Nobyembre

Lapud Kristiano tayo, agtayo manaayew tan aliwan bastos so panagsalita tayo. Pero no maminsan, ompan agtayo nalilikas ya makapasakit la manayay panagsalita tayo. Singa bilang, ompan walay pangaran o tawag tayo ed saray totoon dumay kultura, probinsya, tribu, o lahi da. Tan ompan nasasakitan tayo lay arum ed panaglurey tayo. Seguroen tayo sirin ya makapabiskeg iray ibabaga tayo. Alisto tayo komon ya mangiter na komendasyon, imbes ya manreklamo tayo o balawen tayo ray agagi. Agtayo komon aaligen iray Israelita. Imbes ya misalamat irad si Jehova, reklamo la ran reklamo. Diad tua, makaalis itan ya ugali. Nanonotan yo may agawa nen aliwliway imbalita na samploran espiya? Lapud saman, “nanmeremere so amin ya Israelita ed si Moises.” (Num. 13:31–14:4) Diad kabaliktaran balet, say pangiter na komendasyon et napaliket toy arum. Kanian maabig no iyugali tayo ya pisalamatan tan komendaan iray agagi ed saray maong ya nagagawaan da. w22.04 8 ¶16-17

Manlapu la nensaman ya anggad natan, agla nabilang so ugugaw ya tinulongan nen Jehova ya magmaliw ya kaaro to. Kanian tulongan to met iray ananak mo ya onaligwas ed espiritual, no talagan labay da. (1 Cor. 3:​6, 7) Anggano say pakaliknam et singa agda ipapapuso so katuaan, agka mapaga ta ag-ira sukoan nen Jehova tan tuloytuloy to ran bantayan. (Sal. 11:4) No walay anggan daiset ya pakapatnagan ya ‘duga so kipapasen na puso ra,’ sikatoy manggawa na paraan pian naiyasingger to ra tan magmaliw iran lingkor to. (Gawa 13:48; 2 Awa. 16:9) Ompan tulongan to kan makaisip na ibagam ya eksakto ed situasyon na anak mo. (Pro. 15:23) Ompan usaren toy sakey ya maespiritual ya brother o sister ed kongregasyon yo ya mamaseseg ed sikato. Tan anggano baleg la ray anak mo, ompan ipanonot ed sikara nen Jehova iray imbangat mo ed sikara nensaman. (Juan 14:26) No tuloytuloy mon bangatan iray ananak mo diad saray ibabagam tan ipanengneng moy maong ya alimbawa, iikdan moy Jehova na rason pian bendisyonan to ka. w22.04 21 ¶18

Lapud agla makapawil ed tawen si Satanas, ipapangget toy pasnok to ed saray nakekeran alanaan diad dalin ta sikara so mangirerepresenta ed Panarian na Dios, tan gagawaen da so “kimey a panagtasi nipaakar ed si Jesus.” (2 Cor. 5:20; Efe. 6:​19, 20) Nen 1918, walora ed sarayan alanaan ya agagi so inakusaan tan senentensiaan ya naprison mabayag. Singa la “inatey” so kimey na sarayan alanaan. (Apo. 11:​3, 7-11) Pero nen Marso 1919, sarayan aprison alanaan et imbulos, tan imbasura so kaso ra. Intuloy dan tampol so kimey ya panagpulong tan panagbangat. Pero agtinmunda si Satanas ed pangaataki to ed saray lingkor na Dios. Diad tua, ibabaga na Apocalipsis ya sikatoy angibuga na singa “ilog” na panamairap ed amin ya lingkor na Dios. (Apo. 12:15) Kaukolan sirin na kada sakey ed sikatayo so “panagsungdo tan pananisia” pian nitepel tayo itan.—Apo. 13:10. w22.05 5-6 ¶14-16

Diad sakey ya pasingawey, anengneng nen apostol Juan so duaran grupo ya onsusuporta ed uley nen Jehova tan naikdan na bilay ya andi-anggaan. Say unonan grupo et bubuoen na 144,000. Nanlapu ira diad dalin tan sikara so pinili na Dios ya nakaiba nen Jesus diad tawen pian manuley ed gobierno o Panarian To. Uleyan nen Jesus tan na 144,000 so interon dalin. (Apo. 5:​9, 10; 14:​3, 4) Diad samay pasingawey, anengneng nen Juan so 144,000 ya akaalagey ed simbolikon Palandey Sion diad tawen tan kaiba ray Jesus. (Apo. 14:1) Manlapud panaon na saray apostol anggad natan, nilibo la so apili ya magmaliw ya kabiangan na 144,000. (Luc. 12:32; Roma 8:17) Impaamta balet ed si Juan ya pigpigara labat ed sikara so mabilay diad dalin legan na kaunoran iran agew. (Apo. 12:17) Insan legan na baleg ya kairapan, saray alanaan ya wadia nid dalin et natipon ed tawen pian nakompleto lay 144,000. Magmaliw iran arari tan nakaiba ray Jesus ed Panarian na Dios.—Mat. 24:31; Apo. 5:​9, 10. w22.05 16 ¶4-5

