Kapitulo 12
Say Kabaliksan na Bautismo Yo
1, 2. (a) Akin a say bautismo ed danum so personal a makapainteres ed balang sakey ed sikatayo? (b) Diad antikey, panon yon ebatan iray tepet a nidatak ed parapo 2?
DIAD taon 29 K.P., si Jesus so impalgep ed Ilog Jordan. Si Jehova so manbabantay tan imbalikas to so panangabobon. (Mateo 3:16, 17) Talora tan kapalduan taon ed saginonor, kayari na inkioli to, saray babangatan nen Jesus so binilin to, a kuanto: “Amin a pakauley so niiter ed siak diad tawen tan diad dalin. Onlakayo sirin tan manggawa na babangatan ed amin a nasyones, a bautismoan yora.” (Mateo 28:18, 19) Kasin sikayo la so abautismoan a mitukoyan ed saman so imbilin nen Jesus? Odino kasin sikayo so manpaparaan a manggawa na ontan?
2 Anggan dinan a nagawa et importante so malinew a pakatalos ed bautismo. Saray tepet a mankanepegan na pangonsidera so mangisakup ed saraya: Kasin say bautismo na Kristianos natan so walaan na parehon kabaliksan ed saman so ginawa nen Jesus? Kasin amin a bengatlan ibabaga na Biblia nipaakar ed bautismo so onaplika ed sikayo? Anto so nalalanor diad pambilay a mitukoyan ed saman so kabaliksan na Kristianon bautismo ed danum?
Saray Bautismon Ginawa nen Juan
3. Diad siopa nigeter so bautismo nen Juan?
3 Ngalngalin anem bulan sakbay ya inkabautismoan nen Jesus, si Juan a Bautista so linma ed kalawakan na Judea, a nampulong: “Magbabawi kayo, lapud say panarian na katawenan so inmasingger la.” (Mateo 3:1, 2) Saray totoo ed amin na saman a pasen ya akadngel ed imbaga nen Juan, so mapublikon angipatua ed saray kasalanan da tan impabautismoan ed sikato diad Jordan. Saman a bautismo so para ed saray Judios.—Gawa 13:23, 24; Lucas 1:13-16.
4. (a) Akin a nakaukolan a maganat na saray Judios so magbabawi? b) Anto so nakaukolan pian napaliisan da so ‘kabautismoan ed apuy’?
4 Saraman a Judios so mankaukolan a tuloy na panagbabawi. Diad taon 1513 K.K.P. ed Palandey Sinai a saray atateng da so linmoob ed sakey a sankanasyonan a sipanan ed si Jehova a Dios. Balet ta sikara so agnambilay a matukoy ed saray responsabilidad diad silong na saman a sipanan tan sirin sikara so kinondena to a bilang makasalanan. Say kipapasen da so maatap. “Say baleg tan makapataktakot ya agew nen Jehova” ya impasakbay nen Malaquias so asingger la, tan nen 70 K.P. et dinmapo ed Jerusalem so maples a kadederal. Si Juan a Bautista, tekep na seseg ed tuan panagdayew a singa si Elias, so imbakin akauna sakbay na saman a kadederal “pian niparaan ed si Jehova so sakey a katooan.” Nakaukolan da so pagbabawi ed saray kasalanan da a sumpad Ganggan na sipanan tan niparaan ed puso tan nonot a mangawat ed Anak na Dios, ya ibaki nen Jehova ed sikara. (Malaquias 4:4-6; Lucas 1:17; Gawa 19:4) A singa impaliwawa nen Juan, say Anak na Dios so mamautismo ed masanton espiritu (a satan a bautismo so inmunan naeksperiensia na saray matoor a babangatan nen Pentecostes na 33 K.P.) tan diad apuy (a sinmabi ed saray agnagbabawi a bilang kadederal nen 70 K.P.). (Lucas 3:16) Pian personal a napaliisan so pakasagmak ed satan a ‘bautismo ed apuy’ saraman ya inmunan-siglon Judios so mankaukolan na kabautismoan ed danum diad simbolo na panagbabawi ra, tan sikara so nakaukolan a magmaliw a babangatan nen Jesu-Kristo sano satan a pankanawnawa so nilukas.
5. (a) Sanen sinmingger si Jesus a pabautismoan, akin a satan so sinuppiat nen Juan? (b) Anto so insimbolo na bautismo nen Jesus ed danum? (c) Panon kaseryoso si Jesus diad pananumpal to ed linawa na Dios ed sikato?
