Setyembre

Impatnag nen Jesus so pililikna ed si Marta tan Maria. “Akaakis si Jesus” nen anengneng to ya maneermen ira lapud impatey na agi ran si Lazaro. (Juan 11:32-35) Sikatoy akaakis aliwan lapud agto la nakaiba so maapit a kaaro to. Amta to ya paolien to lanlamang si Lazaro. Akaakis si Jesus lapud natatalosan to tan nalilikna to so paneermen na sarayan papablien ton kakaaro. Makapaseseg a naamtaan ya walay pililikna nen Jesus. Sikatoy inaro tayo lapud mapangasin impantrato to ed saray totoo. Napapaseseg tayo ta amta tayon sikatoy manuuley la bilang Ari ed Panarian na Dios. Magano to lan ekalen so amin a paniirap. Lapud asali toy nagmaliw a too, amta to no panon ya tulongan iray totoo pian agda la nalikna so sakit tan irap ya resulta na uley nen Satanas. Talagan maliket tayo ta walaan tayo na Manuley ya “makapilikna ed saray kakapuyan tayo.”​—Heb. 2:17, 18; 4:15, 16. w19.03 17 ¶12-13

Walay nitulong tayo pian naaralan na arum so nipaakar ed Dios, balet aliwan sikatayo so walaan na sankaimportantian ya betang. (1 Cor. 3:6, 7) Si Jehova so mangiyaasingger ed totoo. Balet, akadepende nin siansia ed kipapasen na puso na kada too no kasin awaten to odino andi so maong a balita. (Mat. 13:4-8) Tandaan ya maslak ed saray totoo et agda inawat so mensahe nen Jesus anggano sikato lay sankamaongan ya Managbangat a nambilay diad dalin! Kanian agtayo nepeg ya nadismaya no dakel ed saray labay tayon tulongan et ag-ira ondengel ed mensahe tayo. Maabig so resulta no ipatnag tayoy pililikna diad ministeryo. Mas panliketan tayoy manpulong. Mas nalikna tayoy liket ya manlalapud panangiter. Tan mas mainomay ya awaten na saramay “walaan na dugan kipapasen na puso parad bilay ya andi-anggaan” so maong a balita. (Gawa 13:48) Kanian “legan a walay pankanawnawa tayo, manggawa itayo na maabig ed amin.” (Gal. 6:10) Diad ontan et maliket tayo lapud niglogloria tayo so Ama tayo ed tawen.​—Mat. 5:16. w19.03 25 ¶18-19

Insulat nen Arin David: “Si Jehova et agnaparaan tan sankamakanepegan na dayew.” (Sal. 145:3) Inaro toy Jehova, tan satan ya panangaro so amakiwas ed sikaton idayew so Dios “diad pegley na kongregasyon.” (1 Awa. 29:10-13; Sal. 40:5) Natan, say sakey a paraan pian nidayew tayoy Jehova et diad panamegley na pankomento ed saray aral. Labalabay tayon amin so makarengel na nanduruman klase na komento diad saray aral tayo. Naliliketan tayo ed simpli balet impapuson komento na melag ya ugaw. Napapaseseg tayo ed komento na sakey ya malikeliket ton inanabang so balon katuaan ya naaralan to. Tan pandinayewan tayo iramay ‘manpapakpel’ ya mankomento anggano mabaing ira odino aaralen da ni labat so lenguahe tayo. (1 Tes. 2:2) Panon tayon nipanengneng ya aapresyaen tayoy pansasagpot da? Sarag tayo ran pisalamatan lapud makapaseseg ya komento ra kayari na aral. Say sakey nin paraan et diad pankomento tayon mismo. Diad ontan, aliwan sikatayo labat so napapaseseg ed saray aral tayo, noagta napapaseseg tayo met so arum.​—Roma 1:11, 12. w19.01 8 ¶1-2; 9 ¶6

Pakaskasi so samploran lalaki. Akating ira, tan singa anggapo lay ilalo ran onabig. Balet sakey ya agew, manlapud arawi et anengneng day Jesus, say Sankamaongan ya Managbangat. Abalitaan da ya pinaabig nen Jesus so amin a klase na sakit. Kanian inyeyag da: “Jesus a Managbangat, kasian mo kami!” Amin da et pinaabig nen Jesus. Seguradon misalsalamat irayan samploran lalaki ed kaabigan to. Walay sakey balet ed sikara ya agto labat alikna so pisasalamat​—imbalikas toy apresasyon to ed si Jesus. Satan ya apaabig ya laki, sakey a Samaritano, et apakiwas ya igloria so Dios “ed maksil a boses.” (Luc. 17:12-19) Singa samay Samaritano, labay tayon ibalikas so pisasalamat tayo ed saray nanggaway kaabigan ed sikatayo. Si Jehova so alimbawa tayo ed panangipanengneng na apresasyon. Say sakey a paraan ya gagawaen to itan et tutumangan to iramay makapaliket ed sikato. (2 Sam. 22:21; Sal. 13:6; Mat. 10:40, 41) Tan papasesegen itayo na Kasulatan ya ‘aligen tayoy Dios, bilang inad-aro ton ananak.’ (Efe. 5:1) Kanian say manunan rason no akin ya kaukolan tayon ibalikas so apresasyon tayo et labay tayon aligen so alimbawa nen Jehova. w19.02 14 ¶1-2; 15 ¶4

