Oktubre

Magmaliw ya marakep tan makapaseseg iray aral tayo no impapuso tan maligligsa tayon mangansion tan mankomento. Pero wala ray agagi ya nababaingan ya mangansion o mankomento diad aral. Sika ey, kasin nababaingan ka met? Antoy makatulong pian nalabanan tayoy baing tayo? Maabig no mangansion tayo ya impapuso. No mangakansion tayoy Kingdom song, dapat say manunan sankanonot tayo et say pangirayew ed si Jehova. Kanian no manpaparaan ka parad aral, aliwan samay topic labat ya aralen so iparaan mo. I-practice mo met iray kansionen. Isip mo met no antoy koneksion na lyrics ed samay topic ya pantongtongan diad aral. Manpokus kad lyrics pian agka masyadon na-conscious ed boses mo. Subok met ed arum ya agagi so mankomento ed aral. Antoy makatulong? Salim so mankomento kada aral. Tandaan mo ya okay labat no say ebat mo et antikey, simpli, tan direkta ed punto. Makakaliket si Aman Jehova no mankokomento tayo nin siansia anggano nababaingan o mannerbiyos tayo no maminsan. w22.04 7-8 ¶12-15

Say salitan “mananulong” et ontutukoy ed sakey ya aliston onaksion tan manapuran ombatik no walay narengel ton onkekerew na tulong. Ontan ya ontan si Jehova. No walay onkerew na tulong ed sikato, onrespondin tampol. Imadyin mo pay Jehova ya manaapura pian natulongan to ka. On, talagan sarasarag tan labalabay to itayon tulongan. Tan siempre, no kaiba tayoy Jehova, maliket tayo tan anggapo ’tay subok ya agtayo nakaya. Anto ray paraan ya tutulongan itayo nen Jehova? Makatulong so libro na Isaias pian naebatan tayo itan. Akin ey? On ta maslak ed saray propesiya ed sayan libro et insulat parad saray lingkor na Dios natan. Tan indeskribe nen Isaias si Jehova diad paraan ya matmainomay tayon natalosan. Singa bilang, nabasa ed Isaias kapitulo 30 iray marakdakep ya ilustrasyon ya pakaaralan tayo no panon ya tutulongan nen Jehova iray lingkor to. Naaralan tayo ditan ya (1) dedengelen tan eebatan to iray pikakasi tayo, (2) igigiya to tayo ed dugan dalan, tan (3) bebendisyonan to tayo natan tan bendisyonan to tayo diad arapen. w22.11 8 ¶2-3

Diad samay mensahe nen Jesus ed kongregasyon na Smirna tan Filadelfia, binilin to ra ya ag-ira natatakot ed panamairap ta bendisyonan ira nen Jehova no manmatoor ira. (Apo. 3:10) Iparaan tayo met lay sarili tayo ed saray onsabin subok tan panamairap, tan nepeg ya determinado tayon itepel itan. (Mat. 24:​9, 13; 2 Cor. 12:10) Impropesiya ed libron Apocalipsis ya napairap iray lingkor na Dios diad “agew na Katawan”—say mismon panaon ya pambibilayan tayo. (Apo. 1:10) Nabasa ed Apocalipsis kapitulo 12 ya nen niletneg so Panarian na Dios, walay agawan guerra ed tawen. Si Miguel (say niglorian Jesu-Kristo) tan saray anghel to et akilaban ed si Satanas tan saray demonyo. (Apo. 12:​7, 8) Atalo irayan kabusol na Dios tan imbantak ira nen Jesus diad dalin. Manlapu lad saman et guguloen tan papairapen da iray totoo.—Apo. 12:​9, 12. w22.05 5 ¶12-13

Makaseguro tayo ya lanang ya duga tan patas so desisyon nen Jehova. Anggapoy papanigan o papaboran to. No sikatoy mandedesisyon no kasin perdonaen to so sakey, agto itan ibabase ed itsura, kayamanan, pribilehyo, o abilidad na nankasalanan. (1 Sam. 16:7; Sant. 2:​1-4) Anggapon balot so makataktakot ed si Jehova tan sikatoy agan balot nasuholan. Saray desisyon to et ag-akabase ed emosyon. (Exo. 34:7) Segurado tayo sirin ya lanang ya duga tan patas so panangukom nen Jehova lapud agnaparaan so pakatalos tan pakatebek to. (Deu. 32:4) Amta na saray nansulat ed Hebreon Kasulatan ya espisyal so panamerdona nen Jehova. Base ed sakey ya reperensya, angusar ira na Hebreon termino ya “ontutukoy labat ed panamerdona na Dios, tan agdan balot itan inusar pian ideskribe so panamerdona na sakey ya too ed kapara ton too.” Akin kasi? On ta si Jehova labat so walaan na autoridad ya mangiter na kompleton panamerdona ed sakey ya magbabawin nankasalanan. w22.06 4 ¶10-11

