Kapitulo 10

Sakey a Panarian “Ya Agbalot Naderal”

1, 2. (a) Anton katuaan so indanet a kada agew na saray nagagawa ed mundo, tan panon? (b) Anto so alenleneg a solusyon?

SARAY nagagawa ed mundo a kada agew so mangidadanet ed katuaan a saray totoo so ag-akaromog na liket diad pangipulisay ed inkasoberano nen Jehova tan, imbes, sasalien dan uleyan so inkasikara. Anggapo so sistema na atooan a gobiernon akapangitarok na pankaabigan ya anggapoy panangiduma ed katooan. Anggaman saray totoo so akapanggawa na sientipikon pikakabat ed ag-inilaloan a kalaknab, agda nayarian a baguten so kasalanan, a taloen so sakit tan panganggaen so patey, agda agawaan ya anggan diad sakey ed saray uuleyan da. Diad kasuniyan, saray nasyones so nantultuloy a mamapawala na balo tan lalon makapakebbiew iran ayura. Ompapalalo so karawalan ed krimen. Say teknolohya, agum tan agpikakabat so nantetekep a nandutak ed dalin, danum tan dagem. Say intulasok na implasyon tan agpakaimpleyo so mamapairap ed dakel diad pakagamor ed saray nakakaukolan ed bilay. Saray totoo so naandian na ilalo ed dalan a pawayan.​—Ecl. 8:9.

² Anto so ebat? Say Panarian na Dios, ya imbangat nen Jesus ed saray patumbok to ya ipikasi. (Mateo 6:9, 10) Agaylan sikatayo so misalsalamat a say pakainawaan ya itarok to so asingsingger la natan!

3. (a) Nipapaakar ed sayan Panarian, anto so agawa ed tawen nen 1914 K.P.? (b) Akin a satan so importante ed sikatayo?

³ Nanlapulad 1914 K.P., say Panarian na Dios ed lima nen Jesu-Kristo so mankukurang la.a Diad saman a taon saray agawgawan anengneng nen Daniel ed mapropetikon pasingawey so peteg ya agawa ed tawen. Say “Kadaanan na Saray Agew,” si Jehova a Dios, so angipabtang ed Anak na too, si Jesu-Kristo, na “pananguley tan karlangan tan panarian, pian saray totoo, nasyones tan lenguahe so manlingkor ya amin ed sikato.” Nanreport ed pasingawey, insulat nen Daniel: “Say pananguley to so maandon pananguley ya agnapaso, tan say panarian to so sakey ya agnitarok ed kadederal.” (Daniel 7:13, 14) Sikato so diad panamegley na sayan Panarian a panggayagaen na Dios iray manangaro ed inkatunong diad agnabilang a maabig iran bengatlan ginagala to sanen impasen to so inmunan toon atateng tayo ed Paraiso.

4. Antoran detalye nipaakar ed Panarian so makapainteres ed sikatayo, tan akin?

⁴ Saray matoor ya uuleyan na Panarian so interesadon tuloy diad paalagey tan kurang na sayan gobierno. Kaliktan dan amtaen no anto so nagagawa natan, no anto so nagawaan to ed arapen tan no anto nakakaukolan to ed sikara. Satan so uusisaen dan maapit, tan legan ya ontan so gawaen da, say apresasyon da ed satan so ombulaslas tan kinlongan toran mangibaga ed satan diad arum.​—Salmo 48:12, 13.

Makapaliing-Puson Inspeksion

5. (a) Panon so pangipanengneng na saray Kasulatan no siopan inkasoberano so nibalikas diad panamegley na Mesianicon Panarian? (b) Sirin panon so kaapektaan tayo ed naaralan tayo nipaakar ed Panarian?

