Kapitulo 4
Say Sakey a Tinasian na Amin a Propeta
1. Anto so ipanengneng na saray katuaan nipaakar ed sakbay-inkatoon kiwawala nen Jesus no nipaakar ed relasyon to ed si Jehova?
DEDESKRIBIEN to so dilin ampetang a relasyon to ed si Jehova, inkuan nen Jesus: “Say Ama so walaan na aro ed Anak tan ipanengneng to ed sikato so amin a bengatlan gawaen to.” (Juan 5:19, 20) Say inkamaapit na satan a relasyon so ginmapo ed panaon na impanpalsa to, agnabilang iran milenyo sakbay na inkianak to ed inkatoo. Sikato so bogbogtong ya Anak na Dios, say alenleneg a pinalsa nen Jehova a mismo. Amin a bengatla ed tawen tan ed dalin so apalsa ed panamegley na satan a pinabpablin inad-aron panguloan ya Anak. Sikato met so nanserbin Salita na Dios odino Sangiyan, say sakey a diad panamegley to et nipakabat so madibinon linawa ed arum. Sayan sakey, say Anak a nagkalalon nanliketan na Dios, so nagmaliw a toon Jesu-Kristo.—Colosas 1:15, 16; Juan 1:14; 12:49, 50.
2. Diad anton kalaknab so panutukoy na saray propesiya na Biblia ed si Jesus?
2 Sakbay na mamilagron inkianak to bilang sakey a too, dakel iran apuyanan a propesiya nipaakar ed sikato so nikurit. A singa tinasian nen apostol Pedro ed si Cornelio, “Diad sikato so nantasian na amin a propeta.” (Gawa 10:43) Diad ontan a kalaknab a say betang nen Jesus nipaakar ed puron panagdayew a nidatak ed Biblia a sakey ya anghel so angibaga ed si apostol Juan: “Dayewen so Dios; ta say pantasi ed si Jesus so mamuyan ed panagpropesiya.” (Apocalipsis 19:10) Saratan a propesiya so malinlinew a mangipabidbir ed sikato tan manawag na imano ed saray nengneng na gagala na Dios nipaakar ed sikato a sikara so makapainteres ed sikatayo natan.
No Anto So Imparungtal na Saray Propesiya
3. (a) Diad propesiya ed Genesdis 3:14, 15, siopa so inrepresenta “na uleg”? “Say bii”? ‘Say bini na uleg’? (b) Akin a say ‘kamekmek na uleg ed ulo’ so makapainteres a tuloy ed saray ariripen nen Jehova?
3 Say inmuna ed saratan a propesiya so nibalikas kayari na impanrebelde ed Eden. Saman so nilugan ed panangukom nen Jehova a nipaarap ed uleg. Inkuan nen Jehova: “Mangyan ak na gulaan ed baetan mo tan say bii tan ed baetan na binim tan say bini to. Mekmekan to ka ed ulo tan sikato so sugaten mo ed mukor.” (Genesis 3:14, 15) Anto so kabaliksan na saman? Diad inggeter na Dios a panaon arum iran propesiya so amalinew ed satan tan amalaknab ed satan. Bilang nansumpalan kabat tayo a say sakey ya akapangibagaan to, a bilang inrepresenta na uleg ed si Satanas a Diablo. “Say bii” so dilin matoor a mangatatawen a muyongan nen Jehova, a diad sikato et singa sakey a matoor ya asawan bii. ‘Say bini na uleg’ so mangisakup ed saray angheles tan saray totoon mangipapatnag na espiritu na Diablo, saraman so onsusumpa ed si Jehova tan saray totoo to. Nisesengeg ed paraan a say uleg so inusar na Diablo ed Eden, nayarin talosan a manlapud propesiya a ‘say kamekmek na uleg ed ulo’ so manutukoy ed kadederal na sayan rebelden anak na Dios ya aneral ed kagalangan nen Jehova tan angitarok a kaermenan ed katooan. Balet no nipaakar ed pakabidbir ed “bini” a manggawa na panagmekmek, saya so abayag a nansiansian sagradon sekreto.—Roma 16:25, 26.