Imbangat nen Jesus iray papatumbok to no antoy dapat ya pakanengneng dad sarili da. Oniay impaseguro to ed sikara: “Saray buek yo et abilang ya amin.” (Mat. 10:30) Makapabiskeg itan na liknaan lalo la no abebbebay pakanengneng mod sarilim. No amta nen Aman Jehova so bilang na buek mo, labay ton ibaga sirin, importante ka ed sikato! Tandaan mo itan, lalo la no iisipen mo ya agka karapat-dapat ya magmaliw ya lingkor to tan manbilay na andi-anggaan diad balon mundo. Manga 15 taon lay apalabas, walay imbaga na Say Panag-bantayan no anto dapat so pakanengneng tayod sarili tayo: ‘No atagtagey so pakanengneng tayod sarili tayo, magmaliw tayon malastog. No abebbeba met, ompan isipen tayo ya anggapoy kana tayo. Dapat balanse so pakanengneng tayod sarili tayo. Bidbiren tayo ya wala ray kamaongan tayo tan wala met iray kakapuyan tayo.’ w22.05 24-25 ¶14-16

Wala kasi nitulong mo pian mansiansia so pankakasakey ed kongregasyon? On, wala. Bibilinen itayo na Biblia ya magmaliw itayon mikakareenan. (Mat. 5:9; Roma 12:18) No gagawaen tayoy anggaay nayarian tayo ya ayosen iray agpantatalosan diad kongregasyon, singa tayo pararakepen ya lalo so espiritual ya paraiso. Tandaan tayo ya kada agi et inyasingger nen Jehova ed dugan panagdayew pian makapanayam ed espiritual ya paraiso. (Juan 6:44) On, seguradon makakaliket si Jehova no nanenengneng to ya mitutulongan ka pian agnaderal so pankakasakey tan deen diad kongregasyon—ta mabmabli ed sikato so kada lingkor to. (Isa. 26:3; Ag. 2:7) Antoy gawaen tayo pian talagan minabang tayo ed saray bendisyon ya iiter nen Jehova ed saray lingkor to? Aralen tayo so Biblia, tan dalepdepen tayo iray nanaaralan tayo. No maaral tan madalepdep ka, mas mainomay mon naalig so ugali nen Jehova tan Jesus, kanian lalom ya nipanengneng so panangaro tan panamabli ed agagi.—Roma 12:10. w22.11 12-13 ¶16-18

No kombinsido itayo ya pinerdona itayo la nen Jehova, ibabaga na Biblia ya ‘makainawa’ tayo. Magmaliw ya mareen so nonot tayo tan nawalaan tayoy malinis ya konsiensia. Nalikna tayo labat itan no “si Jehova a mismo” so amerdona ed sikatayo. (Gawa 3:19) No pinerdona itayo la nen Jehova, ompawil ed dati so relasyon tayod sikato, tan say pantrato tod sikatayo et singa agtayo nankasalanan. Sakey ni, aglan balot isumbat nen Jehova ed sikatayo so agawaan tayon kasalanan, tan agto tayo la dusaen lamet lapud satan. (Isa. 43:25) Ibantak to ray kasalanan tayo “no panoy kaarawi na bubutayan na agew manlapud seselekan to.” (Sal. 103:12) No isipen tayoy inka-espisyal na panamerdona nen Jehova, seguradon misatsalamat tan mandinayew tayo ed sikato. (Sal. 130:4) Say panamerdona to et ag-akadepende ed no kasin baleg o melag so kasalanan na sakey. Agtayo nakuestion so desisyon to ta sikato so Amalsa, Manangiter na Ganggan, tan sankarunongan ya Ukom. w22.06 5 ¶12-14

Balibalin ilalo so inter nen Jehova ed amin ya mangaaro ed sikato. Asingsingger to lan ekalen so sakit, patey, tan amin ya sengegan na paneermen tayo. (Apo. 21:​3, 4) Insipan to ya “saray mauyamo et tawiren day dalin” tan tulongan to ira ya gawaen itan ya Paraiso. (Sal. 37:​9-11) No nagawa la itan, mas nakabkabat tan mas naar-aro tayoy Jehova. Talagan marakdakep itan ya ilalo! Pero akin et makapantiwala tayo ya talagan nagawa iratan? On ta no si Jehova so angisipan, tooren ton tooren! Kanian agtayo nadismaya no “manilalo [tayod] si Jehova.” (Sal. 27:14) Nipanengneng tayo ya maniilalo tayo ed si Jehova no maanos tan malikeliket tayon alagaren so pakasumpal na gagala to. (Isa. 55:​10, 11) Komon ta manmatoor tayo ed si Jehova tan mantiwala tayo ya bendisyonan to “iramay masimoon a manaanap ed sikato.” w22.06 20 ¶1; 25 ¶18

