Tepetepet a Manlapud Managbasa

◼ Kasin say nakdaan a nilanaan na Katawan ed dalin so kabiangan na mangatatawen, pinagkaasawan-biin organisasyon nen Jehova, “Jerusalem ed tagey”?

Saray nilanaan ed dalin nayarin nasalitan nanengneng a kabiangan na muyongan na Dios, say sankatalbaan a pamilya na saray intelihentin pinalsa.

Bilang sinansakey a “nianak lamet,” sikara so magmaliw ya espiritual ya ananak nen Jehova. (Juan 3:3, 5; Roma 8:15-17) Si Jehova so Ama ra. Ingen ta sikara so walaan met na sakey ya “ina,” lapud insulat nen apostol Pablo a “say Jerusalem ed tagey . . . so ina tayo.” Nayarin saya so manutukoy ed mangatatawen a muyongan na saray matoor ya espiritun impasen nen Jehova a bilang piguratibon “asawan-bii.” (Galacia 4:26) Sano saray alanaan a Kristianos so mangawat ed mangatatawen a tumang da, sikara so aktual a mangala na pasen da ed satan a mangatatawen a muyongan.​—Apocalipsis 4:4; 14:1-5.

Saray alanaan a nakdaan ed dalin so aliwa nin literal a kabiangan na “Jerusalem ed tagey.” Balet lapud nikadkaduman posisyon da bilang espiritual ya anak a tekep na ilalo ed mangatatawen a bilay, tan lapud irerepresenta ra so mangatatawen ya “asawan-bii” na Dios, no maminsan et sikara so isakup nen Jehova ed manangisindag a dalan diad saray direktiba, propesiya, sipasipan, tan salsalita na panligliwa a nipaarap ed pinagkaasawa ton muyongan ed tawen.

Saya so nayarin iyilustra tayo ed saray salitan manasaglawi ed kadaanan ya Israel. Diad panamegley nen Isaias, dineskribe nen Jehova so sakey a bii ya agulonggulongan, diad dabok, a mankaukolan na kaliing tan pangisindag na liwawa. (Isaias 51:9, 14; 52:1, 2; 60:1) Saraman a kipapasen so aglinmesa ed limog na saray matoor ya espiritun ananak nen Jehova a manitibukel na mangatatawen a “bii.” Anggaman kuan, sikara so linmesa ed nasyon na Israel. Sanen saray Israelitas so nibulos a manlapud inkadakep ed Babilonia nen 537 K.K.P., sikara so aliing, tinmalindeg a nanlapud dabok, tan ginmapon angisindag na liwawa nen Jehova. Say nipaalagey-lamet a Jerusalem (a mangitatalindeg ed nasyon) so singa sakey ya asawan-biin tinaynanan balet ta natan et sikato so sinayakup lamet tan mamapawala na saray anak, saray Judios ed nipawil a nasyon. (Isaias 54:1-8; 60:1-22; 66:7-14) Kanian saray salita ed Isaias nipaakar ed kipapasen na “bii” (a say “pinagkaasawan-lakin akankayarian” et si Jehova) so niwala ed mangaraldalin a nasyon a mangirerepresenta ed sikato.

Natan ipaarap tayo so imano ed espiritual a nasyon ya awaten na Dios bektaman a sikato (tan say mangatatawen a “biin-pinagkaasawa” to) so ontunda lan mangusar ed silalaman ya Israel. (Galacia 6:16) Kayari na impagmaliw ton “lepes” ed dakel a siglos, say “Jerusalem ed tagey” so ginmapon amawala na saray espiritual ya anak. Si Jesus so inmunan sakey ya apawala, nen 29 K.P., a tinumbokan na 144,000 nin arum, a ginmapo ed saray apostoles tan ninatnat ya anggad panaon tayo. (Galacia 4:21-31) Diad antikey a panaon ed asasakbay a kabiangan na sayan siglo, say nakdaan na espiritual iran Israelitas so sinmuko ed saray panamairap tan sinmabi, a singa panangibaga, ed inkadakep. Insan, nen 1919, sikara so nipaway ed inkadakep ed Babilonia a bilang sakey a kapkapangyanak a nasyon ed espiritual a dalin. Sirin, nanengneng tayo a saray mapropetikon salita nen Isaias nipaakar ed kadaanan a Jerusalem so akaromog na kapetekan ed espiritual ya Israel ed dalin.

