Agosto

Regular itayon napapanonotan ed saray pantitipon no antoy ginawa nen Jehova tan si Jesus parad sikatayo. Lapud misalsalamat itayon maong, gagawaen tayoy anggaay nayarian tayon aligen si Jesus diad inagew-agew ya kabibilay tayo. (2 Cor. 5:14, 15) Ontan met, papakiwasen itayo na puso tayo ya idayew si Jehova lapud impangitarya to ed dondon. Say sakey a paraan pian sikatoy nidayew tayo et diad pangiter na impapuson komento diad saray aral. Nipanengneng tayo ya talagan inar-aro tayoy Jehova tan say Anak to no mabulos tayon mansakripisyo parad sikara. Mabetbet ya kaukolan tayoy mansakripisyo ed nanduruman paraan pian makaatendi tayod saray aral. Diad dakel ya kongregasyon, say oras na aral et kayari na trabaho kanian nayarin naksawan tayo la. Tan wala met so aral no Sabado odino Simba, ya panaon na panagpainawa na arum a totoo. Kasin naiimano nen Jehova so iyaatendi tayod aral anggano naksawan tayo? Siempre! Diad tua, no mas mansasagpot tayo, mas naaapresya nen Jehova so panangaro ya ipapanengneng tayo parad sikato.​—Mar. 12:41-44. w19.01 29 ¶12-13

Naeksperiensyan mismo nen Jesus so arum ya problema na totoo. Singa bilang, mapatnag ya binmaleg si Jesus ed mairap ya pamilya. Diad impankimey nen Jesus kaibay pinagka-ama ton si Jose, asali ton mismo so mantrabahoy ambelat. (Mat. 13:55; Mar. 6:3) Mapatnag ya inatey lay Jose antis nin inggapo nen Jesus so ministeryo to. Kanian seguradon alikna nen Jesus so sakit na naandian na inad-aro. Tan amta nen Jesus so liknaan no aliwan mananisia iray kapamilya. (Juan 7:5) Saratan ya naeksperiensya to tan arum nin rason so akatulong ed si Jesus pian natalosan iray subok ya dadalanen na ordinaryon totoo tan say nalilikna ra. Nagkalalo lan apatnagan so pililikna nen Jesus nen sikatoy nanggawa na saray milagro. Ginawa to iratan aliwa labat ya lapud obligasyon to, noagta lapud ‘akasian to’ iray maniirap. (Mat. 20:29-34; Mar. 1:40-42) Alikna nen Jesus so nalilikna na totoo tan labay to ran tulongan.​—Mar. 7:32-35; Luc. 7:12-15. w19.03 16 ¶10-11

Sampot lan labi na bilay nen Jesus diad dalin ed saman. Isip mo pa ray pakakaaburidoan nen Jesus. Kasin sikatoy mansiansian matoor anggad patey? Akadepende ed sikato so bilay na binilyon a totoo. (Roma 5:18, 19) Say mas importantin sankanonot to et say reputasyon na Ama to. (Job 2:4) Insan, diad samay sampot a pangdem ya kaiba to ray sankaapitan ya kakaaro to, saray apostol to, ‘nansasangsangan ira no siopad sikara so manunaan.’ Balet makapadinayew ta agsinmyodot si Jesus. Imbes, sikatoy nansiansian kalmado. Maar-aro balet mapekder ton impaliwawa lamet so ugali ya nepeg dan ipatnag. Insan kinomendaan to ray kakaaro to lapud matoor iran nansiansia a kaiba to. (Luc. 22:24-28; Juan 13:1-5, 12-15) Sarag tayon aligen si Jesus tan mansiansia tayon kalmado anggano nanaaburido o nai-stress tayo no tandaan tayo ya amin tayo et wala ray nibabaga tan nagagawaan tayo ya makapasyodot ed arum. (Pro. 12:18; Sant. 3:2, 5) Tan no walay maabig ya nanenengneng mod arum, ibagam ed sikara.​—Efe. 4:29. w19.02 11-12 ¶16-17

Diad Mosaikon Ganggan, agbastabasta naakusaan so sakey ya too ed krimen ya agto ginawa. Say sakey ya akusado et walay kanepegan ton amtaen no siopay mangaakusa ed sikato. (Deu. 19:16-19; 25:1) Tan antis ya sikatoy sentensiaan, nepeg ya duaran tasi odino onsulok ni so mangiter na testimonya. (Deu. 17:6; 19:15) Panon to no walay Israelitan akagawa na krimen ya saksakey so akatasi? Agto nayarin isipen ya natakasan toy dusa. Anengneng nen Jehova so ginawa to. On, si Jehova so angipanengneng na perpekton alimbawa; amin ya gagawaen to et patas. Tutumangan nen Jehova iramay matoor ya manguunor ed saray estandarte to, balet dudusaen to iramay aabusoen day autoridad da. (2 Sam. 22:21-23; Eze. 9:9, 10) Nayarin say arum et manggagawa na mauges tan singa natatakasan day dusa, balet diad dugan panaon ya denesidi nen Jehova, seguroen to ya niwalay hustisya. (Pro. 28:13) Tan no ag-ira magbabawi, naamtaan da lanlamang ya “makapataktakot so pakaawat na dusa manlapud mabilay a Dios.”​—Heb. 10:30, 31. w19.02 23-24 ¶20-21

