Kapitulo 2
Itandoro si Jehova a Bilang say Tuan Dios
1. (a) Siopa so tuan Dios? (b) Legan a sikato so aralen tayo, panon so nepeg a kaapekta na saray dilin bilay tayo?
1 Diad saray kaparan Kristianos insulat nen apostol Pablo ya, anggaman walaray dakel a tatawagen na dirios, “peteg a wala ed sikami so sakey a Dios ya Ama . . . tan wala so sakey a Katawan, si Jesu-Kristo.” (1 Corinto 8:5, 6) Say “sakey a Dios” a tinukoy nen Pablo et si Jehova, say Amalsa ed amin a bengatla. (Deuteronomio 6:4; Apocalipsis 4:11) Saray maapresyan totoo a makakaaral ed saray kalidad to tan saray bengatlan ginawa to a para ed katooan so akaromog ed inkasikara ya agda natulakan so iyasingger ed sikato. Diad anton resulta? Natural lambengat ed sikara so pangitandoro ed samay Sakey a dinaydayew dan tuloy, a gawaen da diad salita tan diad gawa. Legan a say aro ra ed Dios so ombulaslas, nalikna ran sikara so napilit a mangibaga ed arum nipaakar ed sikato, tan diad kalaknab ed sikara bilang totoo et kaliktan dan aligen. Sikatayon amin so papasesegen na Biblia a manggawa na ontan, a kuanto: “Magmaliw kayon umaalig ed Dios, a singa inad-aron anak, tan mantultuloy a manakar ed aro.” (Efeso 5:1, 2) Pian satan a simbawa so niyaplika, nakaukolan tayon kabaten si Jehova unong a sikato so tua.
Say Nengneng na Persona Si Jehova
2. Anto so arum ed saray matalonan kalidad na Dios a manenyeg ed sikatayon mangidayew ed sikato?
2 Naromog ed interon Biblia so amayamay a direktan balikas a mangibibiig ed saray manunan kalidad na Dios. Sano saraya so nabasa yo, ilugar so panaon diad panisip no anton peteg irayan kalidad tan no panon so kaimportante ra ed sikayo. Alimbawa: “Say Dios so aro.” (1 Juan 4:8) “Amin na saray dalan to so inkaalas.” (Deuteronomio 32:4) ‘Diad sikato et wala so kakabatan.’ (Job 12:13) Sikato so “mabiskeg ed pakayari.” (Isaias 40:26) Legan a sarayan atributo so umamengen yo, agta sikayo so napakiwas, nisesengeg ed panamabli ed Dios, pian sikato so dayewen?
3. Anto so arum iran nengneng na personalidad nen Jehova a makapasagyat?
3 Diad malaknab nin pangikabat ed sikatayo diad makapasagyat a personalidad to, ibabaga ed sikatayo na Biblia a si Jehova so “sakey a Dios a mapangasi tan maabagey, matantan ya onsanok tan daakan ed maaron panangasi tan katuaan.” (Exodo 34:6) “Sika, O Jehova, so maong tan akaparaan a mamerdona.” (Salmo 86:5) “No nipaakar ed si Jehova, saray mata to so onnengneng ed interon dalin tan ipanengneng to so biskeg to a nisesengeg ed saramay say puso ra so nagnap ed sikato.” (2 Awaran 16:9) “Say Dios so aliwan manangiduma, noagta diad amin a nasyon say too ya ontakot ed sikato tan manggawa na inkatunong so makapaliket ed sikato.” (Gawa 10:34, 35) Si Jehova so “mangiter a mabunbulok” tan sikato “so maliket a Dios.” (Santiago 1:5; 1 Timoteo 1:11) Agaylan makarepresko so pandayew ed sayan andi-kaparan Dios tan nalikna so maaron panangasikaso to!
4. (a) Anton nengneng na debosyon so kakaukolan nen Jehova, tan panon a satan so importante? (b) Diad anto so pangiimbitaan na Salmo 34:3 ed sikatayo a pibiangan?
4 Matukoy ed saray atributos to et say katuaan a sikato so “sakey a Dios a mankaukolan na sigpot a debosyon.” (Exodo 20:5) Pian sikato so napanlingkoran a makapaliket nepeg ya iter ed sikato so sigpot a debosyon tayo. Agtayo met nayarian ya aroen so mundo a si Satanas so dios. (1 Juan 2:15-17; 2 Corinto 4:3, 4) Nanengneng nen Jehova so anggan anton pankunkunwari ed inkatunong. Kabat ton maong a nagnap so aliwa lambengat ed saman so gawaen tayo noagta ontan met ed no panon so liknaan tayo ed satan tan no anto so sasalien tayon pagmaliwan a nengneng na totoo. No tuan inaro tayo so inkatunong, sikatayo so tulongan to. (Jeremias 17:10; Uliran 15:9) Nisengeg ed nengneng nen Jehova a persona, nilaksalaksan totoo ed sankadalinan so malikeliket a mangaawat ed imbitasyon na salmista na Biblia sanen insulat to: “O itandoro tayo si Jehova, sikayon totoo, tan alangonen tayon mankakasakey so ngaran to.” (Salmo 34:3) Kasin sakey kayo ed sikara?
