Disyembre

Kasin samay opisyal na palasyo ya taga Etiopia et kualipikado lan manpabautismo? Isipen pa: Sayan laki et “linmad Jerusalem pian mandayew” ed si Jehova. (Gawa 8:27) Mapatnag sirin ya anggano aliwan Israelita, sikatoy akomberte la ed Judaismo. Kanian seguradon abasa to lay Hebreon Kasulatan tan dakel lay amta to tungkol ed si Jehova. Pero labalabay to ni makaaral. Diad tua, nen pinulongan nen Felipe iyan laki diad dalan, asabian to ya babasaen to ray insulat nen propetan Isaias. (Gawa 8:28) Patunay itan ya agkontento iyan laki ed saray manunan bangat na Kasulatan. Sikatoy nambiahe na arawrawi manlapud Etiopia ya anggad Jerusalem pian makapandayew ed si Jehova diad templo. Nen pinulongan nen Felipe iyan laki, wala ray balon katuaan ya naaralan to. Singa bilang, naamtaan to ya si Jesus so Mesias. (Gawa 8:​34, 35) Lalo ton naar-aroy Aman Jehova tan say Anak To. Kanian imbes ya mansiansia ed Judaismo, nandesisyon ya manpabautismo bilang patumbok nen Jesu-Kristo. Anengneng nen Felipe ya kualipikado la iyan laki, kanian binautismoan to. w23.03 8-9 ¶3-6

No mantila tayo, agtayo napaliket si Jehova lapud kabusol toy “matilan dila.” (Pro. 6:​16, 17) Diad mundo natan, normal labat so mantila, pero agtayo itan gagawaen ta labay tayon unoren si Jehova. (Sal. 15:​1, 2) Panon to no agtayo met direktan nantila, pero inyamot tayoy sakey ya impormasyon pian naloko so arum? Iwasan tayo met itan, ta say labay nen Jehova et mansalita tayoy katuaan. Agtayo met dapat mantsi-tsismis. (Pro. 25:23; 2 Tes. 3:11) No nalikas mo ya say simplin istoryaan et magmamaliw lan tsismisan, uman mo lay tongtongan tan mangistorya ka lay makapaseseg. Maksil so impluensya na sayan mundo, kanian manalwar tayon maong pian agtayo naalig so aliwliwa tan makaderal ya panagsalita ra. No duga so panguusar tayod abilidad tayon mansalita diad ministeryo, diad aral, tan diad pitotongtong tayod arum, seguradon bendisyonan itayo nen Jehova. No naderal la yan sistema na mundo, anggapo lay mauges ya impluensya kanian main-inomay tayo lan nairayew si Jehova diad panagsalita tayo.—Jud. 15. w22.04 9 ¶18-20

No isipen tayoy kabaleg na panangaro nen Jehova tan Jesus ed sikatayo, mas naar-aro tayo ra. (1 Juan 4:10) Pero lalon onelet so panangaro tayod sikara no tandaan tayo ya inter nen Jesus so bilay to parad kada sakey ed sikatayo. Atalosan itan nen apostol Pablo tan agaylay pisasalamat to. Oniay imbaga to nen sinulatan to ray agagi ed Galacia: “Manbibilay ak natan unong ed pananisia ed Anak na Dios, ya angaro ed siak tan inter toy sarili to parad siak.” (Gal. 2:20) No anggapoy dondon, agka makaasingger ed si Jehova tan agka nayarin magmaliw ya kaaro to. (Juan 6:44) Isip mo pa: Inyasingger ka nen Jehova ta walay anengneng ton kamaongan ed pusom tan mabmabli imbayar to pian magmaliw kan kaaro to. Makapa-touch anto? On, dakdakel so rason ya aroen moy Jehova tan si Jesus. Anto met so gawaen mo pian napatunayan mon inarom ira? No inaro tayoy Jehova tan Jesus, aligen tayoy panangaro da ed totoo.—2 Cor. 5:​14, 15; 6:​1, 2. w23.01 28 ¶6-7

Uusaren nen Jehova so Biblia pian “mankakasakey [tayon] manlingkor ed sikato.” Impaisulat nen Jehova so dakel ya parte na Biblia diad paraan ya say makatalos labat et saray mapaabeba. (Luc. 10:21) Dakel pay manbabasa na Biblia natan. Pero saray mapaabeba labat so makakatalos tan manguunor ed satan. (2 Cor. 3:​15, 16) Ipapatnag met na Biblia so karunongan nen Jehova. Tua, uusaren nen Jehova so Biblia pian ibangat iray lingkor to bilang sakey a grupo. Pero uusaren to met itan pian bangatan tan ligliwaen so kada lingkor to. No manbabasa kay Biblia, sankaliknam so panangaro tan malasakit nen Jehova ed sika, anto? (Isa. 30:21) Asalim la ya nen nambasa kay Biblia et walay bersikulo ya dugaruga ed situasyon mo? Akin et walan-walay nabasam ya eksakto ed sika anta impaisulat itan nen Jehova parad minilyon ya totoo? Nia so simplin ebat: Say Autor na Biblia et si Jehova, say sankarunongan ed interon uniberso.—2 Tim. 3:​16, 17. w23.02 4-5 ¶8-10

