Nobyembre

No manlingkor tayo ed si Jehova, walaan itayo na ilalo ya awaten so amin ya abalang nen Adan tan Eva, kaiba lay pankanawnawan manbilay na andi-anggaan. Say sakey a rason no akin ya pinili nen Adan tan Eva so agmanlingkor ed si Jehova et lapud agda pinabiskeg so panangaro da ed sikato. Balet, siansia nin inabuloyan ira nen Jehova ya manbilay na andukey pian nawalaan ira na ananak tan manggawa na sarili dan estandarte ed no panon dan pabalegen iray ananak da. Ag-abayag, anengneng ed saray agawa ya talagan makulangkulang si Adan tan Eva ed desisyon dan agmanpasakop ed si Jehova. Pinatey na panguloan ya anak da so agi to, tan asabi panaon ya nagmaliw a maruksa tan makasarili so dakdakel a totoo. (Gen. 4:8; 6:11-13) Balet, nanggaway paraan si Jehova pian niliktar so amin ya ananak nen Adan tan Eva ya malabay a manlingkor ed sikato. (Juan 6:38-40, 57) Legan ya nanaaruman so antam nipaakar ed kabaleg na panangaro tan inkamaanos nen Jehova, seguradon lalon ombiskeg so panangarom ed sikato. Diad ontan et agmo aligen so ginawa nen Adan tan Eva tan napakiwas kan idedika so sarilim ed si Jehova. w19.03 2 ¶3; 4 ¶9

Pian nipatnag so pililikna, pansagpotan mon talosan iray problema na saray kapamilyam tan saray agagi. Ipanengneng moy panangiyansakit ed saray tinedyer diad kongregasyon ontan met ed saray mansasakit, maedad la, tan saramay inateyan na inad-aro. Kumustam ira. Dengel kan maong no ibabalikas day nalilikna ra. Ipaliknam ed sikara ya talagan natatalosan moy situasyon da. Tulongan mo ra ed antokaman a paraan ya sarag mo. No gagawaen tayo iya, nipapanengneng tayoy tuan panangaro. (1 Juan 3:18) Kaukolan ya marunong tayon onadapta no tutulongan tayoy arum. Akin? Lapud nanduruma so ikikiwas na totoo no walay problema da. Say arum et labay dan itongtong so problema da, say arum balet et andi. Kanian anggano labay tayoy ontulong, nepeg ya paliisan tayoy mantepet na masyadon personal. (1 Tes. 4:11) Tan anggano ibalikas da ni walad puso ra, no maminsan et nayarin agtayo mipakna ed ibabaga ra. Balet, kaukolan tayon bidbiren ya ontan so nalilikna ra. Nepeg ya alisto tayon ondengel tan agbengatbengat a mansalita.​—Mat. 7:1; Sant. 1:19. w19.03 19 ¶18-19

Kasin nanenerbiyos ka sano itotongtong mod arap na totoo so katuaan? Nonot moy Nehemias. Sikatoy nanlingkor ed palasyo na sakey a makapanyarin ari. Maer-ermen si Nehemias lapud abalitaan to ya aderal iray padir tan puerta na Jerusalem. (Neh. 1:1-4) Imadyin mo pay pannerbiyos to nen tinepetan na ari no akin ya maer-ermen! Nampikasin tampol si Nehemias insan inmebat. Bilang resulta, baleg so intulong na ari ed saray totoo na Dios. (Neh. 2:1-8) Isipen met si Jonas. Nen ingganggan nen Jehova ya pasakbayan to ray taga Ninive, tinmakot ya maong si Jonas kanian amaarap ed sananey ya direksion. (Jon. 1:1-3) Balet diad tulong nen Jehova, sinumpal nen Jonas so asainmin to. Tan lapud saray imbaga to, maabig so nansumpalan na saray taga Ninive. (Jon. 3:5-10) Naaralan tayod si Nehemias ya importante so pampikasi antis ya onebat. Tan naaralan tayod si Jonas ya sarag itayon tulongan nen Jehova ya manlingkor ed sikato anggano natatakot tayon maong. w19.01 11 ¶12

No pilien tayon iyaplika ed bilay so katuaan ya walad Biblia, nayarin manguman so relasyon tayod saray kakaaro tan kakanayon tayo. Akin? Oniay impikasi nen Jesus parad saray patumbok to: “Pasantom ira diad panamegley na katuaan; say salitam et katuaan.” (Juan 17:17; paimanod leksab) Say salitan “pasantom ira” et mankabaliksan met na “ibiig mo ra.” No awaten tayo so katuaan, nibiig tayo manlapud mundo lapud agtayo la manpapaimpluensya ed satan. Duma lay pakanengneng na arum ed sikatayo lapud tutumboken tayo la ray estandarte na Biblia. Anggano labay tayon pansiansiaen so maong a relasyon tayod saray kakaaro tan kakanayon tayo, siansian arum ed sikara et nayarin onarawi ed sikatayo tan kontraen da ni ingen so balon pananisia tayo. Agla itan makapabigla. Oniay binidbir a mismo nen Jesus: “On, say mamusol ed sakey a too et saray membro na mismon pamilya to.” (Mat. 10:36) Balet impaseguro to met ya antokaman so isakripisyo tayo parad katuaan, say naawat tayon kasalat et agnabayaran. w18.11 6 ¶11

