Hunyo

Talagan makapabiskeg itan ya sipan ed saray apostol! Anggano agmalinew ed sikara so labay ya ibaga nen Jesus, ya magano lan manampot diad dalin so bilay na Lider da, agto labay ya ibagan anggapo lay ontulong ed sikara. Akaparaan si Jehova ya ebatan iray pikakasi da parad antokaman a tulong ya nakaukolan da pian nasumpal day ganggan ya ipulong so mensahe na Panarian. Tan tua itan ta ag-abayag et naeksperiensya da no panon ya inebatan nen Jehova so ikekerew da na tulong. (Gawa 4:29, 31) Ontan met natan, legan tayon mansusungdo pian magmaliw a mabunga, panliliketan tayoy pikakaaro ed si Jesus. Sakey ni, segurado tayon akaparaan si Jehova ya ebatan iray pikakasi tayo parad tulong pian nasarag iray subok, ya nayarin naeksperiensya tayo legan tayon ipupulong so maong a balita na Panarian. (Fil. 4:13) Talagan misalsalamat itayo ta naeebatan iray pikakasi tayo tan sakey tayod saray kaaro nen Jesus! Sarayan regalo nen Jehova so mamapabiskeg ed sikatayon mantultuloy ya manbunga.​—Sant. 1:17. w18.05 21 ¶17-18

Diad loob labat na limay taon, nanengneng na saray Kristianon Judio ya manaayam ed Jerusalem so isabi na “agew nen Jehova” tan nabidbir da iray tanda ya imbaga nen Jesus ed sikara ya ombatik la rad kapalandeyan. (Gawa 2:19, 20; Luc. 21:20-22) Satan ya agew nen Jehova et agawa nen 70 C.E., sanen inukom to so Jerusalem panamegley na saray Romano. Natan, talagan panisiaan tayo ya say “baleg tan makapataktakot” ya agew nen Jehova et asingsingger la. (Joel 2:11) Oniay imbaga nen propeta Sofonias: “Asingger lay baleg ya agew nen Jehova! Asingger la itan tan mapmaples ya onsasabi!” (Sof. 1:14) Onaplika met itan ya pasakbay ed panaon tayo. Lapud asingger lay agew nen Jehova, imbaga nen Pablo ya “iyansakit tayoy sakey tan sakey pian makapansasagyatan itayo a mangaro tan manggaway maabig iran kimey.” (Heb. 10:24, paimanod leksab) Kanian kaukolan ya magmaliw tayon mas interesado ed saray agagi pian napapaseseg tayo ra kapiganman ya kaukolan da itan. w18.04 20 ¶1-2

Talagan makapaseseg so panamaseguro ya inter nen Jehova ed si Josue antis a manayam so totoo To ed Insipan a Dalin! Aglabat papasesegen nen Jehova iray totoo to bilang indibidual, papasesegen to met ira bilang grupo. Oniay impropesiya nen Jehova ya gawaen to pian naligliwa iray Judio ya inawit ed Babilonia: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka, on, tulongan ta ka. Talagan bembenan ta ka ed kawanan a limak unong ed inkatunong ko.” (Isa. 41:10) Akaawat met na ontan ya panamaseseg iray inmunan Kristiano ya anggad saray lingkor na Dios natan. (2 Cor. 1:3, 4) Anggan si Jesus et akaawat met na panamaseseg manlapud Ama to. Nen abautismoan si Jesus, walay arengel ton boses manlapud tawen: “Saya so Ana’ko, say inad-arok, ya inabobonan ko.” (Mat. 3:17) Seguradon apaseseg si Jesus ed saratan ya salita legan ton susumpalen so ministeryo tod dalin. w18.04 16 ¶3-5

No babasaen na totoo natan so ganggan na Dios ed si Adan, iisipen dan insiblet ed si Adan so kawayangan ton gawaen no antoy labay to. Kanian agda sirin natatalosan ya say kawayangan, o kanepegan a mandesisyon no antoy gawaen, et agmipara ed kanepegan a mandesisyon no antoy maong tan mauges. Walay kawayangan nen Adan tan Eva ya mandesisyon no kasin unoren day Dios odino andi. Balet si Jehova labat so walaay sigpot a kanepegan ya mangibaga no antoy maong tan mauges, ya singa isisimbolo na “kiew na pikakabat ed maong tan mauges” diad hardin na Eden. (Gen. 2:9) Panamegley na ganggan nen Jehova, maaro ton imbangat si Adan tan Eva no panon dan usaren so tuan kawayangan. Bilang resulta, say inmunan atateng tayo et pinili day ag-ontulok. Kasin mas awalaan na kawayangan si Adan tan Eva lapud desisyon da? Andi. Lapud impasoot dan gawaen so labay da, abalang da so tuan kawayangan ya inter ed sikara. w18.04 5-6 ¶9-12