Seguradon lanang ya onkekerew na panangigiya si Moises ed si Jehova. Diad tua, sikatoy “nansiansian mabiskeg ed pananisia a singa sankanengneng to imay Sakey ya agnanengneng.” (Heb. 11:24-27) Ngalngali duay bulan kayari na intaynan na saray Israelita ed Ehipto, wala lay linmesan seryoson problema antis ni ran makasabi ed Palandey Sinai. Ginmapon nanreklamo iray totoo lapud anggapoy danum ya nainum da. Nanmeremere ra sumpad si Moises tan linmoor so situasyon kanian kinmerew na tulong si Moises ed si Jehova, tan inkuan to: “Antoy gawaen kod sarayan totoo? Ta ngalngali da ak la tupaken!” (Exo. 17:4) Inikdan nen Jehova si Moises na saray instruksion no antoy gawaen to. Awiten toy baston to tan ibasig to itan ed bato diad Horeb, insan ompaway so danum ditan. Nabasa tayo: “Ontan so ginawa nen Moises ed pakanengneng na saray mamatatken na Israel.” Inminum iray Israelita tan apenepenek ira, kanian aresolbe so problema.​—Exo. 17:5, 6. w18.07 13 ¶4-5

Say sakey ya uusaren nen Jehova pian pabiskegen itayo diad aro et say Kristianon kongregasyon. Kada sakey ed sikatayo et sarag ton balesen itan ya panangaro To diad pangaro tan pamabiskeg ed saray agagi tayo, aliwa labat ya diad espiritual noagta dia met ed emosyonal. (1 Juan 4:19-21) Pinaseseg nen apostol Pablo iray Kristiano: “Itultuloy yon pasesegen tan pabiskegen so sakey tan sakey, a singa gagawaen yo la.” (1 Tes. 5:11) On, sarag na interon kongregasyon​—aliwan saray elder labat—​ya aligen si Jehova tan Jesus diad panligliwa tan pamabiskeg ed saray agagi. (Roma 15:1, 2) Say arum ya agagi ed kongregasyon ya walaan na graben depresyon et nayarin mankaukolan na propesyonal a tulong tan panagtambal. (Luc. 5:31) Mapaabeban bibidbiren na saray elder tan arum nin agagi ed kongregasyon ya aliwa ran doktor parad ontan iran sakit. Balet walay importantin nagawaan da​—sarag dan ‘ligliwaen iramay maer-ermen, tulongan iramay makapuy, anosan so amin.’—1 Tes. 5:14. w18.09 14 ¶10-11

Napabiskeg tayoy talek tayo ed si Jehova no sikatoy kabaten tayon maong. Tan say alenleneg ya paraan pian talagan nakabat tayoy Dios et diad pambasa na Biblia tan pandalepdep ed saray nababasa tayo. Karga na Biblia iray napanmatalkan ya salaysay no panon ya prinotektaan nen Jehova iray totoo to nensaman. Saratan so mangiiter ed sikatayo na kompiyansa ya asikasoen to tayo met natan. Imanoen pa so sakey ya alimbawa, say marakdakep ya ilustrasyon ya inusar nen Isaias ya mangipapanengneng no panon itayon proprotektaan nen Jehova. Tinukoy toy Jehova bilang managpastol tan tinukoy to ray lingkor na Dios bilang kordero. Oniay imbaga nen Isaias nipaakar ed si Jehova: “Tiponen to iray kordero diad panamegley na taklay to, tan awiten to ra diad pagew to.” (Isa. 40:11) No nalilikna tayon akalakap ed sikatayo so mabiskeg ya taklay nen Jehova, maligen tan kalmado so liknaan tayo. Pian natulongan ka ya mansiansian kalmado anggano nipapaarap ka ed saray problema, dalepdep mo so panamaseguro ya abitla ed teksto tayo natan. Pabiskegen ka na satan pian nasarag mo ray subok ed arapen. w19.01 7 ¶17-18

Kasin walay sakey o pigaran espiritual ya kalat a dadampoten mo? Nayarin pansasagpotan mon basaen ya inagew-agew so Biblia. Odino nayarin papaaligwasen moy abilidad mon mansalita tan manbangat. Antokaman itan, antoy naliknam no nanengneng mo ray positibon resulta odino naimano iratan na arum tan komendaan da ka? Seguradon maliket ka ta pakaliknam et walay agawaan mo. Tan duga labat itan, ta mas iyuunam so panggawa na linawa na Dios nen say panlabayan mo, a singa ginawa nen Jesus. (Pro. 27:11) No akapokus kad espiritual iran kimey, say gagawaen mo et talagan makapaliket lapud aliwa itan ya andi-kakanaan. Oniay insulat nen apostol Pablo: “Magmaliw kayon mapekder, agnagiing, a naynay a dakel so gagawaen yo ed kimey na Katawan, ta amta yo ya aliwan andi-kakanaan so pansasagpot yo nipaakar ed Katawan.” (1 Cor. 15:58) Balet, no akapokus so sakey ed saray ambisyon tan pilalek na sayan mundo​—anggano maasenso ni so bilay to—​andi-kakanaan lanlamang itan.​—Luc. 9:25. w18.12 22 ¶12-13

