Kapitulo 15

Panon so Pangididirihe nen Jehova ed Muyongan To?

1. Anton impormasyon nipaakar ed muyongan nen Jehova so ipaparungtal na Biblia, tan akin a satan so importante ed sikatayo?

DIAD panamegley na apuyanan a Kasulatan, impasilip nen Jehova ed sikatayo so makapakelaw a mangatatawen a muyongan to. (Isaias 6:2, 3; Ezequiel 1:1, 4-28; Daniel 7:9, 10, 13, 14) Anggaman agtayo nanengneng iray espiritun pinalsa, sikatayo so paliliingen to ed saray dalan a pangaapektaan na kimey na saray masanton angheles ed saray tuan managdayew ed dalin. (Genesis 28:12, 13; 2 Arari 6:15-17; Salmo 34:7; Mateo 13:41, 42; 25:31, 32) Dedeskribien met na Biblia so nanengneng a kabiangan na muyongan nen Jehova tan tulongan to itayon mantalos ed no panon so pangididirihe to ed satan. No tuan walaan itayo na espiritual a pakatebek ed sarayan bengatla, saya so ontulong ed sikatayon “manakar a makanakana ed si Jehova ya anggad nagnap a pakapaliket ed sikato.”​—Colosas 1:9, 10.

Panamidbir ed Nanengneng a Kabiangan

2. Nanlapulad Pentecostes nen 33 K.P. anto so kongregasyon na Dios?

² Diad 1,545 taon say nasyon na Israel so kongregasyon na Dios. Balet ta sikara so sinmaew ya anumpal ed Ganggan na sipanan tan impulisay da so dilin Anak na Dios. Sirin, intarok nen Jehova ed kiwawala so sakey a balon kongregasyon, a dian satan et nanggawa na sakey a balon sipanan. Sayan kongregasyon so abidbir ed Kasulatan a bilang say “nobya” nen Kristo, a tinugyop na 144,000 a pinili na Dios a mikasakey ed Anak to diad tawen. (Efeso 5:22-32; Apocalipsis 14:1; 21:9, 10) Saray inmuna so alanaan na masanton espiritu diad samay panaon na Pentecostes, 33 K.P. Diad panamegley na masanton espiritu et inter nen Jehova so agnalingon ebidensya a saya natan so kongregasyon ya usaren to diad panumpal ed gagala to.​—Hebreos 2:2-4.

3. Siopa natan so manitibukel na nanengneng a muyongan nen Jehova?

³ Natan et wala lambengat so nakdaan na 144,000 a wadia ed dalin. Balet, diad kasumpalan na propesiya na Biblia, sakey a baleg ya ulop na “arum a karnero” so nitarok ed aktibon pililimog ed sikara. Si Jesu-Kristo, say Maabig a Pastol, so angikasakey ed sarayan “arum a karnero” ed saraman so nakdaan na nailalak-ed-espiritun patumbok to ta pian tibukelen da so “sakey a pulok” ed leksab to bilang “sakey a pastol” da. (Juan 10:11, 16; Apocalipsis 7:9, 10) Sarayan amin so manibukel na nankakasakey a muyongan, say nanengneng a muyongan nen Jehova natan.

Teokratiko ed Inkatibukel

4. Siopa so mangididirihe ed muyongan, tan panon?

⁴ Say Makasulatan a balikas a “kongregasyon na mabilay a Dios” so mangipatnag no siopa so mangididirihe ed satan. Say muyongan so teokratiko, odino inuleyan-na-Dios. Itatarya nen Jehova so panangidirihe ed totoo to diad panamegley na sakey a tinuro to ya agnanengneng ya ulo na kongregasyon, say Katawan a Jesu-Kristo, tan diad panamegley na dilin Salita To, say Biblia.​—1 Timoteo 3:14, 15; Efeso 1:22, 23; 2 Timoteo 3:16, 17.

5. (a) Panon so inkipatnag na mangatatawen a panangidirihe ed kongregasyon nen inmunan siglo? (b) Anto so mangipanengneng a si Jesus so siansia nin ulo na kongregasyon?