5 Sakey ed saramay sinmingger ed si Juan pian pabautismoan et si Jesus a mismo. Balet akin? Kabat nen Juan a si Jesus so andian na saray kasalanan ya ikumpesar, tan sirin inkuanto: “Siak so nakaukolan a bautismoan mo, tan sika so linma ed siak?” Balet say bautismo nen Jesus so mangisimbolo ed bengatlan duma. Kanian sikato so inmebat: “Nagawa komon, ed sayan panaon, ta diad ontan a pamaakaran et manepeg ed sikata so panumpal na amin a bengatlan matunong.” (Mateo 3:13-15) Say bautismo nen Jesus so agnayarin mangisimbolo na panagbabawi ed kasalanan; nisay nakaukolan ton idedika so inkasikato ed Dios, lapud sikato la so sakey a membro na sakey a nasyon a dedikado la ed si Jehova. Imbes, say bautismo to, diad impakarapat to ed Judion inkatatken ed edad a 30 taon, ya insimbolo to so pangipresenta to na inkasikato ed mangatatawen ya Ama to pian gawaen a malaknab so linawa To. Say linawa na Dios ed “too, si Kristo Jesus,” so angisakup ed kimey nipaakar ed Panarian, ontan met ed pangibagat ed ayadyarin atooan a bilay to bilang sakey a dondon tan bilang letnegan na sakey a balon sipanan. (Lucas 8:1; 17:20, 21; Hebreos 10:5-10; Mateo 20:28; 26:28; 1 Timoteo 2:5, 6) Seryoson ginawa nen Jesus so insimbolo na saman a bautismo to ed danum. Agto inabuloyan so inkasikaton onsipa ed arum iran interes. Anggad sampot na mangaraldalin a bilay to et sikato so nansiansia diad panaggawa ed linawa na Dios.—Juan 4:34.
Bautismo ed Patey
6. Anton arum a bautismo so dinalan nen Jesus tan diad anton panat na panaon?
6 Mitukoyan ed insimbolo na bautismo nen Jesus ed danum, sikato met so dinmalan ed sananey a bautismo. Kabat to a say kimey ya inyan na Dios ed arap to so mangitonton ed pangiyapay to ed atooan a bilay to bilang sakey a bagat balet ta sikato so napaoli ed espiritu diad komatlon agew. Saya so sinalita to a bilang sakey a bautismo. Sayan “bautismo” so ginmapo nen 29 K.P. balet ta ag-akumpleto ya anggad sikato so aktual ya inatey tan apaoli. Kanian ngalngalin taloy taon kayari na samay inkipalgep to ed danum et nayarian ton matukoy ya ibaga: “Siak so walaan na sakey a bautismo a kabautismoan, tan agaylan siak so agonigon ya anggad satan so nasumpal!”—Lucas 12:50.
7. (a) Siopa ni so nabautismoan ed patey? (b) Siopa so manggawa ed sayan bautismo?
7 Saraman so manuley a kaiba nen Kristo ed mangatatawen a Panarian to so nepeg met a nabautismoan ed patey. (Marcos 10:37-40; Colosas 2:12) Diad ipatey da et inyapay da la ed ando lan ando so atooan a bilay da, a singa ginawa nen Jesus. Tan diad kioli ra et sikara so mikasakey ed sikato diad mangatatawen a pananguley. Saya so sakey a bautismon ginawa, aliwan diad panamegley na anggan siopan too, noagta gawaen na Dios ed panamegley na mangatatawen ya Anak to.
8. Anto so kabaliksan na “kabautismoan [da met] ed si Kristo Jesus”?
8 Saraman so abautismoan ed impatey nen Jesus so nibaga met a “abautismoan ed si Kristo Jesus.” Diad panamegley na masanton espiritu a niiter ed panamegley nen Kristo et sikara so mikasakey ed sikato, say ulo ra, a bilang membro na alanaan-na-espiritun kongregasyon, say “laman” to. Lapud satan ya espiritu so nanggawa ed sikaran makayarin mangisindag na superyor a personalidad nen Kristo, nibaga ed sikara a sikaran amin so magmaliw a “sakey a personan nikasakey ed si Kristo Jesus.”—Roma 6:3-5; 1 Corinto 12:13; Galacia 3:27, 28; Gawa 2:32, 33.