Inapresya nen apostol Pablo iray agagi to tan napatnagan itan diad saray ibabaga to nipaakar ed sikara. Diad saray personal a pikakasi to et lanang ton pisasalamatan so Dios lapud sarayan agagi. Imbalikas to met so apresasyon tod sikara diad saray sulat to. Diad unonan 15 ya bersikulo na Roma 16, sansakey ton binitla ed ngaran so 27 ya kapara ton Kristiano. Espisipikon binitla nen Pablo ya si Prisca tan Aquila et ‘inrisga day bilay da’ parad sikato, tan imbaga to ya si Febe et “dakel so tinulongan to,” pati sikaton mismo. Kinomendaan to irayan inad-aro ton agagi ya mansasagpot a maong. (Roma 16:1-15) Amta nen Pablo ya aliwan perpekto irayan agagi to, balet sikatoy nampokus ed maong iran kualidad da. Isip mo pa no panon ya apaseseg a maong irayan agagi nen arengel da iray imbaga nen Pablo ya imbasa ed kongregasyon! Posible ya lapud satan et lalon inmelet so pikakaaro da ed si Pablo. Kasin lanang mon ibabalikas so apresasyon mo ed saray kakongregasyon mo lapud saray maong ya ibabaga tan gagawaen da? w19.02 16 ¶8-9

Kasin kaukolan ya perpekto tayo pian niwalad sikatayo so integridad? Ompan iisipen tayo ya wala ray depekto tayo, odino dakel ingen so nagagawaan tayon lingo. Agkaukolan ya perpekto tayo, ta aliwan saray lingo tayo so nenengnengen nen Jehova. Ibabaga na Salita to: “No saray lingo so babantayan mo, O Jah, siopa kasi so makaalagey, O Jehova?” (Sal. 130:3) Amta to ya aliwa tayon perpekto tan makasalanan itayo, kanian mabulos to tayon peperdonaen. (Sal. 86:5) Ontan met, amta nen Jehova iray limitasyon tayo, tan agto iilaloan ya gawaen tayo iray agtayo sarag ya gawaen. (Sal. 103:12-14) Diad sikatayo ran lingkor nen Jehova, importante so panangaro pian niwala ed sikatayo so integridad. Say panangaro tayod Dios, say matoor ya debosyon tayod sikato bilang Ama tayod tawen, et nepeg ya mansiansian kompleto, andiay depekto, odino intero. No say panangaro tayo et mansiansian ontan anggano nasusubok itayo, nibagan walay integridad tayo. (1 Awa. 28:9; Mat. 22:37) Amta tayo ya matunong iray estandarte nen Jehova, tan akapokus so nonot tayo ed no antoy makapaliket ed Ama tayo ed tawen. Lapud panangaro tayo ed Dios, iyuuna tayo so panlabayan to diad saray desisyon tayo tan papaneknekan tayoy integridad tayo. w19.02 3 ¶4-5

Kada no nanengneng tayoy maong a resulta na panggagawa tayoy duga, mas ombiskeg so pananisia tayo. (Sant. 1:2, 3) Balibali liknaan tayo lapud amta tayon si Jehova et naliliketan a tawagen to tayon ananak to, tan mas ombiskeg so pilalek tayon sikatoy napaliket. (Pro. 27:11) Kada subok et pankanawnawa tayo pian ipanengneng ya agnaapag so puso tayo ed panlilingkor tayod maaron Ama tayo. (Sal. 119:113) Tan papaneknekan tayo ya aaroen tayo si Jehova diad interon puso​—puso ya talagan determinadon mangunor ed saray ganggan to tan manggawa ed linawa to. (1 Ara. 8:61) Kasin makagawa tayoy lingo? On, lapud ag-itayo perpekto. No makagawa tayoy lingo, nonoten tayoy alimbawa nen Arin Hezekias. Wala ray agawaan ton lingo. Balet sikatoy nagbabawi tan nantultuloy ya nanlingkor ed si Jehova “diad interon puso.” (Isa. 38:3-6; 2 Awa. 29:1, 2; 32:25, 26) Kanian labanan tayoy impluensya nen Satanas. Ipikasi tayo ya nawalaan tayoy “maunor a puso” tan makapansiansia tayon matoor ed si Jehova.​—1 Ara. 3:9; Sal. 139:23, 24. w19.01 18-19 ¶17-18