⁵ Say ontan a teokratikon panangiwanwan so sankapatnagan sanen saray inmunan membro na kongregasyon so pinakiwas na masanton espiritu nen Pentecostes nen 33 K.P. (Gawa 2:1-4, 32, 33) Nipatnag sanen say anghel nen Jehova so angidirihe ed saray agawgawa ya angitonton ed inkikayat na maong a balita ed Africa. (Gawa 8:26-39) Ontan met, sanen say boses nen Jesus so angiter na panangiwanwan diad inkakumberte nen Saulo na Tarsus tan lamet sanen nigapo so misioneron kimey ed limog na saray Hentiles. (Gawa 9:3-7, 10-17; 10:9-16, 19-23; 11:12) Ingen say nakakaukolan a panangidirihe so agnaynay a nitarya ed ontan iran nikadkaduman dalan. Asabi panaon ya anggapo laray boses a narengel a manlapud tawen, anggapo laray angheles a pinmatnag ed totoo tan anggapo laray mamilagron langkap na espiritu. Ingen insipan nen Jesus ed saray matoor a patumbok to: “Nia! Siak so wala ed sikayo ed amin na saray agew ya anggad kasampotan na sistema na bengabengatla,” tan saray katuaan so mangipanengneng a sikato so wala ed sikara. (Mateo 28:20; 1 Corinto 13:8) Aliwa lambengat a saray Tasi nen Jehova so mamibidbir ed inkaulo to, noagta mapatnag ya imposibli komon ed sikara so pantultuloy a pangiyabawag ed mensahe na Panarian diad arap na mabiskeg a panagbusol no anggapo so tulong to.

6. (a) Siopa so manitibukel na “matoor tan makabat ya aripen,” tan akin? (b) Anton kimey so inter to ed satan ya “aripen”?

⁶ Sakbay a tuloy na impatey to imbaga nen Jesus ed saray babangatan to so nipaakar ed “matoor tan makabat ya aripen” a pangimatalkan to bilang Katawan na nikaduman responsabilidad. Satan ya “aripen,” unong ed uker nen Jesus, so akaparaan sano say Katawan so onla la ed tawen tan siansia nin mabilay diad panaon na ipawil nen Kristo. Say ontan a salaysay so agnayarin onkabi ed sakey a too. Noagta onkabi ed matoor ya alanaan a kongregasyon nen Kristo bilang intero. Kabat nen Jesus a sikato so manaliw ed sikara diad dilin dala to, kanian sikara so manepeg a tinukoy ton atugyop bilang “aripen” to. Inikdan tora na kimey a gawaen. ginanggan toran amin a manggawa na babangatan tan insan mantultuloy a mamakan ed saraya diad espiritual, a parungoan da ra na “tagano [espiritual] ra ed manepeg a panaon.” Say inkaturo ra so pinekderan na masanton espiritu nen Pentecostes na 33 K.P.​—Mateo 24:45-47; 28:19, 20; 1 Corinto 6:19, 20; ipareng so Isaias 43:10.

7. (a) Anton apalaknab iran responsabilidad so wala ed “aripen” natan? (b) Akin a say ikiwas tayo ed bilin diad panamegley na sayan paralanan so importante?

⁷ Diad ipawil na Katawan, no say “aripen” so sitotoor a manggagawa ed kimey to, sikato so pangimatalkan na apabaleg iran responsabilidad. Saray taon a tinmumbok so panaon na sankagloboan a pantasi ed Panarian, tan say “baleg ya ulop” na managdayew ed si Jehova so natipon diad panilalo ed kiliktar da ed “baleg a kairapan.” (Mateo 24:14; Apocalipsis 7:9, 10) Saraya, met, so mankaukolan na espiritual a tagano, tan iparungo ed sikara na atugyop ya “aripen,” saray alanaan-na-espiritun ariripen nen Kristo. Pian napaliket si Jehova, nakaukolan tayon awaten so bilin ya itarya to ed panamegley na sayan paralanan tan onkiwas diad sigpot a pitunosan ed satan.

8, 9. (a) Nen inmunan siglo anton areglo so wala diad impanresolbe ed saray problema nipaakar ed doktrina tan say impangiter na nakaukolan a panangidirihe no nipaakar ed panangipulong ed maong a balita? (b) Anton miulibay ya oksuyan so wala natan?

⁸ No maminsan, siempre, nayarin onlesa so tepetepet nipaakar doktrina tan oksuyan. Anto sirin? Say koma-15 kapitulo na Gawa so mangibabaga no panon so inkaresolbe na sakey a salisalan nipaakar ed nakakaukolan ed saray akumbertin Hentil. Saman so impanon ed saray apostoles tan mamatatken a lalaki ed Jerusalem, a nanserbin bilang sentron mananguley ya ulop. Saraman a mamatatken a lalaki so aliwan agnalingo; sikara so aliwan totoon agbalot akagawa na lingo. (Ipareng so Galacia 2:11-14.) Balet sikara so inusar na Dios. Sinalaysay da so ibabaga na apuyanan a Kasulatan diad tema a wala ed saman tan ontan met ed ebidensya na ikikiwas na masanton espiritu diad impangilukas ed lawak na Hentil, tan insan inter da so sakey a desisyon. Saman ya oksuyan so benindisyonan na Dios. (Gawa 15:1-29; 16:4, 5) Manlapud saman a sentron ulop, saray sinansakey so nibaki met a mangilaknab diad panangipulong ed maong a balita a mitukoyan ed saman so ingganggan na Katawan a mismo.​—Gawa 8:14; Galacia 2:9.