No bilang ta single mother ka o aliwan Tasi so asawam, tandaan mo ya napapaseseg moy arum ed maong ya alimbawam. Panon to balet no singa anggapoy epekto na pangibabangat moy katuaan ed anak mo? Tandaan, kaukolan so panaon antis mon nanengneng so bunga na sagpot mo. No mangisukit kay bukel ed dalin, ompan isipen mo no kasin ontubo itan tan manbunga. Siempre, diad unaan et agka segurado, pero mas baleg so posibilidad ya ontubo tan manbunga itan no tuloytuloy mon salogen. (Mar. 4:​26-29) Ontan met so situasyon mo bilang sakey ya nanay. Ompan iisipen mo no maminsan no kasin onsasabi ed puso na anak mo iray ibabangat mod sikato tungkol ed si Jehova. Siempre, agmo naidesisyonan so anak mo. Pero no tuloytuloy mon ibangat, baleg so posibilidad ya aroen to met si Jehova. w22.04 19-20 ¶16-17   

Nen matoor ni ya manlilingkor si Solomon ed si Jehova, duga so impangipasen tod sarili to. Nen medyo ugaw ni, binidbir to ya kulang ni so eksperiensya to tan kinerew toy tulong nen Jehova. (1 Ara. 3:​7-9) Amta nen Solomon ya no say sakey et atagtagey so pakanengneng tod sarili to, aliwliway pansumpalan to. Makapaermen balet ta nagmaliw ya mapaatagey si Solomon tan agto inyaplika so mismon insulat to. Diad inlabas na panaon, ginagala to lan imbaliwala iray ganggan nen Jehova. Singa bilang, ibabaga na Mosaikon Ganggan ya say ari et ‘agnepeg a mangasawa na dakel pian agniyarawi so puso to.’ (Deu. 17:17) Amta itan nen Solomon pero angasawa nin siansia na 700 ya bibii, tan 300 so onkokomaduan asawa to! (1 Ara. 11:​1-3) Mapatnag ya nantiwalan maong si Solomon ed sarili to, tan ompan inisip to ya agan balot naimpluensyaan. Say agawa laingen, aliwliway nansumpalan to lapud agto inunor so ganggan nen Jehova.—1 Ara. 11:​9-13. w22.05 23 ¶12

Walay kaukolan ya desisyonan na amin ya totoo, pati sika: Kasin suportaan moy uley nen Jehova lapud sikato so bibidbiren mo ya makanepegan ya Manuley ed uniberso? Odino suportaan moy mauge-uges ya kabusol to, si Satanas a Diablo? Sakey labat so pilien mo, tan akadepende ed desisyon mo no kasin manbilay ka na andi-anggaan diad arapen o andi. (Mat. 25:​31-33, 46) Akadepende met ed satan no kasin namarkaan ka parad kililiktar o parad kadederal legan na “baleg a kairapan.” (Apo. 7:14; 14:​9-11; Eze. 9:​4, 6) No si Jehova so pinilim ya suportaan, duga so desisyon mo. Seguradon labalabay mon tulongan so arum pian makapandesisyon met ira na duga. Nabendisyonan iramay matoor ya onsusuporta ed uley nen Jehova. Aralen tayo sirin iratan ya importantin katuaan ta pian ombiskeg so determinasyon tayon manmatoor ed si Jehova. Sakey ni, no nakabisado tayo iratan ya katuaan, mas natulongan tayo so arum pian pilien da met so uley nen Jehova tan manlingkor irad sikato. w22.05 15 ¶1-2

Si Jehova so nepeg tayon dengelen, aliwan saray kalaban. Ontan so ginawa nen Job. Dinengel ton maong si Jehova nen akitongtong ed sikato. Impaimano nen Jehova ed si Job iray nanduruman pinalsa, insan to tinepetan. Singa to ibabaga ed si Job ya, ‘No sarasarag ko irayan gawaen, di sarasarag ta ka met ya asikasoen. Agka mapaga, amtak so amin ya dinalan mo.’ Lapud satan, nampaabeba si Job tan lalo ton atalosan so kamaongan nen Jehova. Oniay kuan to: “Nadngelan ko lay nipaakar ed sika, balet natan et nanenengneng ta ka la.” (Job 42:5) Kasin imbaga itan nen Job ta dinmakep lay situasyon to? Andi. Diad tua, imbaga to itan legan ya akalespak ni ed dapol tan manpapaotot ni ed karakel na pelsa to. Pero ontan so imbaga to lapud aliklikna toy panangaro nen Aman Jehova. (Job 42:​7, 8) Singa agawa ed si Job, dakel met natan so mangiinsulto ed sikatayo tan ipapalikna dan anggapoy kana tayo. Mauges so ibabaga ra tungkol ed sikatayo tan ed organisasyon tayo. Naaralan tayo ed istoryay bilay nen Job ya walay tiwala nen Jehova ya manmatoor tayo anggano ondadalan tayo ed saray subok. w22.06 23-24 ¶15-16