Lapud si Jehova so Ama tayo, makaseguro tayo ya gawaen ton mismo imay prinsipyo ya impaisulat to diad 1 Timoteo 5:8. No kombinsido tayo ya inaro itayo nen Jehova tan inaro toy pamilya tayo, agtayon balot pandudaan ya talagan iter to ray pankaukolan tayo. (Mat. 6:​31-33) Diad tua, sankamaaroan tan sankamaiteran si Aman Jehova. Nen ginawa to so dalin, nayari pa komon ya say palsaen to et saramay kaukolan tayo labat pian nabilay tayo. Pero andi, dakdakel ni so ginawa to pian na-enjoy tayoy bilay. (Gen. 2:9) Panon to balet no say bilay tayo et ‘sankaalmo-sankaluto’? Misalamat tayo nin siansia ta seseguroen nen Jehova ya ag-itayo napapaulyanan diad kada agew. (Mat. 6:11) No bilang ta wala ray insakripisyo tayo parad si Jehova, tandaan tayo ya ag-iratan makakiking ed saray bendisyon ya iter tod sikatayo natan tan diad balon mundo.—Isa. 65:​21, 22. w22.06 15 ¶7-8

Aliwan saray interesado labat so tuloytuloy ya mankaukolan na anawet ya espiritual ya naakan. Kaukolan tayon amin itan. Imbaga nen apostol Pablo ya makatulong itan ya espiritual ya naakan pian ‘nibiig tayoy duga tan aliwa.’ Diad tua, aliwan mainomay ya unoren iray ganggan tan prinsipyo nen Jehova ta abebbeba lan maong so moralidad na saray totoo natan. Pero seseguroen nen Jesus ya tuloytuloy itayon nataryaan na espiritual ya naakan pian ombiskeg so determinasyon tayon unoren si Jehova. Satan ya naakan et manlalapu ed Salita na Dios, say Biblia. Singa si Jesus, papagalangan tayo so ngaran na Dios tan labay tayon ipakabat itan ed amin ya totoo. (Juan 17:​6, 26) Singa bilang, nen 1931, atawag tayo la ed ngaran ya Saray Tasi nen Jehova. Imbase tayo itan ed Biblia, tan prueba itan ya importantin maong ed sikatayo so ngaran nen Jehova. (Isa. 43:​10-12) Sakey ni, diad Balon Mundo a Patalos na Masanton Kasulatan et impawil tayo so ngaran na Dios diad saray bersikulon talagan kawalaan to. w22.07 11 ¶11-12

Say sakey ya katuaan ed Biblia et say maong a balita tungkol ed Panarian na Dios. Imbaga nen Jesus ya say katuaan tungkol ed Panarian et singa akaamot ya kayamanan. Oniay imbaga to ya nabasa ed Mateo 13:44: “Say Panarian na tawen et singa kayamanan ya akaamot ed uma, ya aromog na sakey a too tan inyamot to lamet; tan lapud liket to et inlako ton amin so kayarian to tan sinaliw to iman ya uma.” Diad tua, agpa manaanap na kayamanan imay laki. Balet nen aromog to itan, inlako ton amin so kayarian to pian naala to itan. Akin kasi? On ta amta to ya mabmablin maong imay nalmo ton kayamanan. Anggano paniibaen ni so amin ya niiter na sayan mundo, agto napantayan so liket ya nalilikna tayo natan diad panlilingkor tayod si Jehova tan say ilalo tayon manbilay na andi-anggaan sano uleyan la na Panarian na Dios so interon dalin. Tan sakey ni, wala ni kasi naisip mon mas importante odino mas mabli nen say pribilehyo ya kaarom si Aman Jehova? Nalikna tayo labat so tuan liket no amta tayon napapaliket tayoy Jehova.—Col. 1:10. w22.08 15 ¶8; 17 ¶ 9, 12

