagro si Jesus kanian dakdakel ya sira so narel nen Pedro tan imbaga toy teksto tayo ed sayan agew. Antoy resulta na imbaga tan ginawa nen Jesus? Si Pedro tan saray kakaiba to et “tinaynan da so amin a bengatla tan tinmumbok irad [si Jesus].” (Luc. 5:1-11) Si Nicodemo, ya membro na Sanhedrin, et nagmaliw ya interesado ed bangat nen Jesus. Labay to ni makaaral balet antakot ed ibaga na totoo no nanengneng dan mantotongtong ira nen Jesus. Maong ya mibagay si Jesus tan inter toy panaon to; kanian diad labi akitongtong ed si Nicodemo pian agnanengneng na totoo. (Juan 3:1, 2) Impanaon na Anak na Dios so pamabiskeg ed pananisia na saray interesado. Agta nepeg met ya makuli tayon pawilen tan iyaralan na Biblia iray interesado? w16.08 4:10, 11

No mapaabeba tayo, akaparaan tayon usisaey sarili tayo tan ikompara itan ed inkalinis tan inkasanto nen Jehova lapud akadepende tayo ed sikato parad sankaabigan ya panangigiya. Ontan met, kaibad inkamapaabeba tayo so panrespeto ed liknaan tan opinyon na arum. Kanian, ‘mapaabeba tayon manakar a kaibay Dios’ diad pambilay base ed saray atagey ya estandarte to tan panrespeto ed panmoria na arum. No nanengneng na totoo so panangawes tayo, ag-ira komon manduaruwa ya mandadayew tayod si Jehova. Nepeg ya kombinsido iray agagi tan arum ya totoo a talagan irerepresenta tayoy matunong ya Dios. Atagey iray estandarte to, tan maliket tayon unoren iratan. Nakomendaan iray agagin lalaki tan bibii ya lapud itsura tan maong ya ugali da et wala ray nagmaliw ya interesado ed manangisalbay bilay ya mensahe na Biblia tan niglogloria tan napapaliket day Jehova. w16.09 3:18-20

Pursigidon milaban si Jacob, tan impanengneng ton agto atrasan so subok! (Gen. 32:24-26) Kanian abendisyonay impan-anos to. Sikatoy inikdan na ngaran ya matukoy ed sikato, Israel, (kabaliksan toy “Milalaban [Mansusungdo] ed Dios” odino “Milalaban so Dios”). Inawat nen Jacob so tumang ya labay tayo met ya naawat​—say panangabobon tan bendisyon nen Jehova. Say inad-aron asawa nen Jacob ya si Raquel et labalabay ton nanengneng so kagawa na promisa nen Jehova ed si asawa to ya nabendisyonan ira na ilalak. Balet anggapoy anak to. Diad saman ya panaon, makapabaing so sakey ya bii no anggapoy anak to. Antoy ginawa nen Raquel pian ag-onkapuy so liknaan tan laman to diad makapadismayan situasyon ya agto kontrolado? Agsinmuko. Imbes, intultuloy toy akilaban panamegley na impapuson pikakasi. Dinengel nen Jehova so kerew nen Raquel, tan ag-abayag et abendisyonan na ananak.​—Gen. 30:8, 20-24. w16.09 2:6, 7

Importante ya ipurek yod ananak yo so kaimportantian na saray prinsipyo ed Biblia. (Sal. 1:1-3) Dakel so paraan pian nagawaan itan. Singa bilang, sarag mon ibagad anak mo ya imadyinen to ya onlan manayam ed arawin isla tan kaukolan toy manpili na saray kaiba ton manayam diman. Insan mo tepetan, “Anto ray ugalin labay mod amin ya nakaibam pian mareen tan maong so ulopan yo?” Sarag mo met ya ipaliwawad sikato so balibalin bilin na Galacia 5:19-23. Duaran importantin leksion so naaralan ed satan ya paraan. Unona, saray estandarte na Dios et mangiter na kareenan tan pankakasakey. Komadua, ibabangat itayo la natan nen Jehova pian akaparaan tayon manbilay ed balon mundo. (Isa. 54:13; Juan 17:3) Sarag mon idanet iyan punto diad pamili na eksperiensya ed saray publikasyon tayo. Nayarim ya usaren iray artikulon “Uumanen na Biblia so Bilay” diad Panag-bantayan. w16.09 5:13, 14

