Kapitulo 3

Mantultuloy ya Ompeket a Malet ed Salita na Dios

1. (a) Panoy impakaeksperiensia na kadaanan ya Israel diad inkamatua na Salita na Dios? (b) Akin a satan so makapainteres ed sikatayo?

“KABAT yon maong ed amin a puso yo tan ed amin a kamarerwa yo ya anggapo so sakey a salita ed amin na saray maabig a salita a sinalita nen Jehova ed sikayo a sinmaew. Sikaran amin so tinmua ed sikayo.” Saman so panonot nen Josue ed saray mamasiken na Israel kayari na inkilira ra ed Insipan a Dalin. Balet diad saray taon a tinmumbok et agda intultuloy ya impapuso so Salita na Dios tan inyaplika. Anto so nansumpalan? Impalinew na Biblia ya unong a saray sipasipan na bendisyon nen Jehova so nansumpal a napanmatalkan, ontan met, sinumpal to so imbaga to no nipaakar ed pansumpalan na katutunganga. (Josue 23:14-16) Saman a rekord, tan ontan met ed amin a walad Biblia so nipreserba ya onkanan kibangatan tayo​—ta pian “nawalaan itayo komon na ilalo” tan sirin ag-itayo manggawa na bengatlan mansumpal ed pakabalang na satan ya ilalo.​—Roma 15:4.

2. (a) Diad anton pantalos a say Biblia so “impuyan na Dios”? (b) Diad pikabat ed saya, anto so responsabilidad tayo?

² Anggaman 40 totoon “sekretaryo” so nausar a mangikurit ed Biblia, si Jehova a mismo so autor to. Kasin kabaliksan na satan a sikato so aktibon angidirihe ed inkisulat na amin a bengatlan wadtan? On. A singa simamatuan imbaga na apostol Pablo: “Amin a Sulat so impuyan na Dios.” Unong a kumbinsido ed satan, pasesegen mi so totoo ed amin a pasen a mangimano ed satan tan mangipaalagey na bilay da ed liber na kinarga to, unong a singa pambabanikelan min gawaen.​—2 Timoteo 3:16; 1 Tesalonica 2:13.

Anto So Ontulong ed Arum a Mangapresya ed Satan?

3. Anto so sankaabigan a dalan diad panulong ed dakel diad saraman so aliwan kumbinsido a say Biblia so Salita na Dios?

³ Siempre, dakel a pisalitaan tayo so andian na singa kumbiksion tayo a say Biblia so peteg a Salita na Dios. Panon so pakatulong tayo ed sikara? Mabetbet, say sankaabigan a dalan et say pangibukay ed Biblia tan ipanengneng ed sikara so karga to. “Say salita na Dios so mabilay tan mabiskeg tan mamakdem nen say anggan dinan a duaray-tarem a kampilan . . . tan nayarian ton tebeken iray kanonotan tan getma na puso.” (Hebreos 4:12) “Say salita na Dios” et say salita na sipan to, a nikurit ed Biblia. Satan so aliwan inatey ya awaran noagta mabilay tan agnaamper a mamapaarap ed kasumpalan to. Unong a satan so gawaen to, saray tuan motibo na puso na totoon nipaarap ed satan so ompatnag no nipaakar ed panangabet ed saray kipapasen. Say impluensya to so mas lalon mabiskeg nen say antokaman a nayarin personal ya ibaga tayo.

4. Antoran simplen paliwawa ed katuaan na Biblia so anguman ed awawey na arum a totoo ed Biblia? Akin?

⁴ Diad impakanengneng labat ed ngaran na Dios ed Biblia so nagmaliw a mananguman a punto ed dakel a totoo. Arum so nandesidin manaral ed Biblia sano nipanengneng no anto so ibabaga to nipaakar ed gagala ed bilay, no akin ya aabuloyan na Dios so karelmengan, say kabaliksan na kaplesan iran nagagawa odino say petepeteg ya ilalon nisentro ed Panarian na Dios. Diad daldalin a saray relihyoson agagamil so angipasen ed totoo a lukas diad pirmin panangonigon na saray mauges ya espiritu, say paliwawa na Biblia ed sengegan na saya tan no panon so pakagamor na pakalukpos so anagyat na interes. Akin a sarayan punto so makapasagyat ed sikara? Lapud say Biblia so alenleneg a sengegan na napanmatalkan ya impormasyon ed sarayan makanan pamaakaran.​—Salmo 119:130.

