Disyembre

Say sakey ed saray balibalin aspekto na personalidad nen Jesus et say abilidad ton talosan so nalilikna na saray aliwan perpekton totoo no walay subok ya aarapen da. Nen wadiad dalin si Jesus, sikatoy ‘akiliket ed saramay manliliket’ tan ‘akiakis ed saramay onaakis.’ (Roma 12:15) Singa bilang, nen malikeliket a pinmawil so 70 ya disipulo to kayari na impanpulong da, sikatoy “aliketan a maong tan napnoy masanton espiritu.” (Luc. 10:17-21) Balet, “naney-ey si Jesus ed puso to tan agonigon” nen anengneng toy graben ermen na saray mangaaro ed si Lazaro lapud impatey to. (Juan 11:33) Akin ya sayan perpekton too et agaylay panangasi tan panangabagey to ed saray aliwan perpekton totoo? Manuna ed amin, inaro nen Jesus iray totoo. “Say nagkalalo lan panliliketan [to] et saray anak na totoo.” (Pro. 8:31) Satan ya panangaro so amakiwas ed sikaton kabisadoen so panagnonot na totoo. Imbaga nen apostol Juan: “Amta to la no antoy walad puso na too.”​—Juan 2:25. w19.03 20 ¶1-2

Sinubok nen Satanas si Job, ya pinaandi to so amin ya walad sikato​—say kayamanan to, saray lingkor to, tan say maong ya reputasyon to ed komunidad. Insublay toy pamilya nen Job, ya pinatey toy samploran inar-aro ton ananak. Insan to met insublay so laman nen Job, ya indapo toy manotot iran pelsa manlapud dapan ya anggad toktok na ulo to. Agonigon tan nanermen ya maong so asawa nen Job; imbaga tod Job ya onsuko la, ya mudmoraen toy Dios pian ompatey la. Anggan si Job et labay to lay ompatey, balet pinansiansia toy integridad to. Insan sinali nen Satanas so arum ya paraan. Inusar toy taloran lalaki ya kakaaro nen Job. Binisita day Job ed pigaran agew, balet imbes ya ligliwaen da, sikatoy sinermonan da tan ansasakit iray imbaga dad sikato. Pinapaway da ya say Dios so nanlapuan na paniirap to tan anggapoy pibabali na Dios ed integridad to. Imbaga da ni ingen ya mauges kuno si Job kanian manepeg labat iray graben nagagawa ed sikato!​—Job 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Wala ray klase na takot ya parad pankaabigan tayo. Singa bilang, nepeg ya walay takot tayo ed si Jehova, salanti, say takot ya sikatoy napaermen tayo. No si Adan tan Eva et walaan na ontan ya klase na takot, inunor da komon si Jehova. Balet nanrebelde ira. Tan nen ginawa da itan, nibagan alukasan so mata ra ta naamtaan da ya nagmaliw iran makasalanan. Impatawir da ed saray ananak da so kasalanan tan patey. Nen anengneng odino atalosan day kipapasen da, akalikna ira na kababaingan lapud labos-lakseb ira tan nanggawa ra na saray insakbong dad laman da. (Gen. 3:7, 21) Balet, say agnepeg ya niwalad sikatayo et say sobran takot ed ipapatey. Nanggaway paraan si Jehova pian nawalaan itayoy bilay ya andi-anggaan. No makagawa tayoy kasalanan balet tuan magbabawi tayo, perdonaen nen Jehova iray lingo tayo. Perdonaen to tayo lapud pananisia tayo ed dondon bagat na Anak to. Tan say sakey ya manunan paraan ya nipanengneng tayoy pananisia et diad pangidedika tayoy bilay tayo ed Dios tan pampabautismo tayo.​—1 Ped. 3:21. w19.03 5-6 ¶12-13

Dakel so rason na saray Israelita ya ipanengneng so apresasyon. Nibulos ira ed impakaaripen kayarin indapo nen Jehova so Samploran Salot ed Ehipto. Insan inliktar ira na Dios nen nilener toy interon armada na Ehipto diad Ambalangan Dayat. Ontan lay pisasalamat na saray Israelita kanian angansion ira na kansion na pananalo pian irayew si Jehova. Balet kasin nansiansia ran maapresya? Nen nipaarap iray Israelita ed saray balon subok, alingwanan dan tampol so amin ya maabig ya bengatlan ginawa nen Jehova parad sikara. Insan da impanengneng ya anggapoy apresasyon da. (Sal. 106:7) Panon? “Nanmeremere so amin a nantitipon ya Israelita sumpad si Moises tan si Aaron diad kalawakan,” balet diad tua et sumpad si Jehova so impanmeremere da. (Exo. 16:2, 8) Adismaya si Jehova lapud anggapoy apresasyon na totoo to. Impasakbay to ya ompatey ed kalawakan iyan interon henerasyon na saray Israelita, nilikud ed si Josue tan Caleb.​—Num. 14:22-24. w19.02 17 ¶12-13