Anggano busy tayo, kaukolan tayon ipanaon so personal a panaral tan panagdayew na pamilya. (Efe. 5:15) Balet say gagala tayo et aliwa labat ya pian nabasay pigaran pahina odino pian makapanparaan na komento ed aral. Nepeg tayon seguroen ya onsasabid puso tayo so Salita na Dios tan ombibiskeg so pananisia tayo. Kaukolan ya balanse tayo​—isipen tayoy pankaukolan na arum tan say mismon espiritualidad tayo. (Fil. 1:9, 10) Tandaan ya no manpaparaan tayo parad ministeryo, aral, odino paliwawa, agto labay ya ibagan iyaaplika tayo la ray nababasa tayo. Bilang ilustrasyon: Anggano tatawayan na kusinero so putahin inluto to antis ton iparungo, agnapesel ed satan. No labay toy mansiansian mabiskeg, kaukolan toy mangiparaan tan mangan na masustansian naakan to. Ontan met, kaukolan tayon pakanen so puso tayo na masustansian espiritual a naakan pian ag-onkapuy so espiritualidad tayo. w16.10 2:10, 11

Nabasa tayoy nipaakar ed pananisia diad Hebreo 11:1. Say pananisia et akasentro ed duaran bengatla ya agtayo nanengneng: (1) “Iilaloan”​—kaibad saya iray impromisan nagawad arapen ya agni asumpal, singa say pakaderal na amin ya mauges tan say isabi na balon mundo. (2) “Saray bengatlan tua anggano agnanengneng.” Diad konteksto, say Griegon salitan impatalos ya “malinew ya ebidensya” et ontutukoy ed “makakombinsin ebidensya” ed saray bengatlan tua anggano agnanengneng, ya singa say kiwawala nen Jehova a Dios, si Jesu-Kristo, saray anghel, tan saray nagagawa ed Panarian diad tawen. Panon tayon paneknekan ya mabilabilay so ilalo tayo tan manisia tayod saray agnanengneng ya bengatlan nabasad Salita na Dios? Panamegley na saray salita tan gawa tayo. No anggapo iratan, kulang so pananisia tayo. w16.10 4:6

Aapresyaen a maong nen Jehova tan Jesus iray nagagawaan tayo pian suportaan so Panarian, anggano limitado so niiter tayo lapud saray sirkumstansya tayo. (Luc. 21:1-4; 2 Cor. 8:12) Singa bilang, mansasagpot ya maong iray pinabpabli tayon maedad lan agagi pian makaatendi tan makapankomento ed saray aral tan makapanpulong ya regular. Agta dapat labat ya komendaan tan pasesegen tayo ra? On, mananap na pankanawnawan pasesegen so arum. No walay naimanom ya balibalin agawaan na arum, agta maong no komendaan mo ra? Imanoen so agawad si Pablo tan Bernabe nen wala rad Antioquia na Pisidia. Oniay imbaga na saray manangasikaso na sinagoga: “Agagi, no walaan kayoy antokaman a salitan makapaseseg ed saray totoo, ibaga yo.” Kanian angiter si Pablo na makapabiskeg ya paliwawa. (Gawa 13:13-16, 42-44) No walay pankanawnawa tayon mamaseseg, agta maabig no ibalikas tayo itan? Tandaan ya no niyugali tayoy mamaseseg, pasesegen itayo met na arum.​—Luc. 6:38. w16.11 1:3,15, 16

Baleg a pribilehyo so magmaliw a kabiangan na organisasyon nen Jehova! Amta tayo ray kakaukolanen tan estandarte to, kanian responsabilidad tayon gawaen no antoy duga tan suportaay soberanya to. Lapud onuuges lan onuuges so mundo, kaukolan tayon ‘busoley kaugsan’ ya singa pangipapasen nen Jehova ed satan. (Sal. 97:10) Agtayo mipakna ed saray totoon anggapoy takot dad Dios ya mangibabagan: “Say maong et mauges tan say mauges et maong.” (Isa. 5:20) Lapud labay tayon napaliket so Dios, pansasagpotan tayoy mansiansian malinis ed pisikal, moral, tan espiritual. (1 Cor. 6:9-11) Inaro tayoy Jehova tan manmamatalek tayod sikato; nandesisyon tayon manmatoor ed sikato diad pangunor ed saray estandarte to ya malinew a nabasad mabmablin Libro to. Tan gagawaen tayoy anggaay nayarian tayon unoren iratan no wala tayod abung, kongregasyon, trabaho, eskuelaan, tan inerman ya kawalaan tayo. w16.11 3:13

