Hulyo

Say abilidad tayon mansalita et regalo nen Aman Jehova. Pero aliwliwa so impangusar na arum ed sayan regalo. Tinilaan nen Satanas ya Diablo si Eva, tan atan ya tila so rason no akin ya nagmaliw ya makasalanan iray totoo. (Gen. 3:​1-4) Nagmaliw met la ya aliwliway panagsalita nen Adan. Nen nankasalanan, say tinetel to et si Eva, tan anggan si Jehova! (Gen. 3:12) Tinilaan nen Cain si Jehova nen pinatey toy agi ton si Abel. (Gen. 4:9) Natan ey? Wala ray politiko ya maayew tan agda itan ibabaing. Amin lawarin pelikula et walay narengel mon bastos ya salita. Diad eskuelaan, lanang ya makakarengel iray ugugaw na ayewan tan kabastosan. Tan diad lugar na trabaho, normal labat itan. Maksil so impluensya na sayan mundo kanian no agtayo maalwar, ompan agtayo naliklikas ya aliwliwa la manayay panagsalita tayo. Pero agtayo labay itan ya nagawa lapud lingkor itayo nen Jehova tan labay tayon napaliket so Dios tayo. Siempre, iwasan tayoy ansakit tan bastos ya panagsalita. Pero aliwan satan labat so nepeg tayon gawaen. Dapat usaren tayo met iyan balibalin regalo na Dios pian sikatoy nidayew tayo. w22.04 4 ¶1-3

Balanse si Jesus no tungkol ed kayamanan tan kuarta. Nen wadiad dalin, na-enjoy toy mangan tan oninum na alak. (Luc. 19:​2, 6, 7) Say sankaunaan ingen ya milagro to et nanggaway maong ya klase na alak. (Juan 2:​10, 11) Tan diad tua, mabmabli so kawes ya akasulong ed sikato diad agew na impatey to. (Juan 19:​23, 24) Pero aliwan materyal so inyuna tod bilay to. Impaseguro nen Jesus ya no iyuna tayoy Panarian, iter nen Jehova iray pankaukolan tayo. (Mat. 6:​31-33) Dakel so nagmaliw ya maliket so bilay da nen inunor day bilin na Dios tungkol ed kuarta. Oniay imbaga na sakey ya balolakin brother, si Daniel: “Nen tinedyer ak ni labat, nandesisyon ak la ya usaren koy bilay ko parad si Jehova.” Lapud simpli labat so bilay nen Daniel, nausar toy panaon tan biskeg to pian makapan-volunteer ed disaster relief tan diad Bethel. Onia ni so imbaga to: “Agan balot nasaliw na kuarta so amin ya bendisyon ya inter nen Jehova ed siak.” w22.05 21-22 ¶6-7

Nipanengneng tayo ya inar-aro tayoy katuaan no regular tayon aralen so Biblia tan saray nibase ed Biblian publikasyon tayo. Diad tua, anggano abaybayag tayo lan Tasi, amayamay ni ray kaukolan tayon aralen. Aliwan mainomay so manaral, pero sulit no gawaen mo itan. Aliwan amin ya Tasi et mahilig ya manbasa tan manaral. Balet labay nen Jehova ya “itultuloy [tayon] anapen” so katuaan tan “itultuloy [tayon] kotkoten” itan ya singa akaamot ya kayamanan. (Pro. 2:​4-6) No gawaen tayo itan, mas onaralem so pakatalos tayo ed katuaan, tan sikatayo lanlamang so minabang ed saray nanaaralan tayo. Makaaral tayo ed si Brother Corey. No sikatoy manbabasa na Biblia, manpopokus kuno ed kada bersikulo. Kuan to: “Babasaen koy amin ya footnote, cross-reference, tan manre-research ak. . . . Amayamay so nanaaralan ko.” Antokaman so paraan na panag-personal study tayo, nipanengneng tayo ya talagan inar-aro tayoy katuaan no ipapanaon tan pansasagpotan tayon aralen itan.—Sal. 1:​1-3. w22.08 17 ¶13; 18 ¶15-16

Nen wadiad dalin si Jesus, inusar to ray nanduruman pinalsa pian ibangat ed saray disipulo to iray kualidad tan ugali nen Ama to. Say sakey ya impaimano nen Jesus et anggapoy pipilien nen Jehova ya panengnengan na panangaro. Diad samay Sermon ed Palandey, impaimano nen Jesus ed saray disipulo to so agew tan uran. Maslak ya totoo et ibabaliwala da labat iratan. Pero diad tua, no anggapo iratan, imposible so manbilay. Sarag pa met nen Jehova ya isiblet so agew tan uran ed saramay totoon agmandadayew ed sikato. Pero lapud maar-aro, “papasinagen toy agew . . . tan papepelagen toy uran” ed amin ya totoo. (Mat. 5:​43-45) Impaimano itan nen Jesus pian na-realize tayo ya labay nen Jehova ya panengnengan tayoy panangaro so amin ya totoo. Kanian kada no naliknam so sinag na agew tan nanengneng moy terter na uran, dalepdep mo so panangaro nen Jehova ed amin ya totoo. Naalig tayo itan ya panangaro no anggapo met so pipilien tayon pulongan. w23.03 17 ¶9-10