⁵ Sakey ed saray ununan bengatla ya iparungtal na ontan a panangusisa et sayan Mesianicon Panarian so sakey a balikas na dilin inkasoberano nen Jehova. Sikato so angiter ed “pananguley tan karlangan tan panarian” ed Anak to. Sirin, nen sayan Panarian so ginmapon manuley, saray boses ed tawen so matukoy ya angiyabawag: “Say panarian na mundo so nagmaliw a panarian na Katawan [Jehova a Dios] tan ed Kristo to, tan sikato [Jehova] so manuley bilang ari ed ando lan ando.” (Apocalipsis 11:15) Sirin amin a bengatlan nanaimatonan tayo nipaakar ed sayan Panarian tan saray nagagawaan to so mangiyasingger ed sikatayon maapit ed si Jehova a mismo. Ipurek to ed sikatayo so sakey a pilalek na isuko ed inkasoberano to ed ando lan ando.

6. Akin a nikadkaduman makapainteres ed sikatayo a si Jesu-Kristo so deputadon manuley nen Jehova?

⁶ Agaylan abig ta impasen nen Jehova si Jesu-Kristo ed trono a bilang deputadon manuley To! Bilang Katawan a Komikimey ya inusar na Dios diad impanggawa na dalin tan too, kabat nen Jesus a magmaong iray nakakaukolan nen say anggan siopa ed sikatayo. Nagkalalo ni, impatnag to manlapud gapo na awaran na too so ‘impanliket to ed saray anak na totoo.’ (Uliran 8:30, 31; Colosas 1:15-17) Ontan lan abalbaleg so ontan ya aro a sikato so personal a linmeksab ed dalin tan inter to so bilay to a bilang sakey a dondon ed sikara. Sirin intarya to ed sikatayo so paraan na kabulos a manlapud kasalanan tan patey, tan say pankanawnawa ed maandon bilay.​—Mateo 20:28.

7. (a) Miduma ed pananguley na anggan siopan too, akin a sayan gobierno so magnayon? (b) Anton pisiglaotan na “matoor tan makabat ya aripen” ed mangatatawen a gobierno?

⁷ Saya so maligen, magnayon a gobierno. Say magnayon a kalidad so impaseguro na katuaan a si Jehovan mismo so ag-ompatey. (Habacuc 1:12; Salmo 146:3-5, 10) Miduma ed saray totoon arari, si Jesu-Kristo, say sakey ya angimatalkan na Dios na inkaari, so agmet ompatey. (Roma 6:9; 1 Timoteo 6:15, 16) Nikasakey ed si Kristo ed mangatatawen iran trono et say 144,000 nin arum, saray matoor ya ariripen na Dios a nanlapud “amin a tribu tan pansasalita tan totoo tan nasyon.” Saraya, met, so naikdan na imortal a bilay. (Apocalipsis 5:9, 10; 1 Corinto 15:42-44, 53) Say baleg a bilang ed sikara so wala la ed katawenan, tan say nakdaan ed sikara so wala ni ed dalin a manibukel na “matoor tan makabat ya aripen” a klase, a sitotoor a mangilalaknab na saray intereses na satan a Panarian dia.​—Mateo 24:45-47.

8, 9. (a) Anton manangapag, mananeral ya impluensya so ekalen na Panarian? (b) Sirin, no paliisan tayo so pagmaliw a kabusol na Panarian na Dios, diad antoran organisasyon tan gawagawa so nepeg tayon paliisan?

⁸ Magano la natan, diad tinuro na Dios a panaon, say manamatey a puersa to so onkiwas a manlinis ed dalin. Deralen da ed ando lan ando iraman so totoon nisesengeg ed dili ran impanpili et agda kabat so Dios, ya impulisay da so pikakabat ed inkasoberano to, tan ipapasen dan tekep na panludlurey so maaron probisyon to ed panamegley nen Jesu-Kristo. (2 Tesalonica 1:6-9) Saya so diad agew nen Jehova, say abayag-inalagar a panaon diad kaalangon to bilang Sankatalbaan a Soberano.

⁹ Amin a palson relihyon, tan ontan met ed amin a gobierno na too tan saray armada ra, a sikara so pakikiwasen na agnanengneng a marelmeng a manuley na sayan mundo, so naderal ed ando lan ando. Amin a mangibibiig na inkasikara a bilang kabiangan na mundo diad panutumbok ed masiblet, masaol, imoral a dalan na bilay so napegpeg ed patey. Si Satanas tan saray demonyos to so naekal a manlapud pidedeneng ed saray manaayam ed dalin. Sikara so nipangaw ed sanlibon taon. Agaylan saya so pakainawaan ed amin a manangaro na inkatunong!​—Apocalipsis 18:21, 24; 19:11-16, 19-21; 20:1, 2.