Tutukoyen nen David so panaon sano tumboken la na saray totoo ed dalin iray matunong ya estandarte na Dios. (2 Ped. 3:13) Oniay propesiya ya nabasa ed Isaias 65:22: “Say bilay na totook et singa karukey na bilay na sakey a kiew.” Ipapanengneng na saya ya saray totoo et manbilay na nilibon taon. Ibabaga na Apocalipsis 21:1-4 ya imanoen na Dios iray totoo, tan sakey ed saray bendisyon ya impromisa to et “anggapo lay patey” diad matunong a balon mundo. Abalang nen Adan tan Eva so pankanawnawa ya manbilay diad Paraiso ed Eden, balet magmaliw lamet ya paraiso so dalin. Singa impromisa na Dios, diad arapen et nabendisyonan iray totoo ed dalin. Pinuyanan si David ya mangisulat a saray mauyamo tan matunong et tawiren day dalin tan manbilay ira ditan diad andi-anggaan. (Sal. 37:11) Ontulong iray propesiya ed libro na Isaias pian talaranan tayo so panaon ya panliketan tayo lay bilay diad paraiso. (Isa. 11:6-9; 35:5-10; 65:21-23) Kapigan itan? No nasumpal la imay impromisa nen Jesus ed samay kriminal. (Luc. 23:43) Nakaiba ka ed satan ya Paraiso. w18.12 7 ¶22-23

Kasin sigpot tayon napaliisan so panagnonot na sayan mundo? Andi, agtayo literal ya makapaway ed sayan mundo. Agtayon balot napaliisan so arum ed saray ideya na satan. (1 Cor. 5:9, 10) Lapud pampupulong tayo et nakakatongtong tayo ray totoon aliwa so papanisiaan da. Balet anggano agtayo napaliisan iratan ya ideya, nepeg ya agtayo iratan iimanoen odino aawaten. Singa si Jesus, kaukolan ya tampol tayon ipulisay iray kanonotan ya labay nen Satanas ya mangimpluensya ed sikatayo. No ontan so gawaen tayo, naprotektaan tayoy sarili tayo ed panagnonot na sayan mundo. Singa bilang, kaukolan ya maalwar tayo no siopa ray pikaaroan tayo. Papasakbayan itayo na Biblia ya no naynay tayon miuulop ed saray agmandadayew ed si Jehova, naalig tayo so panagnonot da. (Pro. 13:20; 1 Cor. 15:12, 32, 33) Ontan met, no ipupulisay tayo ray panagligliwaan ya mangipapaseseg ed ebolusyon, karawalan, odino imoralidad, agnasamalan so kanonotan tayo na saray ideyan “sumpad kakabatan nipaakar ed Dios.”​—2 Cor. 10:5. w18.11 21 ¶16-17

Panon tayon napabiskeg so determinasyon tayon manakar ed katuaan? Say sakey ya paraan et ibangat ed arum so katuaan ya walad Biblia diad anggaay nayarian mo. Diad ontan, tuloytuloy mon nabembenan a malet so espiritual ya espada tayo, say “salita na Dios.” (Efe. 6:17) Sarag tayon amin ya paaligwasen so dunong tayo ed panagbangat, “a dugay panguusar [tayo] ed salita na katuaan.” (2 Tim. 2:15) Legan tayon uusaren so Biblia pian tulongan so arum ya nasaliw day katuaan tan nipulisay iray palson bangat, lalon ontatanek ed nonot tan puso tayo iray salita na Dios. Diad ontan et napabiskeg tayoy determinasyon tayon mantultuloy ya manakar ed katuaan. Say katuaan et mablin regalo ya nanlapud si Jehova. Panamegley na sayan regalo, niwalad sikatayo so sankamablian ya kayarian tayo, say maapit ya relasyon ed Ama tayod tawen. Amin ya imbangat tod sikatayo anggad natan et gapoan ni labat! Insipan na Dios ya ibangat to itayo na katuaan diad andi-anggaan. Kanian pablim so katuaan a singa sakey ya marakep a perlas. Itultuloy mon ‘saliwen so katuaan tan agmon balot ilalako itan.’​—Pro. 23:23. w18.11 8 ¶2; 12 ¶15-17