Aglabay nen Jesus ya sikato so nirayew kanian aliwan komplikado so ingganggan to ya pannodnonot ed impatey to. Imbes, imbaga tod saray disipulo to ya maminsan ed sakey taon et sikatoy nepeg dan nonoten panamegley na simplin pangdem. (Juan 13:15; 1 Cor. 11:23-25) Ipapanengneng na sayan simpli balet makabaliksan ya pangdem ya aliwan mapaatagey si Jesus. Maliket tayo ya say inkamapaabeba so sakey ed saray maabig ya kualidad na Ari tayod tawen. (Fil. 2:5-8) Panon tayon naalig so inkamapaabeba nen Jesus? Diad pangiyuna tayo ed pankaabigan na arum nen say pankaabigan tayo. (Fil. 2:3, 4) Isipen pa lamet imay sampot a labi na bilay nen Jesus ed dalin. Amta nen Jesus ya magano to lan naeksperiensya so ansakisakit ya ipapatey; balet say sankanonot to et saray matoor ya apostol to ya seguradon manermen lapud ipatey to. Kanian diad saman a labi et imbangat, pinaseseg, tan pinaseguroan to ra. (Juan 14:25-31) Napatnagan ed satan ya mapaabeba si Jesus lapud mas ninonot toy pankaabigan na arum nen say sarili to. Talagan balibalin alimbawa ya aligen tayo! w19.01 21 ¶5-6

Kasin nanenerbiyos ka kada no iisipen mon iyatagey moy limam pian mankomento? No ontan so naliliknam, agmo bukbukor. Maslak ed sikatayo et makakaliknay nerbiyos no mankokomento. Diad tua, say takot ya naliliknam et pakapatnagan ya mapaabeba ka tan ipapasen mon mas atagey so arum nen say sika. Labalabay nen Jehova itan ya kualidad. (Sal. 138:6; Fil. 2:3) Balet labay met nen Jehova ya sikatoy idayew mo tan pasesegen mo ray agagi ed saray aral. (1 Tes. 5:11) Inar-aro to ka tan ikdan to kay pakpel ya kaukolan mo. Imanoen so pigaran panonot ed Biblia. Ibabaga na Biblia ya amin tayo et nalilingo ed panagsalita tayo. (Sant. 3:2) Amta nen Jehova ya aliwa tayon perpekto, tan amta met itan na saray agagi tayo. (Sal. 103:12-14) Sikaray espiritual a pamilya tayo, tan inar-aro da tayo. (Mar. 10:29, 30; Juan 13:35) Natatalosan da ya no maminsan et agtayo eksakton nibaga so labay tayon ikomento. w19.01 8 ¶3; 10-11 ¶10-11

Diad sayan mundo, aliwan naynay a mainomay so panggawad satan, balet aliwa met ya imposible. Labay nen Jehova ya na-enjoy moy tuan matalona tan makapenek ya bilay. Diad tulong na Dios, sarag moy ontalona, aliwa labat ya diad panaon a kabataan ka noagta diad interon bilay mo. Mikonektaan ed satan, konsideraen tayo no antoy naaralan tayo ed impansakop na saray Israelita ed Insipan a Dalin. Nen asingger lad Insipan a Dalin iray Israelita, ag-imbaga na Dios ya kaukolan day magmaliw a marundunong ed pilalaban odino ipasal day miguerra. (Deu. 28:1, 2) Imbes, imbaga tod sikara ya kaukolan dan unoren iray ganggan to tan manmatalek irad sikato. (Jos. 1:7-9) Diad pakanengneng na too, aliwan makatunongan itan! Balet satan so sankaabigan a bilin, ta aminpigan impanalo nen Jehova iray totoo to diad impilaban dad saray Canaanita. (Jos. 24:11-13) Kaukolan so pananisia pian natulok tayoy Dios, balet satan ya pananisia et lanang ya manreresulta ed itatalona. Agmanguuman iyan katuaan tan tua itan anggad natan. w18.12 25 ¶3-4

Wala ray adismaya lapud anguman ya pakatalos tayod sakey ya teksto na Biblia. Wala met iray anisia ed saray apostata tan ed arum ya onkokontra ed saray papanisiaan tayo. Kanian say arum et kalkalnan ‘inmarawi’ ed si Jehova tan ed kongregasyon. (Heb. 3:12-14) Mas maabig komon no impansiansia day pananisia ra tan panagmatalek dad si Jesus, a singa ginawa nen apostol Pedro! Say arum et kalkalna dan tinaynan so katuaan, ya ompan agda ni ingen aliklikas itan. Say sakey ya kalkalnan ontataynan ed katuaan et singa baloto ya kalkalnan niyaarawi ed gilig na ilog. Deneskribe na Biblia itan ya kalkalnan pananguman bilang ‘iyaanor a paarawi.’ (Heb. 2:1) Aliwan singa samay sakey ya ginagala toy onarawi ed katuaan, say sakey ya niyaanor paarawi et agto gagagalaen ya gawaen itan. Balet pinaulyanan ton onkapuy so relasyon to ed si Jehova tan agmanbayag et nabalang to itan. w18.11 9 ¶5-6