Si Jehova et aglabat makakalikna na panangabagey ed saray lingkor to ya maniirap. Sikatoy onkikiwas pian tulongan ira. Singa bilang, nen maniirap iray Israelita lapud naaripen ira ed Ehipto, alikna nen Jehova so paniirap da tan apakiwas ya manggaway paraan pian nainawaan ira. Imbaga nen Jehova ed si Moises: “Anengneng kon mismo so paniirap na totook . . . , tan nadngel koy akis da . . . Amtak so paniirap da. Onleksab ak pian iliktar ko rad saray Ehipsio.” (Exo. 3:7, 8) Lapud naabagey nen Jehova iray totoo to, imbulos to ra ed impakaaripen da. Kalabas na nilasus ya taon, nen wala lad Insipan a Dalin iray Israelita, nilusob ira na saray kalaban da. Antoy reaksion nen Jehova? “Akasian ira nen Jehova lapud panakis da nisengeg ed saramay mamapairap tan nanmaltrato ed sikara.” Lapud empatya et apakiwas lamet si Jehova ya tulongan iray totoo to. Sikatoy angibaki na saray ukom pian iliktar iray Israelita ed saray kalaban da.​—Ukom 2:16, 18. w19.03 15 ¶4-5

Ibabaga na unona tan komadua ed Samploran Ganggan ya si Jehova labat so nepeg a dayewen na saray Israelita tan ag-ira nayarin mandayew ed saray idolo. (Exo. 20:3-6) Saratan ya ganggan et aliwan pakagunggonaan nen Jehova, noagta pakagunggonaan na totoo to. Nen nandayew ira ed dirios na arum a nasyon, mauges so nansumpalan da. Balet benendisyonan nen Jehova iray totoo to sanen nanmatoor ira ed sikato tan patas so impantrato da ed sakey tan sakey. (1 Ara. 10:4-9) Aliwan si Jehova so natetel no saramay mangibabagan manlilingkor ed sikato et ibabaliwala da iray estandarte to tan papairapen da iray totoo to. Anggaman ontan, inar-aro itayo nen Jehova tan amta to no makakaeksperiensya tayoy ag-inkahustisya. Nalilikna toy paniirap tayo ya mas ni ed nalilikna na sakey ya ina ed paniirap na melag nin anak to. Anggano nayarin ag-onsalet ya tampol si Jehova, saray agmagbabawin nankasalanan et ukomen to diad dugan panaon lapud paraan na impantrato da ed arum. w19.02 22 ¶13-15

Pigaran simba antis na Memoryal, mabetbet ya saray aral tayo et akapokus ed alimbawa nen Jesus tan ed inkamapaabeba ya impanengneng to nen inter toy bilay to bilang dondon. Napapakiwas itayon aligen so inkamapaabeba to tan gawaen so linawa nen Jehova, anggano wala ray panaon ya nairapan tayon gawaen itan. Isipen pay pakpel ya impanengneng to pigaran agew antis na impatey to. Amta to ya sikatoy pabaingan, siplatan, tan pateyen na saray mamubusol ed sikato. (Mat. 20:17-19) Balet siansian mabulos ton inarap so ipapatey. Nen sinmabi la itan a panaon, imbaga tod saray matoor ya apostol to ya kaiba ton wadman ed Getsemani: “Alagey kayo, ta onla ti la. Nitan lay mangiyawat ed siak.” (Mat. 26:36, 46) Tan sanen sinmabi iray totoon de-awit na armas ya mangaresto ed si Jesus, sikato lay inmasingger, nampakabat, tan imbaga tod saray sundalo ya paulyan da lan onalis iray apostol to. (Juan 18:3-8) Talagan makmakpel si Jesus! Natan, pansasagpotan ya aligen na saray alanaan a Kristiano tan saray arum a karnero so inkakpel nen Jesus. w19.01 27-28 ¶7-8

No panon ya manguusar so pintor na nanduruman balibali ya kolor pian makagawa na painting, kaukolan tayon ipanengneng so nanduruman balibali ya kualidad pian magmaliw tayon mauyamo. Manuna ed saratan ya kualidad so inkamapaabeba, panagpasakop, inkaulimek, tan pakpel. Saray mapaabeban totoo labat so manpapasakop ed linawa na Dios. Kaiba ed linawa na Dios ya ipatnag tayoy inkaulimek. (Gal. 5:23; Col. 3:12) No gagawaen tayoy linawa na Dios, onsasanok si Satanas. Kanian anggano mapaabeba tan maulimek tayo, bubusolen itayo na dakel ya totoon kabiangan na mundo nen Satanas. (Juan 15:18, 19) Kaukolan tayo sirin so pakpel pian nalabanan tayo si Satanas. Say kabaliktaran na toon mauyamo et say toon mapaatagey, agto nakontrol so pasnok to, tan agto uunoren si Jehova. Ontan ya mismo so ugali nen Satanas. Agtayo la pankelawan ya kabkabusol to iray totoon mauyamo! Lapud maong ya ugali ra, lalon ombibitar so inkauges to. Tan mas lalo iran bubusolen nen Satanas lapud papaneknekan da ya sikatoy matila. Akin? Ta anggan antoy ibaga o gawaen to, agton balot napatunda iray mauyamon totoo ya manlingkor ed si Jehova!​—Job 2:3-5. w19.02 8-9 ¶3-5

