Hulyo

Manbibilay tayo ed “mapeligro tan mair-irap a panaon,” tan mas lalon oniirap so bilay antis ya onsabi so balon agew tan nipawil so tuan kareenan ed dalin. (2 Tim. 3:1) Kanian maabig no itepet tayod sarili tayo, ‘Siopay kekerewan ko na tulong tan panangigiya?’ Nilasus taon lay apalabas, binidbir na salmista ya kaukolan tayoy ontangay ed si Jehova parad tulong diad panaon na pankaukolan tayo. (Sal. 123:1-4) Say inengneng tayo ed si Jehova et inkompara tod paraan na inenengneng na aripen ed katawan to. Antoy labay ya ibaga na salmista? Siempre, aglabat onnenengneng so aripen ed katawan to pian naikdan na naakan tan naproteksionan noagta sikatoy lanang ya akabantay pian naamtaan to no anto ray ipagawa na katawan to, insan tampol ton gawaen iratan. Mipadpara, kaukolan ya inagew-agew tayon aralen so Salita na Dios pian naamtaan tayo no antoy linawa nen Jehova ed kada sakey ed sikatayo, insan tayo tumboken so panangigiya to. Diad satan tayo labat naseguro so tulong nen Jehova diad panaon na pankaukolan tayo. w18.07 12 ¶1-2

Tutukoyen nen Jesus so kibulos manlapud abayag lan impakaaripen tan pinasyan panamairap ya naeeksperiensya na too​—say pagmaliw ya “aripen na kasalanan.” (Juan 8:34) Lapud kasalanan et makakagawa itayo na mauges, tan naiirapan tayon gawaen so amta tayon duga odino saray bengatlan amta tayon sarag tayon gawaen. Kanian lapud satan, nibaga ya aripen itayo na kasalanan, ya manreresulta ed pakadismaya, pakasakitan, irap, tan patey. (Roma 6:23) Niwala labat ed sikatayo so tuan kawayangan ya nanliketan na inmunan atateng tayo no permanente lan naandi so kasalanan. Nen imbaga nen Jesus ya, “no mansiansia kayod salitak,” ipapanengneng ton wala ray kaukolan odino limitasyon ya nepeg tayon tumboken pian nibulos to itayo. (Juan 8:31) Bilang dedikadon Kristiano, imburi tayo lay sarili tayo tan pinili tayoy manbilay unong ed saray bangat nen Kristo. (Mat. 16:24) Singa impromisa nen Jesus, magmaliw itayon talagan bulos no naawat tayo lan amin iray gunggona na dondon bagat. w18.04 7 ¶14-16

Ikokonsidera nen Jehova so nalilikna na saray lingkor to​—anggano aliwan lanang ya duga so kanonotan da. Imanoen so agawad si Jonas. Imbaki na Dios iyan propeta to pian ipulong so mensahe na panangukom ed saray taga Ninive. Nen nagbabawi ira, ag-ira dineral na Dios. Balet, ag-itan agustoan nen Jonas. Sikatoy “sinmanok a maong” lapud ag-agawa so impropesiya to. Balet maan-anos si Jehova ed si Jonas tan tinulongan To pian nipetek so kanonotan to. (Jon. 3:10–4:11) Atalosan lanlamang nen Jonas no antoy labay ya ibangat nen Jehova ed sikato, tan impaisulat ni ingen nen Jehova ed sikato iyan salaysay pian nagunggonaan itayo. (Roma 15:4) Saray ginawa nen Jehova parad saray totoo to so mangipapaseguro ed sikatayo ya walay pililikna to ed saray lingkor to. Amta to so paniirap tan sakit ya nalilikna na kada sakey ed sikatayo. Natatalosan to ray sankaaraleman ya kanonotan tan emosyon tayo, pati saray limitasyon tayo. Tan ‘agto abuloyan a nipaarap tayod tukso ya agtayo nayarian.’ (1 Cor. 10:13) Talagan makaligliwa itan ya panamaseguro! w19.03 16 ¶6-7

Base ed Mosaikon Ganggan, saray tinuron mamatatken et responsabilidad da ya asikasoen iray espiritual ya bengatla, pati saray agpantatalosan tan krimen. Imanoen irayan alimbawa. No say sakey ya Israelita et akapatey, sikatoy agbastabasta pateyen. Imbestigaan ni na saray mamatatken ed syudad ya panaayaman to no antoy agawa antis iran mandesisyon no kasin sikatoy manepeg ya sentensiaan na patey. (Deu. 19:2-7, 11-13) Saray mamatatken et manlilingkor met bilang ukom ed nanduruman aspekto na inagew-agew ya bilay​—singa say panresolbe ed saray isyu ed komunidad nipaakar ed kayarian tan anggan say agpantatalosan na sanasawa. (Exo. 21:35; Deu. 22:13-19) No patas iray mamatatken tan uunoren na saray Israelita so Ganggan, nagunggonaan so amin, tan napagalangan na interon nasyon si Jehova. (Lev. 20:7, 8; Isa. 48:17, 18) Nanengneng tayo ed satan ya importante ed si Jehova so kada aspekto na bilay tayo. Labay to ya patas tan maaro so pantrato tayo ed arum. Tan iimanoen to ray ibabaga tan gagawaen tayo, anggan diad mismon abung tayo ya anggapoy arum ya makakarengel o makakanengneng. w19.02 23 ¶16-18