Kasin labalabay moy makaawat na kaaruman iran panangipasal pian mas epektibom ya nasumpal so sagradon panaglingkor mo? No on, ompan kualipikado ka lan manaral ed School for Kingdom Evangelizers. Sayan eskuelaan et mangipapasal ed saray maespiritual a lalaki tan bibii ya manlilingkor lan full-time pian mas nausar ira ed organisasyon na Dios. Saramay man-apply ed sayan eskuelaan et nepeg a mabulos ya mangawat ed anggan anton asainmin ka-graduate da. Kasin maliket mon awaten itan ya pankanawnawa pian nilukas ed sika so arum ni ran pribilehyo na panaglingkor? (1 Cor. 9:23) Bilang totoo nen Jehova, napapakiwas itayon magmaliw ya maparawes​—ya pakapatnagan na kamaongan, kaabigan, tan panangaro—​tan ipanengneng so malasakit ed arum kada agew. No gawaen tayo itan, nalikna tayo so liket, kareenan, tan gayaga. (Gal. 5:22, 23) Antokaman so kipapasen mod bilay, magmaliw kan maliket no aaligen moy inkamaiter nen Jehova tan no sakey ka ed saray papablien ton kakimeyan!​—Pro. 3:9, 10. w18.08 27 ¶16-18

Ompan walay mantepet, ‘Kasin walay basiyan na sakey a Kristiano pian idiborsyo toy asawa to tan mangasawa odino miasawa lamet?’ Imbaga nen Jesus no antoy panmoria to ed diborsyo: “Siopaman a lakin mangidiborsyo ed asawa to insan mangasawa na sananey et mankasalanan na pikakalugoran ed samay inmuna, tan no say sakey a bii et miasawa ed sananey kayari ton indiborsyo so asawa to, sikatoy mankasalanan na pikakalugoran.” (Mar. 10:11, 12; Luc. 16:18) Malinew sirin ya papagalangan nen Jesus so panangasawa tan labay ton ontan met so gawaen na arum. Say laki odino bii ya mangidiborsyo ed matoor ya asawa to ed anggan anto labat ya rason tan mangasawa lamet odino miasawa ed sananey et mankasalanan na pikakalugoran. Tua itan, ta agto labay ya ibagan anampot lay panangasawa no indiborsyo na sakey so asawa to. Diad pakanengneng na Dios, sikaran dua et siansia nin “sakey a laman.” Ontan met, imbaga nen Jesus ya say lakin mangidiborsyo ed matoor ya asawa to et ipepeligro toy asawa to a makapikalugoran. Panon? Diad saman a panaon, nayarin isipen na sakey ya indiborsyon bii ya kaukolan toy miasawa lamet pian walay mansuportad sikato ed pinansyal. No gawaen to itan, sikatoy mankasalanan na pikakalugoran. w18.12 11 ¶8-9

Lapud impitongtong nen Habacuc ed si Jehova, kinmalma so liknaan to. Kanian sikatoy determinadon mantultuloy ya manmatalek tan manalagar ed ikiwas nen Jehova. Aliwan diad saman a mismo to labat alikna iman, lapud impanengneng to lamet itan ya determinasyon to sanen imbaga to ya ‘mareen ton alagaren so agew na gonigon.’ (Hab. 3:16) Anto ray naaralan tayo ed determinasyon nen Habacuc? Unona, nepeg ya agtayo ontutundan manpikasi ed si Jehova, antokaman so onsabin subok ed sikatayo. Komadua, kaukolan tayon dengelen so ibabaga nen Jehova ed sikatayo panamegley na Salita to tan say organisasyon to. Komatlo, nepeg ya maanos tayon manalagar ed si Jehova, tan sigpot a manmatalek ya ekalen to iray paniirap tayo diad panaon ya inggeter to. No naynay tayon ibalikas ed si Jehova so amin ya nalilikna tayo, ondengel tan manalagar ed sikato, ya singa ginawa nen Habacuc, nawalaan itayo met na kalmadon puso ya ontulong ed sikatayon makapansungdo. Lapud ilalo tayo et magmaliw tayon mas maanos, tan satan so ontulong ed sikatayon magmaliw ya maliket anggano dakel iray kairapan ya nayarin arapen tayo. Lapud ilalo et matalek tayon onkiwas so Ama tayo ya walad tawen.​—Roma 12:12. w18.11 15-16 ¶11-12