⁹ Diad agew tayo say Mananguley ya Ulop so tinibukel na saray alanaan-na-espiritun agagi a nanlapud nanduruman daldalin. Sikato so nipasen ed sankamundoan a hedkuarter na saray Tasi nen Jehova. Sitotoor a palalaknaben da so intereses na puron panagdayew diad leksab na inkaulo nen Jesu-Kristo. Sarayan agagi so walaan na parehon punto de bista nen apostol Pablo, a, sanen angipawit na espiritual a simbawa ed saray kaparan Kristianos, et insulat to: “Aliwan lapud sikami so kakatawan na pananisia yo, noagta sikami so kaiban komikimey nipaakar ed gayaga yo, ta diad panamegley na pananisia yo et sikayo so manalalagey.”​—2 Corinto 1:24.

10. (a) Panon so pakadetermina no siopa so magmaliw iran mamatatken odino ministeryal ya ariripen? (b) Akin a sikatayo so nepeg a mikooperan maapit ed saraman so aturo ed ontan iran posisyon?

¹⁰ Sayan teokratikon oksuyan so binidbir na saray Tasi nen Jehova ed sankamundoan. Amin na saray lokal a kongregasyon da so mikikimey diad maapit a pitutunosan ed satan. Onnenengneng ira ed Mananguley ya Ulop a mangitarya na pananuro ed saray mamatatken tan ministeryal ya ariripen a mangasikaso ed maabig a kurang na saray kongregasyon. Diad anton letnegan so inkapili na totoo ed ontan ya inkaturo? Saray nakakaukolan so malinlinew a nidatak ed Biblia. Namparan saray mamatatken a manggawa ed saray rekomendasyon tan saraman so inutorisaan a manggawa ed pananuro so mamasakbay na seryoson responsabilidad ed arap na Dios a manumbok ed saraya. (1 Timoteo 3:1-10, 12, 13; 5:22; Tito 1:5-9) Anggapo so eleksion ed limog na saray membro na kongregasyon nisay wala so anggan anton panagboto na kongregasyon. Imbes, diad pitukoyan ed saman so ginawa na apostoles sanen agawa so pananuro nen inmunan siglo, saratan a manangasikason responsabli ed panangirekomenda, tan saraman so diad kaunoran et manggawa na pananuro, so angiyapay na pikakasi diad tulong na espiritu na Dios tan anapen so panangiwanwan a manlapud apuyanan a Salita to. (Gawa 6:2-4, 6; 14:23; ipareng so Salmo 75:6, 7.) Diad ikiwas tayo ed panangidirihe ya iter na saray mamatatken, nayarian tayon ipanengneng so apresasyon tayo ed maaron probisyon nen Kristo ed sarayan “langkap ed lalaki” ya ontulong ed sikatayon amin diad pakarateng ed “inkasaksakey ed pananisia.”​—Efeso 4:8, 11-16.

11. (a) Antoran mablin serbisyo so gagawaen na saray bibii ed dalem na teokratikon areglo? (b) Kapigan a nakaukolan da so pampandong, tan akin?

¹¹ Ididirihe na Kasulatan a saray posisyon na panangasikaso ed kongregasyon so imatonan na lalaki. Saya so agbalot mangipaabeba ed saray bibii, lapud dakel ed sikara so nisakup ed limog na saray mananawir ed mangatatawen a Panarian. Diad pagmaliw a mauyamo, masimpit ed ugali tan maseseg diad panangasikaso ed pamilya ra, saray Kristianon bibii met so ontutulong diad maabig a pakatongtongan ed kongregasyon. (Tito 2:3-5) Mabetbet a malaem so gagawaen da diad kimey na panag-anap ed balobalon interesadon totoo tan itatarok da ran mikasakey ed muyongan. (Salmos 68:11) Balet say panagbangat ed dalem na kongregasyon so imatonan na saray lalakin aturo. (1 Timoteo 2:12, 13) Tan no anggapo so kualipikadon lalaki ed sakey a miting ya inyuksoy na kongregasyon, sirin say sakey a bii so manpandong sano mangipangulo odino manpikasi.a Sirin ipapanengneng to so respeto ed oksuyan nen Jehova, anggan singa intilak nen Jesus ya ehemplo ed amin diad katutulok ed Ama to.​—1 Corinto 11:3-16; Juan 8:28, 29.

12. (a) Anton panmoria so ipapasen na Biblia ed saray mamatatken ya alaen diad posisyon da? (b) Diad anton marlang a pribilehyo so nayarin pibiangan tayon amin?

