Paliketen so Puso nen Jehova Diad Pamemben na Katooran!
“Balanglan sikatayo so manbilay tan ompatey, sikatayo so para ed si Jehova.”—ROMA 14:8.
1, 2. (a) Akin a saray Tasi nen Jehova so determinadon mamemben na katooran da ed Dios? (b) Balet antoran tepet so onlesa?
AGAYLAN abig iratan a salita nen apostol Pablo ya angibalikas ed liknaan na saray alenleneg a manamemben na tuan katooran ed sayan koma-20 siglo! No sikatayo so apribilehyoan a manbilay tan makanengneng ed kakusbo na kaplesan a marelmeng a sistema diad arap na saray mismon mata tayo, agaylan sikatayo so nalikeliketan! Balet no sikatayo so managmak na patey diad serbisyo na Dios, ontan pa komon. Diad anggan dinan a kipapasen, sikatayo so determinadon matoor a tastasi na Dios tayo, si Jehova. Pansiansiaen tayo so katooran ed sikato. Akin? Lapud manbilay man odino ompatey, peteg a sikatayo so para ed si Jehova!
2 Anto, anggaman kuan, so katooran? Anton pankaukolan so gawaen na satan ed sikatayo? Kasin say panamemben tayo na katooran so peteg a makabaliksan ed Dios?
Katooran tan Saray Nakakaukolan To
3. Unong ed Biblia, say panamemben na katooran so mankabaliksan na anto?
3 Diad Salita na Dios, tutukoyen na katooran so inkabunigas ed moral tan inkagnap, andi-tilol tan andi-pakabalawan. Kabaliksan to so ag-inkibot a debosyon ed inkatunong. Diad tua, nakakaukolan na katooran so agnabuyak a debosyon ed sakey a persona—ed si Jehova a Dios. On, say panamemben na katooran et kabaliksan to so pantultuloy a panggawa ed soberanon linawa nen Jehova.
4. Siopa so inmunan managbuyak na katooran, tan anto so insagyat ton gawaen na saray inmunan sankaparis a too?
4 Say inmunan managbuyak na katooran et samay espiritun pinalsa ya angitonton ed inmunan toon paris diad rebelyoson kurang a sumpad Amalsa. Si Adan tan Eva so walaan na pankanawnawan mangipatnag na katooran da ed si Jehova diad panrespeto ed panangisebel na Dios ed kiew na pikakabat. Balet diad mabiskeg a panangisagyat na Kabusol ed kasibletan, sikara so tinmunganga. Say puso ra so agnansumpal ya andi-pakabalawan diad saray totontonen nen Jehova, tan agda impansiansia so katooran da ed sikato.—Salmo 119:1, 80.
5. Say impanrebelde nen Satanas so amalesa na anton salisalan, tan panon a saya so pinaneknekan na saray eksperiensia nen maptek a Job?
5 Say intunganga nen Satanas so amalesa na salisalan diad pankanepegan na inkasoberano na Dios ed amin a pinalsa To, ed kanepegan nen Jehova a mankaukolan na sigpot a katutulok da. Sirin say insuppiat ed katooran na too ed soberanon linawa na Dios so nagmaliw a kabiangan na salisalan ed sankatalbaan ya inkasoberano. Say prueba na saya so anengneng ed kipapasen nen Job ya aripen nen Jehova, sakey ya anggapoy-pakabalawan, maptek, tan matakot-ed-Dios a too. (Job 1:1) Si Job so agsinmuawi ed manepeg a dalan na Dios. Sikato so agtinalikebkeban na seksual ya imoralidad. Sikato so agbalot nagmaliw a pikewet diad panangukom odino aliwan mabunlok ed balo, ulila-ed-ama, odino say duka. Imbes a ginawa to so materyal a kayamanan a talek to, si Job so nanmatalek a mabiskeg ed Sankatageyan. (Job 31:7-40) Ingen ta inakusa na Diablo a si Job so manlilingkor ed sinisiblet iran rason. Anggaman inabuloyan nen Jehova si Satanas a mangupot ed amin na saray kayarian nen Job tan anggan saray anak to, say Manunan-managpalikdo so sinmaew a manlamat ed katooran na saman a toon maptek. Anggan say makapautot a sakit tan makapabaing iran panagbalaw na saray palson managligliwa so agtinmalona, lapud pinaneknekan nen Job a sikato so manamemben na katooran.—Job 1:6-2:13; 27:5, 6; 31:6; 42:8, 9.
