Oktubre

Aliwa tayon singa si Jehova tan si Jesus ya nabasa day puso. Balet, sarag tayon pansagpotan ya talosan so nalilikna tan pankaukolan na arum. (2 Cor. 11:29) Aliwan singa sayan makasarilin mundo, gagawaen tayoy anggaay nayarian tayon ‘anapen so pankaabigan na arum, aliwan say pankaabigan tayo labat.’ (Fil. 2:4) Saray elder ed kongregasyon so nagkalalo lan nepeg ya mangipanengneng na pililikna. Amta ra ya walay eebatan dad si Jehova ed no panon dan aasikasoen iray karnero to ya inmatalek tod sikara. (Heb. 13:17) Pian natulongan na saray elder iray agagi, nepeg ya walay empatya ra. Panon ya nipatnag na saray elder so pililikna? Say elder ya walaan na pililikna et walay panaon to parad saray agagi. No katongtong to ra, sikatoy mantetepet tan maan-anos ya ondedengel a maong. Nagkalalo lan importante itan no walay sakey ed saray pinablin karnero ya labay ton ipaamta so walad puso to balet nanairapan a mangibalikas. (Pro. 20:5) No mabulos ya iter na elder so panaon to ed saray agagi, ombiskeg so talek, pikakaaro, tan panangaro dad sakey tan sakey.​—Gawa 20:37. w19.03 17 ¶14-17

Say apresasyon et singa panangan​—mas makapaliket no pandurungoan. No nalilikna tayon aapresyaen itayo na arum, maliket tayo. No ibabalikas tayoy apresasyon tayo ed arum, napapaliket tayo ira. Nipalikna tayo ed samay toon akisalamatan tayo ya papablien tayon maong iray sagpot ton tulongan itayo odino iter so pankaukolan tayo. Bilang resulta, lalon onelet so pankakaaro tayo. Saray ibabalikas tayon apresasyon et mabmabli, singa binitla na teksto tayo natan. Isip mo pay karakep na mansanas ya gawad balitok ya inyan ed pilak a pananginan! Tan nonot mo pa no panon kamabli itan! Antoy naliknam no makaawat ka na ontan ya regalo? Diad tua, ontan kamabli iray ibabalikas mon apresasyon ed arum. Tan isipen pa: Say mansanas ya gawad balitok et nayarin mansiansia diad ilabas na panaon. Mipadpara, say imbalikas mon apresasyon ed sakey a too et nayarin agto nalingwanan tan pablien to legay bilay to. w19.02 15 ¶5-6

Nen angan si Adan tan Eva ed samay bunga na kiew na pikakabat ed maong tan mauges, impanengneng da ya anggapoy talek da ed si Jehova tan ed saray estandarte to. Nanggawa ra na sarili dan estandarte ed no antoy maong tan mauges. Balet isip mo pay abalang da. Abalang da so pikakaaro da ed si Jehova. Abalang da met so pankanawnawan manbilay na andi-anggaan, tan impatawir day kasalanan tan patey ed saray ananak da. (Roma 5:12) Ikompara so ginawa nen Adan tan Eva ed samay reaksion na Etiopen eunoko nen sikatoy pinulongan nen Felipe. Naapresyan maong na eunoko so ginawa nen Jehova tan Jesus parad sikato kanian tampol ya nampabautismo. (Gawa 8:34-38) No idedika tayoy bilay tayo ed Dios tan manpabautismo tayo ya singa ginawa na eunoko, ipapanengneng tayo ya aapresyaen tayo so ginawa nen Jehova tan Jesus parad sikatayo. Ipapanengneng tayo met ya manmamatalek tayo ed si Jehova tan bibidbiren tayo ya sikato so nepeg ya manggawa na estandarte ed no antoy maong tan mauges. w19.03 2 ¶1-2

No nipaakar ed sikatayo ran lingkor na Dios, say integridad et mankabaliksan na interon puson panangaro tan agmanguman ya debosyon ed si Jehova, kanian iyuuna tayoy linawa to ed amin ya desisyon tayo. Diad Biblia, say Hebreon salita ya impatalos ya “integridad” et mankabaliksan na kompleto, andiay depekto, odino intero. Singa bilang, saray ayayep ya ibagat ed si Jehova et kaukolan ya andiay depekto. (Lev. 22:21, 22) Saray totoo na Dios et agnayarin mangiyapay na ayep ya anggapoy sakey a sali, layag, odino mata to; tan agmet ira nayarin mangiyapay na ayep ya walay sakit to. Importante ed si Jehova ya say ayep et kompleto, andiay depekto, odino intero. (Mal. 1:6-9) Natalosan tayo no akin ya say pagmaliw ya andiay depekto odino kompleto et importante ed si Jehova. No walay labay tayon saliwen, agtayo labay so mangaliw na prutas ya aketketan, libro ya kulang na pahina, odino kagawaan ya kulang na piyesa. Say labay tayo et amay kompleto, andiay depekto, odino intero. Ontan met so labay nen Jehova ya ipanengneng tayon panangaro tan katooran ed sikato. Nepeg itan ya kompleto, andiay depekto, odino intero. w19.02 3 ¶3