No nai-stress tayo, mairap so magmaliw ya mauyamo. Nayarin makapansalita tayoy ansakit tan aliwliway pantrato tayod arum. No bilang ta nai-stress ka, nonot moy alimbawa nen Jesus. Diad unor la ran bulan nen Jesus diad dalin, sikatoy naaburidon maong. Amta to ya sikatoy pateyen tan manirap ya maong. (Juan 3:14, 15; Gal. 3:13) Manga pigaran bulan antis na ipatey to, imbaga to ya agaylay pakakagonigon to. (Luc. 12:50) Tan pigaran agew labat la antis na ipatey to, imbaga to: “Nagogonigon ak.” Nanengneng tayo ya sikatoy mapaabeba tan mapasakop ed Dios nen ibabalikas toy liknaan to diad pikakasi. (Juan 12:27, 28) Nen asabi lay oras, makpel ya inyawat nen Jesus so sarili to ed saray kabusol na Dios, ya amatey ed sikato diad ansakisakit tan makapabaing ya paraan. Anggano nanaaburido tan maniirap ya maong, mapaabeba ton ginawa so linawa na Dios. Talagan nibaga tayo sirin ya si Jesus so sankaabigan ya alimbawa ed pangipanengneng na kauyamoan anggano nanaaburido!​—Isa. 53:10. w19.02 11 ¶14-15

No maminsan, ondadalan tayod mairap iran kipapasen kanian kaukolan tayoy pakpel pian makaatendi tayon regular ed saray aral. Arum ed saray agagi tayo et onaatendi ed saray aral anggano maneermen ira, walay pakakadismayaan da, odino walay sakit da. Say arum et makpel ya onaatendi ed saray aral anggano susumpaen ira na kapamilya ra odino say gobierno. Isip mo pan magano no panon ya makaapekto so alimbawa tayo ed saray agagi ya nipriso lapud pananisia ra. (Heb. 13:3) No naamtaan da ya tuloytuloy tayon manlilingkor ed si Jehova anggano wala ray subok, napapaseseg iran pansiansiaen ya mabiskeg so pananisia, pakpel, tan integridad da. Nen apriso si Pablo diad Roma, sikatoy malikeliket kada no naamtaan ton matoor ya manlilingkor ed Dios iray kapananisiaan to. (Fil. 1:3-5, 12-14) Ag-abayag antis na inkibulos nen Pablo odino kayarin mismo na satan, sinulatan to iray Hebreon Kristiano. Diad satan a sulat, binilin to irayan matoor ya Kristiano ya agdan balot papaulyanan so pantitipon.​—Heb. 10:25. w19.01 28 ¶9

Labay nen Satanas ya magmaliw tayon singa sikato​—sakey ya rebelde ya agmanguunor ed saray estandarte nen Jehova tan makasarili. Uusaren to ray totoo ed kaliberliber tayo ya naimpluensyaan to la tan labay to ya ‘naderal’ so panagnonot tan kakikiwas tayo. (1 Cor. 15:33) Sasalien met nen Satanas ya impluensyaan so puso tayo ya manmatalek ed karunongan na too imbes ya diad kanonotan nen Jehova. (Col. 2:8) Imanoen so sakey ya ideya ya ikakayat nen Satanas​—say pampayaman so sankaimportantian ya gawaen ed bilay. Saramay ontan so kanonotan da et nayarin onyaman, nayari met ya andi. Balanglan onyaman ira o andi, napepeligro ira. Akin? Lapud nayarin akapokus iran maong ed pananap na kuarta pian nagawa so pipirawaten dad bilay anggano mansakit ira, nabuyak so pamilya ra, tan naderal ni ingen so pikakaaro da ed Dios. (1 Tim. 6:10) Misalsalamat tayo lapud tutulongan itayo na Ama tayod tawen ya nawalaan na balansin panmoria ed kuarta.​—Ecl. 7:12; Luc. 12:15. w19.01 15 ¶6; 17 ¶9

Antis nin linmad dalin si Jesus pian ipanengneng so perpekton alimbawa no panoy pamaseseg ed arum, amta la na saray matoor ya lingkor nen Jehova ya kaukolan day mamaseseg. Nen asingger lan onataki iray Asiryano, tinipon nen Hezekias iray pangulo na armada tan totoo na Juda pian pasesegen ira. Tan “apabiskeg iray totoo ed saray salita [to].” (2 Awa. 32:6-8) Anggan kaukolan a mismo nen Job so panamaseseg, siansian imbangat to so taloran “makapagonigon a managligliwa” to no panon so mamaseseg. Imbaga to ya no sikatoy walad kipapasen da, ‘pabiskegen to ira na saray salitan ompapaway ed sangi to, tan say panagligliwa na bibil to et mangiter na inawa ed sikara.’ (Job 16:1-5) Akaawat a siansia si Job na panamaseseg manlapud si Elihu tan ed si Jehova ya mismo.​—Job 33:24, 25; 36:1, 11; 42:7, 10. w18.04 16 ¶6; 17 ¶8-9