Walad eskuelaan so sakey ya ugaw a bii tan marespeto ton imbaga ya agto labay so mibiang ed panselebra na holiday ya agmakapaliket ed Dios. Manpupulong ed kaabungan so sakey ya mabaing ya lakin kabataan tan tinmoktok ed puerta na abung na kaklase to ya mamabalaw ed saray Tasi nen Jehova. Makulin mantratrabaho so sakey ya laki pian nalegpet toy pamilya to balet ingganggan na amo to ya mansaol odino manggaway ilegal. Anggano amta to ya nayarin naekal ed trabaho, impaliwawa to ya kaukolan toy magmaliw ya matua tan unoren toy ganggan na gobierno lapud satan so labay na Dios ya gawaen na saray lingkor to. (Roma 13:1-4; Heb. 13:18) Anton kualidad so naimanom ed sarayan taloran Tasi? Ompan pigara so naimanom, singa say pakpel tan inkamatua. Balet walay sakey ya importantin kualidad ya impanengneng dan amin​—say integridad. Impanengneng na kada sakey so katooran to ed si Jehova. Kada sakey et agto inkompromiso iray estandarte na Dios. Say integridad so amakiwas ed sikaran talo ya gawaen itan. Seguradon malikeliket si Jehova lapud impatnag na kada sakey ed sikara so integridad. Labay tayo met ya napaliket so Ama tayod tawen. w19.02 2 ¶1-2

Espisipikon prinotektaan na Ganggan iramay agda naprotektaan so sarili da, singa saray ulila, balon bibii, tan saray dayo. Oniay ingganggan ed saray ukom ed Israel: “Agmo pipikeweten so hustisya parad dayo odino ugaw ya ulilad ama, tan agmo aalaen so kawes na sakey a balon bii bilang garantiya ed utang.” (Deu. 24:17) Iyaansakit tan aasikasoen nen Jehova iray totoo ed komunidad ya agda sarag ya idepensay sarili da. Tan dinusa to so siopaman ya amairap ed sikara. (Exo. 22:22-24) Labay nen Jehova ya saramay inikdan toy responsabilidad et aroen tan iyansakit da so amin ya walad panangasikaso ra. Kabusol to iray krimen ed sekso tan labay ton naseguro ya naprotektaan tan makaawat na hustisya so amin, lalo la iramay agda sarag ya idepensay sarili da. (Lev. 18:6-30) No kombinsido tayo ya ipapatnag nen Jehova so hustisya diad pidedeneng to ed sikatayo, ombiskeg so panangaro tayo ed sikato. Tan no inaro tayo so Dios tan saray matunong ya estandarte to, napakiwas itayon aroen so arum tan ipatnag so hustisya diad panagtrato tayo ed sikara. w19.02 24-25 ¶22-26

Imanoen so sakey ya alimbawa no panon tayon naprotektaan so sarili tayo pian ag-itayo naimpluensyaan na kanonotan nen Satanas. Imbangat itayo nen Jehova ya “say seksual ya imoralidad tan amin a klase na karutakan [et nepeg ya] ag-anggan nabitla ed limog [tayo].” (Efe. 5:3) Balet antoy gawaen tayo no paniistoryaan na saray katrabaho o kaeskuela tayo iray imoral a bengatla? Nayarin pasakbayan itayo na managbantay, say konsiensia tayo. (Roma 2:15) Balet kasin dengelen tayo itan? Imbes ya dengelen itan, ompan natukso tayo ya saray katrabaho o kaeskuela tayo so dengelen tayo, odino natukso tayon onnengneng ed saray litraton nenengnengen da. Balet panaon itan ya nepeg tayon isara so puerta na syudad, a singa panangibaga. Umanen tayo lay tongtongan odino onalis tayo la. Kaukolan so pakpel pian nalabanan tayoy panedesdes na arum ed sikatayo ya manisip odino manggaway aliwa. Makaseguro tayo ya nanenengneng nen Jehova so pansasagpot tayo, tan ikdan to tayoy biskeg tan karunongan ya kaukolan tayo pian ag-itayo naimpluensyaan na kanonotan nen Satanas.​—2 Awa. 16:9; Isa. 40:29; Sant. 1:5. w19.01 17-18 ¶12-13