Nagugunggonaan tayon mismo no mankokomento tayo diad saray aral. (Isa. 48:17) Panon? Unona, no plano tayoy mankomento ed aral, mas lalo tayon napakiwas ya manparaan a maong. No manparaan tayon maong, mas onaralem so pakatalos tayo ed Salita na Dios. Tan no mas aralem so pakatalos tayo, mas niyaplika tayo ray nanaaralan tayo. Komadua, mas naliketan tayo ed saray aral lapud mibibiang tayo. Komatlo, lapud kaukolay sagpot ed pankomento, mabetbet ya natandaan tayo ray punto ya inkomento tayo anggano abayag lan asumpal so aral. Ontan met, napapaliket tayoy Jehova no ibabalikas tayoy pananisia tayo. Makaseguro tayon dedengelen itayo nen Jehova no mankokomento tayo ed saray aral tan aapresyaen ton maong so pansasagpot tayo. (Mal. 3:16) Ipapanengneng toy apresasyon to diad pamebendisyon tod sikatayo sano gagawaen tayoy anggaay nayarian tayon sikatoy paliketen. (Mal. 3:10) Malinew sirin ya wala ray maabig a rason no akin ya mankokomento tayo ed saray aral. w19.01 8 ¶3; 9-10 ¶7-9

Agaylay abig na pidedeneng nen Jehova ed saray lingkor to. Imbes ya ikdan to tayoy dakdakel ya ganggan, maan-anos to itayon ibabangat ya tumboken so ganggan na aro. Labay ton manbilay tayo base ed saray prinsipyo to tan busolen tayo so kaugsan. Say Sermon nen Jesus ed Palandey et maabig ya alimbawa na ontan ya panangibangat, lapud tinukoy na satan iray sengegan na panggaway mauges. (Mat. 5:27, 28) Bilang Ari ed Panarian na Dios, itultuloy itayon bangatan nen Kristo diad balon mundo pian perpekto tayon naalig so panmoria to ed inkatunong tan kaugsan. (Heb. 1:9) Gawaen to met ya perpekto so laman tan nonot tayo. Imadyin mo pa, agmo la kaukolan a labanan so impluensya na kasalanan odino naeksperiensya iray graben epekto na satan. Tan diad kaunoran et napanliketan mo lay “maglorian kawayangan” ya impromisa nen Jehova ed sika. (Roma 8:21) Siempre, ag-itayon balot nawalaan na sigpot a kawayangan. Nipatnag tayo ya walaan tayo na tuan kawayangan no papaigiya tayo ed panangaro a singa gagawaen na Dios.​—1 Juan 4:7, 8. w18.12 23 ¶19-20

Say sakey ya lakin Israelita et sarag ton idiborsyo so asawa to no “walay nalmoan ton mabanday nipaakar ed sikato.” Agbinitla ed Ganggan no antoy tutukoyen na samay “mabanday.” Mapatnag ya makapabaing odino seryoso itan, aliwa labat ya atapew ya kasalanan. (Deu. 23:14) Makapaermen ta diad panaon nen Jesus, dakel ya Judio so angidiborsyo ed asawa da “ed anggan anton sengegan.” (Mat. 19:3) Seguradon agtayo ra labay ya aligen. Impaamta nen propeta Malaquias so panmoria na Dios ed diborsyo. Diad saman, maslak ya laki et agmanmamatoor ed ‘asawa to ed inkaugaw to’ tan ididiborsyo to, nayarin pian mangasawa na mas ugaw tan paganon bii. Oniay insulat nen Malaquias nipaakar ed panmoria na Dios: “Kabusol ko so panagdiborsyo.” (Mal. 2:14-16) Mitukoyan itan ed imbaga na Salita na Dios nipaakar ed sankaunaan ya panangasawa: “Iyamong [na laki so] asawa to, tan magmaliw iran sakey a laman.” (Gen. 2:24) Sinuportaan nen Jesus so panmoria nen Ama to nipaakar ed panangasawa, ya kuan to: “Say impankasakey na Dios et agnepeg a pansianen na too.”​—Mat. 19:6. w18.12 11 ¶7-8

Iyaabuloy na sirkumstansya na arum ya agagi a makapanboluntaryo ira ed ararawin lugar. Say inkiwas da et mipara ed si propeta Isaias. Bilang ebat ed tepet nen Jehova ya, “Siopay ibakik, tan siopay mangirepresenta ed sikami?” say ebat to et: “Wadia ak! Ibaki mo ak!” (Isa. 6:8) Kasin labay mo tan iyabuloy na sirkumstansyam so manboluntaryo ed saray teokratikon kimey? Nipaakar ed panagpulong tan panaggaway babangatan a kimey, imbaga nen Jesus: “Mikasi kayo sirin ed Katawan na panag-ani a mangibaki na saray mankimey ed aanien to.” (Mat. 9:38) Kasin sarag moy manlingkor bilang payunir ed lugar ya mas baleg so pankaukolan? Odino kasin sarag mon suportaan so arum ya manggawa ed satan? Dakel ed saray agagi so makapangibaga ya say sankaabigan a paraan ya nipanengneng so panangaro ed Dios tan ed kaparan too et say pampayunir diad saray lugar odino teritorya ya baleg so pankaukolan ed saray komikimey. Kasin walay nanonotan mo nin paraan pian napalaknab odino naaruman moy panaglingkor mo? Talagan makapaliket so panggawa ed satan. w18.08 27 ¶14-15