5. Sano ibaga na sakey a too a sikato so agmanisia ed Biblia, anto so nayarin rason? Panon so nayarin pakatulong tayo ed sikato?

⁵ Anggaman kuan, anto no direktan ibaga na sakey a too ed sikayo a sikato so agmanisia ed Biblia? Nepeg kasin manampot la so tongtongan? Andi no sikato so maliket a mikatunongan. Nepeg tayon liknaen so responsabilidad a mitongtong a tekep na kumbiksion ed Salita na Dios. Nayarin moriaen to a say Biblia so libro na Kakristianoan. Say rekord to ed pansimpisimpitan tan pisasalet ed pulitika, tan ontan met ed saray mabetbet a panagkolekta to na kuarta, so nayarin sengegan na negatibon kiwas to ed Biblia. Akin ya agtepetan no ontan? Say kondenasyon na Biblia ed saray minumundon dalan na Kakristianoan, a dingan na saray punton pandumaan ed baetan na Kakristianoan tan tuan Inkakristiano, so nayarin managyat na interes to.​—Ipareng so Mateo 15:7-9; Santiago 4:4; Miqueas 3:11, 12.

6. (a) Anto so mangumbinse ed sikayon personal a say Biblia so Salita na Dios? (b) Antoray arum a linya na panagkatunongan a nayarin usaren diad panulong ed totoon mangapresya a say Biblia so peteg a nanlapud Dios?

⁶ Para ed arum, say prankan diskusyon ed saray ebidensya na inkapuyanan so makatulong. Anto so malinlinew a mamaneknek ed sikayo a say Biblia so nanlapud Dios? Kasin say no anto so ibabaga na Biblian mismo no nipaakar ed gapowan to? (2 Timoteo 3:16, 17; Apocalipsis 1:1) Odino kasin say katuaan a say Biblia so nankarga na dakerakel iran propesiyan mangisisindag ed saray detalyadon pikakabat ed arapen, a saratan a propesiya so nepeg sirin a manlapud sakey a sengegan a mabiskeg-nen-too? (2 Pedro 1:20, 21; Isaias 42:9) Odino kasin angangko say akindalem a pantutukoyan na Biblia, anggaman insulat na dakerakel a totoo ed peryodo na masulok a 1,610 taon? Odino kasin say sientipikon inkasusto a miduma ed arum iran sulsulat ed saraman a panaon? Odino say inkamapaabeba na managsulat to? Odino say inkipreserba to ed arap na masebeg iran sagpot a paneral ed satan? Antokaman so aromog yon makapasagyat so nayarin nausar ya ontulong ed arum a totoo.

Personal a Panagbasa Tayo ed Biblia

7, 8. (a) Anto so nepeg tayon sinansakey a gagawaen ed Biblia? (b) Anto so nakaukolan tayo a niarum ed personal a panagbasa ed Biblia, tan panon so pangipanengneng na Biblia ed saya a mismo? (c) Panon so personal ya impakagamor yo na pakatalos ed gagala nen Jehova?

⁷ Niarum ed panulong ed arum a manisia ed Biblia, sikatayon dili so nakaukolan a mangilugar na panaon diad pambasan maparanay ed satan. Kasin satan so gagawaen yo? Amin na saray libron apawala, sayan sakey so sankaimportantian. Siempre, agkabaliksan na satan a no basaen tayo et agtayo nakaukolan so arum. Saray Kasulatan so mamapasakbay a sumpad pangibiig tayo na inkasikatayo, ya isipen tayon natalosan tayo laray amin a bengatla diad binubukor a panag-usisa. Namparan say personal a panagaral tan maparanay ya iyaatendi ed saray pantitipon so nakaukolan diad pagmaliw tayon asimbang a Kristiano.​—Uliran 18:1; Hebreos 10:24, 25.