Labalabay tayoy manlingkor ed si Jehova ta inar-aro tayo. Tan siempre, labay tayon iter so ‘the best’ tayo ed sikato. Pero pian niiter tayoy ‘the best’ tayo, dapat walay espiritual ya goal tayo. Singa bilang, sarag tayon i-goal ya ipanengneng iray balibalin ugali, aralen iray skill ya mausar ed organisasyon, tan tulongan iray agagi diad nanduruman paraan. Akin et labay tayoy onaligwas ed espiritual? Say manunan rason et labay tayon napaliket si Aman Jehova. Seguradon makakaimis si Jehova no nanenengneng to ya uusaren tayoy talino tan abilidad tayo diad panlilingkor tayod sikato. Say sakey nin rason et labay tayon tulongan iray agagi. (1 Tes. 4:​9, 10) Walan-wala ni aligwasan tayo ed espiritual anggano abayag tayo lad katuaan. w22.04 22 ¶1-2

Asingger lan atakien na saray lider na gobierno ed interon mundo so Makapanyarin Babilonia, say empiryo na palson relihyon. Atan so palatandaan ya ginmapo lay baleg ya kairapan. No nagawa la itan, kasin ondakel so malabay ya manlingkor ed si Jehova? Andi. Diad tua, ibabaga na Apocalipsis kapitulo 6 ya say ilaloan na totoo ya manprotekta ed sikara et say sistema na politika tan komersyo, ya nikompara ed saray palandey. Mapatpatnag ya agdan talaga labay so manpasakop ed Panarian na Dios, kanian ipasen ira nen Jehova ya kalaban to. (Luc. 11:23; Apo. 6:​15-17) Legan na baleg ya kairapan, nanengneng na amin ya totoo ya talagan duma iray lingkor nen Jehova. Sikara labat so grupo na totoo diad dalin ya mandadayew ed Dios ya Jehova tan agda labay ya suportaan so “atap ya ayep.”—Apo. 13:​14-17. w22.05 16-17 ¶8-9

Aliwa labat ya “maong a balita na Panarian” so kaukolan ya ipulong na saray lingkor na Dios. (Mat. 24:14) Kaukolan da met ya suportaan so kimey na saray anghel ya adeskribe ed Apocalipsis kapitulo 8 anggad 10. Iyaanunsio na sarayan anghel so mantutumbokan ya dusa na saramay agda labay so manpasakop ed Panarian na Dios. Kanian ipupulong met na saray Tasi nen Jehova so mensahe na panangukom ya nikompara ed “uran a kristal tan apoy.” Ipapaamta ra ya deralen na Dios so amin ya kabiangan na mundo nen Satanas. (Apo. 8:​7, 13) Kaukolan ya naamtaan na saray totoo ya asingger lay anggaan pian nauman da lay kabibilay da tan makaliktar ira ed “agew na sanok nen Jehova.” (Sof. 2:​2, 3) Pero aglabay na totoo iyan mensahe. Kaukolan tayoy manpakpel sirin pian nipulong tayo itan. Diad tua, no baleg ya kairapan la, mas ambelat tan mas direktan mensahe na panangukom so ipulong tayo.—Apo. 16:21. w22.05 6-7 ¶18-19

Imadyin mo pay sanasawa ya magano lan magmaliw ya atateng. Seguro, nen anggapo ni anak da, dakdakel lan paliwawa so arengel da tungkol ed pamabaleg na ananak. Pero natan ya wala lay anak da, espisyal lad sikara iratan ya prinsipyo. Amta ra ya baleg ya responsabilidad so mamabaleg na anak tan aliwa itan ya gakgalaw! On, no manguman so situasyon tayo, wala ray teksto o prinsipyo ed Biblia ya magmaliw ya espisyal ed sikatayo, ya ompan dati et agtayo masyadon iimanoen. Atan so sakey ya rason no akin ya kaukolan tayon basaen tan dalepdepen so Kasulatan ed “amin ya agew” na bilay tayo, ya singa ingganggan met nen Jehova ed saray arari ed Israel nensaman. (Deu. 17:19) Sikayo ran atateng, responsabilidad yon ibangat iray ananak yo tungkol ed si Jehova. Balbaleg itan ya pribilehyo! Pero agto labay ya ibagan no kabat na ananak yo no siopa so Dios et susto la. Kaukolan yo ran tulongan pian naar-aro da met si Jehova. w22.05 26 ¶2-3