Malinew tayon nanengneng ed Saray Ebanghelyo iray kanonotan nen Jehova nipaakar ed materyal iran bengatla. Say Dios a mismo so nampili na magmaliw ya atateng a mamabaleg ed Anak to​—sanasawa ya simpli labat so panagbilay da. (Lev. 12:8; Luc. 2:24) Nen inyanak si Jesus, sikatoy “imparukol [nen Maria ed] kuwadra, lapud anggapoy kuarton napampundoan da.” (Luc. 2:7) No gagalaen nen Jehova, sarag to pay mangiparaan na mas komportable ya napampundoan parad kiyanak na Anak to. Balet say importante ed Sikato et say espiritualidad na mangasikaso tan mamabaleg ed si Jesus. Diad sayan salaysay na Biblia, natalosan tayo no antoy panmoria nen Jehova ed materyal iran bengatla. Labay na arum ya atateng a niwalad saray ananak da so sankaabigan no nipaakar ed materyal, anggano nipeligro la so espiritualidad na ananak da. Malinew balet ya say sankaimportantian ed si Jehova et say espiritual iran bengatla. Kasin aaligen moy panmoria nen Jehova? Antoy ipapanengneng na saray gagawaen mo? w18.11 24 ¶7-8

Lapud say Dios so Lapuan na liket, labay ton maliket itayo, tan iikdan to tayo na dakel a rason pian manliket. (Deu. 12:7; Ecl. 3:12, 13) Balet natan, mairap so magmaliw ya maliket. Akin? Nanaandi so liket tayo lapud saray makapa-stress ya nagagawa​—no say sakey ya inad-aro et ompatey o nadispelo, odino lapud diborsyo o pakaandian na trabaho. No anggapoy pantatalosan ed loob na pamilya tan anggapoy maabig ya komunikasyon, nayarin naandi met so liket tayo. Say panagbalaw na katrabaho o kaklase, panamasegsegang, odino pakapriso et mangekal met na liket, pati say ikapuy na laman, graben sakit, odino depresyon. Anggaman ontan, si Jesu-Kristo, say “maliket tan alenleneg a Manuley,” et labalabay ton ligliwaen tan paliketen iray totoo. (1 Tim. 6:15; Mat. 11:28-30) Diad Sermon to ed Palandey, binitla nen Jesus iray pigaran kualidad ya makatulong pian magmaliw tayon maliket, anggano wala ray aarapen tayon mairap iran subok ed mundo nen Satanas. w18.09 17-18 ¶1-3

Sakey ed saray sankairapan ya ibayar parad katuaan et say pangitunda ed agmakasulatan iran kustombre tan kagagawa. (Pro. 23:23) Anggano nayarin mainomay parad arum ya awaten iray Makasulatan ya rason pian taynanan iratan ya kagagawa, say arum balet et nayarin manaalangan ya isakripisyo iratan lapud dedesdesen ira na kapamilya, katrabaho, tan kakaaro ra. Nayarin makapakonsiensia itan ed sikara lalo la no kaiba ed satan ya kustombre so pangigalang ed saray inaatey lan kapamilya da. Say makpel ya alimbawa na arum so ontulong ed sikatayo pian manggawa na kaukolan iran pananguman. Antoy ginawa na balon komberte iran Kristiano ed Efeso ya datin managmahiko pian nataynan da so agmakasulatan iran kagagawa tan pian nasaliw da so katuaan? Oniay impaliwawa na Biblia: “Tinipon da ray libro ra tan pinoolan dad arapan na amin. Tan sanen kinuenta ray bili na saratan ya amin, mankantidad iratan na 50,000 a piraso na pilak.” (Gawa 19:19, 20) Mabli so insakripisyo na sarayan matoor a Kristiano pian naawat so agnabayaran iran bendisyon. w18.11 7 ¶15-16