4. Panon a say kapolian nen Jesus so ontulong a mangipabidbir ed sikato a bilang say nisipan a Bini?
4 Kayari na 2,000 taon ed awaran na too inter nen Jehova so malaknab nin detalye. Impanengneng a say Bini so ompatnag ed linya na pamilya nen Abraham. (Genesis 22:15-18) Anggaman kuan, say linyan mangipaarap ed Bini so mandepende aliwan diad silalaman lambengat a kapolian noagta diad pampili na Dios. Anggaman ed panangaro nen Abraham ed si ilalak ton Ismael, ya inyanak nen aripen a biin Hagar, imbaga nen Jehova a mabitar: “Say sipanan so iletneg ko ed si Isaac, ya iyanak nen Sara ed sika.” (Genesis 17:18-21; 21:8-12) Diad saginonor et saman a sipanan so apaletan, aliwan diad panguloan ya ilalak nen Isaac a si Esau, noagta ed si Jacob, a sikato so nanlapuan na 12 tribu na Israel. (Genesis 28:10-14) Asabi panaon nipanengneng a say Bini so nianak ed tribu nen Juda, ed abung nen David.—Genesis 49:10; 1 Awaran 17:3, 4, 11-14.
5. Anggan diad asasakbay a mangaraldalin a ministeryo nen Jesus, anto ni so nanggawa ed satan a mabitar a sikato so Mesias?
5 Masulok a 700 taon ed asasakbay, binitla na Biblia so Bethlehem a bilang pasen na atooan a nianak na Bini balet niparungtal met a sikato so sakey a manbibilay la a “nanlapud saray agew ya andi-geter,” nanlapulad panaon a sikato so apalsa ed tawen. (Miqueas 5:2) Say panaon na inkipatnag to ed dalin bilang Sakey a Nilanaan nen Jehova, say Mesias, so nipasakbay ed panamegley nen propeta Daniel. (Daniel 9:24-26) Tan sanen sikato so alanaan na masanton espiritu, sakey a boses a nanlapud tawen so angipabidbir ed sikato. (Mateo 3:16, 17) Sirin, kayari na impagmaliw ton sakey a patumbok nen Jesus, nayarian nen Felipe ya ibaga a tekep na kumbiksion: “Aromog mi so sakey ya insulat nen Moises, ed Ganggan, tan saray Propetas, si Jesus, say anak [ed inpanagibi] nen Jose, a manlapud Nazareth.”—Juan 1:45.
6. (a) Kayari impatey nen Jesus, anto so amoria na saray patumbok to? (b) Siopa, manuna, so ‘bini na bii,’ tan anto so kabaliksan na panmekmek to ed ulo na uleg?
6 Kayari na saman, abidbir na saray patumbok nen Jesus a literal ya dakerakel iran mapropetikon reperensya ed sikato so nilaga ed apuyanan iran Kasulatan. Kayari na impatey tan inkioli to, personal ya “impatalos [to] ed sikara iray bengatlan walaan na kipaakaran ed sikato ed amin a Kasulatan.” (Lucas 24:27) Mapatnag la natan a si Jesus, manuna, et sikato so ‘bini na bii,’ say sakey a manmekmek ed ulo na “uleg” ed ontan a nengneng a si Satanas so namekmek a naandi ed kiwawala diad kaunoran. Diad panamegley nen Jesus amin na saray sipan na Dios ed katooan, amin a bengatlan kaililiw tayon gamoran so nasumpal la.—2 Corinto 1:20.