Saray Estudyante na Biblia et matua. Balet legan na 1914 anggad 1919, aliwan duga so panmoria dad panagpasakop ed gobierno. Kanian bilang grupo, no arum et aliwa ran neutral ed guerra. Singa bilang, nen indeklara na presidente na United States ya say Mayo 30, 1918 et agew pian ipikasi so kareenan, pinaseseg na The Watch Tower iray Estudyante na Biblia ya mibiang irad satan. Wala ray agagin angiter na pinansyal a suporta parad guerra, tan wala ni ingen iray akilad labanan ya walay awit dan paltog. Balet, aliwan duga no mankonklusyon tayon Saray Estudyante na Biblia et naaripen na Makapanyarin Babilonia lapud kaukolan day nipetek tan nadisiplina. Diad tua, atalosan da ya kaukolan day onekal ed palson relihyon, tan legan na World War I, ngalngali la ra sigpot ya akalukpos ed empiryo na palson relihyon.—Luc. 12:47, 48. w16.11 5:9

Ompan mankelaw so arum no akin a kaukolan ya bilinen nen Pablo iray alanaan ya Kristiano nipaakar ed kapeligroan na pambilay “unong ed laman.” Tan kasin posible ya nagawa met itan ed saray Kristiano natan ya inawat na Dios bilang kakaaro to tan impasen ton matunong? Makapaermen ta anggan siopan Kristiano et nayarin natukson manakar unong ed makasalanan ya laman. Singa bilang, insulat nen Pablo ya wala ray pigaran agagi ed Roma ya nagmaliw ya “ariripen na saray mismon eges da,” a nayarin ontutukoy ed pilalek ed sekso, panangan, iinumen, odino ed arum ni. Wala ni ingen iray ‘aayaten da ray inosente.’ (Roma 16:17, 18; Fil. 3:18, 19; Jud. 4, 8, 12) Tan wala met so sakey ya agi ed Corinto ya ‘inyamong toy asawa nen ama to.’ (1 Cor. 5:1) Kanian natatalosan tayo no akin ya ingganggan na Dios si Pablo ya pasakbayan iray Kristiano nipaakar ed “pangiteen na nonot ed laman.” (Roma 8:5, 6) Sayan pasakbay et importante ni anggad natan. w16.12 2:5, 8, 9

Say makatulong ed sikan nasarag iray kapagaan mo et no ibagam itan ed panmamatalkan mo. Nayarin natulongan ka na asawam, maapit ya kaarom, odino elder ed kongregasyon pian nainawaan ka. Baleg so nitulong na prangka tan matuan tongtongan pian natalosan tan nasarag mo ray problemam. Ibabaga na Biblia: “Agnasumpal iray plano no anggapoy pantotongtong, balet walay nagawaan no dakel so mananimbawa.” (Pro. 15:22) Tutulongan met nen Jehova iray Kristiano ya nasarag iray kapagaan da diad saray sinimban aral ed kongregasyon. Nakaibam ditan iray agagi ya mangiyaansakit ed sika tan labay dan pasesegen so balang sakey. (Heb. 10:24, 25) Makatulong so ontan ya ‘pampapasesegan’ pian ombiskeg so espiritualidad mo tan mas mainomay mon arapen iray kapagaan mo.​—Roma 1:12. w16.12 3:17, 18