Nen panaon nen Jose, anggapo ni Mosaikon Ganggan ya ditan et malinew ya ingganggan nen Jehova ya “Agka mikakalugoran.” (Exo. 20:14) Diad tua, manga 200 ya taon ni so linmabas manlapud panaon nen Jose insan inter nen Jehova itan ya ganggan. Kanian akin et nibaga nen Jose ya ‘baleg a kaugsan tan mankasalanan ed Dios’ no mikalugoran o mirelasyon ed agto asawa? On ta kabkabat toy Aman Jehova, tan natatalosan to ya aglabay na Dios so imoralidad. Seguradon amta nen Jose imay uksoyan nen Jehova ya say asawan laki tan say asawan bii et para labat ed sakey tan sakey. (Gen. 2:24) Tan seguradon naistorya nen Jacob ed sikato imay amiduan inkagawa ya prinotektaan nen Jehova so bai tod pueg ya si Sara nen walay arum ya laki ya malabay ya mirelasyon ed sikato. (Gen. 12:​14-20; 20:​2-7) Inisip ya maong iratan nen Jose kanian atalosan to no antoy duga ed pakanengneng nen Jehova. Inar-aro nen Jose si Jehova kanian inar-aro to met so matunong ya estandarte To, tan sikatoy desidido ya unoren itan. w22.08 26 ¶1-2

Dati, say amta tayon tutukoyen na sayan propesiya et say simbolikon kioli o say impangituloy ed kimey ya panagpulong kayarin apatunda lawari na saray onkokontra nen 1918. Pero anguman so pakatalos tayo ed saya lapud ontutukoy iyan propesiya ed kioli na saray inaatey diad balon mundo. Akin et nibaga tayon ontan? Say salitan “dabok” ya inusar ed sayan bersikulo tan nabasa met diad Job 17:16 et parehon ontutukoy ed “Lubok.” Kanian say tutukoyen sirin na Daniel 12:2 et say literal ya ibilay na saray inaatey diad dalin no asumpal lay kaunoran iran agew tan say Armagedon. Nabasa met ed sayan teksto ya wala ray napaoli “parad andi-anggaan a bilay.” Labay ton ibaga, sarayan napaoli et tuloytuloy dan kabaten tan unoren si Jehova tan si Jesus, kanian kayari na Sanlibon Taon et awaten da lay andi-anggaan a bilay.—Juan 17:3. w22.09 21-22 ¶6-7

Aglabay ya ibaga na teksto ed sayan agew ya basta tayo labat pantiwalaan iray agagi ya anggapoy rason. Imbes, pantitiwalaan tayo ra ta apatunayan da ya talagan napantiwalaan ira. Kaukolan ya palabasen so panaon pian nanengneng no talaga kasin napantiwalaan so sakey. Anto sirin so gawaen mo pian pantiwalaan mo ray agagi? Maabig no kabaten mo ran maong. Miistoryaan kad sikara antis tan kayari na aral. Mi-partner kad sikara diad ministeryo. Anosan mo ra tan ikdan mo ray tsansa pian napatunayan da ya napantiwalaan ira. Natural labat ya diad unaan et nababaingan ka nin mangistorya na tungkol ed personal ya bilay mo. Pero legan ya oneelet so pankakaaro yo, ompan komportable ka lan mangibaga na problemam o arum ya nagagawad bilay mo. (Luc. 16:10) Panon to balet no aderal so tiwalam ed sakey ya agi? Imbes ya pultoten mon tampol so pankakaaro yo, mamalabas ka ni panaon. Tan agmo iisipen ya lapud ginawa na sakey ya agi et onman met lay amin ya agagi ed kongregasyon. w22.09 4 ¶7-8

Imanoen so eksperiensya nen Brother Miqueas ya elder ed South America. Wala may panaon ya aliwliwa kunoy ginawad sikato na pigaran brother ya walay pribilehyo dad organisasyon. Pero ginawa toy anggaay nayarian to pian nakontrol toy liknaan to tan makapannonot na duga. Pikasi lan pikasi, tan lanang ya onkekerew ed si Jehova na masanton espiritu pian ag-onkapuy so liknaan to tan ag-ontabang ed panlilingkor to. Nan-research met ed saray publikasyon tayo no antoy maabig ya gawaen to. Antoy naaralan tayo ed si Brother Miqueas? No say pakaliknam et aliwliway impantrato ed sika na sakey ya brother o sister, komon ta limpio nin siansia so panagnonot mo—mansiansia kan kalmado tan kontrol moy liknaan mo. Agkan tampol maniisip na negatibo ta agmo amta no antoy rason akin et onman so imbaga o ginawa to. Ipikasim ed si Jehova ya tulongan to ka pian natalosan moy situasyon to may agi. Isip mo ya agto ka met ginagalan sakitan, pian mas mainomay mon naperdona. (Pro. 19:11) Tandaan mo ya amta nen Jehova so dadalanen mo tan tulongan to ka pian agka onkapuy ed espiritual.—Ecl. 5:8. w22.11 21 ¶5