Deneskribe la nen Isaias no panon ya pabiskegen nen Jehova iray totoo to nen inkuan to: “[Si] Jehova et onsabin walaay pakayari, tan say taklay to et manuley parad sikato.” (Isa. 40:10) Mabetbet ya uusaren ed Biblia so salitan “taklay” pian isimbolo so pakayari. Kanian ipapanonot ed sikatayo na balikas ya “say taklay [nen Jehova] et manuley” ya si Jehova et makapanyarin Ari. Inusar to so agnaparaan a biskeg to pian tulongan tan iyagel iray lingkor to nensaman, tan tuloytuloy ton papabiskegen tan proprotektaan iray manmamatalek ed sikato natan. (Deu. 1:30, 31; Isa. 43:10, paimanod leksab) Totooren nen Jehova so sipan to ya “Pabiskegen ta ka” lalo la no papasegsegangen itayo na saray kalaban. Diad arum a pasen na mundo natan, gagawaen na saray kalaban so anggaay nayarian da ya patundaen so kimey tayon panagpulong odino sebelan so organisasyon tayo. Balet agtayo masyadon mapaga ed ontan iran panangataki. Walay impaseguro nen Jehova ya mangiiter ed sikatayo na biskeg tan kompiyansa. Insipan to: “Ag-ontalona so antokaman ya armas a gawaen parad sika.”​—Isa. 54:17. w19.01 5-6 ¶12-13

Aliwan singa saray ayayep, walay espiritual a pankaukolan mo, ya napenek labat na Manamalsa. (Mat. 4:4) No ondengel kad sikato, nawalaan kay aralem a pakatalos tan karunongan, tan magmaliw kan maliket. Pepeneken na Dios so espiritual a pankaukolan mo diad panamegley na Salita to tan dakel ya espiritual a naakan ya itatarya to panamegley na “matoor tan makabat ya aripen.” (Mat. 24:45) Tan talagan dakel tan makapabiskeg iratan ya naakan! (Isa. 65:13, 14) Say espiritual a naakan ya itatarya na Dios et mangiter ed sika na karunongan tan abilidad a mannonot, ya manprotekta ed sika ed dakel ya paraan. (Pro. 2:10-14) Singa bilang, lapud saratan a kualidad et nibiig mo iray palson bangat, singa say pananisia ya anggapoy Manamalsa. Naprotektaan ka na saratan ed katilaan ya say kuarta tan kaykayarian so makapangiter na liket. Tan natulongan ka na saratan pian nabidbir tan nalabanan iray mauges a pilalek tan saray ugalin makapuy so epekto tod sika. Kanian itultuloy moy mansagpot pian nawalaan kay karunongan a manlalapud Dios tan abilidad a mannonot, ya ipasen mo iratan ya kayamanan! w18.12 20 ¶6-7

Nasabi ni kasi panaon sano say bilay tayo et “singa karukey na bilay na sakey a kiew”? Wala ray kiew ya manbibilay na nilibon taon. Kaukolan ya maksil so laman na too pian nawalaan na ontan ya karukey na bilay. No manbilay iray totoo ed kipapasen ya impasakbay nen Isaias, ontua so pipirawaten da, sakey a paraiso! Tan nasumpal itan ya propesiya! Nonot mo no panon ya ipapanengneng na saray promisa ya walay paraiso ed arapen: Bendisyonan na Dios so totoo ed interon dalin. Anggapo lay napeligro lapud saray ayayep odino saray totoon inaayep so ugali ra. Onabig la ray bulag, telek, tan lupoy. Saray totoo et mangipaalagey lay sarili ran ayaman tan panliketan day pantanem na saray pangalaan day naakan. Mas andukey ni bilay da nen saray kiew. On, nabasa tayo ed Biblia iray ebidensya ya nagawa itan ed arapen. Balet, ompan wala ray mangibaga ya iikdan tayoy duman kabaliksan iratan ya propesiya. Antoy mabiskeg a rason mo no akin ya manisia kan walan talagay paraiso ed dalin diad arapen? Angiter na mabiskeg a rason so sankaimportantian ya too a nambilay kapiganman.​—Luc. 23:43. w18.12 5 ¶13-15