¹² Diad mundo say sakey a mamebemben na prominentin posisyon so impasen ya importante, balet diad dalem na muyongan na Dios say totontonen so: “Siopaman a mangikiwas na inkasikato a memelag ed limog yon amin so sakey a baleg.” (Lucas 9:46-48; 22:24-26) Kanian sisimbawaen na Kasulatan iray mamatatken a manalwar ya ag-ira pakakatawan ed saraman so tawir na Dios noag, ingen, magmaliw ya ehemplo na pulok. (1 Pedro 5:2, 3) Aliwan diad pigaran pinili lambengat, noagta ed amin a Tasi nen Jehova, laki tan bii, so walaan na sankarlangan a pribilehyo na panangilaman ed Soberano na talba, a sipapaabeban mansalita ed ngaran to tan mangibaga ed totoo ed anggan iner a pasen nipaakar ed Panarian to.

13. Diad pangusar ed nisita ran kasulatan, singbaten iray tepet a nilista ed sampot na sayan parapo.

¹³ Maabig ya itepet tayo ed inkasikatayo: “Kasin tuan papablien tayo no panon so pangididirihe nen Jehova ed nanengneng a muyongan to? Kasin saray awawey tayo, panagsalita tan kiwas so mangisisindag ed satan?” Say pankatunongan ed onggendan iran punto so ontulong ed balang sakey ed sikatayo a manggawa na ontan a panangusisa:

No tuan onsusuko itayo ed si Kristo bilang ulo na kongregasyon, sirin, a singa nipanengneng ed onggendan iran kasulatan, anto komon so gagawaen tayo? (Mateo 24:14; 28:19, 20; Lucas 21:34-36; Juan 13:34, 35)

Diad sagpot dan magmaliw a mabungan Kristianos, diad anton kalaknab so liknaen na amin a kabiangan na muyongan a mandepende ed Dios tan ed si Kristo? (Juan 15:5; 1 Corinto 3:5-7)

Sano salien na mamatatken ya iyarunsa so panag-isip na totoo ta pian moriaen daray bengatlan mitukoyan ed amin diad muyongan, siopan sipapangasin panangimano so nepeg a panebekan tayo ed saya? (Efeso 4:7, 8, 11-13; 2 Corinto 13:11)

Sano sipapablin awaten so espiritual a probisyon ya onsabi ed panamegley na “aripen” a klase tan say Mananguley ya Ulop to, para ed siopa so pangipapanengnengan tayo na respeto? Balet anto no sikatayo so mansalita na panagmudmora ed saraya? (Lucas 10:16; ipareng so 3 Juan 9, 10.)

Akin ya agtayo nepeg so mansalitan sipapasang diad pambalaw ed saray aturon mamatatken? (Gawa 20:28; Roma 12:10)

¹⁴ Sikato so diad panamegley na nanengneng a muyongan to ed leksab nen Kristo bilang aturon ulo a si Jehova so midedeneng ed sikatayo natan. Sirin say awawey tayo ed sayan muyongan so mangipatnag ed praktikal a dalan na talindeg ya alaen tayo diad salisalan na inkasoberano. (Hebreos 13:17) Ipapakasalanan nen Satanas ya amin tayo so pakikiwasen na pilalek ed personal a gungguna, a say manunan imano tayo et say inkasikatayon dili. Balet no sikatayo so sililiket a mangipalugar na inkasikatayo a manlingkor ed anggan anton dalan a nakaukolan, legan a papaliisan tayo so pansalita tan panggawa ed saray bengatlan manawag na agmanepeg ya imano ed inkasikatayo, papaneknekan tayo a say Diablo so matila. No inaro tan papagalangan tayo iraman so ‘mangipapangulo’ ed limog tayo, ya aligen so pananisia ra diad pangipulisay ed nengneng na toon ‘mandadayew ed saray personalidad ed dilin pankaabigan to,’ itatarok tayo so gayaga ed puso nen Jehova. (Hebreos 13:7; Judas 16) Diad pamayubo na mabunigas a respeto ed muyongan nen Jehova tan sigpot-puson panggawa ed kimey ya ididirihe to, iiter tayo so ebidensya a si Jehova so peteg a Dios tayo tan sikatayo so nankakasakey diad panagdayew ed sikato.​—1 Corinto 15:58.

[Paimano ed Leksab]

Repason Diskusyon

● Anto so nanengneng a muyongan nen Jehova natan? Anto so gagala to?

● Siopa so aturon ulo na kongregasyon? Diad panamegley na anton nanengneng iran areglo so pangitatarya to na maaron panangidirihe ed sikatayo?

● Anton mabunigas iran awawey ed responsabilidad tan totoo ed muyongan so nepeg tayon bayuboan?

14. (a) Diad awawey tayo ed teokratikon muyongan, anto so ipapanengneng tayo? (b) Diad sayan pamaakaran, antoran pankanawnawa so wala a para ed sikatayo diad pamaneknek a say Diablo so matila tan mangitarok na gayaga ed puso nen Jehova?