Manpabiskeg, Ag-onkekesaw
“Iter to ed naksawan so pakayari; tan pabiskegen to na daakan so sakey ya andian na dinamikon enerhya.”—ISAIAS 40:29.
1, 2. Panon yon iyilustra no anto so piparaan na saray Kristianos ed saray bumabatik ed marathon?
DIAD sakey a kabuasan na Oktubre nen 1984, sakey a dayat na katooan a ngalngalin 16,000 milalaslasan so kimuyekyek ed saray kalsada diad inggapo na New York City Marathon. Say kalat so 26.2 milyas (42.2 km) ed kaarawi. Diad saman ya utonyon mapayunget so angitarok na petang ya amakapuy ed enerhya na saray bumabatik tan anubok ed inkamasungdo ra. Say lumba so nagmaliw a makapakesaw a pipupuligesgesan ya anggan diad saray sankaabigan ya atleta. Dakel a bumabatik so naksawan tan tinmunda ed lumba; ngalngalin 2,000 so ag-akapangisumpal. Saramay akapangisumpal so analona ed saray sankairapan a kipapasen.
2 Saray Kristianos, met, so wala ed sakey a lumba. Premyo? Andi-anggaan a bilay. Tan miulibay ed bumabatik ed marathon, nakaukolan da so pipuligesgesan ya anggad kalat. Nakakaukolan so panagsungdo. Nepeg a pansiansiaen so biskeg tan paliisan so kakesawan. Say pilulumba tayo ed bilay so aliwan antikey a babatiken noagta, ingen, singa andukey-distansyan babatiken. Imbaga nen Pablo ed saray kapara ton Kristianos ed Corinto: “Agyo ta kabat a saray bumabatik ed lumba so ombatik ya amin, balet sakey lambengat so makaawat ed tumang? Ombatik ed ontan a nengneng pian satan so nagamoran yo.” (1 Corinto 9:24) Say ibabatik na saray Kristianos so tekep na impasyan panaggunaet.—Lucas 13:24.
3. Panon lambengat so pakapansiansia na saray Kristianos a mabiskeg ya ombatik ya anggad nasumpal da so lumba?
3 Balet nayarin isipen yo: ‘Siopa so makapibansag ed satan ya anggad pakasumpal ed lumba?’ Anggapo ed sikatayo diad dilin biskeg tayo so makayari. Pian nagamoran so premyo, nakaukolan tayo so tulong na mismon Subol na dinamikon biskeg, si Jehova a Dios.—Job 36:22; Salmo 108:13.
Jehova—Say Subol na Dinamikon Biskeg
4. Unong ed si propeta Isaias, akin a sikatayo so nawalaan na talek diad pakayari nen Jehova a mamabiskeg ed saray ariripen to?
4 Anggapoy duaruwa a nayarian nen Jehova a pabiskegen iray ariripen to. Diad sangi na propeta ton si Isaias, nansalita so Makapanyarin-amin nipaakar ed andi-geter iran pakayari to tan say andi-kaparan mabiskeg a gawagawa To. “Itangwa yoray mata yo tan nengneng yo,” inkuanto. “Siopa so amalsa ed sarayan bengatla? Saman so sakey a mangitarok na inayuraan da ya anggan diad bilang, amin da so tawagen to ed ngaran. Nisengeg ed inkadaakan na dinamikon biskeg, sikato met so mabiskeg ed pakayari, anggapo ed sikara so onkulang. . . . Agyo ta akabatan odino nadngelan? Si Jehova, a Manamalsa ed saray kasampotan na dalin, so sakey a Dios ed panaon ya ag-ageteran. Sikato so ag-onkesaw odino onkapuy. Anggapo so makausisa ed pakatalos to.”—Isaias 40:26-28.
5, 6. Mangiter na saray ehemplo na ebidensya na dinamikon enerhya nen Jehova.
5 Manlapud gapo ya anggad andi-anggaan, say inkipatnag na pakayari nen Jehova ed panamalsa so makapakelkelaw! Alimbawa, imanoen iray bloken paalagey ya akapangipaalageyan na amin a bengatla, a pati sikatayo—saray atoms. Sikara so melmelanting a say sankatedter a danum so nankarga na 100 bilyon a bilyon ya atom (American system of numeration). Makapakelkelaw, anggaman kuan, sano nikarga ed dalem na pugnek na saray atom et magenap a mangibekas, diad sakey a kipapasen, diad iterak a biskeg a magenap a manguykoy ed dalin na 32 grado ed kaaralem tan kakapat na sakey a milya ed kaawang.