Abigbiglay apostol Juan ed anengneng to! Walay bii ya akalugan ed ambalbalangan atap ya ayep. Adeskribe itan ya “maimpluensyan imoral a bii [o “paabang a bii,” paimanod leksab]” tan say ngaran to et “Makapanyarin Babilonia.” Imoral iyan bii ta akirelasyon ed “saray arari na dalin.” (Apo. 17:​1-5) Siopa yan bii ya tinawag ya “Makapanyarin Babilonia”? Agnayari ya isimbolo toy politika lapud adeskribe ya karelasyon to ray lider na gobierno. (Apo. 18:9) Diad tua, kokontrolen to irayan lider ta sikatoy adeskribe ya akalugan ed sikara. Agto met isisimbolo so komersyo ed sayan mundo nen Satanas, ta say mangisisimbolo ed komersyo et “saray negosyante ed dalin.” (Apo. 18:​11, 15, 16) Say syudad na Babilonia nensaman so sentro na palson panagdayew. Kanian say isisimbolo na Makapanyarin Babilonia et say amin ya klase na palson panagdayew. Empiryo itan na palson relihyon ed interon mundo.—Apo. 17:​5, 18. w22.05 11 ¶14-16

Natural labat ya sankanonot na sakey ya ina no kasin manlingkor ed si Jehova so anak to. Lalo la natan ta agaylay irap so mamabaleg na anak ed sayan mundo nen Satanas. Wala ray sister ya bukbukor day mamapabaleg ed anak da ta single mother ira. Say arum balet et walay asawa ra, pero agmanlilingkor ed Jehova. Anggano parehon Tasi so atateng, aliwa itan ya garantiya ya magmaliw lan lingkor nen Jehova so anak da. Kaukolan day mansagpot pian napakiwas so anak da ya manlingkor met ed si Jehova. Antokaman so situasyon mo, agka mapaga ta tulongan ka nen Jehova. Tepetan mo ray maespiritual ya atateng ed kongregasyon yo no panon dan uusaren ed family worship da iray intarya na organisasyon. (Pro. 11:14) Ipikasim ed si Jehova ya tulongan to ka pian maong so komunikasyon mo ed anak mo. Singa bilang, kerew mod sikato ya tulongan to ka ya naamtaan moy iisipen tan nalilikna na anak mo.—Pro. 20:5. w22.04 17 ¶4, 7; 18 ¶9

Ombiskeg so panangaro tayod si Jehova no kabkabaten tayoy Anak to. Akin ey? On ta no antoy ugali nen Jehova, sikatoy ugali met nen Jesus. (Heb. 1:3) Nakabkabat moy Jesus no aralen moy libro na Mateo, Marcos, Lucas, tan Juan. No agka ni apasal ya manbasa na Biblia kada agew, anto kasi no igapom natan ed anggan dinan ed sarayan libro? Legan mon babasaen irayan salaysay tungkol ed si Jesus, manpokus ka ed saray balibalin ugali to. Singa bilang, sikatoy mainomay ya asinggeran. Anggan saray angkekelag ya ugugaw et agnababaingan ya onasingger ed sikato. Nilalakap tan ineeba to ni ra ingen. (Mar. 10:​13-16) Sikatoy maomaong tan makaaro, kanian agmanaalangan iray disipulo to ya ibagad sikato no antoy walad isip da. (Mat. 16:22) Diad tua, aaligen met labat nen Jesus so ugali nen Ama to. Matmainomay met ya asinggeran si Aman Jehova. Anggan anton oras et sarag tayoy manpikasi ed sikato, tan naibaga tayon amin so nalilikna tayo. Agto tayo balawen o husgaan. Imamalasakit tan inar-aro to tayo.—1 Ped. 5:7. w22.08 3 ¶4-5

Kabkabat itayo nen Jehova lapud sikato so Amalsa ed sikatayo. Diad tua, kabisado to so amin ya detalye na kada too ed sayan mundo. (Sal. 139:​15-17) Amta to no anto ray ag-inkaperpekto ya atawir tayo ed atateng tayo. Amta to ingen so amin ya agawa ed bilay tayo tan no antoy epekto na saratan ed inkatoo tayo. Lapud kabkabat itayo nen Jehova tan ikokonsidera toy amin ya detalye ed bilay tayo, papanengnengan to tayoy panangasi. (Sal. 78:39; 103:​13, 14) Walay ginawa nen Jehova ya prueba ya talagan sikatoy akaparaan ya mamerdona. Nen nankasalanan so inmunan ateng tayo ya si Adan, amta nen Jehova ya amin tayo et magmaliw ya aripen na kasalanan tan patey. (Roma 5:12) Anggapoy too ya naibulos toy sarili to odino say kapara ton too ed satan ya dusa. (Sal. 49:​7-9) Pero lapud maar-aro tan makasi so Dios, sikato lay nanggawa na paraan pian naibulos tayod kasalanan tan patey. Ibabaga na Juan 3:16 ya imbaki toy alenleneg ya Anak to pian nadondon tayo.—Mat. 20:28; Roma 5:19. w22.06 3 ¶5-6

