Agosto

No nanengneng nen Jehova ed saray ibabaga tayo ya ontatakot tayo ed sikato tan sankanonot tayoy ngaran to, isulat toy ngaran tayo ed “libro na pakanodnonotan” to. Akin kasi et ontan la kaimportante ed si Jehova iray ibabaga tayo? On ta nanengneng ed satan no anton talagay walad puso tayo. Atan may imbaga nen Jesus ya “no anto so walad puso, satan so ibabalikas na sangi.” (Mat. 12:34) No inaro tayoy Jehova, seguradoen to ya manbilay tayoy andi-anggaan diad balon mundo. Say panagsalita tayo so sakey ya basiyan nen Jehova no kasin awaten toy panagdayew tayo o andi. (Sant. 1:26) Saramay totoon agda inaroy Dios et malastog tan ansakit so panagsalita ra. (2 Tim. 3:​1-5) Siempre, agtayo ra labay ya aligen. Labay tayo ya naliketan si Jehova ed panagsalita tayo. Pero, kasin naliketan si Jehova no mabait so panagsalita tayo diad aral tan diad ministeryo, balet ansakit so panagsalita tayo no wala tayo lad abung?—1 Ped. 3:7. w22.04 5 ¶4-5

Iyan na Dios ed kapusoan na samploran saklor tan say atap ya ayep so panderal ed Makapanyarin Babilonia. On, si Jehova ya mismo so mamakiwas ed saray gobierno tan usaren da so ambalbalangan atap ya ayep (say United Nations) pian atakien tan permanentin deralen so amin ya palson relihyon ed interon mundo. (Apo. 18:​21-24) Antoy dapat tayon gawaen? Kailangan tayon seguroen ya say paraan na panagdayew tayo et “malinis tan aliwan marutak ed pakanengneng na Dios.” (Sant. 1:27) Agtayon balot komon aabuloyan ya walay anggan daiset labat ya impluensya ed sikatayo na saray palson bangat, paganon selebrasyon, tan say imoral tan espiritistikon kagagawa na Makapanyarin Babilonia! Tan agtayo komon ontutunda ya pasakbayan iray totoo ya ‘ompaway’ ira ed palson relihyon pian ag-ira nadamay ed pandusa na Dios ed Makapanyarin Babilonia.—Apo. 18:4. w22.05 11 ¶17-18

Atateng, manggawa kayoy paraan pian nibangat yod ananak yo so tungkol ed si Jehova. Istorya yod sikara iray kamaongan ya ginawa nen Jehova ed sikayo. (Deu. 6:​6, 7) Maabig no ontay gawaen mo, lalo la no aliwan Tasi so asawam tan limitado labat so pamba-Bible study yo ed abung. Oniay imbaga nen Sister Christine: “Mataltalag kamin makapan-istoryaan tungkol ed si Jehova diad abung kanian sasamboten koy amin ya pagkakataon.” Ontan met, dapat positibo iray ibabaga yo tungkol ed organisasyon nen Jehova tan saray agagi. Agyo babalawen iray elder. No positibo iray ibabaga yo tungkol ed saray elder, agmanalangan iray ananak yo ya onkerew na tulong ed sikara no walay problema da. Ipanengneng yoy panangaro tan respeto pian mansiansia so deen ed abung. No sakey kan nanay, lanang mon ibaga ed si asawam tan ed saray ananak mo ya inar-arom ira. Agmo dederalan si asawam no iistoryaen mod arum, tan ipasal mo ray ananak mo ya respetoen day ama ra. No ontan so gawaen mo, mareen so abung tan mas labayen na ananak mo ya kabaten si Jehova.—Sant. 3:18. w22.04 18 ¶10-11

Nanengneng tayo ed samay mensahe nen Jesus ed kongregasyon ed Efeso ya maanos iray agagi ditan tan ag-ira tinmundan nanlingkor ed si Jehova anggano dakel so subok. Pero inabuloyan dan naandi so inmunan panangaro ra ed si Jehova. Kaukolan dan ipawil tan papetangen lamet so panangaro rad si Jehova, ta no andi, agto awaten so panagdayew da. Walay naaralan tayod saya: Agto labay ya ibaga ya no aanosan tayo ray subok et napapaliket tayo lay Aman Jehova. Dapat duga so motibo tayo. Naaralan tayod saya ya aliwan saray gagawaen tayo labat so nenengnengen nen Jehova. Importante ed sikato no akin ya gagawaen tayo itan. Labay tayo ya say rason no akin ya mandadayew tayo ed sikato et lapud inar-aro tayo tan misatsalamat tayo ed amin ya kamaongan to. (Pro. 16:2; Mar. 12:​29, 30) Kaukolan met ya mansiansia tayon alerto tan aliing ed espiritual. Atan so problema na saray agagi ed kongregasyon na Sardis. Dati et masetseseg ira, pero sinmabi panaon ya agla ra masyadon aktibo. Imbaga nen Jesus ya kaukolan day “onliing” ed espiritual. (Apo. 3:​1-3) Pero siempre, tandaan tayo ya agan balot lingwanan nen Jehova so amin ya ginawa tayo parad sikato.—Heb. 6:10. w22.05 3 ¶6-7

