Kapitulo 13
Sakey a Baleg ya Ulop ed Arap na Trono nen Jehova
1. (a) Sakbay a balanglan saray anti-Kristianon ariripen na Dios odino saray 144,000 so mangawat na tumang da, anto so nepeg dan sagmaken? (b) Balet anto so posibli ed baleg ya ulop a manbibilay sano ondapo so “baleg a kairapan”?
ANGGAMAN saray matoor ya ariripen na Dios a manlapud si Abel ya anggad si Juan a Managbautismo so angiyuna ed panaggawa na linawa na Dios ed saray bilay da, sikaran amin so inatey tan manaalagar na kioli. Saray 144,000 a mikasakey ed si Kristo ed mangatatawen a Panarian to so nepeg met ya ompatey sakbay a naawat da so tumang da. Diad piduma, nipanengneng ed si apostol Juan so pasingawey a wala so baleg ya ulop a sikara so peteg a makaliktar ed “baleg a kairapan” tan, agla ompatey, nawalaan na ilalo ed pambilay na ando lan ando.—Apocalipsis 7:9-17.
Pakabidbir ed “Baleg ya Ulop”
2. Anto so angitonton ed malinew a pantalos diad pakabidbir ed “baleg ya ulop” ed Apocalipsis 7:9?
2 Diad saray siglos say pakabidbir ed sayan “baleg ya ulop” so ag-atalosan. Balet say progresibon pakatalos ed saray misiglaotan a propesiya so angiparaan na dalan. Nen 1923 atalosan a say “karnero” ed parabolo nen Jesus diad Mateo 25:31-46 tan say “arum a karnero” a tinukoy to ed Juan 10:16 so totoon manbibilay natan a nawalaan na pankanawnawan manayam na ando lan ando ed dalin. Nen 1931 saramay adeskribe ed Ezequiel 9:1-11 a tinandaan na lakin walaan na tinteroan na sekretaryo ed kamulingan da so abidbir ed “karnero” diad Mateo kapitulo 25. Insan, nen 1935, say “baleg a karakel,” odino “baleg ya ulop,” ed Apocalipsis 7:9-17 so anengneng a pareho ed samay “karnero” ed parabolo nen Jesus ed karnero tan kanding. Anggaman nen 1923 et atalosan ya arum ed ontan a malakarneron totoo so ginmapo lan pinmatnag, aliwan anggad 1935 a say bilang da so ginmapon binmaleg a maples. Natan et walaray literal a minilmilyon a mankakaliktan a nabidbir bilang kabiangan na satan a madibinon apaboran a “baleg ya ulop” na “arum a karnero.”
3. Akin a say “panalalagey da ed arap na trono” so agmankabaliksan a sikara so mangatatawen a klase?
3 Saraman so wala ed “baleg ya ulop” so nibiig a manlapud 144,000 a membro na espiritual ya Israel, ya atukoy ya asasakbay ed parehon kapitulo na Apocalipsis. Diad pasingawey to et ag-anengneng nen Juan iyan “baleg ya ulop” a bilang wala ed tawen. Say “panalalagey da ed arap na trono” (Griego: e·noʹpi·on tou throʹnou, “diad pakanengneng ed trono”) na Dios so agmankaukolan a sikara so wala ed tawen. Say posisyon so dia lambengat “ed pakanengneng” na Dios, a mangibabaga ed sikatayo a manlapud tawen et nanenengneng toray anak na totoo. (Apocalipsis 7:9; Salmo 11:4; ipareng so Salmo 100:1, 2, ontan met ed Lucas 1:74, 75 tan Gawa 10:33, Kingdom Interlinear.) Ontan met, agnakaukolan ed “amin a nasyones” so iyakar ed tawen ta pian wala ed arap na trono nen Kristo (literal, “diad arap”), a singa adeskribe ed Mateo 25:31, 32. Say katuaan a say “baleg ya ulop, ya agnayarian na toon bilangen,” et aliwan mangatatawen a klase so impanengneng na impangipareng ed Apocalipsis 7:4-8 tan 14:1-4, a say espesipikon bilang na saraman so inala ed dalin ya onla ed tawen so niparungtal.