Walay espisipikon impagawa nen Jehova ed lingkor ton si Job ya pakapatnagan ya talagan importante ed Sikato so panamerdona. Asakisakitan si Job ed saray imbaga nen Elifaz, Bildad, tan Zofar. Pero ingganggan nen Jehova si Job ya ipikasi to ran talo. Inunor itan nen Job. Lapud kinasian to ra, sikatoy benendisyonan nen Jehova. (Job 42:​8-10) Sikatayo lanlamang so kaskasian no agtayo mamerdona. Labay nen Jehova ya ekalen tayod puso tayo so sakit na linawa pian nainawaan tayo. (Efe. 4:​31, 32) Bibilinen to tayo ya ‘tundaan tayo lay manpasnok tan paliisan tayoy onsanok.’ (Sal. 37:8) Parad pankaabigan tayo lanlamang itan ya bilin. Ta no agtayo itan gawaen, ag-ondeen so nonot tayo tan naapektoan met lay laman tayo. (Pro. 14:30) No maneem-em kay sakit na linawa, say antam et makakabawi ka ed samay toon babarongan mo, pero diad tua et andi. Singa ka oniinum na samal ya say iisipen mon ompatey et sikato. Kanian anggapoy maabig ya resulta no manem-em kay sakit na linawa. Tandaan mo ya parad pankamaongan mo lanlamang no mamerdona ka. Ondeen so nonot tan pusom, tan agka ontabang ed panaglingkor mod si Jehova. w22.06 10 ¶9-10

No sankanonot tayon lanang so ilalo tayo, agtayo natukson aligen so kabibilay na saray makasarilin totoo, ta agtayo labay ya naderal so relasyon tayod si Jehova. (1 Cor. 15:​33, 34) Makatulong so ilalo pian nalabanan tayo so sakey nin uusaren nen Satanas pian nasamalan so nonot tayo—say ideya ya anggan antoy gawaen tayo et agtayo napaliket si Jehova. Singa ontan imay imbaga nen Elifaz ed si Job. Kuan to: “Panon a say sakey a too et magmaliw a malinis?” Singa to ibabagan, ‘Anggapo tay too ya malinis ed pakanengneng na Dios.’ Onia ni ingey imbaga to: “Anggapoy talek [na Dios ed] saray anghel to, tan anggan say tawen et aliwan malinis ed pakanengneng to.” (Job 15:​14, 15) Katilaan iratan ya amin! No bilang ta onsagi itan ed isip mo, tandaan mo ya si Satanas so nanlapuan na satan ya tila. Amta to ya no ontan so sankanonot mo, sukoan mo lay sarilim tan isipen mo ya agka makanepegan ya manbilay na andi-anggaan. Gawam so anggaay nayarian mo ya ekalen itan ed nonot mo. Agmon balot pandududaan ya labay nen Jehova ya manbilay kay andi-anggaan, tan tulongan to kan makapanmatoor pian naawat mo itan ya premyo.—1 Tim. 2:​3, 4. w22.10 25-26 ¶8-10

Labay nen Satanas ya isipen nen Job ya si Jehova so nanlapuan na amin ya trahedyan dadalanen to. Singa bilang, nen saniiba ya mamangan ed saksakey ya abung so samploran ananak nen Job, angusar si Satanas na maksil ya dagem pian nageba itan ya abung. (Job 1:​18, 19) Nampapelag met si Satanas na apoy “manlapud tawen” pian napoolan iray karnero tan managpastol nen Job. (Job 1:16) Nanlapud tagey imay apoy, pati samay maksil ya dagem, kanian inisip nen Job ya nanlapu iratan ed si Jehova. Say amta laingen nen Job, sikatoy dudusaen na Dios. Pero anggano onman so inisip to, sikatoy agbinmarong ed si Jehova. Say ninonot to la et say dakdakel ya bendisyon ya inter nen Jehova ed sikato nensaman. Imbaga to ya aliwan saray maong labat ya bengatla so awaten to manlapud Dios. Mabulos to met kuno ya awaten iray mauges ya bengatla. Kanian oniay imbaga to nin siansia: “Mantultuloy komon a narayew so ngaran nen Jehova.”—Job 1:​20, 21. w22.06 21 ¶7

Impasakbay la nen Jesus ed saray disipulo to ya busolen ira na mundo nen Satanas, ya singa nabasad teksto tayo natan tan ed Juan 17:14. On, nanenengneng tayo lay kasumpalan na satan ya propesiya, lalo lad sayay apalabas ya 100 ya taon. Nen introno si Jesus bilang Ari na Panarian nen 1914, imbantak toy Satanas diad dalin. Agla makapawil si Satanas ed tawen, aalagaren to labat lay panderal ed sikato. (Apo. 12:​9, 12) Pero legan ton manaalagar, mamapasya met ed pamapairap tod saray lingkor na Dios, tan ipapangget tod sikara so petang na ulo to. (Apo. 12:​13, 17) Kampegan mas onggragrabe so pambusol ed sikatayo na sayan mundo! Pero agtayo nepeg ya takotan si Satanas tan saray alipores to. Akin ey? On ta amta tayo ya kaiba tayoy Jehova. Atan imay insulat nen apostol Pablo ya: “No say Dios et walad dapag tayo, siopa so onsumpad sikatayo?” (Roma 8:31) On, mabisbiskeg so tiwala tayo ed si Jehova. w22.07 18 ¶14-15