Diad tawen et oneyag ira ed liket no naderal la so Makapanyarin Babilonia. Pero wala ni tatalaranan dan mas makapaliket. (Apo. 19:​1-3) Diad tua, sakey itan ed saray sankaimportantian a nagawa ya abitla ed Apocalipsis—say “kasal na Kordero”! Wala lad tawen so amin ya kabiangan na 144,000 antis ya mismo na Armagedon. Pero aliwa nin saman so pankasal na Kordero. (Apo. 21:​1, 2) Nagawa so kasal na Kordero kayari na Armagedon, no aderal lan amin so kakabusol na Dios. (Sal. 45:​3, 4, 13-17) Antoy isisimbolo na kasal na Kordero? Diad literal ya kasal, maniba tan mankasakey so nobyo tan nobya manlapu lad agew na kasal da. Kanian diad simbolikon kasal na Kordero, say Ari ya si Jesu-Kristo (say nobyo) et mikasakey ed 144,000 (say nobya). Manlapu lad satan ya agew, onggapo la so Sanlibon Taon ya Uley nen Jesus kaiba so 144,000.—Apo. 20:6. w22.05 17 ¶11-13

Impropesiya nen Jesus ya diad panaon na anggaan, walay pilien ton “matoor tan makabat ya aripen” ya mangitarya na espiritual a naakan. (Mat. 24:45) Kasin nagagawa la iyan propesiya? On. Walay melag ya grupo na alanaan iran lalaki ya uusaren nen Jesus ya mangitaryay espiritual a “naakan . . . diad dugan panaon” parad saray lingkor na Dios tan saray interesadon manaral na Biblia. Ag-iisipen na sarayan lalaki ya sikara so lider tayo. (2 Cor. 1:24) Imbes, bibidbiren da ya si Jesu-Kristo so “lider tan manuley” na amin ya papatumbok to. (Isa. 55:4) Manlapu nen 1919, angi-publish so matoor ya aripen na nanduruman publikasyon pian nataryaan na espiritual ya naakan iray interesado ya manaral na Biblia. Nen 1921, im-publish na aripen so libron The Harp of God pian naaralan na saray interesado iray manunan bangat na Biblia. Diad ilalabas na panaon tan lapud panguuman na situasyon, angi-publish so aripen na nanduruma nin libro. Dinan ya libro so akatulong ed sika pian nakabkabat tan naar-arom si Aman Jehova? w22.07 10 ¶9-10

Si Jehova so sankamaiteran ed amin. No walay inter mod sikato, balesen ton balesen, ya mas dakel ni nen samay inter mo. (Mar. 10:​29, 30) Ipapaseguro to ya no sikatoy panlingkoran mo, magmaliw kan maliket tan walay direksion na bilay mo. Napanlingkoran moy inar-arom ya Ama diad anggad angga. Seguradon kada agew et lalon onelet so aroan yon sanama. On, anggad mabilay si Jehova, tuloytuloy ka met ya manbilay. No idedikam so sarilim ed si Jehova tan manpabautismo ka, diad tua et reregaloan moy Amam ed tawen. Isip mo pay amin ya marakep ya walad sika tan amin ya maliket ya agawgawad bilay mo. Amin iratan et regalo tod sika. Wala met kasi nairegalom ed sikato anggano gawa toy interon uniberso? On wala—say matoor ya panlingkor mo ed sikato. (Job 1:8; 41:11; Pro. 27:11) Atan lay sankarakepan ya napangusaran moy bilay mo. w23.03 6 ¶16-17

No say sakey et tinedyer la, maksil so liknaan to ed sex, kanian mas mainomay ya natukson manggaway imoral. Labay nen Satanas ya makagawa kay imoral. Pero antoy gawaen mo pian agto ka natukso? (1 Tes. 4:​3, 4) Manpikasi kad si Jehova tan ibagam ed sikato so amin ya naliliknam. Ibagam iray kakapuyan tan pakakasubokan mo, tan kerew mo ya ikdan to kay biskeg pian nalabanan moy tukso. (Mat. 6:13) Agka nababaingan ya ibaga iratan ed si Jehova, ta agto ka husgaan. Diad tua, labalabay to kan tulongan. (Sal. 103:​13, 14) Agmo sasarilien so problemam. Ibagam ed ateng mo no anto ray subok ya lalabanan mo. Ompan diad gapo et naiilang o nababaingan ka, pero tandaan mo ya makatulong so pitongtong mod sikara. No dadalepdepen mo iray prinsipyo ya nababasam ed Biblia, mas mainomay moy manggawa na desisyon ya makapaliket ed si Jehova. Mas natalosan moy panagnonot to, kanian agmo kaukolan so ganggan ed amin ya situasyon ed bilay mo. w22.08 4-5 ¶10-12

