Kapitulo 14

‘Manggawa Ak na Sakey a Sipanan ed Sikayo Nipaakar ed Sakey a Panarian’

4. (a) Kapigan so inkalanaan na saray inmunan babangatan nen Jesus na masanton espiritu? (b) Anto so mangipanengneng a say imano so nipaarap nanlapulad saman diad katipon na saray mananawir na Panarian?

⁴ Diad Pentecostes nen 33 K.P. say inmuna ed sikara so alanaan na masanton espiritu. (Gawa 2:1-4; 2 Corinto 1:21, 22) Say probisyon na Dios ed kilalaban a mangipaarap ed imortal a bilay ed tawen so nipakabat. Inusar nen Pedro “iray tombok na panarian na katawenan” diad pangilukas ed sayan pikakabat​—ununa diad saray Judios, ontumbok ed saray Samaritanos, tan insan diad saray totoo na Hentil a nasyones. (Mateo 16:19) Niiter so nikaduman imano diad panibukel ed gobierno a manguley ed katooan diad 1,000 taon, tan ngalngalin amin na saray apuyanan a sulat ed Kristianon Griegon Kasulatan so manunan nipaarap ed sayan grupo na mananawir ed Panarian​—“saray sasantos,” “mibibiang ed mangatatawen a tawag.”a

5. Kasin say inkatawag da ed mangatatawen a bilay so lapud sikara so magmaong ya ariripen na Dios nen saraman so nambilay ya akauna?

⁵ Say inkatawag da ed mangatatawen a bilay so aliwan lapud sikara so magmaong nen say amin nin ariripen na Dios sakbay na Pentecostes nen 33 K.P. (Mateo 11:11) Noag ingen, ginapoan nen Jehova natan a pilien iraman so magmaliw a kaiba nen Jesu-Kristo a manuley. Diad 19 siglos kayari na saya et wala lambengat so sakey a tawag, say mangatatawen. Saman so agkanepegan a panangasin impabtang na Dios ed limitadon bilang diad pangilaknab na dilin makabat tan maaron gagala to.​—Efeso 2:8-10.

6. Akin a say panaon so nepeg ya onsabi sano manampot so mangatatawen a tawag? (b) Siopa so mangidirihe ed pamaakaran ta pian say propesiya nipaakar ed “baleg ya ulop” so nasumpal met, tan anto so peteg ya agawa?

⁶ Asabi panaon say nibagan limitadon bilang a 144,000 so napano. Say unor a katatakan na sarayan espiritual ya Israelitas a naaprobaan so asingger la. (Apocalipsis 7:1-8) Insan si Jehova, diad panamegley na espiritu to tan pakatalos ed Salita to a ginawa ton posibli ed nanengneng a muyongan to, so mangidirihe ed saray pamaakaran ta pian nasumpal so sananey a kabiangan na gagala to, a singa adeskribe ed Apocalipsis 7:9-17. Natipon so “baleg ya ulop” a nanlapud amin a nasyones, dingan na magayagan ilalo na pakaliktar ed baleg a kairapan tan diad pambilay na ando lan ando ed inkayadyari diad utel na mangaraldalin a Paraiso. Sano imanoen tayo so peteg ya agawa, singa mapatnag a say mangatatawen a tawag ed inkalapagan so akumpleto la ed samay ngalngalin taon 1935 K.P. sanen say mangaraldalin ya ilalo na “baleg ya ulop” so malinlinew ya atalosan. Nanlapulad saman et nitarok ed pikakasakey diad saray pigaran nilibon nakekeraan na mangatatawen a klase so minilmilyon a managdayew ed si Jehova a sikara so magunaet a maniilalo diad pambilay na ando lan ando dian mismo ed dalin.

7. Kasin posibli ya anggan natan et walaray arum a mangawat na mangatatawen a tawag, tan akin ya ontan so ebat yo?

⁷ Kasin kabaliksan na saya ya anggapo la natan so tatawagen na Dios a para ed mangatatawen a bilay? Anggad say unor a panagtatak so nagawa, nayarin pigara ed saraman so walaan na ontan ya ilalo so magmaliw ya aliwan matoor, tan saray arum so nakaukolan a napilin onsandi ed pasen da. Balet singa makatunongan a saya so mataltalag a nagawa.

Espiritual ya Anak​—Panon So Pikabat Da?

8. Anton paliwawa so inter nen Pablo a mangipapanengneng no panon a saraman so nailalak ed masanton espiritu so sikakabat ed satan a katuaan?