Antis na Delap, mapatnag ya kaibad impulong nen Noe so pasakbay nipaakar ed onsabin kadederal. Imanoen iyan imbaga nen Jesus: “Ta singa ed saraman ya agew antis na Delap, saray totoo et nan-aakan tan naniinum, angasawa tan akiasawa ra, anggad agew a linmoob ed biong si Noe, tan ag-ira nanimano ya anggad sinmabi so Delap tan niyanor iran amin, ontan met naani ed kiwawala na Anak na too.” (Mat. 24:38, 39) Balet anggano agdinmengel iray totoo, agtinmundan impulong nen Noe so mensahe a pasakbay ya inter ed sikato. Natan, ipupulong tayo so mensahe na Panarian pian nawalaan na pankanawnawa iray totoo ya naaralan day nipaakar ed gagala na Dios parad katooan. Singa si Jehova, labalabay tayo ya onkiwas iray totoo ed mensahen ipupulong tayo pian “mantultuloy [iran] manbilay.” (Eze. 18:23) Ontan met, no manpupulong tayo ed kaabungan tan ed saray publikon lugar, ipapasakbay tayod dakel nin totoo anggad posible so isabi na Panarian na Dios pian panganggaen iyan mauges a mundo.​—Eze. 3:18, 19; Dan. 2:44; Apo. 14:6, 7. w18.05 19 ¶8-9

Antoy nepeg mon gawaen no imbawal so kimey tayo ed lugar yo tan inaresto ka na saray autoridad tan tinepetan da ka nipaakar ed saray agagi? Kasin ibagam ed sikara so amin ya antam? Antoy ginawa nen Jesus nen sikatoy tinepetan na gobernador na Roma? Amta nen Jesus so prinsipyo na Biblia ya walay “panaon na ag-iyesel tan panaon na pansalita,” kanian walay panaon ya sikatoy agbalot nansalita! (Ecl. 3:1, 7; Mat. 27:11-14) Diad ontan ya situasyon, kaukolan tayoy magmaliw ya mataktika tan maalwar, pian agtayo nipeligro iray agagi tayo. (Pro. 10:19; 11:12) Anto so gawaen mo no walay maapit ya kaarom odino kanayon mo ya akagawa na seryoson kasalanan tan antam so nipaakar ed agawa? ‘Ibagam so katuaan.’ Responsabilidad mon ibaga ed saray elder no anton talagay tua. Kanepegan dan naamtaan so tua, diad ontan et natulongan da ed sankaabigan ya paraan so akagaway kasalanan pian nipawil toy relasyon tod si Jehova.​—Sant. 5:14, 15. w18.10 10 ¶17-18

Panon tayon napabiskeg so arum ed aro? Say sakey ya paraan et ondengel ya maong. (Sant. 1:19) Say idengel ya walaan na pililikna et pangipanengneng na aro. Magmaliw ya mataktika tan makonsidera no mantetepet ka pian natalosan mo so nalilikna na samay toon naiirapan. No ontan so gawaen mo, nipanengneng moy pililikna tan napabiskeg moy agim. Komon ta nanengneng ed ekspresyon na lupam so maaron panangiyansakit mo. No kaukolan ya detalyadon ibalikas na agim so amin ya nalilikna to, anosan mon dengelen tan agka onsasalet. No maanos kan ondengel, seguradon natalosan mo no anton talagay nalilikna to. Makatulong itan pian sikatoy nawalaan na kompiyansa ed sika, tan mas dengelen toy ibagam legan mon pansasagpotan ya pabiskegen. No ipanengneng mo ya sikatoy talagan iyaansakit mo, seguradon naligliwam. w18.09 14 ¶10; 15 ¶13

Panaon so nepeg ya ibayar na amin a malabay ya mangaliw na katuaan. Kaukolan so panaon pian dengelen so mensahe na Panarian, basaen so Biblia tan saray literatura ya base ed Biblia, nawalaan na personal a panagaral, tan manparaan tan onatendi ed saray aral ed kongregasyon. Nepeg tayon ‘saliwen,’ odino alaen so panaon ya uusaren tayod saray agtanton importantin gagawaen tayo. (Efeso 5:15, 16, paimanod leksab) Panon karakel ya panaon so kaukolan pian nawalaan tayoy suston kakabatan ed saray manunan bangat na Biblia? Depende itan ed kipapasen tayo. Anggapoy limitasyon na naaralan tayod si Jehova nipaakar ed karunongan, paraan, tan saray kimey to. (Roma 11:33) Diad unonan isyu na Watch Tower et inkompara so katuaan ed “melag ya rosas,” tan oniay nabasa: “Nepeg ya agka labat nakontento ed sakey ya rosas na katuaan. No magenap la so sakey ya rosas na katuaan, agla komon mangiter so Dios na dakel ni ran katuaan. Mantipon ka, mananap ka ni.” Anggan diad panaon ya anggapoy anggaan, dakel nin siansiay naaralan tayo nipaakar ed si Jehova. Say importante et marunong tayon uusaren so panaon tayo diad pangaliw na dakel ya katuaan anggad iyabuloy na sirkumstansya tayo. w18.11 4 ¶7