Aga nampagaan nen Jesus ya ompan daiset labat so malabay ya onsuporta ed kimey ya panagpulong diad kaunoran a parte na sistema na mundo. Baleg so tiwala to ya ontua iyan propesiya ya nabasa ed Salmo 110:3: “Saray totoom et mabulbulos dan iyapay so inkasikara diad agew a milaban so armadam.” No sakey ka ed saray makulikulin manpupulong natan, kaiba ka ed pakakasumpal na satan ya propesiya tan susuportaan moy Jesus tan say matoor ya aripen. Pero amta tayo ya wala ray subok ed sayan kimey. Say sakey ya subok et dakdakel so onkokontra ed pampupulong tayo. Amayamay so katilaan ya ikakayat na saray apostata, lider na relihyon, tan opisyales na gobierno tungkol ed sikatayo ran Tasi. No maminsan et panisiaan itan na saray kakanayon, kakaaro, tan katrabaho tayo. Kanian ompan kombinsien da tayo ya ontunda tayo lan manpulong tan manlingkor ed si Jehova. Diad arum ya bansa, aatakien, babantaan, aarestoen, tan ipipriso ni ingen iray agagi tayo. w22.07 8 ¶1; 9 ¶5-6

Labay nen Jehova ya lanang tayon basaen tan aralen so Biblia, tan dalepdepen tayo iray nababasa tayo ditan. No iyaplika tayoy nanaaralan tayo, mas ombiskeg so pananisia tayo tan lalo tayon onapit ed si Aman Jehova. Kanian anggan anto ni ’tay onsabin subok, nasarag tayo! Iiter met nen Jehova so masanton espiritu to ed saramay mantitiwala ed Salita to. No walad sikatayo so espiritu na Dios, walay “pakayari [tayo] a mas mabiskeg nen say pakayari na too.” (2 Cor. 4:​7-10) Diad tulong nen Jehova, mangitatarya so “matoor tan makabat ya aripen” na dakdakel ya artikulo, video, tan kansion pian ombiskeg so pananisia tayo tan mansiansia tayon alerto ed espiritual. (Mat. 24:45) Imbangat itayo nen Jehova ya aroen tan ligliwaen so sakey tan sakey diad mairap iran panaon. (2 Cor. 1:​3, 4; 1 Tes. 4:9) Labalabay itayon tulongan na saray agagi no ondadalan tayod saray subok pian makapanmatoor tayo ed si Jehova. w22.08 12-13 ¶12-14

No ipasal tayon komendaan iray agagi lapud maong ya ugali o nagagawaan da tan ibaga tayo met itan ed arum, mas naka-close tan naar-aro tayoy sakey tan sakey kanian ombiskeg so kongregasyon. No maminsan, anggan saray maespiritual ya Kristiano et mandumaan met so opinyon da tan makapan-alaan met iray salita. Agawa itan ed si apostol Pablo tan ed kaaro ton si Bernabe. Wala may panaon ya labay ya ipila nen Bernabe si Marcos diad onsublay ya pambiahe da bilang misionero. Pero kontran maong si Pablo. Lapud saya et walay agawan “ampetang a sangsangan” ed si Pablo tan Bernabe, ya anggad nankanya-kanya la ra. (Gawa 15:​37-39) Pero, inayos lanlamang nen Pablo, Bernabe, tan Marcos iyan problema ra. Nanengneng ed saray tinmutumbok ya sulat nen Pablo ya anggapo lay sakit na linawa to ed si Bernabe tan Marcos. (1 Cor. 9:6; Col. 4:10) Ontan met so nepeg tayon gawaen. No bilang ta walay nakabarongan tayon agi, ayosen tayon tampol so problema tan manpokus tayo ed maong ya ugali tan nagagawaan to pian agnaderal so deen tan pankakasakey ed kongregasyon. w22.08 23 ¶10-11

Anggano gagawaen tayoy anggaay nayarian tayon unoren so matunong ya estandarte nen Jehova, anggapoy karapatan tayon ukomen so arum tan agtayo dapat iisipen ya mas matunong tayo nen say sikara. Tandaan tayo ya si Jehova so “Ukom na interon dalin.” (Gen. 18:25) Ag-itayo inikdan nen Jehova na autoridad ya ukomen so arum. Imanoen pay alimbawa nen Jose. Agton balot inukom iramay totoon aliwliway impantrato dad sikato. Diad tua, saray mismon kuya to so angilako ed sikato bilang aripen, tan tinilaan da ni ingen so ama ra ya inatey la kunoy Jose. Kalabas na dakel ya taon, anengneng lamet nen Jose iray kuya to. Diad saman et atagtagey lay posisyon to diad bansan Ehipto, kanian sarasarag to komoy ombales ed sikara. Pagbabawian da lay ginawa rad si Jose, pero natatakot ni ran siansia ta ompan bawian to ra. Pero oniay impaseguro nen Jose ed sikara: “Agkayo natatakot. Siak ta so Dios a mangukom ed sikayo?” (Gen. 37:​18-20, 27, 28, 31-35; 50:​15-21) On, binidbir nen Jose ya si Jehova labat so walaay karapatan ya mangukom. w22.08 30 ¶18-19