⁸ Para ed pankaabiganan tayo ibabaga na Biblia so nipaakar ed sakey ya Etiopen opisyal ya angipaarapan na sakey ya anghel ed si Kristianon ebanghelisador a Felipe sanen say opisyal so manbabasa ed propesiya nen Isaias. Intepet nen Felipe et sikato: “Kasin peteg ya amtam so babasaen mo?” Sipapaabeban inmebat so Etiope: “Peteg, panon so pakaamtak no anggapo so sakey a mangiwanwan ed siak?” Kinerew to ed si Felipe ya isalaysay to so pasen na Sulat. Natan, si Felipe so aliwa lambengat ya independentin bumabasa na Biblia a mangiter na opinyon to ed Kasulatan. Andi; ipapanengneng na rekord ya impansiansia to so maapit a piuulop to ed saray apostoles diad kongregasyon ed Jerusalem tan sikato so sakey a membro na nanengneng a muyongan nen Jehova. Sirin nayarian ton tulongan so Etiopen mangungguna ed saray bangabangat ya itatarya nen Jehova ed panamegley na satan a muyongan. (Gawa 6:5, 6; 8:5, 14, 15, 26-35) Mipadpara natan, siopa ed sikatayo so akarateng ed sakey a malinew tan suston pantalos ed saray gagala nen Jehova ed inkasikaton dili? Diad kasuniyan, nakaukolan tayo, tan itultuloy tayon nakaukolan so tulong a simamaaron itatarya nen Jehova ed panamegley na nanengneng a muyongan to.

9. Antoran programa na panagbasa ed Biblia so mangungguna ed sikatayon amin?

⁹ Pian natulongan itayon mangusar tan mantalos ed Biblia, say muyongan nen Jehova so mangitatarya na saray ekselentin Makasulatan a materyal diad The Watchtower tan saray kaiban palapagan. Niarum, say maparanay ya eskedyul a panagbasa ed Biblia so nitarya ed sikatayo diad Teokratikon Eskuelaan na Ministeryo ed saray kongregasyon na Tasi nen Jehova. Arum a Tasi nen Jehova so manggagawa na mantultuloy a panagbasa ed Biblia a niarum ed saya. Baleg a gungguna so nagamoran diad panaon a nausar ed pangusisa ed Masanton Kasulatan. (Salmo 1:1-3; 19:7, 8) Kasin personal ya abasa yo la so interon Biblia? No andi ni, gawaen so nikaduman sagpot ed satan. Anggamano agyo natalosan a nagnap so amin a bengatla, say pakawalaan na interamentin panmoria ed satan so walaan na baleg a kablian. No basaen yo lambengat so apatira odino limaran pahina ed kada agew, nakumpleto yo so Biblia ed ngalngalin sakey taon.

10. (a) Kapigan so panggagawa yo na panagbasa ed Biblia? (b) Akin a say inkamaparanay so importante?

¹⁰ Kapigan so personal a pakapangiyuksoy yo a manggawa ed sayan panagbasa ed Biblia? No nayarian yon igeter so anggan samplora odino labinliman minuto ed kada agew, agaylan makagungguna so ontan? No andi, nayarin iyeskedyul so maparanay a panaon ed satan diad kada simba, tan insan mansiansia ed satan ya eskedyul. Say panagbasa na Biblia so nepeg a legay-bilay ya ugali, singa say panangan ed tagano. A singa kabat yo la, no saray ugali na sakey a too ed panangan so kinmapuy, say bunigas to so naapekta. Ontan, met, ed espiritualidad tayo. Say bilay tayo so mandepende diad katagano tayon maparanay ed “amin a balikas ya ompaway ed sangi nen Jehova.”​—Mateo 4:4.