Si Solomon ya mayamyaman tan makapanyarin too et nan-eksperimento, ya ‘sinali toy manliket pian nengnengen no antoy maabig a nagawa.’ (Ecl. 2:1-10) Sikatoy angipaalagey na saray abung, saray hardin tan parke, tan ginawa to so amin ya labay to. Antoy alikna to? Kasin sikatoy aliketan tan apenek? Agtayo la kaukolay mannonot ta imbaga lan mismo nen Solomon ed sikatayo so nabasa ed teksto tayo ed sayan agew. Talagan makaaral tayo ed satan! Aglabay nen Jehova ya nasakitan ka ni antis kan makaaral. Tua, kaukolan moy pananisia pian unoren so Dios tan iyunam ed bilay mo so linawa to. Importantin maong itan ya pananisia, tan agkan balot dismayaen na satan. On, agbalot lingwanan nen Jehova so “aro ya impanengneng [mo] parad ngaran to.” (Heb. 6:10) Kanian gawam so anggaay nayarian mo ya pabiskegen so pananisiam, tan nanengneng mon mismo ya say labay na Amam ed tawen et say sankaabigan parad sika.​—Sal. 32:8. w18.12 22 ¶14-15

Say maespiritual a too et walay pananisia tod Dios tan aaligen toy panmoria na Dios. Sikatoy manpapaigiya ed Dios tan determinadon ontulok ed Sikato. (1 Cor. 2:12, 13) Maabig ya alimbawa ed saya si David. Inkansion to: “Si Jehova so nabebetangan ko, say apag ko, tan say kopak.” (Sal. 16:5) Satan ya “nabebetangan” nen David et say maapit ya relasyon to ed Dios, ya pansasalimbengan to. (Sal. 16:1) Antoy resulta? “Malikeliket ak,” so insulat to. On, anggapo lay arum ya mas amaliket ed si David noag say maapit ya relasyon to ed Dios. (Sal. 16:9, 11) Say liket ya alikna nen David et agnalilikna na saramay akasentro so bilay da ed panliliket tan kayamanan. (1 Tim. 6:9, 10) No pabiskegen moy pananisiam ed si Jehova tan manlingkor kad sikato, magmaliw a makabaliksan so bilay mo tan mamaliket itan ed sika. Antoy gawaen mo pian ombiskeg so pananisiam? Kaukolan moy mangigana na panaon parad sikato diad pambasa na Salita to, pangobserba ed saray palsa to, tan pandalepdep ed saray kualidad to, kaiba lay panangaro tod sika.​—Roma 1:20. w18.12 25 ¶7-8

Satan ya imbaga nen Pablo et aliwan sakey ya obserbasyon. Imbes, diad satan ya teksto et bibilinen to iray Kristiano ya pagalangan day panangasawa, ya ipasen dan mabmabli itan. Ontan met kasi panmoriam ed panangasawa, lalo la no wala lay asawam? No papagalangan moy panangasawa, aaligen moy sankaabigan ya alimbawa ed satan, si Jesus. Nen sikatoy tinepetan na saray Fariseo nipaakar ed diborsyo, tinukoy to so imbaga na Dios nipaakar ed sankaunaan ya panangasawa: “Lapud saya et taynan na laki so ama tan ina to, tan sikaran dua et magmaliw a sakey a laman.” Imbaga to ni: “Say impankasakey na Dios et agnepeg a pansianen na too.” (Mar. 10:2-12; Gen. 2:24) Kanian binidbir nen Jesus ya say Dios so angigapo ed panangasawa tan indanet to ya permanente itan. Ag-imbaga na Dios ed si Adan tan Eva ya sarag day mandiborsyo. Say estandarte ed panangasawa ya inletneg na Dios ed Eden et nepeg ya sakey labat so asawa, salanti, say “duara” et impankasakey tan permanente so relasyon da. w18.12 10-11 ¶2-4

Nen naamtaan tayo so katuaan, naaralan tayo ya importante so itulok ed saray manunan kakaukolanen nen Jehova. Balet legan tayon onaaligwas ed espiritual, mas natatalosan tayoy kanonotan nen Jehova​—saray labay to, saray agto labay, tan no antoy panmoria to ed saray bengatla—​tan impluensyaan na satan iray gagawaen tan personal iran desisyon tayo. Anggaman makapaliket ya aligen so paraan na panagnonot nen Jehova, siansian aliwan mainomay itan. No maminsan, say problema et say agperpekton kanonotan tayo. Singa bilang, nayarin mairap tayon talosan so panmoria nen Jehova nipaakar ed kalinisan ed moral, materyalismo, panagpulong a kimey, lingon panangusar ed dala, odino arum nin bengatla. Antoy nagawaan tayo? Panon tayon tuloytuloy ya onaligwas pian say kanonotan na Dios et magmaliw ya kabiangan na bilay tayo? Nagawaan tayo itan no umanen tayoy panagnonot tayo diad panaral ed Salita na Dios ya say gagala tayo et pian talosan iray kanonotan to, dalepdepen iratan, tan itunos so panagnonot tayo ed kanonotan na Dios. w18.11 23-24 ¶2-4