Ag-abayag kabaliw na saray Israelita ed Jordan, akasabat na sakey a laki si Josue ya walay sankabembenan ton espada. Sikato so “pangulo na armada nen Jehova,” ya akaparaan a mangidepensa ed totoo na Dios. (Josue 5:13-15; paimanod leksab) Akaawat na malinew iran instruksion si Josue manlapud Pangulo ya anghel no panon ya sakopen so syudad na Jerico. Diad gapo, singa aliwan praktikal so arum iran instruksion. Singa bilang, ingganggan nen Jehova ya manpasegat so amin ya lalaki, kanian pigay agew iran makapkapuy. (Gen. 34:24, 25; Jos. 5:2) Nayarin inisip na saray agmakalaban ya sundalon Israelita no panon da kasin protektaan so pamilya da no onlusob ed kampo da iray kalaban. Balet biglan abalitaan da ya “malet a nikapot iray puerta na Jerico lapud saray Israelita.” (Jos. 6:1) Agta seguradon binmiskeg so talek dad panangigiya na Dios lapud saman ya ag-iilaloan ya agawa? w18.10 23 ¶5-7

Panon tayon naalig so inkamapaabeba nen Pablo? Unona, kaukolan tayon labanan so antokaman a tukso ya manilalo odino mangawat na dayew lapud saray agawaan tayo diad tulong nen Jehova. Maabig no tepetan tayoy sarili tayo: ‘Antoy panmoriak ed saray totoon napupulongan ko? Kasin agko nalilikas ya wala la manayay panangidumadumak ed saray totoo diad lugar mi?’ Diad interon mundo, aaralen a maong na saray Tasi nen Jehova iray teritorya da no kasin wala ni ray nayarin onkiwas ed maong a balita. Pian nagawaan itan, no maminsan et kaukolan dan aralen iray lenguahe tan kultura na saray totoo ya maslak et memelmelagen na karaklan. Balet, agnepeg ya isipen na saray Tasi ya mas maong ni ira nen say sarayan napupulongan da. Imbes, tatalosan da so kada indibidual pian say mensahe na Panarian et onsabi ed puso to. w18.09 5 ¶9, 11

Pinatey na saray Romano si Judas. Likud ed Judas tan arum nin rebelde, saray ordinaryon Judio et aalagaren da so isabi na sakey a politikon Mesias. Iisipen da ya no onsabi so Mesias, gawaen ton makapanyari so bansa ra tan ibulos to ra ed panangaripen na Roma. (Luc. 2:38; 3:15) Dakel so manisia ya iletneg na Mesias so panarian to diad Israel. No ontan so nagawa, saray minilyon ya Judion nitaytayak ed nanduruman bansa et nayarin ompawil ed mismon bansa ra. Tandaan ya aminsan et tinepetan nen Juan Bautista si Jesus: “Kasin sika may aalagaren min onsabi odino wala ni sananey?” (Mat. 11:2, 3) Nayarin labay ya naamtaan nen Juan no kasin walay sananey ya manumpal ed amin ya iilaloan na saray Judio. Ontan met, samay duaran disipulo ya akaiba day apaolin Jesus diad dalan ya paarap ed Emaus et wala ray iilaloan da nipaakar ed Mesias balet ag-agawa. (Lucas 24:21) Ag-abayag kayari na satan, si Jesus et tinepetan na saray apostol to: “Katawan, ipawil mo ta so panarian na Israel diad sayan panaon?”​—Gawa 1:6. w18.06 4 ¶3-4

Mas kaukolan tayoy manalwar no wala ray nakabatan tayon balita nipaakar ed saray totoo nen Jehova. Agtayon balot lilingwanan ya si Satanas so manag-akusa ed saray matoor a lingkor na Dios. (Apo. 12:10) Kanian impasakbay nen Jesus ya saray onsusumpa et ‘palsaan da tayo na amin lan klase na mauges a bengatla.’ (Mat. 5:11) No naynay tayon sankanonot itan, agtayo la pankelawan no wala ray makapabiglan narengel tayo nipaakar ed saray totoo nen Jehova. Kasin labalabay moy man-e-mail tan man-text ed saray kakaarom tan kabat mo? No on, ompan no walay abasam ya balita diad Internet odino no walay arengel mon agawa et singa ka reporter ya labay mon sika so makaunan mangibalita. Balet antis kan man-text o man-e-mail, tepetan moy sarilim: ‘Kasin segurado ak ya tua so impormasyon ya ipasak ed arum? Kasin wala ray pruebak?’ No agka segurado, ompan agmo naliklikas et mangikakayat ka la manaya na palson impormasyon ed saray agagi. Kanian no manduaruwa ka, agmo la ipapasa, i-delete mo la. w18.08 3 ¶3; 4 ¶6-7