Sarag na nonot tayo so onadapta tan manguman. Antokaman ya pananguman et akadepende ed no antoy iloloob tayod nonot tayo tan no dinan so pipilien tayon mansiansia ditan. No pansiansiaen tan dalepdepen tayoy paraan na panagnonot nen Jehova, napaneknekan tayod sarili tayo ya say kanonotan to so duga. No ontan so gawaen tayo, magmaliw lan natural ed sikatayo ya aligen so paraan na panagnonot to. Balet, tandaan ya pian naalig tayoy paraan na panagnonot nen Jehova, kaukolan ya agtayo la “manpapaimpluensya ed sayan sistema na mundo.” Nepeg ya agtayo la iloloob ed nonot tayo iray ideya odino panmoria ya kontra ed kanonotan na Dios. Say kaimportantian na panggawa ed sayan unonan paraan et nikompara ed naakan. Say sakey ya toon labay ton maong so bunigas na laman to et nepeg ya mangan na masustansia iran naakan. Balet wala kasi kana na satan no sikatoy mangan met lanlamang na aliwan masustansia? Mipadpara, anggapo lanlamang so gunggona na pansasagpot tayon aralen so kanonotan nen Jehova no aabuloyan tayon onloob ed nonot tayo so panagnonot na sayan mundo. w18.11 21 ¶14-15

Nepeg ya determinado itayon manbilay unong ed katuaan diad kada agew. Isulong tayod awak tayo so balkes na katuaan. Diad panaon na Biblia, say balkes na sundalo so onsusuporta tan manproprotekta ed awak to tan ed saray internal organ to. Balet pian makapangiter na proteksion so balkes to, kaukolan ya malet itan ya akasulong. Ta no malukak so balkes, aglanlamang makasuporta itan. Panon itayon naprotektaan na espiritual a balkes na katuaan? No pansiansiaen tayon malet ya akasulong itan ed sikatayo, naprotektaan itayo manlapud makapuy ya panagkatunongan tan ontulong itan ed sikatayon manggawa na maabig iran desisyon. Sano natutukso odino nasusubok itayo, pabiskegen na katuaan ya walad Biblia so determinasyon tayo ya gawaen no antoy duga. No panon ya say sundalo et agton balot salien so onlan milaban ya anggapoy balkes to, nepeg ya determinado itayo met ya agbalot lukakan odino ekalen ed sikatayo so balkes na katuaan. Imbes, gawaen tayo so anggaay nayarian tayo pian mansiansian malet ya akasulong itan ed sikatayo diad pambilay ya mitunosan ed katuaan. w18.11 12 ¶15

Kaukolan tayoy mansagpot pian naalmo tayoy katuaan ed Salita na Dios. Nepeg ya akaparaan tayon mansakripisyo pian naala itan. Singa imbaga na marunong ya nansulat na Proverbio, no ‘asaliw,’ odino wala lad sikatayo so “katuaan,” nepeg ya agtayo itan “ilalako,” odino ibabalang. Anggan say bengatlan libre et nayarin wala nin siansiay iter mon kasalat to. Say Hebreon salita ya impatalos ya “saliw” diad Proverbio 23:23 et mankabaliksan met na “gamoran.” Parehon ipapatnag na saratan ya salita a kaukolan so pansagpot odino nepeg ya walay isalat parad sakey a bengatla. Nayari tayon iyilustra so pangaliw ed katuaan diad onian paraan. Kunwari et naamtaan mon walay libren ponti diad sakey ya tindaan. Kasin bigla labat ya niwalad lamisaan tayo so ponti? Andi. Kaukolan ya mansagpot tayon onlad tindaan pian makala tayo. Kasin libre iray ponti? On, balet kaukolan tayoy mansagpot tan ipanaon so onlad tindaan. Mipadpara, agkaukolan so kuarta pian nasaliw so katuaan. Balet kaukolan tayoy mansagpot pian naala itan. w18.11 4 ¶4-5

Intagar nen Jesus si Pedro, Santiago, tan Juan ya milad sikato ed sakey ya atagey a palandey. Nen wadman ira, akanengneng iray nikadkaduman pasingawey. Sinminag so lupa nen Jesus tan nagmaliw a masnag so kawes to. Anengneng day duaran lalaki, ya singa si Moises tan Elias, ya mitotongtong ed si Jesus nipaakar ed magano lan ipatey tan kioli to. (Luc. 9:29-32) Insan tinmarong ed sikara so maliwawan lurem, tan walay arengel dan boses​—say boses na Dios! Anengneng ed saman ya pasingawey so gloria tan pakapanyari nen Jesus sano sikatoy magmaliw lan Ari ed Panarian na Dios. Seguradon sikatoy apaseseg tan apabiskeg ya arapen so panirap tan ansakit ya ipapatey. Lapud sayan pasingawey, apabiskeg met so pananisia na saray disipulo tan akatulong iya pian magmaliw iran akaparaan ed saray subok ed katooran da tan ed baleg a kimey ya gawaen da ed dakel a taon. Manga 30 taon kayari na satan, tinukoy nen apostol Pedro iman ya pasingawey, a mangipapanengneng ya malinlinew ni itan ed nonot to.​—2 Ped. 1:16-18. w19.03 10 ¶7-8