Antam ta ya sarag kan usaren nen Jehova pian ebatan so pikakasi na lingkor to? Sarag ton usaren so anggan siopa—saray elder, ministeryal a lingkor, payunir, odino anggan siopan agi—balanglan brother o sister, ugaw man o matatken. On, no say sakey et onkerew na tulong ed si Jehova, maslak et usaren to iray elder o arum nin agagi pian niiter so pankaukolan na satan ya lingkor to. (Col. 4:11) Balbaleg ya pribilehyo ya usaren ka nen Jehova pian natulongan iray agagi! Nagawaan mo itan no walay onkakalat ya sakit, no walay kalamidad, tan no ibawal na gobierno so kimey tayo. Ompan labay tayoy ontulong ed arum, pero diad mismon pamilya tayo et walay mansasakit o mairap met so bilay tayo. Antokaman so situasyon tayo, komon ta manggawa tayo nin siansia na paraan pian natulongan tayo iray agagi, tan naliliketan si Jehova no ontan so gawaen tayo.—Pro. 19:17. w22.12 22 ¶1-2

Pantiwalaan ka na arum no amta ra ya inarom ira. Imbaga nen Jesus ya say duaran sankaimportantian ya ganggan et say pangaro ed si Jehova tan pangaro ed kaparan too. (Mat. 22:​37-39) Diad interon uniberso, si Jehova so manunan napantiwalaan tayo. Inaro tayoy Jehova kanian labay tayon aligen itan ya kualidad to. Singa bilang, no inaro tayo ray agagi, agtayo ibabaga ed arum so sekreto da o personal ya impormasyon tungkol ed bilay da. Ta no ibaga tayo itan ed arum, ompan nabaingan, nasakitan, o napahamak ni ra ingen. Makatulong met so inkamapaabeba. No mapaabeba tayo, agtayo labay ya papawayen ya singa sikatayoy una-unaan ya nanlapuan na balita o impormasyon pian pabiliben so arum. (Fil. 2:3) Agtayo labay ya ipalikna ed saray agagi ya mas maong tayo nen say sikara ta walay amta tayon impormasyon ya agda amta. No mapaabeba tayo, agtayo met mangikakayat na saray espikulasyon ya anggapoy direktan ibabaga na Biblia tan agnabasa ed saray publikasyon tayo. w22.09 12 ¶12-13

Imbaga na anghel ya onsabi panaon ya mas natalosan na saray lingkor na Dios iray propesiya ed libron insulat nen Daniel, pero “anggapo ed saray mauges so makatalos ed sarayan salita.” (Dan. 12:10) Dapat ipanengneng tayo la natan ed kabibilay tayo ya ag-itayo kaiba ed saray mauges. (Mal. 3:​16-18) Titiponen la natan nen Jehova iray ipapasen ton “espisyal a kayarian.” Siempre, labay tayon ipasen itayo nen Jehova ya espisyal. On, manbibilay tayo la ed panaon na anggaan. Tan dakel ni ray tatalaranan tayon nagawa. Magano tayo lan nanengneng so pakaderal na amin ya mauges. Kayari na satan, nanengneng tayo met lay pakagawa na sayan sipan nen Jehova ed si Daniel: “Onalagey ka pian awaten moy apag mo diad kasampotan na saray agew.” (Dan. 12:13) Kasin tatalaranan moy agew sano si Daniel, pati saray inar-arom ed bilay et “onalagey” o ombilay lamet? No on, gawam sirin so anggaay nayarian mo pian makapanmatoor ka ed si Jehova, tan naseguradom ya say ngaran mo et mansiansian akasulat ed libro na bilay! w22.09 24 ¶17; 25 ¶19-20

Seguradon binmiskeg so liknaan nen Ezequiel ed satan ya imbaga nen Jehova. Akin ey? On ta posiblin anonotan to ya ontan met so imbaga nen Jehova ed si Moises tan Isaias nen imbaki To ran magmaliw ya propeta To. (Exo. 3:10; Isa. 6:8) Amta met nen Ezequiel no panon ya tinulongan nen Jehova irayan propeta pian nasarag day mair-irap ya asainmin da. Kanian nen amiduan imbaga nen Jehova ya: ‘Ibaki ta ka,’ agla nanduaruwa si Ezequiel ya sikatoy tulongan nen Jehova. Sakey ni, diad libron Ezequiel et maminpiga tayon nabasa iya: “Oniay mensahe nen Jehova a sinmabi ed siak.” (Eze. 3:16) Tan dakel met so nabasan: “Oniay mensahe nen Jehova a sinmabi lamet ed siak.” (Eze. 6:1) On, mapatpatnag ya kombinsido si Ezequiel ya sikatoy imbaki nen Jehova. Sakey ni, say ama to et saserdote, kanian seguradon naistoryad sikato nen ama to no panon ya pinaseguroan nen Jehova iray propeta tan lingkor To ya tulongan To ra. Singa bilang, imbaga nen Jehova ed si Isaac tan Jacob ya, “Wala ak ed sika,” tan imbaga tod si Jeremias ya, “Agka natatakot . . . ta wadia ak a mangiliktar ed sika.”—Gen. 26:24; 28:15; Jer. 1:8. w22.11 2 ¶3