Kasin no panermenan tayoy kasalanan tayo et nibagan magbabawi tayo la? Andi. Say tuan panagbabawi et walay kaiba ton gawa—kaukolan ya umanen na sakey so kabibilay to. Say importantin ikokonsidera nen Jehova no mameperdona et no kasin intunda la na nankasalanan iray mauges ya kagagawa to tan gagawaen to la no antoy panlabayan nen Jehova. (Isa. 55:7) Pian nagawaan to itan, kaukolan ton pasimbaloen so panag-isip to tan manpaigiya ed kanonotan nen Jehova. (Roma 12:2; Efe. 4:23) Dapat desidido pian agto la napawil iray datin kagagawa to. (Col. 3:​7-9) Tan siempre, say manunan basiyan nen Jehova diad pamerdona to et no kasin talagan manisia tayo ed dondon bagat nen Kristo. Perdonaen tan linisan to tayo ed saray kasalanan tayo base ed satan ya dondon bagat no nanengneng to ya talagan gagawaen tayoy anggaay nayarian tayon umanen so kabibilay tayo.—1 Juan 1:7. w22.06 6 ¶16-17

Manlapu lad impanrebelde nen Adan tan Eva ed si Jehova, puro kaugsan lawari so gagawaen na too ed kapara ton too. (Ecl. 8:9) Singa bilang, wala ray opisyal ya aabusoen day autoridad da, ondadakel so kriminal, anggan ugugaw et bubully-en day kaklase ra, tan say arum ingen et mamaltratoen day mismon kapamilya ra. Agtayo la sirin pankelawan no akin ya antakot na too so kapara ton too. Panon ya uusaren nen Satanas so takot ed too pian onkapuy so espiritualidad tayo? Uusaren nen Satanas so takot ed too pian agtayo la unoren si Jehova tan ontunda tayo lan manpulong. Susugsogan to ray gobierno kanian ibabawal day kimey tayo tan papairapen da tayo. (Luc. 21:12) Dakel met ya totoo natan so mangikakayat na katilaan tungkol ed saray Tasi nen Jehova. Wala ray napapanisia da kanian bubusolen, iinsultoen, tan sasakitan da tayo ni ingen. (Mat. 10:36) Pero diad tua, aliwa la yan balo ta diad panaon na saray apostol et ontan lay ginawa nen Satanas.—Gawa 5:​27, 28, 40. w22.06 16 ¶10-11

Siopa iray “dakerakel” ya magmaliw ya matunong? Kaiba ed satan iray napaoli, saray makaliktar ed Armagedon, tan saray iyanak diad balon mundo. Kayari na Sanlibon Taon, perpekto la so amin ya totoo diad dalin. Agto labay ya ibaga ya no perpekto lay sakey ya too et segurado lan manbilay na andi-anggaan. Makaaral tayod samay agawa ed si Adan tan Eva. Perpekto iran tua, pero dapat napatunayan da ni ya talagan maunor ira ed Dios antis to ran ikdan na andi-anggaan a bilay. Makapaermen balet ta pinili dan ag-unoren so Dios. (Roma 5:12) No perpekto la so amin ya totoo diad dalin kayari na Sanlibon Taon, kasin amin da et tuloytuloy dan suportaan so uley nen Jehova? Odino singa met ira si Adan tan Eva ya anggano perpekto la ra et pilien day agmanmatoor ed Dios? Importantin naebatan iratan ya tepet. w22.09 22-23 ¶12-14

Kasin no maminsan et onkakapuy met so liknaan mo no nanenengneng moy amin ya problema ed mundo natan? Ombebetel lay aroan ed pamilya. Maslak ya totoo et masesebeg tan makasarili ira. Agda italtalek iray walad autoridad. Pero diad tua, sarayan nagagawa et pabiskegen toy liknaan mo. Akin ey? On ta prueba iratan ya nagagawa la iray propesiya na Biblia tungkol ed ugali na saray totoo diad “kaunoran iran agew.” (2 Tim. 3:​1-5) Agnaitanggi na anggan siopan too ya manbibilay tayo la ed kaunoran iran agew, tan prueba itan ya manuuley lay Kristo Jesus bilang Ari ed Panarian na Dios. Pero sakey labat itan ed dakel ya propesiya na Biblia ya walay koneksion to ed Panarian. Amin irayan propesiya et singa piraso na jigsaw puzzle ya no buoen tayo et nanengneng tayo ya talagan asingsingger lay anggaan. w22.07 2 ¶1-2