⁸ Say espiritu na Dios so mangiter na positibon paseguro ed katagibi bilang espiritual iran anak diad saray abautismoan a Kristianos ya angawat na mangatatawen a tawag. Saya so impanengneng nen apostol Pablo sanen nansulat ed “saray sasantos” ed Roma, a dedeskribien to no anto so kipapasen na amin a tuan Kristianos ed saman a panaon. Inkuanto: “Amin so intonton na espiritu na Dios, saraya so anak na Dios. Ta agyo inawat so sakey ya espiritu na inkaaripen a pansengegan na takot lamet, noagta inawat yo so sakey ya espiritu na inkatagibi bilang ananak, a diad satan ya espiritu et ikelyaw tayo: ‘Abba, Ama!’ Say espiritun mismo so mangitarok na pantasi ed espiritu tayo a sikatayoray anak na Dios. No, sirin, sikatayo so ananak, sikatayo met so mananawir: mananawir a peteg ed Dios, balet kaiban mananawir nen Kristo, daput no sikatayo so manirap a mankakasakey pian sikatayo komon so nigloria a mankakasakey.”​—Roma 1:7; 8:14-17.

9. Panon a ‘say espiritu a mismo so mantasi’ ed espiritu na saraman so tuan ananak na Dios?

⁹ Duaran usar na salitan “espiritu” so nitarok dia ed imano tayo: “say espiritu a mismo” tan “say espiritu tayo.” Say inmuna et say agnanengneng ya aktibon puersa na Dios. Ipaseseg to ed saray espiritual ya anak to so kumbiksion na impagmaliw dan tagibi bilang bulos ya ananak na Dios. Satan ya espiritu so mantasi met ed panamegley na apuyanan a Salita na Dios, say Biblia, a singa sakey a personal a sulat ed saray espiritual ya ananak to. (1 Pedro 1:10-12) Sano saraman so nailalak ed masanton espiritu so mamasa ed ibabaga na Kasulatan ed saraman so espiritual ya anak na Dios, sikara so manepeg ya onebat: ‘Satan so onaplika ed siak.’ Sirin say dilin aktibon puersa na Dios ed nanduruman dalan so mangitarok na pantasi ed espiritu ra, say manamakiwas a puersa na dilin kanonotan tan puso ra, a sikara so anak na Dios. Mitukoyan ed ipapatnag sirin na espiritu na Dios, saray kanonotan tan puso ra so magmaliw a niteen ed ilalo diad pagmaliw a kaiban mitatawir ed si Kristo, tan awaten daray responsabilidad na espiritual ya anak na Dios.​—Fil. 3:13, 14.

10. (a) Antoran katuaan so diad inkasikaran dili et agmananda ed sakey a bilang alanaan a Kristiano? (b) Anton panmoria so alaen na “arum a karnero” nipaakar ed pasen da diad gagala na Dios?

¹⁰ Kasin satan so tua ed sikayo? No ontan, walaan kayo na makapakelaw a pribilehyo. Anggaman kuan, lingo na anggan siopa so pangibaga a lapud say sakey a too so walaan na makdem ya apresasyon ed araddalem iran espiritual a bengatla odino maseseg ed lawak na ministeryo odino walaan na mabiskeg ya aro ed agagi to et sikato la sirin so alanaan-na-espiritun Kristiano. Saratan a mismon bengatla so inyugali na dakel iran wala ed “arum a karnero.” Saray kapusoan da, met, so pinakiwas na nababasa ra ed Kasulatan nipaakar ed saray kaiban mitatawir nen Kristo, balet agda tatagamen ed inkasikara so bengatlan ag-inggana na Dios ed sikara. (Ipareng so Numeros 16:1-40.) Bidbiren da so orihinal a gagala na Dios ed dalin tan mankimey iran sipapabli diad pibibiang ed satan.

Pibibiang a Makana

11. Siopa so onatendi ed tinaon a selebrasyon na impatey nen Jesus, tan akin?

¹¹ Kada taon, ed Nisan 14, kaselek na agew, saray alanaan a patumbok nen Jesu-Kristo ed amin a pasen na dalin so manselebra ed impatey to, a mitukoyan ed saray bilin ya inter to ed saray apostoles to. (Lucas 22:19, 20) Say “arum a karnero” so onatendi met, aliwan bilang mibibiang ed tinapay tan alak, noagta bilang magalang a manag-imaton.

12. Panon ya arum ed saray inmunan Kristianos ed Corinto so sinmaew a mangipanengneng na manepeg ya apresasyon ed Pangdem na Katawan?

¹² Saya so aliwan maapan relihyoson ritual noagta napno na mabiskeg a kabaliksan. Diad saray inmunan-siglon Kristianos ed Corinto, Gresya, arum ed sikara so sinmaew a mangipanengneng na manepeg a panamabli ed okasyon, insulat nen Pablo so seryoson simbawa, a kuanto: “Siopaman a mangan na tinapay odino oninum ed kopa na Katawan ya agmakana so mankasalanan nipaakar ed laman tan dala na Katawan.” Anto so nanggawa ed sikaran ‘agmakana’ a mibibiang? Sikara so agmanepeg a mangipaparaan na inkasikara ed puso tan nonot. Walaray inkaapag-apag ed kongregasyon. Arum met so nigalet ed tagano tan iinumen sakbay na miting. Impasen da so Pangdem na Katawan a ludlurey. Sikara so andi ed kondisyon a makatebek ed seryoson kabaliksan na tinapay tan say alak.​—1 Cor. 11:17-34.