No sakey kan Tasi ya ulo na pamilya, seguradon seseryosoen mo so responsabilidad mo ya legpeten so pamilyam. Seguro, sankanonot mo no iner so pangalaan moy pambilay na pamilyam, tan say ibayar ed kuryente tan danum. Ompan naiisip mo met ya no naekal kad trabaho, ompan agka la makaanap na arum. Odino ompan manaalangan kayon pamilya ya pasimplien so bilay yo ta iisipen yon agyo itan nasarag. Dakel lan agagi so apatitan nen Satanas ta agda nilabanan so ontan ya takot da. Labay nen Satanas ya isipen tayon anggapoy pibabali nen Jehova tan agto tayo tulongan ed pangasikaso tayod pamilya tayo. No ontan so isipen tayo, ompan ibaliwala tayo la iray prinsipyo ed Biblia pian ag-itayo naekal ed trabaho. w22.06 15 ¶5-6

Amta tayo ya si Jehova et Dios ya “mapangasi tan maabagey, matantan a manpasnok tan abalbaleg ed matoor a panangaro tan katuaan.” (Exo. 34:6) Importantin maong ed sikato so hustisya. (Isa. 61:8) Nasasakitan no nanenengneng ton maniirap itayo, kanian labalabay to lan panampoten so amin ya kairapan. (Jer. 29:11) Sakey itan ya rason ya inar-aro tayoy Aman Jehova ta ontan met so labay tayon nagawa! Anto ni so sakey ya rason no akin ya inar-aro tayo so katuaan? Balbaleg so nitulong na katuaan ed bilay tayo. Singa bilang, naamtaan tayod Biblia so katuaan ya walay ilalo tayo ed arapen. No say sakey a baloto et aka-angkla, aga niyanor-anor anggano madaluyon so dayat. Ontan met ed sikatayo. No lanang tayon sankanonot so ilalo tayod arapen, kalmado tayo labat anggano amayamay so problema tayod bilay. Diad teksto ed sayan agew, say tutukoyen nen apostol Pablo et say ilalo na saray alanaan ya Kristiano ya manbilay ed tawen. Balet onaplika met itan ya imbaga to ed saray Kristiano ya say ilalo ra et manbilay na andi-anggaan diad paraison dalin. (Juan 3:16) On, awalaan na direksion so bilay tayo manlapu la nen naamtaan tayo ya walay ilalo tayon manbilay na andi-anggaan. w22.08 14-15 ¶3-5

No inarom so sakey ya too, siempre pantiwalaan mo. Abitla ed 1 Corinto kapitulo 13 iray pigaran paraan ya nipanengneng tayoy panangaro. Makatulong itan pian pantiwalaan tayoy arum o pian napapawil tayoy tiwala tayod sikara. (1 Cor. 13:​4-8) Singa bilang, nabasa ed bersikulo 4 ya “say aro et maanos tan maomaong.” Diad tua, maan-anos si Jehova ed sikatayo anggano lanang tayon makakagaway lingo. Kanian duga labat ya anosan tayo met iray agagi anggano asakitan tayo ed imbaga o ginawa ra. Nabasa met ed bersikulo 5 ya say aro et “agmainomay a manpasnok” tan “agmanbibilang na impakasakitan.” Lingwanan tayo la sirin iray lingo na agagi tan agtayo la iratan uungkaten. Ibabaga na Eclesiastes 7:9 ya ‘agtayo komon mainomay a nasakitan.’ Pantiwalaan tayo ray agagi no tandaan tayo ya inar-aro ira nen Jehova tan aliwan saray lingo ra so pampopokusan to. (Sal. 130:3) Aligen tayoy Aman Jehova. Imbes ya manpokus tayod lingo na saray agagi, say imanoen tayo et saray maong ya ugali ra.—Mat. 7:​1-5. w22.09 3-4 ¶6-7

Ipapaamta na libron Daniel iray mantutumbokan ya nagawa legan na panaon na anggaan. Singa bilang, ibabaga na Daniel 12:1 ya si Miguel odino si Jesu-Kristo et ‘akaalagey parad totoo na Dios.’ Sayan propesiya et agawa nen 1914 nen nagmaliw ya ari si Jesus ed Panarian na Dios diman ed tawen. Balet nipaamta met ed si Daniel ya si Jesus et “ontalindeg” legan na “panaon na gonigon ya agnin balot agawa manlapud samay panaon ya impangiletneg ed inmunan nasyon.” Sayan “panaon na gonigon” et ontutukoy ed “baleg a kairapan” ya abitlad Mateo 24:21. Manampot itan ya kairapan diad Armagedon. Diad satan ya panaon, “ontalindeg” si Jesus pian idepensa iray totoo na Dios. Saramay makaliktar ed baleg a kairapan et indeskribe na Apocalipsis ya “baleg ya ulop.”—Apo. 7:​9, 14. w22.09 21 ¶4-5