6 Diad sananey a dapag na kabaleg, imanoen so agew. Sayan abalbaleg a palbaan nuklar, a manbelat na binilbilyon a tonilada, so mamapapetang ed sistema na solar tayo. Sikato so susungloran na enerhyan manlalapu ed saray angkekelanting ya atom. Anggaman amin a bilay ed dalin—tantanaman, ayayep, tan totoo—so mandepende ed enerhyan iiter na abalbaleg a mangatatawen a planta na biskeg, melmelanting labat ya enerhya na agew so aktual a makakasabi ed dalin. Ingen, satan so magenap lan manuporta ed bilay. Diad libro ton Astronomy, nen astronomon Fred Hoyle so nansulat: “Say sankamelantingan a kabiangan na enerhya na Agew ya ondapo—kinalkulo ed ngalngalin limaran parte ed sanlasus milyon a milyon—so ngalngalin 100,000 danay a babaleg nen say amin ya enerhyan uusaren ed saray industria na mundo.”
7. Panon so nepeg a liknaan tayo nipaakar ed si Jehova kayari na panmorekdek ed pakayarin nipatnag ed palsa to?
7 Anggaman kuan, say agew so sakey lambengat ed saray binilbilyon a bibitewen a manibukel ed galaksin Milky Way tayo—tan sikato so kaslakan-kabaleg a bitewen. Niarum ni, kinalkulo na saray astronomo a wala so ngalngalin 100,000,000,000 a galaksi ed talba. Saya so makapakelkelaw ya isipen, agta ontan? Agpankelawan a si toon Job, kayari na impanmorekdek to ed no panon so ‘impanginatnat [nen Jehova] ed katawenan,’ so angikuan a say Dios so “manggagawa na baleg iran bengatlan agnausisa, tan makapakelkelaw iran bengatla ya agnabilang.”—Job 9:8-10.
Sika So Nayarian nen Jehova a Pabiskegen
8. (a) Siopa lambengat so makaagwat a sigpot ed biskeg nen Jehova, tan akin? (b) Panon a say sipan ed Isaias 40:29-31 so makapabiskeg na pananisia?
8 Saray managdayew ed si Jehova so nayarin bulos tan sigpot a manpabiskeg ed sayan Subol na dinamikon enerhya ya amalsa tan manusustine ed talba. Saray ariripen nen Jehova so ‘nagawan makapanyarin biskeg diad panamegley na masanton espiritu to,’ ya anggapo so kapagaan diad ikulang na biskeg. (Efeso 3:16; Salmo 84:4, 5) Peteg, say panalo tayo ed lumba a para ed bilay so mandepende diad agnagiing a talek a say makapanyarin taklay na Dios so makayarin mangitulak a makalampas ed kalat. Nayarian to itayon pabiskegen. A singa inkuan nen propeta Isaias nipaakar ed Jehova: “Sikato so mangiter na biskeg ed naksawan; tan diad sakey ya andian na dinamikon enerhya et parakelen to so biskeg. Saray ugugaw a lalaki so nakesawan tan onkapuy, tan saray walad kalangweran a lalaki so andi-saew a nagapol, balet saraman so manilalo ed si Jehova so napabiskeg. Sikara so mamaatagey a tekep na saray payak a singa saray agila. Sikara so ombatik tan ag-onkapuy; sikara so manakar tan agnakesawan.” (Isaias 40:29-31) Akin, say basta pambasa ed saratan a salita so mamapetang na espiritu tayo!
9. Panon so pakatulong nen Jehova ed sikayo diad saray ‘pinmalandey’ a problema yo?
9 Sano nidunget ed singa abalbaleg iran problema a mangigtot a mangamper ed seseg yo a para ed tuan panagdayew, nayarin liknaen yo a sikayo so melmelag. Agnanaandian na ilalo. Onasingger ed makapanyarin mangatatawen ya Ama. Sikato so mamabiskeg ed ‘amin na saraman so maniilalo ed sikato.’ Agta nayarian na Amalsa ed atom a pabiskegen so totoo to diad dinamikon enerhyan mabiskeg a magenap a mangiyalis ed saratan a ‘palandey’? Peteg a nayarian to!—Marcos 11:23.