Imbaga nen Solomon ya no pansagpotan tayoy mankimey o mantrabaho, sikatayo lanlamang so naliketan, tan “regalo na Dios” itan. (Ecl. 5:​18, 19) Nibaga to itan ta sikaton mismo et makulin mankimey. Sikatoy angipaalagey na kaabungan, nantanem na kaubasan, tan nanggawa na saray hardin, parke, tan tiponan na danum. Nampaalagey met na nanduruman klase na syudad. (1 Ara. 9:19; Ecl. 2:​4-6) Nansagpot ya maong si Solomon, tan seguradon malikeliket nen asumpal to iratan. Pero amta to ya aliwan saratan labat so mangiter ed sikato na liket, kanian dakel met so ginawa to parad si Jehova. Singa bilang, sikato so angiyulo ed panagpaalagey na marakdakep ya templo nen Jehova—pitoran taon itan ya proyekto! (1 Ara. 6:38; 9:1) Diad karakel na ginawa nen Solomon, a-realize to ya say sankaimportantian ya nagawaan na sakey ya too et say manlingkor ed si Jehova. Oniay insulat to: “Diad amin a nadngelan, say konklusyon et: Takotan moy tuan Dios tan unor mo ray ganggan to.”—Ecl. 12:13. w22.05 22 ¶8

Dakdakel so nabasa tayod Biblia ya mabulbulos a pinerdona nen Jehova. Siopa ray nanonotan mo? Seguro si Arin Manases. Grabe iray kasalanan ya ginawa to. Indaulo toy pandayew ed dios na saray pagano. Pinatey to ray mismon ananak to lapud imbagat to ra ed saray dios-diosan. Angiyan ni ingen na imahen diad loob na sagradon templo nen Jehova! Oniay impandeskribe na Biblia ed ginawa to: “Alablabas so ginawa ton kaugsan diad pakanengneng nen Jehova, a sinakitan toy liknaan To.” (2 Awa. 33:​2-7) Balet nen impapuson nagbabawi si Manases, sikatoy mabulbulos ya pinerdona nen Jehova. (2 Awa. 33:​12, 13) Tan seguro, say sakey nin naisip mo et si Arin David. Grabe met iray ginawa ton kasalanan. Sikatoy akirelasyon ed si Bat-sheba tan impapatey toy Urias. Balet nen impatua nen David iray kasalanan to tan nagbabawi, pinerdona nen Aman Jehova. (2 Sam. 12:​9, 10, 13, 14) On, talagan akaparaan ya mamerdona si Jehova. w22.06 3 ¶7

Ompan abaybayag tayo lan aalagaren so pakagawa na saray sipan na Dios, kanian no maminsan et singa nabuburagas lay ilalo tayo. Pero tandaan tayo imay ibabaga na Biblia ya “say sanlibon taon et sakey agew” labat ed si Jehova. Ompan isipen tayo ya “matantan” si Jehova ya onkiwas ta singa abaybayag tayo lan manaalagar, pero andi manaya. (2 Ped. 3:​8, 9) Antoy makatulong pian mansiansian mabiskeg so ilalo tayo legan tayon maan-anos ya aalagaren so pakagawa na saray sipan na Dios? (Sant. 5:7) Mansiansian maapit ed si Jehova. Sikato so manggawa ed amin ya iilaloan tayo. Diad tua, ibabaga na Biblia ya mankonektaan so ilalo tan pananisia. Pian tudtua ed sikatayo so ilalo tayo, dapat mabiskeg so pananisia tayo ya talagan ‘wala si Jehova,’ tan ikdan toy premyo “iramay masimoon a manaanap ed sikato.” (Heb. 11:​1, 6) No kabkabat tan maapit tayod si Jehova, agtayo pandudaan ya tooren ton amin so sipan to. Pian mas ombiskeg so ilalo tayo, kailangan tayoy manpikasi ed si Jehova tan basaen tayoy Salita to. Anggano agtayo nanengneng si Jehova, sarag tayoy onapit ed sikato. Labalabay to ya mitongtong tayo ed sikato diad pikakasi, tan ipapaseguro to ya dengelen to tayo.—Jer. 29:​11, 12. w22.10 26-27 ¶11-13