6. Anto so nakaukolan ed saraman so “para ed si Jehova”?
6 Sirin saray totoo so walaan na agnasukat a pribilehyo na panamasantos ed masanton ngaran na Dios. Panon? Diad panamemben na katooran, et ipapanengneng dan sikara so matoor a manusuporta ed sankatalbaan ya inkasoberano nen Jehova. Anto, sirin, so nakaukolan ed saraman so “para ed si Jehova”? Nepeg a lingkoran tayo so Dios a tekep na debosyon, ya agbalot lilingwanan a si Jehova so “sakey a Dios a mankakaukolan na sigpot a debosyon.”—Exodo 20:5.
Nayarian Tayon Paliketen So Puso nen Jehova
7, 8. (a) Lapud sikatayo so ag-ayadyari, panon so pakabembem tayo na katooran ed Dios? (b) No sikatayo so manamemben na katooran, panon so kiyaplika na Uliran 27:11 ed sikatayo?
7 Lapud amin tayo so ag-ayadyari, agtayo nayarian so misukat ya ayadyari ed saray matunong ya estandarte na Dios. Sirin, say panamemben tayo na katooran so agmankabaliksan na inkayadyari ed kiwas odino panagsalita. Noag ingen, kabaliksan to so sigpot-puso, odino nagnap ed debosyon na puso. Kanian, anggaman si David so akapanggawa na saray sersyoson kasalanan, sikato so ‘nanakar ed katooran na puso.’ (1 Arari 9:4) Inawat to so panamaat, pinetek to so dalan to tan ditan et pinaneknekan ton say puso to so napno na peteg ya aro ed si Jehova. (Salmo 26:1-12) Sikatayo, met, so makapangipatnag na ontan ya aro, ya onkiwas ‘unong ed katooran na puso.’—Salmo 78:72.
8 Say kurang ed panamemben na katooran so posibli lapud walaan itayo na aralem a pananisia ed si Jehova a Dios tan manmamatalek a mabiskeg ed sikato tan diad pakayari ton mangiliktar ed sikatayo. (Salmo 25:21; 41:12) Aliwan mainomay so pamemben na katooran tayo, lapud si Satanas a Diablo—sankabalgan a kabusol nen Jehova, tan kabusol tayo—so mamubulag ed saray kaisipan na saray agmananisia tan “papalikdoen to so interon atooan a dalin.” (Apocalipsis 12:9; 2 Corinto 4:4) Balet, singa si Job, makapagmaliw itayon manamemben na katooran. Anggaman sikatayo so ag-ayadyari, nayarian tayon paliketen so puso na maaron Dios tayo. A singa ibabaga na Uliran 27:11: “Onkabat ka, anako, tan paliketen mo so pusok, pian komon naebatan ko so mamabalaw ed siak.” Makapaliket, bilang matoor ya ariripen nen Jehova, nayarian tayon iter ed sikato a tekep na epektibon ebat diad mamabalaw a Kabusol to. Sirin say panamemben tayo na katooran so peteg a makabaliksan. Bilang kaiba na saraman so mamemben na katooran, nayarian tayon paliketen so puso nen Jehova. Tan agaylan gayaga so itarok na saya ed sikatayo!
Andukey a Linya na Saray Manamemben na Katooran
9. Siopa so arum ed baleg a “lurem” na manamemben-katooran a tastasi nen Jehova, tan antoran subok na katooran so sinungdoan da?
9 Diad tua, saray Tasi nen Jehova natan so kabiangan na andukey a linya na saray manamemben na katooran. Ginmapo ed si matoor ya Abel tan isasakup toray lalaki tan bibii a singa si Abel, Enoc, Noe, Abraham, Sara, Isaac, Jacob, Jose, Moises, Rahab, Gideon, Barak, Samson, Jepte, David, tan Samuel. Saray manamemben na katooran a Sidrac, Misac, tan Abednego, ya agnandayew ed talintaon impaalagey nen arin Nabucodonosor na Babilonia tan sikara so imbuntok ed alablabas-pinapetang a palbaan, mapatnag a sikara so atukoy a bilang saraman so “nanayam ed biskeg na apuy.” Arum iran sakbay-Kristianon tastasi nen Jehova so ‘niludlurey, pinekpek, impangaw, tinupak, sinubok, nilagari, pinatey ed kampilan; sikara so nankawes na katat-karnero, ed katat-kanding, legan a manasagmak na kairapan tan kaugsan.’ Peteg a sikatayo so mipakna ed si Pablo, ya angiyabawag: “Say mundo so agmakana ed sikara.” Agaylan makapaliket so kaliktub na ontan a baleg a “lurem” na saray manamemben-na-katooran a tastasi!—Hebreos 11:1 12:1; nengnengen met so Daniel, kapitulo 3.