Amta nen Jehova ya ontakot iray manaayam ed Babilonia. Say Babilonia et lusoben na mabiskeg ya armada na Medo-Persia. Usaren nen Jehova itan ya armada pian ibulos iray totoo to diad impakaaripen da ed Babilonia. (Isa. 41:2-4) Nen naamtaan na saray taga Babilonia tan saray arum a nasyon ya manasingger la ray kalaban da, sinali ran pansiansiaen so pakpel da diad impangibaga rad sakey tan sakey: “Manpabiskeg ka.” Nanggawa met ira na dakel nin idolo, ya saratan so inilaloan dan manprotekta ed sikara. (Isa. 41:5-7) Balet oniay imbaga nen Jehova ed saray nibantak a Judio ya nampakalma ed puso ra: “Sika so lingkor ko, O Israel [aliwan saray arum a nasyon] . . . Agka ompapaga, ta siak so Dios mo.” (Isa. 41:8-10) Imanoen ya imbaga nen Jehova: “Siak so Dios mo.” Diad saratan ya imbaga nen Jehova, papaseguroan to iray matoor ya mandadayew ed sikato ya agto ra nilingwanan tan sikara so totoo to. Imbaga tod sikara: “Awiten . . . tan iliktar ta kayo.” Seguradon apabiskeg iray nibantak ya Judio lapud satan ya panamaseguro.​—Isa. 46:3, 4. w19.01 4 ¶8

Nabasa ed Marcos 1:9-11 so unona ed taloran pankanawnawa ya nansalita si Jehova manlapud tawen. Inkuan nen Jehova: “Sika so Ana’ko, say inad-arok; inabobonan ta ka.” Seguradon malikeliket si Jesus nen arengel to so boses nen Ama to ya mangibabalikas na panangaro tan panamaseguro! Walay taloran importantin katuaan nipaakar ed si Jesus ya papaneknekan na satan ya imbaga nen Jehova. Unona, si Jesus so Anak to. Komadua, inar-aro nen Jehova so Anak to. Tan komatlo, aabobonan nen Jehova so Anak to. Diad impangibaga nen Jehova ya “Sika so Ana’ko,” impatnag to ya si Jesus et nagmaliw ya anak na Dios ed espisyal tan balon paraan. Nen walad tawen si Jesus, sikatoy sakey la ed saray espiritun ananak na Dios. Balet, nen sikatoy abautismoan, sikatoy nilanaan na masanton espiritu. Diad saman, impanengneng na Dios ya si Jesus, bilang nilanaan ya Anak To, et walaan la na ilalon ompawil ed tawen pian magmaliw ya Ari tan Atagey a Saserdote ya tinuro To. (Luc. 1:31-33; Heb. 1:8, 9; 2:17) Kanian satan so rason no akin ya nen abautismoan si Jesus et imbaga nen Ama to: “Sika so Ana’ko.”​—Luc. 3:22. w19.03 8 ¶3-4

Nensaman ni et wala lay makapuy a simbawa. Ginmapo itan nen angiter si Satanas na makapuy a simbawa ed too. Imbaga tod si Eva ya magmaliw iran mas maliket a sanasawa no sikara so mandesisyon a bukor parad bilay da. (Gen. 3:1-6) Makasarili so motibo nen Satanas. Labay to ya si Adan tan Eva, pati saray magmaliw ya ilalak da, et manpasakop tan mandayew ed sikato imbes ya mandayew irad si Jehova. Balet si Jehova so angiter na amin ya walad sikara. Inter toy sakey tan sakey bilang kapareha, say balibalin hardin ya ayaman da, tan say perpekton laman da ya makapambilay na andi-anggaan. Makapaermen ta agtinmulok ed Dios si Adan tan Eva, ya insian day sarili ra ed Sikato. Singa amta tayo la, mauges so nansumpalan da. Singa ra rosas ya pinongsil ed tanaman a kalkalnan amagaan tan inatey. Ontan met so agawad ananak da lapud atawir dan kasalanan. (Roma 5:12) Singa si Adan tan Eva, maslak a totoo natan et agda labay so manpasakop ed Dios. Imbes, gagawaen da no antoy labay da. (Efe. 2:1-3) Malinew a napatnagan ed saray resulta ya tua so ibabaga na teksto ed sayan agew. w18.12 20 ¶3-4