Saray asawan lalaki et nabibilin ya nepeg dan tratoen so kaasawaan da “unong ed kakabatan”​—nayarin mankabaliksan itan na ‘pangipatnag ed sikara na konsiderasyon; ya tatalosan ira.’ (1 Ped. 3:7; paimanod leksab) Say pakatalos tan konsiderasyon et naynay ya mankaiba. Singa bilang, say makatalos ya asawan laki et amta ton say asawa to, bilang katulongan to, et duma ed sikato diad dakel ya paraan, balet agto labay ya ibagan abebbeba ed sikato. (Gen. 2:18) Kanian ikokonsidera toy liknaan na asawa to, tan tratratoen to ya walaan na dignidad tan galang. Say makonsideran asawan laki et sankanonot to met so liknaan na asawa to diad pidedeneng tod arum ya bibii. Agton balot mi-flirt odino mangipanengneng na agmakanepegan ya interes ed sikara; agto met itan gawaen diad social media odino diad Internet. (Job 31:1) On, sikatoy mansiasiansian matoor ed asawa to, aliwa labat ya lapud sikatoy inaro to, noagta lapud inaro toy Dios tan kabusol toy kaugsan.​—Sal. 19:14; 97:10. w18.09 29 ¶3-4

Akin ya no maminsan et nairapan tayon iyaplika iray nanaaralan tayod Salita na Dios? Say sakey ya rason et kaukolan so kapaabebaan pian gawaen so duga, tan say abilidad tayon mansiansian mapaabeba et nasusubok. Diad sayan “kaunoran iran agew,” apaliberan itayo na totoon “maaro ed sarili ra, maaro ed kuarta, mapasirayew, mapaatagey,” tan “anggapoy kontrol da ed sarili ra.” (2 Tim. 3:1-3) Balet no onaaligwas tan singa maliket iray totoon makasarili, nayarin say sakey a lingkor na Dios et makaibeg anggano amta ton mauges so makasarilin ugali. (Sal. 37:1; 73:3) Nayarin nonoten to laingen: ‘Wala kasi gunggona no iyunak so pankaabigan na arum nen say sarilik? Kasin naekal so respeto na arum ed siak no magmaliw ak ya “mapaabeba”?’ No abuloyan tayon naimpluensyaan na sayan makasarilin mundo, nayarin naderal so maabig a relasyon tayod saray agagi tan say pakabidbiran tayo bilang Kristiano. Balet nabendisyonan itayo no aralen tan aligen tayo ray balibalin alimbawa diad Biblia. w18.09 3 ¶1

Bukbukor ni labat nen Jehova antis ya sikatoy amalsa, balet aliwan sarili to labat so inisip to. Imbes, inter to so bilay bilang regalo ed saray matalinon pinalsa to​—saray anghel tan totoo. Si Jehova, say “maliket a Dios,” et labalabay toy mangiter na maong iran bengatla. (1 Tim. 1:11; Sant. 1:17) Tan lapud labay to met ya maliket tayo, ibabangat to itayon magmaliw ya maiter. (Roma 1:20) Pinalsa na Dios so too unong ed indengan to. (Gen. 1:27) Labay ton ibaga, pinalsa itayo na Dios ya sarag tayon ipatnag so personalidad to. Pian magmaliw itayon maliket, kaukolan tayo sirin ya aligen so alimbawa nen Jehova diad pangipanengneng tayoy interes ed arum tan diad pagmaliw tayon maiter. (Fil. 2:3, 4; Sant. 1:5) Akin? Simpli labat so ebat​—lapud ontan so maaron impandesinyo nen Jehova ed too. Anggano agtayo perpekto, sarag tayon aligen so inkamaiter nen Jehova. Labay nen Jehova ya sikatoy aligen tayo, kanian sikatoy naliliketan no maiter tayo.​—Efe. 5:1. w18.08 18 ¶1-2; 19 ¶4

Ipapanengneng na saray papatumbok na Kristo ya sikatoy dedengelen da no gagawaen da ray ibabaga to, aliwa labat ya basta imanoen da iratan. Anggano wala ray “kapagaan ed bilay,” agnababalang so pokus da. (Luc. 21:34) Imbes, iyuuna da ed bilay da so pangunor ed saray ganggan nen Jesus, anggano diad mairap iran situasyon. Diad ontan iran situasyon, mansiasiansian matoor iray agagi tayo ed si Jehova anggan antoy nagawa. Say sakey nin paraan a nipanengneng tayon ondedengel tayo ed si Jesus et diad pitulongan tayo ed saray tinuro to ya mangidaulo ed sikatayo. (Heb. 13:7, 17) Diad agano ni, dakel so agawan pananguman ed organisasyon na Dios, a singa saray balon uusaren tan paraan ed ministeryo tayo, say format na aral tayo ed midweek, tan say paraan na panagpaalagey, panag-apiger, tan panagmintina ed saray Kingdom Hall. Saratan ya panangigiya et parad pankaabigan tayo tan pakapatnagan na panangaro na organisasyon na Dios. Talagan aapresyaen tayo iratan! Makaseguro itayon bendisyonan nen Jehova so pansasagpot tayon unoren iray nipanpanaon ya instruksion na organisasyon. w19.03 10-11 ¶11-12