Nambilay si Habacuc ed mair-irap ya panaon. Sikatoy naermenan ya maong lapud saray mauges tan bayolentin totoo ya akapaliber ed sikato. Kasin manampot ni so kaugsan da? Akin et mabaybayag ya onkiwas si Jehova? Puro ag-inkahustisya tan panamairap so nanenengneng nen Habacuc ya gagawaen na saray mismon kabaleyan to. Anggapoy nagawaan to. Kanian diad saman ya mair-irap ya panaon, sikatoy nampikasi ed si Jehova ya onkiwas la komon. Nayarin inisip nen Habacuc ya anggapo lay pibabali nen Jehova. Singa mabayag nin onkiwas so Dios. Kasin ontan met so naliliknam? Kasin naandi lay panagmatalek nen Habacuc ed si Jehova? Kasin nakal so pananisia to ed saray sipan na Dios? Andi! Lapud si Jehova so angimatalekan to na saray problema tan kapagaan to tan aliwan diad totoo, prueba itan ya sikatoy agnaandian na ilalo. Sikatoy napapagaan lapud agto natalosan no akin ya agni onkiwas so Dios, odino no akin ya inyabuloy nen Jehova ya sikatoy niiyan ed mairap ya situasyon. w18.11 14 ¶4-5

Nen inimbitaan nen Jesus iray managsigay ya si Pedro tan Andres a magmaliw ya “sumisigay na totoo, tinaynan dan tampol iray iket” da. (Mat. 4:18-20) Siempre, maslak ed saramay manaaral na katuaan natan et agda nayarin basta taynanan iray trabaho da. Wala ray Makasulatan ya obligasyon da. (1 Tim. 5:8) Balet, maslak ya manaaral na katuaan et nepeg dan umanen so panmoria da nipaakar ed materyal iran bengatla, anggan saray prayuridad da. Imanoen pay alimbawa nen Maria. Say golf so manuna ed bilay to, tan labay toy onyaman bilang sakey ya professional golfer. Insan ginmapon nanaral na Biblia si Maria, tan sikatoy malikeliket lapud saray pananguman ya ginawa tod bilay to diad tulong na katuaan. Atalosan nen Maria ya agto sarag a pambansagen ya anapen so espiritual tan materyal iran kayamanan. (Mat. 6:24) Agto la intuloy so abayag lan pangarap to ya magmaliw a professional golfer. Sikatoy manlilingkor la bilang payunir tan imbaga ton sikatoy walaan la natan na “sankaliketan tan makabkabaliksan ya bilay.” w18.11 5 ¶9-10

Nen mantaon la na 30 si Jesus, impireg to la iray gamit tod panagkarpentero lapud amta ton mas importante so kimey to bilang managbangat. Imbaga to ya say pangipulong na maong a balita na Panarian so sakey ya rason no akin ya sikatoy imbaki na Dios diad dalin. (Mat. 20:28; Luc. 3:23; 4:43) Si Jesus et nampokus la ed ministeryo to, tan labay ton mibiang so arum ed satan ya kimey. (Mat. 9:35-38) Tua, nayarin aliwa tayon karpentero, balet managbangat tayo na maong a balita. Importantin maong itan a kimey ta kaiba tayo so Dios; tinawag itayon ‘kakimeyan na Dios.’ (1 Cor. 3:9; 2 Cor. 6:4) Bibidbiren tayon “say mismon kabaliksan na salita [nen Jehova] et katuaan.” (Sal. 119:159, 160) Kanian labay tayon seguroen ya ‘duga so panguusar tayo ed salita na katuaan’ diad ministeryo tayo. (2 Tim. 2:15) Pian nagawaan itan, kaukolan ya tuloytuloy tayon paaligwasen so dunong tayod panangusar ed Biblia, say manunan uusaren tayo pian ibangat so katuaan nipaakar ed si Jehova, si Jesus, tan say Panarian. w18.10 11 ¶1-2

No say asawan laki et onnenengneng ed ulo to, si Jesu-Kristo, say manunan alimbawa to, tutulongan toy asawa to ya nawalaan na “aralem a respeto” ed sikato. (Efe. 5:22-25, 33) Satan ya respeto na asawan bii so mamakiwas ed sikaton magmaliw ya makonsidera ed asawa to. No ipapatnag na saray atateng so konsiderasyon ed sakey tan sakey, mangipapanengneng ira na maabig ya alimbawa ed ananak da. Siempre, manunan responsabilidad na atateng ya ibangat ed ananak da no panon so magmaliw ya makonsidera ed arum. Singa bilang, nayarin bilinen da ray ananak da ya ag-ira manbatik-batik ed Kingdom Hall. Sano walay okasyon, nayarin ibaga dad ananak da ya paunaen da ni ray maedad la ya mangala na naakan. No walay balibalin ginawa na ugaw ed sikatayo​—nayarin no nilukasan toy puerta—​maabig no komendaan tayo. No ontan so gawaen tayo, maong so epekto na satan ed ugaw, natalosan ton “mas makapaliket so mangiter nen say mangawat.” w18.09 29 ¶5-6