10. Panon nen apostol Pablo a pinaliket so puso nen Jehova?
10 Tekep na inter-na-Dios a tepel tan biskeg, sinungdoan nen apostol Pablo so inkipangaw, inkapekpekpek, inkakneb, dakel iran kaatapan, agpakaugip iran labi, eras, inkapgaan, betel, inkalakseban, tan “mabetbet a dawit-dawit a patey.” (2 Corinto 11:23-27) Sinagmak to so ontan iran kairapan nisesengeg ed ministeryo, tan ed amin na saya et pinaliket to so puso nen Jehova bilang mabayanin manamemben na katooran. Nagawaan tayo met so ontan.
11. No nipaakar ed katooran, anton ehemplo so inletneg nen Jesus?
11 Matalona ed saray manamemben na katooran et “say Manunan Ahente tan Manamayadyari na pananisia tayo,” si Jesu-Kristo. Sanen tinukso na Diablo ed kalawakan, si Jesus so amemben na katooran to, a diad kaunoran et imbaga to: “Arawi ka, Satanas! Lapud nisulat, ‘Si Jehova a Dios mo so nepeg mon dayewen, tan sikato lambengat so nepeg mon pangisaklangan na sagradon lingkor.’” Malinlinew ya andian na pakayari ed arap na ontan ya inter-na-Dios a determinasyon, tinaynanan na Diablo si Jesus. Aliwan saman so unor a panangataki nen Satanas ed si Jesus, balet say Diablo so andian na pakayarin mamuyak ed katooran na Anak na Dios. ‘Nisengeg ed gayagan niiyan ed arap to et sinungdoan nen Jesus so panamairapan a kiew,’ ya agbalot nagmaliw a manamuyak na katooran. Komon ta lawas tumboken tayo so puron ehemplo to tan paliketen so puso nen Jehova bilang manamemben na katooran.—Hebreos 12:2, 3; Mateo 4:1-11.
12, 13. Antoran subok na katooran so ayarian na saray inmunan Kristianos a tinalonaan?
12 Imbaga nen Jesus ed saray babangatan to: “Sikayo so gulaen na amin a totoo nisesengeg ed ngaran ko.” (Mateo 10:22) Agaylan tua a satan so nagagawa ed saray puron Kristianos! Diad libro ton Christianity and the Roman Government, insulat nen E. G. Hardy: “Ompatnag a sigpot, namparan manlapud sulat nen Pliny tan sulat nen Trajan, a saray Kristianos so nayarin nadusa nisesengeg ed nomen [ngaran] lambengat, odino say basta pangibaga ra ed Inkakristiano, aliwan diad nengneng odino prueba na pihon krimen.”
13 Agayla ran subok na katooran so ayarian a matalonan inarap na saraman ya inmunan Kristianos a tekep na inter-na-Dios a biskeg! Alimbawa, nipaakar ed sikara et nibaga: “No maminsan et sikara so pinairap tan imbuntok ed saray narasan ya atap ya ayep diad panaggalawan pian pamaliket ed totoo.” Anggaman ed ontan iran irirap, naimano a say “panamasegsegang so nanserbi lambengat ya amabiskeg na pananisia ra tan angitarok na dakel a kumberte.” (From the Old World to the New, nen Eugene A. Colligan tan Maxwell F. Littwin, 1932, pahina 90-1) Satan met so tua ed saray manamemben-na-katooran a tastasi nen Jehova ed sayan koma-20 siglo. Saray ahente na Diablo so agmakayari ed sikara.
14, 15. Sioparay “duaran tastasi,” tan anto so naeksperiensia ra nen 1918 tan 1919?
14 Imanoen so asagmak na saray alanaan ya ariripen nen Jehova, say piguratibon “duaran tastasi,” nen 1918 tan 1919, sanen saray kakabusol da so ‘angimaneho na gulo ed panamegley na ganggan.’ (Apocalipsis 11:3, 7-10; Salmo 94:20) Si J. F. Rutherford (presidente na Watch Tower Society ed saman) tan saray pitoran kakaiba to so agmakatunongan ya impriso. Diad saman a panaon, saray “duaran tastasi” so pinatey no nipaakar ed panagpropesiya ra, tan saray kakabusol da so nanliket. Diad libro ton Preachers Present Arms, inkuan nen Ray H. Abrams: “Say impangusisa ed interon kaso [a nanlanor ed si Rutherford tan saray kakaiba to] so angitonton ed konklusyon a saray iglesia tan saray klero so orihinal a walad benegan na pangipalereg [ed saray Estudyante na Biblia]. . . . Sanen say balita ed duamplon-taon a sentensya so akasabi ed saray editor na relihyoson palapagan, ngalngalin amin ed sarayan palapagan, baleg tan melag, so nanliket ed inkagawa. Agak akaromog na anggan anton salita na simpatya ed anggan anton relihyoson palapagan na ortudoks.”