Say istoryan 10 porsiento labat so katuaan to et seguradon 100 porsiento ya makapalikdo. Imanoen pay agawa ed saray Israelita ya manaayam ed sagur na Ilog Jordan diad panaon nen Josue. (Jos. 22:9-34) Walay naawat dan balita ya saray Israelita ya manaayam ed bukig et nanggawa na balbaleg tan makapadinayew ya altar. Tua itan ya kabiangan na balita. Balet lapud sayan agkompleton impormasyon, inisip na saramay manaayam ed sagur ya saray agagi da et nanrebelde ed si Jehova. (Jos. 22:9-12) Maong labat ta antis iran onataki, angibaki ni ra na napanmatalkan a lalaki pian amtaen so amin a detalye. Antoy naamtaan da? Say altar et impaalagey, aliwan pian pambagatan noagta bilang sakey ya pakanodnonotan, pian diad arapen, naamtaan na amin ya anggan sikara et matoor met ya lingkor nen Jehova. Seguradon misalsalamat iraman ya Israelita ta agda pinatey iray agagi ra base labat ed agkompleton impormasyon ya naawat da, noagta inamta da ni no anton talagay tua! w18.08 5 ¶9-10

Singa impaimano nen Pablo, anggan saray tuan mandadayew ed Dios et nayarin nalanor ed mauges iran kagagawa. Saramay manpapadaeg ed tukso et nayarin isipen da ya walaan ni ran siansia na maong a relasyon ed si Jehova. Balet anggano say sakey et labay toy magmaliw a kaaro nen Jehova odino ibabaga ton sikatoy matoor ed Dios, agto labay ya ibaga a sikato lay aabobonan nen Jehova. (1 Cor. 10:1-5) Singa saray Israelita ya nanaburido nen abayagan si Moises ed Palandey Sinai, saray Kristiano natan et nayarin manaburido met ed singa mabaybayag ya isabi na agew na panangukom nen Jehova tan say balon mundo. Say pakasumpal na sarayan promisa et singa mabaybayag ni odino imposiblin nagawa. No agtayo manalwar ed ontan ya kanonotan, nayarin nasagyat itayon iyuna iray makasarilin plano ed bilay imbes ya say panggawa ed linawa nen Jehova. Onsabi panaon, ompan makaarawi tayo ed si Jehova tan makapanggawa tayo na saray bengatlan agtayon balot naisip ya gawaen nen mabiskeg ni so espiritualidad tayo. w18.07 21 ¶17-18

Naawat tayo iray balibalin bendisyon no personal itayon kabkabat nen Jehova. Balet antoy nepeg tayon gawaen pian nakabkabat itayo nen Jehova? Nagawaan tayo itan no sikatoy aroen tayo tan idedika tayod sikato so bilay tayo. (1 Cor. 8:3) Balet, kaukolan tayon pansiansiaen so mabmablin relasyon tayo ed Ama tayod tawen. Singa saray Kristiano ed Galacia ya sinulatan nen Pablo, kaukolan ya agtayo met la manpapaaripen ed “saray makapuy tan andi-kakanaan ya inuugaw iran bengatla” na sayan mundo, kaiba lay pananap ed panangidayew na satan. (Gal. 4:9) Saray Kristiano nen inmunan siglo ya sinulatan nen Pablo et akabat da so Dios kanian binidbir to met ira ya kabat to ra. Balet, imbaga nen Pablo ya saraman met lanlamang ya agagi et ‘ompapawil lamet’ ed saray andi-kakanaan a bengatla. Singa oniay ibabaga nen Pablo ed sikara: “Arawi lay nakar yo, akin et labay yo nin pawilen iray makulangkulang, saray andi-kakanaan a bengatla ya tinaynan yo la?” w18.07 8 ¶5-6

Maong labat ta agtayo la kaukolan ya naeksperiensya ni iray makapuy ya epekto na isumlang ed saray ganggan na Dios pian makaaral tayo na importante iran leksion. Makaaral tayo la ed saray lingo na arum, ya nisulat ed Salita na Dios iray makapuy ya ginawa ra. On, makaawat tayo na sankaabigan ya bilin manlapud Dios no basaen tan dalepdepen tayo iray tuan agawa ya nisalaysay ed Biblia. Singa bilang, isipen pay ansakisakit ya alikna nen Arin David lapud agto inunor so ganggan nen Jehova tan akikalugoran ed si Bat-sheba. (2 Sam. 12:7-14) Legan tayon babasaen tan dadalepdepen iyan salaysay, nayarin itepet tayod sarili tayo: ‘Panon ya apaliisan la komon nen Arin David so makapaermen ya epekto na impikalugoran to ed si Bat-sheba? No nipaarap ak met ed ontan ya tukso, kasin walay kasil na liknaan kon onarawi? Kasin ombatik ak a singa si Jose, odino manpatukso ak a singa si David?’ (Gen. 39:11-15) No dalepdepen tayo iray makapuy ya epekto na kasalanan, napabiskeg so determinasyon tayon ‘busolen so kaugsan.’​—Amos 5:15. w18.06 17 ¶5, 7