Napatnagan ed aktibon panangigiya nen Jesu-Kristo, say nitronon Ari tayo, ya sikatoy talagan interesado ed arapen tayo. Kanian panliketan tayo iray gunggona ya nanaawat tayo lapud saray agano nin agawan pananguman. Nayarin napaseseg ka no aralen yod family worship yo no panon kan agunggonaan ed saray pananguman ed sinimban aral odino diad ministeryo. No natatalosan tayo so gagala na saray instruksion ya manlalapud organisasyon nen Jehova tan say balibalin epekto na satan ed sikatayo, seguradon maliket tayon unoren iratan. Talagan naapresya tayo ya lapud binawasan so bilang na literaturan iyiimprinta et makakatipid tayo, tan lapud panguusar tayod saray balon teknolohiya et mas napapalaknab so kimey na Panarian diad interon mundo. Kanian mas lalon usaren no posible iray elektronikon publikasyon tan media. Diad onian paraan, nipatnag tayoy kanonotan nen Kristo ya usaren ed makabat a paraan iray pundo na organisasyon. No matoor tayon tutuloken so panangigiya nen Kristo, napapabiskeg tayoy pananisia na arum tan niwala so pankakasakey. w18.10 25-26 ¶17-19

No aaligen tayoy panamabli na Dios, nayarin sikatayo so ebat ed pikakasi na sakey ya maneermen a maong. (2 Cor. 1:3-6) Balet, agmo iisipen ya perpekto iray agagim. Pansiansiam ya balanse so panmoriam ed sikara. Aliwan realistiko no ilaloan mon ag-ira nalingo tan nadismaya ka labat. (Ecl. 7:21, 22) Tandaan ya si Jehova et realistiko ed saray kekerewen tod lingkor to. No aligen tayoy alimbawa to, nitepel tayoy lingo na arum. (Efe. 4:2, 32) Imbes ya ipalikna ed sikara ya kulang ni so gagawaen da, komendaan tayo ira ed saray nagagawaan da. Napaseseg irad satan. Makapabiskeg so impapuson komendasyon tan makatulong itan pian nawalaan ira na “rason a manliket” diad panlilingkor da. Mas maabig no ontan so gawaen tayo nen say ikompara tayo rad arum ta nadismaya labat ira.​—Gal. 6:4. w18.09 16 ¶16-17

Parad si Jesus, kaiba ed espiritual ya naakan so ikiwas ed panangigiya na Dios. Diad anton paraan ya singa itan naakan? No panon ya say laman tayo et napepenek tan ombibiskeg no masustansia so kakanen tayo, ombibiskeg met so liknaan tan pananisia tayo ed andi-anggaan ya bilay no gagawaen tayoy linawa na Dios. Say pangiyaplika ed saray instruksion na Dios et pakapatnagan na tuan karunongan. (Sal. 107:43) Talagan nabawbawi so pansagpot pian nawalaan na karunongan. “Agmakapipara ed satan so antokaman a pipirawaten mo. . . . Sikatoy kiew na bilay diad saramay ombebemben ed sikato, tan ipasen a maliket iramay akabemben a maong ed sikato.” (Pro. 3:13-18) Imbaga nen Jesus: “Lapud amta yo la iraya, maliket kayo no gawaen yo.” (Juan 13:17) Mansiansian maliket iray disipulo no itultuloy dan gawaen iray ganggan nen Jesus ed sikara. Agda labat aminpinsan ya inyaplika iray bangat tan alimbawa to, noagta nagmaliw iratan ya kabiangan na bilay da. w18.09 4 ¶4-5

Inikdan na Dios so inmunan sanasawa na saray instruksion ya ontulong ed sikaran nonoten komon so pankaabigan na arum, anggano sikaran dua ni labat ed saman diad hardin na Eden. Benendisyonan nen Jehova si Adan tan Eva tan imbaga ton manparakel ira, panoen day dalin, tan uleyan da itan. (Gen. 1:28) No panon ya interesadon maong so Amalsa ed pankaabigan na pinalsa to, nepeg met komon ya interesado si Adan tan Eva ed pankaabigan na saray magmaliw ya ananak da. Kaukolan ya magmaliw a paraiso so interon dalin parad pankaabigan na ilalak nen Adan. Satan ya baleg a proyekto et mankaukolan na kooperasyon na ombabaleg a pamilya to. Parad perpekton laki tan bii, say pankimey dan gawaen ya paraiso so interon dalin et mankaukolan na sigpot a pikoopera ed si Jehova pian nasumpal iray gagala to, diad ontan et makaloob ira ed painawa to. (Heb. 4:11) Talagan makapaliket tan makagunggona komon iman ya proyekto! No inyuna da labat so pankaabigan na arum, angiter komon itan ed sikara na dakel a bendisyon tan baleg a liket. w18.08 18 ¶2; 19-20 ¶8-9