Pian naalwaran tayoy puso tayo, agtayo labat itan isasara pian agmakaloob iray mauges ya impluensya noagta lukasan tayo met itan pian makaloob iray maong ya impluensya. Diad saray apadiran ya syudad nensaman, saray puerta na syudad et isasara na bantay na puerta pian agmakaloob iray kalaban, balet wala ray panaon ya lulukasan to iray puerta pian niloob iray naakan tan arum nin suplay. No agbalot lukasan iray puerta, naerasan iray manaayam ed syudad. Mipadpara, kaukolan ya regular tayon lukasan so puso tayo pian makaloob so kanonotan na Dios. Walad Biblia so kanonotan nen Jehova, kanian kada no basaen tayo itan, aabuloyan tayoy kanonotan nen Jehova ya mangimpluensya ed nononoten, nalilikna, tan kakikiwas tayo. Panon tayon nagunggonaan a maong ed pambabasa tayoy Biblia? Importante so pampikasi pian natulongan itayon ‘malinew ya nanengneng iray makapakelaw a bengatlan’ walad Salita to. (Sal. 119:18) Kaukolan tayo met ya dalepdepen iray nababasa tayo. No manpipikasi, manbabasa, tan mandadalepdep tayo, say Salita na Dios et onsabi ed ‘dalem na puso tayo,’ tan naaro tayoy kanonotan nen Jehova.​—Pro. 4:20-22. w19.01 18 ¶14-15

Amta nen Jehova ya nanduruma so abilidad tan situasyon tayo, tan aapresyaen ton maong iray bagat ya sarag tayon iyapay ed sikato. Isipen pa ray bagat ya aawaten nen Jehova ed saray Israelita. Saray arum ya Israelita et sarag day mangiyapay na kordero odino kanding. Balet saray mairap-bilay et nayarin mangiyapay na “duaran palekpek odino duaran sibong a malapati.” Tan no agsarag na sakey so mangiyapay na anggan dinan ed saratan, aawaten nen Jehova so “kakaplo na sakey ya efa na pinon arina.” (Lev. 5:7, 11) Mas mamura so arina, balet siansia nin aapresyaen nen Jehova itan ya bagat, basta “pinon arina.” Ontan nin siansiay nalilikna natan na makonsideran Dios tayo. No mankokomento tayo, agto iilaloan ya amin tayo et maong a mansalita ya singa si Apolos odino maong ya mangombinse ya singa si Pablo. (Gawa 18:24; 26:28) Say labay nen Jehova et pansagpotan tayon iter so sankaabigan ya komento tayo​—samay nayarian tayo. Isipen imay balon bii ya angipelag na duaran angkelag ya sinsilyo. Sikatoy papablien nen Jehova lapud inter toy amin ya nayarian to.​—Luc. 21:1-4. w19.01 8-9 ¶3-5

Bilang papatumbok na Kristo, amta tayo ya busolen itayo na totoo. Impasakbay nen Jesus ya makaeksperiensya na graben panamasegsegang iray disipulo to legan na kaunoran iran agew. (Mat. 24:9; Juan 15:20) Impropesiya nen Isaias ya ag-itayo labat busolen na saray kalaban, noagta mangusar met ira na nanduruman armas sumpad sikatayo. Kaiba ed saratan ya armas so panagpalikdo, katilaan, tan brutal ya panamasegsegang. (Mat. 5:11) Ag-amperen nen Jehova iray kalaban ed pangusar dad saratan ya armas pian milaban ed sikatayo. (Efe. 6:12; Apo. 12:17) Balet agtayo nepeg ya ontakot. Imbaga nen Jehova ya “antokaman ya armas” ya usaren sumpad sikatayo et “ag-ontalona.” (Isa. 54:17) No panon ya protektaan itayo na padir ed maksil a bagyo, protektaan itayo met nen Jehova ed “sanok na saray maruksan manuley.” (Isa. 25:4, 5) Anggapon balot so nagawaan na kalaban ya pansengegan na permanentin kaderal tayo. (Isa. 65:17) Amin ya kalaban na totoo na Dios et “naandi tan naderal.”​—Isa. 41:11, 12. w19.01 6-7 ¶13-16

Papablien nen Jehova so kawayangan, tan inyan tod puso yo ran kabataan so panamabli ed satan. Balet, labay to met ya makabat mon usaren so kawayangan mo ta proteksion itan ed sika. Nayarin wala ray kabat mon manbabantay na pornograpiya odino manggagaway seksual ya imoralidad, mibibiang ed delikado iran isport, odino mandrudruga tan alabas so panag-inum day alak. Nayarin diad unaan et mani-enjoy ira. Balet mabetbet ya baleg so kasalat na satan. Nayarin mansakit ira, naadik ira, odino ompatey ni ra ingen. (Gal. 6:7, 8) Iisipen da ya walay kawayangan da, balet diad tua et anggapo. (Tito 3:3) Balet, wala ta lay kabat mo ya nansakit lapud panguunor to ed saray estandarte na Biblia? Malinew ya say pangunor ed si Jehova et maabig ed laman tayo tan mangiter na tuan kawayangan. (Sal. 19:7-11) Sakey ni, no makabat mon usaren so kawayangan mo, ya ibasem ed saray ayadyarin ganggan na Dios tan prinsipyo, ipapanengneng mo ed Dios, pati ed atateng mo, ya mas napanmatalkan ka. Tan nayarin mas ikdan ka na atateng mo na kawayangan.​—Roma 8:21. w18.12 22-23 ¶16-17