Antoy sakey ya pidumaan na saray tuan Kristiano ed saray membro na palson relihyon? ‘Mansasalita tayoy tua.’ (Zac. 8:16, 17) Naynay tayon ibagay tua ed saray katrabaho, kakaaro, inar-aro tayo, tan anggan diad saray agtayo kabat. Kasin sakey kan kabataan tan labay mon awaten ka na arum met ya kabataan? Seguradoen mon aliwan doble so panagbilay mo, ya ompatnag a makalakal ka no kaibam so pamilyam tan saray agagi, balet duma la so ugalim no kaibam la ray kabataan ya aliwan Tasi tan diad social media. Panagtila itan ed atateng mo, ed saray kaagian, tan ed si Jehova. (Sal. 26:4, 5) Amta nen Jehova no sikatoy ‘papagalangan tayo labat panamegley na bibil, balet arawrawi ed sikato so kapusoan tayo.’ (Mar. 7:6) Maabig sirin no unoren tayo iyan simbawa: “Komon ta ag-ibegan na pusom iray makasalanan, noagta takotan moy Jehova diad amin a panaon.”​—Pro. 23:17. w18.10 9 ¶14-15

Say totoo na Dios et sakey ya espiritual a pamilya​—ya kabkabat lapud panangaro dad sakey tan sakey. (1 Juan 4:21) Satan ya panangaro et maslak ya napatnagan, aliwa labat ya diad angkabaleg iran gawa na panagsakripisyo, noagta diad dakel met iran angkelag a paraan, singa say maabig ya panagsalita tan gawa. No maabig tan makonsidera so panagtrato tayo ed arum, ‘aaligen tayoy Dios, bilang inad-aro ton ananak.’ (Efe. 5:1) Perpekton inalig nen Jesus so Ama to. “Dago kayod siak, amin yon mansasagpot tan nabebelatan,” so imbaga nen Jesus, “tan pampainawaen ta kayo . . . , ta mauyamo tan mapaabeba ak.” (Mat. 11:28, 29) No aaligen tayoy alimbawa na Kristo diad “[pangipapatnag] na konsiderasyon ed samay pakaskasi,” niwalad sikatayo so pabor na Ama tayo tan naliketan itayon maong. (Sal. 41:1) Kanian, ipanengneng tayoy aro diad pantultuloy ya pangipanengneng na konsiderasyon diad pamilya, kongregasyon, tan diad lawak na ministeryo. w18.09 28 ¶1-2

No wala ray onsabin kalamidad, walay pankanawnawa na saray totoo na Dios ya mikimeyan ed sikato diad itulong dad saray agagi ed praktikal iran paraan. Singa bilang, mangiiter iray pinansyal a tulong ed saramay apektado. (Juan 13:34, 35; Gawa 11:27-30) Say sakey nin paraan et diad itulong ed panaglinis tan pangapiger ed saray aderal ya abung. Si Gabriela, sakey a sister ya taga Poland, et aderal so abung to lapud delap, balet aliketan nen anengneng ton sinmabi iray agagi manlapud asingger iran kongregasyon pian ontulong. “Agko labay ya pantongtongan iray naandi ed siak​—materyal labat iraman,” so imbaga to. “Imbes, labay kon ibaga ed sikayo no panon karakel so niwala ed siak. Lapud sayan eksperiensya et apaseguroan ak ya say pagmaliw a kabiangan na Kristianon kongregasyon et aliwa labat lan nikadkaduman pribilehyo, noagta lapuan met na liket.” Dakel ed saray akaawat na tulong kayari na kalamidad et ontan met so nalilikna ra. Tan saramay mikikimeyan ed si Jehova diad itutulong dad arum et talagan maliket met.​—Gawa 20:35; 2 Cor. 9:6, 7. w18.08 26 ¶12

Pian naalwaran so puso tayo, nepeg tayon amtaen no anto ray peligro tan onkiwas tayon tampol pian protektaan so sarili tayo. Ipapanonot na satan ed sikatayo so gagawaen na sakey ya managbantay nensaman. Diad panaon nen Arin Solomon, saray managbantay et akaalagey ed padir na syudad tan mangiiter iray pasakbay no walay onsasabin peligro. Sayan alimbawa et makatulong pian natalosan tayo no antoy nepeg tayon gawaen pian agnaimpluensyaan nen Satanas so kanonotan tayo. Nensaman, saray managbantay ya walad padir tan saray bantay na puerta et mantutulongan pian naprotektaan so syudad. (2 Sam. 18:24-26) Seseguroen da ya akasara iray puerta no walay nitan lan kalaban. (Neh. 7:1-3) Say nipasal ed Biblia ya konsiensia tayo et singa managbantay ya mangiiter ed sikatayo na pasakbay no sasalien nen Satanas ya looban so puso tayo​—diad arum ya salita, no sasalien ton impluensyaan so kanonotan, liknaan, motibo, odino pilalek tayo. Kada no pasakbayan itayo na konsiensia tayo, nepeg tayon dengelen itan tan isara tayo so puerta, a singa panangibaga. w19.01 17 ¶10-11