Anggano nankasalanan si Adan tan Eva tan impatawir day patey ed saray ananak da, ag-anguman so gagala nen Jehova. (Isa. 55:11) Siansia nin labay to ya manbilay na andi-anggaan iray totoo ya maunor ed sikato. Imanoen iray imbaga tan ginawa nen Jehova nensaman pian nasumpal so gagala to. Insipan nen Jehova ya paolien to iray inaatey tan ikdan to ra na tsansan manbilay na andi-anggaan. (Gawa 24:15; Tito 1:​1, 2) Segurado si Job ya labalabay nen Jehova ya paolien iray inaatey. (Job 14:​14, 15) Amta nen propetan Daniel ya saray totoon inatey et walay pag-asa dan nabilay lamet tan walay tsansa ran manbilay na andi-anggaan. (Sal. 37:29; Dan. 12:​2, 13) Amta met na saray Judio diad panaon nen Jesus ya seguradon ikdan nen Jehova na “andi-anggaan a bilay” iray matoor ya lingkor To. (Luc. 10:25; 18:18) Aminpiga met ya inulit nen Jesus iyan sipan, tan anggan sikaton mismo et pinaoli na Ama to.—Mat. 19:29; 22:​31, 32; Luc. 18:30; Juan 11:25. w22.12 4-5 ¶8-9

Labalabay nen Jehova ya onapit tayo ed sikato. (Sant. 4:8) Sikato so Dios tayo, pero labay to ya ituring tayo met bilang Ama tan Kaaro. Eebatan to ray pikakasi tayo tan tutulongan to tayo no ondadalan tayod saray subok. Uusaren to met so organisasyon to pian bangatan tan protektaan itayo. Onapit tayod si Jehova no manpikasi tayo ed sikato, tan no basaen tayoy Salita to tan dalepdepen tayo iray nababasa tayo ditan. No ontan so gawaen tayo, mas naar-aro tayoy Aman Jehova tan nanengneng tayo ray balibalin ugali to. Sikatoy labalabay tayon unoren tan idayew ta amta tayon kanepegan to itan. (Apo. 4:11) No diman tayo mas nakakabat si Jehova, diman met mas ombiskeg so tiwala tayo ed sikato tan ed organisasyon to. Pero no ondadalan tayod saray subok, samboten itan na Diablo pian kalkalna ton pakapuyen so tiwala tayod si Jehova tan ed organisasyon. No mabiskeg balet so pananisia tan tiwala tayo ed si Jehova, ag-itayo nabiktima na Diablo, tan agtayon balot taynan so Dios tayo tan say organisasyon.—Sal. 31:​13, 14. w22.11 14 ¶1-3

Pinatunayan la na dakel ya Kristiano ya inar-aro day Jehova tan sikato so bibidbiren dan Soberanon Manuley. Agda inikbanan so integridad da anggano napriso odino ompatey ni ra ingen. Inalig da so alimbawa na taloran Hebreo ya nanmatoor ed Sankatagyan a Dios kanian inliktar to ra ed mandarlang ya hurno. Walay insulat nen salmistan David tungkol ed no akin ya kaukolan tayon pansiansiaen so integridad tayo. Kuan to: “Si Jehova so mansentensia ed totoo. Ukom mo ak pa, O Jehova, unong ed inkatunong ko tan unong ed integridad ko.” (Sal. 7:8) Onia ni insulat to: “Say integridad tan kaptekan komon so manprotekta ed siak.” (Sal. 25:21) Maliket so bilay tayo no mansiansia tayon matoor ed si Jehova. Kanian agtayo komon iikbanan so integridad tayo. No ontan so gawaen tayo, nalikna tayo met imay alikna na salmista ya angibagan: “Maliket iramay pansiasiansiaen dan walaay integridad so panagbilay da, a manaakar unong ed ganggan nen Jehova.”—Sal. 119:​1, paimanod leksab. w22.10 17 ¶18-19