Imadyin mo pa iyan eksena: Akalespak ed dapol si Job tan agaylay panutot na saray sugat to. (Job 2:8) Maneermen nid saman lapud impatey na saray ananak to, tan ambelbelat so liknaan to lapud dinadalan ton subok. Insan natan, sikatoy aakusaan tan papaugesen na taloran lalaki! Antoy reaksion nen Job? Diad gapo, sikatoy ag-inmesel. (Job 2:13) Seguro, inisip da ya agmakasel si Job ta labay to lan ibeneg si Jehova. Pero alingo-lingo ra! Imadyin mo pay Job ya intangwa toy ulo to, insan oniay makpel ton imbaga ed samay taloran lalaki: “Anggad ompatey ak et agko ikbanan so integridad ko!” (Job 27:5) Akin et ontan la kabiskeg so pananisia nen Job? On ta nanilalo ed si Jehova. Amta to ya maar-aro so Dios kanian panampoten To lanlamang so paniirap to. Imbaga to ingen ya anggano ompatey, sikatoy bilayen lanlamang nen Jehova.—Job 14:​13-15. w22.06 22 ¶9

Isip mo pa iyan marakdakep ya pribilehyo tayo—makaasingger tayo ed Amalsa na tawen tan dalin panamegley na pikakasi! Sarag tayoy mitongtong ed si Jehova ed anggan anton oras tan ed anggan anton lenguahe. Makapanpikasi tayo anggan iner so kulaan tayo—anggano dia nid ospital o prisoan—ta amta tayo ya dedengelen itayo na maar-aron Ama tayo. Talagan mabmablin pribilehyo so pampikasi ed si Jehova! Pinabpabli nen Arin David so pribilehyo ya makapanpikasi. Oniay inkansion to ed si Jehova: “Komon ta say pikakasik et magmaliw a singa insenso ya imparaan ed arapan mo.” (Sal. 141:​1, 2) Diad panaon nen David, maal-alwar ya ipaparaan na saray saserdote so sagradon insenso ya uusaren ed dugan panagdayew. (Exo. 30:​34, 35) Nanengneng tayo sirin ed samay imbaga nen David ya labay to met ya iparaan a maong iray pikakasi to ed Ama tod tawen. Ontan met so labay tayon gawaen. Labay tayon naliketan si Jehova ed saray pikakasi tayo. w22.07 20 ¶1-2; 21 ¶4

Si Jehova so makanepegan ya ombales. Agto itayo inikdan na autoridad ya ombawi no walay nankasalanan ed sikatayo. (Roma 12:​20, 21) Lapud agtayo perpekto, limitado so pakatalos tayo, aliwan singa si Jehova ya amta toy amin ya nagagawa kanian lanang ya patas so panangukom to. (Heb. 4:13) Tan no maminsan, mimila so emosyon tayo kanian aliwa iray desisyon tayo. Oniay impaisulat nen Jehova ed si Santiago: “No say too et manpapasnok, agto nipatnag so inkatunong na Dios.” (Sant. 1:20) Makaseguro tayo ya no si Jehova so ombales, duga so pangukom to tan talagan iter toy hustisya. Labay nen Jehova ya mantiwala tayo ya iter toy hustisya. No ipalima tayo lad si Jehova so amin a bengatla, ipapanengneng tayo ya baleg so tiwala tayo ya sarasarag ton buralen so amin ya epekto na kasalanan. Insipan to ya diad balon mundo, “agla nanonotan iray apalabas a bengatla tan agla iratan mansiansia ed puso.” On, paabigen to so amin ya sugat ed puso tayo.—Isa. 65:17. w22.06 10-11 ¶11-12

Imbaga nen Jesus ya no busolen itayo na totoo, patunay itan ya walad sikatayoy pabor nen Jehova. (Mat. 5:​11, 12) Si Satanas so mansusugsog ed saray onkokontra ed sikatayo. Pero tandaan tayo ya agbalot makakiking si Satanas ed si Jesus! Lapud pangidadaulo nen Jesus ed panagpulong, nipapasabi lay maong a balita ed saray totoo ed amin a bansa. Sankanengneng ed saray ebidensya ya talagan ontan so nagagawa. Say sakey nin subok ed pampupulong tayo et nandurumay lenguahe na totoo. Pero diad samay pasingawey ya impanengneng nen Jesus ed si apostol Juan, impasakbay nen Jesus ya diad panaon tayo et nipulong so maong a balita diad amin ya lenguahe. (Apo. 14:​6, 7) Panon itan ya nagagawa natan? Seseguroen na organisasyon tayo ya anggad posible et naamtaan na amin ya totoo so mensahe na Panarian. Singa bilang, saray base ed Biblian impormasyon ya walad website tayon jw.org et sarag ya basaen na totoo ed interon mundo ta ni-translate itan ed masulok ya 1,000 ya lenguahe! Say libron Panliketan so Bilay ya Anggapoy Anggaan! ya uusaren tayod pamba-Bible study et inaprobaan na Mananguley ya Ulop ya i-translate ed masulok ya 700 a lenguahe! w22.07 9 ¶6-7