No walay sakit o probleman agtayo nasolusyonan, ipaawit tayod si Jehova iratan, tan manmatalek ya iyaansakit to itayo. (1 Ped. 5:6, 7) Ontan met, nepeg tayon gawaen no antoy nasarag tayo pian minabang ed saray Kristianon pantitipon tan arum ni ran espiritual ya probisyon. (Heb. 10:24, 25) Antoy sarag ya gawaen na saray matoor ya atateng no tinmundan nanlingkor ed Dios so anak da? Agsarag na masiken lan si Samuel ya piliten iray wala lad edad ya ananak to ya mansiansian matoor ed saray matunong ya estandartin imbangat tod sikara. (1 Sam. 8:1-3) Kaukolan ton ipalima itan ed si Jehova. Anggaman ontan, sarag nen Samuel so mansiansian matoor tan paliketey Ama to ed tawen, si Jehova. (Pro. 27:11) Diad panaon tayo, ontan so situasyon na arum ya Kristianon atateng. Manmamatalek ira ya lanang ya tatalaranan nen Jehova so ipawil na saray nankasalanan ya magbabawi. (Luc. 15:20) Legan na satan, mansasagpot ya maong iratan ya atateng a mansiansian matoor ed si Jehova, iilaloan dan lapud maong ya alimbawa ra et ompawil so anak da. w17.01 1:15, 16

Say mapaabeban too et balanse panmoria tod saray abilidad tan nagagawaan to, bibidbiren to ray lingo to, tan aawaten to ray suhestion tan ideya na arum. Naliliketan a maong si Jehova ed saray mapaabeba. Base ed Biblia, no mapaabeba tayo et aliwan alablabas so pakanengneng tayod sarili tayo tan amta tayo ray limitasyon tayo. Diad orihinal ya teksto, nidanet ya no amta tayo ray limitasyon tayo, napakiwas tayon respetoen tan maaron tratoen so arum. Anto ray pakapatnagan ya magmamaliw tayo lan mapalakbat? Nia ray pigaran pakanengnengan. Ompan atagtagey lay pakanengneng tayod sarili tayo odino saray pribilehyo tayo. (Roma 12:16) Ompan labalabay tayon sikatayoy kawalaan na atension. (1 Tim. 2:9, 10) Odino nayarin ipipilit tayo ray opinyon tayo lapud walay posisyon, koneksion, odino sarilin ideya tayo ya agtayo nalilikas ya mapalakbat tayo la manaya.​—1 Cor. 4:6. w17.01 3:6-8

Diad apalabas iran taon, linmaknab tan nagmaliw ya komplikado so kimey na saray totoo nen Jehova. Lapud saray balon proyekto, wala met iray balon proseso na pankimey ed saratan​—mabetbet ya kaibad satan so pangusar na teknolohiyan maples ya manguuman. Nayarin nairapan iray maedad la ya mibansag ed sarayan pananguman. (Luc. 5:39) Anggano ag-ira bilang nairapan, siansia nin mas mabiskeg tan mapaot iray mas ugaw ni. Kanian panangipanengneng na panangaro tan mas praktikal parad saray maedad la no iparaan da ray mas ugaw ni parad kaaruman iran responsabilidad. (Sal. 71:18) Nayarin aliwan mainomay parad saray walaan na pribilehyo tan autoridad so mangiter na responsabilidad ed saray mas ugaw ni. Ompan natatakot so arum ya naandi ed sikara so papablien dan pribilehyo, odino iisipen dan agnasarag na saray mas ugaw ni so kimey da. Nayarin irason na arum ya anggapoy panaon dan mangipasal. Saray mas ugaw ni balet et nepeg iran manalwar ta ompan agla ra makaanos no agni ra naikdan na responsabilidad. w17.01 5:3, 4

Si Jesus et nagmaliw ya perpekton too, ya singa si Adan. (Juan 1:14) Balet duma si Jesus ed si Adan ta nansiansian matoor ed saray estandarte nen Jehova parad perpekton too. Anggano diad sankagrabian iran subok, agnankasalanan si Jesus tan agto sinumlang iray ganggan na Dios. Bilang perpekton too, sarag nen Jesus ya iliktar so totoo ed kasalanan tan patey diad pangibagat tod bilay to. Sikato so eksakton angipanengneng ed amin ya iilaloan ed si Adan​—perpekton too, talagan matoor tan matulok ed Dios. (1 Tim. 2:6) Si Jesus so nagmaliw ya dondon bagat ya angilukas na dalan ed bilay ya anggapoy anggaan parad “amayamay”—lalaki, bibii, tan ugugaw. (Mat. 20:28) On, say dondon so angilukas ed dalan pian nasumpal so gagala na Dios. (2 Cor. 1:19, 20) Say dondon so angiter na ilalon bilay ya anggapoy anggaan ed amin ya matoor a totoo. w17.02 1:15, 16