Lapud impankasalanan nen Adan, wala ray agawan pananguman. Say sakey et say ipapatey, ya akaapekto ed panangasawa. Nanengneng tayo itan ed samay sulat nen apostol Pablo nen impaliwawa to ya agla sakop na Mosaikon Ganggan iray Kristiano. Impaamta to ya panampoten na ipapatey so relasyon na sanasawa tan nayarin mangasawa o miasawa lamet imay mabilay nin asawa. (Roma 7:1-3) Diad Ganggan ya inter na Dios ed nasyon na Israel et wadtan iray detalye nipaakar ed panangasawa. Inabuloyan na satan so poligamya odino pangasawa na anggan pigara, a nagagawa la antis nin inter na Dios ed Israel so Ganggan. Balet, wala ray totontonen nipaakar ed poligamya, ya mangisesebel ed panangabuso. Singa bilang, no say sakey ya Israelita et angasawa na aripen insan mangasawa na sananey, agto nepeg a bawasan so iiter ton kakanen, kawesen, tan say kanepegan na samay inmunan asawa to. Ingganggan na Dios ya protektaan tan asikasoen na asawan laki so inmunan asawa to. (Exo. 21:9, 10) Ag-itayo la sakop na Ganggan, balet nanengneng tayo nin siansia ed satan so panamabli nen Jehova ed panangasawa. Agta makatulong itan pian pagalangan moy panangasawa? w18.12 10 ¶3; 11 ¶5-6

Kayarin inmatalek nen Habacuc ed si Jehova iray kapagaan to, nayarin inisip to no anto kasi reaksion nen Jehova. Lapud mapangasi tan makatalos ya Ama si Jehova, agto nampasnokan si Habacuc ed saray imbalikas to. Natatalosan na Dios ya nibaga to labat iraman lapud sikatoy nanairapan tan naeermenan lan maong. Kanian imbaga nen Jehova ed si Habacuc no antoy magano to lan gawaen ed saray agmatoor ya Judio. Posiblin si Habacuc so inmunan angipaamtaan nen Jehova ya asingsingger to lan panampoten iman ya mauges a panaon. Impanengneng nen Jehova ed si Habacuc ya Sikatoy akaparaan ya onkiwas. Asingsingger lan nadusa iman ya maruksa tan mauges ya henerasyon. Diad samay imbaga nen Jehova ya “diad saray agew yo,” impanengneng ton say pangukom to et seguradon nagawa legay pambibilay na propeta odino na saray kakontemporaryo to. Ag-inilaloan nen Habacuc so ebat nen Jehova. Kasin satan so ebat ed pampapaga to? Seguradon say kabaliksan na imbaga nen Jehova et mas onloor so paniirap ed interon Juda. w18.11 15 ¶7-8

Antoy pakanengneng mo ed saray totoo ya agda ni akabatan so katuaan? Anggaman say inanap nen apostol Pablo ya pulongan diad saray sinagoga et saray Judio ya wala lay amta da nipaakar ed Dios, aliwan sikara labat so pinulongan to. Singa bilang, diad unonan impanbiahe nen Pablo bilang misionero, abaloan na totoo ed Licaonia ya sikaran dua nen Bernabe et dirios ya nagmaliw a totoo​—say palson dirios da ya si Zeus tan Hermes. Kasin atukso si Pablo tan Bernabe ya panliketan so impangirayew ed sikara? Kasin inisip dan pankanawnawa da la itan pian makainawa ra ed amin ya panamasegsegang ya naeksperiensya da diad duaran syudad ya akaunan binisita ra? Kasin inisip da ya no kabkabat ira et makatulong itan pian mainomay dan nipulong so maong a balita? Andin balot! Tampol iran kinmontra tan pinilat da ray kawes da insan ira linmad pegley na totoo, tan inyeyag da: “Akin et oniay gagawaen yo? Totoo kami met a walaan na saray kakapuyan a singa sikayo.”​—Gawa 14:8-15. w18.09 4-5 ¶8-9