Imanoen, met, so Apocalipsis 12:1-17. Diad sampot na Panaon Hentil nen 1914, say mangatatawen a “biin-pinagkaasawa” na Dios so amawala na gobiernon Panarian a singa sakey ya “ugaw a laki.” Say nimedmer a Satanas so “sinmanok ed bii.” Balet say panangataki so aliwan direkta a sumpad pinagkaasawan-biin organisasyon na Dios ed tawen, a satan so agto la nayarian a dampoten. Noag ingen, si Satanas so akibakal “ed nakekeraan na bini to” a mangirerepresenta ed sikato diad dalin.

Sirin, a singa diad abenegan ed mangaraldalin ya Israel, ontan met ed espiritual ya Israel. Say kipapasen ed “Jerusalem ed tagey” so nisindag ed limog na saray anak to ed dalin. Diad praktikal a pantalos, saray ganggan, panametek, ligliwa, tan sipasipan a nipaarap ed mangatatawen a pinagkaasawan-bii nen Jehova, so mangapektan manuna ed saraman so wadia ed dalin a mangirerepresenta ed sikato tan walaan na ilalo ed pagmaliw a kabiangan na mangatatawen a muyongan na Dios.

◼ Kasin saraman so wala ed “baleg ya ulop” so magmaliw a kabiangan na sankatalbaan a muyongan nen Jehova?

Natan, sakbay na “baleg a kairapan,” amin a Tasi nen Jehova so malikeliket a manseserbi ed Dios diad inkasaksakey. (Mateo 24:21) Anggapo so inkaapag-apag diad katuaan a say melag a bilang so alanaan na espiritu tan maniilalo diad iyakar ed tawen, bang say karaklan so walaan na ilalo ed maandon bilay diad mangaraldalin a paraiso. A singa impanengneng nen Jesus, namparan say “karnero” tan say “arum a karnero” so nikasakey ed “sakey a pulok.” (Juan 10:11, 16) Sirin, say peles a muyongan na saray ariripen nen Jehova so tinibukel na saratan a duaran grupo, a tekep na saratan a destino.

Anengneng lan akauna nen Jehova a say biin-pinagkaasawa to so manggayaga ed ontan ya aligwas. Impanengneng to a saray totoon nanlapud amin a nasyones, saraman so aliwan espiritual ya Israelitas, so natipon ed baleg a bilang. (Isaias 60:1-22; 61:5-9) Say libro na Apocalipsis so manideskribe na “sakey a baleg ya ulop, ya agnayarin bilangan na too, a nanlapud amin a nasyones tan tribu tan binaleybaley tan pansasalita, a manalalagey ed arap na trono tan ed arap na Kordero.” Saraya so walaan na mangaraldalin ya ilalo, aliwan saraman so wala ed espiritual a nasyon na nilanaan a sikara so nagkalautlan mangirerepresenta ed sankatalbaan a muyongan nen Jehova natan. Siansia ni, say “baleg ya ulop” so manalalagey ed arap na trono na Dios tan ed Kordero ya akakawes a pinaputi na dala na Kordero. Agaylan maabig a talindeg so wala ed sikara anggan natan!​—Apocalipsis 7:9-17.

Saraya a wala ed “baleg ya ulop” so nasubok met no nipaakar ed katooran da. Say pantultuloy dan matoor natan tan anggad Sanlibon Taon ya Uley tan say unor a subok so mansumpal ed pangiyabawag nen Jehova ed sikara a matunong bilang ayadyarin totoo, a kaiba na saray napaoli a kabiangan na “arum a karnero” nen Jesus. Lapud sikara so “nibulos a manlapud panangaripen na kabubulok,” sikara so manggayaga “ed maglorian kawayangan na saray anak na Dios.” (Roma 8:21) Sikara la ed satan, a singa agawa ed si inmunan Adan tan Eva, so nanengneng a kabiangan na sankatalbaan a muyongan nen Jehova. Sikara so ayadyari, intelihentin ilalak nen Jehova tan say biin-pinagkaasawa to a muyongan ed tawen.