Lapud onloloor so ag-inkahustisya, dakdakel so manpipirawat ya mibali ed politika. Say panagbuis so manunan isyu ed politika diad panaon nen Jesus. Saray sakop na Roma, kaiba la ray katongtong nen Jesus, et kaukolan ya manbayar na dakdakel a buis, a singa saray produkto ra, dalin, tan abung da. Tan say lalon mamapairap ed sikara et say pankukurakot na saray managsingil na buis. No maminsan et babayaran da ray opisyal na gobierno pian nawalaan ira na atagey ya posisyon tan uusaren da itan pian makala ra na dakel ya kuarta manlapud saray akolekta ra. Si Zaqueo, ya pangulon managsingil na buis ed Jerico, et nagmaliw ya mayaman lapud kuakuartaan to ray totoo. (Luc. 19:2, 8) Satan ya kagagawa to et nayarin mipara ed gagawaen la na karaklan. Si Jesus et sinalin patitan na saray mamubusol ed sikato nen tinepetan da no kasin manepeg so pambayar na buis. Say tutukoyen dan “buis” et samay sakey a denario ya sisingilen ed saray uuleyan na Roma. (Mat. 22:16-18) Kontran maong iray Judio ed panagbuis ta ipapanengneng na satan ya wala rad pakauley na Roma. w18.06 5-6 ¶8-10

Say bayar na idapag ed si Satanas et naynay ya mas ambelat nen say antokaman ya ompatnag a singa makagunggonan iyoopresi to. (Job 21:7-17; Gal. 6:8) Antoy gunggona no amta tayoy kalaknab na impluensya nen Satanas? Makatulong iya pian balanse so pangipasen tayo ed saray sekular ya autoridad tan napaseseg tayo ed panagpulong. Natatalosan tayon labay nen Jehova ya manpasakop tayod autoridad na gobierno. (1 Ped. 2:17) Tan iilaloan ton unoren tayo ray ganggan na gobierno basta ag-itan kontra ed saray estandarte to. (Roma 13:1-4) Balet tandaan a nepeg tayoy mansiansian neutral, ya agtayon balot papaboran so anggan anton partido na politika odino toon lider. (Juan 17:15, 16; 18:36) Lapud nanenengneng tayo no antoy labay ya gawaen nen Satanas ed ngaran na Dios tan ed reputasyon to, mas napapakiwas tayon ibangat ed arum so katuaan nipaakar ed Dios. Malikeliket tayon natawag ed ngaran na Dios tan usaren itan ta amta tayon mas makagunggona so pangaro ed sikato nen say pangaro ed kuarta odino saray bengatla.​—Isa. 43:10; 1 Tim. 6:6-10. w18.05 24 ¶8-9

No wala ray problema na sanasawa, makatunongan kasin solusyon so pansian? Anggapoy nabasa ed Kasulatan no anto ray nayarin rason na pansian. Insulat nen Pablo: “No say sakey a bii et agmananisia so asawa to tan onaabobon a miamong ed sikato, agto tataynanan so asawa to.” (1 Cor. 7:12, 13) Onaplika met itan ed panaon tayo. Balet, wala ray situasyon ya say ‘agmananisian asawan laki’ et agto ipapanengneng ya sikatoy ‘onaabobon a miamong ed asawa to.’ Nayarin grabe panagkabil to, ya ompan nalikna na asawan bii ya sengegan la itan na pansakit to odino napepeligro lay bilay to. Ompan gagagalaen ton aglegpeten so pamilya da odino nipepeligro lan maong so espiritualidad na asawa to. Diad ontan iran situasyon, personal ya nandesisyon so arum ya Kristiano ya kaukolan day misian ed asawa ra ta ag-ipapanengneng na asawan laki ya sikatoy “onaabobon a miamong,” antokaman so ibaga to. Balet say arum ya Kristiano ya ontan met kairap so situasyon da et ag-ira akisian. Manaanos ira tan mansasagpot ira pian magmaliw ya maabig so relasyon dan sanasawa. w18.12 13 ¶14, 16; 14 ¶17

Diad ilustrasyon na tomatanem a naromog ed Lucas 8:5-8, 11-15, say bini et “say salita na Dios,” odino say mensahe na Panarian. Say dalin et irerepresenta toy piguratibon puso na too. Say bini ya naplag ed maong a dalin et linmamot, tinmubo, tan “nambunga ray 100.” No panon ya say maong a dalin ed ilustrasyon nen Jesus et pinatubo to so bini, inawat tayo met so mensahe tan pinabli tayo itan. Bilang resulta, say singa bini ya mensahe na Panarian et linmamot tan binmaleg, a singa say dawa na trigo ya ag-abayag et nambunga. Tan no panon ya say dawa na trigo et agnambunga na balon dawa noagta balon bini, mamapawala itayo met na bunga ya ag-ontutukoy ed balon disipulo noagta balon bini na Panarian. Panon itayon makapawala na balon bini na Panarian? Kada no ipupulong tayo so mensahe na Panarian, singa tayo paparakelen tan ikakayat so bini ya nitanem ed puso tayo. (Luc. 6:45; 8:1) Kanian naaralan tayo ed sayan ilustrasyon nen Jesus ya anggad tuloytuloy tayon ipupulong so mensahe na Panarian, sikatayoy ‘manbubunga tan mansusungdo.’ w18.05 14 ¶10-11