10. (a) Antoran bengatla so mamakesaw ed saray Kristianon bumabatik? (b) Anto so kaliktan nen Satanas a gawaen ed sikayo?
10 Diad biek a dapag, arum a Kristianos so nayarin nakekesawan a tuloy diad inagew-agew a pibabakal a sumpad saray irap diad sakey a mundon mangipapatnag na agpanangimano ed saray Kristianon prinsipyo a liknaen dan sikara so singa ontatayer odino ontutunda ni ingen diad lumba ed bilay. Say sakit, kairapan ed bilay, saray problema ed pamilya, kaermenan, odino arum iran gonigon so nayarin pansengegan na kadidismaya. Tan say kadidismaya so maples a mamakapuy ed biskeg na sakey a Kristiano, magmainomay a singa say agew ya ampetang a nayarian ton upoten so enerhya a manlapud sakey a bumabatik ed marathon. Say baleg a Kabusol, si Satanas a Diablo, so manguusar ed ontan iran bengatla diad panalin pamuyak na katooran yo bilang sakey ya aripen nen Jehova. (1 Pedro 5:8) Ag-aabuloyan so Diablo a manggagawa ed satan! Onnengneng ed Manamalsa ed saratan a minilmilyon iran mangatatawen a galaksin mangiter ed sikayo na espiritual ya enerhya. Sikayo so nayarian nen Jehova a pabiskegen.—Salmo 37:17; 54:4.
11. Anto so naaralan tayo a manlapud paraan na impangarap nen David ed saray gonigon?
11 Sanen nidunget ed saray gonigon, aromog nen David a naynay a si Jehova so sakey a subol na balon biskeg. Apabiskeg ed masanton espiritu, ayarian nen David a ‘kalaben’ so anggan anton isusumpa. Inkuanto: “Diad panamegley mo et siak so ombatik a sumpad managlubak ya ulop; tan diad panamegley na Dios ko et nayarian kon kalaben so sakey a bakor.” Inyabawag met nen David: “Diad panamegley na Dios et nagamoran tayo so biskeg, tan sikato so mangiyurak ed saray kakabusol tayo.” (Salmo 18:29; 60:12) Satan met so nayarian nen Jehova a gawaen ed sika.
Labanan So Espiritual a Kesaw
12. (a) Akin a say espiritual a kakesawan so nepeg ya amperen a tampol? (b) Antoray sintoma na espiritual a kesaw? (c) Antoran tarya so inter nen Jehova a mamabiskeg ed saraman so espiritual a naksawan?
12 Nepeg a sikatayo so aliston makaimano ed saray tanda na espiritual a kakesawan tan insan aliston manalona ed saratan. Akin? Lapud saraman lambengat so daiset a ‘manggunaet a mabiskeg ya onloob ed mainget a puerta,’ odino saraman so bumabatik a makalampas ed kalat, so makagamor ed premyon bilay ya andi-anggaan. (Lucas 13:24; Filipos 3:12, 13) Usisaen so kaulop a kahon ya apauloan na “Arum Iran Dalan diad Pamakal ed Espiritual a Kesaw.” Kasin nabidbir mo so arum a sintoma ed inkasika odino diad sakey a membro na pamilya? No ontan, tampol a gawaen so panangiyarunsa. Pabiskegen mo so espiritualidad mo diad pangagwat na biskeg a manlapud saray nilistan probisyon nen Jehova.
13, 14. (a) Antoran ehemplo so ontulong a mamasimbalo ed espiritual a biskeg tayo? (b) Panon a say simbawa a manlapud abayaglan aripen nen Jehova so ontulong ed sikatayon mansiansia ed lumba?
13 Nayarian yon tulakan so tendensyan onkesaw diad pangalig ed saray ehemplo na mananalon ariripen na Dios ed kuritan na Biblia. Walaray dakel, lalaki tan bibii, walad kalangweran tan matatatken, a nansungdo ya anggad kasampotan. Sikara so basaen ed kasulatan a singa say Hebreos 11:4-40. Ontan met, diad modernon panaon et walaan itayo na dakel iran inararon agagin lalaki tan bibii a mantutultuloy ya andi-kesaw diad panlilingkor ed si Jehova.