Legan na COVID-19 pandemic, akaawat tayo na malinlinew iran instruksion no panon tayon gawaen so aral ed kongregasyon tan no panon tayon manpulong. Mapmaples ya nandesisyon so Mananguley ya Ulop ya videoconference la so aral, asemblea, tan kombension tayo. Inaral tayo met so man-letter writing tan man-telephone witnessing pian makapanpulong tayo, tan benendisyonan nen Jehova so amin ya sagpot tayo. In-report na dakel ya branch office ya dinmakel laingen so publisher ed teritorya da. Diad tua, dakdakel so balibalin eksperiensya na saray agagi legan na pandemic. Ompan inisip na arum ya masyadon istrikto iray instruksion ya inter na organisasyon. Pero anengneng tayo ya duga iratan tan parad pankaabigan tayo lanlamang. No isipen tayon maong so maar-aron pangaasikaso tan pangidadaulo nen Jesus ed sikatayo, ombiskeg so tiwala tayo ya anggan antoy nagawa, ag-itayon balot paulyanan nen Aman Jehova tan say inar-aro ton Anak.—Heb. 13:​5, 6. w22.07 13 ¶15-16

Agtayo lilingwanan so misalamat ed si Jehova ed amin ya kamaongan to ed sikatayo. Singa bilang, pisalamatan tayoy Jehova ed saray mararakep ya rosas ya nandurumay kolor da, saray dakdakel ya klase na masarap ya panangan, tan say liket ya nalilikna tayo no kaiba tayo ray kakaaro tayo. Iiter irayan amin na maar-aron Ama tayo ta labay to ya magmaliw tayon maliket. (Sal. 104:​12-15, 24) Tan manuna ed amin, pisalamatan tayoy Jehova ed dakdakel ya espiritual ya naakan ya itatarya to tan ed balibalin arapen ya ipaparaan to parad sikatayo. Diad amin ya gagawaen nen Jehova parad sikatayo, ompan no maminsan et nalilingwanan tayoy misalamat ed sikato. Anto sirin so gawaen mo pian agmo nalingwanan so misalamat? Maabig no manggawa kay listaan na saray espisipikon impikasim, tan pawilpawil mo iray akalista ditan tan isip mo no panon lan inebatan nen Jehova iratan. Insan mo pisalamatan ed impangebat tod pikakasim.—Col. 3:15. w22.07 22 ¶8-9

Kulang so basta panaral labat ed katuaan. Kaukolan tayoy manbilay base ed katuaan. Labay ton ibaga, iyaplika tayod bilay tayo iray nanaaralan tayo. No ontan so gawaen tayo, nalikna tayoy tuan liket. (Sant. 1:25) Panon tayon naseguro ya manbibilay tayo base ed katuaan? In-suggest na sakey ya brother ya marakep no usisaen tayoy sarili tayo—isulat tayo no anto la ray maong ya nagagawaan tayo tan no anto ni ray kaukolan tayon i-improve. Mipara itan ed sayan imbaga nen apostol Pablo: “Antokaman so inaligwasan tayo la, mantultuloy tayo komon ya onabante.” (Fil. 3:16) Isipen pa iray balibalin resulta no gawaen tayoy anggaay nayarian tayon ‘manakar ed katuaan’! Magmaliw tayon mas maliket, tan napaliket tayo met si Jehova tan saray agagi. (3 Juan 4; Pro. 27:11) On, komon ta determinado tayon aroen so katuaan tan manbilay base ed katuaan! w22.08 18-19 ¶16-18

Panon ya nipanengneng na saray elder ya inar-aro day Jehova tan Jesus? Say sakey ya importantin paraan et no asikasoen da iray karnero nen Jesus. (1 Ped. 5:​1, 2) Atan imay impurek to ed si apostol Pedro. Amitlon imburi nen Pedro si Jesus, pero pagbabawian to iman ya ginawa to. Nen inmoli lay Jesus, oniay intepet tod si Pedro: “Simon ya anak nen Juan, kasin inarom ak?” Seguradon tatalaranan nen Pedro no antoy onsublay ya ibaga tan ipagawa nen Jesus, ta labay ton paneknekan so panangaro tod sikato. Oniay ingganggan nen Jesus ed si Pedro: “Pastolan mo iray angkekelag a karnerok.” (Juan 21:​15-17) Impapuso itan nen Pedro, ta manlapu lad saman et inasikaso to iray karnero nen Jesus bilang patunay ya inar-aro to. Sikayo ran elder, panon yon nipanengneng ya ipapapuso yo met imay imbaga nen Jesus ed si Pedro? Nipanengneng yo ya inar-aro yoy Jehova tan Jesus no maan-anos yon i-shepherding iray inaktibo tan tulongan yo ran ompawil ed si Jehova.—Eze. 34:​11, 12. w23.01 29 ¶10-11