13. Anto so kabaliksan na tinapay tan say alak a niseserbi ed Memoryal?

¹³ Anto so kakanaan na satan? Ag-onsaral ed anggan anton nibabagan mamilagron transpormasyon na tinapay tan alak. Si Kristo so agnibagat lamet ed anggan anton pantalos ed kada Memoryal. Ibabaga na Kasulatan a si “Kristo so niyapay ya aminsan ed amin a panaon a mangitarok ed kasalanan na dakel.” (Hebreos 9:28; 10:10; Roma 6:9) Say tipay na andi-lebaduran tinapay tan say ambalangan alak so emblema ra lambengat a mangirepresenta ed literal a laman ya imbaga nen Jesus tan say literal a dala to ya inkalbo to. Balet agaylan sarayan kapetegan so mabmabli! Say andi-kasalanan ya atooan a laman nen Jesus so niiter ta pian say mundo na katooan so nawalaan na pankanawnawan manbilay na ando lan ando. (Juan 6:51) Tan say naibung a dala to so manserbi ed nankaduan gagala​—kalinisan a manlapud kasalanan ed saraman so totoon mangagamil na pananisia ed satan, ontan met a pakurangen to so balon sipanan ed Dios tan say kongregasyon na espiritual ya Israel, a sikato so tinugyop na alanaan-ed-espiritun Kristianos. (1 Juan 1:7; 1 Corinto 11:25; Galacia 6:14-16) Sikato rayan mablin probisyon so nanggawan posibli ed saray membro na “melag a pulok” ya iyabawag na Dios a matunong, a peteg a walaan na atooan ya inkayadyarin nipabtang ed sikara. (Lucas 12:32) Saya so agawa ta pian sikara so ilalaken na masanton espiritu bilang ananak na Dios, tekep na panmoria na pibiang da ed si Kristo diad mangatatawen a Panarian to. Legan a sikara so mibibiang ed saray emblemas na Memoryal a kada taon, sirin itatarok da so pantasi ed mangatatawen ya ilalo ra, say apresasyon a wala ed “balon sipanan” a pinegleyan nen Kristo so napasimbalo tan napaaralem.​—Hebreos 8:6-12.

“Mila Kami ed Sikayon Totoo”

14. (a) Akin a say “arum a karnero” so agmibiang ed saray emblema ed Memoryal, balet anto so panggugunaetan dan iilaloan? (b) Panon so panmoria ra diad pililimog da ed nakdaan na mananawir ed Panarian?

¹⁴ Say “arum a karnero” so akatebek no panon so pililimog nen Jehova ed saray nilanaan to, tan sikara so akiulop ed sikara, a kuan da: “Mila kami ed sikayon totoo, lapud nadngelan mi a say Dios so wala ed sikayon totoo.” (Zacarias 8:20-23) Aliwa lambengat a sikara so mandaragup noagta sikara so mibiang a mankakasakey diad panangiyabawag ed maong a balita na Panarian ed amin a panaayaman a dalin. Anggaman kuan, say “arum a karnero” so agniloob ed “balon sipanan” ed espiritual ya Israel nisay sikara so nisakup ed “sipanan . . . nipaakar ed sakey a panarian” a ginawa nen Jesus ed saraman so pinilin mibiang ed mangatatawen a bilay a kaiba to, tan sirin, manepeg, sikara so agmibibiang ed saray emblema ed Memoryal. (Lucas 22:20, 29) Balet legan a say “balon sipanan” et nagegemtan to so gagala to, a tiponen iray unor a membro na “melag a pulok” ed mangatatawen a Panarian, say “arum a karnero” so makamoria a saya so mangipatnag a saray bendisyon a naawat da ed dalin diad panamegley na satan a Panarian so manasingger la. Ibilang dan pribilehyo, legan na “kaunoran iran agew,” so panserbin mikakasakey ed matoor a nakdaan na mananawir ed Panarian.

[Paimano ed Leksab]

Repason Diskusyon

● Akin a malaem ed Kristianon Griegon Kasulatan et ipapaarap to so imano ed mangatatawen ya ilalo?

● Panon so pikabat ed satan na saraman so nailalak bilang ananak na Dios? Anto so kabaliksan na saray emblema ed Memoryal a pibiangan da?

● Panon so pangipatnag na “arum a karnero” a sikara so tuan mikakasakey ed “melag a pulok”?