Pian naawat tayo so katuaan tan makapambilay tayo base ed saray estandarte na Biblia ed moral, nepeg ya akaparaan tayon umanen so panagnonot tan kondukta tayo. Imanoen iyan insulat nen Pedro nipaakar ed saratan ya pananguman: “Bilang matulok ya ananak, agkayo la manpapaimpluensya ed saray pilalek yo nensaman sanen anggapo ni kakabatan yo, noagta magmaliw kayon masanto diad amin a kagagawa yo.” (1 Ped. 1:14, 15) Saray imoral ya totoo ed syudad na Corinto et kaukolan day manggawa na baleg iran pananguman ed kabibilay da pian nasaliw da so katuaan. Ontan met natan, tinaynan na dakel so marutak iran kagagawa da pian nasaliw so katuaan. Onia ni imbilin nen Pedro ed saray Kristiano nen panaon to: “Magenap lad sikayo imay panaon a linmabas sanen ginawa yoy labalabay na saray totoo ed mundo, salanti, saray anggapoy-baing a kagagawa, agnakontrol a pilalek ed sekso, alabas a panag-inum na alak, mabanday a panliliket, paniinuman, tan makapadimlan idolatriya.”​—1 Ped. 4:3. w18.11 6 ¶13

Panon tayon naamtaan no siopa ray “walaan na dugan kipapasen na puso parad bilay ya andi-anggaan”? Singa nen inmunan siglo, naromog labat iratan ya totoo diad panamegley na pampulong. Kaukolan tayon unoren sirin so imbilin nen Jesus: “Inerman a syudad odino baryo so looban yo, anap yo no siopa ditan so makanepegan.” (Mat. 10:11) Siempre, agtayo iilaloan ya ondengel ed maong a balita iray totoon ag-interesado, mapaatagey, odino agmanisia ed Dios. Say anapen tayo et saramay totoon matua, mapaabeba, tan narasan ed katuaan. Nikompara tayo iya ed samay nayarin ginawa nen Jesus bilang karpentero ya nananap na dugarugan tabla pian manggaway yurongan o lamisaan, kapot, pako, o arum ni. No akalmo la na dugarugan tabla, alaen to la ray gamit to, usaren toy dunong to, tan gapoan to lay mankimey. Ontan met so nepeg tayon gawaen legan tayon panseseetan ya ibangat iray matua tan mapaabeban totoo pian magmaliw iran disipulo.​—Mat. 28:19, 20. w18.10 12 ¶3-4

Angipanengneng na maabig ya alimbawa so ebanghelisador ya si Felipe no panon so pansiansian akapokus ed ministeryo anggano wala ray nagawan pananguman ed bilay. Diad Jerusalem, walay agawan graben panamasegsegang ya lapud satan et pinatey si Esteban. Diad saman a panaon, panliliketan nen Felipe so balon asainmin to. (Gawa 6:1-6) Balet sanen nitaytayak iray papatumbok nen Kristo, agnasarag nen Felipe so manpareen labat tan anggapoy gawaen to. Sikatoy linman nampulong ed syudad na Samaria, ya maslak a totoo diad saman a panaon et agni akarengel na maong a balita. (Mat. 10:5; Gawa 8:1) Mabulos si Felipe ya onla ed inerman a pangibakian ed sikato na espiritu na Dios, kanian sikatoy inusar nen Jehova pian pulongan iray teritoryan agni akimeyan. Seguradon aliketan iray Samaritano lapud anggapoy panangidumaduma tod sikara, ta nensaman et memelmelagen ira na saray Judio. Agla pankelawan ya saray totoo et “nankakasakey” ya dinmengel ed sikato! (Gawa 8:6-8) Nansiansian akapokus si Felipe ed ministeryo to, kanian sikato tan say pamilya to et benendisyonan a maong nen Jehova.​—Gawa 21:8, 9. w18.10 30 ¶14-16

Aminsan, nen walad rehyon na Decapolis si Jesus, “inyakar dad sikato so sakey a lakin telek tan walay deperensya tod panagsalita.” (Mar. 7:31-35) Imbes ya paabigen nen Jesus diad arap na totoo, “sikatoy inyarawi” to insan to pinaabig. Akin? Nayarin agkomportable imay laki ed dakel a totoo lapud kapansanan to. Nayarin alikas iya nen Jesus kanian sikatoy pinaabig to ya arawi ed saray totoo. Siempre, agtayo sarag so manggaway milagro. Balet, sarag tan nepeg tayon nonoten so pankaukolan tan liknaan na saray agagi. Atalosan nen Jesus so liknaan na samay lakin telek tan impanengneng toy konsiderasyon sanen pinaabig to. Ontan met, ipanengneng tayo so konsiderasyon ed saray maedad tan makapuy la. Say Kristianon kongregasyon et kabkabat, aliwan diad karakel na nagagawaan da, noagta diad aro dad sakey tan sakey. (Juan 13:34, 35) Satan ya aro so mamapakiwas ed sikatayon ontulong ed saray maedad la tan ed saray walaay kapansanan pian makaatendi ira ed saray Kristianon pantitipon tan pian makapanpulong ira, anggano limitado lay nagawaan da.​—Mat. 13:23. w18.09 29-30 ¶7-8