No walay lalabanan mon kakapuyan, agmo komon iisipen ya anggapoy makatalos ed situasyon mo. Ta no ontay isipen mo, ompan onsuko ka la tan irason mo ya agmo lan talaga sarag so manguman. Pero ibabaga na Biblia ya sarag mo. Kuan to: “Sano onsabi so tukso et sikatoy manggawa met na dalan a pawayan pian nasungdoan yo itan.” On, anggano mabisbiskeg so pilalek na laman, tandaan tayo ya diad tulong nen Jehova, anggapo tay tukso ya agtayo nalabanan. Lapud agtayo perpekto, ompan walay makalaman ya pilalek tayo ya pawil-pawil nin siansia. Pero no nalikas tayo la itan, aligen tayoy Jose—ibatikan tayoy tukso! (Gen. 39:12) Tandaan, agka natalo na saray pilalek mo no desidido kan labanan iratan. w23.01 12-13 ¶16-17

Say sakey ya kualidad nen Jehova et hustisya. (Deu. 32:4) Labay ton ibaga, patas si Jehova—“anggapoy lalabien [to].” (Gawa 10:​34, 35) Nanengneng tayo itan ya kualidad to nen impaisulat to so Biblia. Sineguro to ya nisulat itan diad lenguahe ya natalosan na dakel ya totoo. Im-promise nen Jehova ya diad panaon na anggaan et “ondakel so tuan kakabatan.” Labay ton ibaga, ondakel so totoon makatalos ed saray katuaan ya walad Biblia. (Dan. 12:4) Diad panaon tayo, mainomay lay makaala na Biblia tan arum nin publikasyon ya base ed Biblia. Itra-translate tan ipa-publish la iratan diad nanduruman lenguahe. In-translate na organisasyon tayo so intero odino parte na Biblia diad masulok ya 240 ya lenguahe, tan agtayo itan papabayaran ed saray totoo no labay day mangala. Kanian saray totoo ed amin ya nasyon et nanaamtaan da so “maong a balita na Panarian” antis ya onsabi so anggaan. (Mat. 24:14) On, si Jehova et Dios na hustisya kanian labay ton ikdan na tsansa so amin ya totoo pian nabasa day Salita to tan sikatoy nakabat da. Gagawaen to itan ta inar-aro to tayon amin. w23.02 5 ¶11-12

Kasin inarom so inkatunong? Seguradon ‘on’ so ebat mo. Pero siempre, amin tayo et aliwan perpekto. No agtayo manalwar, ompan main-inomay tayon naimpluensiaan na sayan mundo. (Isa. 5:20) No nabitla so salitan “matunong,” say iisipen na arum et amay toon masita, atagtagey so pakanengneng tod sarili to, tan iisipen to ya mas maong nen say arum. Pero diad tua, aglabay nen Jehova iratan ya ugali. Nen wadiad dalin si Jesus, imbaga tod saray lider na relihyon ya aliway gagawaen da ta ipapasirayew dan matunong ira, pero abebbebay pakanengneng dad arum. (Ecl. 7:16; Luc. 16:15) On, no say sakey et tuan matunong, agton balot isipen ya sikatoy mas maong nen say arum. Say inkatunong et balibalin kualidad. Say matunong ya too et gagawaen to no antoy duga ed pakanengneng nen Jehova. Diad Biblia, saray salitan “matunong” tan “inkatunong” et lanang ya walay koneksion to ed atagey ya estandarte nen Jehova. w22.08 27 ¶3-5

Nantiwala si Jesus ed saray disipulo to anggano wala ray lingo ra. (Juan 15:16) Nen imbaga nen Santiago tan Juan ed si Jesus ya labay day nawalaan na espisyal ya posisyon ed Panarian, aga kinuestion nen Jesus so panlilingkor dad si Jehova tan agto ra inekal bilang apostol to. (Mar. 10:​35-40) Diad mismon labi ya inarestoy Jesus, sikatoy tinaynan na amin ya disipulo to. (Mat. 26:56) Pero aga nakal so tiwala nen Jesus ed sikara. Anggano wala ray lingo ra, “intultuloy ton impanengneng so panangaro tod sikara anggad kasampotan.” (Juan 13:1) Kayari na inkioli nen Jesus, inikdan to ni ingen na ambelat ya responsabilidad imay 11 ya matoor ya apostol to. Sikara so inyasain ton mangidaulo ed kimey ya panagpulong tan panagbangat, tan mangasikaso ed saray inar-aro ton karnero. (Mat. 28:​19, 20; Juan 21:​15-17) Kasin duga so desisyon to ya mantiwala ed sarayan agperpekton lalaki? On, ta amin da et matoor dan ginaway asainmin da anggad impatey da. Singa si Jesus, mantiwala tayo met ed arum. w22.09 6 ¶12