5. Anto so ontulong ed sikatayo a mangunggunan nagnap diad panaral tayo ed personalidad nen Jehova?
5 Say pilalek yon mangitongtong nipaakar ed Dios so onaralem, tan sikayo so natulongan na baleg diad saray sagpot yon mangalig ed sikato no usisaen yon maapit iray atagey a kalidad to. Anapen (1) ya eksakto no anto so kada kalidad, angangko no anto so piduma to ed arum a kalidad, (2) no panon so impangipatnag nen Jehova ed satan tan diad siopa, ontan met (3) no panon so pangipatnag yo ed satan odino no panon so pangapekta to ed punto de bista yo.
6. Usaren so aro a bilang ehemplo, ipanengneng no panon yon nayarian ya usisaen iray kalidad nen Jehova. Saya so gawaen diad pangebat ed saray tepet a walad sampot na sayan parapo, a pati saray kasulatan ed ebat yo.
6 Imanoen dia so sakey pa nin ehemplo. Sano ibabaga na Biblia, “Say Dios so aro,” anto so kabaliksan to? (1 Juan 4:8) Wala ra, siempre, so pigaran nengneng na aro. Inusar na Griegon salita ed sayan teksto so a·gaʹpe, a tutukoyen to so sankatageyan a porma na aro, a singa impanengneng ya ehemplo nen Jehovan Dios a mismo. Say ontan ya aro so sakey a balikas na sigpot ya anggapoy kasibletan. Diad panisip ed satan, tibukelen yoray dilin ebat yo ed saray tepet a walad onggendan, ya usaren so nisitan kasulatan.
Panon so inkipatnag na sayan kalidad diad saray kimey nen Jehova ed impamalsa? (Gawa 14:16, 17)
Anto so sankamatalonaan ya ehemplo na aro nen Jehova ed katooan? (Juan 3:16) Kasin satan so lapud kaabigan na too a saya so ginawa nen Jehova? (Roma 5:8)
Panon a say ginawa nen Jehova ed panamegley na Anak to so mangimpluensya ed dalan a pangusaran tayo ed saray bilay tayo? (2 Corinto 5:14, 15, 18, 19)
Diad antoran dalan so nayarin pangipanengneng tayon Kristianos a walaan itayo na parehon nengneng na aro ed saray kaparan Kristianos? (1 Corinto 13:4-7; 1 Juan 4:10, 11; 3:16-18)
Diad siopa ni so nepeg a pangipanengnengan tayo na aro, tan panon? (Mateo 5:43-48; 28:19, 20; Galacia 6:10)
7. Diad personal a panagaral yo, panon so pakaromog yo na mipadparan materyal nipaakar ed arum a kalidad nen Jehova?
7 Kasin labay yo met ya usisaen so pigara ed saray arum a kalidad nen Jehova? Diad pangigapo, akin ya agsalien so “inkahustisya” tan “kakabatan” ed personal a panagaral, insan angangko say “maaron-abig-linawa” tan “panangasi.” Tekep na pangusar ed indese ed saray palapagan na Watch Tower tan say konkordansya na Biblia, naromog yo so mayaman a makapaliwawan materyales.
Tulongan So Arum a Manaral ed Katuaan Nipaakar ed Dios
8. (a) Antoran dirios so dadayewen na totoo ed mundo? (b) Siopa so walad benegan na sayan amin a gutgutan, tan akin ya ibaga yo so ontan?
8 Diad isusumpa ed panagdayew ed tuan Dios, literal a nilaksalaksan arum a dirios so dadayewen na totoo. Nen komapat a siglo, say Kakristianoan so angadapta ed pananisia ed “Trinidad,” ya imbangat na saray taga Babilonia, Ehipsio, Hindu tan Budista sakbay na saman. Niarum ed sayan panmoria ed Dios, walaray mabibiskeg a manuley, matalunggaring iran gumagalaw tan kumakanta a dinayew bilang dirios. Say kuarta, dilin laman tan sekso so nagmaliw met a dirios a pangipupugtaan na masimoon a debosyon. Siopa so walad benegan na satan ya amin? “Say dios na sayan sistema na bengabengatla,” si Satanas a Diablo. (2 Corinto 4:4; 1 Corinto 10:20) Diad amin a nayarin isipen, diad masilib a paraan et sasalien ton pabenegen so totoo ed si Jehova, odino nayarin apagen to so debosyon da.