Si apostol Pablo et matalino tan edukadon too, duaran lenguahe so amta to. (Gawa 5:34; 21:37, 39; 22:2, 3) Balet no nipaakar ed pandesisyon no antoy duga tan aliwa, impulisay to so karunongan na mundo, tan imbase to ray desisyon to ed Kasulatan. (Gawa 17:2; 1 Corinto 2:6, 7) Bilang resulta, nanliketan nen Pablo so mabunga ya ministeryo tan tinalaranan to so sakey ya agmanganggan tumang. (2 Tim. 4:8) Talagan mas atagey so kanonotan na Dios nen say panagnonot na sayan mundo. No aligen tayo so paraan na panagnonot to, magmaliw itayon mas maliket tan maong so pansumpalan tayo. Balet ag-ipipilit nen Jehova so kanonotan to ed sikatayo. Agkokontrolen na “matoor tan makabat ya aripen” so kanonotan na kada sakey ed sikatayo, ontan met na saray elder. (Mat. 24:45; 2 Cor. 1:24) Imbes, responsabilidad na kada Kristiano ya itunos so panagnonot to ed kanonotan na Dios. w18.11 20-21 ¶12-13

Impasakbay na Dios panamegley nen Isaias ya no akapawil la ray totoo To ed dalin da, wala lay kareenan ditan tan agla ra ontakot ya ompan atakien ira na ayayep odino saray totoon inaayep so ugali ra. Ugaw man odino matatken et magmaliw ya maligen. (Isa. 11:6-9; 35:5-10; 51:3) Imbaga met nen Isaias ya say dalin​—salanti, say interon dalin, aliwan say nasyon na Israel labat—​so “napano na kakabatan ed si Jehova a singa saray danum a mamapano ed dayat.” Imbaga lamet nen Isaias ya saray ompawil et agsakitan na saray ayayep odino totoo. Manbunga na dakel so dalin da lapud karakel na suplay na danum, ya singa say hardin na Eden ya nasasalog a maong. (Gen. 2:10-14; Jer. 31:12) Kasin saya labat so kasumpalan na satan a propesiya? Anggapoy ebidensya ya mamilagron inmabig iramay pinmawil manlapud inkibantak da. Singa bilang, ag-akanengneng iray bulag. Kanian napatnagan ed satan ya promisa na Dios ya diad arapen to ni literal a paabigen so amin ya mansasakit. w18.12 5 ¶11-12

Say panakar ed katuaan et tuloytuloy ya proseso, say dalan ya labay tayon panakaran diad andi-anggaan. Panon tayon napabiskeg so determinasyon tayon tuloytuloy ya manakar ed katuaan? Itultuloy mon aralen iray mablin katuaan ya walad Salita na Dios tan dalepdep mo iratan. On, saliw moy katuaan diad pakawalaan mo na regular ya eskedyul pian mangan na espiritual iran katuaan ya walad Salita na Dios. Lapud satan et onaralem so apresasyon mod katuaan tan ombiskeg so determinasyon mon agbalot ilako itan. Balet likud ed pangaliw na katuaan, ibabaga na Proverbio 23:23 ya nepeg tayon saliwen met so “karunongan tan disiplina tan pakatalos.” Agmagenap so kakabatan labat. Kaukolan tayon iyaplika ed bilay tayo so katuaan. No walaan tayoy pakatalos, natebek tayoy pankokonektaan na amin ya salita nen Jehova. Pakiwasen itayo na karunongan ya gawaen so amta tayo. No maminsan, disiplinaen itayo na katuaan, tan ipanengneng na satan ed sikatayo iray kaukolan tayon umanen. Komon ta naynay tayon ontulok ed ontan ya panangigiya. Mas mabli ni itan nen say pilak.​—Pro. 8:10. w18.11 9 ¶3; 11 ¶13-14

Antoy sankamablian ya kayarian mo? Labay mo kasin isalat itan ed bengatlan mas abebay kantidad to? Parad saray dedikadon lingkor nen Jehova, mainomay labat iratan ya ebatan. Say sankamablian ya kayarian tayo et say relasyon tayod si Jehova, tan agtayo labay ya isalat itan ed anggan anton bengatla. Papablien tayo met so katuaan ya manlalapud Biblia, ya tinmulong ed sikatayon nawalaan na maapit ya relasyon ed Ama tayod tawen. (Col. 1:9, 10) Isipen pa labat so amin ya ibabangat ed sikatayo na Makapadinayew a Managbangat tayo panamegley na Salita to, say Biblia! Ipapaamta to so katuaan nipaakar ed kabaliksan na ngaran to tan saray balibalin kualidad to. Ipapakabat tod sikatayo so nipaakar ed makapadinayew ya probisyon na dondon, ya maar-aro ton intarya parad sikatayo panamegley na Anak to, si Jesus. Ipapakabat met nen Jehova ed sikatayo so nipaakar ed Mesianikon Panarian tan say ilalo ya manbilay diad Paraison dalin. Ibabangat to itayo met no panon so nepeg tayon pambilay. Papablien tayo iratan ya katuaan lapud ontutulong iratan ed sikatayo ya onapit ed Manamalsa tayo. Walay kabaliksan na bilay tayo lapud saratan. w18.11 3 ¶1-2