Saray ugaw nin brother et kaukolan ya husgaan, aliwan base ed personal iran panmoria odino kultura, noagta base ed estandarte na Biblia. (2 Tim. 3:16, 17) Saray agmakasulatan iran panmoria lapud kultura so nayarin magmaliw a rason no akin ya agnirekomenda iray kualipikadon brother. Diad sakey a bansa, sakey ya kualipikadon ministeryal a lingkor so naikdan na ambelat iran responsabilidad. Anggano onabobon iray elder ed kongregasyon to ya akapet to lay Makasulatan iran kualipikasyon parad sakey ya elder, siansian sikatoy ag-inrekomenda. Impasoot na arum ya maedad lan elder ya ugaw nin maong ya nengnengen imay brother pian magmaliw ya elder. Makapaermen ta ag-inrekomenda imay brother lapu labat ta sikatoy ugaw nin nengnengen. Ipapanengneng na saray report ya sayan panagnonot et nagagawa met ed nanduruman bansa. Talagan importantin manmatalek tayod Kasulatan imbes ya diad mismon panmoria tayo! Atan labat so paraan pian naunor tayoy Jesus ya agtayo manhusga base labat ed nanenengneng tayo.​—Juan 7:24. w18.08 12 ¶16-17

Walay sakey ya peligro no tampol tayon mangipasa na e-mail tan text. Diad arum a bansa et nalilimitaan odino isesebel ni ingen so kimey tayo. Saray onsusumpa ed sikatayo ditan et nayarin gagalaen day mangikayat na saray balita ya denesinyon manaktakot ed sikatayo odino mangekal na talek tayod sakey tan sakey. Imanoen pay agawa diad datin Soviet Union. Say secret police, ya kabkabat ed tawag ya KGB, et angikayat na balita ya wala ra kunoy kabkabat a brother ya nantraidor ed agagi ra. Dakel so anisia ed satan ya palson balita, kanian bilang resulta, tinaynan da so organisasyon nen Jehova. Talagan makapaermen! Maong labat ta dakel so pinmawil, balet wala met iray aglan balot pinmawil. Aderal so pananisia da. (1 Tim. 1:19) Panon tayon napaliisan itan? Agtayo mangikakayat na negatibo odino ag-apruebaan iran balita. Agtayo magmamaliw ya ignorante odino bastabasta manisia. Seguroen ya amta tayo no antoy tua. w18.08 4 ¶8

Diad saray sankaunaan a Griegon manuskrito, aglanang ya uusaren iray punctuation. Kanian say tepet: Kasin say ibabaga nen Jesus et, “Ibagak ed sika, natan nakaiba ta ka ed Paraiso”? Odino say ibabaga to et, “Ibagak ed sika natan, nakaiba ta ka ed Paraiso”? Tandaan ya antis na satan et oniay imbaga nen Jesus ed saray papatumbok to: “[Say] Anak na too [et] taloy agew tan taloy labi to naani ed dalem na dalin.” (Mat. 12:40; 16:21; 17:22, 23; Mar. 10:34; Gawa 10:39, 40) Kanian aglinma si Jesus ed Paraiso diad agew na impatey to tan impatey na samay kriminal. Si Jesus et pigay agew ya walad “Lubok [odino “Hades”]” anggad sikatoy pinaoli na Dios. (Gawa 2:31, 32; paimanod leksab) Ag-amta na samay kriminal ya akisipanan si Jesus ed saray matoor ya apostol to ya nakaiba to ra ed Panarian diad tawen. (Luc. 22:29) Ontan met, ag-anggan abautismoan iman ya kriminal. (Juan 3:3-6, 12) Kanian, say impromisa nen Jesus et diad paraiso ed dalin ya nagawa ed arapen. w18.12 6 ¶17-18, 20-21

Ag-abayag et mandadayew la ray Israelita ed balitok a kilaw ya baka! Anggano mapatpatnag lan agda inunor si Jehova, pinalikdo day sarili da nen inisip dan wala ni ran siansia ed dapag to. Agayla, anggan si Aaron et tinawag ton “piesta parad si Jehova” so impandayew da ed kilaw a baka! Antoy alikna nen Jehova? Sikatoy asakitan ya maong. Imbaga tod si Moises ya saray Israelita et “nanggaway mauges” tan “sinmian ed dalan ya ingganggan [Ton] tumboken da.” Lapud “mandarlang a sanok” nen Jehova, inisip ton deralen so balo ni labat a nasyon ya Israel. (Exo. 32:5-10) Balet, denesidi nen Jehova ya agto la deralen so amin ya Israelita. (Exo. 32:14) Anggano kaibay Aaron ed impanggawa na idolo, sikatoy nagbabawi tan akilad saray arum ya Levita ya imbaga dan wala rad dapag nen Jehova. Anggaman nilibo so inatey lapud impandayew dad idolo, saramay dinmapag ed si Jehova et pinaseguroan ya nabendisyonan.​—Exo. 32:26-29. w18.07 20 ¶13-16