14 Si George, a manaayam ed abalaten a parte na Estados Unidos, so sakey ya ehemplo na Kristianon bumabatik ya agkinmesaw. Kayari na masulok a 50 taon diad lumba a para ed maandon bilay, sikato ni so siansian mabiskeg. Anton simbawa so iter to ed sikatayo?
“Maranet ya ibagak, mansiansia ed organisasyon. Nonoten a si Jesu-Kristo, bilang Sakey a Tinuro nen Jehova, so mangipapakurang ed organisasyon. Sirin agnadidismaya no sakey a maapit ed sikayo so agnansiansian matoor. No wala so bengatlan sigpot ya agyo natalosan odino naromog yon mairap ya awaten, manmatalek a diad maganon arapen et satan so nalinewan. Say organisasyon nen Jehova so angitarok la ed sikatayo ya anggad natan. Manmatalek a sikato so mangiwanwan ed sikatayo ya onloob ed Balon Sistema.”—Juan 6:66-68.
15. No saray maabig ya ehemplo so mamarepresko ed espiritu tayo, anto so nepeg tayon gawaen?
15 Nayarin wala ra so arum ed sarayan inad-aro ed kongregasyon yo, odino sikara so naabet yo ed saray asamblea sirkito. Mitongtong ed sikara. Manaral ed sikara. Niarum ni, saray ehemplo na arum iran matoor so naromog ed Yearbook, The Watchtower, tan arum iran palapagan na Watch Tower. Sarayan salaysay so basaen. Nengnengen no panon so pakaagwat na biskeg a manlapud saratan ya eksperiensia.
Mamatatken—Magmaliw a ‘Manamabiskeg a Tulong’
16. (a) Panon so pakatulong na saray mamatatken ed saray kaparan Kristianos a napabiskeg? (b) Anton panalwar so nepeg ya agamilen na mamatatken sano mangiiter na panamaseseg tan simbawa?
16 Saray mamatatken ed kongregasyon so nagkalautlan alisto ya ontulong ed saray membron mangipapanengneng na tanda na itatayer. Iyoopresi na Isaias 35:3 so maabig a konseho diad impangikuanto: “Pabiskegen iray makapuy a lima, sikayon totoo, tan pabiskegen iray pueg a manpaker.” Balet panon yon mamatatken a gawaen so biang yo ed satan? Nisengeg ed sakey a bengatla, maimano. Anapen so peteg a sengegan na ikakapuy. Mangiyopresi na praktikal, Makasulatan iran suhestion a sikara so inepeg ed satan a too. Balet manalwar. Kaliktan yo so mamaseseg, aliwan manismaya, ed agi yo.a Sirin, agyo ipipilit so konsiensia yo ed sananey, odino paskaren so too a manumbok ed solusyon yo, odino sikato so tandaan yon aliwan matatken a Kristiano no sikato so manduaruwan manumbok ed personal a panmoria yo. Saray mamatatken so nepeg a mangibasi na simbawa tan panamaseseg da ed Biblia. Agda labay a patayeren so kapara ran bumabatik diad pangibunton ed sikara ya agnakakaukolan iran totontonen ed kongregasyon.—Ipareng so Mateo 11:28, 29 ed Mateo 23:2-4.