Antoy panmoria na Dios nipaakar ed pakagapol na arum? Oniay imbaga nen Jesus: “Siopaman a mangigapol ed sakey ed sarayan angkekelag a walaay pananisia ed siak, mas maong nin sabitan so beklew to na baton gilingan ya itetelek na asno tan sikatoy ibuntok ed dayat.” (Mar. 9:42) Ambelat iratan ya salita! Lapud perpekton impanengneng nen Jesus so personalidad na Ama to, segurado tayo ya ontan met so nalilikna nen Jehova ed siopaman ya lapud saray kagagawa to et nagagapol iray papatumbok nen Jesus. (Juan 14:9) Kasin aaligen tayoy panmoria nen Jehova tan Jesus? Kasin ginawa tayo la itan ya kabiangan na bilay tayo? Antoy ipapanengneng na saray gagawaen tayo? Singa bilang, walay agustoan tayon estilo na kawes tan panag-ayos ya nayarin makaopendi ed arum diad kongregasyon, odino lapud satan et makapannonot laingen so arum na imoral a bengatla. Kasin ikokonsidera tayoy liknaan na agagi, aliwan say personal iran panlabayan tayo labat? w18.11 25 ¶9-10

Akin ya importantin maong so integridad ed kada sakey ed sikatayo? Kaukolan moy integridad lapud kinuestion nen Satanas si Jehova, tan kinuestion to ka met. Saman ya rebelden anghel et pinauges to so maabig ya ngaran nen Jehova, ya singa to ibabagan say Dios et mauges, makasarili, tan aliwan matuan Manuley. Makapaermen ta sinuportaan nen Adan tan Eva si Satanas, tan nanrebelde met ira ed si Jehova. (Gen. 3:1-6) Diad Eden, dakdakel so pankanawnawa dan pabiskegen so panangaro ra ed si Jehova. Balet diad samay panaon ya kinuestion nen Satanas si Jehova, diman apatnagan ya say panangaro ra ed Dios et aliwan kompleto, walaay depekto, odino aliwan intero. Wala ni linmesan tepet: Kasin walay too ya mansiansian matoor ed si Jehova a Dios lapud panangaro ed sikato? Diad arum ya salita, kasin sarag na totoo ya ipanengneng so integridad? Linmesa itan ya tepet diad samay agawa ed si Job. (Job 1:8-11) Sikatoy aliwan perpekto ya singa sikatayo. Wala met iray lingo to. Balet inar-aro nen Jehova si Job lapud integridad to. w19.02 3-4 ¶6-7

Pian ipanengneng no panon kamabli so katuaan na Panarian na Dios parad saramay akaromog ed satan, tinukoy nen Jesus so nipaakar ed ombiabiahen negosyante ya manaanap na mararakep ya perlas. Sikatoy akaromog na sakey a talagan mabmabli kanian “inlako ton tampol” so amin ya walad sikato pian nasaliw to itan. (Mat. 13:45, 46) Mipadpara, say aromog tayon katuaan​—say katuaan na Panarian na Dios tan arum nin mablin katuaan ya naamtaan tayod Salita na Dios—​et talagan mabmabli ed sikatayo kanian mabulos tan tampol tayon nanggaway sakripisyo pian naala itan. Anggad papablien tayo so katuaan, ‘agtayon balot ilako’ itan. (Pro. 23:23) Makapaermen balet ta abalang na arum ed saray totoo na Dios so panamabli dad katuaan ya aromog da​—tan inlako da ni ingen itan. Komon ta agbalot itan nagawa ed sikatayo! Pian nipanengneng tayon talagan papablien tayo so katuaan tan agtayon balot ilako itan, nepeg tayon unoren so bilin na Biblia ya ‘mantultuloy a manakar ed katuaan.’ (3 Juan 2-4) Kaibad panakar ed katuaan so pangiyaplika ed satan​—iprayuridad itan ed bilay tayo tan onkiwas itayo ya mitukoyan ed satan. w18.11 9 ¶3

Ingganggan iray Israelita ya ag-atakien so Jerico noagta liberen da so interon syudad ya maminsan kada agew diad loob na anemiran agew tan maminpito dan liberen diad komapiton agew. Nayarin naisip na arum ya sundalo ya, ‘Sayang labat so panaon tan biskeg tayo!’ Balet say agnanengneng ya Lider na Israel et amta toy gagawaen to. Lapud sayan estratehiya to, aglabat binmiskeg so pananisia na saray Israelita noagta apaliisan da met so direktan pilaban ed saray mabibiskeg ya sundalo na Jerico. (Jos. 6:2-5) Antoy naaralan tayod sayan salaysay? No maminsan et agtayo natalosan ya maong iray rason ed saray balon instruksion ya manlalapud organisasyon. Singa bilang, nayarin diad gapo et inisip tayon aliwan praktikal so pangusar na saray gadyet diad personal a panagaral, diad ministeryo, tan diad saray aral. Natan et nayarin nanenengneng tayo la iray gunggona diad pangusar ed saratan no posible. No nanenengneng tayo iray maabig a resulta na saratan ya pananguman anggano nayarin manduaruwa tayo diad gapo, ombibiskeg so pananisia tan pankakasakey tayo. w18.10 23 ¶8-9