Say pilim ya kakaaro et saramay inar-aro day Jehova. Mas onaligwas ka no maespiritual iray kakaarom. (Pro. 13:20) Oniay imbaga nen John ya natan et manlilingkor la bilang sakey ya elder: “Nen kabataan ak ni, dakel so akaarok ya agagi ya nakakaibak diad panagpulong. Masetseseg ira, tan anengneng ko ya talagan malikeliket ira ed ministeryo. . . . Nen payunir ak la, diman ko a-realize ya pigpigara labat so maong ya kakaarok dati ta say labay ko labat ya pikaaroan et saramay kaedad ko.” Panon to no walay kakongregasyon mo ya alikas mon makapuy so impluensya tod sika? Amta nen apostol Pablo ya wala ray agagi nensaman ya mauges so impluensya ra kanian binagaan toy Timoteo ya arawian to ra. (2 Tim. 2:​20-22) Say pikakaaro tayod si Jehova so sankaimportantian ed bilay tayo. Dakdakel lay ginawa tan insakripisyo tayo pian makapikaaro tayod sikato, kanian agtayon balot ompapayag ya naderal itan lapu labat ed mauges ya impluensya na arum. w22.08 5-6 ¶13-15

Agtayo labay ya aligen iray makulangkulang ya kakkabusol da iray ganggan na Dios. Inar-aro tayoy Jehova kanian inar-aro tayo met iray ganggan to. Antoy gawaen tayo pian napabiskeg tayo itan ya panangaro? Maabig no pankomparaen tayoy bilay na saramay manguunor ed Dios tan saramay agmanguunor ed sikato. Antoy nansumpalan na saramay agmanguunor ed bilin nen Jehova? Lapud aliwa iray desisyon da, nambabangil laingen ya problema so aarapen da. Sika balet ey? Seguradon misatsalamat ka ta apaliisan moy dakel ya problema lapud uunoren moy Dios. (Sal. 32:​8, 10) Labalabay nen Jehova ya awaten komon na amin so tuan karunongan, pero agto tayo pipiliten. Impasakbay to la balet no antoy pansumpalan na saramay ag-ondengel ed karunongan to. (Pro. 1:​29-32) Anien da iray resulta na kagagawa ra. Sikara lanlamang so kaskasian ta makapa-stress so bilay da tan anggapoy deen na nonot da. Tan onsabi so panaon ya deralen ira na Dios lapud inkabenger da. Pero oniay sipan nen Jehova ed saramay mangiyaaplika ed bilin to: “Samay ondedengel ed siak et manayam ed kaligenan tan ag-ontakot ed antokaman ya irap.”—Pro. 1:33. w22.10 21 ¶11-13

No walay takot tayod si Jehova, baleg so respeto tayod sikato tan agtayo labay ya nasakitan so liknaan to. (Pro. 16:6) Kanian gagawaen tayoy anggaay nayarian tayon unoren so estandarte na Dios ya nanaaralan tayo ed Biblia. (2 Cor. 7:1) No gagawaen tayo iray panlabayan nen Jehova tan iiwasan tayo ray kagagawa ya kabusol to, seguradon maliket so bilay tayo. (Sal. 37:27; 97:10; Roma 12:9) Ompan say sakey ya too et amta to met ya si Jehova so walaay autoridad ya mangibaga no antoy duga tan aliwa. Pero say tepet, kasin unoren to itan? (Roma 12:2) Bilang Kristiano, nanengneng dapat ed kabibilay tayo ya talagan manisia tayo ya parad pankaabigan tayo so estandarte nen Jehova. (Pro. 12:28) Ontan so alikna nen David kanian nibaga tod si Jehova ya: “Impaamtam ed siak so dalan na bilay. Diad arapan mo et walay baleg a gayaga; diad nikawanan mo et walay liket ya anggad angga.”—Sal. 16:11. w22.10 8 ¶9-10

Agan balot binmaleg so ulo nen Jesus. Antis ya linmad dalin, dakdakel lay ginawa to. Ibabaga na Biblia ya “panamegley to et apalsa so amin ni ran bengatlan walad tawen tan walad dalin.” (Col. 1:16) Nen abautismoan si Jesus, mapatnag ya pinmawil ed memorya to so amin ya agawaan to nen kaiba to ni Ama to ed tawen. (Mat. 3:16; Juan 17:5) Kasin nagmaliw ya mapaatagey si Jesus nen anonotan to iratan ya amin? Andi. Diad tua et agton balot impalikas ya mas nayaryari nen say arum. Imbaga to ni ingen ed saray disipulo to ya sikatoy “linma dia [ed dalin] aliwan pian panlingkoran, noagta pian manlingkor tan iter toy bilay to a panondon ed amayamay.” (Mat. 20:28) Imbaga to met ya say gagawaen to et panlabayan nen Ama to, aliwan say sarili ton panlabayan. Talagan mapaabeba si Jesus! Aligen tayo sirin so alimbawa to. w22.05 24 ¶13