Panon to no abiktima ka na palson akusasyon? Ontan so agawa ed si Jesus tan Juan Bautista. (Mat. 11:18, 19) Panon ya inarap nen Jesus so palson akusasyon? Agto inupot so panaon tan biskeg to pian idepensay sarili to. Imbes, pinaseseg to ray totoo ya amtaen no anto ray tuan ginawa tan imbangat to. Singa imbaga nen Jesus, “say karunongan et napaneknekan a duga ed panamegley na saray nagagawaan na satan.” (Mat. 11:19; paimanod leksab) Walay importantin leksion ya naaralan tayod saya. No maminsan, nayarin wala ray mansalita na mauges odino negatibo iran bengatla nipaakar ed sikatayo. Ompan labay tayon niwalay hustisya tan wala komon so nagawaan tayo pian nalinisan so reputasyon tayo. Balet walay sarag tayon gawaen. No bilang walay angikayat na tila nipaakar ed sikatayo, ipanengneng tayod saray gagawaen tayo ya aliwan tua itan. On, singa ipapanengneng na alimbawa nen Jesus, say mismon maong ya kondukta tayo bilang Kristiano so manprueba ya aliwan tua iray palson akusasyon ed sikatayo. w18.08 6 ¶11-13

Saray salaysay ed Biblia nipaakar ed ag-inkamatulok nen Cain, Solomon, tan saray Israelita diad Palandey Sinai et walaan na importantin pampaparehoan. Kada sakey ed sikara et walaan na pankanawnawan “magbabawi . . . tan manguman.” (Gawa 3:19) Malinew ya agtampol ipapasen nen Jehova ya aglan balot manguman iramay akagawa na kasalanan. Si Aaron et pinerdona nen Jehova. Diad panaon tayo, papasakbayan itayo nen Jehova panamegley na saray salaysay ed Biblia, base ed Biblia iran publikasyon, odino maaron bilin na kaparan Kristiano. No unoren tayo iratan, seguradon naawat tayoy panangasi nen Jehova. Walay gagala na agnaparaan a kaabigan nen Jehova. (2 Cor. 6:1) Lapud satan et walay pankanawnawa tayon “ipulisay so mauges a kagagawa tan minumundo iran pilalek.” (Tito 2:11-14) Legan tayon manbibilay ed “sayan kaplesan a sistema na mundo,” wala ray situasyon ya nasubok so katooran tayod si Jehova. Komon ta lanang tayon akaparaan ya mansiansia ed dapag to! w18.07 21 ¶20-21

Panon tayon napabiskeg so determinasyon tayon anapen so panamidbir nen Jehova aliwan say panamidbir na sayan mundo? Pian nagawaan tayo itan, kaukolan tayon nonoten so duaran importantin katuaan. Unona, lanang ya bibidbiren nen Jehova iramay matoor ya manlilingkor ed sikato. (Heb. 6:10; 11:6) Papablien to so kada sakey ya lingkor to, tan ipapasen ton ‘ag-inkatunong’ no lingwanan to iramay manmamatoor ed sikato. “Amta nen Jehova so dalan na matunong” tan amta to no panon iran iliktar ed subok. (Sal. 1:6; 2 Ped. 2:9) Komadua, nayarin bidbiren itayo nen Jehova diad nanduruman paraan ya agtayon balot iilaloan. Saramay manggagawa na kamaongan ya say motibo da labat et pian nanengneng ira na totoo et agmakaawat na tumang manlapud si Jehova. Akin? Inawat da lan amin so tumang da. (Mat. 6:1-5) Balet imbaga nen Jesus ya say Ama to a “makakanengneng ed amin” et tumangan to iramay agmakakaawat na panamidbir ed kamaongan ya gagawaen da. Iimanoen to iratan ya kamaongan tan tutumangan toy kada sakey unong ed ginawa to. w18.07 9 ¶8, 10

Awetwet si Pedro no anto kasi labay ya ibagad sikato na boses ya nadngel to. Diad saman et sinmabi ray mensahero nen Cornelio. Kayarin inawat nen Pedro so panangigiya na masanton espiritu, sikatoy akila ed saramay mensahero diad abung nen Cornelio. No hinusgaan nen Pedro iray bengatla base labat ed nanenengneng to, seguradon agla komon linmoob ed abung nen Cornelio. Agbalot onloloob iray Judio ed abung na saray Gentil. Akin et linma nin siansiay Pedro anggano binmaleg ya walay panangidumaduma tod saray Gentil? Baleg so epekto na saman ya pasingawey ed si Pedro tan say panamaseguro ya naawat to manlapud masanton espiritu. Kayari ton dinengel so imbaga nen Cornelio, seguradon sikatoy apakiwas, kanian oniay imbaga to: “Natatalosan ko la natan ya anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.” (Gawa 10:34, 35) Talagan aliketan a maong si Pedro ed satan ya balon pakatalos​—ya siansian onaplika ni anggad natan! w18.08 9 ¶3-4