7. Niarum ed pakabidbir ed sakey ya atukoy ed sarayan propesiya, anto ni so makagunggunan konsideraen?
7 Sanen inmunan abasa yo so arum ed sarayan propesiya angangko ta intepet yo, a singa ginawa na samay Etiopen Eunoko, “Nipaakar ed siopa so pangibabagaan na propeta ed saya?” Balet agpinaulianan na eunoko so pamaakaran sanen naawat to so ebat. Kayari na indengel ton maalwar ed paliwawa nen Felipe, amoria na too itan a panamabli ed no panon so impanumpal nen Jesus ed propesiyan nankaukolan na aksion ed dilin biang to, diad inkabautismoan to. (Gawa 8:32-38; Isa. 53:3-9) Kasin sikatayo met so onkiwas na ontan? No maminsan et sikato so diad pamaakaraan a say sakey a propesiya so nipresenta a manenyeg ed sikatayo, odino say puso tayo so nayarin natenyeg ed saray konklusyon ya inagwat ed Biblian mismo sano nipalinew so kasumpalan.
8. Apatiran propetikon padron nipaakar ed si Jesu-Kristo so asalaysay dia. Mankatunongan ed saray tepet tan kasulatan a nitaryan mangipanengneng no panon a sarayan propesiya so mangapekta ed sikatayo. Salaysayen a sansakey.
8 Imanoen no panon a saya so tua ed onggendan iran mapropetikon sipan tan padron nipaakar ed si Jesu-Kristo. Saray tepet so ebatan yo diad tulong na nisitan kasulatan.
(1) Panon a say rekord nipaakar ed getma nen Abraham a pangiyapay ed si Isaac so ontulong ed sikatayon mangapresya ed ginawa nen Jehova diad impangitarya to na dondon ed panamegley na Anak to? (Juan 3:16; Genesis 22:1-18 [imanoen no panon so inkadeskribe nen Isaac ed bersikulo 2.])
Anton talek so nepeg ya iter na saya ed sikatayo? (Roma 8:32, 38, 39)
Balet anto so nakaukolan ed biang tayo? (Genesis 22:18; Juan 3:36)
(2) Diad pakabidbir ed si Jesus a bilang say propetan singa si Moises, ed anton seryoson responsabilidad so ipapanonot na Biblia ed sikatayo? (Gawa 3:22, 23; Deut. 18:15-19)
Anto so arum ed saray bengatlan sinalita nen Jesus ed sikatayo, tan akin a sikara so nipanpanaon natan? (Mateo 28:18-20; 19:4-9; 18:3-6)
(3) Sano ipapaliwawa so inyanino na inkasaserdote nen Aaron, diad anton makasagyat iran kalidad nen Jesus bilang atagey a saserdote so pangipapaarapan na Biblia na imano? (Hebreos 4:15-5:3; 7:26-28)
Sirin panon so nepeg tayon liknaan diad iyaasingger ed Dios diad pikakasi ed panamegley nen Kristo diad tulong a panalona ed saray kakapuyan tayo?
(4) Nisesengeg ed inkasuperyor na bagat nen Jesus (a sinandian to so amin na saraman so inyapay ed silong na Mosaicon Ganggan), akin a sikatayo so nepeg a maalwar a tuloy ya ompaliis diad kipanget ed ugalin panggawa na antokaman a kabat tayon aliwan makapaliket ed Dios? (Hebreos 10:26, 27)
No tuan papablien tayo so ilalo ed bilay ya agawan posibli a bilang resulta na bagat nen Jesus, antoran bengatla so maseseg tayon gawaen? (Hebreos 10:19-25)
Panon Tayon Ipanengneng So Pananisia Tayo ed Si Kristo?
9. Akin ya anggapo so kilalaban ed sikatayo no anggapo si Jesu-Kristo?
9 Kayari na impangituro to ed Judion atagey a korte ed Jerusalem no panon so inkasumpal na propesiya ed si Jesus, maabig ya imbaga nen apostol Pedro: “Anggapo so kilalaban ed anggan siopaman ni, ta anggapo so sananey a ngaran ed leksab na tawen a niiter ed limog na totoo a nepeg tayon kilabanan.” (Gawa 4:11, 12; Salmo 118:22) Amin na saray ilalak nen Adan so makasalanan, sirin say ipapatey da so onsabi ed kondenasyon na kasalanan tan anggapo so iter ton merito a nayarin niyaplika a bilang dondon ed siopaman. Balet si Jesus so ayadyari, tan say impangiter to na bilay to so walaan na masakripisyon kablian. (Salmo 49:6-9; Hebreos 2:9) Inyapay to ed Dios so sakey a bagat ya eksakton kasimbangan ed bili na saman so abalang nen Adan a para ed saray kapolian to. Panon so pangungguna na saya ed sikatayo?—1 Timoteo 2:5, 6.