Anto so sankaabigan ya klase na panamidbir ya nayarin naawat tayo? Aliwan satan imay klase na atension ya aanapen na totoo diad eskuelaan, trabaho, tan diad industriya na saray sikat a totoo ed sayan mundo. Imbes, satan imay klase ya deniskribe nen Pablo diad sarayan salita: “Natan ta kabat yo lay Dios, odino kabat kayo la na Dios, akin et ompapawil kayo lamet ed saray makapuy tan andi-kakanaan ya inuugaw iran bengatla tan labay yo lamet so manpaaripen ed saratan?” (Gal. 4:9) Talagan baleg a pribilehyo ya ‘nakabat itayo na Dios,’ say Sankatagyan a Manuley diad uniberso! Labay ton nawalaan itayo na maapit a relasyon ed sikato. Singa imbaga na sakey ya iskolar, sikatayo so “pangipapatnagan to na panangabobon to.” No bibidbiren itayo nen Jehova bilang kakaaro to, nasusumpal so gagala no akin ya manbibilay tayo.​—Ecl. 12:13, 14. w18.07 8 ¶3-4

Pian nagunggonaan tayo ed saray ganggan na Dios, nepeg tayon aroen tan respetoen iratan. (Amos 5:15) Balet panon tayon nagawaan itan? Importante ya aralen tayon ipasen iray bengatla a singa ed pangipapasen nen Jehova. Pian iyilustra: Isipen pan walay problemam ed kakaugip. Inrekomenda na doktor mo ya kaukolan moy man-diet, man-ehersisyo, tan umanen so estilo na kabibilay mo. Nen sinalim ya tumboken itan, naimanom ya epektibo! Seguradon misalsalamat kad doktor mo lapud tinulongan to ka ya magmaliw lan normal so kakaugip mo. Mipadpara, inikdan itayo na Amalsa na saray ganggan ya manprotekta ed sikatayo manlapud saray makaderal ya epekto na kasalanan tan pian magmaliw ya maliket so bilay tayo. Isipen pa labat so nagunggona tayo no unoren tayo iray ganggan na Biblia nipaakar ed panagtila, panagsaol, panagtakew, seksual ya imoralidad, karawalan, tan espiritismo. (Pro. 6:16-19; Apo. 21:8) No makaawat tayoy dakel ya bendisyon lapud gagawaen tayoy panlabayan nen Jehova, seguradon onaralem so panangaro tan apresasyon tayo ed si Jehova tan ed saray ganggan to. w18.06 17 ¶5-6

Nayarin natatakot so gobernador ya ompan manrebelde iray totoo ed gobierno lapud si Jesus, tan atan so manunan pakakapagaan nen Pilato legan na uley to. Inmebat si Jesus: “Say Panarian ko et agkabiangan na sayan mundo.” (Juan 18:36) Agto labay so mibabali ed politika ta say Panarian to et diad tawen. Imbaga tod si Pilato ya say kimey to diad dalin et ‘pian tasian to so katuaan.’ (Juan 18:37) No natatalosan tayon maong so kimey tayo ya singa ed si Jesus, paliisan tayoy onsuporta ed saray paraan ya gagawaen na totoo pian niwalay kawayangan, anggan diad liknaan labat odino anggano agtayo ibabalikas. Aliwan mainomay itan. “Dakdakel so totoo ed lugar mi ya labay day pananguman,” so imbaga na sakey ya ombiabiahen manangasikaso. “Maslak ya totoo et nagmaliw lan nasyonalistiko tan iisipen dan mas maong so bilay da no say mismon kalahi ra so manuley ed sikara. Maong labat ta pansiasiansiaen na saray agagi so pankakasakey da diad sigpot ya pibibiang da ed panangipulong na maong a balita na Panarian. Maniilalo ira ed Dios ya solusyonan toy ag-inkahustisya tan arum nin problema ya aarapen tayo.” w18.06 4-5 ¶6-7

Talora labat ya libro ed Hebreon Kasulatan​—1 Awaran, Job, tan Zacarias—​so pakabasaan ed si Satanas, ya mankabaliksan na “Sumusumpa.” Akin ya daiset labat so nabasa nipaakar ed kalaban tayo antis na isabi na Mesias? Mapatnag ya aglabay nen Jehova ya naikdan na importansia si Satanas ed pangipasulat na dakel ya impormasyon diad Hebreon Kasulatan nipaakar ed sikato tan ed gagawaen to. Say manunan gagala nen Jehova ed impangipuyan tod satan ya kabiangan na Kasulatan et pian nabidbir so Mesias tan nitonton so totoo na Dios ed sikato. (Luc. 24:44; Gal. 3:24) Nen asumpal iratan tan sinmabi la so Mesias, inusar nen Jehova si Jesus tan saray disipulo to pian dakel ni naamtaan nipaakar ed si Satanas tan saray anghel ya akikomplot ed sikato. Dugaruga itan, ta si Jesus tan saray alanaan ya kaiba ton manuley so usaren nen Jehova ya maneral ed si Satanas tan ed saray ontutumbok ed sikato. (Roma 16:20; Apo. 17:14; 20:10) Tandaan, limitado labat so pakapanyari na Diablo. Tutulongan itayo nen Jehova, Jesus, tan saray matoor ya anghel. Diad tulong da et natalo tayo so kalaban tayo. w18.05 22-23 ¶2-4