Saray iilaloan nipaakar ed Mesias, singa ed saray inisip na saray disipulo nen Jesus, so rason no akin ya labay na totoo ed Galilea ya magmaliw ya ari da si Jesus. Nayarin iisipen da ya si Jesus so sankamaongan lan manuley. Sikatoy marundunong ya mansalita; sarag ton paabigen iray mansasakit; sarag to ni ingen ya napakan iray narasan. Kayarin pinakan nen Jesus so manga 5,000 ya totoo, alikas to no antoy labay dan gawaen. “Lapud atebek nen Jesus a sikatoy ngalngali da la piliten a gawaen ya ari ra, sikatoy tinmaynan lamet ya amaarap ed palandey a bukbukor to.” (Juan 6:10-15) Diad sinmublay ya agew diad biek na Dayat na Galilea, nayarin kinmalma la iray totoo. Diad saman et impaliwawa nen Jesus ed sikara so tuan gagala na kimey to. Sikatoy imbaki pian tulongan irad espiritual, aliwan diad materyal. Imbaga tod sikara: “Mankimey kayo, aliwan parad naderal a kakanen, noagta parad agnaderal a kakanen a mangiter na bilay ya andi-anggaan.”​—Juan 6:25-27. w18.06 4 ¶4-5

Natatalosan nen Jesus so liknaan na saramay singa abalbal ya tanubong odino makuykuyep ya pabilo a ngalngali la naerep. Kanian sikatoy makonsidera, mapangasi, tan maanos. (Mar. 10:14) Siempre, agtayo naparaan so karunongan tan abilidad nen Jesus ya manbangat! Balet sarag tan nepeg tayon ikonsidera iray totoo ed teritorya tayo. Kaiba ed satan so paraan na pitotongtong tayo, no kapigan tan panon kabayag so pitongtong tayod sikara. Natan, minilyon ya totoo so “singa ra kinatatan tan pinaulyanan” na saray kurakot tan anggapoy panangasi iran negosyante, politiko, tan lider na relihyon. (Mat. 9:36) Kanian dakel so totoon negatibo tan anggapo lay ilalo da. Importante sirin ya magmaliw tayon mauyamo tan mapangasi ed saray ibabaga tayo tan ed tono na boses tayo! On, dakel so ondedengel ed mensahe tayo aliwan lapud dakel so amta tayod Biblia odino maong tayon mankatunongan, noagta lapud nanenengneng dan talagan interesado tayo ed sikara tan walay konsiderasyon tayo. w18.09 31-32 ¶13-14

Panon tayon nipanengneng ya mapaga tayod satan ya pankaukolan? Nagawaan tayo itan no mamangan itayo na espiritual iran naakan, no pablien tayo ray bangat na Biblia, tan no iyuna tayod bilay tayo so pandayew ed maliket a Dios. No ontan so gawaen tayo, mantultuloy tayon maliket. Napabiskeg tayoy pananisia tayo ed saray sipan na Dios ya asingsingger lan nagawa. (Tito 2:13) Importantin walay maapit ya relasyon tayod si Jehova pian mansiansia so liket tayo. Pinuyanan si apostol Pablo ya isulat: “Manliket kayon naynay ed Katawan [a Jehova]. Uliten ko, Manliket kayo!” (Fil. 4:4) Pian naliketan tayo ed satan ya mabmablin relasyon, kaukolan ya niwalad sikatayo so karunongan na Dios. (Pro. 3:13, 18) Balet, pian mansiansia so liket tayo, agtayo labat basta babasaen so Salita na Dios, noagta importantin iyaplika tayo so nababasa tayo. Indanet nen Jesus so kaimportantian na pangiyaplika ed saray nanaaralan tayo nen imbaga to: “Lapud amta yo la iraya, maliket kayo no gawaen yo.” (Juan 13:17; Sant. 1:25) Importante itan pian napenek so espiritual ya pankaukolan tayo tan pian mansiansia so liket tayo. w18.09 18 ¶4-6

Kabkabat nen Epafras iray agagi, tan iyaansakit to iran maong. Say situasyon to bilang ‘kaparan priso’ nen Pablo et ag-angamper ed sikaton nonoten so espiritual ya pankaukolan na arum. (Filem. 23) Tan walay ginawa to pian natulongan ira. Agta pakapatnagan itan na agmakasarilin ugali? Baleg so nagawaan na pangipikasi ed saray kapara tayon mandadayew ed si Jehova, lalo la no bitlaen tayoy kangaranan da. (2 Cor. 1:11; Sant. 5:16) Isip mo iramay sarag mon bitlaen so ngaran da diad pikakasim. Singa si Epafras, dakel ed saray agagi tayo so mangipipikasi ed saray kakongregasyon da tan saray pamilya ya walaan na ambelat iran responsabilidad, walaan na ambelat iran dedesisyonan, odino onaarap ed saray tukso. Sakey ni, maabig met no nonoten tayo iramay inateyan na inad-aro ed bilay, saramay akaliktar ed saray kalamidad tan guerra, tan saramay mansusungdo ed kairapan na bilay. Talagan dakel ed saray agagi tayo so kaukolan ya ipikasi tayo, tan seguradon makatulong itan ed sikara. w18.09 5-6 ¶12-13