10. Ipaliwawa so sakey a dalan a say bagat nen Jesus so angungguna ed sikatayo na baleg.
10 Ginawa ton posibli so impakawalaan tayo na malinis a konsiensia lapud inkaperdona na kasalanan—bengatlan lalo nen say agamoran na Israel diad saray ayayep a bagat diad leksab na Mosaicon Ganggan. (Gawa 13:38, 39; Hebreos 9:13, 14) Diad impakawalaan ed saya, siempre, et mankaukolan a sikatayo so matua ed inkasikatayo tan nawalaan itayo komon na puron pananisia ed si Jesu-Kristo. Kasin personal ya apresyaen tayo no panon a nakaukolan tayo so bagat nen Kristo? “No ikuan tayo: ‘Andian kami na kasalanan,’ papalikdoen tayo so inkasikatayo tan say katuaan so andi ed sikatayo. No ipatua tayoray kasalanan tayo, sikato so matoor tan matunong ta pian perdonaen to itayo ed saray kasalanan tayo tan linisan to itayo a manlapud amin ya ag-inkatunong.”—1 Juan 1:8, 9.
11. Akin a say kipalgep ed danum so importantin sengegan diad pakagamor na maabig a konsiensia ed Dios?
11 Siempre, arum a mangibagan kabat da a sikara so makasalanan tan ikuan dan manisia ra ed si Kristo, a sikara ni so diad arum a kalaknab et mangibabaga ed arum na nipaakar ed Panarian na Dios a singa ginawa nen Jesus, so anggaman kuan et kulang na sigpot a pananisia ed si Jesus. Diad anton dalan? Bueno, a singa nipanengneng ed Biblia, sanen saray totoo nen inmunan siglo so tuan nagmaliw a mananisia, panon so mapublikon impangipanengneng da ed satan? Sikara so abautismoan. Akin? Lapud ingganggan nen Jesus a saray babangatan so bautismoan. (Mateo 28:19, 20; Gawa 8:12; 18:8) Sano say puso na too so peteg a natenyeg ed maaron probisyon a ginawa nen Jehova ed panamegley nen Jesu-Kristo, satan so agto ikibot. Gawaen to so anggan anton nakakaukolan a panangiyarunsa ed bilay to, ya idedika to so inkasikato ed Dios tan saya so isimbolo to ed panamegley na kipalgep ed danum. A singa ipapapengneng na Biblia, sikato so diad pangipatnag na pananisia ed onian dalan a gawaen to so ‘kerew to ed Dios nipaakar ed maabig a konsiensia.’—1 Pedro 3:21.
12. No namoria tayon sikatayo so akagawa na kasalanan, anto so nepeg tayon gawaen ed satan, tan akin?
12 Anggan diad kayari na satan, siempre, saray makasalanan ya ugali so ompatnag. Anto ey? “Sulaten takayo ed sarayan bengatla pian agkayo komon mankasalanan,” so imbaga nen apostol Juan. Sirin agtayo leglemewen so kasalanan ed inkasikatayo, balanglan ompatnag ed kiwas, panagsalita odino awawey. “Tan ingen, no say sakey so mankasalanan, walaan itayo na mananulong ed Ama, si Jesu-Kristo, sakey a matunong. Tan sikato so mananakbong a bagat ed saray kasalanan tayo, ingen aliwan ed saray kasalanan tayo lambengat noagta ontan met ed kasalanan na sankamundoan.” (1 Juan 2:1, 2) Kasin kabaliksan na satan ya, anggaman anto so gawaen tayo, no sikatayo so manpikasi ed Dios, ‘Perdonam iray kasalanan mi,’ amin a bengatla so areglado la? Andi. Say tombok ed kaperdona et say puron panagbabawi. Say tulong so nayarin nakaukolan met a manlapud saray mamatatken ed Kristianon kongregasyon. Nepeg tayon bidbiren so lingon agawaan tan liknaen so masimoon a pagbabawi ed satan ta pian gawaen tayo so magunaet a sagpot diad agla pakaulit ed satan. (Gawa 3:19; Santiago 5:13-16) No saya so gawaen tayo, napaseguroan itayo ed tulong nen Jesus. Diad letnegan na pananisia tayo ed mananakbong-kasalanan a bili na bagat to, say kipawil ed pabor nen Jehova so posibli, tan saya so makana pian say panagdayew tayo so makapaliket ed sikato.