9. Anto so sankaabigan a dalan a panulong ed siopaman a manaral ed katuaan nipaakar ed Dios?
9 Panon tayon tulongan so ontan iran totoo, balanglan saray mankuan a Kristiano odino arum, a mangamta ed katuaan nipaakar ed Dios? Sakey ed saray sankaabigan a dalan et say pangipanengneng ed sikara diad makatulong a dalan ed no anto so ibabagan mismo na Biblia nipaakar ed pakabidbiran ed tuan Dios tan say nengneng ton persona. Insan nakaukolan tayon pabiskegen iya diad kondukta a mangidalangirang ed maridios iran kalidad ed bilay tayo.—1 Pedro 2:12.
10. Sano mitotongtong ed sakey a Trinitaryano, akin ya aliwan makabat so pangipasen a kabat tayon eksakto so sisisiaen to?
10 Balet anto no arum ed saray membro na iglesia na Kakristianoan so onsuppiat ed sikayo, ya ibaga ran say pananisia ra ed “Trinidad” so Makasulatan? Ununa ed amin, moriaen ya, anggaman walaray opisyal a balikas ed doktrinan “Trinidad,” dakel a totoo so walaan na saray dilin ideya. Imbitaan iran mangibalikas na inkasikara, tan insan tulongan iran mangipareng na sisisiaen da ed saman so wala ed dilin Biblia ra. Nasabi panaon, sikara met so pasesegen a mangipareng ed opisyal a bangat na iglesia ed Salita na Dios.
11. Alaen lambengat so sakey ed saray limaran manunan punto a sansakey, usaren iray tepet tan kasulatan a nilista ed sayan parapo diad pangikatunongan ed ag-inkamakasulatan na doktrinan “Trinidad”?
11 Sinononot ed pilalek ya ontulong ed saray masimoon a totoo, imanoen no panon so nayarin pangusar yo ed saray tekston nidatak ed leksab diad pangikatunongan ed saray punton nipanengnengan na sarayan kasulatan:
(1) Arum iran Trinitaryano so mangidadanet ed ideya a wala so taloran madibinon Persona (Ama, Anak tan Espiritu Santo) balet saksakey a Dios.
Balet kasin ipapanengneng na Gawa 2:4, 17 a say “Espiritu Santo,” odino “masanton espiritu,” so sakey a persona?
Akin a makatulong so pangimano no panon a dakel a totoo so nipapaarap ed kada sakey ed saray onggendan a kasulatan? (Juan 17:20-22; Gawa 7:56; Apocalipsis 7:10)
(2) Arum so manisia ya amin a membro na “Trinidad” so nampapara ed gloria, ya anggapo so babaleg odino memelag nen say sananey, a sikara so parpareho tan ontan met a nampaparan maando.
Kasin mipakna so Kasulatan? (Diad ebat, nengnengen so Juan 14:28; Mateo 24:36; Apocalipsis 3:14.)
(3) Ituro na arum a totoo so Juan 1:1 a bilang prueba ed “Trinidad.” Isangsang da a say Griegon teksto dia so andian na “indefinite article” (“a”) tan sirin say kasulatan so nepeg a nabasa: “say Salita so Dios,” imbes a “sakey a dios.”
Balet pigaran persona so asalita ed Juan 1:1? Talora? Odino duara? Panon met so pisumlangan na Juan 1:18 ed doktrinan “Trinidad”?
Tua a say Griego so andian na indefinite article, balet ta dakel iran lenguahe so walaan, tan nausar ed saratan a lenguahe ta pian nibalikas a duga so kanonotan. No liknaen na sakey so pangusar ed indefinite article sano ipatalos so Juan 1:1, kasin satan met so labay ton ekalen ed Gawa 28:6 unong ed King James Version tan saray arum ni? (Sananey a nengneng na impangipatalos ed Juan 1:1, a singa nipanengneng ed An American Translation, so “say Salita so dibino,” salanti, sikato so walaan na parehon madibinon kalidad a wala ed Dios.)
(4) Isangsang met na saray Trinitaryano a diad Genesis 1:1, 26 a say Hebreon salita et nipatalos a “Dios” so El·o·himʹ tan saya so masulok-nen-sakey ed Hebreo tan peteg a kabaliksan to so “Dirios.”
Akin a satan et agto suportaan so bangat na taloran dibinon Persona ed “sakey a Dios”?
No ipanengneng to so sakey a “Trinidad” ed Genesis 1:1, anto so ipanengneng to ed Uko-ukom 16:23, ya inusar to so el·o·himʹ a para ed “dios,” diad Hebreon berbo ed porma a singular, aliwan plural?