17. Panon a saray mamatatken a tarangkaan so taktika nen Satanas a niganan mamatayer ed saray kaparan Kristianos?
17 Saray mamatatken so makapangiletneg na maabig iran ehemplo bilang patumbok nen Kristo diad aliston pangomenda ed saray membro na kongregasyon. Ipalikna a sikara so masimoon a kalikaliktan tan nakaukolan! Say sistema nen Satanas so naynay a lalon akaparaan a manggawa ed Kristianon manlikna a sikato so makulang. Diad sayan punto ed pilulumba ra ed bilay, saray agagi tayo so mankaukolan, aliwan saray kritiko, noagta kakaaron manligliwa ed sikara a mamaarap ed pambiktorya. Alimbawa, sanen say sakey ya agin bii so tinmunda ed pampapayunir to, say puso to so ampetapetang a manpirawat diad pakapawil to ed sigpot-panaon a serbisyo. Balet ta agto nayarian lapud saray kipapasen to ed pinansyal. Anggaman nayarin maong so getma to, sakey a matatken so anepet ed sikato diad makritikon dalan: “Kapigan ey so pampayunir mo lamet?” Say ebat na agin bii so anurprisa ed sikato: “Sano say masiken ko so makabayar la ed abang.” Say sinaewan na matatken a moriaen, balet naaralan to ed kaunoran, et say pampapayunir to so natutulongan a manuna na sueldo na asawa to. Balet sanen say amo na masiken to so lalon manpapagawa ed sikato na kimey a susuppiaten a para ed sakey a Kristiano, say konsiensia na masiken to so amakiwas ed sikato a mananap na sananey a trabaho. Diad edad to, nairapan lan mananap na trabaho. Sirin ta pasaragen to la so abeban-sueldon trabaho; kanian, nakaukolan la natan ed si akulaw to a mantrabahon sigpot-panaon.
18. Diad anton dalan a saray mamatatken so “manamabiskeg a tulong”?
18 Manlapud akaunan eksperiensia, kasin talosan tayo a saray mamatatken so nepeg a masuyat a mangonseho ed saray kapara ton Kristianos? Andi. Noag ingen, sano nakaukolan so konseho odino panamaseseg, saray mamatatken so nepeg a manebek ed aktual a kipapasen na agagi ra tan aglabat onnengneng ed akinpaway ya indengan. (Santiago 2:15, 16) Diad onia, saray mamatatken so magmaliw a “manamabiskeg a tulong” ed kongregasyon da.—Colosas 4:11.
19. Anto so nagawaan mo diad itulong ed saray payunirs pian agnakesawan?
19 Sakey ya ondarakel a bilang na manangipalapag ed Panarian so lalon ombibiskeg tan natan et sikara la so regular payunirs. Say ngalangal na ulop so mamaseseg ed saray bumabatik ed marathon a manpabiskeg. Sirin, anto so gagawaen mo a pamaliket ed saray payunirs diad pambiktorya ed kongregasyon yo? Si Doug tan Joanne so nanggawa ed sigpot-panaon a serbisyo a karera ra ed bilay. Nayarin makapadismaya sanen sikara so tinepetan na arum, “Kapigan so pananak yo?” odino, “Kapigan ey so iligen yo met la?” Anggaman kuan, anto so nagawa no saray kaparan Tasi so mangiter ed sikara na moral a suporta diad pangikuan, “Itultuloy yo so maabig a kimey. Maliket kami ta sikayo so payunir ed kongregasyon”? Agda labatla papaliisan so espiritual a kesaw noagta natutulongan ya ontikkiab a singa agila diad serbisyo ra ed panagpayunir!—Ipareng so Isaias 40:31.
No Panon So Kapabiskeg na Saray Payunirs
20, 21. Panon so inkapabiskeg na arum ed sigpot-panaon a serbisyo?
20 Ontalineng ed sayan sanasawa, si Frederick tan si Marian. Kabat da no panon so pampabiskeg. Sikaran dua so misioneron manlilingkor diad sakey a bansa ed Central America, tan sikaran dua so wala la ed edad dan 70’s. Inggapo nen Frederick so misioneron serbisyo to nen 1946, si Marian nen 1950. Anto so tinmulong ed sikara diad impantultuloy ed serbisyo nen Jehova? Onebat si Frederick: “Niarum ed panangaro ed si Jehova tan say pilalek ya ontulong ed arum a totoo, say lawas pannonot ed kalat a bilay ya andi-anggaan.” Onebat so asawa to a say ‘sipan na Dios so amasiansia ed sikami a mantultuloy.’ Panon so impansiansia ran agnakesawan? “Antokaman so asainmin yo,” isisimbawa to, “gawaen yo so inkasikayon okupado.” Irerekomenda nen Marian so “panpirmi ed teokratikon kimey” tan inyarum to: “Legan a sika so ontatatken, agmo nagawaan so amin a bengatlan kaliktan mon gawaen. Satan so mangonigon ed siak, balet siak so mitongtong ed si Jehova nipaakar ed satan diad pikakasi.” Insampot nen Frederick ed sayan maabig a simbawa: “Sikami so manpipikasin kada labi tan onkekerew ed si Jehova a tulongan to kami.”—1 Pedro 4:7.