13. (a) Ipaliwawa so sananey a dalan a say bagat nen Jesus so angungguna ed sikatayo. (b) Akin a say serbisyo tayo ed Dios so agmankanepegan ed sayan tumang? (c) Balet no peteg a walaan tayo na pananisia, anto komon so gagawaen tayo?
13 Say bagat nen Jesus so angilukas met ed sikatayo na pankanawnawa ed maandon bilay—diad katawenan a para ed “melag a pulok,” tan diad Paraison dalin a para ed saray binilyon a katooan. (Lucas 12:32; Apocalipsis 20:11, 12; 21:3, 4) Saya so aliwan sakey a tumang a nagungguna tayo. Anggaman panon la so gawaen tayo ed serbisyo nen Jehova, agtayon balot nayarian ya ipaalagey so ontan a merito ya utang na Dios ed sikatayo so bilay. Say maandon bilay so “langkap ya iter na Dios . . . diad panamegley nen Kristo Jesus a Katawan tayo.” (Roma 6:23; Efeso 2:8-10) Anggaman kuan, no walaan tayo na pananisia ed satan a langkap tan apresasyon ed nengneng a kagawa to, saya so gawaen tayon ompatnag. Diad pakatebek ed no panon a makapakelaw so impangusar nen Jehova ed si Jesus diad impanumpal ed linawa To tan no panon a makana ya amin tayo so manumbok a maapit ed bakat nen Jesus, gawaen tayo so Kristianon ministeryo a sakey ed saray sankaimportantian a bengatla ed bilay tayo. Say pananisia tayo so ompatnag a manlapud kumbiksion diad pangibaga tayo ed arum nipaakar ed sayan makapakelkelaw a langkap na Dios.—Ipareng so Gawa 20:24.
14. Panon a say ontan a pananisia ed si Jesu-Kristo so walaan na manamakasakey ya epekto?
14 Agaylan maabig, manamakasakey ya epekto so ontan a pananisia! Diad panamegley to et niyasingger itayon maapit ed si Jehova, ed Anak to tan ed balang sinansakey ed dalem na Kristianon kongregasyon. (1 Juan 3:23, 24) Gawaen to itayon manliket a si Jehova so sipapangasin angiter ed Anak to “na ngaran a walad tagey na amin nin arum a ngaran [nilikud so ngaran na Dios], ta pian diad ngaran a Jesus et amin a pueg so ontalimukor na saraman so wala ed tawen tan saraman so wala ed dalin tan saraman so wala ed leksab na dalin, tan amin a dila so mamidbir ed lapag a si Jesu-Kristo so Katawan diad kigloriaan na Dios ya Ama.”—Filipos 2:9-11.
Repason Diskusyon
● Sanen pinmatnag so Mesias, akin a say pakabidbiran ed sikato so malinew ed saraman so tuan anisia ed Salita na Dios?
● Panon a saray mapropetikon padron ya asumpal ed si Jesus, a singa niretrato ed pahina 26, so mangapekta ed sikatayo?
● Diad antoran dalan a say bagat nen Jesus so angungguna la ed sikatayo? Panon so pakapangipanengneng tayo na apresasyon ed satan?
[Kahon ed pahina 26]
Propetikon Padron Nipaakar ed si Jesus—Panon So Nepeg a Pangapektarya ed Sikayo?
Pangiyaapay nen Abraham ed si Isaac
Moises bilang sangiyan na Dios
Aaron bilang atagey a saserdote
Bagbagat ya ayep