Diad interon bilay nen Job, seguro say sakey ed saray agto nalinglingwanan et amay impitongtong nen Aman Jehova ed sikato. Imbaga nen Jehova ed si Job ya imanoen to iray nanduruman pinalsa. Akin ey? No ontan so gawaen nen Job, lalon nakombinse ya si Jehova so sankarunongan ed amin, tan sarasarag Ton asikasoen iray lingkor To. Singa bilang, anengneng nen Job ya agpapaulyanan nen Jehova iray ayayep, kanian seguradon asikasoen to met si Job. (Job 38:​39-41; 39:​1, 5, 13-16) Nen inobserbaan nen Job iray nanduruman pinalsa, lalo ton akabat so Dios. Nakabat tayo met so Dios no obserbaan tayo ray pinalsa to. Pero, ompan naiirapan tayon gawaen itan lapud nanduruman rason. Singa bilang, no syudad so panaayaman tayo, ompan puros bilding so walad kaliberliber, kanian daiset lay nanengneng tayon pinalsa na Dios. Tan anggano probinsya so panaayaman tayo, ompan busy tayo kanian ngalngali anggapoy panaon tayo ya obserbaan so kalikasan. Pero tandaan tayo ya importante ya walay panaon tayon obserbaan iray pinalsa nen Aman Jehova. w23.03 15 ¶1-2

Impaamta la nen Jesus ed saray papatumbok to ya wala ray nagawan “maksil a yegyeg” tan arum ni ran kalamidad antis ya onsabi so anggaan. (Luc. 21:11) Impropesiya to met ya ‘ondakel so kaugsan.’ Talagan nagagawa la itan natan ta amayamay so krimen, gulo, tan terorismo. (Mat. 24:12) Ag-imbaga nen Jesus ya say apektado labat ed saraya et saray agmanlilingkor ed Dios. Diad tua, dakel ya matoor a lingkor nen Jehova so biktima met na kalamidad. (Isa. 57:1; 2 Cor. 11:25) Tua ya agla manggagawa si Jehova na milagro pian nipaliis tayo ed saray kalamidad, pero tutulongan to tayo pian ondeen so nonot tayo tan mansiansia tayon kalmado. Mas kalmado tayo no akaplano lay gawaen tayo tan akaparaan tayo la. Pero no ontay gawaen tayo, labay to kasin ibaga et anggapoy tiwala tayo ed si Jehova? Andi. Diad tua, pakapatnagan itan ya walay tiwalam ed sikato. Akin et nibaga tayo itan? On ta sikaton mismo so manbibilin ed sikatayo ya manparaan tayo pian makapaliis tayo ed saray peligro. w22.12 18 ¶9-10

Legan ya walad prisoan si Jose, pinankugip nen Jehova so Faraon na duaran makapaaburidon kugip. Nen naamtaan na Faraon ya walay abilidad nen Jose ya ipatalos iray kugip to, impatawag to. Diad tulong nen Jehova, impatalos nen Jose iraman ya kugip tan nan-suggest ni ingen no antoy marakep ya gawaen na Faraon. Manbilib ya maong so Faraon. Anengneng to ya igigiya na Dios si Jose, kanian sikato la so pinili ton mangasikaso ed abasto na interon Ehipto. (Gen. 41:​38, 41-44) Ag-abayag, walay graben eras ya agawad Ehipto tan diad Canaan, ya kawalaan na pamilya nen Jose. Lapud posisyon nen Jose, sarasarag ton tulongan so pamilya to pian ag-ira ompatey ed eras tan naprotektaan so pamilyan panlapuan na Mesias. Mapatpatnag ya bebendisyonan nen Aman Jehova so amin ya gagawaen nen Jose. On, anggan samay mauges ya ginawa na saray kuya nen Jose et pinagmaliw nen Jehova ya paraan pian nasumpal so gagala to. w23.01 17 ¶11-12

Uunoren na sakey ya Kristiano so warning ed teksto natan no sikatoy lanang ya alerto ed saray manderal na relasyon to ed si Jehova, tan iiwasan ton tampol iratan. Gagawaen to itan ta labay toy mansiansia ed panangaro na Dios. (Pro. 22:3; Jud. 20, 21) Aliwa labat ya si Jesus so angibaga ya kaukolan tayoy manalwar. Onia met so bilin nen apostol Pablo nen sinulatan to ray Kristiano ed Efeso: “Manalwar kayon maong a say kagagawa yo et aliwan singa saray agmarunong noagta singa saray marunong a totoo.” (Efe. 5:​15, 16) Mamapasyay Satanas pian deralen so espiritualidad tayo. Kanian bibilinen itayo na Biblia ya “itultuloy [tayon] tebeken no antoy linawa nen Jehova” pian naprotektaan tayoy espiritualidad tayo. (Efe. 5:17) Pian duga iray desisyon tayo, kaukolan tayon tebeken o talosan no antoy “linawa nen Jehova.” Nagawaan tayo itan no regular tayon aralen so Salita na Dios tan dalepdepen tayo iray nababasa tayo. No natatalosan tayo no antoy panlabayan nen Jehova tan “walad sikatayoy kanonotan nen Kristo,” baleg so posibilidad ya duga iray desisyon tayo anggano anggapoy espisipikon ganggan ed Biblia tungkol ed situasyon tayo.—1 Cor. 2:​14-16. w23.02 16-17 ¶7-9