Ipasen itayo labat nen Jehova bilang lingkor to no manbunga itayo. (Mat. 13:23; 21:43) Kanian diad ilustrasyon ya naromog ed Juan 15:1-5, say bunga ya nepeg a pawalaen na kada Kristiano et ag-ontutukoy ed saray balon disipulo ya nayarin atulongan tayo. (Mat. 28:19) Ta no onman, ompaway a saramay matoor ya agagi ya anggapoy napapakiwas dan magmaliw a disipulo nen Jesus, lapud agmaawat iray totoo ed teritoryan pampupulongan da, et singa samay agmanbubungan sanga diad ilustrasyon nen Jesus. Balet aliwan makatunongan itan! Akin? Lapud agtayo nayarin puersaen iray totoo ya magmaliw a disipulo. Kontra itan ed linawa nen Jehova, agto itayon balot piliten ya gawaen so bengatlan agtayo nasarag. Amin ya igaganggan nen Jehova ed sikatayo et sarag tayon gawaen. (Deu. 30:11-14) Anto sirin so bunga ya nepeg tayon pawalaen? Malinew ya say tutukoyen to yan bunga et say kimey ya nagawaan na kada sakey ed sikatayo. Anto itan a kimey? Say panagpulong na maong a balita na Panarian na Dios.​—Mat. 24:14. w18.05 14 ¶8-9

Amayamay so lider na relihyon natan, balanglan tatawagen ya pastor, pari, rabbi, swami, odino arum nin titulo. Singa saray kapara da nen inmunan-siglo, sikaray “manesebel ed katuaan” ya manlalapud Salita na Dios tan say “katuaan na Dios et insalat da ed katilaan.” (Roma 1:18, 25) Ibabangat da iray katilaan ya singa say “no aligtas ka la, ligtas ka la,” ag-ipatey na kamarerwa, reinkarnasyon, tan say makulangkulang ya ideya ya aawaten na Dios iray homoseksual ya kagagawa tan say pankasal na parehon laki o parehon bii. Mantitila iray politiko pian ibalang iray totoo. Sakey ed sankabalegan iran tila ya narengel tayo ni labat et no iyabawag dan wala lay “kareenan tan kaligenan!” Balet “tampol ya onsabid sikara so biglan kadederal.” Agtayo nepeg a panisiaan iratan ya lider na politika. Katilaan labat itan, ta diad tua et napepeligro la iyan sistema na mundo! Tan “kabkabat [tayo] a say agew nen Jehova et onsabin singa matakew ed labi.”​—1 Tes. 5:1-4. w18.10 7-8 ¶6-8

Uusaren nen Jesus iray alanaan ya agagi to tan “saray prinsipe” ya kabiangan na arum ya karnero pian pasesegen tan igiya iramay maneermen tan nadidismaya diad sayan mairap ya panaon. Ontan so kaukolan dan gawaen ta saratan ya elder et aliwan “katawan” na pananisia na arum, noagta, “kakimeyan” ira pian maliket iray agagi ra. (Isa. 32:1, 2; 2 Cor. 1:24) Angipanengneng si apostol Pablo na alimbawa ya aligen tayo. Oniay insulat tod saray napapasegsegang ya Kristiano ed Tesalonica: “Lapud maaron panamabli mid sikayo, aliwa labat a say maong a balita nipaakar ed Dios so determinado min inabang ed sikayo, noag pati say mismon bilay mi, ta inar-aro mi kayo.” (1 Tes. 2:8) Pian ipanengneng ya say panamaseseg et aliwan puro salita labat, imbaga nen Pablo ed saray mamatatken ed Efeso so nabasad teksto ed sayan agew. w18.04 21-22 ¶6-8

Pian niwala ed sikatayo itan ya kawayangan tan nagunggonaan ed satan, nepeg tayoy “manguman pian mandayew ed si Jehova,” labay ton ibaga et nawalaan tayo na personal ya relasyon ed sikato. (2 Cor. 3:16) Duma so impangipasen na saray Israelita ed impideneng nen Jehova ed sikara diad kalawakan. Agda itan tinalosan diad espiritual a paraan. Say puso tan nonot da et singa asakbongan tan inmawet, akapokus labat ira ed no panon dan usaren ed makalaman ya paraan so balon kawayangan da nen nibulos irad Ehipto. (Heb. 3:8-10) Balet, say kawayangan ya manlalapud espiritu nen Jehova et mas ni nen say kibulos ed literal ya impakaaripen. Mas ni nagawaan na satan nen say iisipen na too, say espiritu nen Jehova so mangibulos ed sikatayo manlapud panangaripen na kasalanan tan ipapatey, ontan met ed panangaripen na palson panagdayew tan saray kagagawa na satan. (Roma 6:23; 8:2) Talagan makapadinayew itan ya kawayangan! Nagunggonaan so sakey ed satan ya klase na kawayangan anggano sikatoy nipriso odino naaripen.​—Gen. 39:20-23. w18.04 9 ¶3-5