Makasi si Jesus. Oniay aminsan ya agawa unong ed salaysay nen apostol Mateo: “Sanen anengneng [nen Jesus] iray totoo, akasian to ra, lapud singa ra kinatatan tan pinaulyanan a karnero ya andiay managpastol.” (Mat. 9:36) Si Aman Jehova ey, makasi met kasi? Makaala tayoy ideya ed sayan imbaga nen Jesus: “Aliwan makapaliket ed Amak a walad tawen no nabalang so anggan sakey ed sarayan angkekelag.” (Mat. 18:14) Talagan maar-aroy Aman Jehova, awa? On, no kabaten mon maong si Jesus, ombiskeg so panangarom ed si Jehova. Say sakey nin paraan pian mas naarom si Jehova tan onaligwas ka et no kabaten mon maong iray maespiritual ya agagi ed kongregasyon. Seguro, napapansin mo ya malikeliket ira. Agdan balot pagbabawian so desisyon da ya manlingkor ed si Jehova. Tepetan mo ra no anto ray agda nalinglingwanan ya eksperiensya ra diad panlilingkor da. No walay importantin desisyonan mo, kerew kay advice ed sikara. Tandaan mo ya no dakel so mansimbawa ed sika, nasegurom ya duga iray desisyon mo. w22.08 3 ¶6-7

Amin tayo et seguradon onarap ed subok. Pero agtayo bukbukor ya arapen iratan. Tandaan tayo ya walad abay tayo so maar-aron Ama tayo, si Jehova. Babantayan to tayo, dedengelen to ray pikakasi tayo, tan akaparaan ya lanang ya ontulong ed sikatayo. (Isa. 43:2) Inter tod sikatayo so pribilehyon manpikasi, say Biblia, say dakdakel ya espiritual ya naakan, tan say suporta na saray maar-aron agagi. Kanian kombinsido tayo ya nasarag tayoy anggan anton subok. Misatsalamat tayo ta babantayan itayo na Ama tayo ed tawen! “Malikeliket so puso tayo lapud sikato.” (Sal. 33:21) Pablien tan pisalamatan tayo sirin so amin ya iiter nen Jehova pian natulongan to tayo. Tan ipanengneng tayod kabibilay tayo ya labalabay tayoy manpaasikaso ed sikato. Labay ton ibaga, pansagpotan tayon unoren si Jehova tan gawaen tayoy panlabayan to. Diad ontan et bantayan to itayo diad andi-anggaan! w22.08 13 ¶15-16

Dakel ya totoo natan so mairap da lay mantiwala ed arum. Nanenengneng da ya makasarili iray rerespetoen dan totoo diad komunidad—singa saray politiko, saray atagey so aral da, tan saray negosyante. Nakal met lay respeto dad saray pari tan pastor. Kanian nakal met lay tiwala dad Biblia, ta ditan kuno aalaen na saray lider na relihyon so ibabangat da. Kombinsido tayo balet iran lingkor nen Jehova ya sikato so “Dios na katuaan” tan sankanonot ton lanang so pankaabigan tayo. (Sal. 31:5; Isa. 48:17) Amta tayo ya makapantiwala tayo ed saray nababasa tayod Biblia. Duga iyan insulat na sakey ya Bible scholar: “Anggapoy anggan sakey ya katilaan ed saray imbaga na Dios, nagawa iratan ya amin. Mantitiwala iray lingkor na Dios ed amin ya imbaga to lapud baleg so tiwala dad sikato.” w23.01 2 ¶1-2   

Napabiskeg tayo ray agagi no tulongan tayo ra no nasusubok so pananisia ra. Say arum et babalawen na saray aliwan Tasi. Wala ray mansasakit na grabe. Say arum et mairap dan lingwanan so ginawa ed sikara na sakey ya agi. Wala met iray akukulaw tan mamasiken la natan ya abaybayag da lan aalagaren so isabi na anggaan. Nayarin nasubok so pananisia na sakey ya Kristiano ed sarayan situasyon. Asali met iratan na saray Kristiano nen inmunan siglo. Inusar nen apostol Pablo so Kasulatan pian napabiskeg toy pananisia na saray agagi. Singa bilang, wala ray Judion Kristiano nensaman ya agda amtay iyebat da no balawen ira na kapamilya ra tan ibaga ran mas atagey so Judaismo nen say relihyon na saray Kristiano. Seguradon binmiskeg so pananisia ra nen sinulatan ira nen Pablo. (Heb. 1:​5, 6; 2:​2, 3; 9:​24, 25) Akatulong so malinew ya eksplinasyon to pian amta ray iyebat da ed saray mamabalaw ed sikara. w22.08 23-24 ¶12-14

