Kapitulo 28
Panuulop ed Balang Sinansakey Diad Aro
14. Anton simbawa so inter nen Jesus diad agpagmaliw a mabalaw ed arum?
14 Lapud amin tayo so ag-ayadyari, imbangat nen Jesus a sikatayo so nepeg ya aliwan mabalaw ed arum. Tua, arum so nalilingo, balet sikatayo met so ontan. “Akin, sirin, et sika so onnengneng ed taep diad mata na agim, balet agmo imanoen so pagsen ed dilin matam?” so intepet nen Jesus. (Mateo 7:1-5) Diad lawas pannonot ed satan a simbawan makabat, natulongan itayon miulop ed saray agagi tayon lalaki tan bibii.
15. (a) Akin ya importante a perdonaen tayo so arum anggan sano walaan itayo na sengegan na panreklamo a sumpad sikara? (b) Diad ilustrasyon to ed Mateo kapitulo 18, panon so impangibangat nen Jesus ed pankaukolan na pagmaliw a manamerdona?
15 Absuloton nakaukolan a sikatayo so magmaliw a mapangasi tan manamerdona. Tua, nayarin walaan kayo na peteg a sengegan na panreklamo ed sakey ya agin laki odino bii. Balet nonoten so simbawa na Biblia: “Itultuloy so pantetepelan ed balang sinansakey tan manpeperdonaan so balang sinansakey a bulobulos no wala so sengegan na panreklamoan a sumpad balang sinansakey.” Balet akin a nepeg yon perdonaen so arum sano walaan kayo na peteg a sengegan na panreklamoan a sumpad sikara? Lapud “si Jehova so sibubulos ya amerdona ed sikayo,” so ebat na Biblia. (Colosas 3:13) Tan pian naawat tayo so panamerdona to, inkuan nen Jesus, nepeg tayon perdonaen so arum. (Mateo 6:9-12, 14, 15) Si Jehova, singa samay ari ed ilustrasyon nen Jesus, so amerdona ed sikatayo diad nilibu-libon danay, sirin agta naperdona tayoray agagi tayo ed pigaran danay?—Mateo 18:21-35; Uliran 19:11.
16. (a) Unong ed 1 Juan 4:20, 21, panon a say aro ed Dios so misiglaotan ed aro ed kaparan Kristianos? (b) Anton kiwas so nakaukolan no say agim so walaan na bengatlan sumpad sika?
16 Agtayo lambengat basta agamilen so katuaan tan ontan met a tratoen tayoray agagi tayon lalaki tan bibii diad aliwan maaro, aliwan manamerdonan dalan. (1 Juan 4:20, 21; 3:14-16) Kanian, sirin, no walaan kayo na bengatlan problema ed sakey a kaparan Kristiano, ag-ontutundan mitongtong ed sikato. Agmanpopoot, noagta peteken so pamaakaran diad espiritu na aro. No asakitan yo so agi yo, akaparaan ya onkerew na panamerdona tan dispensa.—Mateo 5:23, 24.
17. Anto so manepeg a kurang ya alaen no sika so nanggawaan na sakey na mauges?
17 Balet anto no sikayo so ininsulto na sakey, odino nanggawaan to kayo na mauges ed arum a nengneng? Isisimbawa na Biblia: “Ag-ibabaga: ‘Unong a singa ginawa to ed siak, ontan met so gawaen ko ed sikato.’” (Uliran 24:29; Roma 12:17, 18) Insimbawa nen Jesu-Kristo: “Siopaman a manampal ed kawanan ya aping yo, ipaarap yo met so pagpag ed sikato.” (Mateo 5:39) Say tampal so ag-inggetman pamasakit ed pisikal noagta panginsulto odino pamasanok. Sirin ibabangat nen Jesus iray patumbok ton paliisan da so gulo odino sangsangan. Imbes ya “ibales so mauges ed mauges odino ayew ed ayew,” nepeg yon “anapen so kareenan tan tumboken.”—1 Pedro 3:9, 11; Roma 12:14.
18. Anto so naaralan tayo ed ehemplo na Dios diad panangaro ed amin a totoo?
18 Nonoten a nepeg tayo so “nawalaan na aro ed interon panlilimog na agagi.” (1 Pedro 2:17) Inletneg nen Jehova a Dios so ehemplo. Sikato so aliwan manangiduma. Amin a rasa so parepareho ed pakanengneng to. (Gawa 10:34, 35; 17:26) Saraman so nasalimbengan ed onsasabin “baleg a kairapan” so inala a nanlapud “amin a nasyones tan tribu tan binaleybaley tan pansasalita.” (Apocalipsis 7:9, 14-17) Sirin, diad pangalig ed Dios, agtayo nepeg ya aroen na daiset so arum lapud sikara so duma ed rasa, nasyonalidad odino talindeg ed sosyal, odino duma so kolor na baog da.
19. (a) Panon so nepeg a pangipasen tan pantrato ed saray kaparan Kristianos? (b) Anton babaleg a pribilehyo so nayarin onwalad sikatayo?
19 Kabaten a maong so amin na saraman so wala ed Kristianon kongregasyon, tan sikara so aroen tan pablien. Tratoen iray mamatatken a bilang kaamaan tan kainaan, saray walad kalangweran a bilang agagin lalaki tan bibii. (1 Timoteo 5:1, 2) Pribilehyo so pagmaliw a kabiangan na singa-pamilyan nanengneng a muyongan na Dios, a saray membro to so makapanuulop a mankakasakey ed aro. Agaylan abig so pambilay na ando lan ando ed paraiso diad dalin dingan na ontan a maaron pamilya!—1 Corinto 13:4-8.