Labay nen Jesus ya nalikna tayoy liket diad pagmaliw a maiter. Positibo so reaksion na dakel ya totoo ed ugalin inkamaiter. Siempre, aliwan amin et positibo so reaksion da, balet no apresyaen da itan, seguradon magmaliw met la ran maiter. Kanian iyugali tayo so mangiter, apresyaen da man itan o andi, ta agmo amta no panon kabaleg so epekto na anggan aminsan labat ya impangiter mo. Say tuan maiter ya too et agmanaalagar na kasalat. Ontan so walad nonot nen Jesus sanen imbangat to: “No mangiparaan kay ponsia, imbitaan mo iray pobri, lupoy, piley, bulag; tan naliketan ka, lapud ag-ira makabales ed sika.” (Luc. 14:13, 14) “Say mabunlok a too et nabendisyonan,” so imbaga na sakey a pinuyanan a managsulat. Onia ni imbaga na sakey: “Maliket so siopaman a mangipapatnag na konsiderasyon ed samay pakaskasi.” (Pro. 22:9; Sal. 41:1) On, nepeg ya mangiter tayo lapud naliketan tayo no ontulong tayod arum. w18.08 21-22 ¶15-16

Mairap natan ya amtaen no antoy tua tan manggawa na dugan konklusyon lapud amayamay so agnapanmatalkan ya impormasyon, balita ya agkompleto ed detalye, tan lapud agtayo perpekto. Antoy makatulong ed sikatayo? Nepeg tayon amtaen iray prinsipyo na Biblia tan iyaplika iratan. Say sakey ed saratan ya prinsipyo et kakulangkulangan tan kababaingan so iyebat antis nin narengel so tua. (Pro. 18:13) Ipapanonot met na sakey nin prinsipyo ya agtayo papanisiaan so kada salita ya agla mantetepet. (Pro. 14:15) Tan siempre, anggano dakel lay eksperiensya tayo bilang Kristiano, agtayo nepeg ya manmatalek ed sarili tayon pakatalos. Protektaan itayo na saray prinsipyo na Biblia no segurado tayon napanmatalkan iray impormasyon ya uusaren tayo pian makapanggawa tayo na saray dugan konklusyon tan makabat iran desisyon. w18.08 7 ¶19

Diad pampabautismo tayo, pormal tayo lan ipapaamta ed totoo ya si Jehova so makankayarian ed sikatayo tan mabulos tayon manpasakop ed sikato. Ontan so ginawa nen Jesus sanen sikatoy nampabautismo, singa to ibabaga ed si Jehova: “Say panggaway linawam, O Dios ko, so pirawat ko.” (Sal. 40:7, 8, paimanod leksab) Antoy reaksion nen Jehova ed impanpabautismo nen Jesus? Oniay ibabaga na Biblia: “Kayarin abautismoan si Jesus, sikatoy inmimwas; tan alukasan so tawen, tan anengneng to so espiritu na Dios a singa malapati ya ondadapo ed sikato. Wala met so sakey a boses manlapud tawen ya angikuan: ‘Saya so Ana’ko, say inad-arok, ya inabobonan ko.’” (Mat. 3:16, 17) Anggaman si Jesus et sipor lan kayarian na Ama to ed tawen, malikeliket si Jehova ya nanengneng so inkamabulos na Anak ton gawaen so linawa To. Malikeliket met si Jehova ya mangawat ed dedikasyon tayo, tan pagalangan to itayo diad pamendisyon tod sikatayo.​—Sal. 149:4. w18.07 23 ¶4-5

Diad impangusar nen Moises ed salitan “kami,” nayarin say tutukoyen to et sikato tan si Aaron. Napatnagan ed saman ya imbaga nen Moises ya talagan agto nirespeto si Jehova bilang say tuan Lapuan na saman a milagro. Sayan posibilidad et nayarin pruebaan na samay nabasad Salmo 106:32, 33: “[Say Dios et] pinasanok da diad saray danum na Meriba, tan aliwliway agawad si Moises lapud sikara. Sikatoy apasyodot da, kanian akapansalita laingen a bengatbengat.” (Num. 27:14) Antokaman so agawa, lapud ginawa nen Moises et agniiter so galang ya manepeg ed si Jehova. Oniay imbaga nen Jehova ed si Moises tan Aaron: “Nanrebelde kayon dua ed ganggan ko.” (Num. 20:24) Talagan seryoson kasalanan itan! Diad apalabas, ag-inabuloyan nen Jehova so sakey a henerasyon na saray Israelita ya onloob ed dalin na Canaan lapud impanrebelde da. (Num. 14:26-30, 34) Kanian parehon duga tan makatunongan labat ya ontan met so impangukom nen Jehova ed si Moises lapud impanrebelde to. Sikatoy agnaabuloyan ya makaloob ed Insipan a Dalin. w18.07 14 ¶9, 12; 15 ¶13