Saray totoo natan ed sayan mundo et mairap da lay mantiwala ed arum. Seguro, asali da lay aloko tan asaol na saray negosyante, nanenengneng day kurapsion ed gobierno, tan nababalitaan day mauges ya gagawaen na saray lider na relihyon. Ngalngali anggapo met lay tiwala rad kakaaro, kakaabay, tan anggan ed mismon kapamilya ra. Agtayo la itan pankelawan ta oniay impasakbay na Biblia: “Diad kaunoran iran agew . . . , saray totoo et . . . aliwa ran matoor, . . . managpauges ira, . . . traidor ira.” Aaligen day agnapantiwalaan ya dios na sayan mundo, si Satanas. (2 Tim. 3:​1-4; 2 Cor. 4:4) Pero sikatayo ran Kristiano, baleg so tiwala tayod si Aman Jehova. Kombinsido tayo ya talagan inar-aro to tayo tan ‘agton balot taynan’ iray kakaaro to. (Sal. 9:10) Tan baleg met so tiwala tayod si Kristo Jesus ta inter toy bilay to parad sikatayo. (1 Ped. 3:18) Apatunayan tayo met ya mismo ya napantiwalaan iray bilin ed Biblia.—2 Tim. 3:​16, 17. w22.09 2 ¶1-2

Kasin tua so liket ya naliliknam no balibali so liknaan mo natan, pero naani et andi la? Andi. Duma so tuan liket ta permanente itan. Oniay imbaga nen Jesus diad samay Sermon ed Palandey: “Maliket iray manonot ed espiritual a pankaukolan da.” (Mat. 5:3) Antoy tutukoyen nen Jesus ya “espiritual a pankaukolan” tayo? Atan may pankaukolan na totoo ya kabaten tan dayewen so Amalsa, si Jehova ya Dios. Ibabaga na Biblia ya si Jehova et “maliket a Dios,” kanian saramay mandadayew ed sikato et maliket met. (1 Tim. 1:11) Kasin magmaliw tayo labat ya maliket no anggapoy problema tayo? Andi. Diad tua et imbaga nen Jesus ya “maliket iray maneermen.” Imbaga to met ya “maliket iray napapasegsegang lapud inkatunong.” (Mat. 5:​4, 10, 11) Niay punto nen Jesus: Say tuan liket et ag-akadepende ed situasyon tayo. Akadepende itan ed no kasin kabkabat tayoy Dios tan no maapit so relasyon tayo ed Sikato.—Sant. 4:8. w22.10 6 ¶1-3

No say sakey et malaknab so pakatalos to, amta to no kapigan so “panaon na ag-iyesel tan panaon na pansalita.” (Ecl. 3:7) Walay kasabihan ya, “Speech is silver, silence is gold.” Labay ton ibaga, wala ray panaon ya mas maabig lay ag-onesel nen say mansalita. Imanoen so alimbawa na abaybayag lan elder ya mabetbet ya kekerewan na tulong na arum ya kongregasyon no walay mairap ya problema ra. Oniay kuan na kapara ton elder: “Maal-alwar ira, agdan balot iistoryaen ed sikami iray kompidensyal ya impormasyon tungkol ed arum ya kongregasyon.” Lapud napampiyaan iyan elder, baleg so respeto ed sikato na saray kaiba ton elder ed kongregasyon da. Segurado ira ya agto ibaga o istoryaen ed arum iray kompidensyal ya impormasyon ed kongregasyon. Importante met so inkamatua. Baleg so tiwala tayo ed toon matua ta amta tayo ya agto tayo tilaan o larog-larogan.—Efe. 4:25; Heb. 13:18. w22.09 12 ¶14-15

Dakel natan so agmalabay ya ondengel ed tuan karunongan anggano “onkekelyaw” la itan diad karsada. (Pro. 1:20) Ibabaga na Biblia ya walay taloran grupo na totoon agmalabay ed karunongan: saray “andiay kakabatan,” saray “mababalaw,” tan saray “makulangkulang.” (Pro. 1:​22-25) Saray “andiay kakabatan” et saramay totoon matmainomay ya napanisia o naloko, tan mimila labat irad agus. (Pro. 14:​15, paimanod leksab) Isip mo pa iray minilyon ya totoon aloko na saray lider na relihyon tan saray politiko. Agmakapanisia so dakel ed sikara no naamtaan da ya niloko tan tinilaan ira na saray lider da. Pero mas grabe iramay totoon “andiay kakabatan” ya abitla ed Proverbio 1:22 ta wala komoy tsansa ra ya naamtaan no antoy tua, pero pinili ray mansiansian andiay kakabatan. (Jer. 5:31) Agda la labay ya amtaen o aralen so ibabagay Biblia ta agda la labay ya umanen so kabibilay da. Agtayo labay ya aligen iray ontan ya totoo ya mas labay day mansiansian ignorante nen say amtaen so tua!—Pro. 1:32; 27:12. w22.10 19 ¶5-7