Saray ngaran ya akasulat natan ed libro na bilay et nayari nin ekalen o “buralen.” (Apo. 3:5) Singa panamegley na lapis ni labat so inusar nen Jehova diad impangisulat tod saray ngaran. Kaukolan tayon seguradoen sirin ya mansiansia so ngaran tayo ed satan ya libro, ya anggad isulat la itan nen Jehova panamegley na tinta. Labay ton ibaga, permanente la. Say sakey ya grupo ya nisulat la so ngaran da ed libro na bilay et saramay apili ya nakaiba nen Jesus ya manuley ed tawen. Nen sinulatan nen apostol Pablo iray “kakimeyan” tod Filipos, imbaga to ya “say kangaranan [na saray alanaan]” ya naimbitaan ya manuley ed tawen ya kaiba nen Jesus et wala lad libro na bilay. (Fil. 4:3) Pero pian agnabural so ngaran da, kaukolan ya mansiansia ran matoor. Diad unor ya pantatak ed sikara, permanente lan nisulat so ngaran da ed libro na bilay. (Apo. 7:3) Nagawa itan balanglan antis na ipatey da odino antis ya onggapo so baleg a kairapan. w22.09 14 ¶3; 15 ¶5-6

Kasin asalim la ya walay angiparungo ed sika na paboritom ya panangan? Pero lapud manaapura ka ta sankanonot mo ni ray gawaen mo, basta insubom lan insubo ya anggad naupot la manaya. Kasumpal mo balet ya angan, a-realize mo ya tinantanan mo komon pian ananam moy kinan mo. Ompan ontan met so nagawa no manbabasa tayoy Biblia. No maminsan, mapmaples tayon manbasa tan agtayo la nai-enjoy no antoy ibabangat nen Jehova ed sikatayo. Dapat “nanamen” tayo so babasaen tayo. Maabig no imadyinen moy eksena, no antoy emosyon tan paraan na panagsalita na saray karakter, tan isip mo no anto ray naaralan mo ed binasam. No ontan so paraan na panagbasam na Biblia, mas naliketan ka. Nampili si Jesus na “matoor tan makabat ya aripen” ya mangitarya na espiritual ya naakan ed dugan panaon. (Mat. 24:45) Amayamay so itatarya dan espiritual ya naakan tayo. Amin ya ipaparaan na matoor ya aripen et akabase ed Biblia.—1 Tes. 2:13. w22.10 7-8 ¶6-8

Impasakbay na Biblia ya diad kaunoran iran agew et dakdakel so mabalaw. (2 Ped. 3:​3, 4) Elek-elekan da iray mangiyaaplika ed saray prinsipyo na Biblia pian ompaway ya sikara so duga tan nagawaan da ray “mauges a pilalek da.” (Jud. 7, 17, 18) Antoy gawaen tayo pian agtayo naalig so ugali tan kagagawa na saray mababalaw? Agtayo dapat mimiulop ed saray mareklamo. (Sal. 1:1) Agtayo dedengelen o babasaen so antokaman ya nanlapud saray apostata, ta andi lay ginawa ra et deralan so organisasyon nen Jehova. No agtayo manalwar, ompan naalig tayo ra tan kuestionen tayo met lay Jehova tan saray instruksion ya iiter na organisasyon to. Antoy makatulong pian napaliisan tayoy ontan ya kagagawa? Tepetan moy sarilim: ‘No walay balon instruksion o balon liwawa, kasin negatibon tampol so reaksion ko? Kasin aanapan koy lingo iray mangidadaulo?’ No nalikas mo ya magmamaliw ka lan mareklamo o mabalaw, pansagpotan mon ekalen ya tampol itan ya ugali pian naliketan si Jehova ed sika.—Pro. 3:​34, 35. w22.10 20 ¶9-10

Say espiritu na Dios so amabiskeg ed si Ezequiel pian napulongan to ray totoo ed teritorya to ya “anawet so ulo tan puso” ra. Oniay imbaga nen Jehova ed si Ezequiel: “Pinaawet koy lupam a singa inkaawet na lupa ra tan say moling mo a singa inkaawet na moling da. Say moling mo et impagmaliw kon singa sakey a diamante, tan anawet nen say bato. Agka ontatakot ed sikara odino onkekebbiew ed saray lupa ra.” (Eze. 3:​8, 9) Singa ibabaga nen Jehova ed si Ezequiel: ‘Siak so akauley ed sika. Agka nadidismaya ed inkabenger da.’ Kayari na satan, inyakar na espiritu na Dios si Ezequiel ed teritoryan pampulongan to. “Kinmiwas ed siak so pakayari nen Jehova,” so insulat nen Ezequiel. Diad tua, sakey simba ton dinalepdep so mensahen ipulong to. (Eze. 3:​14, 15) Insan sikatoy pinaonla nen Jehova ed sakey a lugar ya ditan et “niwalad [sikato] so espiritu.” (Eze. 3:​23, 24) On, akaparaan lay Ezequiel ya manpulong! w22.11 4-5 ¶8-9