Nayarin aarawian tayo la iray kagagawa ya talagan kabusol na Dios. Balet, wala ray arum nin gagawaen tayo odino aspekto na bilay tayo ya anggapo iray espisipikon ganggan na Biblia. Diad ontan iran situasyon, panon tayon naamtaan no antoy aabobonan na Dios tan makapaliket ed sikato? Ditan la magmaliw ya mausar so nipasal ed Biblia ya konsiensia tayo. Sikatayoy maaron inikdan nen Jehova na saray prinsipyo ya katulongan na nipasal ed Biblia ya konsiensia tayo. Oniay mismon imbaga to: “Siak si Jehova a Dios mo, say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran.” (Isa. 48:17, 18) No uusaren tayoy nonot tan puso tayo pian talosan iray prinsipyo na Biblia, makatulong itan pian nipetek, nigiya, tan nipasal tayoy konsiensia tayo. Bilang resulta, makapanggawa itayo na duga iran desisyon. Say prinsipyo et “sakey ya importantin katuaan odino bangat ya uusaren bilang basiyan ed pankatunongan odino ikiwas.” Pian natalosan tayoy sakey a prinsipyo, kaukolan tayon talosan met so panagnonot na Manangiter na ganggan tan saray rason no akin ya ingganggan to iratan. w18.06 17 ¶5; 18 ¶8-10

Iilaloan na saray kapartido na Herodes ya nantepet ed si Jesus ya no kontraen toy panagbuis, sikatoy nayarin naakusaan ya rebelde ed gobierno. Balet no ibaga nen Jesus ya manepeg so pambayar na buis anggano makapabelat, nayarin anggapo lay ontumbok ed sikato. Sineguro nen Jesus ya sikatoy mansiansian neutral nipaakar ed isyu ed panagbuis. Siempre, amta nen Jesus ya kaslakan so panagkurakot na saray managsingil na buis. Balet aglabay nen Jesus ya nabalang so pokus to ed mas importantin isyu​—say Panarian na Dios, ya makapangiter na tuan solusyon. Kanian impanengneng to so maabig ya alimbawa ed amin ya papatumbok to. Kaukolan dan paliisan so mibali ed saray problema ed politika, anggano singa duga odino maabig so gagala ra. Iyuuna na saray Kristiano so Panarian na Dios tan say inkatunong to. Ontan so gagawaen da imbes ya mangiter iray opinyon da ya balanglan pabor odino kontra ed gagawaen iran ag-inkahustisya. (Mat. 6:33) Dakel ya Tasi nen Jehova ya datin mibabali ed politika et anguman la natan. w18.06 6 ¶9-11

Sanen tinukso nen Satanas irayan agmatoor ya anghel, nayarin aliwan say pankanawnawan pisekso labat so inusar to noagta insipan to met ya nawalaan ira na pakayarin nauleyan so totoo. Nayarin say gagala to et amperen so isabi na insipan ya ‘ilalak na bii.’ (Gen. 3:15) Antokaman so rason, ag-inabuloyan nen Jehova ya nagawa iratan ya plano diad impangiyakar to na Delap​—saya so angamper ed saray sagpot nen Satanas tan saray rebelden anghel diad saman a panaon. Kanian, agtayon balot melmelagen so patit ya imoralidad odino say pagmaliw ya mapaatagey. Saramay anghel ya dinmapag ed si Satanas et abaybayag lan manlilingkor ed mismon arapan na Dios. Balet, inabuloyan dan ontubo tan ombaleg so mauges a pilalek. Mipadpara, nayarin abayag tayo met lan manlilingkor ed kabiangan na organisasyon na Dios ed dalin. Balet anggan diad sayan malinis ya kipapasen ed espiritual, nayarin onlamot iray marutak a pilalek. (1 Cor. 10:12) Talagan importante sirin ya naynay tayon usisaen so puso tayo, ipulisay iray imoral ya panagnonot, tan paliisan so inkamapaatagey!​—Gal. 5:26; Col. 3:5. w18.05 25 ¶11-12