Aglabat tutukoyen nen Pablo so pangiter na materyal iran bengatla noagta tutukoyen to met so pangiter na panamaseseg, panangigiya, tan tulong ed saray mankaukolan. (Gawa 20:31-35) Diad salita tan gawa, imbangat itayo nen apostol Pablo ya iter no antoy walad sikatayo—say panaon, biskeg, atension, tan panangaro tayo. Naobserbaan met na saray researcher ed social science ya maliket iray totoon maiter. Unong ed sakey ya artikulo, “imbaga na totoo ya nagmaliw iran mas maliket kayari ran nanggaway kamaongan ed arum.” Ibabaga met na saray researcher ya importante so itulong ed arum pian nawalaan na “tuan gagala tan kabaliksan” so bilay “lapud pepeneken na satan iray manunan pankaukolan na too.” Kanian maslak et irerekomenda na saray eksperto so pamboluntaryo ed panlingkor ed totoo ta makatulong itan ed bunigas na laman da tan magmaliw iran maliket. Agla iya pankelawan na saray totoo ya aawaten day Biblia bilang Salita na maaron nandesinyo ed too, si Jehova.​—2 Tim. 3:16, 17. w18.08 22 ¶17-18

Pinabiskeg tan pinaseguroan itayo nen Isaias panamegley na propesiya to nipaakar ed Katawan tayon Jesu-Kristo. Impasakbay to ya si Jesus et “agto mangukom a base labat ed nanengneng to, odino mangipetek a base labat ed narengelan to. Patas so pangukom to ed saray pobri.” (Isa. 11:3, 4) Akin ya makapaseseg itan? Lapud manbibilay tayod mundo ya aliwan patas tan manangidumaduma. Pipirawaten tayo lan amin so isabi na perpekton Ukom, samay agbalot mangukom ed sikatayo base labat ed nanenengneng to! Kada agew, nahuhusgaan tayo ray kapara tayon too. Balet lapud agtayo perpekto, agtayo naalig si Jesus ya perpekto so panhuhusga to. Walay tendensia tayon husgaan so arum base labat ed nanenengneng tayo. Kanian nen wadiad dalin si Jesus, ingganggan to tayon agmanguukom ed “nanenengneng,” noagta mangukom “diad matunong a paraan.” Malinew sirin ya labay nen Jesus ya sikatoy aligen tayo, ya agtayo huhusgaan so arum base labat ed nanenengneng tayod sikara. w18.08 8 ¶1-2

Tua, aliwan literal ya narengel tayoy Dios a mansasalita manlapud tawen. Balet, inter tod sikatayo so Salita to, say Biblia, ya ditan tayo nabasa iray instruksion to. Ontan met, say espiritu nen Jehova so mamapakiwas ed “matoor a manag-asikaso” pian tuloytuloy ya nataryaan na espiritual a naakan iray lingkor To. (Luc. 12:42) Talagan dakdakel so espiritual ya naakan ya nanaawat tayo, balanglan niimprinta odino diad online, pati saray video tan audio ya publikasyon! Komon ta saray imbaga na Dios, ya akasulat ed Biblia, et mamabiskeg ed talek tayo ya kontrolado nen Jehova so amin ya bengatla tan ekalen to so amin ya mauges ya epekto na ginawa nen Satanas tan say mundo to. Tan determinado tayo komon ya ondengel a maong ed boses nen Jehova. No gawaen tayo itan, nasungdoan tayo so antokaman ya probleman aarapen tayo natan tan saray onsabi nin subok. Papanonotan itayo na Biblia: “Nakaukolan yoy mansungdo, pian kayari yon gawaen so linawa na Dios, naawat yoy kasumpalan na sipan.”​—Heb. 10:36. w19.03 13 ¶17-18

Lapud si Moises so abaybayag ya lider na Israel, nayarin iisipen nen Josue no antoy reaksion na totoo na Dios no sikato lay magmaliw ya lider da. (Deu. 34:8, 10-12) Oniay imbaga na sakey a reperensya ed Biblia nipaakar ed Josue 1:1, 2: “Balanglan nensaman odino natan, say pansalat na lider so sankairapan tan sankamapeligroan a panaon ed sakey a bansa.” Walay rason nen Josue ya manpaga, balet kayari pigaran agew, sikatoy kinmiwas. (Jos. 1:9-11) Sikatoy sigpot ya nanmatalek ed Dios. Nabasa tayo ed Biblia ya si Jehova a mismo so angigiya ed si Josue tan saray Israelita panamegley na sakey ya anghel. Duga labat ya isipen a sayan anghel et say Salita, say panguloan ya Anak na Dios. (Exo. 23:20-23; Juan 1:1) Tinulongan nen Jehova iray Israelita ya makapan-adjust ed agawan pananguman nen si Josue lay balon lider da. w18.10 22-23 ¶1-4