15 Kabekta, anggaman kuan, saray waloran imprison Estudyante na Biblia so imbulos tan sigpot ya alukpos ed panamakasalanan, agaylan insanok nen Satanas tan saray patumbok to. Abilay ed panamegley na espiritu na Dios, saray “duaran tastasi,” satan a melag ya armada na saray alanaan, so tinmalindeg ed saray salita lamet bilang manangiyabawag na Panarian. (Apocalipsis 11:11) Tan saray kakabusol nen Jehova so mibabakal na natatalon bakal a sumpad saratan a manamemben na katooran nanlapulad saman.
16. Panon so impangibalikas na sakey a walad kalangweran a manamemben na katooran ed inkasikato?
16 Diad pangiyilustra: Imanoen iray makpel a salitan insulat na sakey a lakin walad kalangweran diad pamilya to kaleganan ya aalagden to so ipapatey diad lima na saray managpasegsegang a Nazi. Insulat to: “Lampas la na pegley-labi. Siak ni so walaan na pankanawnawan manguman ed kanonotan ko. A! nayari kasin siak lamet so maliket ed sayan mundo kayari na pangiburik ed Katawan tayo? Peteg ya andi! Balet et sikayo so napaseguroan a sayan mundo so taynanan ko diad liket tan kareenan.” Kasin satan so ompatnag a singa maletey, matakot, binakbak a managbuyak na katooran? Siempre andi!
17. Saray inkaerel-erel na saray Tasi nen Jehova ed Unyon Sobyet so walaan na anton epekto ed saray kimey dan panagpulong-ed-Panarian?
17 Saray getman pamuyak ed katooran na saray ariripen nen Jehova so nantultuloy. Alimbawa, diad libro ton Religion in the Soviet Union, imbaga nen dyurnalistan si Walter Kolarz so nipaakar ed inggrupon impangerel ed saray Tasi nen Jehova nen asasakbay a 1951 tan inkuanto: “Saray Tasi a mismo so angalkula a 7,000 amin a totoo so imbantak, ed Urals, Siberia, diad Arawin Baybay (Vorkuta) tan diad Kazakhstan.” Inyarum to: “Saya so aliwan anggaan na saray ‘Tastasi’ ed Rusya, noagta gapowan lambengat na sakey a balon kapitulo ed saray kimey dan panagkumberte. Sinali ra ni ingen ya iyabawag so pananisia ra sanen sikara so tinmunda ed saray estasyon a mamaarap ed kipangawan da. Diad impamataynan ed sikara et anggapo so maabig ya agawaan na Gobiernon Sobyet diad impangamper ed panangikayat na pananisia ra. Nanlapud inkapataynan da ed baley da et saray ‘Tasi’ so niyakar ed maad-awang a mundo, anggaman saya lambengat so makapakebbiew a mundo na inkipangaw tan managpairap iran kampo.” Ditan et aromog na saray ariripen nen Jehova so dakel a magaygayagan angawat ed makapaligsay-puson mensahe na Panarian.—Ipareng so Gawa 11:19-21.
Singa Sakey a Mananalon Armada
18, 19. Panon a posibli so panalo a bilang manamemben na katooran?
18 Say panamasegsegang ed saray totoo na Dios so nantultuloy ed sarayan agew. Sirin panon a posibli ed saray Tasi nen Jehova so panalo bilang manamemben na katooran? Nagawaan tayo lapud tutuloken tayo so Salita na Dios, tan ‘saray pakayari na panagmorekdek tayo so nipasal a mangibiig ed susto tan aliwa.’ Bilang matoor a tastasi nen Jehova, sikatayo so ‘ag-akiaabobon ed sayan sistema na bengabengatla noagta apasimbalo ed kanonotan tayo.’ Magaygayagan gagawaen tayo so makapaliket ed si Jehova, tan iter to ed sikatayo so pananalo ed saray kakabusol tayo, demonyo tan too.—Hebreos 5:12-14; Roma 12:1, 2.