Bautismo ed Danum na Saray Kristianon Babangatan
9. (a) Kapigan so inmunan inkagawa na bautismo ed nengneng na nibilin ed Mateo 28:19? (b) Diad pangusar ed saray tepet tan kasulatan a nitarya ed sayan parapo, usisaen no anto so ituturo nen Jesus a nepeg a bidbiren na saray kandidato ed bautismo.
9 Saray inmunan babangatan nen Jesus so binautismoan nen Juan ed danum tan insan sikara so nipaarap ed si Jesus a bilang prospektibon membro na espiritual a nobya to. (Juan 3:25-30) Diad panangidirihe nen Jesus et sikara met so mamautismo, a walaan na parehon kabaliksan a singa bautismo nen Juan. (Juan 4:1-3) Ginmapo nen Pentecostes na 33 K.P., anggaman kuan, inggapo ran sumpalen so ganggan a mamautismo “ed ngaran na Ama tan ed Anak tan ed masanton espiritu.” (Mateo 28:19) Naromog yon makagunggunan tuloy so panrepaso ed no anto so kabaliksan na satan diad liwawa na kasulatan a nisita ed onggendan iran tepet:
Pian nabautismoan “ed ngaran na Ama,” anto so nepeg a bidbiren na sakey a too nipaakar ed Ama? (2 Arari 19:15; Salmo 3:8; 73:28; Isaias 6:3; Roma 15:6; Hebreos 12:9; Santiago 1:17)
Say bautismo ed ngaran “na Anak” so mankaukolan na panamidbir ed anto? (Mateo 16:16, 24; Filipos 2:9-11; Hebreos 5:9, 10)
Anto so nepeg a sisiaen na sakey a too ta pian nabautismoan ed ngaran “na masanton espiritu”? (Lucas 11:13; Juan 14:16, 17; Gawa 1:8; 10:38; Galacia 5:22, 23; 2 Pedro 1:21)
10. (a) Anto so insimbolo na Kristianon bautismo ed danum natan? (b) Panon a saya so duma ed dilin bautismo nen Jesus? (c) Sano nabautismoan iray totoon Makasulatan a kualipikado, anto so pagmaliwan da?
10 Saray inmunan abautismoan a mitukoyan ed saraman a bilin nen Jesus et saray Judios (tan saray proselita), a sikara bilang sakey a nasyon so dedikado la ed Dios tan angipanengnengan to na nikadkaduman imano to ya anggad 36 K.P. Anggaman kuan, nen say pribilehyo na pagmaliw a Kristianon babangatan so ninatnat ed saray Samaritano tan saray Hentiles, sakbay a sikara so nabautismoan et sikara so personal a manggawa na andi-kibot a dedikasyon ed si Jehova pian sikato so panlingkoran da bilang babangatan na Anak to. Para ed amin, pati saray Judios so nantultuloy a makabaliksan ed Kristianon bautismo ed danum ya anggad sayan agew tayo. Sayan “sakey a bautismo” so onaplika ed amin a magmaliw a tuan Kristianos. Sikara so magmaliw a Kristianon tastasi nen Jehova, ordinadon ministros na Dios.—Efeso 4:5; 2 Corinto 6:3, 4.
11. (a) Diad anto so pisimbangan na Kristianon bautismo ed danum, tan panon? (b) Manlapud anto sirin so kisalbaan na sakey a Kristiano?
11 Say ontan a bautismo so walaan na baleg a kablian ed imaton na Dios. Kayari na impanalambit to ed impamaalagey nen Noe na biong ya akaliktaran to tan say pamilya to ed Delap, intawag nen apostol Pedro so imano ed saya. Insulat to: “A saman so misimbangan ed saya met so mangilaban ed sikayo, salanti, bautismo, (aliwan say panangekal ed dutak na laman, noagta say pankerew ed Dios na maabig a konsiensia,) diad panamegley na inkioli nen Jesu-Kristo.” (1 Pedro 3:21) Say biong so nanengneng ya ebidensyan si Noe so angidedika na inkasikato diad panggawa ed linawa na Dios tan insan matoor a sinumpal to so kimey ya impabtang na Dios ed sikato. Saya so angitonton ed inkiliktar to. Diad misimbangan a dalan, saraman so mangidedika na inkasikara ed si Jehova diad letnegan na pananisia ed apaolin Kristo, ya abautismoan ed simbolo na satan tan insan ontuloy a manggawa ed linawa na Dios a para ed saray ariripen to ed agew tayo so makaliktar a manlapud peles a mundon marelmeng. (Galacia 1:3, 4) Sikara la so agmamapaarap ed kadederal a kaiba na mundo. Sikara so niliktar a manlapud saya tan inikdan na Dios na maabig a konsiensia.