Wala ray instruksion ya iiter na organisasyon tayo parad safety tayo. Singa bilang, lanang da tayon papanonotan ya iter tayod saray elder so updated ya contact information tayo pian mainomay da tayon nakontak no walay emergency. Ompan mangiter met so organisasyon na instruksion tungkol ed ag-iyalis ed abung, pan-evacuate, pangala na relief, no antoy gawaen tayo pian natulongan tayoy arum tan no kapigan tayo itan gawaen. No agtayo iratan unoren, ompan iiyan tayod peligro so bilay tayo tan anggan say bilay na saray elder ya mangasikaso ed sikatayo. (Heb. 13:17) Dakel so agagi ya apilitan ya taynan so abung da lapud kalamidad o guerra ed lugar da. Anggano mana-adjust ni ra ed inalisan dan lugar, agda pinaulyanan so panaglingkor da ed si Jehova. Tuloytuloy dan “iyaabawag so maong a balita,” ya singa ginawa na saray inmuunan Kristiano ya nitaytayak ed nanduruman lugar lapud graben isusumpa. (Gawa 8:4) Anggano mair-irap so situasyon na sarayan agagi tayo, akatulong ed sikara so panagpulong pian akapokus ira ed Panarian, aliwan diad saray problema ra. Kanian ag-abalang so liket da tan nalilikna da nin siansiay deen. w22.12 19 ¶12-13

Importante ed si Jehova so kada lingkor to. Antis ya imbaki nen Jesus ya manpulong iray apostol to, walay imbaga to ya akatulong pian agda takotan iray onkontra ed sikara. (Mat. 10:​29-31) Impaimano tod sikara so sakey ya klase na siwit ya inagew-agew dan nanenengneng—say anuyaw. Nen panaon nen Jesus, mamura labat iratan ya siwit. Pero oniay imbaga tod saray disipulo to: “Anggapo ed saratan so napelag ed dalin ya ag-amta na Ama yo.” Insan oniay impaseguro to: “Mas mabli kayo nen say dakel ya anuyaw.” On, labay ya ipa-realize nen Jesus ed saray disipulo to ya importante ed si Jehova so kada sakey ed sikara. No saray angkekelag ya anuyaw et iimanoen nen Jehova, anggapo sirin so nepeg dan takotan, ta mas mabli ira nen saray anuyaw. Seguro nen wala lad teritorya iray disipulo, nanonotan da imay imbaga nen Jesus kada no makanengneng iray anuyaw. Sika ey? Komon ta kada no makanengneng kay melag ya siwit, nanonotan mo ya importante ka ed si Jehova ta “mas mabli [ka] nen say dakel ya anuyaw.” Anggano dakel so onkontra ed pandadayew mo, anggapoy nepeg mon takotan ta tulongan to ka. w23.03 18 ¶12

Nanduruman irap so aarapen tayo. Say arum ya agagi et kokontraen na kapamilya ra ed pandadayew dad si Jehova, tan say arum et nakal ed trabaho. No abaybayag tayo lan aanosan so sakey ya problema, ompan naekalan tayo lay ilalo ya anggad na-depress ti la. Sasamboten nen Satanas iratan ya situasyon pian isipen tayo ya ag-itayo inaro nen Jehova. Labay na Diablo ya tetelen tayoy Jehova tan say organisasyon To ed paniirap tayo. Ontan so agawa ed saray Israelita nen wala rad Ehipto. Nen unaan, manisia ira ya si Moises tan Aaron so pinili nen Jehova ya mangibulos ed sikara ed impakaaripen da. (Exo. 4:​29-31) Pero nen mas pinabelat na Faraon so kimey da, say tinetel da et si Moises tan si Aaron. (Exo. 5:​19, 20) Makapaermen ta say tinetel da laingen et saray matoor ya lingkor na Dios! No bilang ta abaybayag mo lan aanosan so irap o problema, manpikasi kad si Jehova, ibagam so amin ya naliliknam, tan kerew moy tulong to. w22.11 15 ¶5-6

Si Jehova so Lapuan na bilay tan walay pakapanyari ton bilayen iray inaatey. Nensaman, inikdan toy pakapanyari si propetan Elias ya paolien imay anak na biyuda ya taga Zarepat. (1 Ara. 17:​21-23) Inikdan met na Dios si propetan Eliseo na pakapanyarin paolien imay anak na biin Sunamita. (2 Ara. 4:​18-20, 34-37) Papatunayan na saratan tan arum nin impamaoli nensaman ya walay pakayari nen Jehova ya bilayen iray inaatey. Nen wadiad dalin si Jesus, impanengneng to ya sikatoy inikdan na Ama to na pakapanyarin paolien iray inaatey. (Juan 11:​23-25, 43, 44) Natan et wala lad tawen si Jesus tan niiter lad sikato so “amin a pakauley ed tawen tan diad dalin.” Kanian sarasarag to lan tooren imay sipan ya “amin a walad pakanodnonotan iran lubok” et paolien tan walay tsansa ran manbilay na andi-anggaan.—Mat. 28:18; Juan 5:​26-29. w22.12 5 ¶10