Saray mapalikdo et agda naloko si Jehova ta “amin a bengatla et mapatpatnag tan sankanengneng” to. (Heb. 4:13) Bilang alimbawa, implano nen Ananias tan Safira ya palikdoen iray apostol. Inlako ray pigaran kaykayarian da balet agda inter ed saray apostol so amin ya nanlakoan da. Labay dan papawayen ya balbaleg so indonasyon da pian nanengneng na kongregasyon ya maomaong tan maiter ira. Balet amta nen Jehova ya mantitila ra, kanian dinusa to ra. (Gawa 5:1-10) Panon ya ipapasen nen Jehova iray matila? Si Satanas, tan amin ya agmagbabawin matila ya mangaalig ed sikato, et naderal diad “dayat na apoy.” (Apo. 20:10; 21:8; Sal. 5:6) Amta tayon si Jehova et “aliwan singa sakey a too a makapantila.” Diad tua, “imposiblin mantila so Dios.” (Num. 23:19; Heb. 6:18) “Kabusol nen Jehova . . . [so] matilan dila.” (Pro. 6:16, 17) Pian napaliket so Dios, importante ya lanang tayon ibaga no antoy tua. w18.10 8 ¶10-13

Panon to no imbaga na amom ya mangiter kay kontribusyon parad sakey ya selebrasyon a walay koneksion tod palson relihyon? Antoy gawaen mo? Imbes ya alagaren mo nin nagawa itan, agta mas maabig no natan ni labat et isipen mo lay kanonotan nen Jehova ed saratan ya bengatla? Kanian no bilang nagawa la iratan, mainomay mo lan gawaen tan ibaga no antoy duga. Say pannonot lan unona ed saray kaukolan tayon gawaen pian mansiansian matoor et talagan makatulong lalo la no walay nagawan emergency. Anggaman determinado tayon agmanpasaksak na dala odino anggan dinan ed apatiran manunan kabiangan na dala, say arum balet ya paraan na panagpatambal ya nalalanor so dala et mankaukolan na personal a desisyon base ed saray prinsipyo na Biblia ya mangipapatnag na kanonotan nen Jehova. (Gawa 15:28, 29) Seguradon aliwan say sankaabigan a panaon ya pannonotan itan et no wala tayo lad ospital, odino no wala lay sakit ya nalilikna tayo tan dedesdesen itayo na arum ya mandesisyon a tampol. Natan la sirin so panaon pian man-research, manggawa na kompleton legal a dokumento ed paraan na panagpatambal ya labay tayo, tan mitongtong tayod doktor. w18.11 24 ¶5; 26 ¶15-16

Si Jehova et sakey ya maaron pastol ya lalakapen to ray totoo to tan proprotektaan to ra ed saray mamubusol ed sikara. Talagan napabiskeg itayo ed saratan ya katuaan legan tayon onaarap ed anggaan na sayan sistema na mundo! Itultuloy nen Jehova ya asikasoen iray totoo to legan ya manasingger so baleg a kairapan. (Apo. 7:9, 10) Kanian ugaw man o matatken, mabiskeg o walay kapansanan, saray totoo na Dios et ag-onggiwgiw odino ontakot legan na baleg a kairapan. Diad tua, duma laingen so gawaen da! Sankanonot da irayan salita nen Jesu-Kristo: “Alagey kayoy maptek tan itangwa yo ray ulo yo, lapud asingger lay kililiktar yo.” (Luc. 21:28) Mansiansia ran matalek ed si Jehova ya iliktar to ra anggan diad iyataki na Gog​—say alyansa na mabiskeg iran bansa. (Eze. 38:2, 14-16) Akin et mansiansian kalmado iray totoo na Dios? Lapud amta da ya agmanguuman si Jehova. Pruebaan to lamet ya sikatoy mangiyaansakit tan makonsidera ya Manangiliktar.​—Isa. 26:20. w18.09 26 ¶15-16