Aglabat akaparaan si Pablo ya mamaseseg ed saray agagi to, sikatoy akaparaan met ya ‘mangusar ed amin a walad sikato tan sigpot a pausar parad sikara.’ (2 Cor. 12:15) Ontan met ed saray elder natan, aliwan diad salita labat ira mamaseseg tan manligliwa. Kaukolan dan ipanengneng ed gawa so personal ya interes dad saray agagi. (1 Cor. 14:3) Kaiba ed pamaseseg ed arum so pangiter na simbawa, balet nepeg ya tumboken na saray elder so alimbawan walad Biblia no panon so manimbawa ed makapaseseg ya paraan. Impanengneng nen Jesus so sankaabigan ya alimbawa ed saya kayari impatey tan inkioli to. Wala ray mapuersan simbawa to parad saray kongregasyon ed Asia Minor, balet imanoen no panon ton ginawa itan. Antis to ran sinimbawa, maaro to nin kinomendaan iray kongregasyon ed Efeso, Pergamo, tan Tiatira. (Apo. 2:1-5, 12, 13, 18, 19) Aaligen na saray elder si Jesus diad paraan na panagsimbawa ra. w18.04 22 ¶8-9

Sikayo ran atateng, seguradon gagawaen yoy anggaay nayarian yo ya protektaan iray anak yo ed sakit. Pansiasiansiaen yon malinis so abung yo, tan ibabantak yoy antokaman ya nayarin pansengegan na pansakit yo odino saray anak yo. Mipadpara, kaukolan yon protektaan iray anak yo ed saray pelikula, palabas ed TV, video game, tan website ya nayarin mangimpluensya ed sikara ya aligen so kanonotan nen Satanas. Inikdan kayo nen Jehova na autoridad ya asikasoen so espiritualidad na ananak yo. (Pro. 1:8) Kanian agkayo natatakot ya manggawa na saray totontonen ed abung ya nibase ed saray estandarte na Biblia. Ibaga yod saray ugaw nin ananak yo no anto ray sarag tan agda sarag ya bantayan, tan tulongan yo ran natalosan no akin ya ontan so desisyon yo. (Mat. 5:37) Legan iran ombabaleg, ipasal yo ran natebek no antoy duga tan aliwa base ed saray estandarte nen Jehova. (Heb. 5:14) Tan tandaan, makaaral iray anak yo lalo lad saray gagawaen yo.​—Deu. 6:6, 7; Roma 2:21. w19.01 16 ¶8

No sakey kan kabataan ya Kristiano, say sakey ya nagawaan mo et say pangipanengneng na interes ed saray maedad la. Nayarin marespetom ya paistorya ed sikara iray eksperiensya ra ed abayag lan panlilingkor da. Seguradon napabiskeg ka, tan mas napapaseseg ka pati sikara ya isindag so liwawa na katuaan. Sarag tayon amin ya i-welcome iramay mimiaral ed Kingdom Hall tayo. No inyasain kan mangidaulo ed pantitipon parad lawak na kimeyan, baleg so nagawaan mo pian natulongan iray maedad la ya makapibiang ed ministeryo. Kasin walay teritoryan sarag dan kimeyan? Wala ray situasyon ya nayarin iyulop ira ed mas ugaw ni pian naasistian ira. Sarag yo met ya ipanengneng so pakatalos ed saramay makapuy lay laman da tan lapud sirkumstansya ra et limitado so nagawaan da ed ministeryo. On, no ipanengneng yoy konsiderasyon tan pakatebek, natulongan iray ugaw ni tan maedad la, eksperiensyado tan balo ni, ya maseseg dan ipulong so maong a balita.​—Lev. 19:32. w18.06 23-24 ¶10-12

Agtayon balot ibabaliwala so impangibulos nen Jehova ed sikatayo manlapud impakaaripen ed kasalanan tan patey. Panamegley na dondon, sarag tayon panlingkoran so Dios tekep na malinis a konsiensia, tan maliket tayon gawaen itan. (Sal. 40:8) Likud ed pangibalikas tayo na pisasalamat ed si Jehova, nepeg tayon usaren met so mablin kawayangan tayo diad dugan paraan. Pinasakbayan itayo nen apostol Pedro ya agtayo nepeg ya usaren so kawayangan tayo bilang baraan pian gawaen so pilalek na laman. Kasin nanonotan mod satan ya pasakbay so agawad saray Israelita diad kalawakan? Tan nayarin nipaarap tayo met ed satan a peligro, ya ompan mas grabe ni ingen. Iyoopresi nen Satanas tan sayan mundo to iray mas makapasagyat a klase na kawes tan panag-ayos, naakan tan nainum, panagrelaks tan panagligliwaan, tan arum ni. Mabetbet ya uusaren na saray advertiser iray maganggana tan guapguapon modelo pian sagyaten itayon nawalaan na saray bengatlan agmet kaukolan. Lapud saratan et magmainomay itayon napatitan tan nausar ed aliwan paraan so kawayangan tayo. w18.04 10 ¶7-8