Singa ibabaga nen Jehova ya sikaton mismo so aglabay ya dengelen na saray Israelita no ibaliwala day mensahe nen Ezequiel. Kanian apaseguroan si Ezequiel ya anggano ag-ondengel iray totoo, agto labay ya ibaga ya sikatoy makapuy ya propeta. Tan impaseguro met nen Jehova ed si Ezequiel ya no nagawa lay inyabawag ton panangukom, diman “naamtaan [na saray totoo] a walay propeta ed limog da.” (Eze. 2:5; 33:33) Seguradon akatulong iratan ya imbaga nen Jehova pian ag-onkapuy so liknaan nen Ezequiel tan nasumpal to so ministeryo to. Ombibiskeg met so liknaan tayo ta amta tayon imbaki itayo met nen Jehova. Baleg ya kagalangan ya tinawag to tayon “tasi” to. (Isa. 43:10) On, si Jehova ya mismo so angibaki ed sikatayon manpulong! No nensaman et imbaga nen Jehova ed si Ezequiel ya: “Agka ontatakot,” ibabaga met nen Jehova ed sikatayo natan ya: “Agkayo onkekebbiew.” (Eze. 2:6) Agtayo sirin tatakotan iray onkokontra ed panagpulong tayo. Singa si Ezequiel, tandaan tayo ya imbaki itayo nen Jehova tan suportaan to tayo.—Isa. 44:8. w22.11 3-4 ¶4-5

Papablien tayo iray napantiwalaan ya elder tan ministeryal a lingkor ed kongregasyon tayo. Misatsalamat tayo ed si Aman Jehova ta wala irayan matoor tan makukulin brother ya mangaasikaso ed sikatayo! Sikatayo balet ey, panon tayon naipanengneng ya napantiwalaan tayo? Inar-aro tayo ray agagi, tan labalabay tayon kumustaen no antoy nagagawad bilay da. Pero kaukolan tayoy magmaliw ya balanse tan agtayo pibabalian so personal ya bilay da. Wala ray Kristiano nen inmunan siglo ya “matsismis ira tan mibabali rad bilay na arum a totoo, ya itotongtong da ray bengatlan agda nepeg ya itongtong.” (1 Tim. 5:13) Agtayo ra labay ya aligen. Balet panon to no walay imbaga ed sika na sakey ya agi tungkol ed bilay to, tan impuppurek to ya agmo itan ibabaga ed arum? Singa bilang, ompan ibaga to ya walay graben sakit to o walay dadalanen ton subok. No imbaga to ya sekreto yo labat iman, agmo iistoryaen ed anggan siopa. w22.09 10 ¶7-8

Say Griegon salita ya impatalos ya ‘uman yoy panagnonot yo’ et nayari met ya ipatalos ya “i-renovate yoy panagnonot yo.” Singa onia ’tan ay: No bilang ta kaukolan mon i-renovate so abung mo, di ba talagan pasimbaloen mo? No imbagan “i-renovate,” agto labay ya ibagan dekorasyonan mo labat et duga la. Ontan met ed bilay tayo bilang Kristiano. Agto labay ya ibaga ya basta manggagawa tayoy maabig et duga la. Dapat usisaen tayo no anton talagay inkatoo tayo, tan no walay nanengneng tayon aliwliwan ugali o kagagawa tayo, umanen o ekalen tayo itan pian naliketan si Jehova ed sikatayo. Tuloytuloy tayo itan ya gawaen, aliwan maminpinsan labat. No perpekto tayo la, aliwa lan mairap ya gawaen no antoy makapaliket ed si Jehova. Pero lapud agtayo ni perpekto natan, kaukolan tayoy mansagpot ya maong. Base ed Roma 12:​2, kaukolan tayo nin umanen so panagnonot tayo pian natalosan tayo no anton talagay makapaliket ed si Jehova. Nepeg tayo sirin ya usisaen iray desisyon tan pangarap tayo ed bilay. Kasin napatnagan ed saratan ya sankanonot tayoy panlabayan nen Jehova o kasin naimpluensyaan tayo la na mundo? w23.01 8-9 ¶3-4

Anto ray naaralan tayo ed saray agawad bilay nen Jose? Kasin kokontrolen nen Aman Jehova so amin ya nagagawa ed bilay tayo? Kasin kaibad plano to iray subok ya dadalanen tayo ta amta ton parad pankaabigan tayo lanlamang iratan? Andi, aliwan ontan so ibabangat na Biblia. (Ecl. 8:9; 9:11) Pero aya so segurado: Amta nen Jehova so amin ya dadalanen tayon subok tan dedengelen to tayo no onkerew tayoy tulong. (Sal. 34:15; Isa. 59:1) Tan seguradon tulongan to tayo pian naanosan tayoy anggan anton irap. Panon to balet itan ya gagawaen? Manggaway paraan si Aman Jehova pian napaseseg tan napabiskeg to tayo diad eksakton panaon ya kakkaukolan tayo itan. (2 Cor. 1:​3, 4) Walay nanonotan mon agawad bilay mo ya tinulongan ka nen Jehova nen kakkaukolan moy panamaseseg? No maminsan, na-realize tayo labat ya benendisyonan tan tinulongan itayo nen Jehova no alampasan tayo la so sakey ya subok. w23.01 17-18 ¶13-15