Pambilay a Tukoy ed Saray Responsabilidad Tayo
12. Akin a say kabautismoan na sakey a mismo so agmangarantiya na kilalaban?
12 Lingo so pangibaga a say kabautismoan a mismo so garantiya na kilalaban. Satan so walaan lambengat na kablian no say sakey a too so tuan angidedika na inkasikato ed si Jehova ed panamegley nen Jesu-Kristo tan kayari to et sumpalen to so linawa na Dios, a matoor ya anggad kasampotan.—Mateo 24:13.
13. (a) Anto so linawa na Dios no nipaakar ed nengneng a pangusaran na saray abautismoan a Kristianos ed bilay da? (b) Panon kaimportante so panaggawa na babangatan ed bilay tayo?
13 Say linawa na Dios ed si Jesus et insakup to no panon so impangusar to ed bilay to bilang sakey a too. Saman so nigaton ed ipapatey bilang sakey a bagat. Diad kipapasen tayo saray laman tayo so ipresenta ed Dios, pian sumpalen so dilin-panagsakripisyon bilay. Sikara so nausar a sigpot diad panggawa ed linawa na Dios. (Roma 12:1, 2) Peteg a satan so agtayo gawaen no anggan paminsanminsan, et gagalaen tayo so onkiwas a singa say mundo ed kaliberliber tayo odino no sikatayo so manbilay na sinisiblet legan a sikatayo lambengat so mangiiter na paspasaray a serbisyo ed Dios. (1 Pedro 4:1-3; 1 Juan 2:15-17) Sanen intepet na sakey a Judio so nepeg ton gawaen pian nagamoran to so andi-anggaan a bilay, sikato so pinanonotan nen Jesus ed kablian na pambilay a malinis ed moral, tan insan inturo to so pankaukolan na Kristianon babangatan, magmaliw a patumbok nen Jesus, a manunan bengatla ed bilay. Agnayarin satan so segundaryo ed materyal iran gegemtan.—Mateo 19:16-21.
14. (a) Anton responsabilidad nipaakar ed Panarian so wala ed amin a Kristianos? (b) A singa wala ed kahon, anto so arum ya epektibon dalan a panggawa ed sayan kimey? (c) No tuan mibibiang tayo a sigpot-puso ed ontan a kimey, ed anton ebidensya so iter na satan?
14 Nepeg met a nonoten a say linawa na Dios ed si Jesus et insakup to so makanan kimey nipaakar ed Panarian. Si Jesus a mismo so alanaan a magmaliw ya Ari. Balet legan a wadiad dalin et sikato met so maseseg a tasi nipaakar ed Panarian. Sikatayo met so walaan na miulibay a panagtasin kimey a gawaen tan walaan na sigpot a rason diad pibiang ed satan a sigpot-puso. Diad panggawa na ontan et ipapanengneng tayo so panamabli ed inkasoberano nen Jehova tan say aro tayo ed kaparan totoo. Ontan met ya ipapanengneng tayo a sikatayo so mikakasakey ed saray kaparan managdayew ed sankamundoan, ya amin da et Tastasi na Panarian, a mantutultuloy a mamapaarap ed kalat a bilay ya andi-anggaan diad silong na satan a Panarian.
Repason Diskusyon
● Antoran panuulibayan tan antoran pandurumaan so wala ed baetan na bautismo nen Jesus tan say bautismo ed danum natan?
● Para ed siopa so bautismo nen Juan? Siopa ra so nabautismoan ed patey? Tan siopa so “nabautismoan ed si Kristo Jesus”?
● Anto so nalalanor diad pambilay a tukoy ed saray responsabilidad ed Kristianon bautismo ed danum?
[Kahon ed pahina 25]]
Diad Antoran Dalan so Pangiyaabawag Yo ed Panarian?
Diad kabkaabungan
Diad panagpawil ed saray interesado
Diad saray panangiyaral ed Biblia
Diad saray lansangan
Diad saray kaeskuelaan
Diad saray katrabahowan