Dakel ya irap so dinalan nen propetan Habacuc. Sinmabi ingen ed punto ya singa pandududaan to la no kasin sikatoy imamalasakit nen Jehova. Kanian imbaga tod si Jehova so amin ya nalilikna to. Dinengel tan inebatan nen Jehova so impapuson pikakasi na sayan matoor ya lingkor to. (Hab. 2:​2, 3) Nen dinalepdep nen Habacuc iray ginawgawa la nen Jehova nensaman parad saray lingkor To, pinmawil so liket tan ligsa to. Kanian binmiskeg so talek to ya sikatoy tulongan tan asikasoen nen Jehova. (Hab. 3:​17-19) Antoy naaralan tayo? No walay aarapen mon mair-irap ya situasyon o problema, manpikasi kad si Jehova, ibagam ed sikato so amin ya naliliknam, tan kerew moy tulong to. Dalepdep mo met no anto la ray ginawa nen Jehova parad sika nensaman. No ontan so gawaen mo, ombiskeg so tiwalam ya tulongan to ka nen Jehova ya makapan-anos. Tan no diman mo nalilikna so tulong to, lalon ombiskeg so pananisiam. On, no agmo paulyanan so espiritualidad mo, naekal so panduaruwa ed nonot mo, tan agka onarawi ed si Jehova anggano mairap so bilay.—1 Tim. 6:​6-8. w22.11 15 ¶6-7

Nen asingger lan ompatey si Jesus, walay duaran kriminal ed abay to ya akapasak met ed panamairapan ya poste. (Luc. 23:​32, 33) Sikatoy binalawbalaw na sarayan kriminal. (Mat. 27:44; Mar. 15:32) Pero ag-abayag, apaisip tan anguman imay sakey ya kriminal. Oniay imbaga to ed si Jesus: “Jesus, nonot mo ak sano onsabi kad Panarian mo.” Antoy ebat nen Jesus? Amay teksto tayo ed sayan agew. (Luc. 23:​39-42) Kada no nabasa tayod Biblia imay imbaga nen Jesus ed samay kriminal, seguro napapaisip tayo no anto kasi magmaliw ya bilay diad Paraiso. Makaala tayoy ideya diad impanuley nen Arin Solomon. Mareen tan mainawa so bilay ed Israel nen sikato so ari. Pero ibabaga na Biblia ya si Jesus et mas maong tan mas marunong ya ari nen say si Solomon. (Mat. 12:42) No si Jesus la tan saray kaiba ton arari so manuley dia ed dalin, seguradon pagmaliwen da iyan marakdakep ya Paraiso. No kabiangan itayo na ‘arum a karnero,’ duga labat ya amtaen tayo no antoy nepeg tayon gawaen pian manbilay tayo na andi-anggaan diad Paraiso.—Juan 10:16. w22.12 8 ¶1; 9 ¶4

Ipapaseguro ed sikatayo nen Isaias ya dengelen itayo nen Jehova no onkerew tayoy tulong ed sikato tan onkiwas ya tampol no manpikasi tayo. Oniay nabasad sampot na teksto ed sayan agew: “Ebatan to kan tampol sano narengel to itan.” On, ipapanonot na sayan teksto ya ag-itayo nabaingan no si Jehova so asinggeran tayo ta labalabay to tayon tulongan pian naanosan tayo ray subok. Makapaliket itan ya naamtaan, awa? Dedengelen nen Jehova so pikakasi na kada sakey ed sikatayo. Seguro, naimano yo ya diad gapo na Isaias kapitulo 30, say inusar iran salita et “yo,” “kayo,” tan “sikayo” ta say katongtong nen Jehova et saray Judio bilang sakey ya nasyon. Pero anguman diad bersikulo 19. Say nausar la et “ka” ta satan ya mensahe et parad kada sakey a lingkor to. Insulat nen Isaias: “Agka la onakis”; “kasian to ka”; “ebatan to kan tampol.” Maar-aron Ama si Jehova. Amta to ya aliwa tayon parepareho tan nanduruma so pankaukolan tayo kanian sansasakey ton dedengelen iray pikakasi tayo.—Sal. 116:1; Isa. 57:15. w22.11 9 ¶5-6