Bidbiren nen Jehova iramay mabulos ya manlilingkor ed sikato, tan isulat toy ngaran da diad “libro na pakanodnonotan.” No labay tayon mansiansia so ngaran tayod “libro na pakanodnonotan” nen Jehova, walay nepeg tayon gawaen. Espisipikon imbaga nen Malaquias ya nepeg tayon ‘ontakot ed si Jehova tan mandalepdep ed ngaran to.’ No mandayew tayo ed siopaman odino ed antokaman a bengatla, ekalen nen Jehova so ngaran tayo ed piguratibon libro na bilay. (Exo. 32:33; Sal. 69:28) Kanian say dedikasyon tayod si Jehova et aliwa labat lan basta pangisipan ya gawaen so linawa to insan manpabautismo. Maples tan maminpinsan labat iratan ya nagawa. Balet say pansiansian walad dapag nen Jehova bilang totoo to et mankaukolan na tuloytuloy ya pangipanengneng na katutulok ed sikato, natan tan diad arapen​—legan ya manbibilay tayo.​—1 Ped. 4:1, 2. w18.07 23-24 ¶7-9

Ag-itan nagawa ya tampol. Kaukolan tayon “itultuloy” ya pankimeyan itan. Kaiba ed itatatken ed espiritual so pakawalaan na mas malaknab ya kakabatan tan mas aralem ya pakatalos. Kanian lanang itayon papasesegen ya manbasa na Biblia ya inagew-agew. (Sal. 1:1-3) Kasin gagawaen mo la itan? No ontay gawaen mo, mas natalosan mo ray ganggan tan prinsipyo nen Jehova tan onaralem so pakatalos mod Biblia. Say manunan ganggan parad saray Kristiano et say ganggan na aro. Imbaga nen Jesus ed saray disipulo to: “Diad saya et naamtaan na amin a sikayo iray disipulok​—no manaaroan kayo.” (Juan 13:35) Si Santiago ya agi nen Jesus ed ina et imbaga ton say aro et “ganggan na ari.” (Sant. 2:8) Imbaga nen Pablo: “Say aro et kasumpalan na ganggan.” (Roma 13:10) Agla iya pankelawan ta ibabaga ed sikatayo na Biblia ya “say Dios et aro.”​—1 Juan 4:8. w18.06 19 ¶14-15

Anggano si Jehova so pinasanok na saray Israelita, si Moises balet so sinmyodot. Lapud agto kinontrol so sarili to, sikatoy nansalita ya agto ninonot no anto ray pansumpalan na satan. Inabuloyan nen Moises ya lapud kiwas na arum et nabalang toy tuloytuloy ya inenengneng tod si Jehova. Nen unaan et duga so impangarap nen Moises ed problema. (Exo. 7:6) Balet posiblin kayari na dakel a taon ya impangidaulo tod saray rebelden Israelita, sikatoy kinmesaw tan asyodotan lad sikara. Kasin say manunan ninonot nen Moises et say liknaan to imbes ya no panon ton nigloria si Jehova? No say matoor ya propeta a singa si Moises et abalang so pokus to tan alingo, nayarin mainomay met itan a nagawa ed sikatayo. Singa si Moises, asingger tayo lan onloob ed balon mundo ya impromisa nen Jehova ed sikatayo. (2 Ped. 3:13) Labay tayon amin ya naawat itan ya espisyal a pribilehyo. Balet pian makaloob itayo, kaukolan ya tuloytuloy tayon onnengneng ed si Jehova, ya lanang tayon gawaen so panlabayan to.​—1 Juan 2:17. w18.07 15 ¶14-16

Agnapasoot nen Satanas iray totoo ya gawaen day agda labay. (Sant. 1:14) Ag-amta na dakel ya say gagawaen da manaya et panlabayan nen Satanas. Balet nen naaralan day katuaan, kaukolan ya pilien na sakey no siopa so nepeg ton panlingkoran. (Gawa 3:17; 17:30) No determinado tayon gawaen so linawa na Dios, anggapoy nagawaan nen Satanas pian deralen so integridad tayo. (Job 2:3; 27:5) Wala ni ray arum ya limitasyon nen Satanas tan saray demonyo. Singa bilang, anggapoy ibabaga na Biblia ya sarag dan basaen so walad nonot odino puso na sakey a too. Si Jehova tan si Jesus labat so walaan na ontan ya pakayari. (1 Sam. 16:7; Mar. 2:8) No gawaen tayoy anggaay nayarian tayon mansalita tan onkiwas ya mitunosan ed gagala na Dios, makaseguro tayon ag-abuloyan nen Jehova so Diablo ya manggaway antokaman ya pankaugsan tayo. (Sal. 34:7) Kaukolan tayon kabaten so kalaban tayo, balet agtayo nepeg ya ontakot ed sikato. Diad tulong nen Jehova, anggan saray aliwan perpekton totoo et sarag dan taloen si Satanas. No sikatoy sumpaen tayo, ibatikan to tayo.​—Sant. 4:7; 1 Ped. 5:9. w18.05 26 ¶15-17