No lanang mon isipen ya inar-aro ka nen Jehova tan naynay mon kaiba, agkan balot nataktakot nen Satanas. Makaaral tayo ed samay angisulat ed Salmo 118. Nanduruman problema so dinalan to. Singa bilang, dakel so mamubusol ed sikato, kaiba la ray ataragey ya opisyal (bersikulo 9, 10). Imbaga to met ya singano walay mangitutulak ed sikato na makmaksil kanian ngalngali la onsuko (bersikulo 13). Tan asali to met so dinisiplina nen Jehova (bersikulo 18). Pero anggan ontay situasyon to, kinansionan to nin siansiay Jehova tan imbaga ton: “Agak ontakot.” Anggano sikatoy adisiplina, amta to ya sikatoy inar-aro na Ama tod tawen. Segurado iyan salmista ya antokaman so situasyon, wadtan ya lanang si Aman Jehova ya ontulong ed sikato. (Sal. 118:29) On, dapat kombinsido ka ya inar-aro ka nen Jehova. No agmo pandudaan so panangaro to, natalom iyan taloran klase na takot: (1) say takot ya agmo nalegpet so pamilyam, (2) say takot ed too, tan (3) say takot ya ompatey. w22.06 14-15 ¶3-4

Iyuna tayo ed bilay tayo so panagdayew ed si Jehova. Si Jehova so Amalsa, kanian sikato labat so karapat-dapat ya dayewen tayo. (Apo. 4:11; 14:​6, 7) Say sankaimportantian sirin ed bilay tayo et say pandayew ed si Jehova diad paraan ya labay to—“diad espiritu tan katuaan.” (Juan 4:​23, 24) Kaukolan tayoy manpaigiya ed masanton espiritu na Dios pian say panagdayew tayo et akabase ed saray katuaan ya walad Biblia. Agtayo dapat papaulyanan so panagdayew tayo ed si Jehova anggano manaayam tayo ed bansa ya imbawal o nilimitaan na gobierno so kimey tayo. Diad nanduruman bansa, masulok ya 100 ya agagi tayo so akapriso lapu labat ta sakey iran Tasi nen Jehova. Pero malikeliket ni ran siansia ya mandadayew ed si Jehova. Ag-ira tinmundan manpipikasi, manpi-personal study, tan ipupulong da nin siansia so tungkol ed Dios tan ed Panarian to. Anggano balawen o pairapen itayo na arum, maliket tayo nin siansia ta amta tayon kaiba tayoy Jehova tan bendisyonan toy katooran tayo.—1 Ped. 4:14. w22.10 9 ¶13

Diad libro na Proverbio, dakdakel ya bilin so impaisulat nen Jehova ya parad pankaabigan tayo. Imanoen so duaran bilin ya nabasa ditan. Unona, dapat ya mankontento tayo ed no antoy wala. Oniay bilin na Proverbio 23:​4, 5: “Agmo uupotey biskeg mo ed pananap na kayamanan . . . ta seguradon ontubo iray payak to a singa sakey ya agila tan ontikyab ed tawen.” Uupoten na dakel ya totoo natan so biskeg da ed pananap na kuarta, mayaman man ira o mairap so bilay da. Lapud kuarta so tetelekan na bilay da, anggapo lay pibabali da anggano naderal so reputasyon da, say relasyon dad arum, tan anggano mansakit ira. (Pro. 28:20; 1 Tim. 6:​9, 10) Komadua, manisip ka ni antis kan mansalita. No agtayo apipigeren so panagsalita tayo, ompan agtayo nalilikas ya nasasakitan tayo la manayay arum. Oniay imbaga na Proverbio 12:18: “Say salitan agla ninonot et singa saray saksak na espada, balet say dila na marunong et mamaabig.” Mansiansia so deen tan pankakaaro no agtayo la ilalabir o itsi-tsismis so kakapuyan o lingo na arum.—Pro. 20:19. w22.10 21 ¶14; 22 ¶16-17