Say sakey ya ikokonsidera nen Jehova no mamerdona et no kasin amta na nankasalanan ya aliwa imay ginawa to. Atan imay punto nen Jesus ya walad Lucas 12:​47, 48. No gagalaen na sakey ya too so manggawa na mauges anggano amta to ya nasakitan toy Jehova, ambelat so kasalanan to. Kanian ompan sikatoy agperdonaen nen Jehova. (Mar. 3:29; Juan 9:41) Pero posible kasin naperdona ni nen Jehova? On, ta ikokonsidera to no kasin impapuso so pagbabawi na nankasalanan. Say panagbabawi et ontutukoy ed panguman na isip, ugali, o direksion na bilay. Kaiba ed satan so pakalikna na graben ermen tan pakakakonsiensia lapud antam ya mauges so ginawam o agmo agawaan so duga. No say sakey et talagan magbabawi, agto labat panermenan ya akapanggawa na mauges, noagta panermenan to met ya kinmapuy so relasyon tod si Jehova kanian akapankasalanan. w22.06 5-6 ¶15-17

Si Satanas et mangikakayat na tila tungkol ed saray brother ya mangidadaulo ed organisasyon nen Jehova. (Sal. 31:13) Say arum ed sarayan brother et inaresto, kinasoan, tan impasen a kriminal. Agawa la itan nen inmunan siglo nen inaresto tan impriso si apostol Pablo. Nen apriso si Pablo ed Roma, sikatoy tinaynan na arum ya agagi. (2 Tim. 1:​8, 15; 2:​8, 9) Seguradon ansakisakit iman ed si Pablo. Agto inilaloan ya onman so gawaen da ta dakel so intepel ton irap tan inrisga to ni ingen so bilay to parad sikara. (Gawa 20:​18-21; 2 Cor. 1:8) Agtayo komon aaligen irayan agagi ya tinaynan day Pablo. Agtayo la sirin nabibigla no pupuntiryaen nen Satanas iray brother ya mangidadaulo. Pakana to itan pian itakwil na sarayan agagi si Jehova tan nataktakot to tayo. (1 Ped. 5:8) Itultuloy tayon ipanengneng so suporta tan panangaro ed saray brother ya mangidadaulo.—2 Tim. 1:​16-18. w22.11 16-17 ¶8-11

Mapatpatnag ya Judio imay magbabawin kriminal ya impasak ed panamairapan a poste diad abay nen Jesus. Saksakey a Dios so dadayewen na saray Judio, aliwan singa saray totoo ed arum a nasyon ya manisia ed dakel a dirios. (Exo. 20:​2, 3; 1 Cor. 8:​5, 6) No aliwan Judio iman ya kriminal, di say intepet to komon et “Anggapo tay takot mod saray dirios?” Sakey ni, kaslakan et agpupulongan nen Jesus iray aliwan Judio ta sikatoy imbaki na Dios parad saray “abalang a karnero ed sankaabungan na Israel.” (Mat. 15:24) Impaamta na Dios ed saray Israelita ya bilayen to iray inaatey. Mapatpatnag ya amta iya na samay magbabawin kriminal. Base ed samay imbaga to, talagan manisia ya bilayen nen Jehova si Jesus pian manuley ed Panarian na Dios. Tan mapatnag ya iilaloan met na sayan kriminal ya sikatoy bilayen na Dios. Bilang Judio, amta to so tungkol ed si Adan tan Eva. Kanian nen abitla nen Jesus so Paraiso, seguradon say naisip to may kriminal et sakey ya marakdakep ya hardin diad dalin.—Gen. 2:15. w22.12 8-9 ¶2-3

Nagawaan tayo so panagpulong a kimey dia labat ed tulong na masanton espiritu na Dios. Akin et kakkaukolan tayo itan? Kakalabanen itayo nen Satanas ta labay ton patundaen so kimey a panagpulong. (Apo. 12:17) Ompan isipen na arum ya anggapoy kalaban-laban tayo ta mas mabiskeg si Satanas nen say sikatayo. Pero diad tua, tataloen tayo si Satanas lapud panagpulong tayo! (Apo. 12:​9-11) Akin et ontan so nibaga tayo? On ta kada no pansasagpotan tayon gawaey ministeryo tayo, ipapanengneng tayo ya agtayo natatakot ed si Satanas. Kanian kada no manpulong tayo, natatalo si Satanas. Prueba itan ya tutulongan itayo na masanton espiritu tan bebendisyonan nen Jehova iray sagpot tayo. (Mat. 5:​10-12; 1 Ped. 4:14) No walad sikatayo so espiritu na Dios, anggapo ’tay subok ed ministeryo ya agtayo nakaya. (2 Cor. 4:​7-9) Anto sirin so gawaen tayo pian tuloytuloy tayon ikdan nen Jehova na masanton espiritu to? Tuloytuloy tayon kerewen itan kada no manpikasi tayo, tan agtayo panduaruwaan ya iter itan nen Jehova. w22.11 5-6 ¶10-11