Adismaya si Pablo nen ag-inawat na saray Judio so mensahe na Panarian. Anggaman ontan, sikatoy agsinmuko ya tulongan ira. Imanoen no anto ni imbaga tod sulat to parad saray Kristiano ed Roma nipaakar ed liknaan tod saray Judio: “Say pipirawaten na pusok tan say masimoon ya ipipikasik ed Dios nipaakar ed sikara et say pakaliktar da. Lapud tatasian ko a maseseg ira parad Dios, balet aliwan unong ed suston kakabatan.” (Roma 10:1, 2) Imbaga nen Pablo no akin ya tuloytuloy ton pinulongan iray Judio. Sikatoy apakiwas na ‘pipirawaten na puso to.’ Pirawat na puso to ya niliktar so arum ya Judio. (Roma 11:13, 14) Sikatoy akikasi ed Dios ya natulongan to komon iray Judio ya awaten da so mensahe na Panarian. Onia ni imbaga to: “Maseseg ira parad Dios.” Say ninengneng to et say potensyal na kada too ya manggawa na maong. Say seseg, no duga so pangusaran ed satan et makatulong ed saray matuan impanpuso ya totoo pian magmaliw ya maseseg a disipulo nen Kristo, a singa amta la nen Pablo. w18.05 13, ¶4; 15-16 ¶13-14

Importante ya kada sakey ed sikatayo et maimano ed no antoy “nakaukolan” na arum. Sinimbawa nen Pablo iray Hebreon Kristiano: “Pabiskeg yo ray linmaylay a lima tan makapuy a pueg, tan itultuloy yon gawaen a maptek iray dadalanen na sali yo, pian samay piley et agnalupoy, noagta napaabig.” (Heb. 12:12, 13) Amin tayo, kaiba la ray ugugaw, et nayarin makapanpapasesegan. Oniay insimbawa nen Pablo: “No walay niiter yon panamaseseg nisengeg ed Kristo, no walay niiter yon ligliwa nisengeg ed aro, no walay panangiyansakit yo ed sakey tan sakey, no walay masimoon a panamabli tan panangabagey yo, diad ontan et paliket yo ak a maong diad pakawalaan yoy parehon kanonotan tan parehon panangaro, a sigpot kayon mankakasakey, a saksakey so nononoten yo. Agkayo manggagaway antokaman lapud inkamakolkol odino inkamapaatagey, noagta magmaliw kayon mapaabeba, ya ipasen yon mas atagey so arum nen say sikayo, legan yon aanapen so pankaabigan na arum, aliwan say pankaabigan yo labat.”​—Fil. 2:1-4. w18.04 22 ¶10; 23 ¶12

Say tuan gagala no akin ya imbulos itayo nen Jehova panamegley nen Jesus manlapud kasalanan tan patey et pian usaren tayoy bilay tayo “bilang ariripen na Dios.” Say sankaabigan a paraan pian napaliisan tayon usaren ed aliwan paraan so kawayangan tayo tan magmaliw lamet ya aripen na saray minumundon ambisyon tan pilalek, et diad pampokus ed espiritual iran bengatla. (Gal. 5:16) Imanoen tayoy alimbawa nen patriarkan Noe tan say pamilya to. Nambilay ira ed mauges tan imoral a mundo. Balet, agda inabuloyan ya naimpluensyaan ira na saray pilalek tan kagagawa na totoon walad kaliberliber da. Panon dan agawaan itan? Pinili day magmaliw ya busy diad panggawa ed amin ya ingganggan nen Jehova ed sikara​—say panggawa na biong, pantipon na naakan da tan na ayayep, tan pamasakbay ed arum. “Ginawa nen Noe so amin ya ingganggan na Dios ed sikato. Ontan so ginawa to.” (Gen. 6:22) Antoy resulta? Akaliktar si Noe tan say pamilya to nen dineral na Dios iray mauges a totoo.​—Heb. 11:7. w18.04 10 ¶8; 11 ¶11-12

Aliwan say gobierno labat so uusaren nen Satanas tan saray demonyo to pian ibalang so “interon mundo,” noagta uusaren to met so palson relihyon tan komersyo. (Apo. 12:9) Panamegley na palson relihyon, ikakayat nen Satanas iray katilaan nipaakar ed si Jehova. Ontan met, gagawaen na Diablo so anggaay nayarian to pian dakel a totoo so makalingwan ed ngaran na Dios. (Jer. 23:26, 27) Kanian naloloko laingen iray matuan totoo ya iisipen dan mandadayew irad Dios anta manaya et saray demonyo so dadayewen da. (1 Cor. 10:20; 2 Cor. 11:13-15) Ikakayat met nen Satanas iray katilaan to panamegley na komersyo. Singa bilang, lapud komersyo et nababangatan iray totoo ya isipen dan say sankaabigan ya paraan pian magmaliw ya maliket et say pakawalaan na dakel a kuarta tan kaykayarian. (Pro. 18:11) Saramay manisia ed sayan katilaan et uusaren day bilay da diad panlilingkor ed “Kayamanan” imbes ya diad Dios. (Mat. 6:24) Kanian say panangaro da ed saray materyal a bengatla so angekal ed panangaro dad Dios.​—Mat. 13:22; 1 Juan 2:15, 16. w18.05 23 ¶6-7