4. (a) Anto so “baleg a kairapan” a naliktaran da? (b) A singa nibaga ed Apocalipsis 7:11, 12, siopa so mangiimaton ed “baleg ya ulop” tan mibiang ed sikara diad panagdayew?
4 Diad pakabidbir ed “baleg ya ulop,” insulat nen Juan: “Saraya so nanlapud baleg a kairapan.” Say naliktaran da so, peteg, et say sankabalgan a kairapan a nasagmak ed dalin. (Apocalipsis 7:13, 14; Mateo 24:21) Saray niliktar ed satan a makapataktakot ya agew nen Jehova so agmanduaruwa ed no siopa so responsabli ed inkiliktar. Sanen sikaray sisasalamat ya angipabtang na kilalaban da ed Dios tan ed Kordero, sirin, a singa anengneng nen Juan ed pasingawey, amin na saray matoor a pinalsa ed tawen so mangikasakey na boses da ed sikara diad panagdayew ed alenleneg a tuan Dios, a kuan da: “Amen! Say bendisyon tan say gloria tan say kakabatan tan say pisasalamat tan say dayew tan say pakayari tan say biskeg so betang na Dios tayo ed ando lan ando. Amen.”—Apocalipsis 7:11, 12.
Asubok No Nipaakar ed Inkamakana ed Kililiktar
5. (a) Panon tayon nadetermina no anto so nakakaukolan ta pian magmaliw a kabiangan na “baleg ya ulop” a niliktar? (b) Diad pangebat ed saray tepet ed sampot na sayan parapo, ipaliwawa no anto so nakakaukolan ta pian makaliktar ed “baleg a kairapan.”
5 Say kipreserba na “baleg ya ulop” so mitukoyan ed dilin matunong iran estandarte nen Jehova. Saray mabitar a pamatnagan diad pakabidbiran ya ugali na saramay niliktar so nikarga ed saray mapropetikon reperensya ed sikara diad Biblia. Sirin posibli ed saray maaro ed inkatunong so ikiwas natan no nipaakar ed pakaliktar. Tinukoy tayo laray kasulatan ya onggendan. Balet natan et sikara so usisaen a maalwar, tekep na tulong na kaaruman iran tekston nisita, tan imanoen no anto so nepeg yon gawaen ta pian onnepeg ed saray mapropetikon salaysay.
“Arum a karnero” ya atukoy ed Juan 10:16
Anto so kabaliksan to ed sakey a toon literal ya ontalineng ed boses nen Jesus? (Juan 10:27; Mateo 9:9; Efeso 4:17-24)
Panon so pakapangipanengneng tayo a bibidbiren tayo si Kristo a bilang “sakey a pastol” tayo? (Mateo 23:10, 11)
Say “karnero” ed ilustrasyon nen Jesus ed karnero tan saray kanding (Mateo 25:31-46)
Sioparay “agagi” nen Kristo a panggagawaan na saraya na maabig? (Hebreos 2:10, 11; 3:1)
Diad silong na antoran mairap a kipapasen so akatawagan dan mangipabidbir na inkasikara a kaiba na saray agagi nen Kristo ed dalin? Tan diad anton kimey so pangiiteran da na matoor a tulong? (Apocalipsis 12:12, 17; Mateo 24:14; 28:19, 20)
Saray totoon tinandaan ed kililiktar na samay lakin walaan na tinteroan na sekretaryo (Ezequiel 9:1-11)
Panoy pangipanengneng da a sikara so ag-onabobon ed saray makapadimlan bengatlan nagagawa ed antitipikon Jerusalem, odino Kakristianoan? (Apocalipsis 18:4, 5)
Anto so nisakup ed “tanda” a mangiduma ed sikara a manlapud saray mankunkuanan a Kristianos tan ipasen tora ed dasig na kililiktar? (1 Pedro 3:21; Mateo 7:21-27; Juan 13:35)
6. Panon a say salaysay nen Juan ed “baleg ya ulop” so ontulong ed sikatayon mantalos no akin a sikara so niliktar?
6 Say salaysay ed “baleg ya ulop” ya aromog ed Apocalipsis 7:9-15 so mangarum na malaknab nin importante ran detalye. Diad pangibabaga ed sikatayo no panon so impatnag na satan a “baleg ya ulop” kayari na “baleg a kairapan,” saray Kasulatan so mangitatawag na katuaan ya angitonton ed kililiktar da.