11. Anto so nepeg a getma tayo diad pambasa tayo ed Biblia?

¹¹ Anto so nepeg a gagala tayo diad pambasa ed Biblia? Lingo no say gagala tayo et say basta pangobre ed sakey a kuta na saray pahina odino say sigpot a pakagamor ed maandon bilay. Pian magnayon a nagunggunaan, nepeg a nawalaan tayo na atagtagey iran motibo​—aro ed Dios, pilalek a mikabat ed sikato a magmaong, pian natalosan so linawa to tan pian sikato so dayewen a makapaliket. (Juan 5:39-42) Say awawey tayo so nepeg a singa saman so managsulat na Biblia ya angikuan: “Ipaamtam ed siak iray dilin dalan mo, O Jehova; ibangat moak ed saray dilin basbas mo.”​—Salmo 25:4.

12. (a) Akin a say pakagamor na “suston pikakabat” so nakaukolan, tan anton sagpot sano manbabasa so nayarin nakaukolan ta pian satan so nagamoran? (b) A singa nipanengneng ed kahon, manlapud antoran punto de bista so nayarin makagunggunan pangusisa tayo ed saman so babasaen tayo ed Biblia? (c) Iyilustra irayan limaran punto, a sansakey, diad pangebat ed saray tepet a nitarya ed sampot na sayan parapo. Seguroen ya usaren yo so Biblia yo.

¹² Legan a satan a bangat so awaten tayo, nepeg a pilalek tayo so pakagamor ed “suston pikakabat.” No satan so anggapo, panon tayon iyaplikan manepeg so Salita na Dios ed saray dilin bilay tayo odino nipaliwawan susto ed arum? (Colosas 3:10; 2 Timoteo 2:15) Say igamor na suston pikakabat so mankaukolan na pambasa tayon maalwar, tan no say kabiangan so aralem a nayarin nakaukolan tayon basaen a maminpiga ta pian natebek so kabaliksan. Sikatayo met so nagunggunaan no ilugar tayo so panaon ed pandalepdep ed materyal, a satan so morekdeken ed nanduruman punto-ed-bista. Limaran mablin paraan na panag-isip ed pangusisa so nipabitar ed onggendan a kahon. Dakel iran kabiangan na Kasulatan so makagunggunan nausisa diad pangusar ed sakey odino onsulok ed saraya. Legan ya ebatan yoray tepet ed onggendan nanengneng yo no panon a satan so tua.

(1) Mabetbet a say kabiangan na Kasulatan a babasaen yo so mangiter na pamatnagan ed nengneng na persona si Jehova.

Sano mandalepdep itayon tekep na panamabli ed ibabaga na Biblia ed sikatayo nipaakar ed saray kimey na panamalsa nen Jehova, panon so pangapekta na satan diad awawey tayo ed sikato? (Salmo 139:13, 14; manlapud Job kapitulo 38-42 imanoen nagkalautla so 38:1, 2 tan 40:2, 8, insan 42:1-6.)

Nisesengeg ed samay imbaga nen Jesus ed Juan 14:9, 10, anto so nibaga tayo nipaakar ed si Jehova a manlapud saray agawgawa a singa say nikurit ed Lucas 5:12, 13?

(2) Imanoen no panon a say awaran ya ontulong ed inkatibukel na tema ed Biblia, salanti, say kaalangon na ngaran nen Jehova ed panamegley na Panarian ed leksab nen Jesu-Kristo ya Insipan a Bini.

Panoy pisiglaotan na saray bakbak ed Ehipto diad sayan tema? (Nengnengen so Exodo 5:2; 9:16; 12:12.)