Kasin mabulos mon isakripisyo iray kanepegan mo pian agnagapol so agim ya duma ed sika so inkipasal na konsiensia to? Seguradon gawaen mo itan. Antis ya naamtaan na arum ya agagi so katuaan, nayarin sikaray datin mainum, balet natan et determinado la ran paliisan itan. Agtayo labay ya sikatayoy pansengegan pian pawilen na sakey ya agi so datin kagagawa to, ya satan et pankaugsan to! (1 Cor. 6:9, 10) Kanian no angimbita ka na sakey ya agi, aliwan maaro no sikatoy piliten mon oninum na alak no agto labay. Nen si Timoteo et tinedyer ni odino masulok ni labat ya 20 so taon to, sikatoy nampasegat anggano ansakit itan pian agto nagapol iray Judio ya pulongan to. Say panmoria to et mipara ed si apostol Pablo. (Gawa 16:3; 1 Cor. 9:19-23) Singa si Timoteo, kasin mabulos mon isakripisyo iray personal ya panlabayan mo parad pankaabigan na arum? w18.06 18-19 ¶12-13

Iyaasingger nen Jehova iramay labay ton magmaliw a membro na espiritual a pamilya to, a maaro ton iyaapit ed dugan panagdayew iramay matuan impanpuso. (Juan 6:44) No walay akabat mon sakey ya anggapod katuaan, antoy antam ed sikato? Ompan daiset labat, singa say ngaran tan itsura to. Duma balet no say akabat mo et kabat to tan aaroen to si Jehova. Anggano duma so binalegan, bansa, tribu, odino kultura to, dakel lay antam ed sikato​—tan dakel met lay amta to ed sika! Singa bilang, nabidbir yon tampol so “lenguahe” na kada sakey​—say “puron lenguahe” na katuaan. Kanian amta yo so papanisiaan na kada sakey nipaakar ed Dios, saray estandarte ed moral, say ilalo ed arapen, tan arum ni. Saratan so sankaimportantian ya naamtaan yod sakey a too, ta makatulong iratan pian nawalaan kayoy kompiyansa tan talek ed sakey tan sakey. Magmaliw met iratan ya pundasyon parad maong tan manbayag ya pankakaaro. w18.12 21 ¶9-10

Diad panangigiya nen Kristo, impalinew na mananguley ya ulop ya agla kaukolan ya segaten iray aliwan Judion Kristiano. (Gawa 15:19, 20) Balet pigaran taon so linmabas, siansia nin dakel ya Judion Kristiano so manesegat ed ananak da. Pero nayarin isipen tayo, ‘Akin et inabuloyan nen Jesus ya onlabas ni andukey a panaon antis ya naresolbe so isyu anta naandi lay Mosaikon Ganggan diad impatey to?’ (Col. 2:13, 14) Parad arum, kaukolan so panaon pian makapan-adjust ira ed sakey a balon pakatalos. Kaukolan na saray Judion Kristiano so magenap a panaon pian nauman day panagnonot da. (Juan 16:12) Mairap ya awaten na arum ya say panagsegat et aliwa lan pakabidbiran na espisyal a relasyon da ed Dios. (Gen. 17:9-12) Saray arum balet, lapud antakot day napasegsegang, agda labay so magmaliw ya duma ed karaklan ya Judio. (Gal. 6:12) Balet sinmabi panaon, angiter so Kristo na kaaruman ya panangigiya panamegley na pinuyanan iran sulat nen Pablo.​—Roma 2:28, 29; Gal. 3:23-25. w18.10 24-25 ¶10-12

Angibaki si Caifas na saray sundalon mangerel ed si Jesus diad labi. Amta nen Jesus iyan makapabaing ya plano ra, kanian nen unor lan pangdem to a kaiba iray apostol to, imbaga ton mangawit ira na pigaran espada. Duga lay duaran espada pian ibangat ed sikara so sakey ya importantin leksion. (Luc. 22:36-38) Diad saman ya labi et inuyos nen Pedro so espada tan sinigbat to so sakey ed saramay linman mangerel ed si Jesus. Ginawa iman nen Pedro lapud pansyodot to ed anggapoy hustisyan impangerel ed si Jesus diad saman ya labi. (Juan 18:10) Balet imbaga nen Jesus ed si Pedro: “Ipawil moy espadam ed kaluban to, ta amin iramay mangusar na espada et ompatey ed espada.” (Mat. 26:52, 53) Sayan importantin leksion et mitukoyan ed samay impikasi nen Jesus antis na saman ya labi​—nepeg ya ag-ira magmaliw a kabiangan na mundo. (Juan 17:16) Say Dios so nepeg ya ilaloan ya mangiter na hustisya. Satan so rason no akin ya mansiasiansia tayon mareen tan nankakasakey. Tan legan ya nanenengneng nen Jehova so mundon anggapoy pankakasakey, sikatoy naliliketan no nanenengneng ton walay pankakasakey na totoo to.​—Sof. 3:17. w18.06 7 ¶13-14, 16