Saray Getma To​—No Panon ya Agegemtan

10. (a) Panon a say Mesianicon Panarian so manumpal ed gagala nen Jehova diad dalin a mismo? (b) Anto so kabaliksan na saya ed totoon manbibilay diad dalin ed satan?

¹⁰ Sayan Mesianicon Panarian so sigpot a manumpal ed orihinal a gagala na Dios ed dalin. (Genesis 2:8, 9, 15; 1:28) Anggad sayan agew, say too so sinmaew a mangitarok ed satan a gagala. Anggaman kuan, “say onsabin panayaman a dalin” so nisilong ed Anak na too, si Jesu-Kristo. Amin a makaliktar ed panangidapo na panangukom nen Jehova ed sayan daan a sistema so mankimey a mankakasakey ed leksab nen Kristo a bilang Ari, a sililiket a manggawa ed antokaman ya idirihe to pian say dalin so magmaliw a sankagloboan a Paraiso. (Hebreos 2:5-9) Amin a totoo so manggayaga ed kimey na lima ra tan mangunggunan sigpot ed inkadaakan na bunga na dalin.​—Salmo 72:1, 7, 8, 16-19; ipareng so Isaias 65:21, 22.

11. (a) Panon so kitarok na inkayadyari ed kanonotan tan laman diad saray uuleyan na Panarian? (b) Anto so isakup na saya?

¹¹ Sanen apalsa si Adan tan Eva sikara so ayadyari, tan gagala na Dios ed dalin a napano ed saray ilalak da, ya amin da so manggayaga ed inkayadyari diad kanonotan tan laman. Diad silong na uley na Panarian, satan a gagala so onsabi ed maglorian kapetegan. Saya so mankakaukolan na kaekal na amin ya epekto na kasalanan, tan diad satan et si Kristo so aglabat manserbi a bilang Ari noagta ontan met ya Atagey a Saserdote. Siaanos a tulongan toray matulok ya uuleyan diad pangungguna ed mananakbong-kasalanan a bili na bagat na dilin atooan a bilay to. Saray bulag so makanengneng la. Saray telek so makadngel la. Saray laman a kinmumanet ed inkatatken odino sakit so magmaliw a tartariwa nen say sakey ya ugaw. Saray kakapuyan so nasandian la na kabunigasan. Say agew so onsabi sano anggapo so mangibaga na, “Siak so mansasakit,” lapud saray matakot-ed-Dios a totoo so nalukpos la diad daget na kasalanan tan diad saray makapaermen ya epekto to.​—Ipareng so Isaias 33:22, 24; 35:5, 6; Job 33:25; Lucas 13:11-13.

12. (a) Anto ni so nakakaukolan na atooan ya inkayadyari? (b) Panon so pakagegemtan ed satan, tan anto so pansumpalan a manlapud satan?

¹² Diad pakagamor na inkayadyari, anggaman kuan, so manasaglawi na mas nen say pakawalaan na mabunigas a laman tan mabunigas a nonot. Isasakup to so manepeg a panangisindag ed kalidad na personalidad nen Jehova, lapud say too so agawa ed ‘indengan na Dios, unong ed nengneng to.’ (Genesis 1:26) Diad satan, nakaukolan so malaem ya edukasyon. Saya so sakey a Balon Oksuy a “panayaman na inkatunong,” a singa impasakbay nen propeta Isaias, “say matunong so peteg a naaralan na saray manaayam ed mabungan dalin.” (2 Pedro 3:13; Isaias 26:9) Sayan kalidad so mangitonton ed kareenan​—diad baetan na totoo ed amin a nasyones, diad limog na saray maapit a kalimog, diad pamilya tan, manuna ed amin, diad Dios a mismo. (Isaias 32:17; Salmo 85:10-13) Saraman so manaral na inkatunong so progresibon nabangatan ed linawa na Dios ed sikara. Unong a say aro ed dalan nen Jehova so nilamulamut ed kapusoan da, saraya so tumboken da ed amin a nengneng na bilay da. Say ayadyarin toon si Jesus so makayarin mangikuan, ‘Gawaen kon naynay iray bengatlan makapaliket ed si Amak.’ (Juan 8:29) Agaylan magayagan bilay itan sano satan so tua ed amin a totoo!