Isipen pa ya wala kad pegley na andukey tan ambilunget ya tunnel. Nayarin isipen mo no kasin nanengneng mo lamet so liwawa. Ontan met, no maminsan et nayarin isipen mon agmo nasarag iray problemam. Anggan si Jesus et alikna to met itan. Sikatoy puntirya na “masumpan panagsalita na saray managkasalanan,” panagbalaw, tan ansakisakit ni ingen so impatey to ed “panamairapan a kiew”​—satan lay sankabilungetan ya panaon ed bilay to diad dalin! (Heb. 12:3) Balet sinungdoan nen Jesus itan ya amin. Sikatoy nampokus ed saray bendisyon ya naawat to no mansungdo, lalo la no antoy nagawaan to pian napasanto so ngaran na Dios tan niyalangon so soberanya nen Jehova. Saray mair-irap ya subok ed si Jesus et temporaryo labat, balet saray bendisyon ya awaten tod tawen et anggapoy anggaan. Natan, saray subok ya aarapen mo et nayarin mair-irap tan talagan ambelbelat. Balet tandaan ya saray kairapan ya nadalan mo paarap ed bilay ya anggapoy anggaan et temporaryo labat. w16.04 2:10

Diad sayan mundo ya nagagawaan na totoo so labay da, dakel so agmakakaliknan walay kasalanan da, kanian agda amta ya kaukolan day dondon. Agda amta no anto tay kasalanan, no panon tayon naaapektoan na satan, tan no antoy nepeg tayon gawaen pian nibulos ed kasalanan. Saray totoon manaanap na katuaan et naliligliwa no naaamtaan da ya lapud baleg a panangaro tan agnaparaan a kaabigan nen Jehova, imbaki tod dalin so Anak to pian dondonen itayod kasalanan tan ed ipapatey ya epekto na satan. (1 Juan 4:9, 10) Say dondon bagat nen Kristo so sankabalegan ya prueba na panangaro na Dios ed sikatayo tan pakapatnagan na daakan ya agnaparaan a kaabigan To. Agaylan makaligliwan naamtaan ya no walay pananisia tayod nipaagus ya dala nen Jesus, naperdona ray kasalanan tayo tan magmaliw ya malinis so konsiensia tayo! (Heb. 9:14) Talagan maong a balita ya labay tayon ipaamtad arum! w16.07 4:6, 7

No ipanengneng tayoy pananisia ed dondon, sigpot itayon naperdona. Ipapasegurod sikatayo na Salitay Dios ya “nabural” iray kasalanan tayo. (Gawa 3:19-21; paimanod leksab) Diad panamegley na dondon et tinagibi nen Jehova iray nilanaan na espiritun ariripen pian magmaliw ya ananak to. (Roma 8:15-17) Diad sikatayo balet ya kabiangan na ‘arum a karnero,’ singa nanggawa si Jehova na kasulatan pian tagibien to tayo tan akasulat ditan so ngaran tayo. No perpekto tayo la tan nalampasan tayoy unor ya subok, pirmaan la nen Jehova so kasulatan a singa panangibaga, tan tagibien to tayo bilang inad-aro ton ananak diad dalin. (Roma 8:20, 21; Apo. 20:7-9) Say panangaro nen Jehova ed saray pinabpabli ton ananak et anggapoy anggaan to. Saray bendisyon na dondon et mansiansia ed andi-anggaan. Agnaandi so kablian na sayan regalo. Anggapoy too o pakapanyari a makasamsam ed satan ed sikatayo. w17.02 2:15, 16

Sanen inyasingger itayo nen Jehova ed sikato, amta to iray agperpekton tendensia ya makapagonigon ed sikatayo. Tan amta to ya sagpaminsan et mankasalanan itayo. Balet, siansia nin labay nen Jehova so mikaaro ed sikatayo. Lapud panangaro na Dios ed sikatayo, inikdan to itayo na mabmablin regalo​—say dondon bagat na inad-aro ton Anak. (Juan 3:16) No magbabawi itayo base ed sayan mabmablin probisyon tan kerewen tayoy panamerdona nen Jehova no akagawa tayoy kasalanan, makapanmatalek itayo ya mansiansia so pikakaaro tayo ed sikato, anggano agtayo perpekto.​—1 Tim. 1:15. w16.05 4:6, 7