Kada sakey ya karnero nen Jehova et talagan mabmabli ed sikato tan ed si Jesus, ya angitarya na dondon bagat. (Gal. 2:20) Inar-aro tayo ray agagi. Tan labay tayo ran asikasoen diad makonsidera tan maaron paraan. Pian magmaliw tayon makaparepresko, “seetan tayon gawaen iray bengatlan mamapawala na kareenan tan saray bengatlan makapabiskeg ed sakey tan sakey.” (Roma 14:19) Talagan tatalaranan tayo la so isabi na panaon, diad Paraiso, ya no iner et anggapo lan balot so nadismaya! Anggapo lay sakit, guerra, ipapatey, panamasegsegang, pambubusolan ed pamilya, tan pakadismayaan. Kayari na Sanlibon Taon ya Uley na Kristo, magmaliw lan perpekto so amin ya totoo. Saramay nalampasan day unor ya subok et tagibien nen Jehova ya Dios bilang ananak to diad dalin tan nawalaan iray “maglorian kawayangan bilang ananak na Dios.” (Roma 8:21) Komon ta itultuloy tayon amin ya ipatnag so aro ya makapabiskeg tan tulongan tayoy sakey tan sakey ya naawat so makapaliket tan mabmablin tumang. w18.09 14 ¶10; 16 ¶18

Say panaral ed Salita na Dios et aliwan basta labat pambasa tan panggulis na saray ebat ed tepet. No manaaral tayo, tatalosan tayo no antoy ibabaga na aaralen tayo nipaakar ed si Jehova, saray paraan to, tan panagnonot to. Tatalosan tayo no akin ya igaganggan odino isesebel nen Jehova so sakey ya bengatla. Iisipen tayo met no anto ran pananguman so kaukolan tayon gawaen ed bilay tayo tan ed panagnonot tayo. Anggaman amin iratan et agtayo met kaukolan ya ikonsidera ed kada panaral tayo, nagunggonaan tayo no ipanaon tayo so mandalepdep​—nayarin usaren tayo so kapaldua na panaon ed kada panaral tayo—​pian mas naapresya tayoy babasaen tayo. (1 Tim. 4:15) No regular tayon dadalepdepen so Salita na Dios, ‘napaneknekan tayod sarili tayo’ ya say kanonotan nen Jehova ed saray bengatla et perpekto. Natatalosan tayo la iray bengatla base ed panmoria to tan panisiaan tayo iratan. ‘Anguman’ la so panagnonot tayo, tan wala lay balon paraan na panagnonot tayo. (Roma 12:2) Kalkalna lan magmaliw ya kabiangan na bilay tayo so kanonotan nen Jehova. w18.11 24 ¶5-6

Nen inmunan siglo C.E., tinukoy nen Pablo so sarili to tan saray maapit ya kaiba to bilang ‘kakimeyan na Dios’ lapud responsabilidad da ya mantanem tan mansalog ed bini na katuaan na Panarian. (1 Cor. 3:6) Natan, sarag tayo met so magmaliw ya ‘kakimeyan na Dios’ no mabulos tayon usaren so panaon, kaykayarian, tan biskeg tayo ed panagpulong a kimey ya ingganggan na Dios. Talagan baleg iyan pribilehyo! Seguradon magmaliw tayon maliket no mabulos tayon iter so panaon tan biskeg tayo diad panagpulong tan panaggaway babangatan. Dakel ed saray awalaan na maaligwas ya panangiyaral na Biblia so makapangibagan tua itan. Talagan maliket tayo no nanengneng tayon naliliketan iray iyaaralan tayo lapud natatalosan day aaralen da, ombibiskeg so pananisia da, manggagawa ray pananguman, tan inanabang da met lad arum so katuaan. Si Jesus et aliketan met ya maong nen say imbaki ton 70 ya manpulong et “malikeliket a pinmawil” lapud saray balibalin naeksperiensya ra.​—Luc. 10:17-21. w18.08 20 ¶11-12

No masyado tayo lan manmamatalek ed sarili tayon pakatalos, magmaliw itan ya patit ed sikatayo. Ompan isipen tayon sarasarag tayon amtaen tan talosan so sakey ya situasyon anggano agtayo amta so amin ya detalye. Ontan met, say sakey a rason a mairap ya amtaen so tua et no walay agi ya agtayo napibagayan so ugali to. No naynay tayon sankanonot iray agpantatalosan, ompan pansuspetsaan tayo la so motibo na agi tayo. Kanian no walay narengel tayon negatibo nipaakar ed sayan agi ed kongregasyon, ompan panisiaan tayon tampol. Antoy leksion? No manem-em tayoy sakit na linawa ed agagi tayo, nayarin mainomay tayo ran husgaan ya aliwan base ed no antoy tua. (1 Tim. 6:4, 5) Napaliisan tayo so basta panhusga no agtayo abuloyan ya mansiansia so ibeg tan imon ed puso tayo. Imbes ya manpadaeg ed ontan iran negatibon liknaan, komon ta awaten tayoy obligasyon tayon aroen iray agagi tan mabulos tayo ran perdonaen manlapud puso.​—Col. 3:12-14. w18.08 6 ¶15; 7 ¶18