Sayan atap ya ayep et kaparpara to lanlamang imay ayep ya pitoray ulo to. Say pidumaan to balet iya et ambalbalanga. Adeskribe iya bilang “imahen na atap ya ayep” tan “komawalon ari.” (Apo. 13:​14, 15; 17:​3, 8) Sayan “ari” et nanuley, insan naandi, pero pinmawil lamet. Dugaruga itan ya deskripsion ed United Nations lapud susuportaan na satan so sistema na politika ed interon mundo! Nen unaan et tinawag itan ya League of Nations pero abuyak itan nen World War II. Insan nen abuo lamet, tinawag la itan ya United Nations. Sayan atap ya ayep o gobierno et kontra ed si Jehova tan ed saray lingkor to. Singa da titiponen iray “arari na interon dalin” parad guerra na Armagedon, say “baleg ya agew na Dios a Makapanyarin-amin.”—Apo. 16:​13, 14, 16. w22.05 10 ¶10-11

Nen baleg lay Jesus, labalabay ton basaen so Kasulatan. Kanian kabkabisado tan naar-aro to itan, tan nampaigiya ed satan. Seguro, nanonotan yo may agawa ed templo nen 12 ni labat so taon to. Saramay managbangat ya kabisado day Mosaikon Ganggan et “mankelkelaw ed pakatalos to tan ed saray ebat to.” (Luc. 2:​46, 47, 52) Singa si Jesus, nakabisado tan naar-aro tayo met so Salita na Dios no lanang tayo itan ya basaen. Makaaral tayod saray imbaga nen Jesus ed saramay akatongtong ton kabisado day Ganggan, singa saray eskriba, Fariseo, tan Saduceo. Anggano lanang dan babasaen so Kasulatan, agdan talaga natatalosan tan anggapoy epekto to ed bilay da. Impaimano nen Jesus no anto komoy ginawa ra pian natalosan day Kasulatan. Makatulong ed sikatayo iray imbaga nen Jesus pian (1) natalosan tayoy babasaen tayo, (2) naalmo tayo ray espiritual ya kayamanan, tan (3) naiyaplika tayod bilay tayo iray bilin na Biblia. w23.02 8-9 ¶2-3

Pian agnaderal so espiritualidad tayo, iwasan tayoy mi-flirt, alabas ya panag-inum tan panangan, tan ansakit ya panagsalita. Agtayo manbabantay na pornograpiya, saray palabas ya puros laban tan pateyan, tan arum nin andi-kakanaan ya bengatla. (Sal. 101:3) Tandaan tayo ya siber-siber so Diablo tan mantatalaran no kapigan to tayo napatitan ya manggaway mauges. (1 Ped. 5:8) No agtayo manalwar, ompan agtayo naliklikas ya ontutubo la manaya ed isip tan puso tayo so inggit, ag-inkamatua, agum, pambusol, inkalastog, tan sakit na linawa. (Gal. 5:​19-21) No agtayo iratan bagoten ya tampol, singa iratan makasamal ya tanaman ya no linmamot lan maong et sengegan na ipatey tayo ed espiritual. (Sant. 1:​14, 15) Say piulop ed saramay mauges so impluensya ra et sakey nin peligro ya agtayon tampol nalikas. Tandaan tayo ya maksil so impluensya na saramay lanang tayon nakakaiba. (1 Cor. 15:33) Kanian no agmet kaukolan, agtayo miuulop ed saramay agda uunoren so estandarte nen Jehova. (Luc. 21:34; 2 Cor. 6:15) On, no nanengneng mo ya walay peligro, iwas kan tampol! w23.02 16 ¶7; 17 ¶10-11

Legan mon nakakabat si Jehova, mas naar-arom tan lalon onasingger so liknaan mod sikato. Kasin labay mon onelet ni so pankakaaro yo anggad angga? Diad tua, atan so labay nen Jehova ya nagawa. Antoy gawaen mo balet? Ibabaga na Biblia ya say kekerewen to met labat et amay paliketen moy puso to. (Pro. 23:​15, 16) No talagan inarom si Jehova, dapat aliwa labat ya anggad salita. Ipanengneng mod kabibilay mo ya sikatoy inarom tan labay mon paliketen. Seguradon agmo itan pagbabawian! Panon mon nipanengneng ya talagan inar-arom si Jehova? Unona, ipikasim tan i-promise mod si Jehova ya idedikam lay sarilim ed sikato. Espisyal itan ya pikakasi. (Sal. 40:8) Insan, manpabautismo ka pian naamtaan na amin so dedikasyon mo ed si Jehova. Say bautismo et malikeliket tan importantin agew ed bilay na sakey ya lingkor na Dios. Onggapo lay ‘balon chapter’ na bilay mo ta manlapud satan ya agew et manbilay ka la parad si Jehova, aliwa lan parad sarilim. (Roma 14:8; 1 Ped. 4:​1, 2) Siempre, seryoso tan ambelat itan ya desisyon. Pero atan so mangiter ed sika na sankaabigan ya bilay. w23.03 5-6 ¶14-15