Seguradon apaseseg iray matoor ya Israelita nen nadngel da iyan imbaga nen Jehova ya nabasa ed teksto tayo ed sayan agew. Bilang sakey ed saray lingkor to, makaseguro ka met ya inar-aro kan maong nen Jehova. Oniay insipan na Salita na Dios ed saramay aanapen da so dugan panagdayew: “Sikatoy mangiliktar bilang Sakey a makapanyari. Sikatoy manliket a maong lapud sika.” (Sof. 3:16, 17) Anggan anton subok so arapen na saray totoo nen Jehova, isisipan ton asikasoen tan ligliwaen to ira. “Pasusoen tan ebaen to kayo, tan panlugtoten to kayo ed akwalan to. Singa sakey ya ina a liligliwaen toy anak to, itultuloy ta kayo met a ligliwaen.” (Isa. 66:12, 13) Talagan balibali itan ya nengnengen​—sakey a maaron ina ya sankaeba toy anak to odino panlulugtoten to ed akwalan to! Diad sayan ilustrasyon, ipapanengneng nen Jehova no panon kabaleg so panangaro tan panangasikaso to ed saray tuan mandadayew ed sikato. Tandaan mo ya pinabpabli tan inar-aro ka nen Jehova.​—Jer. 31:3. w18.09 13 ¶6-7

Nensaman diad Israel, wala ray nanduruman pankanawnawa ya kinaukolan iray boluntaryo. (Exo. 36:2; 1 Awa. 29:5; Neh. 11:2) Natan, dakel met so pankanawnawam ya manboluntaryo pian nausar moy panaon, kaykayarian, tan abilidad mo diad itulong mod saray agagi. Tan seguradon malikeliket ka tan dakel so naawat mon bendisyon diad itulong mo. Saramay manboboluntaryo ed saray teokratikon proyekto et maslak ya nawawalaan na balo iran kakaaro. Imanoen pay eksperiensya nen Margie, sakey ya sister ya namboluntaryo ed saray proyekton panagpaalagey na Kingdom Hall diad loob na 18 taon. Legan na saratan a taon, wala ray atulongan ton mas ugaw nin sister diad impangipasal tod sikara. Apruebaan tod satan ya eksperiensya to ya sankaabigan iman ya paraan pian makapanpapasesegan ed espiritual. (Roma 1:12) Diad saray panaon ya ondadalan ed subok si Margie, sikatoy papasesegen na saramay kakaaro to ya akabat to diad panagpaalagey iran proyekto. Kasin asalim lay namboluntaryo ed ontan iran klase na panagpaalagey ya proyekto? w18.08 25 ¶9, 11

Nen insulat iratan nen apostol Pablo, si Timoteo et nayarin mantaon na masulok ya 30. Anggaman ontan, sikatoy tinuro nen Pablo ya mangasikaso ed ambelat iran responsabilidad. Antokaman so rason na satan ya simbawa nen Pablo, malinew so punto. Agtayo nepeg a husgaan iray mas ugaw nin brother base labat ed edad da. Kaukolan tayon tandaan ya anggan say Katawan tayon Jesus et sinumpal toy ministeryo to diad dalin nen sikatoy mantaon na masulok a 30. Diad arum ya kultura, agrerespetoen iray mas ugaw ya lalaki. Lapud satan, ompan manaalangan laingen iray elder ed kongregasyon ya irekomenda iray kualipikadon ugaw nin brother bilang ministeryal a lingkor odino elder. Nepeg a tandaan na amin ya elder ya anggapoy ibabaga na Kasulatan ya espisipikon edad pian nirekomenda so sakey bilang ministeryal a lingkor odino elder.​—1 Tim. 3:1-10, 12, 13; Tito 1:5-9. w18.08 11-12 ¶15-16

Pian makapandesisyon itayo na duga, kaukolan ya walaan itayo na mabiskeg ya prueba. Kanian nepeg sirin ya mapili tayon maong tan maalwar tayo ed saray babasaen tayo. (Fil. 4:8, 9) Nepeg ya agtayo sasayangen so oras tayo diad inengneng ed saray kuestionablin news site ed Internet odino diad pambasa na agnapanmatalkan iran balita ya ikakayat panamegley na e-mail. Lalo lan nepeg tayon iwasan iray website ya uusaren na saray apostata. Say manunan gagala da et pian pakapuyen iray totoo na Dios tan pikeweten so katuaan. No agnapanmatalkan iray impormasyon, mansumpal itan ed makapuy iran desisyon. Agtayon balot iisipen ya agnaapektoan so nonot tan puso tayo na saratan ya manangibalang ya impormasyon. Imanoen pay agawa diad panaon nen Moises sanen mauges a balita so impasabi na 10 ed saray 12 ya imbaki pian man-espiya ed Insipan a Dalin. (Num. 13:25-33) Lapud alablabas tan makapabigla so imbaga ra, kinmapuy a maong iray totoo nen Jehova. (Num. 14:1-4,6-10) Imbes ya amtaen da so tua tan manmatalek irad si Jehova, mas pinili dan panisiaan so mauges a balita. w18.08 4 ¶4-5