7. Anto so ginawa ra sakbay na “baleg a kairapan,” tan panon so inkisuhiri na saya?
7 Anggaman sikara so nanlapud amin a nasyones, tribu, totoo tan salsalita, sikara so nipanengneng a nankakasakey a “manalalagey ed arap na trono,” a mangigagalang ed si Jehova, say Sakey ya akayurong ed trono, a bilang Soberano na Talba. Pinaneknekan da ed dalan na bilay da a sikara so matoor ed pananguley to. Say katuaan ya “inurasan daray kawes da tan pinaputi da ra ed dala na Kordero” so mangipanengneng a binidbir da so pankaukolan da na mananakbong-kasalanan a merito na bagat nen Jesus bilang say Kordero na Dios. (Juan 1:29; 1 Juan 2:2) Diad pananisia et indedika ra so inkasikara ed Dios diad letnegan na satan a bagat, a saya so insimbolo ra diad inkipalgep ed danum tan natan et panggagayagaan da so malinis a talindeg ed arap na Dios, a singa inretrato na kawes dan amputi. Agda inkibot so mapublikon panangipaamta ra ed pananisia ra ed Anak na Dios. (Mateo 10:32, 33) Matukoy ed amin na saya, sikara so nipanengneng a singa wala ed templo na Dios, odino sankatalbaan ya abung na panagdayew, a bilang managdaydayew a mangisasaklang ed Dios na “sagradon lingkor ed agew tan labi.” Sirin agawaan da so sakey a rekord bilang matoor a managsuporta ed tuan panagdayew tan manangiyabawag ed Panarian to.—Isaias 2:2, 3.
8. Pian sayan impormasyon so mangungguna ed sikatayo, anto so nepeg tayon gawaen?
8 Kasin saray detalye na sarayan mapropetikon retrato so onnepeg ed sikayo? Kasin walaray dalan a nakaukolan yon pangitarokan na bilay yon lalon nagnap a midasig ed no anto so adeskribe dia? No ontan, natan la so panaon a panggawa ed satan!
Pambilay ed Espiritual a Paraiso
9. Panon so impaneskribe nen Juan ed espiritual iran bendisyon a panggagayagaan na “baleg ya ulop” anggan natan?
9 Kasin sakey kayo ed saraman so maniilalon makaliktar a bilang kabiangan na “baleg ya ulop”? No sikayo la so akitunosan ed saray matunong a dala nen Jehova, sirin andi-duaruwan sikayo la so onggagapon manggagayaga ed nisipan iran kipapasen a matukotukoy ya asalitan espiritual a paraiso. Nibaga ed si apostol Juan: “Sikara la so agnaerasan nisay napegaan, nisay sikara so bakbaken na agew nisay anggan anton mansasnit a petang, lapud say Kordero, a wala ed pegley na trono, so mangipastol ed sikara, tan mangitonton ed sikara diad saray subol na danum na bilay. Tan punasen na Dios so amin a lua ed kamataan da.” (Apocalipsis 7:16, 17) Panon a saya so apaneknekan a tua ed kipapasen yo?
10. (a) Diad espiritual a pantalos panon a tua a say “baleg ya ulop” so agla “naerasan nisay napegaan”? (b) Kasin saya so naeksperiensia yo?