Maminpiga kan manlinis na abung yo? Seguro nen kakkapanpaalagey ni itan, nan-general cleaning kayo antis yon panayaman. Anto kasi nagawa no manlapud saman et agkayo lan balot nanlinis? Seguradon marabok tan marutdutak la. Pian malinis tan maayos so abung, dapat lanang ya lilinisan itan. Ontan met so kailangan tayon gawaen diad panag-isip tan inkatoo tayo. Antis tayon nampabautismo, dakel so ginawa tayon pananguman ed bilay tayo pian “[nalinisan] tayoy sarili tayo ed amin a karutakan na laman tan espiritu.” (2 Cor. 7:1) Pero anggano bautismado tayo la, uunoren tayo nin siansia imay bilin nen apostol Pablo ya ‘itultuloy tayoy manpasimbalo.’ (Efe. 4:23) No agtayo itan gawaen, main-inomay ya narutakan na sayan mundo so panag-isip tayo. Pian mansiansia tayon malinis ed pakanengneng nen Jehova, dapat lanang tayon usisaen so panagnonot, inkatoo, tan saray pilalek tayo. w23.01 8 ¶1-2

Imadyin mo pa ya mabilay ka la nen wadiad dalin si Jesus. Seguradon labalabay mon dengelen iray ibabangat to. Mabetbet ton bibitlaen iray nabasa ed Masanton Kasulatan tan memorize to iratan. Nen abautismoan si Jesus tan alanaan na masanton espiritu, mapatpatnag ya pinmawil ed memorya to so impanbilay tod tawen antis ya nagmaliw ya too. Diad tua, say sankaunaan ya akarekord ya imbaga to kayari na bautismo to et nanlapud Kasulatan. Tan anggan saray imbaga to antis ya inatey et akabase met ditan. (Deu. 8:3; Sal. 31:5; Luc. 4:4; 23:46) Tan legan na talora tan kapalduan taon na ministeryo nen Jesus, mabetbet ton nabibitla tan babasaen so Kasulatan diad arap na totoo tan ipapaliwawa to itan ed sikara. (Mat. 5:​17, 18, 21, 22, 27, 28; Luc. 4:​16-20) Manlapu lad inkaugaw nen Jesus, narerengel to lay Salita na Dios. Maespiritual iray atateng ton si Maria tan Jose kanian seguradon lanang dan nabibitla so Kasulatan. (Deu. 6:​6, 7) Tan apasalan dan pamilya so onlad sinagoga kada Sabaton. (Luc. 4:16) Naiimadyin tayoy Jesus ya madengedengel legan ya babasaen so Kasulatan diad sinagoga. w23.02 8 ¶1-2

Agtayo naupotan na rason no akin ya inar-aro tayo si Jehova. Singa bilang, sikato so lapuan o “subol na bilay” tan inter tod sikatayo so “amin a maong tan sankaabigan a regalo.” (Sal. 36:9; Sant. 1:17) On, amin ya panliliketan mod bilay mo et nanlapud maite-iter tan maar-aron Dios tayo. Espisyal ya regalo nen Jehova ed sikatayo so dondon. Akin et ontan so nibaga tayo? Pian naebatan itan, isip mo pay malmalet ya ulopan nen Jehova tan nen Jesus. Imbaga nen Jesus ya sikatoy inar-aro na Ama to tan inar-aro to met so Ama to. (Juan 10:17; 14:31) Bilyon-bilyon ya taon la ran saniba, kanian seguradon close iran maong. (Pro. 8:​22, 23, 30) Kanian isip mo pay alikna nen Jehova nen anengneng ton maniirap tan manpapanabos so Anak to. Seguradon asakisakitan pero intepe-tepel to lapud inar-aro to ka tan say amin ya totoo. Ontay lay panangaro to ed sikatayo ya kaya ton iter so Anak to bilang dondon pian manbilay tayo na andi-anggaan. (Juan 3:16; Gal. 2:20) No dalepdepen mo iraya, mas naar-arom si Jehova. w23.03 4-5 ¶11-13

Iwasan tayo iray bangat na apostata. Ambelat so simbawa nen Jesus ed kongregasyon na Pergamo lapud wala ray agagi ditan ya ontutumbok ed bangat na nanduruman sekta, kanian naapag-apag ira. (Apo. 2:​14-16) Kinomendaan to balet iray agagi ed Tiatira ya inmiwas ed “aralem iran bengatla nen Satanas.” Tan pinaseseg to ra ya “bembenan [dan] malet” so katuaan. (Apo. 2:​24-26) Antoy nepeg ya gawaen na saray agagi ditan ya naimpluensyaan na saray palson bangat? Imbaga nen Jesus ya kaukolan day magbabawi. Antoy naaralan tayod saya? Dapat iwasan tayo met so antokaman ya bangat ya kontra ed kanonotan nen Jehova. Saray apostata et “singano walay takot da ed Dios balet agnapatnagan [itan] ed kabibilay da.” (2 Tim. 3:5) No makuli tayon manaral na Biblia, mas mainomay tayon nabirbir tan naiwasan iray bangat na apostata. (2 Tim. 3:​14-17; Jud. 3, 4) Kaukolan tayon seguroen ya awaten nen Jehova so panagdayew tayo. No bilang ta walay gagawaen tayo ya aglabay nen Jehova, itunda tayo la tan gawaen tayo no antoy duga.—Apo. 2:​5, 16; 3:​3, 16. w22.05 4 ¶9; 5 ¶11