Anggano walay isusumpa, ituloy moy manpulong tan mangiyaral na Biblia, ta atan so mangiter ed sika na liket dan deen. Aligen tayo ray apostol. Nen ingganggan ira na opisyales na saray Judio ya agla ran balot manpupulong, imbaga ra ya say Dios so unoren da, aliwan saray totoo. Lapud intuloy day nampulong, malikeliket ira. (Gawa 5:​27-29, 41, 42) Siempre no walay panagbawal, dapat maalwar tayo ed panagpulong. Tua, aliwa itan ya mainomay. Pero no gawaen tayoy anggaay nayarian tayo, mareen so nonot tayo ta amta tayon napapaliket tayoy Aman Jehova tan ipapaamta tayo ed arum so mensahe ya makapangiliktar ed bilay da. On, anggano mair-irap so situasyon, nalikna tayo nin siansia so deen. No walay onkakalat ya sakit, walay kalamidad, o ibawal na gobierno so kimey tayo, tandaan tayo ya say klase na deen ya kakkaukolan tayo et say kareenan ya si Jehova labat so makapangiter. Mantiwala kad sikato tan ed organisasyon to. Manpokus ka ed saray bendisyon ya ipaparaan to parad sika. No ontay gawaen mo, kalmado ka labat ta antam ya kaibam so “Dios na kareenan.”—Fil. 4:9. w22.12 21 ¶17-18

Pian nagawaan tayoy ibabaga na teksto tayod sayan agew, kaukolan tayon ekalen iray aliwliwan ugali tan kagagawa ya singa say “panem-em na sakit na linawa, pasnok, sanok,” tan arum ni ra. (Efe. 4:​31, 32) Pero no maminsan, aliwan mainomay itan. Ibabaga na Biblia ya wala ray totoon sipor lan “mipepetang so ulo” ra tan “misasanok.” (Pro. 29:22) No wala ray ontan ya nilamot lan ugalim, kaukolan ya tuloytuloy mon kontrolen so sarilim anggano abautismoan ka la. (Roma 7:​21-23) Ipikasim ed si Jehova ya tulongan to kan naekal so aliwliwan ugalim. Seguradon dengelen to itan ya pikakasim ta unong ed linawa to. (1 Juan 5:​14, 15) Bilang ebat ed pikakasim, agto mamilagron ekalen so aliwliwan ugalim, pero seguradon ikdan to kay biskeg pian nakontrol moy sarilim. (1 Ped. 5:10) Balet siempre, pansagpotan mon gawaen no antoy ipipikasim. Iwasan mo ray posiblin rason ya ompawil so daan ya personalidad mo. No nalikas mo ya walay aliwliwan ompapasok ed isip mo, ekal mo itan ya tampol tan mannonot kay positibo.—Fil. 4:8; Col. 3:2. w23.01 10 ¶7, 9-10

Say sakey ya paraan ya nipanengneng tayoy panangaro et no makuli tayon manpulong. Anggapoy pipilien tayon pulongan—mairap man ira o mayaman, atagey man so inaral da o andi, tan anggan antoy nanlapuan dan tribu o lahi. No makuli tayod panagpulong tan anggapoy pipilien tayo, aaligen tayoy Jehova ta say labay to et “niliktar so amin a klase na totoo tan nawalaan ira na suston kakabatan ed katuaan.” (1 Tim. 2:4) Nipanengneng tayo met ya inar-aro tayoy Jehova tan Jesus no inar-aro tayo ray agagi. Imamalasakit tayo ra tan tutulongan tayo ra no ondadalan irad saray subok. Akaparaan tayon manligliwa ed sikara no inateyan ira, papasyaren tayo ra no mansasakit ira, tan agtayo onsasawan mamabiskeg ed liknaan da no nadi-depress ira. (2 Cor. 1:​3-7; 1 Tes. 5:​11, 14) Agtayo met ira lilingwanan ya ipikasi ta amta tayon “balbaleg so nagawaan na masimoon a pikakasi na sakey a matunong.”—Sant. 5:16. w23.01 28-29 ¶7-8

Diad ilalabas na panaon, say sakey ya construction worker et lalon ondudunong ed kimey to. Ontan tayo met. Diad ilalabas na panaon, mas nanaaralan tayo iray epektibon paraan no panon tayon napabiskeg so sakey tan sakey. Napaseseg tayo ray agagi ya mananos no istoryaen tayod sikara iray lingkor nen Jehova ya akapan-anos anggano mair-irap so situasyon da. (Heb. 11:​32-35; 12:1) Napansiansia tayo so deen no saray maong ya ugali tan nagagawaan na agagi so pampokusan tayo, no agtayo ipilit ed arum so opinyon o panlabayan tayo, tan no ayosen tayo ray agpantatalosan. (Efe. 4:3) Napabiskeg tayo met so pananisia na saray agagi no tulongan tayo ra pian mas lalo dan natalosan iray importantin katuaan ed Biblia, no mangiter tayoy praktikal ya tulong, tan no agtayo onsasawan pasesegen iramay kinmapuy so pananisia ra. Malikeliket tayo met no mitutulongan tayo ed espiritual ya panagpaalagey—say pamabiskeg tayo ed sakey tan sakey. Aliwan singa saray literal ya bilding ya diad ilabas na panaon et ondaan insan naderal, say resulta na espiritual ya pampapaalagey tayo et mansiansia ed andi-angga. w22.08 22 ¶6; 25 ¶17-18