10 Sakbay a sinmabi ed silong na maaron panangasikaso na Maabig a Pastol, si Jesu-Kristo, kasin sikayo so nanaerasan tan napepegaan ed inkatunong? (Ipareng so Mateo 5:6.) No ontan, say pampipirawatan yo et say bengatlan nayarian lambengat ya itarya nen Jehova ed panamegley na Anak to. Sanen naaralan yo so nipaakar ed saray matunong a dalan nen Jehova—say gagala ton maneral ed marelmeng, ingen say agkanepegan a panangasi ton manggawan posibli ed kililiktar na saray ilalak nen Adan—sirin, andi-duaruwa, diad ununan pankanawnawa ed bilay yo et nalikna yon sikayo so peteg a kontento. Say espiritual a tagano tan inumen a manlapud Salita na Dios, a singa nipaparungo ed panamegley na muyongan to, so nantultuloy a mangitatarok ed sikayo na kapenek. (Isaias 65:13, 14) Tan no indedikam la so inkasika ed Dios diad panamegley nen Kristo sika la natan so walaan na peteg a gagala ed bilay. (Ipareng so Juan 4:32-34.) Say walad arap mo et say magayagan panilalo ed maandon bilay diad sakey a Paraison dalin, lapud say Kordero “so mangitonton [ed “baleg ya ulop”] diad saray subol na danum na bilay.”
11. (a) Diad anton dalan a tuan ‘nisay say agew nisay mansasnit a petang so mamakbak ni ed sikara’? (b) Panon kaimportante itan ed sikayo?
11 Bilang manmamatalek a “karnero,” saraman so walad “baleg ya ulop” so nasalimbengan met tan maligen ya itonton na Maabig a Pastol. Sikato no akin, piguratibon panagsalita, ‘nisay say agew nisay anggan anton mansasnit a petang so mamabakbak ni ed sikara.’ Agkabaliksan na saya, bilang sakey ed “baleg ya ulop,” et agkayo la managmak na kapasegsegang ed mundo. Noag ingen, ituturo to a sikayo la so nasalimbengan a manlapud mansasnit a petang na dilin agpanliket na Dios. Tan sano iyuran to na madibinon panagderal ed marelmeng, agto kayo deralen. Sayan maapabor a siglaotan so mantultuloy ed ando lan ando.—Ezequiel 38:22, 23; ipareng so Salmo 11:6; 85:3, 4.
12. Panon so inkapunas na saray lua ed mata yo ya anggan natan?
12 Agayla ran makapakelaw a sengegan na panggayaga so wala ed sika no tuan sakey ka ed satan a “baleg ya ulop”! Sika so walaan na makapakelaw ya ilalo ed pakanengneng na sigpot a kapunas na marelmeng tan insan say kanonotan tan laman mo so aktual a nabulos a manlapud amin ya epekto na kasalanan. Balet anggan natan say ermen a sasagmaken na totoo lapud sikara so agmikakabat ed Dios so agmamapasakit ed sika. Sika so onggagapon makaamta ed gayaga a kayarian lambengat na saray totoon say Dios da et si Jehova. (Salmo 144:15b) Diad onia et sika la so onggagapon makaeksperiensia ed kasumpalan na sipan: “Punasen na Dios so amin a lua ed kamataan da.”
13. Anto so mangarum na gayaga ed espiritual a paraiso legan na pantultuloy na milenyon uley nen Kristo?
13 Unong a singa say “baleg ya ulop” so makaliktar ed anggaan na sayan sistema na bengabengatla, ontan met ed espiritual a paraiso. No sika so sakey ed sikara, sirin mantultuloy kan manggayaga ed espiritual a piesta na saray mataban bengatla kaleganan na pankukurang na milenyon uley nen Kristo. Say pikakabat mo ed Dios a mismo so onaralem legan a nanengneng mo so ag-onsaew a gagala to a maglorian nasusumpal. Say gayagam so napabiskeg legan a sika so mibiang diad pangabrasa ed ombabaleg a bilang na saray inaatey a mikasakey ed sika diad tuan panagdayew. Tan saray pisikal a bendisyon so nitarya ed satan so nagkalautlan mabli ed saray amin a matoor ya ariripen na Dios legan a sikara so nanengneng a balikas na aro nen Jehova a mismo.—Isaias 25:6-9; Santiago 1:17.
Repason Diskusyon
● Diad anton ekstraordinaryon ebento so isisiglaot na Biblia ed “baleg ya ulop,” tan panon?
● No peteg a labay tayo so napibali ed satan a madibinon apaboran a “baleg ya ulop,” anto so nepeg tayon gawaen natan?
● Panon inkaimportante ed sika iray bendisyon na espiritual a paraiso?