Likud ed pamapatit nen Satanas, uusaren to met so panamasegsegang pian nikompromiso tayoy katooran tayod si Jehova. Singa bilang, usaren to ray gobierno pian isebel so kimey tayon panagpulong. Odino nayarin impluensyaan to ray katrabaho odino kaeskuela tayo pian balawen da itayo lapud itutumbok tayod estandarte na Biblia nipaakar ed moral. (1 Ped. 4:4) Nayarin impluensyaan to met iray mangiyaansakit ya kapamilya tayo pian dismayaen itayon miaral. (Mat. 10:36) Panon tayon nasarag iratan? Unona, nepeg labat ya ilaloan tayo iyan direktan panangataki​—milalaban si Satanas ed sikatayo. (Apo. 2:10) Insan, kaukolan tayon nengnengen so talagan rason na saratan ya nagagawa​—ibabaga nen Satanas ya manlilingkor tayo labat ed si Jehova no kombeniente itan ed sikatayo. Ibabaga to met ya no naiirapan tayo la, ibeneg tayo lanlamang so Dios. (Job 1:9-11; 2:4, 5) Tan kaukolan tayoy manmatalek ed si Jehova ya pabiskegen to tayo pian nasarag iratan ya subok. Tandaan, agto tayon balot paulyanan.​—Heb. 13:5. w18.05 26 ¶14

Anggano say mensahe na Panarian ya ipupulong tayo et singa ag-onsasabi ed puso na totoo, agtayo nepeg a melmelagen so epekto na kimey tayo ya panagtanem. Tua ya dakel so totoon ag-ondengel ed sikatayo, balet oobserbaan da tayo. Iimanoen day masimpit ya panangawes tayo, maong ya ugali tayo, tan makaaron imis tayo. Agmanbayag, nayarin makatulong so kondukta tayo pian nanengneng da ya aliwan tua manaya so negatibon iisipen dad sikatayo. Oniay inkuan na payunir a si Sergio tan Olinda: “Lapud sakit, medyo abayag kamin ag-akaonla ed plaza. Nen akapawil kami lamet, tinepetan kami na saray ondadalan, ‘Antoy agawa? A-miss mi kayo ah.’” On, no ‘agtayo pampainawaen so lima tayo’ diad pantatanem na bini na Panarian, makanakana so pibibiang tayo ed “pantasi ed amin a nasyon.” (Mat. 24:14) Nagkalalo la, talagan maliket tayo ta amta tayon walad sikatayo so pabor nen Jehova, lapud aaroen to so amin ya ‘manbubunga tan mansusungdo’!—Luc. 8:15. w18.05 16 ¶16-18

Manlapu nen nankasalanan so too tan nagmaliw ya aliwan perpekto, prinuebaan nen Jehova ya sikatoy Dios ya mangiiter na panamaseseg. Kayarin mismo na impanrebelde diad Eden, angiter si Jehova na rason pian makapanpakpel iray magmaliw ya ilalak nen Adan. Say promisa na Dios ya walad Genesis 3:15, et mangiter na ilalo ed totoo ya naderal lanlamang so “sankaunaan ya uleg,” si Satanas ya Diablo, pati amin a mauges ya kimey to. (Apo. 12:9; 1 Juan 3:8) Say lingkor nen Jehova ya si Noe et nambilay diad mundon anggapoy takot na totoo ed Dios. Diad saman et pamilya to labat so mandadayew ed si Jehova. Grabe so kaugsan tan imoralidad, kanian adismaya la komon si Noe. (Gen. 6:4, 5, 9, 11; Jud. 6) Balet imbaga nen Jehova ya deralen To iman ya mauges a mundo, insan to inikdan si Noe na instruksion no antoy nepeg ton gawaen pian seguradon makaliktar so pamilya to. (Gen. 6:13-18) Impanengneng nen Jehova ed si Noe ya talagan sikato so Dios ya mamapaseseg. w18.04 15 ¶1-2

Nayarin nalilingo itayo no iisipen tayon agtayo sarag so mamaseseg lapud agtayo apasal ya mitongtong. Balet diad tua et aliwan mairap so mamaseseg​—anggan say iyimis mo et nayarin makapaseseg la. No agto ka inimisan, ompan walay problema to, tan say idengel mo et nayarin mamaseseg ed sikato. (Sant. 1:19) Sarag tayon amin so magmaliw ya makapaseseg ed saray agagin maermen. Oniay insulat nen Arin Solomon: “Say salitan imbalikas ed dugan panaon et alay abig! Say maligsan mata et paliketen toy puso; say maong a balita et pakasilen toy pukepukel.” (Pro. 15:23, 30, paimanod leksab) Impanengneng nen Pablo ya makapaseseg met so saniiban pangansion na Kingdom song. (Gawa 16:25; Col. 3:16) Say pampapasesegan et mas lalon kakkaukolan legan tayon nanenengneng ya “manasingger” lay agew nen Jehova.​—Heb. 10:25. w18.04 23 ¶16; 24 ¶18-19