Lapud si Jehova so amalsa ed too, amin tayo sirin et kayarian to. (Sal. 100:3; Apo. 4:11) Balet manlapu la nensaman, wala ray espisipikon grupo na totoo ya pinili na Dios pian magmaliw ya espisyal a kayarian to. Singa bilang, tinukoy na Salmo 135 iray matoor ya mandadayew ed si Jehova nensaman diad Israel bilang “espisyal a kayarian to.” (Sal. 135:4) Ontan met, impasakbay ed libro na Oseas ya wala ray aliwan Israelita ya magmaliw a totoo nen Jehova. (Os. 2:23) Asumpal so propesiya nen Oseas sanen wala ray pinili nen Jehova ya aliwan Judio a nakaiba nen Kristo ya manuley diad arapen. (Gawa 10:45; Roma 9:23-26) Sayan “masanton nasyon” et “nikabkabiig a kayarian” nen Jehova diad makapadinayew a paraan, saray membro na satan et nilanaan na masanton espiritu tan pinili pian manbilay diad tawen. (1 Ped. 2:9, 10) Panon to balet iray dakel ya matoor a Kristiano natan ya walaan na ilalon manbilay diad dalin? Tinawag met ira nen Jehova ya ‘totoo’ to tan ‘saray pinili’ to.​—Isa. 65:22. w18.07 22 ¶1-2

Aaligen na saray tuan Kristiano si Kristo, ya angipanengneng na perpekton alimbawa no panon so pagmaliw ya maiter. (Mat. 20:28) Maabig no itepet tayod sarili tayo, ‘Sarag ko kasin aligen ya mas maapit so alimbawa nen Jesus?’ (1 Ped. 2:21) Niwalad sikatayo so pabor nen Jehova no aligen tayoy perpekton alimbawa to tan nen Kristo, no nonoten tayoy pankaabigan na arum, tan no manggawa tayoy paraan pian natulongan tayo rad saray pankaukolan da. Diad samay parabolo nipaakar ed maong a Samaritano, malinew ya iilaloan nen Jesus ya gawaen na saray patumbok to so anggaay nayarian da pian natulongan so arum, anggan ed saramay duma so kipapasen da. (Luc. 10:29-37) Nanonotan mo ni may tepet ya amakiwas ed si Jesus ya isalaysay so parabolo nipaakar ed maong a Samaritano? Intepet na samay Judio ed sikato: “Siopa tay kaparak a too a nepeg kon aroen?” Nanengneng ed ebat nen Jesus ya singa samay Samaritano, nepeg ya mabulos tayon mangiter no labay tayon niwala ed sikatayo so pabor na Dios. w18.08 19 ¶5-6

Kasin tuloytuloy ya binidbir nen Jehova so matoor ya impangasikaso tan impamabaleg nen Maria ed Anak To? On. Impaisulat na Dios ed Biblia iray ginawa tan imbaga to. Mapatnag ya ag-akaiba nen Maria si Jesus diad talora tan kapalduan taon ya ministeryo to. Nayarin lapud balo lay Maria kanian kaukolan toy mansiansia ed Nazaret. Balet anggano dakel ya balibalin pribilehyo so agto naeksperiensya, akaiba toy Jesus diad mismon agew na impatey to. (Juan 19:26) Balet ag-abayag, walad Jerusalem si Maria kaiba iray disipulo legan ya manasingger so Pentecostes sanen nikalbo so masanton espiritu. (Gawa 1:13, 14) Baleg so posibilidad ya sikatoy nilanaan kaibay arum ya wadman. No ontan sirin, sikatoy naikdan na pribilehyon nakaiba si Jesus ed tawen diad andi-anggaan. Talagan balibalin tumang itan ed matoor ya impanlingkor to! w18.07 9 ¶11; 10 ¶14

Legan na ministeryo nen Jesus, imbangat to iray manunan katuaan pian natalosan na saray disipulo to no anto ray pansumpalan na ipapatnag dan ugali odino ikikiwas da. Singa bilang, imbangat to ya say panem-em na sakit na linawa et nayarin manresulta ed karawalan tan say agmanepeg ya pilalek et nayarin manresulta ed pikakalugoran. (Mat. 5:21, 22, 27, 28) Pian nawalaan itayo na konsiensia ya duga so inkipasal to, nepeg tayon abuloyan iray prinsipyo na Dios ya mangigiya ed sikatayo, diad ontan et nigloria so Dios. Wala ray situasyon ya nayarin mandumaan so panmoria na duaran Kristiano ya parehon nipasal ed Biblia so konsiensia ra. Singa say nipaakar ed panag-inum na alak. Ag-isesebel na Biblia so kabkaabigan ya iyinum na alak. Balet kokondenaen na satan so alabas ya panag-inum na alak tan say panagbuanges. (Pro. 20:1; 1 Tim. 3:8) Labay to kasin ibaga et anggapo lay arum ya ikonsidera na sakey a Kristiano basta kabkaabigan labat so iinumen to? Andi. Anggano nayarin agmet nakokonsiensia so sakey a Kristiano, kaukolan to met ya ikonsidera so konsiensia na arum. w18.06 18 ¶10-11