Maslak a totoo et walaan na maabig iran ugali, tan dakel ya aliwan lingkor nen Jehova et agmet manggagawa na mauges. No ontan iray kaulop mo, kasin nibagam ya maong iran kakaaro? Tepetan moy sarilim no antoy epekto na pikakaarom ed sikara diad relasyon mod si Jehova. Kasin natulongan da kan mas onapit ed sikato? Antoy walad puso ra? Singa bilang, kasin say lanang dan itotongtong et nipaakar ed no antoy uso, kuarta, gadyet, panagligliwaan, odino arum ni ran materyal ya bengatla? Kasin say panagsalita da et naynay ya walay kaiba ton panagbalaw ed arum odino mabanday so panaglurey da? Oniay direktan pasakbay nen Jesus: “No anto so walad puso, satan so ibabalikas na sangi.” (Mat. 12:34) No naimanom ya saray kaulop mo et mangipeligro ed maong ya relasyon mod si Jehova, kiwas kan tampol, limitaan moy piulop ed sikara, odino no nakaukolan et pultot moy pikakaarom ed sikara.​—Pro. 13:20. w18.07 19 ¶11

Nen mantaon lay 80 si Moises, sikatoy inyasain nen Jehova ya mangipaway ed Israel ed panamairap na Ehipto. (Exo. 3:10) Aminpigan sinali nen Moises so manbaraan. Balet nansiansian maanos si Jehova tan inikdan to ni ingen si Moises na pakayari pian makapanggawa na saray milagro. (Exo. 4:2-9, 21) Sarag to komon ya taktakoten si Moises pian ontulok lan tampol. Balet agto itan ginawa, imbes, maanos tan maomaong si Jehova, lanang ton papaseguroan so mapaabeban lingkor to. Kasin epektibo iyan makonsideran paraan to? On! Si Moises et nagmaliw ya kabkabat a lider ya mauyamo tan makonsidera ed panagtrato tod arum a singa ed impantrato nen Jehova ed sikato. No walay autoridad mo, talagan importante ya aligen moy Jehova ya magmaliw kan makonsidera, maomaong, tan maanos diad panagtratom ed saray walad panangasikasom! (Col. 3:19-21; 1 Ped. 5:1-3) No gagawaen moy anggaay nayarian mon aligen si Jehova tan say Babaleg a Moises, si Jesu-Kristo, magmaliw kan mainomay ya asinggeran na agagi tan makaparepresko kad sikara.​—Mat. 11:28, 29. w18.09 24-25 ¶7-10

Maabig no pansagpotan moy magmaliw a maong ya impluensya ed arum tan ontulong pian napansiansia so pankakasakey tayo. No gagawaen mo la itan, nakomendaan ka. Sarag mo kasi “manpalaknab,” ya gawaen itan a nagkalalo ni tan tuloytuloy? (2 Cor. 6:11-13, paimanod leksab) Panon mo nin mas nisindag so liwawa na katuaan ed lugar ya panaayaman yo? Nayarin nasagyat so arum ed katuaan lapud maabig ya panagsalitam tan kagagawam. Tepetay sarilim: ‘Antoy nibagad siak na saray kakaabay mi? Kasin pansiasiansiaen kon maayos tan malinis so abung mi pian anggapoy nabalaw na kakaabay mi? Kasin mabulos ak ya ontutulong ed arum?’ No mitotongtong kad arum ya agagi, maabig no tepetan mo ra no antoy epekto na ipapanengneng dan kaabigan tan maong ya ugali da diad saray kakanayon, kakaabay, katrabaho, odino kaeskuela ra. Seguradon naamtaan mo ray balibalin eksperiensya ra.​—Efe. 5:9. w18.06 24 ¶13-14

Ontan so inisip na saramay amatey ed disipulon si Esteban, tan ontan met so inisip na arum ya singa sikara. (Gawa 6:8, 12; 7:54-60) Makapabigla ta saray relihyoson totoo ya mangibabagan dadayewen day Dios et sikaran mismo so manusumlang ed saray ganggan to diad panggagawa ra na grabe iran krimen a singa say panagpatey! (Exo. 20:13) Malinew ya say konsiensia ra et agnapanmatalkan ya giya! Antoy gawaen tayo pian naseguro tayon napanmatalkan a giya so konsiensia tayo? Saray ganggan tan prinsipyo ed Salita na Dios et “makagunggona parad panagbangat, pananimbawa, panangipetek, panagdisiplina unong ed inkatunong.” (2 Tim. 3:16) Kanian no maseet tayon aralen so Biblia, dalepdepen iray ibabaga na satan, tan iyaplika iratan ed bilay tayo, nipasal so konsiensia tayo ya magmaliw a mas sensitibo ed kanonotan na Dios, kanian nayarin napanmatalkan itan ya giya. w18.06 16-17 ¶3-4