Nipanengneng tayo met ya inar-aro tayo ray agagi no gawaen tayoy anggaay nayarian tayon mikareenan ed sikara. Aligen tayoy Aman Jehova ya akaparaan ya mamerdona. No si Jehova et mabulos ton inter so mismon Anak to pian ompatey parad saray kasalanan tayo, di mabulos tayo met sirin ya perdonaen iray agagi tayo. Agtayo labay ya aligen imay mauges ya aripen ed sakey ya ilustrasyon nen Jesus. Anta agla impabayaran na katawan to imay balbaleg ya utang to, pipiliten to balet imay kapara ton aripen ya bayaran imay melag ya utang tod sikato! (Mat. 18:​23-35) No walay agyo pantatalosan na sakey ya agi, anto kasi no sika lay unonan manggawa na paraan pian naayos yoy problema yo antis na Memoryal? (Mat. 5:​23, 24) No ontan so gawaen mo, papaneknekan mo ya inar-arom si Jehova tan Jesus. w23.01 29 ¶8-9

Naamtaan moy pankaukolan na saray agagi no kumustaen mo ra tan tepeten moy situasyon da diad paraan ya ag-ira nabaingan. (Pro. 20:5) Kasin wala ni naakan da? Kasin kailangan day tambal tan arum nin nakaukolan ed inagew-agew? Kasin wala ni trabaho da, odino ompan anggapo lay pambayar dad renta na abung? Ompan kaukolan day mangiba ed sikara pian makala ray tulong na gobierno. Labay nen Jehova ya amin tayo et manpapasesegan tan mantutulongan. (Gal. 6:10) Anggan say simpli ya pangipanengneng na panangaro et balbaleg lay epekto to ed sakey ya mansasakit. Singa bilang, sarag na sakey ya ugaw so manggawa na card o mandrowing pian napaseseg so sakey ya agi. Sarasarag na saray kabataan ya itindaanan o ibaan so maedad lan agi diad kimey tod abung. Say arum ed kongregasyon et sarag dan ilutoan so agin mansasakit. Wala ray agagi ya angiter na thank you card ed saray elder ya busy’n maong ya ontutulong ed saray agagi. Importante sirin ya kada sakey ed sikatayo et “itultuloy [tayon] pasesegen tan pabiskegen so sakey tan sakey”!—1 Tes. 5:11. w22.12 22 ¶2; 23 ¶5-6

Kabisadon maong na saray Saduceo so unonan limaran libro na Hebreon Kasulatan, pero agda atebek so arum ya importantin katuaan ya nabasa ditan. Singa bilang, ag-ira manisia ed kioli. Kanian tinepetan day Jesus pian kuestionen itan ya bangat. Bilang ebat, oniay intepet nen Jesus ed sikara: “Agyo ta abasa ed libro nen Moises, diad salaysay nipaakar ed masabit a kiew, ya inkuan na Dios ed sikato: ‘Siak so Dios nen Abraham tan Dios nen Isaac tan Dios nen Jacob’?” (Mar. 12:​18, 26) Seguradon aminpigapiga lan abasa itan na saray Saduceo, pero mapatpatnag ya agda atebek so importantin katuaan ya onsabi panaon et walay nagawan kioli. (Luc. 20:38) Antoy naaralan tayo ed samay imbaga nen Jesus ed saray Saduceo? No manbabasa tayoy Biblia, labay tayon tebeken so amin ya katuaan tan prinsipyo ya walad sakey ya bersikulo o salaysay. Singa iratan akaamot ya kayamanan ya kaukolan tayon anapen. Kanian aliwan basta akabasa tayo tan atalosan tayo ray manunan bangat et duga la. Say goal tayo et anapen iray espiritual ya kayamanan. w23.02 11 ¶9-10