Anto so nipaakar ed makapaligsay-puson awaran nipaakar ed si Ruth a Moabita? (Ruth 4:13-17; Mateo 1:1, 5)

Panoy kinepeg na pakabat nen Gabriel ed si Maria diad onsasabin kianak nen Jesus? (Lucas 1:26-33)

Akin a say inkalanaan na saray babangatan nen Jesus na masanton espiritu ed Pentecostes so makabaliksan? (Gawa 2:1-4; 1 Pedro 2:4, 5, 9; 2 Pedro 1:10, 11)

(3) Say konteksto so walaan na kipaakaran ed kabaliksan na saray espesipikon bersikulo.

Diad siopa so angipaarapan ed saray balikas diad Roma 5:1 tan 8:16? (Nengnengen so Roma 1:7.)

Kasin ipanengneng na konteksto a say 1 Corinto 2:9 so mangokomento nipaakar ed bilay ed dalin diad Balon Oksuy na Dios? A singa nipanengneng ed bersikulo 6-8, siopara mata tan layag so agmakatalos ed saray bengatlan insulat nen Pablo?

(4) Tepetan mo so inkasika no panon so pakapanggawam na personal ya aplikasyon ed babasaen mo.

Kasin say rekord nipaakar ed impamatey nen Cain ed si Abel so bengatlan makapainteres ed awaran lambengat odino kasin wala so simbawan wadtan a para ed sikatayo? (Genesis 4:3-12; 1 Juan 3:10-15; Hebreos 11:4)

Sano basaen tayo (ed Exodo ya anggad Deuteronomio) so nipaakar ed saray eksperiensia na Israel ed kalawakan, anto so personal ya aplikasyon a nepeg tayon gawaen? (1 Corinto 10:6-11)

Kasin say simbawa ed kondukta a nisulat ed saray alanaan a Kristiano so onaplika ed saray totoon walaan na ilalo ed maandon bilay diad dalin? (Ipareng so Numeros 15:16; Juan 10:16.)

Anggaman sikatayo so walad maabig a talindeg ed Kristianon kongregasyon, kasin walay pankaukolan na pangimano ed dalan pian lalon sigpot a niyaplika tayo so simbawa na Biblia a kabat tayo la? (2 Corinto 13:5; 1 Tesalonica 4:1)

(5) Molimolien no panon so nayarin pangusar yo ed saman so babasaen yo diad panulong ed arum.

Siopa so nayarin natulongan diad salaysay na inkioli na anak a bii nen Jairo? (Lucas 8:41, 42, 49-56)

13. Antoran pansumpalan so nailaloan tayo a manlapud mantultuloy a programa na panagbasa ed Biblia tan panagaral ed muyongan nen Jehova?

¹³ Agaylan mayaman a makatumang so panagbasa na Biblia sano nagawa ed onian nengneng! Pian naseguro, say panagbasa ed Biblia so sakey ya angat​—sakey a proyekto a nayarin makagunggunan kimeyan tayo legan na bilay. Ingen legan a satan so gawaen tayo sikatayo so lalon ombiskeg ed espiritual. Iyasingger to itayo ed maaron Ama tayo, si Jehova, tan diad saray Kristianon agagi tayo. Tulongan to itayon mangimano ed simbawan pansiansiaen “so malet a pamemben ed salita na bilay.”​—Filipos 2:16.

Repason Diskusyon

● Akin a say Biblia so nisulat tan nipreserba ya anggad natan?

● Panon so pakatulong tayo ed arum a mangapresya ed satan?

● Akin a say maparanay a panagbasa ed Biblia so makagungguna? Manlapud anton limaran punto de bista so makagunggunan analisaen tayo ed saman so basaen tayo?

[Kahon/Litrato ed Pahina 31]

Sano Basaen so Biblia Imanoen​—

No anto so ibaga na kada parte ed sika nipaakar ed si Jehova bilang persona

No panon so kisiglaot to ed interamentin tema na Biblia

No panon so pangapekta na konteksto ed kabaliksan

No panon so nepeg a pangapekta to ed dilin bilay mo

No panon so pangusar mo ed satan diad panulong ed arum