Say espadan uusaren na saray Romanon sundalo diad panaon ya nansulat si Pablo et manga 20 pulgada (50 cm) so karukey to tan adesinyo itan parad arap-arapan ya pilaban. Say sakey ya rason no akin ya marundunong iray Romanon sundalo ed panguusar day espada et lapud inagew-agew iran manprapraktis. Inkompara nen Pablo ed espada so Salita na Dios ya inter nen Jehova ed sikatayo. Balet kaukolan tayon aralen no panon tayon marundunong ya nausar itan no idedepensa tayo ray papanisiaan tayo​—odino no ipepetek tayoy mismon panagnonot tayo. (2 Cor. 10:4, 5; 2 Tim. 2:15) Agtayo nepeg a takotan si Satanas tan saray demonyo. Tua ya walay pakapanyari da, balet sarag tayo ran taloen. Walay anggaan da tan asingsingger lan nagawa itan. Legan na Sanlibon Taon ya Uley na Kristo, nipriso ira tan anggapon balot so nagawaan da, kayari na satan et deralen ira. (Apo. 20:1-3, 7-10) Kabat tayo so kalaban tayo, saray taktika to, tan saray gagala to. Diad tulong nen Jehova, sikatoy natalo tayo! w18.05 30 ¶15; 31 ¶19-21

Amta nen Adan ya agmakasalita so uleg. Kanian nayarin inisip ton say akitongtong ed si Eva et sakey ya espiritun pinalsa panamegley na uleg. (Gen. 3:1-6) Anggapoy amta nen Adan tan Eva nipaakar ed sayan espiritun pinalsa. Anggaman ontan, ginagala nen Adan ya ag-unoren so maaron Ama to ed tawen tan akikomplot ed sayan estranghero ya sumlangen so linawa na Dios. (1 Tim. 2:14) Tampol ya impaamta nen Jehova so nipaakar ed sayan kalaban ya amalikdo ed si Adan tan Eva, ya impromisa ton agmanbayag et naderal lanlamang iyan mauges. Balet impasakbay nen Jehova ya legan a wadia nid dalin iyan espiritun pinalsa ya akitongtong panamegley na uleg et walay pakayari ton sumpaen iramay mangaaro ed Dios. (Gen. 3:15) Lapud karunongan nen Jehova, agton balot imbaga ed sikatayo so personal ya ngaran na samay anghel a nanrebelde ed sikato. Tan ag-ingen anggan angiter so Dios na ngaran ya mangidedeskribe ed satan ya kalaban, ya anggad linmabas so 2,500 a taon kayari na inmunan rebelyon.​—Job 1:6. w18.05 22 ¶1-2

No nadidismaya ka lapud ngalngali anggapoy interesado ed teritoryan pampupulongan mo, natalosan moy naeksperiensya nen apostol Pablo. Legan na manga 30 taon ya ministeryo to, dakel so atulongan ton magmaliw ya disipulo nen Kristo. (Gawa 14:21; 2 Cor. 3:2, 3) Balet, dakel ya Judio so agto akombinsin magmaliw a tuan managdayew. Diad tua, maslak et agdinmengel ed si Pablo, tan sikatoy pinasegsegang ni ingen na arum. (Gawa 14:19; 17:1, 4, 5, 13) Antoy epekto na satan ed si Pablo? Oniay imbaga to: “Ibabagak so katuaan nipaakar ed Kristo . . . a pinasyay paneermen ko tan ag-ontutunday sakit a naliliknay pusok.” (Roma 9:1-3) Akin et ontan so alikna nen Pablo? Lapud impapuso to so panagpulong a kimey. Pinulongan to ray Judio lapud inaro to ra. Kanian ansakisakit ed si Pablo no agda aawaten so panangasi na Dios. Singa si Pablo, pupulongan tayo ray totoo lapud inaro tayo ra.​—Mat. 22:39; 1 Cor. 11:1. w18.05 13 ¶4-5

Impanengneng nen Pablo ya anggan saramay walaan na responsabilidad ya mamaseseg et kaukolan da met so napaseseg. Oniay insulat tod saray Kristiano ed Roma: “Pipirawaten kon nanengneng kayo, pian ninabang kod sikayo iray espiritual a bendisyon a mamabiskeg ed sikayo; odino pian makapanpapasesegan itayo, a napaseseg yo ak ed pananisia yo tan napaseseg ta kayo ed pananisiak.” (Roma 1:11, 12) On, anggan si Pablo a maong ya mamaseseg ed arum et kaukolan to met no maminsan so napaseseg. (Roma 15:30-32) Importantin komendaan tayo iramay mansasakripisyo pian makapanlingkor ya full-time. Komendaan tayo met iray agagin nansiansian single lapud panguunor dad ganggan ya miasawa o mangasawa “labat ed Katawan.” (1 Cor. 7:39) Pati saray Kristiano ya manmamatoor anggano ondadalan irad panamasegsegang odino sakit et nepeg met a pasesegen.​—2 Tes. 1:3-5. w18.04 21 ¶3-5