Sakey a Labin Nodnonoten

Say petsan Nisan 14 so anibersaryo na inkiliktar na Israel ed Ehipto. Saman so anibersaryon imbilin ed saray Judios a nodnonoten a kada taon a tekep na nikabiig a panangan. Legan na satan et nakaukolan dan ipaliwawa ed saray walad kalangweran ya anak da no panon a say dala na Paskuan kordero so impunas ed saray puerta tan ed tagey na puerta pian nasalimbengan iray panguloan ed sankaabungan na Israelita a manlapud manamatey ya anghel na Dios.​—Exodo 12:21-27.

Diad saginonor a 1,545 taon, dia met ed Nisan 14, inggapo nen Jesu-Kristo ed saray babangatan to a walaan na ilalo ed mangatatawen a Panarian so sakey a selebrasyon ya onsandi ed Paskua. Legan na sakey a simplen seremonya, inusar nen Jesus so andi-lebaduran tinapay tan alak a bilang simbolo na atooan a bilay to, ya ibagat to a para ed katooan. Say bagat to so walaan na manangiliktar a pakayarin superyor nen say samay Paskuan kordero. (Juan 1:29) Sanen inggapo to so memoryal na bagat to, inkuan nen Jesus: “Saya so itultuloy yon gawaen a pakanodnonotan ed siak.”​—Lucas 22:19.

Sikayo so iimbitaan na saray Tasi nen Jehova ya onatendi ed panselebra ed sayan sankaimportantian a selebrasyon ed Memoryal. Sayan taon say petsa ed kalendaryo tayo a mipetekan ed Nisan 14 et Lunes, Marso 24, kaselek na agew. Nayarian yo so onatendi ed satan ya agew diad Kingdom Hall a sankaasinggeran ed abung yo. Mitongtong ed saray Tasi nen Jehova ed lugar yo nipaakar ed eksakton oras.