21 Si Lavonia so manedad na 67 tan sikato so regular payunir ed apalabas lan 20 taon. Nen katantaon, sikato so naospital na 15 agew tan kaplesan a manpapatambal ed puso to. Say impatey na pigaran membro na pamilya, a pati say asawan to tan ama to, so angapektan maong ed emosyon to. Siansian sikato so nantultuloy a nanggunaet. Panon so inkapabiskeg to? Say pibiang a lalon nagnap ed kimey na panagpulong so peteg a tinmulong ed siak,” so inkuanto, “lapud nen nayarian ko la so mitongtong ed arum nipaakar ed si Jehova, saray kanonotan ko so niarawi ed saray problema tan inikdan toak na kareenan ed nonot tan gayaga a manggawa ed bilay a makabaliksan.” Agto ipaplano so ontundan manpayunir noagta kuanto: “Say pakakanengneng ed arum a makakaaral nipaakar ed si Jehova tan saray engranden sipan to so mangiter ed siak na ontan lan baleg a gayaga ya agko anggan inisip so itunda ed kimey na panagpayunir.”—Gawa 20:35.
22. Pian manalo ed lumba a para ed bilay ya andi-anggaan, anto so nepeg tayon itultuloy a gawaen?
22 Balanglan nayarian tayon ibanikel so inkasikatayo bilang payunir ed sayan punto na bilay odino andi, amin tayo so makapansiansian maapit diad Subol na dinamikon enerhya, si Jehova, tan say organisasyon to. Itultuloy tayo so manpabiskeg diad matoor a panserbi ed Dios tayo. Insan, singa si Habacuc, nibaga tayo: “Si Jehova a Soberanon Katawan so biskeg ko; tan saray salik so pagmaliwen ton singa saray sali na usa.” (Habacuc 3:19) Sirin sikatayo so agnakesawan odino onkapuy. Nonoten a say lumba so ngalngalilan nasumpal. Asingger itayo la ed kalat!
[Paimano ed Leksab]
a Makapasagyat, say salita a para ed panamaseseg diad Filipos 2:1 tan Hebreos 6:18 so nanlapud sakey a Griegon berbo a kabaliksan to so “pangagamil na matamoy ya impluensya ed panamegley na saray salita” odino “say pitongtong ed sakey, diad positibo, makapabiskeg a dalan.”
Repason Tepetepet
◻ Siopa lambengat so bulobulos a makaagwat na dinamikon enerhya nen Jehova?
◻ Anto so arum ed saray tanda na espiritual a kesaw?
◻ Antoran tarya nen Jehova so ontulong ed sikatayon napabiskeg?
◻ Panon so pakatulong na mamatatken tan saray arum ed kongregasyon diad saray payunirs a mantultuloy ed “lumba”?
[Kahon ed pahina 17]
Arum Iran Dalan na Pamakal ed Espiritual a Kesaw
Saray Sintoma na Kesaw
◻Kakulangan na dangka ed panangan, kakainum, tan kagletan ed liket
◻ Kaandian na entusiasmo ed katuaan, inkaambetebetel na espiritu
◻ Panmolimoli ed seryoso tan pawilpawil a panduaruwa
◻ Panamaulian na pililimog ed saray miting diad kongregasyon
◻ Kakulangan na seseg tan gayaga ed lawak na ministeryo
◻ Pagmaliw ya alablabas a kritiko ed saray mamatatken tan say muyongan
Saray Tulong ed Panagsungdo
◻ Pampikasi diad tulong na masanton espiritu—Lucas 11:13; Galacia 5:22, 23; 1 Pedro 4:7
◻ Personal a panagaral—Salmo 1:1, 2
◻ Panagdalepdep ed Makasulatan iran bengatla—Salmo 77:12
◻ Maparanay a kakaatendi ed saray miting tan asamblea—Nehemias 8:1-3, 8, 10; Hebreos 10:23-25
◻ Maparanay a pibibiang ed lawak na kimeyan—Gawa 20:18-21
◻ Espiritual a tulong a manlapud mamatatken ed kongregasyon, managbiahen manangasikaso—Roma 1:11, 12; Hebreos 13:17
[Saray Litrato ed pahina 17]
Si Jehova, a Manamalsa ed talba, so ontutulong ed saray Tasi to a napabiskeg
[Credit Line]
NASA photo