Say mensahe ya ipulong nen Ezequiel et singa to iloob ed laman to—nepeg ton iyulo tan ipapuso pian napakiwas ya manpulong. Mankelaw si Ezequiel ta samay lukot et “masamsamit . . . a singa dilo.” (Eze. 3:3) On, parad si Ezequiel, say asainmin ton irepresenta si Jehova et “masamsamit” o makapaliket. (Sal. 19:​8-11) Misatsalamat ed si Jehova ed pribilehyo ton manlingkor bilang propeta. Oniay sinmublay ya imbaga nen Jehova ed si Ezequiel: “Ipapusom tan dengel moy amin ya ibagak ed sika.” (Eze. 3:10) On, labay nen Jehova ya tandaan tan dalepdepen nen Ezequiel so amin ya akasulat ed lukot. Seguradon inunor itan nen Ezequiel kanian kinmasil so liknaan to. Malinew met lad sikato so mensahe na panangukom ya kaukolan ton ipulong. (Eze. 3:11) Lapud impapuso la nen Ezequiel so mensahen ibaga to, akaparaan la ed asainmin to tan desididon sumpalen itan. w22.11 6 ¶12-14

Antoy gawaen mo no nanairapan kan man-adjust ed saray pananguman ed organisasyon? Suportaan mo iratan ya pananguman. Antis ya akasabid Insipan ya Dalin iray Israelita, saray Kohatita so manasakbat ed kaban na sipanan tan sankanengneng ira na amin. (Num. 3:​29, 31; 10:33; Jos. 3:​2-4) Nikadkaduma itan ya pribilehyo! Pero anguman so situasyon nen wala lad Insipan ya Dalin iray Israelita. Agla kaukolan ya iyalis-alis so kaban na sipanan. Kanian duman lan responsabilidad so inyasain ed saray Kohatita. (1 Awa. 6:​31-33; 26:​1, 24) Anggapon balot so nabasad Biblia ya nanreklamo iray Kohatita o nampa-importante ira ta dati et espisyal so asainmin da. Antoy naaralan tayod sikara? No wala ray pananguman ed organisasyon nen Jehova, mabulos tayon suportaan itan anggano manguman so asainmin tayo. Panliketan mo so anggan anton asainmin. Tandaan mo ya say panangaro nen Jehova ed sika et ag-akadepende ed pribilehyom. Say importante ed sikato et say katooran tan katutulok mo anggan anto ni tay asainmin mo. w22.11 23 ¶10-11.

Inanap nen Onesiforo si apostol Pablo. Nen aromog to, nanggaway paraan pian natulongan to. Ginawa to iman anggano amta to ya posiblin naaresto met tan ompan ipapatey ni ingen na gobierno. Antoy naaralan tayod saya? No wala ray brother ya arestoen tan napriso, kasin agtayo la ra suportaan ta natatakot tayod too? Andi. Kakkaukolan day panangaro tan suporta tayo. Kanian komon ta wadtan tayon lanang parad sikara. (Pro. 17:17) Isip mo pa ray brother tan sister ed Russia ya masuporta ed saray agagin impriso. No walay agi ya lilitisen, dakel ya agagi so oonla ed korte pian ipalikna so suporta da. Antoy naaralan tayo? No akusaan, arestoen, o ipriso iray agagi tayo, agtayo komon natatakot. Ipikasi tayo ra, asikasoen tayoy pamilya ra, tan manisip tayoy paraan pian nipalikna tayoy suporta tayo.—Gawa 12:5; 2 Cor. 1:​10, 11. w22.11 17 ¶11-12

Kaiba ed kimey na saray elder so pamabiskeg tan pamaseseg ed saray agagi. (1 Ped. 5:2) No walay nagawan kalamidad, nepeg dan seguroen ya ligtas so amin ya agagi tan walay naakan, kawes, tan panayaman da. Pero anggano linmabas lay pigaran bulan, kaukolan nin siansia na saray agagi so panamaseseg tan nalikna ran walay manmamalasakit ed sikara. (Juan 21:15) Oniay imbaga nen Harold, ya membro na Branch Committee tan dakdakel lay akatongtong ton agagi ya biktima na kalamidad: “Agan tampol maka-recover iray agagi. Seguro ompapawil met lad normal so kabibilay da balet nayarin pawil-pawil nin siansia so pakakailiw dad saray inatey ya kapamilya o kaaro da, sankanonot da ni ray aperdin kaykayarian da, odino man-panic lamet ira no nanonotan da may eksena ya dawdawit iran inatey. Normal labat ya pawil-pawil so ermen da, pero agto labay ya ibagan makapuy so pananisia ra.” Importante sirin ya saray elder et “miakis . . . ed saramay onaakis.”—Roma 12:15. w22.12 22 ¶1; 24-25 ¶10-11