Imbaga nen Jesus ya kaukolan so pakatebek pian natalosan tayoy Salita na Dios. (Mat. 24:15) Anto tay pakatebek? Atan imay abilidad ya amtaen no antoy koneksion o pandumaan na sakey ya detalye ed arum nin detalye. Atan met imay abilidad ya talosan so kabaliksan na sakey ya impormasyon anggano ag-itan direktan imbaga. Imbaga nen Jesus ya kaukolan tayoy pakatebek pian nanengneng tayo no kasin nagagawa la iray propesiya ed Biblia. Kaukolan tayo met itan pian minabang tayo ed amin ya nababasa tayo ed Biblia. Si Jehova so mangiiter na pakatebek ed saray lingkor to. Kanian ipikasim ed sikato ya ikdan to kay pakatebek. Antoy gawaen mo pian nipanengneng mod si Jehova ya seryoso ka ed satan ya ipipikasim? Usisam ya maong so babasaen mo tan isip mo no antoy koneksion na satan ed saray dati lan antam. I-research mo no antoy labay ya ibaga na sakey ya teksto tan no panon mon niyaplika itan ed bilay mo. (Heb. 5:14) No tebeken moy nababasam, mas onlawak so pakatalos mo ed Biblia. w23.02 10 ¶7-8

Imadyin mo pa ya walay kaarom ya inikdan to kay datdaan balet ta mabmablin painting. Kinmupas lay kolor to tan wala met la ray mantsa to. Pero lapud obra-maestra itan, milyon-milyon so presyo to. Kanian seguradon al-alwaran mo itan ya painting. Say bilay tayo et singa satan ya painting. Mabmabli itan ya regalo nen Jehova. Nibaga tayon mabmabli ed si Jehova so bilay tayo ta inter toy mismon Anak to pian nadondon itayo. (Juan 3:16) Si Jehova so “subol” o nanlapuan na bilay. (Sal. 36:9) Oniay imbaga nen apostol Pablo: “Lapud [Dios] et walay bilay tayo tan onggagalaw itayo tan wala itayo.” (Gawa 17:​25, 28) Atan so rason no akin ya nibaga tayon say bilay et regalo na Dios. Diad tua, inter toy amin ya nakaukolan tayo pian tuloytuloy tayon manbilay. (Gawa 14:​15-17) Pero agmanggagaway milagro si Aman Jehova natan pian naprotektaay bilay tayo. Labay to ya gawaen tayoy betang tayo—ilaloan ton asikasoen tayoy laman tayo, pati say espiritualidad tayo.—2 Cor. 7:1. w23.02 20 ¶1-2

Misatsalamat tayod Aman Jehova ta impaisulat to so Biblia! Nabasa tayo ditan iray bilin to ya makatulong pian nasarag tayo ray problema. Naamtaan tayo met ed Biblia ya walay marakdakep ya ilalo ya manatalaran ed sikatayo. Lapud Biblia, akabkabat tayoy Aman Jehova tan naamtaan tayo ray marakdakep ya ugali tan kualidad to. No dalepdepen tayo iratan, mas naar-aro tayo so Dios tan lalon onasingger so liknaan tayod sikato. (Sal. 25:14) Labalabay nen Jehova ya sikatoy nakabkabat tayo. Nensaman, impaamta toy mensahe to ed totoo panamegley na saray kugip, pasingawey, tan angibaki ni ingen na saray anghel. (Num. 12:6; Gawa 10:​3, 4) Labay nen Jehova ya naamtaan tan naaral tayo iratan ya mensahe, kanian ingganggan to so pigaran lalaki ya ‘isulat da iratan ed libro.’ Perpekto so amin ya gagawaen nen Jehova, kanian segurado ya atan so sankaabigan ya paraan pian makasabi so mensahe to anggad panaon tayo.—Sal. 18:30. w23.02 2 ¶1-2

Manisip ka na goal mo ed espiritual. No walay goal mo, magmaliw kan mas makalakal tan ontatken so nonot mo. (Efe. 3:16) Singa bilang, marakep no i-goal mo ya regular kan makapan-personal study tan inagew-agew kan manbasa na Biblia. (Sal. 1:​2, 3) Sarag mo met ya i-goal ya mas mabetbet kan manpikasi tan iparaan moy ibagam antis kan manpikasi. Ompan kaukolan mon mas kontrolen so sarilim diad panagpilim na libangan tan bawasan moy panaon mo ed satan. (Efe. 5:​15, 16) Mas ontatken ka ed espiritual no dakel so panaon mon ontulong ed arum. Singa bilang, marakep no i-goal mo ya tulongan iray kakongregasyon mon mansasakit o maedad la. Ompan sarag mo ran itindaanan o ibangat mo ra pian nakabisado day pangusar ed gadyet da. Nipanengneng mo met so panangaro ed saray agni manlilingkor ed si Jehova no ipulong mod sikara so maong ya balita na Panarian. (Mat. 9:​36, 37) Tan no posible, i-goal moy onloob ed full-time ya panaglingkor. w22.08 6 ¶16-17