Akin a say porman plural ed Dios so nausar ed sarayan teksto ed Hebreo? Saya so sakey a dalan a pangipatalosan na Hebreo ed ideya na katagyan odino karlangan. No masulok nen sakey a too so labay ton ibaga, saray kaulop a verb so plural met, balet diad alimbawan walad tagey so andi.
(5) Lapud danet ya impasen na saray iglesia ed si Jesus (dingan na katuaan a say ngaran a Jehova so inekal ed dakel iran patalos na Biblia), arum iran totoo so manisip labat ed si Jesus sano nabitla so Dios.
Balet anton ehemplo ed panagdayew so intarya nen Jesus ed sikatayo ya aligen? (Lucas 4:8)
12. Akin a matukotukoy so impanawag nen Jesus ed Ama to a bilang “say alenleneg a tuan Dios”?
12 Anggaman si Jesus so asalita ed Kasulatan a bilang “sakey a dios,” anggan “Makapanyarin Dios,” ingen ta intandoro to so Ama to, a sikato so tutukoyen to a bilang say “Dios ko tan Dios yo.” (Juan 1:1; 20:17; Isaias 9:6) Sikato so akipakna ed si Moises, ya angibagan akadkauna: “Si Jehova so tuan Dios; anggapo so arum nilikud ed sikato.” (Deuteronomio 4:35) Si Jehova so miduman tuloy ed ontan iran puntirya na dadayewen bilang idolo, didiosen a totoo tan Satanas a Diablo. Diad piduma ed amin na satan, si Jehova, a singa impanawag nen Jesus ed sikato, “so alenleneg a tuan Dios.”—Juan 17:3.
“Manakar ed Ngaran nen Jehova”
13, 14. Anto so nalalanor diad “pikabat” tan ‘panakar ed’ ngaran nen Jehova?
13 Kayari na dakel iran taon na gutgutan no nipaakar ed pakabidbiran ed Dios, aromog na dakel iran totoon makapasagyat sanen inmunan anengneng da so personal a ngaran na Dios, Jehova, ed Biblia ra. (Exodo 6:3) Balet sikara so maandon nagunggunaan ed sayan pikakabat lambengat no sikara so ‘manakar ed ngaran nen Jehova ed ando lan ando.’ (Miqueas 4:5) Saya so manasaglawi na nagkalalo nen say basta pikabat ed ngaran nen Jehova odino pangibagan sikara so Tastasi nen Jehova.
14 Nipaakar ed kabaliksan na ngaran na Dios, ibabaga na Salmo 9:10: “Saraman so mikabat ed ngaran mo so manmatalek ed sika,. . . O Jehova.” Anto so lalanoren na satan? Lalanoren to so mas nen say pikabat ed ngaran nen Jehova, ya aliwan automatikon kabaliksan toy panmatalek ed si Jehova. Say “pikabat” ed ngaran na Dios dia et kabaliksan toy pangapresya ed nengneng na Dios si Jehova, nipaakar ed autoridad to, pangunor ed saray ganggan to. Mipadpara, say ‘panakar ed ngaran nen Jehova’ so manutukoy na pagmaliw a dedikado ed sikato tan pangirepresenta ed sikato a bilang sakey ed saray managdayew ed sikato, tuan uusaren na sakey so bilay to a mitukoyan ed linawa na Dios. (Lucas 10:27) Kasin satan so gagawaen yo?
15. Anto, likud ed liknaan na obligasyon, so nakaukolan no lingkoran tayo si Jehova ed ando lan ando?
15 No lingkoran tayo si Jehova a maando, mas nen say liknaan na obligasyon so nepeg a managdag ed sikatayo. Pinaseseg nen apostol Pablo si Timoteo a manlilingkor la ed si Jehova ed dakel lan taon: “Manpasal ka ed maridios a debosyon a bilang getmam.” (1 Timoteo 4:7) Say debosyon so manlapud puso; sikato so pakiwasen na apresasyon ed personan kipaarapan to. Say “maridios a debosyon” so napabaleg nipaakar ed si Jehova a personal. Ipatnag to so maaron kisiglaot ed sikato lapud apresasyon ed sikato tan ed saray dalan to. Pakiwasen to itayon manlabay ed amin a mangitandoro ed ngaran to ed sankatageyan a panamagalang. Nepeg tayon bayuboan so “maridios a debosyon” a bilang kalat odino getma ed bilay tayo no sikatayo so manakar ed ngaran nen Jehova, say tuan Dios, ed ando lan ando.—Salmo 37:4; 2 Pedro 3:11.
Repason Diskusyon
● Anton nengneng na persona si Jehova? Panon so kagunggunaan tayo dia ed pangala na malinew a pakatalos ed kada sakey ed saray kalidad to?
● Panon so pakatulong tayo ed arum a totoon makaaral ed katuaan nipaakar ed Dios?
● Anto so nalalanor diad “pikabat” ed si Jehova tan say ‘panakar ed ngaran to’?