Graben subok so dinadalan na amin ya tasi ya tutukoyen na teksto natan, pero pinaneknekan da ya matoor ira ed si Jehova. (Heb. 11:​36-40) Diad tua balet, agda anengneng so impakasumpal na amin ya sipan na Dios. Labay to kasin ibaga, asayang so impananos tan impanmatoor da? Andi. Segurado ira ya walad sikaray pabor nen Jehova, kanian baleg so tiwala ra ya nanengneng da lanlamang ya nasumpal iray sipan to diad arapen. (Heb. 11:​4, 5) On, nanilalo irad si Jehova! Komon ta gawaen tayon inspirasyon so alimbawa ra pian determinado tayo met ya manilalo ed si Jehova. Lalo la ta onuuges lan onuuges so situasyon na mundo. (2 Tim. 3:13) Nanduruman klase na subok tan problema so itutupak nen Satanas ed saray lingkor na Dios. Anggano anto ni tay subok ya onsabi, komon ta determinado tayon ag-ontunda ya manlingkor ed si Jehova, tan lanang tayon isipen ya “say paniilaloan tayo et mabilay a Dios.”—1 Tim. 4:10. w22.06 25 ¶17-18

Say sakey ya rason no akin ya aasikasoen tayoy laman tayo et lapud labay tayon usaren so biskeg tayo diad panlingkor tayod si Jehova. (Mar. 12:30) Kanian iiwasan tayo ray nayarin panlapuan na sakit. (Roma 12:1) Siempre anggan antoy alwar tayo, agto labay ya ibagan agtayo lan balot mansakit. Anggaman ontan, aasikasoen tayoy laman tayo ta labay tayon ipanengneng ed si Aman Jehova ya papablien tayo so bilay ya inregalo to. No walay sakit tayo o matatken tayo la, ompan agtayo la nagawaan iray datin gagawaen tayo. Makapaermen tan makapadismaya itan. Pero agto labay ya ibagan paulyanan tayo lay laman tayo. Akin ey? On ta anggano walay sakit tayo o matatken tayo la, nairayew tayo nin siansia si Aman Jehova, ya singa ginawa nen Arin David. Tandaan tayo ya mabmabli tayo nin siansia ed pakanengneng nen Jehova! (Mat. 10:​29-31) Diad tua, anggano ompatey itayo, bilayen to tayo ta ontan lay panamabli tod sikatayo. (Job 14:​14, 15) Pero legan ya mabilay tayo ni, gawaen tayoy anggaay nayarian tayo ya alwaran so laman tayo. w23.02 20-21 ¶3-5

Kasin saray kabiangan na baleg ya ulop et mansiansia so ngaran da ed libro na bilay kayari na Armagedon? On. (Apo. 7:14) Imbaga nen Jesus ya ‘awaten da so bilay ya andi-anggaan.’ (Mat. 25:46) Pero anggano akaliktar irad Armagedon, agni ran tampol naikdan na bilay ya andi-anggaan. Legan na Sanlibon Taon ya Uley na Panarian, si Jesus so “manpastol ed sikara tan itonton to ra diad saray subol na danum na bilay.” Saramay ontumbok ed panangigiya nen Kristo tan napatunayan ya matoor ed si Jehova diad unor ya subok et permanente lan nisulat so ngaran da ed libro na bilay. (Apo. 7:​16, 17) Saray kanding balet et naderal diad Armagedon. Ag-akasulat so ngaran da ed libro na bilay. Imbaga nen Jesus ya “ompatey [ira] ed andi-anggaan.” (Mat. 25:46) Insulat met nen apostol Pablo ya “sikaray naukom tan say dusa ra et andi-anggaan a kadederal.”—2 Tes. 1:9; 2 Ped. 2:9. w22.09 16 ¶7-8

Seguradon narelaks tan man-enjoy so pamilya no wala rad nature. Makatulong itan pian onelet so bonding da. Dakdakel so ginawa nen Jehova ya balibalin lugar ya napasyaran tayo. Labalabay na saray pamilya so man-outing ed dayat o palandey. Labalabay na saray ugugaw so manbatik-batik tan manggalaw diad park, obserbaan iray ayayep, tan manames ed ilog o dayat. Diad balon mundo, diman tayo la talagan na-enjoy so amin ya pinalsa nen Jehova. Agtayo la antakot ed saray ayayep tan agda tayo met la antakot. (Isa. 11:​6-9) Lapud andi-anggaan so bilay, agtayo la naupotan na panaon ya na-enjoy iray ginawa nen Jehova. (Sal. 22:26) Pero atateng, natan ni labat komon et ibangat yo la ray ananak yo ya panliketan iray pinalsa nen Jehova. No usaren yo ray pinalsa pian mas nakabat na ananak yo si Jehova, seguradon nibaga da met iyan imbaga nen Arin David: “O Jehova, agbalot naparaan iray [ginawam].”—Sal. 86:8. w23.03 25 ¶16-17