Imadyin mo pan planom so onlad arawin lugar parad importantin okasyon. Pian makasabi ka, kaukolan moy onlugan ed bus tan andukey so biahe. Kasabim ed istasyon na bus, dakdakel so bus. Kaukolan mon onlugan ed bus ya onlad laen mo. No basta ka labat onlugan ed anggan dinan ya bus, ompan aliwa laingen so naakar mo. Onaarap iray kabataan natan ed miparan situasyon: andukey ya biahe, balet aliwan panamegley na bus, noagta biahe ed bilay. No maminsan, singa agda la amtay gawaen da lapud karakel na napampilian tan desisyonan da. Sikayo ran kabataan, mas mainomay yoy mandesisyon no wala lay plano yod bilay. Kasin manpokus ka ed pamaliket mod si Jehova? Labay ton ibaga, sikatoy ipilam ed amin ya aspekto na bilay mo​—edukasyon, trabaho, responsabilidad ed pamilya, tan arum ni. Kaibad satan so pankimey pian naabet iray goal ed espiritual. Saray kabataan ya mansiasiansian akapokus ed panlilingkor dad si Jehova et seguradon nabendisyonan tan magmaliw ya maliket so bilay da. w18.04 25 ¶1-3

Tinoor nen Jefte so insamba to tan imbaki toy marikit to ed Silo pian manlingkor ed tabernakulo legay bilay to. (Ukom 11:30-35) No mairap iman ed si Jefte, nayarin mas mairap iman ed anak to, ya mabulos a tinmulok ed desisyon nen tatay to. (Ukom 11:36, 37) Labay ton ibaga, agla makapiasawa, agla nawalaay anak, nabalang met lay ngaran na pamilya tan tawir da. Kanian no walay mankaukolan na ligliwa tan panamaseseg, sikato iman. Ibabaga na Biblia: “Saya so nagmaliw a kustombre ed Israel: Kada taon, saray kalangweran a bibii ed Israel et oonla pian komendaan day marikit nen Jefte a Gileadita, apat agew ed sakey taon.” (Ukom 11:39, 40) Agta makanepegan met na panamaseseg tan komendasyon iray agagin mansiasiansian single ya akapokus ed “saray bengatlan nipaakar ed Katawan”?—1 Cor. 7:32-35. w18.04 17 ¶10-11

Dakel ya anghel so akibiang ed impanrebelde nen Satanas. Antis na Delap, tinukso nen Satanas so pigara ed sikara ya nawalaay imoral a relasyon ed saray ananak a bibii na totoo. Sayan katuaan et impaamta na Biblia ed simbolikon paraan sanen deneskribe to so dragon ya ingguyor toy kakatlo na saray bitewen ed tawen a kaiba to. (Gen. 6:1-4; Apo. 12:3, 4) Nen tinaynan na saratan ya anghel so pamilya na Dios, nampakontrol la rad si Satanas. Balet, sarayan rebelde et aglabat basta sakey ya grupo na manggugulo. Angiletneg met si Satanas na sarili ton gobierno, ya sikato so ari. Inorganisa nen Satanas irayan demonyo a magmaliw ya manuley. (Efe. 6:12) Panamegley na espiritun organisasyon to, uuleyan nen Satanas so amin ya gobierno na too. w18.05 23 ¶5-6

No maminsan, ipapanengneng na Dios so panangaro to panamegley na panangipetek, ya singa gagawaen na sakey ya ama. Inawat nen David so ontan ya maaron panangipetek. Dinalepdep toy kanonotan na Dios, ya inalig to itan tan inabuloyan ton mangimpluensya ed bilay to. No ontan so gawaen mo lapud pananisiam, ombaleg met so panangarom ed Dios tan say panlabay mon ontulok ed sikato. Ontatken tan ombiskeg ka met ed espiritual. Imbaga na sakey a sister ya manngaran na Christin, “No manaaral ak tan dadalepdepen koy nababasak, pakaliknak et insulat itan nen Jehova parad siak!” No maespiritual kan too, ikdan ka na Dios na nikaduman kakabatan tan pakatalos pian say pakanengneng mo ed mundo tan ed pansumpalan na satan et mipara ed sikato. Akin et iikdan ka na Dios na ontan ya kakabatan tan pakatalos? Labay to ya maabig iray iprayuridad mo ed bilay, manggawa kay makabat iran desisyon, tan onnengneng kad arapen ya walaay kompiyansa!​—Isa. 26:3. w18.12 26 ¶9-10