Saray Agawaan So Mapatnag La

13. Usaren iray tepet ed tagey a pangipabitar ed saray agawgawaan na Panarian tan no anto komon sirin so nepeg a gagawaen tayo.

¹³ Saray makapasagyat ya agawaan la na Panarian so mabitar ed totoon walaan na mata na pananisia. Saray onggendan a tepet tan insitan Kasulatan so mangipanonot ed sikayo na arum ed saraya, tan ontan met ed saray bengatlan nayarian tan nepeg a gawaen natan na saray amin ya uuleyan na Panarian:

Sumpad siopa so ununan kiwasan na Ari, tan diad anton pansumpalan? (Apocalipsis 12:7-10, 12)

Say panipon ed unor a membro na anton grupo so naikdan na aliston imano kayari na inkitrono nen Kristo? (Mateo 24:31; Apocalipsis 7:1-4)

Diad Mateo 25:31-33, anton arum a kimey so impasakbay nen Jesus a gawaen to kayari na iyurong to ed trono to tan sakbay na paneral to ed marelmeng?

Panon so kagagawa na sayan kimey? Sioparay mibibiang ed satan? (Mateo 24:14; Salmo 110:3; Apocalipsis 14:6, 7)

Akin a saray sumusumpan pulitika tan relihyon so agmakayarin mamatunda ed satan? (Gawa 5:38, 39; Zacarias 4:6)

Bilang nansumpalan na edukasyonal a kimey a nagagawa, antoran panamasimbalo so nagagawa la ed bilay na totoon onsusuko ed uley na Panarian? (Isaias 2:4; 1 Corinto 6:9-11)

Magnayon a Kalidad na Panarian

14. (a) Panon kabayag so panuley nen Kristo? (b) Anto so nagawa legan na satan a panaon?

¹⁴ Kayari na kimedmer nen Satanas tan saray demonyos to ed kaaralman, si Jesu-Kristo a dingan na saray 144,000 a kaiba ton mananawir so manuley ed sanlibon taon. (Apocalipsis 20:6) Legan na satan a panaon say katooan so nitarok ed inkayadyari. Amin a gobierno tan pakauley tan pakayari ya onsusumpa ed si Jehova so naekal. Diad kagawa na satan, si Jesus so mangiyawat ed Panarian ya ipawil ed si Ama to, “pian say Dios komon so wala ed amin a bengatla ed balang sakey.”​—1 Corinto 15:24, 28.

15. Panon a tua a sayan Panarian so ‘agbalot naderal’?

¹⁵ Say dilin posisyon nen Jesus nipaakar ed dalin so sirin manguman. Anggaman kuan, say pananguley to so “andi-anggaan” tan say Panarian to “so agnaderal.” (Daniel 7:14) Diad anton pantalos? A say pananguley so agniiter ed lima na arum a walaan na miduman gagala. Saray agawaan na Panarian so ‘agbalot naderal.’ Say gawaen na Panarian a pangalangon ed ngaran nen Jehova tan say gagala to nipaakar ed sayan dalin so ontalindeg ed ando lan ando.

[Paimano ed Leksab]

Repason Diskusyon

● Akin a say Panarian na Dios so alenleneg a solusyon ed saray problema na totoo? Kapigan so inggapo na uley to?

● Anto so nikaduman makapasagyat ed sikayo nipaakar ed Panarian na Dios tan anto so gawaen to? Akin?

● Anton agawaan na Panarian so nanenengneng tayo la? Anton kabiangan so wala ed sikatayo diad saraya?