Mapuersan pinasakbayan nen Jesus iray disipulo to ya arawian da iray ibabangat, odino lebadura, na saray Fariseo, Saduceo, tan saray kapartido na Herodes. (Mat. 16:6, 12) Makapainteres ta agawa iyan tongtongan ag-abayag kayari na samay inkagawa nen labay na totoo ya gawaen ya ari si Jesus. No mibabali so relihyon ed politika, main-inomay ya onlesa so karawalan. Imbangat nen Jesus iray disipulo to ya nepeg iran mansiansian neutral diad onia ran pamaakaran. Mitukoyan itan ed samay rason no akin ya si Jesus et labay a pateyen na saray manunan saserdote tan Fariseo. Sikatoy ipapasen dan kalaban ed politika tan relihyon ya nayarin pansengegan na pakaekal da ed posisyon da. Oniay imbaga ra: “No paulyanan tayo labat ed gagawaen to, manisia la ran amin ed sikato, tan onsabi iray Romano tan ekalen dad sikatayo so pasen tayo tan say nasyon tayo.” (Juan 11:48) Kanian indaulo na Atagey a Saserdoten si Caifas so planon pamatey ed si Jesus.​—Juan 11:49-53; 18:14. w18.06 6-7 ¶12-13

Say sakey ya epektibon patit ya uusaren nen Satanas et say pagmaliw ya mausisa nipaakar ed okultismo. Natan et ipapaseseg toy pakawalaan na interes ed saray demonyo, aliwa labat ya diad panamegley na palson relihyon noagta diad panamegley met na saray panagligliwaan. Ipapanengneng ed saray pelikula, video games, pati diad media ya singa makapaliket so espiritismo. Antoy gawaen tayo pian agtayo napatitan? Agtayo nepeg ya ilaloan ya say organisasyon na Dios et mangiter na listaan no anto ray manepeg tan agmanepeg ya panagligliwaan. Kaukolan ya kada sakey ed sikatayo et ipasal toy sarili ton konsiensia ya mitunosan ed saray estandarte na Dios. (Heb. 5:14) Balet, magmaliw itayon marunong ed pampili no iyaplika tayo so pinuyanan a simbawa nen apostol Pablo ya nabasa ed teksto ed sayan agew. Nayari tayon tepetay sarili tayo: ‘Kasin say pipilien kon panagligliwaan et gagawaen to ak ya mansimpisimpitan? No nanengneng na saray iyaaralan ko na Biblia odino saray papawilen ko so pipilien kon panagligliwaan, kasin isipen da ya gagawaen ko no antoy ipupulong ko?’ No diman tayo mas gagawaen no antoy ibabaga tayo, ag-itayo bastabasta napatitan nen Satanas.​—1 Juan 3:18. w18.05 25 ¶13

Panon tayon naalig si Pablo? Unona, gawaen tayoy anggaay nayarian tayon pansiansiaen so pirawat na puso tayo ya anapen iramay “walaan na dugan kipapasen na puso parad bilay ya andi-anggaan.” Komadua, ipikasi tayod si Jehova ya nalukasan komon so puso na saray matuan totoo. (Gawa 13:48; 16:14) Oniay imbaga nen Silvana ya payunir ed ngalngali 30 taon, “Antis ak ya onlad sakey ya abung diad teritorya mi, manpipikasi ak nid si Jehova, kekerewen kon magmaliw ak komon ya positibo.” Ipipikasi tayo met ed Dios ya komon et igiya itayo na saray anghel ed saray matuan impanpuso ya totoo. (Mat. 10:11-13; Apo. 14:6) Imanoen tayo pay imbaga nen Robert ya payunir ed masulok lan 30 taon, “Say pankimey a kaiba na saray anghel ya makaamta ed no antoy nagagawa ed bilay na saray unabung et makapalikliket.” Komatlo, say nenengnengen tayo et say potensyal na too ya manggawa na maong. Oniay imbaga nen Carl, sakey ya elder, “Nenengnengen koy anggan melag a pakapatnagan ya interesado so sakey a too, nayarin diad imis to, mauyamon itsura, odino ed balibalin tepet to.” On, singa si Pablo, makapansungdo tan makapawala itayo na bunga. w18.05 15 ¶13; 16 ¶15

No nababalitaan tayon manmamatoor iramay tinulongan tayo nensaman, talagan napaseseg tayo. Ontan so alikna nen apostol Juan, insulat to: “Anggapo lay mas panliliketan ko nen say saya: a narengel kon manaakar ed katuaan iray ananak ko.” (3 Juan 4) Dakel ya payunir so napapaseseg no nababalitaan dan saramay tinulongan da nensaman et mansiasiansian matoor, tan ompan arum ni ingen ed sikara et payunir la. No ipanonot tayod nadidismayan payunir iray balibalin agawaan to, talagan sikatoy napaseseg. Dakel ya manangasikaso na sirkito so angibaga ya apaseseg ira tan say asawa ra nen akaawat ira na anggan antikey ya sulat na pisasalamat lapud imbisita ra ed sakey ya kongregasyon. Ontan met so nalilikna na saray elder, misionero, payunir, tan Bethelite no aapresyaen na arum so matoor ya panlilingkor da. w18.04 23 ¶14-15