19 Sikatayo a “para ed si Jehova” so nayarin nipareng ed sakey a mananalon armada. Siempre, say pibabakal tayo so espiritual, tan sikatayo “so onlan ongamor na pakayari ed Katawan tan diad pakapanyari na biskeg to.” Insulong tayo so sigpot a kinlong na espiritual ya ayura a nanlapud Dios, tan say masanton espiritu to so ontutulong ed sikatayo. Sikato no akin a “nayarian tayo so ontalindeg a malet a sumpad saray kasiliban na Diablo.” (Efeso 6:10-20; 2 Corinto 10:3, 4) On, tan sikato no akin a mantultuloy itayon manalo a bilang manamemben na katooran.
20. Anton tulong tan paseguro so walad sikatayo legan a kimeyan tayo so pamasiansia na katooran tayo?
20 Peteg a sikatayo so nikadkaduman militaryan puersa. Akin, diad limog tayo et anggan “saray bibiin mangibabaga na maong a balita so baleg ya armada”! (Salmo 68:11) Anggaman aarapen tayoray mabiskeg a kakabusol, ‘wala so mas dakel ed sikatayo nen say wala ed sikara.’ (2 Arari 6:16) Saray angheles so kaiba tayo legan ya ibaga tayo so maong a balita ed saray manaayam ed dalin. (Apocalipsis 14:6) Tan bilang manamemben na katooran, walaan itayo na talek ya ‘anggapo so ayuran onsumpad sikatayo a matalona.’—Isaias 54:17.
21. Anggaman ed panamasegsegang a sasagmaken tayo, anto so mantultuloy?
21 Agnasuppiat, saray linya na bakal so akaparaan la. Saray puersa nen Satanas so determinadon mamatunda ed kimey na panagtasi tayo. Sirin “mantultuloy itayon mibakal na maabig a pibabakal.” (1 Timoteo 1:18) Unong a si niglorian Jesu-Kristo so Komander tayo tan Pangulo, komon ta balang sakey ed sikatayo so manlingkor a “bilang maabig a sundalo nen Kristo Jesus.” (2 Timoteo 2:3, 4) Anggaman sikatayo so nakakabil ed amin a diking, nakaukolan tayo—tan gawaen tayo, diad panamegley na agkanepegan a panangasi na Dios—so ontalindeg a malet bilang manamemben na katooran. Saray kalupaan tayo so mansinag legan a nanenengneng tayo so mantutultuloy ya idadaak. Lalon ombabaleg a bilang na saray ‘kalikaliktan a bengatla na nasyones’ so onloloob tan mamapano na gloria ed abung nen Jehova. (Aggeo 2:7) Anggaman ed saray inkapasegsegang, inkipangawpangaw, inkapekpekpek, inkasebelan na kimey tayo ed nanduruman dalin, tan say mabiskeg a getman mamepet ed saray bibil tayo, say engranden kimey na panaggaway-babangatan so mantutultuloy tan lalon ombibiskeg.—Mateo 24:14; 28:19, 20.
22. No nipaakar ed saraman so para ed si Jehova, anto so nepeg tayon gawaen?
22 Legan ya ombabaleg so dayew ed si Jehova, saya so sakey a panaon na panagdesisyon ed balang sakey diad dalin. Agaylan sikatayo so apribilehyoan a mangilaknab ed maong a balita tan ibangat iraman so mangaabrasa ed tuan panagdayew! Sirin, legan a say “baleg ya ulop” so ondarakel, komon ta mantultuloy itayo a bilang mabayanin ariripen na Sankatageyan a Dios. (Apocalipsis 7:9) ‘Manbilay itayo man odino ompatey, sikatayo so para ed si Jehova.’ Sirin itultuloy tayo so ombatik a mamaarap ed kalat na bilay, a lawas misalsalamat ed engranden pribilehyo tayo a mamapaliket ed puso nen Jehova diad panamemben na katooran!
Kasin Naebatan Yo?
◻ Anto so katooran?
◻ Anto so nakakaukolan na panamemben na katooran ed saray totoo nen Jehova?
◻ Panon a nipanengneng a say panamemben na katooran tayo so makabaliksan ed Dios?
◻ Diad antoran dalan a saray arum ed apalabas so angipanengneng a sikara so manamemben na katooran?
◻ Panon a posibli ed saray Tastasi nen Jehova so pagmaliw a manamemben na katooran natan?
[Litrato ed pahina 22]
Saray ariripen nen Jehova natan so kabiangan na andukey a linya na saray manamemben-na-katooan a tastasi to. Kasin sakey kayo ed sikara?
Enoc
Sara
Jepte
Pablo
Modernon-agew a Kristiano