Pian nagawaan tayoy duga, iikdan itayo nen Jehova na masanton espiritu to. Kada no man-personal study tayo, ipapanengneng tayod si Jehova ya labalabay tayoy manpaigiya ed espiritu to. Makakaawat tayo met na masanton espiritu no mimiaral tayo. Ditan et nakakaiba tayo ray agagi ya pansasagpotan dan gawaen so duga, tan napapaseseg tayod alimbawa ra. (Heb. 10:​24, 25; 13:7) Tan no espisipiko tayon ipikasi ed si Jehova ya tulongan to tayon labanan iray kakapuyan tayo, iter toy masanton espiritu to pian ombiskeg itayo tan agtayo onsuko. No gawaen tayo iratan ya amin, agmet automatiko ya naekal la ray mauges ya pilalek tayo. Pero baleg so nitulong na saratan pian nakontrol tayoy sarili tayo. Agtayo papaulyanan iray espiritual ya rotina tayo pian tuloytuloy tayon nalabanan iray makalaman ya pilalek. w23.01 11 ¶13-14

Say Biblia et aliwan libro tungkol ed nutrisyon o pangasikaso ed laman, pero naamtaan ditan no anto ray bilin nen Jehova tungkol ed saraya. Singa bilang, bibilinen to tayo ya “ipulisay [tayo] ray bengatlan mauges ed laman.” (Ecl. 11:10) Bibilinen to tayo met ya ag-itayo masiba tan mainum na alak, ta panlapuan itan na sakit. (Pro. 23:20) Labay nen Aman Jehova ya kontrolen tayoy sarili tayo pian naalwaran tayoy panangan tan kakainum tayo. (1 Cor. 9:25) Nipanengneng tayon papablien tayoy bilay tayo no usaren tayoy “abilidad [tayon] mannonot” no mandedesisyon tayo. (Pro. 2:11; Sal. 119:​99, 100) Singa bilang, usaren tayo itan ya abilidad no manpipili tayoy kanen tayo. No paborito tayo so sakey ya naakan pero amta tayon makapuy so epekto tod laman tayo, iwasan tayo la. Regular tayo met ya man-exercise, agtayo puyat lan puyat, tan mapalinis tayo dapat ed laman tan ed abung tayo ta atan so dugan gawaen. w23.02 21 ¶6-7

No manbabasa kay Biblia, panon mon naromog iray espiritual ya kayamanan? Makatulong so ibabaga na 2 Timoteo 3:​16, 17. Nabasa ditan ya “say interon Kasulatan et . . . makagunggona” parad (1) panagbangat, (2) pananimbawa, (3) panangipetek, tan (4) panagdisiplina. No manbabasa kay Biblia, imanom iratan ya apatiran gunggona anggan diad saramay libron agka masyadon pamilyar. Singa bilang, isip mo no antoy ibabangat na sakey ya salaysay na Biblia tungkol ed si Jehova, tungkol ed gagala to, o no anto ran prinsipyo so naaralan mo ed satan. Likas mo met no panon kan sisimbawaen nen Jehova. Kasin walay abasam ya bersikulo ya ditan et anengneng mo ya walay kaukolan mon umanen ya ugalim o kagagawam? Isip mo met no panon mon nausar so sakey ya teksto pian naipetek so pikewet ya panagrason, singa diad ministeryo. Imanom met no panon ya makatulong so sakey ya teksto pian nadisiplina o naipasal moy sarilim ya aligen so panagnonot nen Jehova. No sankanonot mo irayan apatiran gunggona legan kan manbabasa na Biblia, walan-walay naromog mon espiritual a kayamanan. w23.02 11 ¶11

Nabasa ed libro na Daniel ya onggapon manuley si Jesus ed Panarian kayari na simbolikon pitoran panaon. Panon tayon amta no kapigan itan agawa? (Dan. 4:​10-17) Say karukey na simbolikon “pitoran panaon” et 2,520 ya taon. Ginmapo itan nen 607 B.C.E. nen inekal na Babilonia so sampot ya ari ed Jerusalem ya mangirerepresenta ed uley nen Jehova. Anampot itan nen 1914 C.E. nen introno nen Jehova si Jesus—samay “makankanepegan” ya magmaliw ya Ari ed Panarian na Dios. (Eze. 21:​25-27) Akin et makapabiskeg na pananisia iyan propesiya? Ipapaseguro na propesiya tungkol ed “pitoran panaon” ya tooren nen Jehova so sipan to diad dugarugan panaon. Abaybayag lan inyeskedyul nen Jehova no kapigan onggapon manuley so Panarian to, tan talagan tinoor to itan nen sinmabi itan ya petsa. Makaseguro tayo sirin ya nagawa iray arum nin propesiya base ed eskedyul nen Jehova. On, no antoy imbaga nen Jehova, “seguradon ontua” diad dugarugan panaon!—Hab. 2:3. w22.07 3 ¶3-5