Ag-itan inunor nen Solomon, diad saginonor et sikatoy angasawa na 700 a bibii. Tan awalaan ni na 300 ya onkokomaduan asawa. (1 Ara. 11:3) Dakel ed saray asawa to et aliwan Israelita, ya mandadayew ed palson dirios. Kanian agto met tinulok so ganggan na Dios ya agmangasawa na aliwan Israelita. (Deu. 7:3, 4) Say kalkalnan ag-impangunor nen Solomon ed saray kakaukolanen nen Jehova so angitonton ed sikaton manggawa na graben kasalanan. Angipaalagey si Solomon na altar parad diosan si Astoret tan sakey nin altar parad palson dios ya si Kemos. Ditan et sikatoy akibiang ed paganon panagdayew kaiba iray asawa to. Diad amin ya pasen a nayarin pangipaalageyan tod saratan, say apilipili to ni et diad palandey ya walad arap na Jerusalem, say mismon angipaalageyan to na templo nen Jehova! (1 Ara. 11:5-8; 2 Ara. 23:13) Nayarin pinalikdo nen Solomon so sarili to nen inisip ton ibaliwala nen Jehova so agto intulok basta mantultuloy a mangiyapay ed templo. Balet agbalot ibabaliwala nen Jehova so panggawa na kasalanan. w18.07 18-19 ¶7-9

Say arum ed saray “mandarlang a pana” ya nayarin ikena nen Satanas ed sika et saray tila nipaakar ed si Jehova​—ya anggapo kunoy panangiyansakit tod sika tan anggapoy mangaaro ed sika. Si Ida ya mantaon na 19 et nilabanan toy nalilikna ton singa anggapoy kana to. Imbaga to, “Naynay kon nalilikna ya singa aliwan maapit ed siak si Jehova tan agto ak labay ya magmaliw ya kaaro to.” Panon ton asarag itan ya liknaan? “Baleg a tulong ed siak so pipiaral pian ombiskeg so pananisiak,” so imbaga nen Ida. “Dati et akayurong ak labat tan agmankomenton balot, iisipen kon anggapo met lanlamang so malabay ya ondengel ed ibagak. Balet natan, manpaparaan ak lad saray aral tan sasalien koy onebat na mamidua odino mamitlo.” Napatnagan ed eksperiensya nen Ida so sakey ya importantin katuaan: Say literal ya samper na sakey a sundalo et walay eksakton sukat na kabaleg to, balet say sukat na samper na pananisia tayo et nayarin onmelag odino ombaleg. Akadepende itan ed sikatayo. (Mat. 14:31; 2 Tes. 1:3) Talagan importante ya pabiskegen tayo so pananisia tayo! w18.05 29-30 ¶12-14

Anguman imay guardia tan kinmerew labat na tulong kayari na yegyeg. (Gawa 16:25-34) Mipadpara, wala ray totoo natan ya dati et agda labay ya dengelen so mensahe na Biblia, balet nayarin manguman ira tan onkerew na tulong no biglan walay nagawa ed sikara ya agda iilaloan. Nayarin agda ilaloan ya naekal irad abayag lan trabaho da kanian abigbigla ira. Ompan say arum et nayarin naandian lay ilalo lapud graben sakit, odino maer-ermen lapud impatey na inad-aro da. Nayarin nitepet da no antoy gagala na bilay ya dati et agda met nononoten. Ompan nitepet da ni ingen, ‘Antoy gawaen ko pian niliktar ak?’ No nakatongtong tayo ra, ompan labay da lan dengelen so mensahe na ilalo diad unonan pankanawnawa. Kanian diad matoor tan tuloytuloy tayon pampupulong, seseguroen tayon akaparaan tayon mangiter na ligliwa ed saray totoo diad panaon ya nayarin akaparaan la ran mangawat ed satan.​—Isa. 61:1. w18.05 19-20 ¶10-12

Diad panaon tayo, maslak a totoo et siansia nin binulag na dios na sayan sistema na mundo tan aripen ira na palson relihyon, materyal ya bengatla, tan politika. (2 Cor. 4:4) Pribilehyo tayon aligen so ehemplo nen Jesus ya tulongan iray totoo ya nakabatan tan dayewen da si Jehova, say Dios na kawayangan. (Mat. 28:19, 20) Aliwan mainomay itan a gawaen tan dakel so subok. Diad arum a bansa, saray totoo et anggapoy interes da ed katuaan, say arum ni ingen et kabusol da tayo. Kanian oniay nepeg tayon itepet ed sarili tayo, ‘Kasin uusaren koy kawayangan ko pian mas nasuportaan koy kimey na Panarian?’ Talagan makapaseseg a nanengneng ya natatalosan na dakel ya asingsingger lay anggaan na sayan sistema, kanian pinasimpli day bilay da pian makaloob irad full-time a ministeryo. (1 Cor. 9:19, 23) Arum ed sikara et manlilingkor ed mismon lugar da; say arum balet et diad lugar ya mas baleg so pankaukolan. Talagan makapadinayew itan a resulta na marunong ya panguusar ed kawayangan a manlingkor ed si Jehova!​—Sal. 110:3. w18.04 11-12 ¶13-14